1. Yehova afwelelesa vyuma muka vatu vaze navapihilila nakwalumuka?

 NUMBA TUHU Yehova apwa Tengi, Muka-Kutuhana Jishimbi, kaha nawa Muka-kutuyula, oloze apwa nawa Setu wamwilu wazangi. (Samu 100:3; Isa. 33:22) Kachi nge tunapihilila nakwalumuka hashili tunalingi, Yehova afwila kutukonekela mwomwo akwechi ngolo jakulinga ngocho. (Samu 86:5) Yehova atufwelelesa kuhichila muli kapolofweto Isaya ngwenyi: “Numba tuhu jishili jenu jinapu nge ulombo uchila, oloze najitoma to nge lihina litoma.”—Isa. 1:18.

2. Vyuma muka twatela kulinga nge tuli nakusaka kupwa nausoko wamwaza navakwetu?

² Tuvosena tweji kuhanjikanga nakulinga vyuma vize navivwisa vakwetu kupihya mwomwo katwakupukako. (Yako. 3:2) Chipwe ngocho, echi kachalumbununa nge katweshi kuhasa kupwa nausoko wamwaza navakikoko. Mwomwo nge natuvakonekela, kaha natupwa nausoko wamwaza navakiko. (Vishi. 17:9; 19:11; Mateu 18:21, 22) Yehova asaka tukonekelenga vakwetu kachi nge vanahanjika chipwe kulinga vyuma vimwe vize vinatwivwisa kupihya. (Kolo. 3:13) Chapwa chamwaza kukonekelanga vakwetu, mwomwo Yehova atukonekelele “namuchima wosena.”—Isa. 55:7.

3. Vyuma muka natushimutwila muchihande chino?

³ Muchihande chino, natushimutwila omwo vatu vakuhona kukupuka vanahase kulondezeza Yehova nakukonekela vakwavo. Jishili muka jize twatela kulweza vakulwane muchikungulwilo? Mwomwo ika Yehova asakila tukonekelenga vakwetu? Vyuma muka natulinangula kuli vandumbwetu vamwe vaze vanamono  ukalu mwomwo yakuvalinga mwamupi kuli vakwavo?

4. (a) Uno chuma muka atela kulinga ngamba yaYehova nge nalingi shili yayinene? (b) Mulimo muka vatwama nawo vakulwane nge vali nakushimutwila namutu uze nalingi shili?

⁴ Nge mutu nalingi shili yayinene twatela kulweza vakulwane muchikungulwilo. Vyakutalilaho vimwe vyajishili kaneji jajinene vavisoneka hali Wavaka-Kolinde 1, 6:9, 10. Shili yayinene yapwa kuhokola jishimbi jaKalunga. Nge muka-Kulishitu nalingi shili kana, atela kulomba kuli Yehova Kalunga nakulweza vakulwane vachikungulwilo. (Samu 32:5; Yako. 5:14) Mulimo muka vatwama nawo vakulwane? Yehova kaha ikiye atwama nangolo jakukonekela vatu vaze vanalingi shili, kaha eji kulinganga ngocho kuhichila mundando yakusokola. b Chipwe ngocho, Yehova ahana vakulwane mulimo wakukekesa Visoneka vamone numba nge mutu uze nalingi shili atela kupwa lika muchikungulwilo nyi chiku. (Koli. 1, 5:12) Kaha chuma chikwavo veji kulinganga shina kulihulisa vihula vyakufwana nge: Uno mutu kana alinganga shili chakuchisakula kumuchima wenyi tahi? Uno mutu kana aswekelanga vakwavo shili kana tahi? Kutala nalinginga shili kana halwola lwalusuku tahi? Chachilemunyi, veji kulihulisanga ngwavo, kutala mutu kana napihilila nakwalumuka tahi? Uno kuli unjiho wakusolola chikupu nge Yehova namukonekela tahi?—Vili. 3:19.

5. Uno mulimo veji kuzatanga vakulwane weji kunehanga nganyo muka?

⁵ Omu vakulwane veji kusopesanga mutu uze nalingi shili, veji kufwilanga kukasa vyuma ngana muze vanakase lyehi mwilu. (Mateu 18:18) Uno kulinga chuma kana cheji kunganyalisanga ngachilihi chikungulwilo? Kufumisa mutu uze nahono kupihilila nakwalumuka muchikungulwilo, cheji kukinganga mikoko jaYehova kuchina navavahungumwisa kumutu kana. (Koli. 1, 5:6, 7, 11-13; Chitu. 3:10, 11) Cheji kukafwanga nawa mutu uze nalingi shili apihilile nakwalumuka mangana Yehova amukonekele. (Luka 5:32) Vakulwane veji kulombelangako mutu uze napihilila nakwalumuka nakulomba Yehova amukafwe atunge cheka usepa naikiye.—Yako. 5:15.

6. Uno Yehova nahase kukonekela mutu uze vanafumisa muchikungulwilo tahi? Lumbununenu.

⁶ Chuma muka veji kulinganga vakulwane nge mutu uze vali nakusopesa kapihililile nakwalumukako? Mutu kana veji kumufumisanga muchikungulwilo. Kachi nge mutu kana nahokola lushimbi lwafulumende, vakulwane kaveshi kumusweka mwomwo ngwavo mwapwa muukaluko. Yehova etavisa vilolo vafulumende vayule nakuzangamisa kala mutu uze nahokola lushimbi, numba nge napihilila nakwalumuka chipwe chiku. (Loma 13:4) Oloze mukuhita chalwola, kachi nge mutu kana natachikiza ngwenyi vyuma alingile vyapwile vyakuhenga kaha napihilila nakwalumuka, Yehova mwamukonekela. (Luka 15:17-24) Kaha nawa Yehova eji kulinganga ngocho numba nge mutu kana avulumwine shili yayinene.—Miji. 2, 33:9, 12, 13; Chimo. 1, 1:15.

7. Tunahase kukonekela ngachilihi mutu uze natulingi mwamupi?

⁷ Twatokwa hakutachikiza ngwetu keshi mulimo wetuko wakusakula numba nge Yehova mwakonekela muka-shili nyi chiku. Chipwe ngocho, kuli chuma chimwe chize nayetu twatela kulinga. Chuma muka vene ocho? Shimbu jimwe, mutu nahase kutulinga mwamupi chikuma, kaha nahase kutulweza tumukonekele.  Oloze shimbu jimwe, mutu uze natulingi mwamupi chikuma keshi kuhasa kwiza nakulomba lukonekeloko. Chipwe ngocho, tunahase kusakula kukonekela mutu kana hakuhona kumukwachila matoto nakuhona kumulamina koko. Kuhanjika muchano, chinahase kumbata lwola kukonekela mutu, kaha nawa chasakiwa kukilikita, chikumanyi nge vyuma vanatulingi vinatukolesa chikuma kumuchima. Kaposhi Kakutalila waSeptember 15, 1994, ambile ngwenyi: “Kukonekela mutu uze nalingi shili kachalumbununa nge tunamono shili nalingi kupwa yamwazako. Kuli vaka-Kulishitu, kukonekela chalumbununa kuseza vyuma vyosena mumavoko aYehova mwomwo apwa Muka-kuyula wakwoloka mwilu nahamavu, kaha nawa mwayula mwakwoloka halwola lwakutamo.” Mwomwo ika Yehova atukolezeza tukonekelenga vakwetu nakufwelela ngwetu mwayula mwakwoloka?

8. Uno natusolola ngachilihi ngwetu twasakwilila Yehova hakututetela?

⁸ Kukonekela vakwetu cheji kusololanga nge twasakwilila Yehova hakututetela. Muchifwanyisa chimwe, Yesu afwanyishile Yehova kuli kaka yamutu uze akonekelele ndungo yenyi uze ahonene kufweta mukuli waunene. Oloze ndungo uze vakonekelele ahonene kukonekela mukwavo ndungo uze amukongwele jimbongo jajindende. (Mateu 18:23-35) Chishina muka apwile nakunangula Yesu? Kachi nge twasakwilila Yehova hakeke yayinene atusolwela, kaha nachitulingisa tukonekelenga vakwetu. (Samu 103:9) Kaposhi Kakutalila umwe kunyima alumbunwine chishina kanechi ngwenyi: “Chamokomoko namapapa natukonekela vakwetu, katweshi kuhasa kukonekela vakwetu nganomu Kalunga atukonekela kuhichila muli Kulishituko.”

9. Yehova eji kutetelanga vatu muka? (Mateu 6:14, 15)

⁹ Nge natukonekelanga vakwetu, kaha naYehova mwatukonekela. Yehova eji kutetelanga vaze veji kutetelanga vakwavo. (Mateu 5:7; Yako. 2:13) Yesu ashindakanyine chishina kana omu anangwile tumbaji twenyi mwakulombela. (Tangenu Mateu 6:14, 15.) Kaha nawa kunyima, Yehova alwezele ngamba yenyi Yopa chishina chochimwe. Ou lunga wakushishika evwile kupihya hamazu amapi vamwambile kuli Elifwaze, naMbilitate naZofwale. Yehova alwezele Yopa alombeleko ava malunga. Kahomu Yopa alombele, Yehova amukiswile.—Yopa 42:8-10.

10. Uno kulamina vakwetu koko chinahase kutunehela ukalu muka? (Wavaka-Efwesu 4:31, 32)

¹⁰ Kulamina vakwetu koko chinahase kutunehela ukalu. Yehova kasaka tulaminenga koko vakwetuko, mwomwo kulinga ngocho cheji kutulingisanga tuwahilile. (Tangenu Wavaka-Efwesu 4:31, 32.) Atukolezeza ‘tumbile utenu nakuseza matoto.’ (Samu 37:8) Kachi nge natukavangiza lundongi kana, kaha nachitunganyalisa. Kulamina vakwetu koko chinahase kutunehela ukalu kumujimba nakuwongo. (Vishi. 14:30) Ngana muze kunwa ulembe nachitunehela ukalu yetu vavene keshi vakwetuko, nakukwachila vakwetu matoto chinahase kutunehela etu vavene ukalu keshi vakikoko. Nge natukonekelanga vakwetu, chili kwijiva nge tuli nakulikinga yetu vavene. (Vishi. 11:17) Kulinga ngocho nachitukafwa tuunde muchima nakutwalaho lika kuzachila Yehova.

11. Vyuma muka yahanjika Mbimbiliya kutalisa kukulinga sambanjinga? (Wavaka-Loma 12:19-21)

¹¹ Yehova ikiye apwa muka-kulinga sambanjinga. Yehova katwitavisa tulinge sambanjinga kumutu uze natulingi mwamupiko. (Tangenu Wavaka-Loma 12:19-21.) Hakuwana nge  katwakupukako, ngocho katweshi kuhasa kuyula mwakwoloka ngana muze eji kuyulanga Kalungako. (Hepe. 4:13) Vishinganyeka vyetu vinahase kutulingisa tuchiwane kupwa chachikalu kusakula kulinga vyuma vyakwoloka. Yehova ahwiminyinyine Yakova asoneke ngwenyi: “Utenu wamutu kaweshi kuneha kwoloka chaKalungako.” (Yako. 1:20) Twatela kufwelela ngwetu Yehova mwalinga vyuma vyakwoloka nakuyula mwamwenemwene.

12. Tunahase kusolola ngachilihi ngwetu twafwelela chiyulo chaYehova?

¹² Kukonekela vakwetu cheji kusololanga nge twafwelela chiyulo chaYehova. Kuseza vyuma vyosena mumavoko aYehova cheji kusololanga nge twafwelela ngwetu Yehova mwakafumisako ukalu wosena uze weza mwomwo yashili. Mukaye kakahya, katweshi kukanuka cheka ‘vyuma vyakunyima, chipwe kuvivezuka mumichima yetuko.’ (Isa. 65:17) Uno nge vanatwivwisa kupihya, kutala chinahase kupwa chachashi kuhona kukwata matoto nakulamina koko mutu uze natwivwisa kupihya tahi? Tutalenu havyakutalilaho vyavatu vamwe vaze vanalinginga ngocho.

13-14. Uno vyuma vyasolokele kuli Tony naJosé vinaminangula vishina muka kutalisa kukukonekela?

¹³ Vandumbwetu vavavulu vakonekelele vatu vaze vavalingile mwamupi numba tuhu chapwile chachikalu kulinga ngocho. Vyuma muka vananganyala hakulinga ngocho?

¹⁴ Shimbu kanda Tony c uze atwama mulifuchi lyaPhilippines alinangule muchano, yayenyi vamujihile kuli lunga umwe walijina lyaJosé. Halwola kana, Tony apwile wamatoto chikuma kaha nawa chilyanyi, ngocho afwililile kulinga sambanjinga. José vamukashile mukamenga mwomwo yakujiha mutu. Kutwala muze, omu José vamufumishile mukamenga, Tony alishingile ngwenyi kuvanga mwamukikisa mangana amujihe. Ngocho alanjile nauta mangana akamuloze. Kutwala muze, Tony aputukile kulinangula Mbimbiliya naVinjiho jaYehova. Ambile ngwenyi, “Omu ngwapwile nakulinangula Mbimbiliya ngwamwene ngwami ngwatelele kwalumunako vilinga vyami, kuhakilako vene namuchima wamatoto.” Kufumaho, Tony vamumbapachishile, kaha  kutwala muze vamutongwele kupwa mukulwane muchikungulwilo. Tony alikomokelele chikuma hakutachikiza ngwenyi José uze ajihile yayenyi naikiye napu jino Chinjiho chaYehova. Omu Tony naJosé valiwanyine, valipakachile mukasamba, kaha Tony alwezele José ngwenyi namukonekela. Tony ambile ngwenyi, kukonekela ndumbwenyi mujila kana chamulingishile apwenga wakuwahilila chikuma kuhambakana muze apwile hakavanga. Chikupu vene, Yehova akiswile Tony hamuchima wenyi wakukonekela.

15-16. Uno vyuma vyasolokele kuli Peter napuwenyi Sue vinaminangula vyuma muka kutalisa kukukonekela?

¹⁵ Mu 1985, Peter napuwenyi Sue vapwile nakukunguluka muZuvo yaWangana, kaha vakasumukile kapata kanapiluka. Kwapwile lunga umwe atele kapata kana muZuvo yaWangana. Kapata kana kalingishile Sue ajike matwitwi nakufwa meso. Kaha nawa kapwile cheka nauhashi wakuhumbikako. d Peter napuwenyi Sue valihulishilenga ngwavo, ‘Uno mutu muka mwalinga chuma kanechi chachipi ngana?’ Omu mwahichile myaka yayivulu, uze lunga atele kaze kapata vamukwachile nakumuhaka mukamenga, kaha vamulwezele ngwavo mwakafwila vene muze. Omu Peter napuwenyi Sue vavahulishile numba nge vanakonekela uze lunga, vambile ngwavo: “Yehova atunangula ngwenyi kupwa namatoto nakulama koko nachitunehela ukalu kumujimba namuvishinganyeka nakuwongo. Halwola vene luze kapilukile kaze kapata, twalombele Yehova atukafwe tumukonekele nakuhona kumulamina koko mangana tuunde muchima.”

¹⁶ Kutala chapwile chachashi kukonekela mutu kana tahi? Kachapwile chachashiko. Peter ambile ngwenyi: “Namakumbi ano, nge puwami Sue naputuka kuviza mwomwo yauze kapata, tweji kupihililanga chikuma. Oloze katwatwalaho kushinganyeka haukalu kanako, ngocho matoto eji kukumanga washiwashi. Kuhanjika muchano, tweji kushinganyekanga ngwetu, kachi nge uze lunga mwakalinangula muchano nakupwa ndumbwetu, natukamusambilila chikuma. Chuma kanechi chatusolokelele  chinatunangula nge jindongi jamuMbimbiliya jinahase kutukafwa nakupwa vakulihehwa mujijila jajivulu. Kaha nawa kutachikiza ngwetu kalinwomu Yehova afumiseko ukalu wosena tuli nakumona cheji kutuvendejekanga chikuma.”

17. Uno vyuma vyasolokele kuli Myra vyatunangula vyuma muka kutalisa kukukonekela?

¹⁷ Myra alinangwile muchano halwola apwile kuulo, kaha apwile navana vavali vavanyike. Oloze lunga lyenyi ketavilile kulinangula muchanoko. Kaha mukuhita chalwola, alingile ukoji nakuseza tanga yenyi. Myra ambile ngwenyi: “Omwo lunga lyami angusezele navana ngwevwile vene namutwe ngo, nakuhona kufwelela chuma kana ngwami chinasoloka, nakuputuka kuliveya nakulihana mulonga nakupwa namuchima wamatoto, ngana muze veji kulinganga vatu vavavulu vaze veji kusezanga kuli vaka-zuvo yavo.” Numba tuhu ulo wafwile, oloze chamuvijilenga lika kumuchima mwomwo yakumuseza kuli lunga. Myra ambile nawa ngwenyi: “Ngwalivwilenga lika kupwa wamokomoko hatukweji vavavulu, oloze ngwamwene ngwami vyuma kana vyahakile usoko wami naYehova navakwetu vatu muponde.” Oholyapwa Myra eji kwambanga ngwenyi katwama cheka namatotoko, chipwe kufungijikila lunga amumbachile vyuma vyavipiko. Eji kushinganyekanga ngwenyi, likumbi limwe uze lunga amumbachile mwakapandama kuli Yehova. Myra eji kushinganyekanga havyuma vyamwaza vyakulutwe. Kaha nakafwe vaze vana venyi vavali vaputuke kuzachila Yehova. Makumbi ano, Myra ali nakulivwisa kuwaha kuzachila Yehova hamwe kaha navana venyi najitanga javo.

18. Vyuma muka nahase kulinga Yehova uze apwa Muka-kuyula Wakulitulaho?

¹⁸ Tweji kwivwanga kuwaha kutachikiza ngwetu kawapwa mulimo wetu wakusakula omwo vatela kusopeselamo mutuko. Hakuwana nge Yehova ikiye apwa Muka-kuyula Wakulitulaho, ngocho ikiye atamo kuzata mulimo kana. (Loma 14:10-12) Twatela kufwelela ngwetu lwola lwosena mwayulanga kweseka najindongi jenyi jakwoloka. (Kupu. 18:25; Vamya. 1, 8:32) Keshi kuhasa kulinga vyuma mujila yakuhengako.

19. Uno vyuma muka mwakalinga Yehova uze apwa muka-kuyula wamwenemwene?

¹⁹ Tuli nakutalilila kulwola luze omu Yehova mwakafumisako ukalu wosena uze weza mwomwo yashili nakuhona kukupuka. Halwola kana, vyuma vyavipi vyosena vize vili nakutuyanjisa kavyeshi kukapwakoko. (Samu 72:12-14; Kuso. 21:3, 4) Kaha nawa katweshi kukavyanuka chekako. Omu tuli nakuvandamina lwola kana, twatela kusakwilila Yehova uze atulweza tukonekelenga vakwetu ngana muze eji kulinganga ikiye.