1. Ale ethegile mbwenye ethwaruwile, ethu baani Yehova anaroromelihiye?

 NIHINONA wi Yehova dimpaddusihu, dinanivaha malamulo, dinanitoriha teto valudhuva di babihu odhivela. (Sal. 100:3; Isa. 33:22) Iyo namuthegela Yehova ni nathwaruwa ni murima wamutene, oliye kanakanna kopolove baahi yonilevelela, mbwenye onofuna vanlubale werana ndo. (Sal. 86:5) Yehova ohumulabihedha namavuhulela Isayiya wihina aniroromelihe ni madhu ala enihina: ‘Naari dhothega dhenyu dhikale dhofiila, dhinere otxenihiwa ninga funga.” —Isa. 1:18.

2. Akala nnofuna wihina dhehu dhineddelege pama naathu amodha, ethu baani nnahowelihu werana?

² Iyo aatene kanilogomane, bumwahaya malabo mamodha nnowoga obe nnowerana ethu enawuukula athu amodha. (Tia. 3:2) Eyo kinatapulela wihina nihaweddihege pama athu amodha, murombweya fuunona olevelela. (Pro. 17:9; 19:11; Mat. 18:21, 22) Muthu erana obe naari awoga ethu enipihe mbani naarive ekale eng’ono Yehova anafuna wihina nimulevelele. (Col. 3:13) Iyo nihikanna dhithu dhinanthukulela werana ndo, mwahaya bowi Yehova ononilevelela ‘ni murima wamutene.’ —Isa. 55:7.

3. Musolo ola nnahudhere ddi?

 ³ Musolo ola nnere woona makalelo oomutajhiha Yehova wodhela olevelela naarive nihilogomane ni nnere woona dhowakula dha makoho ala. Dhothega baani dhinafwanelela okabeleliwa ni anamaholela mulogo? Mwahaya bwaddi Mulugu agafuna wi naalevelelege athu amodha? Nnahudheravo ddi ni dhotajhiha dha addibila yonile goyi vanlubale mwaha dhothega dhaathu amodha?

4. a) Mudhaari a Yehova erana yothega enlubale, anahoweleya wera ddi? b) Anamaholela mulogo yatugumana ni muliba atheegile mutholo wewa buuvi?

⁴ Nanona wihina akala muthu erilena yothega enlubale, nawaddele yothega eyo anamaholela mulogo. Dhothega dhinlubale ddiniyani? Dhothega dhinlubale fuwathegela vanlubale malamulo a Mulugu. Nnofwanya dhotajhiha dhimodha dha dhothega ninga dhendha va 1 Coríntios 6:9, 10. Mukiristawu erana yothega enlubale yowindala oliye anofwanelela olobela wa Yehova amulobaga nikurumuwelo ni asayele anamaholela mulogo. (Sal. 32:5; Tia. 5:14) Mutholo wa anamaholela mulogo buuvi? Nihinona wi Yehova dinna ofuru wolevelela dhothega, oliye onowerana ndo wodhela mukutho wa mwanaye Yesu kiristu. * Mbwenye Yehova ohathikela anamaholela mulogo mutholo wothoma akala mowiwana ni Bibliya muliba atheegile anofwanelela okala Namona a Yehova obe naari. (1 Cor. 5:12) Wihina aliwa yerena yothoma ninga yela, ethu emodha anamaholela mulogo eneriwana fuwawakula makoho ninga ala: Muthu ola erilena yothega ela pudhave? Ohakuwana athu amodhaya? Yothega ela anadha eragana mudhidhi wowinjhivene? Yathimaya anowonehiha wihina ohuthwaruwa mwaha wa yothega eriliyena? Akala ethu enooneya wi Yehova ohumulevelela? —At. 3:19.

5. Mabasa anamaholela mulogo enakavihera addi mulogo ni muthu ole atheegile?

⁵ Anamaholela mulogo yatugumana ni ddibila atheegile efunelo yewa futhoma ethu emodhave athomile Yehova odhulu. (Mat. 18:18) Mabasa ala anamaholela mulogo enokavihera mulogo watene mwaha namathega ola atxosiwa eyo enobarela mulogo watene ohivoloweliwa ni mweddelo wabure naale ehinathwaruwa. (1 Cor. 5:6, 7, 11-13; Tit. 3:10, 11) Ohiya eyo, eyo enomukavihera muthuya wukuuwa ni othwaruwa ni murima wamutene ni oleveleliwa ni Yehova. (Luc. 5:32) Anamaholela mulogo enomulobelela ddibila ole athwaruwile wihina oliye avenyihedhe epaddaye yomuzimuni. —Tia. 5:15.

6. Akala muthu ohutxosiwa oliye podi oleveleliwa dili bili? Kawogamo.

⁶ Yahere ninga anamaholela mulogo ehitugumana ni muthu ole mbwenye kathwaruwe. Yereya ndo, muthu ole atheegile anofwanelela otxosiwa. Akala oliye oherana ethu yabure anamaholela mulogo kinanbarele dhithu dhinafuna ompadduwela naarive namathega ole athwaruwe. Yehova kanambarele namathega ole mmadani manamathonga wihina emutorihe obe emusinyuse. (Rom. 13:4) Mbwenye wavira mudhidhi, namathega ole uukuwa ni athwaruwa ni murima wamutene ni asaddula mweddelo waye, Yehova podi omulevelela muthu yola. (Luc. 15:17-24) Eyo podi opadduwa naarive muthuya agerilena dhothega dhinlubale. —2 Crónicas 33:9, 12, 13; 1 Tim. 1:15.

7. Omulevelela muthu anithegele enatapulela ddi?

⁷ Mwebaribarene sapama onona wihina iyo kannahowela othoma baani anafuna oleveleliwa ni Yehova. Naarive dhigari ndo, nnofwanelela othoma ethu-sithu. Ninga ddi? Malabo  mamodha podi wera yothega erilena muthuya ehinipiha mbani ni ehinoniha goyi vanlubale teto podi wera muthu ola ohuniloba nlevelelo. Naarive dhigari ndo, iyo podi othoma omulevelela muthuya. Eyo enatapulela wihina kannamukoyele ntxiga newene kannamunyanyuwele. Ebaribariya sowi onere ohowela mudhidhi wowinjhivene ni wilibihera wihina omulevelele yothega enrena muthu yole thabwathabwa akala oherana yothega enlubale. Sentinela a 15 Setembro a 1994 anihina: “Wamulevelelaga muthu atheegile, eyo kinatapulela wihina onodumera yothega yaye. “Wa makiristawu, olevelela enatapulela ohiya dhithu dhatedhene mmadani mwa Yehova. Oliye namatoriha ororomeleya elabo yatene, Yehova anere otoriha mudhidhiya wakwanela.” Yehova anafuna wihina iyo nlevelelege ni nroromele wihina oliye anere otoriha mwamakalelo owogowa. Mwahaya bwaddi nigaroromela?

8. Nnonihe addi wihina mwebaribarene nnotamalela vanlubale thagaraga dha Yehova?

⁸ Nanona olevelela, nnowoniha wi nnomutamalela Yehova. Munladdanihoni, Yesu ohumuliganiha Yehova ni mwene aamulevelele mudharaaye mangawu manlubale anniyena. Mudhaari ola kaande waaliva mangawu ale anniyena, mbwenye vasogolova mudhaari ole kandile walevelela mwana mangawu mudhaari mukwaye anniyena nuliye. (Mat. 18:23-35) Yesu afuna ahudhihe ddi ni nladdaniho nna? Nanona otamalela thagaraga Yehova anniyena ni iyo nnere okanna efunelo emodhave yowalevelela athu amodha. (Sal. 103:9) Sentinela dhaala akale ohusoriha muselu ola egihina: “Kannapwatha dila ngasi nimulevelelihu mwanddamanihu, dila dhatedhene nda nimulevelelihu kadhinanda okuneela olevelela ni thagaraga Yehova aneddeliye wodhela mukutho wa Yesu.”

9. Yehova dathagaraga nnani? (Mateus 6:14, 15)

⁹ Nanona olevelela nnere oleveleliwa. Yehova dathagaraga naale enna thagaraga. (Mat. 5:7; Tia. 2:13) Yesu ohuvaha yotajhiha yapama mudhidhi ahudhihaga anamahara aye makalelo olobela. (Omwileri Mateus 6:14, 15.) Iyo nnohudhera ethu emodhave niile Yehova awogiliye amwaddelaga mudhaari aye Jo. Mulobwana ola ororomeleya uhona goyi ni madhu akwaye araru Elifaz, Bildade ni Zofar. Mbwenye Yehova omwaddela Jo wihina alobelele akwaye ala. Jo numala walobelela, Yehova omureeliha vanlubale mudhaari ola oororomeleya. —Jó 42:8-10.

10. Mwahaya bwaddi okoya ntxiga wiganoniha goyi? (Efésios 4:31, 32)

¹⁰ Okoya ntxiga winoononiha goyi. Onyemeliha mubuwelo wehu ni ntxiga podi ononga egumihu, teto Yehova kanadhiveliwa aanonaga noonaga goyi. (Omwileri Efésios 4:31, 32.) Bumwahaya oliye aganaddelaga egi: ‘Ohiye okala muthu owaali ni osukume ekalelo yonyanyuwa.’ (Sal. 37:8) Werana ndo sinatapulela okanna thotho. Mwebaribarene okoya ntxiga winononiha goyi epaddi yomwiilini ni yomubuweloni. (Pro. 14:30) Kaniddiwale wihina okoya ntxiga kawinamoniha goyi muthu ole anukunle. Wubuwela ndo, eri ninga ong’wa ndibwi ni ojhehera wihina muthu mmodha oone goyi. Mowindo, nalevelelaga athu amodha dihiyo anakavihereya. (Pro. 11:17) Nnokanna murenddele ni murimihu onokala vamburoni, vano iyo podi odhowagave naaparaga mabasa a Yehova.

11. Bibliya anasoriha ddi wodhela ohogolosa kunyakunya? (Romanos 12:19-21)

¹¹ Ohogolosa kunyakunya fwa Yehova. Yehova  kanivahile ofuru womuwelihedha kunyakunya muthu anitheegela. (Omwileri Romanos 12:19-21.) Mwaha wohanda woonelamo dhithu dhatedhene dhinapadduwa, kaninna ofuru womutoriha muthu, mbwenye Yehova dinna ofuru yola. (Heb. 4:13) Malabo mamodha mubuwelo wehu podi onivuganyedha nannya, bumwahaya Yehova adhe anvethelege Tiago waleba madhu enihina: ‘Mwaha owaali wa muthu kuniima ekalelo yowogowa ya Mulugu.’ (Tia. 1:20) Iyo podi okanna ebaribari wihina Yehova kanadha erana ethu yabure ni anere otoriha mowogowa.

12. Nnonihe addi wihina nnororomela wogowa wa Yehova?

¹² Nalevelela nnowoniha wihina nnaroromela wogowa wa Yehova. Ohiya dhithu dhatedhene mmadani mwa Yehova, nnowoniha wihina oliye anere omariha obure watene onanoniha goyi mwaha yothega yakwihu obe yehu. Mwilaboni exa kannadha nawubuwelaga mabambihu omuzimuni ‘dila biili, newene murima wehu kunadha onuubusedhaga’ dhithu dhamundduli. (Isa. 65:17). Nerege enowandeya oselela onyanyuwa ni okoya ntxiga naarive muthu aganthegele vanlubale? Vano nnafuna nihudhere dhotajhiha dhaathu amodha yandile oselela.

13-14. Yopadduwa ya Toni ni Juze, yuhudhihe ddi wodhela olevelela?

¹³ Addibila ni arogola owinjhiva ehithoma olevelela naarive egathegeliwe vanlubale ni aathu amodha. Ki mareeliho baani yawakeliwa mwaha wolevelela?

¹⁴ Toni * anakala oFilipina ahinakale Namona a Yehova oliye ahoona wihina ddibile apogoya eere opiwa ni mulobwana dhaala ithaniwa Juze. Woona wi mudhidhi yoyo Toni ari muthu owopiha, oliye othoma ohogolosa kunyakunya. Oliye ahivolosihiwa mukambura mwaha opanga eriliyena. Vasogolova Juze nuukumihiwa mukambura, Toni ompaganya wihina eere omusayela wi ampe. Oliye ahifiyedha ogula futhi wihina erena yeyo, mbwenye Toni nuwambela omuhudhera Bibliya ni Anamoona a Yehova oliye wera: “Gimuhudheraga Bibliya miyo woona wihina ginofwanelela werana masadduwo  owinjhiva mwigumini mwaga, yavolowelavo ohiya okala muthu owopiha.” Nuuvira mudhidhi Toni obaddiziwa, vasogolova oliye okala namaholela mulogo. Kubuwela makalelo atikine Toni nunona wihina Juze Namoona a Yehova! Aliwa nuugumana yahikubarelana vanlubale, nuwindo Toni omuroromeliha wihina ohumulevelela. Toni wera omulevelela Juze wahidhana ohagalala winlubale ahinandiye owogamo dhatedhene. Mohanganyedha Yehova ahimureeliha Toni mwaha oliye othoma omulevelela.

15-16. Yotajhiha ya ddibila Peter ni Sue yohudhihe ddi wodhela olevelela?

¹⁵ Yaka ya 1985, Peter ni Sue yera woona mutugumano muNyumbani yomwene, morurumusa oruma bomba. Mulobwana dhaala ere otibela bomba munyumbani yOmwene! Sue oporeya vanlubale, obajha labonenne mentwaaye ni mabarwaye oliye kuhiwaga. * Malabo owinjhiva okala nuwikoha egi, ‘muthuyola aamange murima afiyedha werana ethu yowopiha ninga yela baani?’ Nuuvira mudhidhi, mpanga ole ahari Namoona a Yehova oliye ovokeriwa mukambura ni othomeliwa wihina egumaye yatene emalele mwemune. Nukohiwa Peter ni Sue akala ehimulevelela mulobwana ole, aliwa wera Yehova anihudhihe wihina nihikale athu onyanyuwa newene nihikoyege ntxiga, mwaha eyo enonooniha goyi epaddi yomwilini ni yomuzimuni. Bumwahaya obajha omambelelowene iyo nihimuloba Yehova osukuma onyanyuwa ni okoya ntxiga, wihina dhehu dhineddelege pama.

¹⁶ Naarive dhigapaduwele dhatedhene dhendha, kahi yokwewa mwigumini mwewa olevelela. Aliwa enihina: “Mwaha wa mabamba ala anniyena, nasugwa iyo nnobajha onyanyuwa dila biili. Mbwenye nnowilibihera wihina nahithabwege wubuwela, nindo onyanyuwa wule kawinalegela. Nnowoga ni murimihu wamutene wihina nlabo nimodha molubwana ola anadhiye akala Namona a Yehova nnere omwaakela ni malada menli. Dhatedhene  dhendho dhinihudhiha wi waparihedhaa mabasa malagano amBibliyani enonobola. Hee, enonobola okwaranya ethu-sithu nahubuwelihu ohiya eyo enonlibiha vanlubale onona wi vohilegela Yehova anere omariha goyi yatene nnonihu.”

17. Ohudhere ddi wodhela olevelela ni yotajhiha ya murogola Mira?

¹⁷ Murogola Mira nuhudhera ebaribari oliye oteliwa ni okanna ahima abili, mbwenye mwamune ari ahinathi ohudhera ebaribari. Nuvira mudhidhi, oliye okuma mba ni onyanyala murala waye. Mira anihina: “Mwamunaga nunyanyala murolihu miyo gahukuwa vanlubale ninga enukwa muthu-di-muthu ahiwa ni mamune. Miyo kaganda orumedha ele yagipadduwele, mubuwelo obalaleya, miyo wukuuwa okunamo, miyo kukanna yowera, ni gowivaha nibili wodhela ele yagipadduwele ni gari rayivave naarive nigamanle omwalana, mwaha gubuwela yogipa mbani.” Mira anihina: “Miyo gahivira mweri dhowinjhivadhene goonaga goyi, vano miyo wonelamo wihina eyo yahambela ononga wandana waga ni Yehova vamodha ni athu amodha.” Mbwenye vano, anihina kaginathabwa okanna rayiva newene kanamukoyela ntxiga mamune ole akale ni anororomela wihina nlabo nimodha anere ohudhera ebaribari. Vano Mira onowanda osugwa pamadhene osogolo. Oliye ohanda walela anaaye abiili yeka wihina emulabele Yehova, peeno anna omulabelave Yehova nanaye vamodha namudhaye.

18. Ebaribari baani ninnihuna wodhela Yehova namatoriha munlubale?

¹⁸ Mwebaribarene, sapama onona wihina kahiyo iyo anathoma makalelo kadda muthu anafuniye otorihiwa. Yehova ari namatoriha munlubale duliye anafuna werena ndo. (Rom. 14:10-12) Iyo nnororomela ni murima wamutene wihina Yehova anere omariha dhatedhene mwamakalelo ologomana, aharaga nlamulo naye wodhela ele eri yapama ni yabure. (Gén. 18:25; 1 Reis. 8:32) Yehova kanadha erana ethu yabure.

19. Vohilegela Yehova anafuna ere ddi?

¹⁹ Nnojhehera nuuthaba mudhidhi Yehova anadhiye aamariha makathamiho aatene etatamuliwe ni ohulogomana waathu. Eyo yereya mabambihu aatene omuzimuni, omwiilini ni ammubuweloni enere obibiddeleya. (Sal. 72:12-14; Apo. 21:3, 4) Wafiya mudhidhi yoyo iyo kannadha nonaga goyi mwaha wa dhithu dhendha. Mwebaribarene iyo aatene nnomutamalela vanlubale Yehova mwaha wonivaha thotho yomuthajhiha ni onihudhiha okala athu olevelela.