1. Bõe la a Zeova yet sẽn maan-b yel-wẽnd n tek yam n kot sugrã, tɩ sɩd kengd raoodo?

 BAA ne a Zeova sẽn yaa d Naanda, soab ning sẽn kõt tõnd noy la d bʋ-kaoodã, a leb n yaa d saasẽ Ba sẽn nong-do. (Yɩɩn. 100:3; Eza. 33:22) D sã n wa beeg-a n sɩd tek yam n kot sugri, a na n kõ-d-la sugri. La a sɩd tʋllame n maan woto. (Yɩɩn. 86:5) A Zeova tũnuga ne no-rɛɛs a Ezayi n togs goam sẽn kengd raood wʋsgo. A yeelame yaa: “Baa yãmb yel-wẽnã sã n yaa miuug wa saag-pag-a-minamina, b na n lebga pɛɛlg wa lampalga.”—Eza. 1:18.

2. D sã n dat tɩ tõnd ne d taabã moor noomẽ, bõe la d segd n maane?

² D sẽn pa zems zãngã yĩnga, d fãa mi n yeelame bɩ n maan bũmb tɩ sãam d taabã sũy. (Zak 3:2) La woto pa rat n yeel tɩ d pa tõe n paam tɩ d moorã le noomẽ ye. D tõe n kell n yɩɩ b zo-rãmba, d sã n yaa sug-kõatba. (Yel. 17:9; 19:11; Mat. 18:21, 22) A Zeova ratame tɩ d kõt d taabã sugr b kong-bõonesã yĩnga. (Kol. 3:13) D tara bʋʋm n na n sɩd maan woto, bala a Zeova pʋd n ‘kõta tõnd sugr wʋsgo.’—Eza. 55:7.

3. Bõe yell la d na n gom sõs-kãngã pʋgẽ?

³ Sõs-kãngã pʋgẽ, d na n yãa ninsaalbã sẽn pa zems zãngã sẽn tõe n dɩk a Zeova togs-n-taar to-to, sugrã kũun wɛɛngẽ. Yel-wẽn-bʋs la d segd n togs kãsem-dãmbã? Bõe yĩng t’a Zeova rat tɩ d kõt d taabã sugri? D na n goma d tẽed-n-taas kẽer sẽn nams wʋsg yelle, neb sẽn beeg-b yĩnga, la yam ning d sẽn tõe n dɩk b kibarã pʋgẽ.

4. a) Ned sẽn tũud a Zeova sã n maan yel-wẽn-kãsenga, bõe la a segd n maane? b) Kãsem-dãmbã sã n wa sõsd ne sẽn maan-a yel-wẽndã, bõe la b na n bao n bãnge?

⁴ Ned sã n maan yel-wẽn-kãsenga, d segd n togsa kãsem-dãmbã. Pipi Korẽnt-rãmb 6:9, 10 pʋgẽ, b sõdga yel-wẽn-kãsems kẽere. Yel-wẽn-kãseng yaa a Zeova noyã kɩɩsg meng-menga. Kiris-ned sã n maan yel-wẽn-kãsenga, a segd n pʋʋsa a Zeova n kos sugri. La a segdame me n togs tigingã kãsem-dãmbã. (Yɩɩn. 32:5; Zak 5:14) Bõe la kãsem-dãmbã na n maane? Yaa a Zeova a ye bal n tõe n kõ ned sugr fasɩ a yel-wẽn yĩnga. Yaa ne a Zeezi maoongã maasem la a maand rẽ. * La a Zeova kõo kãsem-dãmbã sore, tɩ b tõe n tũ ne Biiblã n bao n bãng sẽn maan-a yel-wẽndã sã n tõe n kell n zĩnda tigingã pʋgẽ. (1 Kor. 5:12) Rẽ wɛɛngẽ, ad bũmb kẽer kãsem-dãmbã sẽn na n bao n bãnge: A maana yel-wẽndã ne pʋ-toog bɩ? A ra solga yel-wẽndã n pa rat tɩ ned bãng bɩ? A maana yel-wẽndã n yɩlem n kaoos bɩ? La sẽn tar yõod n yɩɩda, yaa vẽeneg t’a sɩd teka yam n kot sugr bɩ? Bũmb bee sẽn wilgd t’a Zeova kõ-a-la sugr bɩ?—Tʋʋ. 3:19.

5. Kãsem-dãmbã sã n sõng ned sẽn maan yel-wẽnde, wãn to la nafd tigingã tõre?

⁵ Kãsem-dãmbã sã n wa sõsd ne ned sẽn maan yel-wẽnde, yaa sẽn na yɩl n welg yellã tɩ zems ne yellã sẽn zoe n welg to-to saasẽ wã. (Mat. 18:18) Wãn to la rẽ nafd tigingã? Kogenda tigingã, bala sõngdame tɩ b yiisd sẽn maand-b yel-wẽnd n pa tek yam n kos sugrã tigingã pʋgẽ, tɩ b yel-manesmã ra wa sãam tigingã neb a taabã tẽeb ye. (1 Kor. 5:6, 7, 11-13; Tɩt 3:10, 11) Tõe n sõnga sẽn maan-a yel-wẽndã me t’a tek yam, n paam t’a Zeova kõ-a sugri. (Luk 5:32) Ned sẽn maan yel-wẽnd sã n tek yam n kos sugri, kãsem-dãmbã pʋʋsda a Zeova a yĩnga, n kos-a t’a sõng-a t’a le paam zood sõma ne-a.—Zak 5:15.

6. B sã n yiis ned tigingã pʋgẽ, a Zeova ket n tõe n kõ-a-la sugr bɩ? Wilg-y y leoorã võore.

⁶ Kãsem-dãmbã tõe n wa sõsa ne ned sẽn maan yel-wẽnde, n mik t’a pa tek yam n kot sugr ye. Sã n wa yaa woto, b yiisd-a-la tigingã pʋgẽ. Sã n mikame me t’a kɩɩsa tẽngã laloa wã, kãsem-dãmbã pa na n bao n kogl-a t’a ra paam sɩbgr ye. A Zeova kõo goosneema-rãmbã sore, tɩ ned sã n kɩɩs laloa wã bɩ b tõe n kao a bʋʋd n sɩbg-a, a soabã teka yam n kos sugr t’a pa tek yam me. (Rom. 13:4) A soabã sã n wa bãng t’a sẽn maanã yaa wẽng wʋsgo, n toeem a tagsa wã la a tʋʋm-tʋmdɩ wã, a Zeova na n sak n kõ-a-la sugri. (Luk 15:17-24) A na n kõ-a-la sugri, baa a sẽn maan bũmb ningã yaa wẽng wʋsgo.—2 Kib. 33:9, 12, 13; 1 Tɩm. 1:15.

7. Kõ ned sẽn beeg-d sugr rat n yeelame tɩ bõe?

⁷ D sẽn mi tɩ pa tõnd n yãkd a Zeova sã n na n kõo ned sẽn maan yel-wẽnd sugrã noom-d-la wʋsgo. La bũmb la d tõe n yãk yam n maane. Yaa bõe? Wakat ninga, ned tõe n maana bũmb n beeg-do, n wa maand a bãngẽ, n kos-d sugri, wall n pa kos-d sugr ye. Baa ne rẽ, d tõe n yãka yam n kõ-a sugri, n da tall sũ-kẽk bɩ n yik d sũur ne-a ye. Togs sɩdã, yɩl n wa tõog n kõ a soabã sugr tõe n kaoosame, la baood modgr me, sẽn yɩɩd fãa a sẽn  maan bũmb ningã sã n sãama d sũur wʋsgo. Yʋʋmd 1994 bõn-bɩʋʋng kiuug rasem 15 Gũusg Gasgã pʋgẽ, b yeelame yaa: “F sã n kõ ned sugri, pa rat n yeel tɩ f getame t’a sẽn maanã pa wẽng ye. D sẽn yaa kiris-nebã, kõ ned sugr rat n yeelame tɩ f rɩk yellã n bas ne a Zeova. Yẽ la bʋ-kaood sẽn yaa tɩrg ãndũniyã gill zugu. La wakat ning a sẽn yãkã sã n ta, a na n gesame tɩ yellã manege.” Bõe yĩng t’a Zeova rat tɩ d kõ d taabã sugri, la d bas sẽn ketã ne-a?

8. D sã n yaa sug-kõata, wãn to la wilgd tɩ d sũur nooma ne a Zeova sẽn zoet d nimbãanegã?

⁸ D sã n yaa sug-kõata, wilgdame tɩ d sũur nooma ne a Zeova nimbãan-zoeerã. A Zeezi yel-bũnd a ye pʋgẽ, a maka a Zeova ne zu-soab sẽn sak n bas a yamb sam-kẽeng taale, a sẽn da pa tõe n yao yĩnga. La yambã pa zoe a yem-taag sẽn da tar a samd nimbãaneg ye. Samdã yaool n da pa zemb baa fʋɩ ye. (Mat. 18:23-35) A Zeezi ra ratame tɩ d bãng bõe? D sũur sã n sɩd nooma ne a Zeova sẽn zoet d nimbãaneg wʋsgã, na n kɩtame tɩ d sakd n kõt d taabã sugri. (Yɩɩn. 103:9) Rẽ wɛɛngẽ, Gũusg Gasgã yeela hal sẽn kaoos tɩ baa d sã n kõta d taabã sugr naoor wʋsgo, pa tõe n ta sõor ning a Zeova sẽn kõt tõnd sugr la a zoet d nimbãaneg ne a Zeezi maoongã maasem yĩngã ye.

9. Ne ãnd dãmb la a Zeova wilgd a nimbãan-zoeere? (Matiye 6:14, 15)

⁹ D sã n kõt d taabã sugri, d paamdame t’a Zeova me kõt-d sugri. A Zeova wilgda a nimbãan-zoeerã ne neb nins sẽn zoet b taabã nimbãanegã. (Mat. 5:7; Zak 2:13) A Zeezi goma rẽ yell vẽenega, a sẽn wa n wilgd a karen-biisã b sẽn segd n pʋʋs to-to wã. (Karm-y Matiye 6:14, 15.) Sẽn deng rẽ, a Zeova ra yeela a tʋm-tʋmd a Zoob bũmb sẽn wilgd rẽ. A Elifaaz, a Bildad ne a Zofaar sẽn yaa a Zoob zo-rãmbã ra wa n goma goam sẽn sãam a Zoob sũurã wʋsgo. A Zeova yeela a Zoob t’a pʋʋs b yĩnga. A Zoob sẽn maan rẽ wã, a Zeova ning-a-la barka.—Zoob 42:8-10.

10. Bõe yĩng tɩ d tõe n yeel tɩ d sã n tar sũ-kẽka, d wãada d menga? (Efɛɛz rãmbã 4:31, 32)

¹⁰ D sã n tar sũ-kẽka, d wãada d menga. D sã n tar sũ-kẽka, yaa wa d sẽn tʋk zɩɩb sẽn zɩs wʋsgo. A Zeova ratame tɩ d bas sũ-kẽka, n paam laafɩ. (Karm-y Efɛɛz rãmb 4:31, 32.) A yeta tõnd tɩ d ‘zãgs sũ-yikri, la d bas sũ-puugri.’ (Yɩɩn. 37:8) D sã n tũ sagl-kãnga, nafd-d lame. D sã n tar sũ-kẽka, tõe n booga d yĩisã laafi wã. (Yel. 14:30) D sã n tar sũ-kẽk ne neda, yaa tõnd mengã la namsd n yɩɩda, la pa sẽn beeg-a tõndã ye. Yaa wa f sẽn na n yũ pozõno, n dat tɩ kʋ sẽn beeg-a foo wã. Woto wã, d sã n kõt d taabã sugri, yaa tõnd mengã la d maand neer n yɩɩda. (Yel. 11:17) D paamdame tɩ d yamã gãe bãane, n tõe n ket n tʋmd a Zeova tʋʋmã.

11. Bõe la Biiblã yet sũ-dokrã wɛɛngẽ? (Rom dãmbã 12:19-21)

¹¹ Sũ-dokr yaa a Zeova n so. A Zeova pa kõ-d sor tɩ ned sã n beeg-d bɩ d tõe n dok d sũur ne a soab ye. (Karm-y Rom dãmb 12:19-21.) D sẽn pa zems zãngã yĩnga, d sẽn get yɛlã to-to wã kɩtame tɩ d pa tõe n kao bʋʋd tɩrg wa Wẽnnaam ye. (Ebre. 4:13) Wakat ninga, d tagsgã sẽn yaa to-to wã kɩtdame tɩ d pa tõe n bãng n maan sẽn segdã ye. A Zeova vẽnega a  Zak t’a yeel yaa: “Ninsaal sũ-yikr pa wat ne sẽn yaa tɩrg Wẽnnaam nifẽ ye.” (Zak 1:20) D tõe n basa d yam t’a Zeova na n wa maana sẽn segdã, la a ges n welg yɛlã tɩ zemse.

12. Wãn to la d tõe n wilg tɩ d kɩsa sɩd t’a Zeova sẽn maand fãa yaa tɩrga?

¹² D sã n yaa sug-kõata, wilgdame tɩ d kɩsa sɩd t’a Zeova sẽn maand fãa yaa tɩrga. D sã n dɩk d yɛlã fãa n bas ne a Zeova, d wilgdame tɩ d kɩsa sɩd t’a na n wa welga yɛl nins fãa yel-wẽnã sẽn wa ne wã. Dũni-paalgã a sẽn pʋlmã pʋgẽ, d “kõn tol n leb n tẽeg” yɛl nins sẽn da namsd tõndã ye. D “kõn leb n tags b yell” meng ye. (Eza. 65:17) La ned sã n maan bũmb n sãam d sũur hal wʋsgo, rẽ yĩnga, d tõe n basa taal fasɩ n pa tol n tall sũ-kẽk ne-a bɩ? D gom neb kẽer sẽn tõog n maan woto yelle.

13-14. A Toni ne a Zooze kibarã sõnga yãmb tɩ y bãng bõe sugrã kũun wɛɛngẽ?

¹³ D tẽed-n-taas wʋsg yãka yam n kõ neb sugri, baa ne nin-kãensã sẽn maan-b wẽng wʋsgã. Wãn to la b sẽn maan rẽ wã naf-ba?

¹⁴ A Toni * yaa d tẽed-n-taag sẽn be Filipin. Nand t’a wa lebg a Zeova Kaset soaba, a bãngame tɩ rao a ye yʋʋr sẽn boond t’a Zooze n kʋ yẽ kẽema. Wakat kãng t’a Toni ra yaa ned sẽn nong zaba, n da rat n dok a sũuri. B ra yõka a Zooze n pag bãens roogo, a sẽn kʋ nedã yĩnga. Kaoosg zugẽ b sẽn wa n yiis a Zooze bãens roogã, a Toni wẽename n pids t’a na n kʋ-a lame n lebse. A raa bug-raoog rẽ yĩnga. A Toni wa n sɩnga Biiblã zãmsg ne a Zeova Kaset rãmbã. A yeelame: “Mam sẽn wa n zãmsd Biiblã, m bãngame tɩ m segd n toeema m tagsa wã la m tʋʋm-tʋmdɩ wã, wala makre, n bas sũ-kẽkã.” A Toni wa n deega lisgu, hal n wa lebg kãsem-soab a tigingã pʋgẽ. Tags-y n ges-y sẽn ling-a to-to, a sẽn wa n bãng t’a Zooze me reega lisg n lebg a Zeova Kaset soabã. B sẽn wa n seg taabã, b mobga taab sõma. A Toni yeela a Zooze t’a kõ-a-la sugri. A yeelame t’a sũur nooma wʋsgo, a sẽn tõog n kõ a  Zooze sugrã, la t’a pʋd n pa tõe n bãng n bilg a sũ-noogã sẽn yaa to-to wã ye. A Zeova ninga a Toni barka, a sẽn yãk yam n kõ sugrã.

15-16. A Peter ne a Sue kibarã sõnga yãmb tɩ y bãng bõe sugrã kũun wɛɛngẽ?

¹⁵ Yʋʋmd 1985 wã sasa, daar a ye, a Peter ne a pag a Sue kẽnga tigsg Rĩungã roogẽ. B sẽn wa n be be wã, bõmb n pusg zĩig pʋgẽ. Mik yaa rao a ye n da wa n ning bõmbã beenẽ. A Sue pogla wʋsg hal n ket n namsd rũndã-rũndã. A pa le wʋmd yũug me ye. * A Peter ne a Sue ra nong n sokda b mens yaa: ‘Yaa ãnda soab n yaa n sak n tʋm tʋʋm-wẽng a woto?’ Yʋʋm wʋsg poore, b yõka rao ning sẽn wa n ning bõmbã Rĩungã roogẽ wã, n kao-a bʋʋd n kẽes-a bãens roog t’a segd n pa be a yõor tɛka. A ra pa a Zeova Kaset soab ye. B sẽn sok a Peter ne a Sue n gese b sã n kõo raoã sugrã, b leokame yaa: “A Zeova sõnga tõnd tɩ d bãng tɩ ned sã n tar sũ-kẽka, tõe n booga a laafɩ wã la a sũ-noogã. Rẽ n so tɩ yellã poor bala, d kosa a Zeova t’a sõng-d tɩ d ra tall sũ-kẽka, la d kell n vɩɩmd ne sũur pʋgẽ bãane.”

¹⁶ Baa ne b sẽn kõ raoã sugrã, mi n pa nana ne-b ye. B yeelame: “Wakat ninga, sã n wa pa nana ne a Sue, a sãmpogrã yĩnga, d sũurã yikdame. La d pa tagsd rẽ zug n kaoos ye. Rẽ kɩtdame tɩ tao-tao bal tɩ d sũurã le sigame. Togs sɩdã, d tõe n yeelame tɩ sẽn ning-a bõmbã Rĩungã roogẽ wã sã n wa lebg d tẽed-n-taaga, d na n sak n deeg-a-la ne sũ-noogo. Yel-kãngã sõnga tõnd tɩ d bãng tɩ Biiblã noyã tũub nafdame. Kɩtame tɩ d paam d mens ne yɛl wʋsg d sẽn da pa tẽed menga. D sẽn mi tɩ ka la bilfu, a Zeova na n wa remsa yel-kɛgã fãa wã belsd-d-la wʋsgo.”

17. A Mariya kibarã sõnga yãmb tɩ y bãng bõe sugrã kũun wɛɛngẽ?

¹⁷ Saam-bi-poak a ye yʋʋr sẽn boond  t’a Mariya sẽn wa n lebg a Zeova Kaset soabã, rẽ t’a ra kẽe kãadem n tar kom-bõones a yiibu. A sɩdã pa sak n lebg a Zeova Kaset soab ye. A wa n yoome, n daag a zakã rãmb n base. Ad a Mariya sẽn yeele: “M sɩdã sẽn wa n daag maam ne d kamb a yiibã n basã, m bãnga ned sũ-sãang sẽn yaa to-to, a pag bɩ a sɩd sã n loog n bas-a. M da pa tẽeda, m da maanda m bãngẽ, m sũur da yika wʋsgo. M da ningda m meng taal me.” Baa ne b sẽn kao b kãadmã, yellã ra ket n namsda a Mariya. A Mariya paasame yaa: “M yɩɩrã la m sũ-sãangã kaoosa kiis wʋsgo, la m wa n bãngame tɩ rat n sãama maam ne a Zeova zoodã, la maam ne m tẽed-n-taasã zems-n-taarã.” A Mariya yeelame tɩ masã, a basa sũ-kẽkã, la a pa le tʋlg tɩ bũmb sẽn yaa wẽng paam a pĩnd sɩdã ye. A saagdame tɩ daar n wat t’a pĩnd sɩdã na n wa sak n lebg a Zeova Kaset soaba. A Mariya tagsda bark nins sẽn wat beoogã yell n tɩ yɩɩda. A kell n wuba a kambã yẽ a yembre, tɩ b sak n tũud a Zeova. Rũndã-rũndã, yẽ ne a kambã la a yagensã tũuda a Zeova tɩ b sũy noomẽ.

18. Bõe n kɩt tɩ d tõe n bas d yam ne a Zeova sẽn yaa bʋ-kaood sẽn ka to wã?

¹⁸ D sũur noomame, d sẽn mi tɩ pa tõnd n yãkd b sẽn segd n kao ned bʋʋd to-to wã. Yaa a Zeova sẽn yaa bʋ-kaood sẽn ka to wã n na n ges rẽ yelle. (Rom. 14:10-12) D tõe n basa d yam t’a na n ket n kaooda bʋʋd tɩ zemsd ne noy nins sẽn zems zãngã a sẽn lugl sẽn yaa sõma ne wẽngã wɛɛngẽ wã. (Sɩng. 18:25; 1 Rĩm. 8:32) A pa na n maan bũmb sẽn pa tɩrg a bada.

19. Bõe la a Zeova sẽn yaa bʋ-kaood sẽn zems zãngã na n maane?

¹⁹ D gũuda wakat ning a Zeova sẽn na n wa kɩt tɩ yɛl nins fãa ninsaalbã sẽn pa zems zãngã ne yel-wẽnã sẽn wa ne wã sa fasɩ wã. Wakat kãnga, d toogã, d namsgã la d sũ-sãamsã fãa na n saame. (Yɩɩn. 72:12-14; Vẽn. 21:3, 4) D pa na n tol n le tẽeg rẽ yell ye. Nand tɩ wakat kãng d sẽn gũud ne d sũur fãa wã ta, d sẽn paam t’a Zeova naan tõnd tɩ d tõe n dɩk a togs-n-taar n kõt d taabã sugrã noom-d-la wʋsgo.