1. Tae-eb Jehovaba ǃhobasen ra ǁore-aona ra mîmâiba?

 JEHOVAB a sida Kuru-ao, ǂHanub mā-ao tsî a ǀGoraǃgâ-ao. Xaweb ge noxoba a sida di ǀnamxaǃnâ ǀhomsi ǁGû. (Psa. 100:3; Jes. 33:22) ǁÎb ǃoagu da ga ǁore tsî amabes ǃnâ ǃhausen o. Ob ge sida ǀûbas di turab ǀguiba ūhâ tama, xaweb ge ra ǀûba da ǂgao. (Psa. 86:5) Kēbo-aob Jesajab ǃnâ-ūb ge Jehovaba ǀnamxaǃnâ ǁkhaeǂgaosa ge mā: ‘Sadu ǁoren ga ǀaob khami ǀapa, xawen ge gūǀûn khami nî ǃuri.’—Jes. 1:18.

2. ǂKhîsa ǀhōsagusisa ūhâs ǃaroma da tae-e nî dī?

² ǀOasa kurusa da ūhâ tama amaga da ge mî. Tsî xūna ra dī, nau khoena ra tsûtsûna. (Jak. 3:2) Xawe ǁnās ge ǂâibasen tama hâ. ǀGū ǀhōsagusisa da nau khoen ǀkha a ūhâ ǁoa ti. Ūhâ ǁkhā da ge a, nau khoena ǀûbasa da ga ǁkhāǁkhāsen o. (ǂKhm. 17:9; 19:11; Mat. 18:21, 22) ǂKhari ǀgaugu ǃnâ da ga tsûtsû gu, ob ge Jehovaba ra ǂhâba î da ǀûbagu. (Kol. 3:13) ǃGâi ǃaromasa da ge ūhâ, ǁnāsa dīs ǃaroma. Tsî nēn hoan ǂam-ai Jehovab ge māsenxase ‘ǃnāsase’ ra ǀûba da.—Jes. 55:7.

3. Tae-e da nē ǁkhāǁkhāǃâs ǃnâ nî ǃhoaǃgao?

³ Nē ǁkhāǁkhāǃâs ǃnâ da ge nî ǃhoaǃgao. Matin ǀoasa kurusa ūhâ tama khoena, Jehovab di ǀûba ǀnamxasiba a ǁgae  ǁkhā ǀgausa. Mâ ǁore-e da ǀhaohâb ǃûi-aoga nî mîba? Tae-i ǃaromab Jehovaba ra ǂkhâǃnâ da î da nau khoena ǀûba? Tsî tae-e da sida ǃgâsana xu a ǁkhāǁkhāsen ǁkhā. Hîna ge nau khoen di ǁoren ǃaroma ǀgaisase tsûba a hōǃâna?

4. (a) Jehovab di ǃoaba-ao i ga tsū ǁore-e dī o, o i tae-e nî dī? (b) Mâ ǃereamsa gu ǀhaohâb ǃûi-aoga ūhâ?

⁴ ǀHaohâb di ǃûi-aoga da ge nî mîba khoe-i ga tsū ǁoreba dī o. Nēti ī ǁoren ge 1 Korinteǁîn 6:9, 10 ǃnâ a hō-e ǁkhā. Tsū ǁoren ge Elob di ǂhanuba ǃgôaǃgâ tama hâ. Xristeǁî-i ga ǁnāti i ǁore-e dī, o i ge Jehovaba ǃoa ǀgores ǃnâ nî ǀgū. Tsî ǀhaohâb ǃûi-aoga ǃoas tsîna nî ī. (Psa. 32:5; Jak. 5:14) Mâ ǃereamsa gu ǀhaohâb ǃûi-aoga ūhâ? Jehovab ǀguib ge ǁnā ǀgaiba ūhâ, khoe-i di ǁoreba ǀoasase ǀûbasa. Tsîb ge sida ǁorena ra ǀûba xoremarib ǃnâ-ū ǀgui. * Xawe Jehovab ge ǀhaohâb ǃûi-aoga ǃereamsa mā hâ, î gu xoade ra sîsenūse kō. Khoe-i ǀhaohâb ǃnâ a hâ ǀgara ǁkhāsa. (1Kor. 5:12) ǁNāsa sīǃnâs ǃaroma gu ge, sao ra dîdi ǃereamde nî ǂanǂui: Nē khoe-e ǀnai go aiǂhomisen hâ i ǁoreba dīsa? Nē khoe-e ǂgui ǃnāde ǁoreba dī hâ? Xawe ǂhâǂhâse ǁgauǁgauna hâ, nē khoe-i amabes ǃnâ ra ǃhausen ǃkhaisa? ǁGauǁgauna hâ Jehovab ǁî-e ǀûba hâsa?—ǃNǃkh. 3:19.

5. Mâ ǀkhaega ǀhaohâb ǃûi-aoga xu a ǀkhī ǁkhā?

⁵ ǀHaohâb ǃûi-aogu ga ǁoreba go dī khoe-i ǀkha ǀhao o. O gu ge ǀhommi ǃnâ ge dīhe mîǁguib tsîna ǃhūbaib ai nî dī. (Mat. 18:18) Nē mîǁguiga mati ǀhaohâba ra tsâǀkhā? ǀHaohâb ra ǁkhaubahe amaga i ge ǃhobasen ǂgao tama hâ ǁore-ao-e. ǀHaohâba xu ra ūǂuihe î-i, tā Jehovab di gūna tsûtsû. (1Kor. 5:6, 7, 11-13; Tit. 3:10, 11) Tsî i ge ǁore-ao-i tsîna a hui ǁkhā î-i ǃhobasen. Tsî ǃgâiba Jehovab di ǀûbasa xu hō. (Luk. 5:32) ǀHaohâb ǃûi-aogu ge Jehovaba ǃoa ra ǀgore îb ǃhobasen go khoe-e hui. Î-i ǀhōsagusisa ǁkhapa ǁîb ǀkha ǀgaiǀgai.—Jak. 5:15.

6. Khoe-i ga ǂnûiǂuihe toas khaoǃgâ, ǁî-e noxoba ǀûbahe ǁkhā-e? ǁGuiǃā re.

⁶ ǀNîsi i ge khoe-e ǀhaohâb ǃûi-aogu ǀkha i ǀhao hâs khaoǃgâ, ǃhobasen tama hâ. ǁNāti i mâsib ǃnâ i ge ǁî-e ǀhaohâba xu nî ǂnûiǂuihe. Xawe i ga ǁî-e ǃhūb di ǂhanuba ǁnâuǀnam tama io. O gu ge ǀhaohâb ǃûi-aoga ǁî-e dī i go xū-e xu sâu tide. Jehovab ge ǃhūb di ǂhanuba mā-am hâ î-i mâ khoe-i hoa-e ǁkharahe. Tsî ǀgoraǃgâhe, ǂhanuga i ga sao tama io. Nēsi i ga ǃhobasen tamas ka io ǃhobasen tama i xawes tsîna. (Rom. 13:4) Xawe i ga ǁî-e mûǂan o, dī i go xū-i ǃgâi tama hâsa. Tsî ǁî-i ǂâi ǀgaub tsî dīga ǀkharaǀkhara o. Ob ge Jehovaba a māsenxa ǁî-e ǀûbasa. (Luk. 15:17-24) Tsî ǁnās ge a ama ǁî-i ga tsū ǁoreba dīs tsîna.—2Kro. 33:9, 12, 13; 1Tim. 1:15.

7. Mâ ǀgaub ǃnâ da sida ǃoagu ra ǁore khoe-e ǀûba ǁkhā?

⁷ Kaise da ge ra gangan, sida ǁnā ǃereamsa ūhâ tamasa. Î da mîǁgui Jehovab ǁnā ǁore-ao-e a ǀûba ǁkhāsa. Xawe i ge xū-e hâ, sida a mîǁgui ǁkhā-e. Tae-e ǁnā-e? ǀNî ǁaegu ai i ge khoe-e sida ra tsûtsû, ǀnîsi ǀgaisases tsîna. Xawe i ge ǁî-e ǀnîsi sida ai ǀûba-e a ǂgan ǁkhā. Tsî ǀnî ǁaega i ge khoe-e ǀûbaba sida ai ǂgan tide. ǁNāti i ga ī xawes tsîna da ge a mîǁgui ǁkhā. Î da ǁnā khoe-e ǀûba tsî tā ǁî-i ǀkha ǁaixa. Nēs ge amabes ǃnâ ǁaeb tsî ǁguiǂgāsens tsîna  ǂhâ hâ. ǀGaisase da ga tsûtsûhe o. Septemberi 15, 1994ǁî kurib di Watchtower ǂkhinib ge ra mî: “ǁOre-ao-e du ga ǀûba o, os ge nēsa ǂâibasen tama hâ ǁoreba du ra kō ǃkharu ti. Xristeǁî-i hîna ra ǀûba i ge ra ǂgomǃgâ, Jehovab nî ǃamkuse nē ǃkhaisa ǀgoraǃgâsa. ǁÎb ge a ǂhanu-ai hoaraga ǃhūbaib ǃnâ. Tsîb ge nî dī î da ǂhanu-aisiba ǂhanu ǁaeb ai ǃkhōǃoa.” Tae-i ǃaromab Jehovaba ra ǂkhâǃnâ da î da ǀûbagu. Tsî ǂhanu-aisiba ǁîb di ǃomǁae ǁnāxu?

8. Mati i khoe-e Jehovab ǀkhomxaǂgaosiba, i ra ǃgôaǃgâsa ra ǁgau?

⁸ ǀÛbas ge Jehovab di ǀkhomxasiba ra ǁgau. ǀGui ǂkhōs ǃnâb ge Jesuba, Jehovaba ǀhōnkhoeb hîna ge. ǃGāb ǂgui mari-e surude hâ îba, a ǀûbab xa ge ǃhoa. Xawe nē ǃgāb ǀûbahe geb ge, nau ǃgāb ǃoagu ǀkhomxaǂgaosiba ge ǁgau tama hâ i. Hîna ge ǁîba ǀoro mari-e surude hâ îba. (Mat. 18:23-35) Jesuba tae-e gere ǁkhāǁkhā da? Amabes ǃnâ da ga ǃgôaǃgâ o, Jehovab di ǃgâisiba sida ǃoagu. O da ge nî ǁgari-e î da nau khoena ǀûba. (Psa. 103:9) The Watchtower ǂkhanib ge kurirona ǃkharu tsî ge mî: “Matikō ǂgui ǃnāde da ga sida di ǃgâsana ga ra ǀûba. Xawe i ge tātsēs tsîna ǀgui tide sida di Elob ra ǁgauda ǀkhomxasib. Tsî ǀûbab hînab ra Xristub ǃnâ-ū mādab ǀkha.”

9. Ham-eb Jehovaba ǀkhomxaǂgaosiba ra ǁgau? (Mateub 6:14, 15)

⁹ Sida ga nauna ǀûba o, Ob ge Jehovab tsîna nî ǀûba da. Jehovab ge ǀkhomma, ǁnān hîna ǀkhomxaǂgaona ra ǁgau. (Mat. 5:7; Jak. 2:13) Jesub ge ǁnāsa ǃgāsase ge ǂoaxa ū. ǁÎb di ǁkhāǁkhāsabegab ge ǁkhāǁkhā o, mati gu nî ǀgoresa. (Khomai re Mateub 6:14, 15 sa.) Tsî ǁkhā xū-e da ge ra ǁkhāǁkhāsen, Jehovab ge Joba ǃoa a mî xūna xu. ǁNā ǂgomǂgomsa khoeb ge ǀgaisase ǂgaob ai ge tsûtsûhe. ǃNona khoegu Elifab, Bildadi tsî Sofar hâ gu ge mî xūn xa. Jehovab ge Joba ge mîba îb ǁîga ǀgoreba. Jobi ge ǁnāsa dī toas khaoǃgâb ge Jehovaba ǁîba ge ǀkhae.—Job. 42:8-10.

10. Mâ ǀgaub ǃnâ da ra tsûtsûsen, ǁaixa hâse da ga hâ ǀgara o? (Efeseǁîn 4:31, 32)

¹⁰ Tsûtsûsen da ge ra ǁaixa hâse da ga hâ o. ǁAib ge ǃgom xū-i khami ī. ǁNā-amagab ge Jehovaba ra ǂhâba, î da ǁnā xūna ǁnāxu, tsî ǂkhîba hōǁkhā. (Khomai re Efeseǁîn 4:31, 32 sa.) ǂKhâǃnâ dab ge ra î da ‘ǁaiba xu ūdabasen tsî ǁaixasiba ǁnāxu.’ (Psa. 37:8) ǁNā ǀapemāsa da ga sao o, o i ge nî hui da. Tsî khoe-i ga tsûtsû da o, tsî da ga ǁaiba ǃkhōǀgara. O da ge sida tsâsigu tsî ǂurusib tsîna a tsûtsû ǁkhā. (ǂKhm. 14:30) Nau khoe-i ǀkha da ga noxoba ǁaixa ǀgara. O i ge ǁî-e tsûtsû tama hâ. Tsî ǁnās ge sida ǃgā-e ās ǀkha a ǀgui. ǁNās ge nau khoe-e tsûtsû tama hâ. ǁNā-amaga da ga nauna ǀûba o, o da ge ǀkhaeba aitsama ra māsen. (ǂKhm. 11:17) Tsî da ge ǁnās ǀkha ǂkhîba ūhâ. Tsî noxoba a aiǃgû ǁkhā Jehovab di ǃoabas ǃnâ.

11. Elobmîsa dī ǃoas xa tae-e ra mî? (Romeǁîn 12:19-21)

¹¹ ǀKhaos ge Jehovab di. Jehovab ge ǁnā ǀgaiba mā da tama hâ, î da sida tsūdī hâ khoe-e dī ǃoa. (Khomai re Romeǁîn 12:19-21 sa.) Sida ǀoasa kurusa ūhâ tama amaga da ge. ǁNā ǁkhāsiba ūhâ tama î da ǂhanu ǀgaub ai ǀgoraǃgâ, Elob khami. (Heb. 4:13) ǀNî ǁaegu ai i ge sida di tsâsiga a mā-am da ǁoa î da, ǃgâi ǀgaub ai ǀgoraǃgâ. Jehovab ge Jakobuba ge  ǂkhâǃnâ, îb xoa: “ǁAixasib Elob di ǂhanu-aisiba sîsenǂui tama xuige.” (Jak. 1:20) ǂGomǃgâ ǁkhā da ge a Jehovab nî ǂhanu xū-e dī. Tsî ǃgâise ǀgoraǃgâ ǃkhaisa.

12. Mati da ǂgomǃgâsiba Jehovab ǂhanu-aisib ǃnâ ǁgau ǁkhā?

¹² ǀÛbas ge ǂgomǃgâsib hîna da Jehovab di ǂhanu-aisib ǃnâ ūhâba ra ǁgau. Jehovaba da ga ǂgomǃgâ o, îb hoa xūna ǂhanuse ǀgoraǃgâ. O da ge ra ǁgau ǂgomǃgâ da rasa Jehovab hoa ǁgai xūn. Hîna ǁoreb xa ǃaromahe hâna nî dī-ūnu ǃkhaisa. ǁÎb di ǀasa mîmâisa ǃhūbaib ǃnâ i ge tsûtsûsa. Tsî ‘ǃkharu ge xūna tātsē ǁkhawa ǂâihōhe tide. Tamas ka io ǂâis ǃnâ hā tide.’ (Jes. 65:17) Xawe sida ga tsûtsûhe o, īǁkhā-e ǁaixa ǀûsa. ǁNā khoe-i hîna sida tsûtsû hâ i ǃoagu? Kō re matin ge ǀnîna nēsa dīsa.

13-14. Tae-e du go Tonib tsî Joséb ǀûbab aiǁgausa xu ǁkhāǁkhāsen?

¹³ ǂGui ǃgâsan ge ge mîǁgui, în nau khoena ǀûba. ǀGaisasen ge tsûtsûhe hâ i xawes tsîna. Tae-i ǀkhaegan ge hō?

¹⁴ Jehovab di ǃoaba-ao kaib nîs aiǃâb ge. Tonib, * Philippines ǃnâ ra hâba ge ǂanǂui. ǁÎb di kai abutib ge a ǃgamhesa, José di ǀon hâ khoeb xa. Xawe ǁnā ǁaeb aib ge Toniba kaise ge ǁaixasa khoe i. Tsî ǁnās ǀkha gere dī ǃoa ǂgao. Joséb ge ǃkhōsis ǃnâ ge ǂgāhe, ǁîb ge dī xū-i ǃaroma. Xaweb ge Joséba ēga ǃkhōsisa xu ge ǂoa kaihe. Tsîb ge Toniba ge mîǁgui, ǁîbab nî ôaǂui tsî nî ǃgam ǃkhaisa. Tsîb ge ǁnās ǃaroma ǃapusa ge ǁama. Tonib ge Elobmîsa Jehovab di ǃoaba-aon ǀkha ge ǁkhāǁkhāsen tsoatsoa. Tsîb ge ra mî: “Elobmîsa ta ge ǁkhāǁkhāsen khami ta ge ge mûǂan. Ti ǀgauga ta nî ǀkharaǀkhara ǃkhaisa. Tsî ǁnās ge ti ǁaiba ǁnāxusa ge ǃkhōǂgā hâ i.” Tsî ǁae-i khaoǃgâb ge Toniba ge ǁāǁnâhe. Tsî ge ǀhaohâb ǃûi-ao kai. ǂÂis ǀguisa hî re, matib gere tsâsa. ǂAnǂuib ge o Joséb tsîn ge ǁāǁnâhesa, Jehovab di ǃoaba-aon di ǀguib ase. ǁÎkha ge ǀhao, o kha ge ge ǁnamǂgāgu. Tonib ge Joséba ge mîba, ǁîbab ge ǀûba ǃkhaisa. Tonib ge ra mî, nē ǀûbas ge kai  ǂkhîba mābi ǃkhaisa. Nē tsâsibab mati nî ǁguiǃāsab ge a ǀū. Jehovab ge Tonib ge māsenxase a ǀûba, o ge ǀkhae bi.

15-16. Tae-e du go Peteri tsî Sue hâra di aiǁgausa xu ǁkhāǁkhāsen?

¹⁵ Peteri tsî Sue hâra 1985ǁî kuri, saali dawa hâ. Hîna i ge bombsa ge ǃhui. ǀGui khoeb ge Bombsa saali ǃnâ ge ǂnûi hâ i. Sues ge ǀgaisase ge tsû. Tsî ǁnās ǀkha mûs tsî ǁnâus ǃgomsina ūhâ. Tsî xū-e hame tamas ka io a ǃkhapa ǁoa. * Peteri tsî Sue hâra ge ǀnî ǁaega ra dîsen, ‘mâ ǃnôa khoeba, nēti i ǁgai xū-e ge dība?’ ǂGui kurin khaoǃgâb ge, ǁnā xū-e ge dī khoeba ge ǃkhō-e. ǁÎb ge Jehovaba ge ǃoaba tama hâ i. Tsî ûib ǁkharaba ǃkhōsis ǃnâ ge hō. Dîhe ra ge o, ǁnā khoeba ra ge ǀûbasa, o ra ge Peteri tsî Sues tsîna ge mî: “Jehovab ge ra ǁkhāǁkhā da aiǃgû tsî da ga ǂâi o tsûb tsî ǁaib tsîn xa. O da aitsâma sorosise sida di ǂâidi ǃnâ a tsûtsûsen ǁkhāsa. ǁNā-amagam ge, ǀnai Jehovaba ge ǂgan. Îb huimi ǁnā ǁaiba sîm ûiga xu ūbēsa.”

¹⁶ ǁÎra î ge supuba i ǁnā khoeba ǀûbasa? Hî-i, hoaǁaes ose. Aiǃgû tsî ra ge ra mî: “ǁAeba xu ǁaeb ǀkha î ge Sues di tsûna gere tsoatsoa o. Om ge ǁkhapa aisa xu gere ǁaixa tsoatsoa. Xawem ge nē ǂâiǀgaugu ai hâ ǀgara tama hâ. ǁNā-amaga i ge ra bē, ǁnās ǂam-aim ge sîm di ǂgaogu ǃgamsiba xu ra mî. Bomsa ge ǂnûi khoeb ga ǀguitsē sada di ǃgâsan di ǃâ kai o. Om ge nî ǁkhoreǁhare bi. Nēs ge ge ǁkhāǁkhā mi, Elobmîs di ǀapemāde da ga ra sao, o da ǃnorasase ra tsâsa. Tsî Elobmîs ǀapemādi ge ǂgui ǀgaugu ai ra ǃnora kai da, ǂâi da ras xa. ǁKhaeǂgaohem ge ra Jehovab nî ǀgūǁae hoa xūna, ǃgâiǃgâi ǃkhaisam a ǂan amaga.”

17. Tae-e du go Myras aiǁgausa xu ǁkhāǁkhāsen?

¹⁷ Myras ge ǃgamme tsîs ǀnai ǀgam ǀgôana ūhâ. Hîna amaba ge ǁkhāǁkhāsen  tsoatsoa. ǁÎs di aob ge amaba ge ūǃoa tama hâ i. ǁAe-i khaoǃgâb ge ǀai tsî omarisa ge ǁnāxu. Myras ge ra mî: “Ti aob ge tita tsî sîm ǀgam ǀgôara tsîna a ǁnāxu o. O ta ge ǁnā tsâsiba ge hōǃâ. ǂGuin ra ǁîn di ǀnamsaben xan ga ǀapexūhe, o ra hōǃâ ga. Aiǁgause, ǃhuri, ǂgomǀû, ǃoa, ǃhausen, aitsama ǀhapiǂgā-amsen tsî ǁaixasa.” ǃGammeb ge ǀam xawes ge noxoba tsûba gere hōǃâ. Myras ge aiǃgû tsî ra mî: “ǁNā tsâsigu ge ǃgâi tamase ǁkhâga ge tsâ kai te. Tsî ta ge ge mûǂan ǁnās ge Jehovab. Tsî nau khoen ǀkha da ūhâ ǀhōsagusisa gere tsâǀkhāsa.” Myras ge nēsi ra mî, ǁîs ǁaixa tama hâsa. Tsîs ǁîs ge ǃgamme hâ i aob ǀkha i tsū xū-e nî īsa ǂgao tama hâsa. ǂGoms ge ra ǀgui tsēb, Jehovab ǀgūse nî sī ǃkhaisa. Myras ge ǁîs di ǂâisa hānîǁaeb ai ra ūhâ. ǃGamme tama taras ases ge, ǁîs di ǀgam ǀgôana, Jehovaba ra ǃoabase ge kaikai. Nētsēs ge Myra sa ǃgâiaǂgaoba ūhâ. ǀGuiba Jehovaba ǁîs di ǀgôan tsî omaris ǀkha ǃoabasa.

18. Mâ ǂgomǃgâsiba da Jehovab ǃnâ a ūhâ ǁkhā, ǀGapi ǀgoraǃgâ-aob ase?

¹⁸ ǂKhîba i ge ra māda ǂan da ga o. Sida a mîǁgui ǁoasa, mati i khoe-e nî ǀgoraǃgâhesa. ǀGapi ǀgoraǃgâ-aob a amagab ge Jehovaba nē ǂhâǂhâsa sîsen-e nî kōǃgâ. (Rom. 14:10-12) ǀOasa ǂgomǃgâsiba da ge a ūhâ ǁkhā. ǁÎb hoaǁae ǂhanu ǀgaugu ai nî ǀgoraǃgâsa. (Gen. 18:25; 1Gao. 8:32) ǁÎb ge tātsē ǂhanu-oǃnâ xū-e dī tide.

19. Jehovab di ǀoasa ǂhanuba tae-e nî dīǀoaǀoa?

¹⁹ Mûǂui da ge ra ǁnā ǁaeb hînab Jehovaba ǀoasase. Khoesi ǀoasa tama kurus tsî ǁoreb tsîna nî ūbēsa. ǁNā ǁaeb ai i ge sida di sorosi tsûgu. Tsî hânîse ī tsûn hoana nî ūbē. (Psa. 72:12-14; J.ǂHa. 21:3, 4) ǁÎn ge tātsē sida di ǂâi di ǃnâ hā tide. ǁNā ǁkhoaxa ǁaeba da ge ǃâu hâ. Tsî da ge kaise ra gangan. Jehovab ǀûbas ǁkhāsiba mā da hâ ǃkhais ǃaroma, î da ǁîba ǁgae.