1. ¿Tlake kiniljuia Jehová katli moyolkuepaj?

 JEHOVÁ techchijchijki, techmaka tlanauatili, techtlajtolsenkaua, uan nojkia eli se toTata katli tlauel techiknelia (Sal. 100:3; Is. 33:22). Yeka, kema titlajtlakolchiuaj ya techtlapojpoljuia, pampa kiampa kineki kichiuas (Sal. 86:5). Jehová kitekiuik tlajtolpanextijketl Isaías ma kiijkuilo se keski tlamantli tlen tlauel techyolchikaua. Ya kiijtok: “Yonke tlauel miak inmotlajtlakoljuaj hasta nesi chichiltik, na nijchiuas ma eli chipauak keja nextli” (Is. 1:18).

2. ¿Tlake uelis tijchiuasej tlaj tijnekij kuali timouikasej ininuaya sekinok?

² Nochi titlajtlakolejkej, yeka kemantika tikijtouaj uan tijchiuaj tlen kinyolkokoua sekinok (Sant. 3:2). Maske kiampa pano, tlaj nochipa timotlapojpoljuiaj uelis timouampojchiuasej ininuaya sekinok (Prov. 17:9; 19:11; Mat. 18:21, 22). Jehová kineki ma timotlapojpoljuikaj maske amo timoixpanoj ika se ueyi tlamantli (Col. 3:13). Uan moneki kiampa tijchiuasej pampa Jehová nochipa techtlapojpoljuia ika nochi iyolo (Is. 55:7).

3. ¿Tlake tikitasej ipan ni tlamachtili?

³ Ipan ni tlamachtili tikitasej maske titlajtlakolejkej, uelis tijchiuasej kej Jehová kema tikintlapojpoljuisej sekinok. ¿Tlake tlajtlakoli moneki tikiniljuisej ueuejtlakamej? ¿Kenke Jehová kineki ma timotlapojpoljuikaj? Uan, ¿tlake uelis tijyekosej tlen se keskij toikniuaj katli tlaijiyouijkej pampa sekinok kichijkej tlen amo kuali?

4. 1) ¿Tlake moneki kichiuas katli tlajtlakolchijtok? 2) ¿Tlake moneki kichiuasej ueuejtlakamej?

⁴ Kema se toikni kichiua se ueyi tlajtlakoli, moneki kimatisej ueuejtlakamej. Ipan 1 Corintios 6:9, 10, kiijtoua se keski uejueyi tlajtlakoli. Nochi ni tlajtlakoli, tlauel kiixpano toTeotsij itlanauatiljuaj. Tlaj se akajya kichijtok se tlen ni ueyi tlajtlakoli, moneki kiiljuis Jehová ma kitlapojpoljui uan nojkia moneki kiniljuis ueuejtlakamej (Sal. 32:5; Sant. 5:14). ¿Tlake tekitl kipiaj ueuejtlakamej? Jehová kintekimakatok ma kiitakaj ika Biblia tlaj katli tlajtlakolchijki nojua uelis itstos ipan tlanechikoli, maske kipia nochi tlanauatili uan tetlapojpoljuia ika Jesús imikilis * (1 Cor. 5:12). Kema ueuejtlakamej kiitaj tlen panotok, kichiuaj kampeka motlatsintokisej: ¿ipa moiljuijtoya tlajtlakolchiuas? ¿Kitlatik nopa tlajtlakoli? ¿Miakpa kiampa kichijki? ¿Kinextia nelia moyolkueptok? ¿Onka se keski tlamantli tlen kinextia Jehová kitlapojpoljuijtok? (Hech. 3:19).

5. ¿Kenijkatsa tlen kichiuaj ueuejtlakamej kinpaleuia toikniuaj?

⁵ Kema ueuejtlakamej kamanaltij iuaya katli tlajtlakolchijtok, san kinekij kitlapejpenisej tlen Jehová ya kitlapejpenik iluikak (Mat. 18:18). ¿Kenijkatsa kinpaleuia toikniuaj tlen tlanechikoli? Tlaj katli tlajtlakolchijtok amo moyolkuepa, uajka ayokmo kikauiliaj ma itsto ipan tlanechikoli, kiampa toikniuaj amo monejnemiltisej kej ya (1 Cor. 5:6, 7, 11-13; Tito 3:10, 11). Nojkia, uelis kipaleuis katli tlajtlakolchijtok ma moyolkuepa uan kiampa toTeotsij kitlapojpoljuis (Luc. 5:32). Ueuejtlakamej momaijtouaj uan kiiljuiaj Jehová ma kipaleui katli moyolkueptok sampa kuali ma tlaneltoka (Sant. 5:15).

6. Xikixtoma tlaj Jehová kitlapojpoljuis se katli kikixtijtokej tlen tlanechikoli.

⁶ Ma timoiljuikaj katli tlajtlakolchijki amo kinextia moyolkueptok kema ueuejtlakamej kamanaltij iuaya, uan yeka kikixtiaj tlen tlanechikoli. Uan tlaj kiixpanok tlanauatili tlen kitlalijtokej tekichiuanij, ueuejtlakamej amo kimanauisej tlaj monekis kitlatsakuiltisej. Jehová kinkajtok tekichiuanij ma kitlajtolsenkauakaj uan ma kitlatsakuiltikaj katli kiixpano tlanauatili, maske kinextis moyolkueptok o amo (Rom. 13:4). Tlaj katli tlaixpanok teipa motlalnamiktia, moyolkuepa ika nochi iyolo, kipatla itlalnamikilis uan kej monejnemiltia, Jehová kitlapojpoljuis (Luc. 15:17-24). Ya kitlapojpoljuis maske kichijki uejueyi tlajtlakoli (2 Crón. 33:9, 12, 13; 1 Tim. 1:15).

7. ¿Tlake nojkia moneki tijchiuasej ika katli techixpanok?

⁷ Maske tiyolpakij pampa tojuantij amo tijtlapejpeniaj tlaj Jehová kitlapojpoljuis o amo katli tlaixpanok, kena moneki tijtlapejpenisej tlaj tijtlapojpoljuisej katli tlauel techyolkokok maske amo tleno techiljuis. Kema kiampa panos, moneki tijtlapejpenisej tlaj tijtlapojpoljuisej o tikilkauasej tlen techchiuilik uan ayokmo tikualantosej iuaya. Kemantika monekis  panos miak tonali uan tijmatisej ouij tijtlapojpoljuisej tlaj tlauel techyolkokok. La Atalaya septiembre 15, 1994, kiijtoua: “Tijtlapojpoljuis katli mitsixpanok, amo kiijtosneki kuali tikita tlen kichijki. Kema se toikni tetlapojpoljuia kinextia kikaua imako Jehová nopa kuesoli pampa san ya xitlauak tetlajtolsenkaua uan kisenkauas nopa kuesoli kema kinamikis”. ¿Kenke Jehová kineki ma titetlapojpoljuikaj uan ma tijkauakaj imako nopa kuesoli o ma timotemachikaj ya kichiuas tlen xitlauak?

8. ¿Kenijkatsa uelis tijnextisej tijtlaskamatij pampa Jehová techtlasojtla?

⁸ Kema titetlapojpoljuiaj tijnextiaj tijtlaskamatij pampa Jehová techtlasojtla. Ika se tlapoualistli, Jesús kiijtok Jehová eli kej se tekojtli katli kitlapojpoljuik itlatekipanojka katli kitlauikiliyaya tlauel miak tomij. Maske ya kiampa kichijki, itekipanojka amo kitlasojtlak se iuampo katli kentsi kitlauikiliyaya (Mat. 18:23-35). ¿Tlake kinejki techmachtis Jesús? Tlaj nelnelia tijtlaskamatij Jehová pampa techtlasojtla, uajka nojkia tikintlapojpoljuisej sekinok (Sal. 103:9). Ipan La Atalaya tlen uejkajkia kiski kiijtok maske miakpa titetlapojpoljuisej, amo kema tijchiuasej sanse “kej Jehová techtlapojpoljuia uan techtlasojtla ika Jesús imikilis”.

9. Kej kiijtoua Mateo 6:14, 15, ¿ajkia inijuantij kintlasojtla Jehová?

⁹ Tlaj titetlapojpoljuisej, Jehová techtlapojpoljuis. Ya kintlasojtla katli tetlasojtlaj (Mat. 5:7; Sant. 2:13). Jesús kiampa kinextik kema kinmachtik itokilijkauaj kenijkatsa uelis momaijtosej (xijpoua Mateo 6:14, 15). Jehová ipan kiiljuijtoya Job kiampa ma kichiua kema Elifaz, Bildad uan Zofar kiyolkokojkej ika tlen kiiljuijkej. ToTeotsij kiiljuik Job ma kinmaijto, uan kema kiampa kichijki kiselik miak tlateochiualistli (Job 42:8-10).

10. Kej kiijtoua Efesios 4:31, 32, ¿kenke tlauel techtlanauia kema amo tikilkauaj tlen techchiuilijkej?

¹⁰ Tlauel techtlanauia kema amo tikilkauaj tlen techchiuilijkej. Kema nojua tikualantokej eli kej kema tijmamajtokej se etik tlamamali, uan Jehová amo kineki kiampa ma tijyolmajtokaj (xijpoua Efesios 4:31, 32). Yeka, techiljuia: “Amo ximokualankamaka. Xijtlalkaui kualantli” (Sal. 37:8). Tlaj tijchiuaj tlen Jehová techtlajtolmaka tlauel techpaleuis, pampa amo timokokosej uan amo kitlanauis totlalnamikilis (Prov. 14:30). Tlaj tlauel tijkualankaitaj katli techyolkokok, kejuak tikijiskiaj se tlamantli tlen techmiktis. Yeka, kema titetlapojpoljuiaj kejuak timomakaj se kuali tlamantli (Prov. 11:17). Kema kiampa tijchiuaj, tijpiaj tlaseuilistli uan techpaleuia nojua ma tijtekipanojtokaj Jehová.

11. Kej kiijtoua Romanos 12:19-21, ¿kenke amo kinamiki timomakuepasej?

¹¹ Ma tijkauakaj imako Jehová tlen techchiuilijkej. Ya amo kema techiljuia ma timomakuepakaj (xijpoua Romanos 12:19-21). Tojuantij titlajtlakolejkej, yeka amo tiuelij tijxitlauaj se kuesoli kej Jehová (Heb. 4:13). Nojkia,  tlen tijyolmatij uelis kichiuas ouij ma tijmatikaj kenijkatsa titetlajtolsenkauasej. Santiago kiijtok: “Tokualankayo titlakamej axtechpaleuia para tijyolpaktisej toTeko, niyon axtechchiua tixitlauakej iixpa” (Sant. 1:20). Uelis timotemachisej Jehová kichiuas tlen xitlauak uan kiitas kiampa ma mochiua.

12. ¿Kenijkatsa uelis tijnextisej san Jehová kuali tetlajtolsenkaua?

¹² Kema titetlapojpoljuiaj tijnextiaj timotemachiaj san Jehová kuali tetlajtolsenkaua. Tlaj tijkauaj imako tlen techchiuilijtokej, tijnextiaj timotemachiaj ya kisenkauas nochi kuesoli tlen techpanotok pampa tielij titlajtlakolejkej. Ipan nopa yankuik Tlaltipaktli tlen techtenkauilijtok ayokmo kema tikilnamikisej yon techyolkokos tlen techchiuilijkej (Is. 65:17). ¿Nelnelia uelis tikilkauasej tlen techchiuilijkej uan ayokmo tikualantosej maske tlauel techyolkokojkej? Ma tikitakaj tlake kichijtokej sekinok.

13, 14. ¿Tlake techmachtia tlen kinpanok Tony uan José?

¹³ Miakej toikniuaj kintlapojpoljuijkej sekinok maske tlauel kinyolkokojkej. ¿Kenijkatsa kinpaleuijtok?

¹⁴ Ma tikitakaj tlen kipanok Tony * katli eua Filipinas. Kema ayamo kitekipanouayaya Jehová, kimiktijkej iikni achtouiejketl. Kimatki se tlakatl katli itoka José kimiktijtoya iikni. Tony tlauel mosisiniyaya uan yeka kinekiyaya momakuepas. José kitsajkej pampa temiktik. Uan kema kikixtijkej, Tony kiijtok kimiktiskia kema kipantiskia, yeka mokouik se pistola. Maske kiampa moiljuijtoya, teipa pejki momachtia Biblia ininuaya Jehová itlajtoltemakauaj. Ya kiijtoua: “Kema panok tonali, nijyekok monekiyaya nijpatlas nonemilis uan ayokmo nitekualankaitas”. Tony moatsonpoliuiltik uan teipa pejki tlatekipanoua kej ueuejtlakatl. Uan  tlauel mosentlachilik kema kimatki José nojkia mochijtoya se Jehová itekipanojka. Kema mopantijkej, chikauak monajnauajkej uan kiiljuik José ma kitlapojpoljui. Tony tlauel yolpajki kema kitlapojpoljuik José. Ya kiyekok tetlapojpoljuis uan Jehová tlauel kiteochijki.

15, 16. ¿Tlake tijyekouaj ika tlen kinpanok Peter uan Sue?

¹⁵ Ipan 1985, Peter uan Sue itstoyaj ipan tlanechikoli kema toponki se bomba pampa se tlakatl kitlalijtoya. Ika tlen panok, Sue ayokmo tlaijnejki, ayokmo tlachixki yon tlakajki. * Kemantika motlatsintokiyayaj: “¿Ajkia kichijki ni tlamantli?”. Kema panok miak xiuitl, nopa tlakatl kitsajkej uan kiiljuijkej ayokmo kema kisaskia. Kema Peter uan Sue kintlatsintokijkej tlaj kitlapojpoljuijtoyaj nopa tlakatl, inijuantij kiijtojkej: “Jehová techmachtijtok kema amo tikilkauaj tlen techchiuilijkej, uelis kitlanauis totlakayo uan totlalnamikilis, uan nojkia amo kuali tijyolmatisej. Yeka, kema techpanok ni tlamantli, nima tikiljuijkej Jehová ma techpaleui amo ma tijkualankaitakaj nopa maseuali uan nojua ma tiyolpaktokaj”.

¹⁶ Toikni Peter uan isiua kemantika kimatij ouij kitlapojpoljuisej nopa tlakatl. Inijuantij kiijtouaj: “Kema Sue tlauel tlaijiyouia ika tlen techpanok, kichiua sampa tlauel ma tikualanikaj. Maske kiampa techpano, tijchiuaj kampeka amo san ya nopa timoiljuijtosej, nopa techpaleuia sampa kuali ma tijyolmatikaj. Yeka, ika nochi toyolo tikijtouaj tlaj nopa tlakatl se tonali elis se toikni, tlauel kuali tijselisej. Ika tlen techpanok, tikitstokej tlen Biblia tetlajtolmaka techpaleuia kuali ma tijyolmatikaj. Nojkia, tlauel techyolchikaua pampa tijmatij Jehová nechka kikualtlalis nochi tlen pano”.

17. ¿Tlake techmachtia tlen kipanok Myra?

 ¹⁷ Maske Myra kiixmatki Jehová kema ya monamiktijtoya uan ya kinpixtoya omej iokichpiljuaj, iueue amo kema kinejki momachtis. Teipa, iueue kikajkayajki uan kinkajtejki. Myra kiijtoua: “Kema noueue techkajtejki, nijyolmatki sanse kej katli kitlauelkauaj, ayokmo nimotemachik ipan ya, nimoyolkokok, nimotlajtlakoltiyaya uan tlauel nikualaniyaya”. Maske mokajkej, nojua tlauel kiyolkokouayaya tlen kichiuilijtoyaj. Myra nojkia kiijtoua: “Miak metstli kiampa nijyolmatki, uan nikitak nopa kichiuayaya ayokmo kuali ma nimouika iuaya Jehová uan sekinok”. Nama, Myra kiijtoua ayokmo kualani uan ayokmo kikualankaita katli elki iueue. Uan kichia se tonali nojkia ma momachti Biblia. Myra mosentlalia ipan tlen kiselis teipa, amo ipan tlen kipanok. Maske iselti kiniskaltik ikoneuaj uan kinmachtik Biblia, nama tlauel yolpaki pampa sansejko tlatekipanouaj, uan nojkia ika iyexuaj uan iixuiuaj.

18. ¿Ipan tlake uelis timotemachisej pampa Jehová tlauel kuali tetlajtolsenkaua?

¹⁸ Kema tikitaj tojuantij amo tijtlapejpenisej kenijkatsa Jehová kintlajtolsenkauas maseualmej, tlauel tiyolpakij pampa san ya tlauel kuali tetlajtolsenkaua (Rom. 14:10-12). Uelis timotemachisej ya nochipa kuali tetlajtolsenkauas pampa ya kimati tlake tlamantli eli kuali uan tlake amo (Gén. 18:25; 1 Rey. 8:32). Ya amo kema kichiuas tlen amo xitlauak.

19. ¿Tlake kichiuas teipa Jehová pampa kuali tetlajtolsenkaua?

¹⁹ Jehová kisenkauas nochi kuesoli tlen onka pampa titlajtlakolejkej. ¡Nelia tijchiaj ma asi nopa tonali! Ya kichiuas ayokmo ma techkoko yon se tlamantli uan kuali ma tijyolmatikaj (Sal. 72:12-14; Apoc. 21:3, 4). Ayokmo tikilnamikisej tlen amo kuali. Maske ayamo asi nopa tonali, nojua ma tijchijtokaj kampeka titetlapojpoljuisej.