1. ¿Tlen kinmiluia Jehová akinmej melauak moyolkopaj?

 JEHOVÁ otechchijchi, ye technauatia tlen moneki tikchiuaskej, ye Juez pero noijki toTajtsin uan techtlasojtla (Sal. 100:3; Is. 33:22). Ik non, tla titlajtlakolchiuaj uan timoyolkopaj, amo san techtlapojpoluia, ye kineki ijkon kichiuas (Sal. 86:5). Tlen Jehová okijto ika profeta Isaías techyolchikaua. Ye okijto: “Maski namotlajtlakol yetos ken escarlata, mokopas istak ken nieve” (Is. 1:18).

2. ¿Tlen moneki tikchiuaskej para kuali timouikaskej inmiuan oksekimej?

² Tinochtin titlajtlakolejkej, ik non, ualeua tikchiuaj uan tikijtouaj tlen kinyolkokoua oksekimej (Sant. 3:2). Para kuali timouikaskej inmiuan oksekimej, moneki tikintlapojpoluiskej (Prov. 17:9; 19:11; Mat. 18:21, 22). Jehová kineki ma tikintlapojpoluikan akinmej techchiuiliaj tlen amo kuali (Col. 3:13, TNM). Moneki ijkon tikchiuaskej porque ye nochipa techtlapojpoluia (Is. 55:7).

3. ¿Tlen tikitaskej?

³ Axkan tikitaskej maski titlajtlakolejkej uelis tikchiuaskej ken Jehová uan tikintlapojpoluiskej oksekimej.  ¿Tlen tlajtlakoli moneki tikinmiluiskej tlayekankej? ¿Tleka Jehová kineki ma tikintlapojpoluikan oksekimej? ¿Tlen techmachtia ijkuak tokniuan tlajyouiaj porque oksekimej tlajtlakolchiuaj?

4. (1) ¿Tlen moneki kichiuas se tokni tla sapanoua otlajtlakolchi? (2) ¿Tlen moneki kichiuaskej tlayekankej?

⁴ Moneki tikinmiluiskej tlayekankej ijkuak ikaj sapanoua tlajtlakolchiua. 1 Corintios 6:9, 10 kijtoua ken sekimej sapanoua tlajtlakolchiuaj. Ijkuak ikaj ijkon kichiua kiteititia amo kitlakamati toTajtsin Dios. Tla se tokni sapanoua tlajtlakolchiua, moneki kiluis Jehová ma kitlapojpolui uan noijki moneki kinmiluis tlayekankej (Sal. 32:5; Sant. 5:14). ¿Tlen moneki kichiuaskej tlayekankej? Jehová okitemakak iKone, ik non, techtlapojpoluia. * Pero kinkauilia tlayekankej ma kipejpenakan ika Biblia kox kikixtiskej itech tlanechikol akin otlajtlakolchi (1 Cor. 5:12). Ik non, moneki ma motlajtlanikan: ¿Yomokuayejyekojtoka tlajtlakolchiuas? ¿Amo okinekiaya kijtos otlajtlakolchi? ¿Ouejka otlajtlakolchijtoka? ¿Kiteititia melauak moyolkopa? ¿Ken tikmatij Jehová yokitlapojpolui? (Hech. 3:19).

5. ¿Ken techpaleuia ijkuak kikixtiaj akin amo moyolkopa?

⁵ Ijkuak tlayekankej motlapouiaj iuan akin otlajtlakolchi, motlatlaujtiaj uan kikauiliaj ma kinyekana espíritu santo uan ijkon kichiuaskej tlen kijtouaj principios bíblicos (Mat. 18:18). ¿Ken techpaleuia ijkuak kikixtiaj akin amo moyolkopa? Ijkon tinochtin kuali tikatej (1 Cor. 5:6, 7, 11-13; Tito 3:10, 11). Noijki kipaleuia akin otlajtlakolchi ma moyolkopa uan ijkon Jehová kitlapojpoluis (Luc. 5:32). Tlayekankej kitlatlaujtiaj Jehová ma kitlapojpolui akin moyolkopa uan ijkon oksepa iuan ma mouika (Sant. 5:15).

6. Xikijto tla uelis Jehová kitlapojpoluis akin kikixtiaj itech tlanechikol.

⁶ Ma tikijtokan tlayekankej motlapouiaj iuan akin otlajtlakolchi uan tla amo moyolkopa, kikixtiaj itech nechikol. Tla amo kintlakamati tekiuajkej, tlayekankej amo kipaleuiskej. Jehová kinkauilia tekiuajkej ma kinmixkomakakan uan ma kintsakuakan akinmej amo kintlakamatij, tekiuajkej amo kitaj kox moyolkopaj noso amo (Rom. 13:4). Jehová kineki kitlapojpoluis akin tlajtlakolchiua tla melauak moyolkopa uan kipatla tlen mokuayejyekoua uan tlen kichiua (Luc. 15:17-24). Maski sapanoua otlajtlakolchi ye kitlapojpoluis (2 Crón. 33:9, 12, 13; 1 Tim. 1:15).

7. ¿Tlen kijtosneki ijkuak ikaj tiktlapojpoluiaj?

⁷ Tiyolpakij tikmatiskej tejuan amo moneki tikijtoskej kox Jehová kitlapojpoluis akin otlajtlakolchi. Pero ¿tlen moneki tikchiuaskej? Xamo ikaj otechchiuili tlen amo kuali uan techiluia ma tiktlapojpoluikan noso xamo amo techiluis ma tiktlapojpoluikan. Moneki tikpejpenaskej tla  tiktlapojpoluiskej uan ayakmo iuan tikualaniskej. Xamo oui tikitaskej tiktlapojpoluiskej tla sapanoua otechyolkoko. Revista Akin Tetlapouijtok 15 de septiembre 1994, okijto: “Ijkuak ikaj tiktlapojpoluiaj amo kijtosneki amo tlajtlakoli tlen okichi, kijtosneki tikkauiliaj Jehová ma kiyektlali tlen opanok. Ye se Juez yolkuali uan kimati keman kiyektlalis”. ¿Tleka Jehová kineki ma tikintlapojpoluikan oksekimej uan ma tikkauilikan ye ma tlaixkomaka?

8. ¿Ken tikteititiaj tiktlasojkamatiliaj Jehová teiknomati?

⁸ Tikteititiaj tiktlasojkamatiliaj Jehová teiknomati ijkuak titetlapojpoluiaj. Jesús okijto Jehová ken se tlakatl tlen okiknomatki itlakeual tlen okiuikiliaya miak tomin uan amo ueli okitlaxtlauiliaya. Pero non tlakeuali amo okitlapojpolui itlakeual tlen amo miak tomin okiuikiliaya (Mat. 18:23-35). ¿Tlen otechmachti Jesús? Tla tiktlasojkamatiliaj Jehová techiknomati, tikintlapojpoluiskej oksekimej (Sal. 103:9). Yiuejkika revista Akin Tetlapouijtok okijto, maski miak uelta ma tikintlapojpoluikan oksekimej, “amo keman titetlapojpoluiskej nion titeiknomatiskej ijkon ken Jehová kichiua ika Cristo”.

9. ¿Akinmej kinmiknomati Jehová? (Mateo 6:14, 15).

⁹ Jehová techtlapojpoluis tla titetlapojpoluiaj. Ye kinmiknomati akinmej teiknomatij (Mat. 5:7; Sant. 2:13). Jesús ijkon okiteititi ijkuak imachtijkauan okinmachti ken omonekiaya motlatlaujtiskej (xiktlajtolti Mateo 6:14, 15). Jehová ijkon otlamachti ijkuak okatka itekipanojka Job. Ye okixiko tlen okiluijkej Elifaz, Bildad uan Zofar. Jehová okilui Job inpatka ma motlatlaujti, ijkuakon okiteochi (Job 42:8-10).

10. ¿Tleka amo kuali san ma tikualantokan porque ikaj itlaj otechchiuili? (Efesios 4:31, 32).

¹⁰ Amo techpaleuis tla san tikualantokej porque ikaj itlaj otechchiuili. Tla san tikualantokej yetoskia ken itlaj tikmamajtokej pero Jehová amo kineki ijkon ma tikchijtokan (xiktlajtolti Efesios 4:31, 32). Ye techiluia: “Ximoyolseui uan ayakmo xikualani” (Sal. 37:8). Tla tikchiuaj tlen ompa kijtoua, techpaleuis porque amo timokokoskej uan kuali timomachiliskej (Prov. 14:30). Tla ikaj otechchiuili tlen amo kuali uan amo tikilkauaj, yetoskia ken tikonij veneno uan san tejuan timotlajyouiltiaj. Tejuan kuali tikatej, ijkuak tikintlapojpoluiaj oksekimej (Prov. 11:17). Kuali timomachiliaj uan non techpaleuia ma tiktekichiuilijtokan Jehová.

11. ¿Kijtoua Biblia ma timomakopakan? (Romanos 12:19-21).

¹¹ Ma tikkauilikan Jehová ma momakopa. Jehová amo kineki ma tikinchiuilikan tlen amo kuali akinmej itlaj techchiuiliaj (xiktlajtolti Romanos 12:19-21). Tejuan titlajtlakolejkej uan amo tikajsikamatij nochi, ik non, amo ueli titlaixkomakaj ijkon ken Jehová kichiua (Heb. 4:13). Noijki ualeua tlen tikmachiliaj amo techkauiliaj  ma timokuayejyekokan ken moneki. Santiago okijkuilo: “Ijkuak se tlakatl kualantok, amo kichiwa tlan Dios kipaktia” (Sant. 1:20). Ma tikneltokakan Jehová kiyektlalis tlen otechchiuilijkej.

12. ¿Ken tikteititiaj tikneltokaj Jehová kiyektlalis ken moneki tlen otechchiuilijkej?

¹² Ijkuak titetlapojpoluiaj tikteititiaj tikneltokaj Jehová kiyektlalis ken moneki tlen otechchiuilijkej. Tla tikkauiliaj Jehová ma kiyektlali tlen techpanotok, tikteititiaj tikneltokaj ye kiyektlalis tlen techchiuiliaj. Tla otechyolkokojkej, itech xochitlali ‘ayakmo tikilnamikiskej, nion ayakmo yetos itech toyoloʼ (Is. 65:17). ¿Uelis ayakmo tikualantoskej uan tikilkauaskej tlen otechchiuilijkej? Ma tikitakan tlen okinpaleui sekimej.

13, 14. ¿Tlen techmachtia tlen okinpanok Tony uan José?

¹³ Miakej tokniuan okintlapojpoluijkej akinmej okinchiuilijkej tlen amo kuali. ¿Ken okinpaleui ijkon okichijkej?

¹⁴ Ma tikitakan tlen okipanok Tony, * ye chanti ompa Filipinas. Ijkuak ayamo omochiuaya iTlaixpantijka Jehová se ikni tlen otlayekanaya oixpoliuik. Satepan okimatki se tlakatl tlen itoka José okimikti ikni. Tony sapanoua okualaniaya uan otlateuiaya, ik non, okinekiaya momakopas. José okitsakej porque otemikti uan ijkuak okikixtijkej, Tony okijto kimiktis, ik non, okiko se pistola. Pero ijkuakon iTlaixpantijkauan Jehová opejki kimachtiaj. Ye okijto: “Ijkuak onimomachtijtoka onikitak omonekiaya nikpatlas tlen onikchiuaya, ayakmo omonekiaya ma nikualani”. Tony omoapolakti uan kanin monechikoua opejki tlapaleuia ken tlayekanki. ¡Amo ueli okineltokaya ijkuak okimatki José noijki omochi iTlaixpantijka Jehová! Ijkuak  omoajsikej omonauajtekej, Tony okilui José yokitlapojpolui. Tony kijtoua sapanoua yolpaki porque okitlapojpolui José. Non tokni otetlapojpolui uan Jehová okiteochi.

15, 16. ¿Tlen techmachtia tlen okinpanok Peter uan Sue?

¹⁵ Itech 1985, kanin omonechikojkej Peter uan Sue itlaj otopontekiski. Se tlakatl ompa okitlali se bomba. Sue ayakmo tlajnekui uan sapanoua omokojko. * Miak uelta nonmej tokniuan omotlajtlaniayaj: ¿Akin okichi itlaj sapanoua amo kuali? Akin ijkon okichi amo okatka iTlaixpantijka Jehová uan okitsakej miak xiuitl. Ijkuak okintlajtlanijkej Peter uan Sue kox okitlapojpoluijkej, yejuan okijtojkej: “Jehová techmachtia tla tikualantokej san tejuan timotlajyouiltiaj. Ik non, otikiluijkej ma techpaleui para amo tikualantoskej uan para ma timoyolseuijtokan”.

¹⁶ ¿Okinchiuili oui tokniuan tetlapojpoluiskej? Kema. Ma tikitakan tlen okijtojkej: “Ualeua ijkuak Sue tlajyouia oksepa tikualanij pero tla amo timokuayejyekojtokej tlen opanok, ayakmo ijkon timomachiliaj. Yotikijtojkej tla non tlakatl mochiuaskia tokni kuali tikseliskiaj. Tlen otechpanok techititia principios bíblicos techpaleuiaj. Xamo amo timokuayejyekouaj ken sapanoua techpaleuiaj. Timoyolseuiaj porque tikmatij san niman Jehová kiyektlalis nochi tlen techpanotok”.

17. ¿Tlen techmachtia tlen okipanok Myra?

¹⁷ Myra okixmatki Jehová ijkuak yokipiaya inamik uan ome ikoneuan. Inamik amo okinek tlaneltokas. Satepan  okikajkaya uan okinkajte. Myra okijto: “Ijkuak nonamik otechkajtej amo ueli onikneltokaya. Onimomachili ijkon ken akinmej kinkajkayauaj, onimoyolkokouaya, onikijtouaya xamo notlajtlakol uan onikualaniaya”. Maski inamik okinkajte ye ok omoyolkokouaya porque okilnamikiaya okikajkaya. Myra noijki okijto: “Miak metstli ijkon onimomachilijtoka uan onikitak ayakmo kuali onimouikaya iuan Jehová uan inmiuan oksekimej”. Axkan Myra kijtoua ayakmo kualani uan amo kineki ma kipano tlen amo kuali akin okatka inamik. Ye kineki ma tlaneltoka. Myra ayakmo mokuayejyekoua tlen opanok, ye mokuayejyekoua tlen panos satepan. Maski iselti okinmiskalti ikoneuan uan okinpaleui ma tlaneltokakan, axkan ye yolpaki kitekichiuilia Jehová iuan infamilias ikoneuan.

18. Tla Jehová Juez tlen okachi ueyititok, ¿tlen moneki tikneltokaskej?

¹⁸ Jehová Juez tlen okachi ueyititok. Tejuan amo moneki ma techtekipacho ken kinmixkomakas oksekimej uan non techyolseuia (Rom. 14:10-12). Moneki tikneltokaskej ye kuali tlaixkomakas porque san ye kimati tlen kuali uan tlen amo kuali (Gén. 18:25; 1 Rey. 8:32). Ye nochipa kichiua tlen kuali.

19. ¿Tlen kichiuas Jehová satepan?

¹⁹ Jehová kiyektlalis nochi tlen yotechpanok porque titlajtlakolejkej. ¡Tiknekij ma ajsi non tonal! Ye kichiuas ayakmo oksepa ma timoyolkokokan (Sal. 72:12-14; Apoc. 21:3, 4). Ayakmo tikilnamikiskej tlen otechpanok. Ijkuak ayamo ajsi non tonal moneki ma tikchiuakan ken Jehová uan ma tikintlapojpoluikan oksekimej.