1. Cigondiso capi cinopa Jehovha kuno vashaishi vakhauya?

 PIKIJA Jehovha ndiyena Musiki wedu, Mupi wo Mutemo no Mutongi, iyena ndi Baba vano rudo. (Nduyo 100:3; Isaia 33:22) Patinomushaishira no kukhauya ngo mwoyo wese, iyena anokwanisa kutiregerera. (Nduyo 86:5) Ecishandisa muporofita Isaya, Jehovha wakatipa cigondiso ici co rudo: “Nokunyati bzixaixi bzenyu bzikapsuka inga udothwe hwo mukurambira, bzinozocena inga thonje.”—Isaia 1:18.

2. Kudari tinoda kuva no ushamwari waushoni no vamweni, zvicinyi zvatinodikana kuita?

² Zvecivoneka kuti atizivi kukwana, tese tingananga no kuita zviro zvinonyangajisa vamweni. (Jakobo 3:2) Asi izvi azvirevi kuti atingakwanisi kuva no ushamwari waushoni na ivona. Tingajijira kuva vandhu vanoregerera. (Mazwi Akangwara 17:9; 19:11; Mateu 18:21, 22) Kudari tikanyangajisa umweni ngo ciro cidokowane, Jehovha anoda kuti tiregerere. (Vakorose 3:13) Tina thangwe raushoni rinotiita kuti tiite zvondhozvo. Jehovha “anokungurisisa.”—Isaia 55:7.

3. Muvhunjo japi jatinozodavira pa jijo iyi?

³ Pa jijo iyi tinozovona kuti, kuitisa kudini vandhu vacikazivi kukwana vangatevejera kuregerera ka Jehovha. Zvishaishi zvapi zvatinodikana kuvhunja vakuru? Ngenyi Jehovha anoda kuti itusu tiregerere vamweni? Ngozvapi zvatingajija kuvhira ku hama no hambzaji jedu, jakatambujika maningi ngo zvishaishi zvo vamweni?

4. (a) Mushandiri wa Jehovha paanoita cishaishi cikuru, ngozvapi zvaanodikana kuita? (b) Ngozvapi zvinodikana kuitwa ngo vakuru pavanonga vecibhuya no mushaishiwo?

⁴ Kudari ari wese akaita cishaishi cikuru, tinodikana kuvhunja vakuru. Muezaniso munganani jo zvishaishi zvikuru, jinowanika pana 1 Vakorinte 6:9, 10. Kuita zvishaishi zvikuru kunopwanya mutemo ja Mwari. Kudari Mukristu akaita cishaishi, anodikana kuita mukumbiro ecikumbira kuregerehwa ndi Jehovha no kuvhunja vakuru vo ungano. (Nduyo 32:5; Jakobo 5:14) Waro ngorapi basa rino vakuru? Ndi Jehovha basi anokwanisa kuregerera zvishaishi mukuperera akacijikira pa muripo wa Jesu. * Asi iyena wakapekeja vakuru basa rokuvona dangani mushaishi anodikana kwenderera mberi ari mu ungano kana kuti haiwa. (1 Vakorinte 5:12) Kuti vakwanise kuita izvi vanodikana kuwana mupinguro jo muvhunjo jinoteverari: Kunanga kuti waita cishaishi ici ngo cabomo? Kunanga kuti iyena wakaeja kufisa cishaishico ku vamweni? Wakaita cishaishico kovhaza jakawanda? Ciro cinosisira maningi, zviripo zvinovonesa kuti iyena wakhauya ngo mwoyo wese? Zviripo zvinovonesa kuti Jehovha wamuregerera?—Mabasa o Vapostori 3:19.

5. Basa rinoita vakuru rinobesera kudini ungano?

⁵ Vakuru pavanoenda kobhuya no mushaishi wiya, cido cavo ngo cokusunga zviro zvinozwirana no zvasungwa kumatenga. (Mateu 18:18) Nasiriro iyi, inobeseresa kudini ungano? Iyona inoita kuti ungano ive yakajiviririka ngokuti mushaishi wiya aazoendereri mberi ari mu ungano nokutizve aazokhuvazi vashandiri vanosisira va Jehovha. (1 Vakorinte 5:6, 7, 11-13; Tito 3:10, 11) Inoitazve kuti mushaishi akhauye no kubesereka ngo kuregerehwa ndi Jehovha. (Ruka 5:32) Vakuru vanomukumbiririra no kumubesera kuti aitisezve nane ushamwari hwake na Jehovha.—Jakobo 5:15.

6. Kudari mundhu akajingwa, zvinokwanisika kuregerehwa ndi Jehovha? Sananguranyi.

⁶ Ngatiti mushaishi uwu, anonga acizivi kukhauya vakuru pavanoenda kobhuya naye. Pamugariro wakadari, anodikana kujingwa mu ungano. Kudari waita cishaishi cinopwanya mutemo wo nyika, vakuru avakwanisi kumubesera kuti atame kupanicwa ndizvona. Jehovha anotendera kuti utongi, utonge no kupanica mundhu ari wese waita cishaishi cinopwanya mutemo azvinenyi dangani wakhauya kana haiwa. (Varoma 13:4) Asi kudari pakufamba ko nguva mundhuwo wozwisisa kuti zvaaitaro zvainga zvakashata, wocinja manera ake okurangarira no kuita zviro, Jehovha wakanasiririka kuti amuregerere. (Ruka 15:17-24) Iyena anoita izvi pikija cishaishico cainga cakashatisisa kamare.—2 Kronike 33:9, 12, 13; 1 Timoti 1:15.

7. Munjira yapi itusu tingaregerera mundhu watishaishira?

⁷ Tinodakara maningi ngo kuziva kuti Jehovha aazivi kutipa basa ro kutema civaringo cokuti iyena anozoregerera mundhu kana haiwa. Pikija zvakadaro, pano ciro catinodikana kuita. Ngocapi? Pa mugariro jimweni mundhu angatotishaishira mu njira yakashata kamare asi angatikumbira kuregerehwa. Nguva jimweni aatokumbiri. Pikija zvakadaro, itusu tinodikana kumuregerera kusiyapo kuviga bundu. Zvokadi kamare izvi zvingatora nguva no kupeja simba redu kudari mundhu wondhowo akatinyangajisa maningi. Murindiri wo 15 wa Setembro wo 1994  mu Cishona, wakananga kudari: “Zivanyivo kuti pamunoregerera mushaishi, azvirevi kuti imwimwi munonga mecitendera zvishaishi zvaakaitaro. Kuno Makristu, kuregerera zvinoreva kusiya zvese mu nyara ya Jehovha. Ndiyena Mutongi wakarungama wo pasi pese no mudenga, anozoita zvakarungama pa nguva kwayo.” Waro ngenyi Jehovha anotivhunja kuti tiregerere no kusiya zvese mu nyara jake?

8. Kuitisa kudini kuregerera vamweni kunokhombija kubongesera unyasha watinokhombijihwa ndi Jehovha?

⁸ Patinoregerera tinokhombija kuti tiri kubongesera ngo unyasha watinotatijihwa ndi Jehovha. Pa muezaniso umweni, Jesu wakaezanisa Jehovha na patarau vakasiya kuti muranda wavo atame kupagari mare yaainga acikakwanisi kupagari. Asi muranda wakaregerehwari aazivi kutaja muranda doni wake ngo unyasha, uwo wainga ecimufiyari mare shomani. (Mateu 18:23-35) Jesu waida kujijisenyi ngo muezaniso uwu? Kudari itusu tecidakara ngo unyasha watinokhombijihwa ndi Jehovha, zvinozotiitavo kuti tiregerere vamweni. (Nduyo 103:9) Murindiri umweni wakananga kudari makore akaperari: “Azvinenyi vhaza ngana yo taregerera vadoni vedu, azvingaezani no kuregerehwa no unyasha hwotakakhombijihwa ndi Mwari ecishandisa Jesu Kristu.”

9. Jehovha anokhombijira unyasha hwake kuna ani? (Mateu 6:14, 15)

⁹ Kudari tikaregerera vamweni, Jehovha anozotiregereravo. Jehovha anokhombija unyasha hwake kuna vaya vanokhombija unyasha. (Mateu 5:7; Jakobo 2:13) Jesu wakanasa kujekesa izvi, paakajijisa vajiji vake manera okuita mukumbiro. (Verenganyi Mateu 6:14, 15.) Kare kamare, Jehovha wakanangavo zviro zvakafanana ku mushandiri wake Jobe. Mushandiri uwu wakagondeka wakahwajihwa maningi ngo magama akashata aakavhunjwa ngo vanarume vatatu vaizwi Erifazi, Bhirdhadhe na Zofari. Jehovha wakavhunja Jobe kuti avaitire mukumbiro. Jobe paakapera kuita izvi, Jehovha wakamukomborera.—Jobe 42:8-10.

10. Ngenyi kuviga bundu kunokhuvaza? (Vaefeso 4:31, 32)

¹⁰ Tinojikhuvaza pacedu kudari tikaviga bundu. Kuviga bundu kwakadari inga kuthwara mutoro unorema. Jehovha aadi kuti itusu tijizwe teciremehwa. Ngo kudaro, atidikani kuva vandhu vanoviga bundu. (Verenganyi Vaefeso 4:31, 32.) Iyena anotivhunja kudari, “regai uxungu, siai kuceneka.” (Nduyo 37:8) Kudari tikatevera ngwajo iyi, zvinozotibesera. Kudari tikaenderera mberi takanyangajwa no mundhu watinyangajisa, zvinozoita kuti tive no zvineso mu upenyu hwedu. (Mazwi Akangwara 14:30) Kuviga bundu akukhuvazi mundhu watinyangajisaro, zvakadari inga kumwa nvhenene, ikona akuzokhuvazi mundhu umweni. Ngo kudaro, patinoregerera vamweni tinonga tecijiitira zviro zvaushoni. (Mazwi Akangwara 11:17) Tinova no runyararo mu murangariro no mu mwoyo mwedu, zvinotibeserazve kuti tikwanise kwenderera mberi tecishandira Jehovha.

11. Bhaibheri rinonangenyi ngo pamusoro po kuhwirijira? (Varoma 12:19-21)

¹¹ Kuhwirijira ngo ka Jehovha. Jehovha aazivi kutipa mutoro wo kupanica mundhu watishaishira. (Verenganyi Varoma 12:19-21.) Ngo ndava yo kuva vandhu vacikazivi kukwana, atikwanisi kutonga shwiro mu njira kwayo inga zvinoita Mwari. (Vahebheru 4:13) Nguva jimweni, mazwiro edu angaita kuti tinesehwe kutonga shwiro mu njira yaushoni.  Jehovha wakafemera Jakobo kuti atare kudari: “Ushungu hwo mundhu, ahuviisi ururami hwa Mwari.” (Jakobo 1:20) Tingava no cokwadi co kuti Jehovha anozoita zvakanaka no zvakarurama.

12. Tingakhombijisa kudini kuti tinothemba urungami hwa Jehovha?

¹² Kuregerera kuvonesa kuti tinothemba urungami hwa Jehovha. Patinosiya shwiro mu nyara ja Jehovha, tinokhombija kuti tinothemba kuti iyena anozoitisa nane zviro zvese zvinoviiswa ngo ushaishi. Mu nyika imbza iri kuviyari, zviro zvakashata “abzizocerecejwibze, abzizodihwibze mu mwoyo.” (Isaia 65:17) Asi kudari itusu tanyangajiswa maningi, zvinokwanisika kutama kunyangajwa no kutama kuviga bundu here? Hina, ngativone kuti vamweni vakazviitisa kudini izvi.

13-14. Ngozvapi zvamajija ngo pamusoro po kuregerera kuvhira ku muezaniso wa Toni na Jhoze?

¹³ Hama no hambzaji zinji, jakatema civaringo co kuregerera vamweni pikija jainga jakanyangajwa maningi ngo zvakaitikaro. Ngoapi makomborero ovakawana ngo kuita zvondhozvo?

¹⁴ Acito ajija cokwadi, Toni * anogara ku Firipina, wakaziva kuti nevanji wake vakauraiwa ngo mwanarume umweni anodanwa Jhoze. Pa kufamba ko nguva, Toni wakava mundhu anovereketa ngo hasha no anoda maningi zvokutakana. Waitoda kuhwirijira. Jhoze wakasungwa, wodihwa mukadheya ngo ndava yo cishaishi caakaitari. Pa kufamba ko nguva, iyena wakabudiswa mukadheya. Toni wakatema civaringo co kumupsaka no kuda kumuuraya. Iyena wakatotenga mabhandidhu kuti akwanirise izvi. Asi pa mukuvo wondhowo kamare, Toni wakatanga kujija Bhaibheri no Zvapupu zva Jehovha. Iyena wakati: “Pa jijo yangu, ndakajija kuti ndinodikana kuita cinjo pa undhu hwangu no manera angu okurangarira. Izvi zvaibatanijavo kusiya kunyangajwa kwandainga nako.” Toni wakaguma pa kubhabhatijwa, pa kufamba ko nguva wogajwa inga mukuru wo ungano. Amborangariranyi kukahamara kwaakava nako, paakaziva kuti Jhoze waingavo  wabhabhatijwa inga mushandiri wa Jehovha. Vovaviri povakasongana, vakakumbatirana. Toni wakatovhunja Jhoze kuti wainga amuregerera. Iyena wakananga kuti kuregerera kwaakaitari, kwakamuita kuti ave no mudakaro mukuru waacikakwanisi kusanangura. Hina, Jehovha wakakomborera Toni ngo kuva kwake no cido co kuda kuregerera.

15-16. Ngozvapi zvamajija ngo pamusoro po kuregerera kuvhira ku muezaniso wa hama Pita na hambzaji Sue?

¹⁵ Mu gore ro 1985, hama Pita na hambzaji Sue, povainga pa musongano jo ungano pakaitika zviro zvinosuruvarisa maningi. Kwakaputika bhombha mu Nyumba yo Umambo. Mwanarume umweni wainga wakaridira mondhomo. Hambzaji Sue vakakhuvazika maningi mu meso no njeve. Cimwenizve, ivona avacakwanisi kuzwa kunuhira ko ciri cese. * Hama Pita na hambzaji Sue vaijivhunjisa kudari: ‘Mundhu womushovonyi angaita zviro zvakashata kudari?’ Makore mazinji akatevera, mwanarume wakadiraya bhombha mu Nyumba yo Umambo, wakasungwa wodihwa mu kadheya. Wotongehwa kugara mondhomo mbhera kufa kwake. Pavakavhunjiswa dangani ivona vanoregerera mwanarume uwu, hama Pita na hambzaji Sue vakati: “Jehovha wakatijijisa kuti kuviga bundu no kugara tecirangarira zvakaitikari, zvinotikhuvaza mu mativi ese o upenyu hwedu. Ngo kudaro, pakandoperaya kuitika ngozi iyi, takakumbira Jehovha kuti atibesere kuregerera mundhu wakazviitaro. Ngo kudaro, tinokwanisa kupona mu runyararo.”

¹⁶ Kunanga kuti zvakavarerukira kuti ivona varegerere mwanarume uwu? Haiwa. Ivona vakaenderera mberi veciti: “Nguva jimweni, Sue paanohwajihwa ngo ndava yo zvivonje zvake, tinotangazve kunyangajwa. Asi atigari tecirangarira zviro izvi, ngo kukasika mazwiro aya anopera. Kunasa kunanga, kudari mwanarume uwu akava hama yedu, tinozonasa kumuashira kamare. Zvakaitikari, zvakatijijisa kuti ndhungamiriro jo Bhaibheri jinobesera  maningi, jinototibesera mbhera mu njira yoticikarangariri. Tinovangiswazve ngo kuziva kuti Jehovha sambiri pano anozopeja ushati hwese.”

17. Ngozvapi zvamajija ngo pamusoro po kuregerera kuvha ku muezaniso wa hambzaji Mira?

¹⁷ Hambzaji Mira vakajija cokwadi povainga vapera kucadha, vainga vaano vana vaviri. Mwamuna wavo aazivi kutenda kujija cokwadi. Pakufamba ko nguva iyena wakaita upombo, vosiya mbhuri yavo. Hambzaji Mira vakati: “Mwamunangu paakasiya inini no vana vangu vaviri, ndakava no mazwiro anova no vandhu vazinji pavanosiiwa ngo vandhu vavanoda, ndakasuruvara, ndakajipa ndava, ndakagara ndecijikhuvaza no kuva no ushungu.” Pikija mucadho wavo wakapera, ivona vaciri kuhwajihwa ngo zvakaitikari. Ivona vakaenderera mberi veciti: “Ndaithimwa-thimwa maningi no kusuravara ko mweji jakawanda, ndakazozwisisa kuti mazwiro awo ainga ecipsasa ushamwari hwangu na Jehovha no ushamwari hwangu no vamweni.” Wari hambzaji Mira avazivi kunyangajwa nee avatodi kuti ciri cese cakashata ciitike ku mwamuna wavo vo kare. Ivona vanovetera kuti njiku iri yese iyena anozoshandiravo Jehovha. Izvi zviri kuitika ngokuti hambzaji Mira vari kusotesesa zvo kumbeji. Inga mai vari kurera vega vana, vari kurera vana vavo vaviri kuti vave vashandiri va Jehovha. Wari hambzaji Mira vari kudakara vecishandira Jehovha no vana vavo pomwe no mbhuri yavo.

18. Kuthemba kwapi kwatingava nako ngo pamusoro po Mutongi wedu mukuru Jehovha?

¹⁸ Zvinotitondhoja maningi kuziva kuti Jehovha aazivi kutipa mutoro wo kutonga vamweni. Inga mutongi wedu Mukuru, Jehovha ndiyena anozoita basa iri. (Varoma 14:10-12) Tingathemba kamare kuti iyena nguva jese anozotonga mukuzwirana no ndhungamiriro jake jakarungama ngo pamusoro po zvakanaka no zvakashata. (Genesi 18:25; 1 Majimambo 8:32) Iyena narini aazotongi mu njira icikazivi kurungama.

19. Urungami wa Jehovha unozokwanirisa cinyi?

¹⁹ Tiri kuvetera no cidaka-daka cese mukuvo wo kuti Jehovha anozopeja zviro zvese zvakashata zvinoviiswa ngo kutama kukwana no kushaisha. Pa nguva yondhoyo, mazwiro ese akashata atingava nawo, anozopera. (Nduyo 72:12-14; Apokaripsi 21:3, 4) Iwona aazoviizvi mu mwoyo. Patinonga tecivetera mukuvo uwu, tingadakara ngo kuziva kuti Jehovha wakatisika mu njira yatingakwanisa kutevejera kuregerera kwaanoita.