1. Jehova oku uvanekela shike aayoni mbono yi itedhulula?

 NONANDO Jehova oye Omushiti gwetu, Omugandjimpango nOmupanguli, okuli wo Tate yetu gwomegulu omunahole. (Eps. 100:3; Jes. 33:22) Uuna twa yono kuye e tatu iyele shili ombedhi, oha kala e na uuthemba nehalo lyoku tu dhimina po. (Eps. 86:5) Okwa li a popi okupitila momuhunganeki Jesaja a ti: “Oondjo dheni nando nadhi kale dha tiligana mbyumbyumbyumbyu, otadhi ka toka dha fa oompawe.” — Jes. 1:18.

2. Ngele otwa hala tu kale tu na ombili nayalwe, oshike tu na okuninga?

² Molwaashoka inatu gwanenena, ohatu popi nohatu ningi iinima mbyoka hayi uvitha nayi yalwe. (Jak. 3:2) Nonando ongawo, shoka inashi hala okutya itatu vulu okukala tu na uukuume wopothingo nayo. Otatu vulu, ngele otwi ilongo okukala hatu dhimine po. (Omayel. 17:9; 19:11; Mat. 18:21, 22) Uuna gumwe a popi nenge a ningi sha shoka she tu uvitha nayi ihe inashi kwata miiti, Jehova okwa hala tu mu dhimine po. (Kol. 3:13) Otu na etompelo ewanawa lyoku shi ninga. Etompelo ndyoka olini? Jehova ohe tu ‘dhimine po oondjo odhindji.’ — Jes. 55:7, OB-1954.

3. Oshike tatu ka kundathana moshitopolwa shika?

³ Moshitopolwa shika, otatu ka tala kunkene aantu inaaya gwanenena taya vulu okuholela okudhimina po kwaJehova. Omayono geni tu na okulombwela aakuluntugongalo? Omolwashike Jehova a hala tu kale hatu dhimine po yalwe? Noshike tatu vulu okwiilonga kooitaali ooyakwetu mboka ya mona iihuna noonkondo omolwokuyona kwayalwe?

4. (a) Uuna omupiya gwaJehova a yono sha kwata miiti, oshike e na okuninga po? (b) Aakuluntugongalo oye na oshinakugwanithwa shini, uuna ya yi momutumba naangoka a yona?

⁴ Uuna twa mono kutya gumwe okwa yona sha kwata miiti, otu na oku shi lombwela aakuluntugongalo. Omayono gamwe ga kwata miiti otaga adhika mAakorinto yotango 6:9, 10. Okuyona sha kwata miiti, okuteya ompango yaKalunga thiluthilu. Uuna Omukriste a yono eyono lya kwata miiti, oku na okugalikana Jehova e mu dhimine po, noku na wo oku ka popya naakuluntugongalo. (Eps. 32:5; Jak. 5:14) Aakuluntugongalo oye na oshinakugwanithwa shashike? Jehova oye owala ta vulu okudhima po omayono thiluthilu, nokwe shi ningitha tashi wapa okupitila mekuliloyambo. * Nonando ongawo, Jehova okwa pa aakuluntugongalo oshinakugwanithwa shokulongitha Omanyolo ya tokole ngele omuyoni ota vulu okukala megongalo nenge hasho. (1 Kor. 5:12) Opo ya gwanithe po oshinakugwanithwa shawo, shimwe shomiinima mbyoka ya pumbwa okuninga okukambadhala okumona omayamukulo gomapulo taga landula: Mbela omuntu okwa yonene owina? Mbela okwa kala ta ningi ompangela a yone? Mbela okwa kala ta yono uule wethimbo? Shoka sha simanenena, mbela opu na uumbangi mboka tawu ulike kutya okwi iyela shili ombedhi? Mbela opu na uumbangi mboka tawu ulike kutya Jehova okwe mu dhimina po? — Iil. 3:19.

5. Uuwanawa wuni hawu zi mekwatho lyaakuluntugongalo?

⁵ Uuna aakuluntugongalo ya yi momutumba naangoka a yona, elalakano lyawo okuninga etokolo lya faathana naandyoka lya ningwa nale megulu. (Mat. 18:18) Elongekidho ndyoka ohali etele ngiini egongalo uuwanawa? Aayoni mboka inaaya iyela ombedhi, mboka tashi vulika ya nwethe mo nayi oonzi dhaJehova, ohaya kondwa mo megongalo. (1 Kor. 5:6, 7, 11-13; Tit. 3:10, 11) Ohali vulu wo okukwathela ngoka a yona i iyele ombedhi noku dhiminwe po kuJehova. (Luk. 5:32) Aakuluntugongalo ohaye mu galikanene nohaya pula Jehova e mu kwathele a kale ishewe e na ekwatathano ewanawa naye. — Jak. 5:15.

6. Ngele omuntu okwa kondwa, mbela Jehova ote ke mu dhimina po ngaa? Shi yelitha.

⁶ Natu tye nduno omuntu ini iyela ombedhi sho a yi momutumba naakuluntugongalo. Pompito ndjoka, ota ka kondwa mo megongalo. Ngele okwa yona ompango yoshilongo, aakuluntugongalo itaye ke mu popila kaa geelwe. Jehova okwa pitika aakwanepangelo ya pangule nokugeela kehe ngoka ta yono ompango yoshilongo, kutya nduno okwi iyela ombedhi nenge hasho. (Rom. 13:4) Ihe ngele omuntu ngoka lwanima okwe ki iyela ombedhi, e ta lundulula iikala ye, Jehova okwi ilongekidha aluhe oku mu dhimina po. (Luk. 15:17-24) Ote ke mu dhimina po shili kutya nduno okwa yona sha kwata miiti shi thike peni. — 2 Ondjal. 33:9, 12, 13; 1 Tim. 1:15.

7. Omeityo lini tatu vulu okudhimina po ngoka a yona kutse?

⁷ Otwa pandula sho tu shi kutya katu na oshinakugwanithwa shokuhogolola ngele Jehova oku na okudhimina po omuntu nenge hasho. Nonando ongawo opu na oshinima shoka twa pumbwa okuninga etokolo musho. Oshini mbela? Poompito dhimwe, gumwe otashi vulika a yone kutse nokuli sha kwata miiti, ihe otashi vulika e tu pe ombili, e te tu pula tu mu dhimine po. Poompito dhimwe, omuntu otashi vulika kee shi ninge. Nonando ongawo, otatu vulu okuhogolola tu mu dhimine po molwaashoka inatu hala okutsikila okukala tu mu nine onkone nenge twe mu geela. Ihe uushili owo kutya, shoka otashi vulu oku tu pula ethimbo noonkambadhala, unene tuu ngele shoka e tu ningila  oshe tu uvitha nayi noonkondo. Oshungolangelo 15 Septemba 1994, oya ti: “Uuna wa dhimine po gumwe, shoka itashi ti kutya owa panda shoka a ninga. KOmukriste, okudhimina po gumwe otashi ti okweethela iinima momake gaJehova. Oye omupanguli omuyuuki gweshito alihe, note ku ukitha iinima peuthwathimbo lye.” Omolwashike Jehova he tu ladhipike tu dhimine po nokweethela iinima momake ge, tu na einekelo kutya ote ku ungaunga nayo pauyuuki?

8. Okukala hatu dhimine po yalwe otaku ulike ngiini kutya otwa pandula ohenda yaJehova?

⁸ Okukala hatu dhimine po ohaku ulike kutya otu na olupandu. Meyele limwe, Jesus okwa li a faathanitha Jehova nomukwaniilwa ngoka a li dhimi po oongunga odhindji dhagumwe gwomaapika ye. Ihe omupika ngoka kali a ulukile omupika gumwe ohenda ngoka a li e na oongunga dhe dhiimaliwa owala iishona. (Mat. 18:23-35) Mbela Jesus okwa li a hala oku tu longa shike? Ngele otwa pandula shili ohenda yaJehova ndjoka he tu ulukile, natse otashi ke tu inyengitha tu dhimine po yalwe. (Eps. 103:9) Oshungolangelo yimwe oya tile: “Kutya nduno otu kale hatu dhimine po ooyakwetu shi thike peni, itashi vulu okuyelekwa nokudhimwa po kuKalunga nohenda ndjoka e tu ulukila okupitila muKristus.”

9. Jehova oha ulukile oolye olukeno? (Mateus 6:14, 15)

⁹ Ngele otwa kala hatu dhimine po yalwe, Jehova naye ote ke tu dhimina po. Jehova oha ulukile ohenda mboka haya ulukile yalwe ohenda. (Mat. 5:7; Jak. 2:13) Shoka Jesus okwa li e shi popi sha yela sho a li ta longo aalongwa ye nkene ye na okugalikana. (Lesha Mateus 6:14, 15.) Otatu ilongo oshinima sha faathana mwaashoka Jehova a li a lombwele omupiya gwe Job. Omulumentu ngoka omudhiginini okwa li a uvithwa nayi noonkondo koohapu dhaalumentu yatatu, Elifas, Bildad, naSofar. Jehova okwa li a lombwele Job e ya galikanene. Konima sho Job e shi ningi, Jehova okwe mu yambeke. — Job 42:8-10.

10. Omolwashike okukwatela onkone haku tu ehameke? (Aaefeso 4:31, 32)

¹⁰ Ohatu iyehameke tse yene ngele otwa kala twa kwatela gumwe onkone. Jehova okwa hala tu ethe po onkone opo tu kale tu na ombili. (Lesha Aaefeso 4:31, 32.) Ote tu lombwele ‘kaatu iyethele muugeyi.’ (Eps. 37:8) Ngele otwa landula omayele ngoka, otage ke tu kwathela lela. Okukala twa kwatela gumwe onkone otashi vulu oku tu ehameka palutu nopamaiyuvo. (Omayel. 14:30) Ngele otwa kwatela omuntu gwontumba onkone ihashi mu ningi sha, ngaashi owala omuntu a nwa uuzigo, ihe okwa tegelela ngoka e mu ninga nayi a se. Ihe uuna twa dhimine po yalwe, ohashi tu etele uuwanawa. (Omayel. 11:17) Ohatu kala tu na ombili yopamadhiladhilo noyokomutima, nohatu vulu okutsikila okulongela Jehova.

11. Ombiimbeli otayi ti ngiini kombinga yokukwatela yalwe onkone? (Aaroma 12:19-21)

¹¹ Egeelo olyaJehova. Jehova ine tu pa uuthemba tu kwatele onkone omuntu ngoka a yona kutse. (Lesha Aaroma 12:19-21.) Molwaashoka ihatu kala tu shi ashihe shoka sha kwatelwa mo nosho wo kutya inatu gwanenena, ihatu vulu okutala ko iinima pauyuuki ngaashi Kalunga. (Heb. 4:13) Ihe omathimbo gamwe, omaiyuvo getu ohaga vulu oku tu imba okutala ko iinima pauyuuki. Jehova okwa li a nwetha mo Jakob a nyole ta ti: “Ondjahi yomuntu ihayi longo shoka shu uka koshipala shaKalunga.” (Jak. 1:20) Otatu vulu okukala nuushili kutya Jehova oha ningi aluhe shoka shi li mondjila noha shilipaleke kutya uuyuki owa gwanithwa po.

12. Ongiini tatu vulu okukala neinekelo kutya Jehova ota ka ungaunga niinima pauyuuki?

¹² Okudhimina po yalwe ohaku ulike kutya otu na einekelo kutya Jehova ota ka ungaunga niinima  pauyuuki. Ngele ohatu ethele iinima momake gaJehova, ohatu ulike kutya otu na einekelo kutya ota ka opalekulula uupyakadhi mboka we etithwa kokuyona. Muuyuni we uupe, iinima mbyoka ya li hayi tu uvitha nayi pamadhiladhilo otayi “ka dhimbiwa thiluthilu.” (Jes. 65:17) Ihe ngele otu uvithwa nayi noonkondo, otashi wapa ngaa kaatu kale we twa geya notwa kwatela omuntu onkone? Natu ka taleni kuyamwe mboka ya vulu oku shi ninga.

13-14. Owi ilongo shike kombinga yokudhimina po moshimoniwa shaTony naJosé?

¹³ Aamwatate oyendji naamwameme oya hogolola okudhimina po yalwe nonando oyu uvithwa nayi noonkondo kwaashoka ye ya ningila. Omayambeko geni ya mona sho ye shi ningi?

¹⁴ Tony * ngoka ha kala moFilipine manga inii ilonga oshili okwa li e shi mono mo kutya gumwe gwomaamwayinamati okwa dhipagwa komulumentu gwedhina José. Pethimbo ndyoka, Tony okwa li lela omugeyentu, ye oku hole elongithonkondo nokwa li a hala okugalulila José uuwinayi. José okwa mangwa po e ta tulwa mondholongo. Konima yethimbo okwa li a mangululwa mo, na Tony okwa li a tokola oku mu konga e mu dhipage. Okwa landa nokuli ondjembo nelalakano ndyoka. Pethimbo ndyoka, Tony okwa tameke okukonakona Ombiimbeli nOonzapo dhaJehova. Okwa ti: “Sho tandi konakona Ombiimbeli, ondi ilongo kutya onda pumbwa okulundulula iikala yandje neihumbato lyandje, naashoka osha li sha kwatela mo okweetha po ongeyo.” Mokweendela ko kwethimbo, Tony okwa ninginithwa nolwanima okwa ka langekwa po e li omukuluntugongalo. Dhiladhila owala kutya okwa li a kumwa shi thike peni sho a uvu kutya José naye okwa ninginithwa nokwa ninga omupiya gwaJehova! Aalumentu mboka yaali sho ya tsakanene oyi ipapatele, Tony e ta lombwele José kutya okwe mu dhimina po. Tony okwa ti kutya sho a dhimine po José oshe mu etele lela enyanyu olindji nokali e na iitya nomatumbulo okupopya nkene e uvite. Jehova okwa yambeke shili Tony sho a dhimine po nehalo ewanawa.

15-16. Owi ilongo shike kombinga yokudhimina po moshimoniwa shaPeter naSue?

¹⁵ Esiku limwe mo 1985, Peter naSue oya li ye li mOshinyanga shUukwaniilwa e taya topelwa mo komboma inaaye shi tegelela, ndjoka ya li ya tegwa mo komulumentu gumwe. Sue okwa  li e ehamekwa noonkondo, nongashingeyi iha mono ko we ye nawa, noiha uvu ko we nawa. Shimwe ishewe, iha uvu we omazimba. * Peter naSue olundji oya li hayi ipula taya ti, ‘Omuntu a tya ngiini a ningi oshinima sha tya ngawo oshiwinayi noonkondo?’ Konima yomimvo odhindji, omutegi gwomboma ndjoka, ngoka a li kee shi omupiya gwaJehova, okwa ka kwatwa po, e ta tokolelwa okukala onkalamwenyo ye ayihe mondholongo. Sho Peter naSue ya pulwa ngele oye mu dhimina po, oya ti: “Jehova ohe tu longo kutya okukala twa geya tse otwa kwatela gumwe onkone otashi vulu oku tu ehameka palutu, pamaiyuvo nopamadhiladhilo. Onkee nziya konima yetopo lyomboma ndjoka, otwa pula Jehova e tu kwathele tu ethe po okukala twa geya notu tsikile nonkalamwenyo yetu.”

¹⁶ Mbela osha li ngaa oshipu kuyo ya dhimine po omulumentu ngoka? Hanaanaa. Oya gwedha ko ya ti: “Omathimbo gamwe ngele Sue ta ehama omolwoshiponga shoka a li a mona, ohashi tu geyitha ishewe. Ihe ihatu kala tatu dhiladhila kombinga yasho, onkee omaiyuvo ngoka ohaga kana po nziya. Odhoshili kutya ngele omulumentu ngoka a li a tege omboma ndjoka okwa ka ninga omumwatate, otatu ke mu taamba ko nomaako agehe. Oshimoniwa shika oshe tu longa kutya ngele ohatu tula omakotampango gOmbiimbeli miilonga; ohatu kala tu uvite twa manguluka. Nokuli omakotampango gOmbiimbeli oge tu mangulula momikalo ndhoka twa li inaatu tegelela. Ohashi tu hekeleke wo sho tu shi kutya masiku Jehova ota ka opalekulula uuwinayi mboka twa ningilwa.”

17. Owi ilongo shike kombinga yokudhimina po moshimoniwa shaMyra?

¹⁷ Myra okwi ilongo oshili a adhika nale a hokanwa ye oku na uunona uyali. Ihe omusamane gwe ka li a taamba ko oshili. Mokweendela ko kwethimbo, omusamane gwe okwa yi moluhondelo e ta thigi po uukwanegumbo wawo. Myra okwa ti: “Sho omusamane gwandje a thigi ndje po naanona yetu yaali, onda li ndi uvite ngaashi aantu oyendji haya kala ye uvite uuna ya kengelelwa kaaholike yawo. Osha li sha halutha ndje, nokanda li tandi shi itaale. Onda li nda nika oluhodhi,  ndu uvite ondjo, tandi ipe uusama nonda geya.” Nonando ondjokana yawo oya teka, iha kala we e uvite nayi sho a kengelelwa. Myra okwa tsikile ko a ti: “Uule woomwedhi onda kala ndi na oshimpwiyu, ngame onda geya nonda li nde shi mono kutya omaiyuvo ngoka oga li taga taye po ekwatathano lyandje naJehova nonayalwe.” Myra ngashingeyi oha ti kutya iha kala we a geya noiha kala a hala oshinima oshiwinayi shi ningilwe omusamane gwe gwonale. Oku na einekelo kutya esiku limwe ota ka hedha popepi naJehova. Myra ngashingeyi oha gandja eitulomo konakuyiwa. Okwa putudha aanona ye yaali oye awike ya ninge aapiya yaJehova. Kunena Myra okwa nyanyukwa sho ta longele Jehova pamwe naanona ye nomaukwanegumbo gawo.

18. Einekelo lini tatu vulu okukala tu na muJehova e li Omupanguli Omunene?

¹⁸ Ohashi tu etele ombili lela sho tu shi kutya katu na oshinakugwanithwa shokutokola nkene aantu ye na okupangulwa. E li Omupanguli gwetu Omunene, Jehova ota ka tonatela oshilonga shika sha simana. (Rom. 14:10-12) Otatu vulu okukala tu na omukumo thiluthilu kutya ota kala aluhe nokupangula aantu metsokumwe nomithikampango dhe dhaashoka shi li mondjila naashoka sha puka. (Gen. 18:25; 1 Aak. 8:32) Ke na esiku a ka ninge oshinima kaashi li pauyuuki!

19. Molwaashoka Jehova omuyuuki, ota ka gwanitha po shike monakuyiwa?

¹⁹ Otwa tegelela nondjuulukwe ethimbo ndyoka Jehova ta ka hulitha po thiluthilu iinima iiwinayi mbyoka ye etithwa kokwaagwanenena nokokuyona kwaantu. Pethimbo ndyoka, omaunkundi getu gopalutu nogopamadhiladhilo otaga ka aludhwa thiluthilu. (Eps. 72:12-14; Eh. 21:3, 4) Iinima mbyoka itatu ke yi dhimbulukwa we. Manga twa tegelela ethimbo ndyoka ewanawa li thike, inatu pandula tuu sho Jehova e tu shita hatu vulu oku mu holela mokukala hatu dhimine po yalwe.