1. Tɛnɛ mɛ Yehova tɛnɛ na lo tɛ awa lingɔ siɔ kpale mɛ angbinya bɛ la nɛ?

 YEHOVA du wa lingɔ e, Wa hɛ̃ngɔ e ndia, nga wa fangɔ ngbanga tɛ e, lo nga To e ti ndozu mɛ na songo. (Nz. 100:3; Yis. 33:22) Ngoi mɛ e ndo li lo siɔni, wa e gbinya bɛ e bɛta kpale ko, lo na ngunu nga na gwɛ̃ ti kangɔ lɛ lo na ndo siɔ kpale tɛ e. (Nz. 86:5) Na lége tɛ prɔfeta Yisaya, Yehova tɛnɛ ya: “Abɛse siɔ kpale tɛ ĩ adu bengbani gba ko, ni na tingɔ mbufuni mabere mbindã.”​—Yis. 1:18.

2. Se e ye dungɔ na mangbi ti nzɔ̃ni ná azi mɛndɛ̃, ye mɛ elengbi ti lingɔ nɛ?

² Na lo mɛ ya, e du azi ti zangangɔ lengbingɔ ko, e zu e ndo tɛnɛ bere e ndo li aye mɛ alengbi ti hɛ̃ngɔ azi mɛndɛ̃ ngɔnzɔ. (Zaki 3:2) Ta ni la alengbi ti gbanzingɔ e ya, e du na mangbi ti nzɔ̃ni na azi mɛndɛ̃ ma. Elengbi ti dungɔ na mangbi ti nzɔ̃ni na azi mɛndɛ̃ se e manda kangɔ lɛ e na ndo siɔ kpale tɛ ala. (Mas. 17:9; 19:11; Mat. 18:21, 22) Se zo li ye mɛ ahɛ̃ e ngɔnzɔ ko, Yehova yɔ ka ti e ya, e ka lɛ e na ndo siɔ kpale tɛ lo. (Kɔl. 3:13) E na aye mɛ alengbi ti tongɔ e ya, e li ngaso, na lo mɛ ya, Yehova nvɛ̃ni ndo ka nga lɛ lo na ndo siɔ kpale tɛ e “na bɛ lo kɔi.”​—Yis. 55:7.

3. Aye mɛ ndɛ e na mandangɔ nɛ?

³ Na ya tɛnɛ mɛ, e na hũngɔ ya, abɛse e du azi ti zangangɔ lengbingɔ ko, elengbi ti landangɔ se lɛlo tɛ Yehova na omɛ aba kangɔ lɛ na ndo siɔ kpale tɛ azi mɛndɛ̃. Wa e nga na hɛ̃ngɔ gbinya  ti hũnda mɛ: siɔ kpale mɛ ngasia la, elengbi ti tɛnɛngɔ ni hɛ̃ abiazi nɛ? Nda mɛ Yehova ye ya, e ka lɛ e na ndo siɔ kpale tɛ azi mɛndɛ̃ nɛ? Wangɔ mɛ elengbi ti luangɔ ka tɛ ayata kɔli ná ayata wali na ndenge mɛndó ala ka lɛ la na ndo siɔ kpale ti kotani mɛndó ali tɛrɛ la nɛ?

4. (a) Se wakristo kɔi ali siɔ kpale mɛ kotani, ye mɛ lo lengbi ti lingɔ nɛ? (b) Kumba mɛ abiazi na ni na ngoi mɛ ala tengbi na zo mɛ ali siɔ kpale nɛ?

⁴ Se zo li siɔ kpale kɔi mɛ kotani ko, ayɔ ya, lo tɛnɛ ni hɛ̃ abiazi. Mbeti ti 1 Kɔrinto 6:9, 10 adikɔ ambanga asiɔ kpale ni. Siɔ kpale ti kotani adu kongɔ nyɔ ndia tɛ Nzapa. Se wakristo li siɔ kpale ti ngaso ko, ayɔ ya, lo li sambela hɛ̃ Yehova Nzapa ti nɛngɔ ya, lo ka lɛlo na ndo siɔ kpale tɛ lo, wa lo pa nga ni hɛ̃ abiazi ti ya bombi. (Nz. 32:5; Zaki 5:14) Kumba mɛ abiazi na ni nɛ? Bo Yehova la, na ngunu ti kangɔ lɛ lo bwai na ndo siɔ kpale tɛ azi, lo ndo li ni na lége ti tɔngɔ mɛndó Yezo tɔ̃ na azi. * Abɛse ngaso ko, lo hɛ̃ abiazi kumba ti mungɔ ekateli na lége ti Ngbangɔ na ndo zo mɛ ali siɔ kpale, bere lo lengbi ti ngbangɔ kaya bombi bere ta lo lengbi ti ngbangɔ kaya bombi ma. (1 Kɔr. 5:12) Ti nɛngɔ ya, ala mu ekateli ti nzɔ̃ni ko, ayɔ ya, ala li kpengbani ti hĩngangɔ gbinya ti ahũnda mɛ: Lo li siɔ kpale ni na sana? Lo gi lége ti ɔndɛngɔ siɔ kpale tɛ lo? Lo li siɔ kpale niko fãni gba nga na ya ngoi yɔngɔrɔni? Ye mɛ ngbondoni adu ya, lo ndo fa na lége ti kwa tɛ lo ya, lo gbinya bɛ lo biani? Wa ye mɛ ndo fa ya, Yehova ka lɛlo na ndo siɔ kpale tɛ lo nɛ?​—Aw. 3:19.

5. Nzɔ̃ kpale mɛ ndo si na ngoi abiazi ndo za azi mɛ ali siɔ kpale nɛ?

⁵ Na ngoi mɛ abiazi ndo za zo ko la ali siɔ kpale ko, mɔkanɔ tɛ ala ndo du ti mungɔ ekateli kwɛ kɔi na ekateli mɛ amu tɛrɛ lo ka ndozu. (Mat. 18:18) Ngasia la, ebongiseli niko ndo hɛ̃ azi ti ya bombi nzɔ̃ kpale nɛ? Na lége ti ebongiseli niko, ando bi zo mɛ ali siɔ kpale mɛ akɛ̃ gbinyangɔ bɛ lo gigi ti nɛngɔ ya, ta lo to ayata mɛndɛ̃ ati nga na seliye tɛ lo ma. (1 Kɔr. 5:6, 7, 11-13; Tit. 3:10, 11) Ni lengbi nga ti tongɔ zo mɛ ali siɔ kpale ya, lo gbinya bɛ lo, wa Yehova ka lɛ lo na ndo siɔ kpale tɛ lo. (Luka 5:32) Abiazi ndo li sambela na lo tɛ zo mɛ agbinya bɛ lo, wa ala ndo yɔ nga ka ti Yehova ya, lo za lo ti nɛngɔ ya, lo ti na mangbi ti nzɔ̃ni na Yehova.​—Zaki 5:15.

6. Se abi zo gigi afa ya, ta Nzapa lengbi ti kangɔ lɛ lo na ndo siɔ kpale tɛ lo ma? Kambisa.

⁶ E mu ya, ngoi mɛ abiazi tengbi na zo mɛ li siɔ kpale ko, lo kɛ̃ gbinyangɔ bɛ lo. Se adu ngaso ko, ayɔ ya, abi lo gigi. Wa se siɔ kpale tɛ lo ako nyɔ̃ ndia tɛ leta ti kɔdɔrɔ mɛ lo ka da ko, ta abiazi na batangɔ lo ti nɛngɔ ya, lo zanga luangɔ etumbu ti siɔ kpale tɛ lo ma. Yehova hɛ̃ agbia ti gigi lége ti sambisangɔ nga na hɛ̃ngɔ etumbu hɛ̃ azi zu ko la, ako nyɔ̃ ndia tɛ agbia​—abɛse zo niko gbinya bɛ lo bere ta lo gbinya bɛ lo ma. (Roma 13:4) Kanda, se zo niko ati na bingangɔ li ti nzɔ̃ni, wa lo gbinya nvɛ̃ni bɛ lo, lo gbinya nga seliye tɛ lo ko, Yehova na kangɔ lɛ lo na ndo siɔ kpale tɛ lo, abɛse siɔ kpale ni adundó ti ngasia.​—2 Nt. 33:9, 12, 13; Luka 15:17-24; 1 Tim. 1:15.

7. Kangɔ lɛ na ndo siɔ kpale tɛ azi mɛndɛ̃ alengbi na nɛ?

⁷ Adu ye ti dengɔ bɛ hĩngangɔ ya, ta e la elengbi ti mungɔ ekateli ti nɛngɔ ya, Yehova ka lɛ lo na ndo siɔ kpale tɛ zo bere ta lo ka lɛ lo na ndo siɔ kpale tɛ zo ma! Kanda se zo kɔi li siɔ kpale tɛrɛ e ko, elengbi mungɔ ekateli kɔi. Ekateli ni adu nɛ? Abɛse lo yɔ pardon ti e bere ta lo li ni ma ko, elengbi ti mungɔ ekateli ti kangɔ lɛ e na ndo siɔ kpale tɛ lo afa ya, ta e bata ngɔnzɔ tɛ lo bere e gbe lo kaya e ma. Ti tɛnɛngɔ  bɛta tɛnɛ ko, alengbi ti mungɔ ngoi gba bere yɔngɔ ya, e du na ge ge ge se du ya, ye mɛ ali tɛrɛ e ahɛ̃ e pɛnɔ gba nvɛ̃ni ka bɛ e. Linɔngi ti Sinzili ti 15/09/1994, atɛnɛ ya: “Kangɔ lɛ na ndo siɔ kpale tɛ zo, ta adu vĩngɔ lɛ na ndo siɔ kpale ma. Ka tɛ awakristo, kangɔ lɛ na ndo siɔ kpale adu ziangɔ kpale zu ka bɛ ti Yehova mɛ wa fangɔ ngbanga tɛ azi zu ti lɛ sese. Lo na fangɔ ngbanga na mbilimbili na ngoi mɛ alengbi.” Nda mɛ Yehova yɔ ka ti e ya, e ka lɛ e na ndo siɔ kpale tɛ azi mɛndɛ̃, wa e zia kpale zu ka bɛ ti lo nɛ?

8. Ye mɛ hĩngangɔ se mɛ Yehova ndo ma vundu tɛ e alengbi ti tongɔ e ya e li nɛ?

⁸ Se e ndo ka lɛ e na ndo siɔ kpale ko, e ndo fa na Yehova ya, e ndo hɛ̃ lo sia kɔli na lo ti bɛ ti vundu tɛ lo. Na ya ndakisa kɔi, Yezo hakandó Yehova na gbia kwa kɔi mɛndó lo zia sɔlɔngɔ falanga ti kpengbani mɛndó mbɛ tɛ lo kɔi azɛ̃ na lo mɛ ya, ta lo na likoki ti futangɔ ni ma. Kanda mbɛ niko akɛ̃ndó mangɔ vundu tɛ fɔ̃ lo mɛndɛ̃ mɛndó na nyongo tɛ lo ti falanga mɛ yakere. (Mat. 18:23-35) Wangɔ mɛndó Yezo ye hɛ̃ngɔ e nɛ? Se e ndo hĩnga se mɛ Yehova ndo fa bɛ ti vundu na e ko, ni na tongɔ e ya, e ka lɛ e na ndo siɔ kpale tɛ azi mɛndɛ̃. (Nz. 103:9) Linɔngi ti Sinzili kɔi ti gã tɛnɛ ya: “Abɛse du ya, e ka lɛ e na ndo siɔ kpale tɛ afɔ̃ fãni kɛ̃ ko, ta ni na lengbingɔ bɛ fãni kɔi na se mɛ Nzapa ndo ka na lɛlo na ndo siɔ kpale tɛ e na vundu zu na lége tɛ Kristo ma.”

9. Yehova ndo fa bɛ ti vundu tɛ lo na ana? (Matie 6:14, 15)

⁹ Yehova na kangɔ lɛ lo na ndo siɔ kpale tɛ e azi mɛ ndo ka lɛ la na ndo siɔ kpale tɛ azi mɛndɛ̃. Yehova ndo fa bɛ ti vundu na azi ko la ndo fa bɛ ti vundu. (Mat. 5:7; Zaki 2:13) Yezo tɛnɛndó ni yangondo na ngoi mɛndó lo fa na ava lo se ti lingɔ sambela. (Di Matie 6:14, 15.) Adu nga ye mɛndó Yehova yɔ ka ti Yobo ya lo li la. Tɛnɛ mɛndó Elifaze, Biledade, na Zofare atɛnɛ hɛ̃ Yobo zo ti mbilimbili ahɛ̃ndó lo pɛnɔ gba ka bɛ lo. Kanda Yehova pandó hɛ̃ Yobo ya, lo li sambela na lo tɛ la. Na pɛ lingɔ ni ko, Yehova hɛ̃ndó Yobo nzɔ̃ sulu.​—Yobo 42:8-10.

10. Nda mɛ batangɔ ngɔnzɔ ka bɛ adu siɔni nvɛ̃ni nɛ? (Efɛzɛ 4:31, 32)

¹⁰ E ndo hɛ̃ tɛrɛ e pɛnɔ na ngoi mɛ e ndo bata ngɔnzɔ. Batangɔ ngɔnzɔ adu mabere yɔngɔ kota kumba, wa Yehova ye ya, e zia ngɔnzɔ ti nɛngɔ ya, e du na siriri ti bɛ. (Di Efɛzɛ 4:31, 32.) Lo yɔ ka ti e ya, “e zia ngɔnzɔ e zia nga tɔmbɔgɔngɔ.” (Nz. 37:8) Se e landa awangɔ niko ko, ni na zangɔ e. Se e kpã ngɔnzɔ tɛ zo ka bɛ e ko, elengbi ti gãngɔ ngã wa ni lengbi ti gbɛ̃ngɔ sãte tɛ e. (Mas. 14:30) Batangɔ ngɔnzɔ tɛ zo ka bɛ e, adu mabere nyɔngɔ pwanzɔ̃, ta ni lengbi ti lingɔ zo mɛ ali siɔ kpale tɛrɛ e siɔni ma, kanda ni na lingɔ e nvɛ̃ni siɔni. Na ngoi mɛ e ndo ka lɛ e na ndo siɔ kpale tɛ azi mɛndɛ̃ ko, e ndo li kpale ti nzɔ̃ni ka tɛrɛ e nvɛ̃ni. (Mas. 11:17) E ndo ti na siriri ti bɛ, wa e na ngbangɔ bo lá kwɛ lingɔ kwa tɛ Yehova.

11. Tɛnɛ mɛ Ngbangɔ tɛnɛ na ndo gɛ̃ngɔ kula nɛ? (Roma 12:19-21)

¹¹ Gɛ̃ngɔ kula adu tɛ Yehova. Ta Yehova hɛ̃ e lége ya, e gɛ̃ kula na ngoi mɛ zo kɔi li e siɔni ma. (Di Roma 12:19-21.) Na lo mɛ ya, e du azi ti zangangɔ lengbingɔ ko, ta elengbi ti hũngɔ kpale yɔngɔrɔ ni ma, na lo ni la ta elengbi ti fangɔ ngbanga na ndenge mɛ Yehova lengbi ti lingɔ na ni ma. (Aeb. 4:13) Wa na ya ngoi mɛndɛ̃, se mɛ e ndo ma na tɛrɛ e alengbi ti gbanzingɔ e ya, ta e fa ngbanga na ndenge ti nzɔ̃ni ma. Na lége ti Nyingɔ vurú tɛ Nzapa Zaki su ya: “Zo ko la ngɔnzɔ agbɔ̃ lo ko, ta lo lengbi ti lingɔ ye mɛ Nzapa aye ma.” (Zaki 1:20) Elengbi ti yengɔ na bɛ e kɔi ya, Yehova na lingɔ zu mɛ lo lengbi ti lingɔ, wa lo nga na dungɔ na kpengba lɛ ya, afa ngbanga na mbilimbili.

12. Ngasia la elengbi ti fangɔ ya, e ndo ye nvɛ̃ni ya, Yehova na fangɔ ngbanga na mbilimbili nɛ?

 ¹² Se e ndo ka a lɛ e na ndo siɔ kpale ko, e ndo fa na Yehova ya, e ndo kpã bɛ e ya, lo na fangɔ ngbanga na mbilimbili. Se e zia akpale zu na bɛti Yehova ko, e ndo fa ya, e ye na bɛ e kɔi ya, lo na lɛkɛngɔ akpale zu ti siɔni mɛ asi na lége ti siɔ kpale. Kaya gigi ti fãnani, “ta e na dangɔ bɛ e fãni mɛndɛ̃ na akpale ti sɔini mɛndó afa bɛ e na kã ma. Ta ni na diringɔ gangɔ kaya bɛ e ma.” (Yis. 65:17) Kanda, se du ya, ye mɛ ali tɛrɛ e afa bɛ e na kã ti kotani, elengbi nvɛ̃ni ti ziangɔ batangɔ ngɔnzɔ nga na kula tɛ azi ka bɛ e? E ba se mɛ ambanga azi alonga nwɔngɔ ngɔnzɔ bere kula.

13-14. Wangɔ mɛ mɔ lua na ndo se lɛlo tɛ Tony ná José na omɛ aba kangɔ lɛ na ndo siɔ kpale nɛ?

¹³ Ayata kɔli ná ayata wali gba mɛ awakristo amundó ekateli ti kangɔ lɛ la ndo siɔ kpale ti kotani mɛndó azi mɛndɛ̃ ali tɛrɛ la. Nzɔ̃ kpale mɛndó ala lua nɛ?

¹⁴ Tony mɛ ndo du ka Philippines, abulu gba uzu ti nɛngɔ ya, lo ti Tɛmwɛ tɛ Yehova ko, * lo mandó ya kɔli kɔi mɛ ili lo la José ahondó togbia lo. Na ngoi nikondó ko, Tony ndó wa mobulu wa lo yendó gɛ̃ngɔ kula. Agbɔ̃ ndó José wa abi ngandó lo ka bɔlɔkɔ na lo ti ye mɛndó lo li. Na ngoi mɛndó lo si ka bɔlɔkɔ ko, Tony mundó ekateli ti gingɔ lo ya, ni ho lo. Kanda lo bandandó mandangɔ Ngbangɔ na Atɛmwɛ tɛ Yehova. Lo tɛnɛ ya, “Aye mɛ mbi manda kaya Ngbangɔ aza mbi ya, mbi hũ aye mɛ ayɔ ya mbi gbinyangbi ni na ya dungɔ lɛ ngɛ̃́ tɛ mbi. Kɔi ti aye ni adu ngɔnzɔ.” Na gesi, Tony mundó batisimɔ, wa lo ti ngandó biazo ti ya bombi. Da bɛ mɔ na ndenge mɛndó lo kamwa na ngoi mɛndó lo ma ya, José ti nga Tɛmwɛ̃ tɛ Yehova! Ngoi mɛndó ala tengbi ko, ala bɔmbɔndó tɛrɛ la, Tony tɛnɛndó hɛ̃ José ya, ni ka lɛ ni na ndo siɔ kpale tɛ lo. Tony tɛnɛ ya, kangɔ lɛ na ndo siɔ kpale tɛ José ahɛ̃ ni dengɔ bɛ mɛ ta kɔdɛ ti kambisangɔ ni da ma. Ti biani, Yehova sulundó Tony na lo ti seliye tɛ lo.

15-16. Wangɔ mɛ e lua ka tɛ Peter na Sue na omɛ aba kangɔ lɛ na ndo siɔ kpale nɛ?

¹⁵ Lá kɔi na bulu ti 1985, Peter ná Sue ndó kaya da ti bombi, na mbala kɔi, bombe kɔi asumbundó. Kɔli kɔi la akpãndó bɔmbe ni kaya da ti Lo-lengɔ Gbia! Sue hɔ̃ndó kã kɔi mɛ  kpengbani, lɛ lo ná ma lo agbɛ̃ndó na ndenge ti siɔni. Ta lo didɛndó lo ma nga finya ma. * Peter ná Sue ndo hũndandó tɛrɛ la ngoi zu ya, ‘Zo mɛ lengbi ti lingɔ aye ti siɔni nvɛ̃ni ti ngaso na?’ Abulu gba na gesi, zo mɛndó wa lingɔ ye ni ko mɛndó ta lo Tɛmwɛ̃ tɛ Yehova ma ko, agbɔ̃ndó lo, wa abi ngandó lo ka bɔlɔkɔ, ti nɛngɔ ya, lo li ka bolokɔ dungɔ lɛ ngɛ̃́ tɛ lo zu. Ngoi mɛndó ahũnda Peter ná Sue bere ala kandó lɛ la na ndo siɔ kpale tɛ zo niko ko, ala tɛnɛndó ya: “Yehova ndo ha na e ya, batangɔ ngɔnzɔ ná kula, alengbi ti lingɔ ya zo hũ pɛnɔ na tɛrɛ longa na ya bingangɔ li tɛ lo. Ni la e hũndandó Yehova iɔ ya, lo za e, e hã siɔ dangɔ bɛ niko, wa e gbã lá kwɛ gwengɔ uzu.”

¹⁶ Na ya abulu ko zu ko, adundó woni ka tɛ la ti nɛngɔ ya, ala ka lɛ la na ndo siɔ kpale tɛ azi wa ta la di du na dangɔ bɛ niko ma? Ta du ngaso ma. Ala di tɛnɛ ya: “Ngoi zu ko la e ndo da bɛ e na kpale mɛndó asi na Sue ko, e ndo ma ngɔnzɔ gba. Kanda e ndo li kpengbani ya, ta e kpã bo lɛ e na ndo ye mɛndó aɔ wɛ ma, ni ndo li ya, ngɔnzɔ̃ tɛ e wɛ iɔ. Ni la, elengbi ti yengɔ na bɛ e kɔi ya, se zo kondó akpã bɔmbe ati nyita e Tɛmwɛ̃ tɛ Yehova ko, e na dungɔ na dengɔ bɛ ti yambangɔ lo. Kpale mɛ e ndo tengbi na ni ando hɛ̃ e wangɔ ya, andia ti Ngbangɔ ndo si na zo ka gbɛ mbɛ, ando si na zo na ya akpale gba mɛ ta lo da bɛ lo ya, lo na singɔ kaya ni ma! Ni sa ngunu bɛ e ya, angbã yakere Yehova lɛkɛ akpale ti siɔni zu mɛndó asi na lége ti siɔ kpale.”

17. Wangɔ mɛ mɔ lua ka tɛ Myra na omɛ aba kangɔ lɛ na ndo siɔ kpale nɛ?

¹⁷ Ngoi mɛndó Myra ti Tɛmwɛ̃ tɛ Yehova ko, lo dundó na kɔli wɛ, lo dũ ayangambi ti kɔli sɛ. Ta kɔ lo ayendó mbilimbili ma. Na gesi, lo handa ya lo, wa lo zia ngandó lo. Myra tɛnɛ ya: “Ngoi mɛndó kɔ mbi zia mbi na ayangambi sɛ ko, mbi mandó pɛnɔ mɛ azi mɛndɛ̃ gba ndo ma, na ngoi mɛ zo mɛ ndo ye ala ahɛ̃ ala pɛnɔ, mbi mandó pɛnɔ gba, ta mbi hũndó ya, ni du biani ma, wa mbi mandó sɔngɔ bɛ gba ka bɛ mbi, mbi bandandó bingangɔ bɛ mbi, mbi hũndó ya, mbi la, mbi li siɔni, mbi ti ngandó na  ngɔnzɔ gba.” Abɛse na pɛ hongɔ libala tɛ la ko, Myra ngbã bondó lá kwɛ kanisangɔ ya, kɔni li ni siɔni. Myra ngbã bo lá kwɛ tɛnɛngɔ ya: “Kpale niko agiandó mbi na ya anzɛ gba, wa mbi hũndó ya, ni lengbi ti gbɛ̃ngɔ mangbi tɛ mbi ná Yehova, nga na azi mɛndɛ̃.” Na olo ko, ta Myra na ngɔnzɔ na ndo kɔ lo ti uzu ma, wa ta lo yɔ nga ya, kpale ti siɔni asi na kɔ lo ma. Lo hinga ya, lá kɔi gbanda ko, lo na tingɔ Tɛmwɛ̃ tɛ Yehova. Myra kpã bɛ lo na ndo kpale mɛ na gangɔ. Na lo mɛ ya, lo mama mɛ mɔdo ko, lo kã ayangambi tɛ lo na ya mbilimbili. Kanda ndɛ lo mɛ ko, lo na dengɔ bɛ ti vɔrɔngɔ Yehova ndoni kɔi na ayati lo nga na ndasewa tɛ la.

18. Ye mɛ elengbi ti yengɔ lo ni na lo tɛ Yehova wa fangɔ ngbanga mɛ aɔ awa fangɔ ngbanga zu?

¹⁸ Hĩngangɔ ya, ta e na kumba ti fangɔ ngbanga tɛ azi ma ko, ni ndo wamba bɛ e! Adu kumba tɛ Yehova wa fangɔ ngbanga mɛ aɔ awa fangɔ ngbanga zu. (Roma 14:10-12) Elengbi ti yengɔ na bɛ e kɔi ya, lo na fangɔ ngbanga ngoi zu na landangɔ andia tɛ lo ti mbilimbili mɛ aba nzɔ̃ ye ná siɔ ye. (Eb. 18:25; 1 Ba. 8:32) Ta lo na lingɔ ye mɛ azanga mbilimbili bɛ fãni kɔi ma!

19. Ye mɛ mbilimbili tɛ Yehova na tongɔ lo ya, lo li nɛ?

¹⁹ E ndo kũ na bɛ e kɔi ngoi mɛ gbanda Yehova na onzingɔ ti bwai zangangɔ lengbingɔ ná siɔ kpale. Na ngoi niko apɛnɔ mɛ e ndo hũ nga akã zu mɛndó e hɔ̃ kaya bɛ e na wɛngɔ ti bwai. (Nz. 72:12-14; Suma 21:3, 4) Ta e na dangɔ bɛ e ni fãni mɛndɛ̃ ma. Uzu ti nɛngɔ ya, ngoi niko alengbi ko, e hɛ̃ Yehova sia kɔli na ndenge mɛ lo hɛ̃ e likoki ti landangɔ se lɛlo tɛ lo ti kangɔ lɛ e na ndo siɔ pale tɛ azi mɛndɛ̃.