1. Tiheeni Yehova onaaroromeliheiye anamacheka oocharuwa?

 NAAMWI Yehova ari Mpatuxa ahu, Namavaha a malamulo ni Muthoriha, owo tho Tiithi ahu a wirimu oosivela. (Sal. 100:3; Isa. 33:22) Vaavaa nnamuchekelaahu yoowo ni ncharuwa mweeparipari, owo ookhalano owerya ni nchuno na onikhurumuwela. (Sal. 86:5) Moorweela wa mulipa a miririmo Isaiya, Yehova moosivela onnaniroromeliha: “Soocheka sanyu, nari iphilivinle ntoko nikhami, inamweelihiwa ntoko maralala.”—Isa. 1:18.

2. Wakhala wi ninnachuna okhalaka mwa murecele ni akina, tiheeni nnaphwanelaahu weera?

² Woona wi naachu oohiphaameya, oothene ahu ninnaloca naari opaka ichu seiho sinaanyeenyeiha akina. (Tiy. 3:2) Nyenya ela henataphulela wi hanni niwerye opuha onthamwene ni yaawo. Nnanwerya wakhala wi ninnakhurumuwela. (Masi. 17:9; 19:11; Mat. 18:21, 22) Wakhala wi muchu ooloca naari oheera echu ekhaani yeeyo eninyeenyeihale, Yehova onachuna wi nimukhurumuwele. (Kol. 3:13) Hiyaano nookhalano mathowa oophwanelela a weerano yeela. Opwaha soothene, Yehova onnakhurumuwela “ni murima wothene!”—Isa. 55:7, BNM.

3. Tiheeni nnahaalaahu othokororya mmwaha yoola?

³ Mmwaha yoola, nnahaala othokororya mukhalelo achu oohiphaameya eneeraaya ewerye omutakiherya Yehova ni waakhurumuwela akina. Soocheka taani nnaphwanelaahu waaleela atokweene a mmulokoni? Ntakhara heeni Yehova onnachuna wi naakhurumuweleke akina? Nave tiheeni nnahaalaahu ohuserya orweela wa anna ni arokora ahu yaawo yaahooxen’ye vancipale nthowa na soocheka sa akina?

4. (1) Vaavaa mulapeli a Yehova onapakeiye yoocheka etokweene, tiheeni owo onaphwaneleiye weera? (2) Tuuvi ori murici wa atokweene vaavaa anathukumanaaya ni namacheka?

⁴ Hiyaano nnaphwanela waaleela atokweene a mmulokoni vaavaa  muchu onapakeiye yoocheka etokweene. Soocheka ikina itokweene sinnalociwa mu 1 Korinto 6:9, 10. Soocheka itokweenexa sinnananariha malamulo a Muluku. Wakhala wi Mukristu oopaka yoocheka ntoko yeela, owo onaphwanela omwaacamela Yehova Muluku mu nivekelo nave tho onaphwanela waaleela asitokweene a mmulokoni. (Sal. 32:5; Tiy. 5:14) Murici taani atokweene aryaayano? Pahiru Yehova torino ophwanelela wa okhurumuwela soocheka moomalela nave owo onnakhurumuwela soocheka sahu moorweela wa mukucho wa woopola. * Nyenya Yehova ohaavaha atokweene murici wa olakelela orweela mu Soorempwa waakhanle wi namacheka onnaphwanela otitelela okhala mmulokoni naari hooye. (1 Kor. 5:12) Wi ekhwaaniherye yeela, echu emoha awo aneeraaya ori weererya ophwanya maakhulo a makoho anacharela: Apwanne muchu yoowo orimulakelela opaka yoocheka? Apwanne owo oheererya okhuwa yoocheka awe? Apwanne owo opanke mwawuuluulela yoocheka yeela etokweene? Echu yoochuneyaxa, apwanne sookhalavo sawooniherya sawi owo oocharuwa mweeparipari? Apwanne sookhalavo sawooniherya sawi Yehova oomukhurumuwela?—Saw. 3:19.

5. Miphurelo taani sinakhumelela orweela wa muteko wa asitokweene a mmulokoni?

⁵ Vaavaa atokweene anathukumanaaya ni namacheka, yoochuna aya ori opaka yoolakelela veelaponi, yeeyo enahaala weemereryiwa wirimu. (Mat. 18:18) Ti mwawiihai meerelo yaala anakhaviheryaaya muloko? Ela enneeriha wi anamacheka yaawo ahinacharuwa ehititelele opaka makupa mmulokoni ni waavolowela alapeli oochuneya a Yehova. (1 Kor. 5:6, 7, 11-13; Tito 3:10, 11) Ela tho enanwerya omukhaviherya namacheka ocharuwa ni ophura orweela wa okhurumuweliwa ni Yehova. (Luka 5:32) Atokweene annavekela ntakhara muchu yoowo ocharunwe ni omveka Yehova wi amukhaviherye owo orehererya makupa awe oomunepani.—Tiy. 5:15.

6. Wakhala wi muchu ohiikariwa mmulokoni, apwanne nlelo ti wooweryeya Yehova omukhurumuwela? Mutharihe.

⁶ Mwaanyiherye wi muchu hacharunwe vaavaa atokweene anathukumanaaya ni yoowo. Mmukhalelo yoola, owo onahaala wiikariwa mmulokoni. Waakhanle wi owo oochekela malamulo a elapo, atokweene a mmulokoni heeni emwaakihe nthowa na sookhumelela sa miteko sawe soonanara. Yehova onnaweemererya alamuleli omuthoriha ni omulaka muchu yoowo ochekenle nlamulo moohipwacha waakhanle wi oocharuwa naari hooye. (Aro. 13:4) Nyenya wakhala wi muchu owo ohoolo waya ootoroka muupuwelo ni saweera sawe, Yehova onahaala omukhurumuwela. (Luka 15:17-24) Ela eparipari naamwi soocheka sawe saari itokweenexa.—2 Math. 33:9, 12, 13; 1 Tim. 1:15.

7. Mmukhalelo taani nnaphwanelaahu omukhurumuwela muchu yoowo onichekenle?

⁷ Hiyaano ninnathamalela osuwela wi hinaano murici wa olakelela waakhanle wi Yehova onahaala omukhurumuwela muchu yoowo opanke yoocheka! Naamwi hiihaa, yookhalavo echu ekina nnaphwanelaahu olakelela. Teevi yeeyo? Ikwaha ikina, muchu onanwerya onchekela nyenya ohoolo waya onanwerya othanana ni oniveka nikhurumuwelo. Mmikhalelo mikina, owo onanwerya oheerano. Naamwi hiiha, hiyaano nnaphwanela othanla omulevelela muchu owo nave oheererya onyeenyeya ni yoowo. Mweeparipari, onanwerya oviravo elukuluku nave onamuchuneya wiilipixerya, xaxaxa wakhala wi muchu owo ootepa oninyeenyeiha. Mulipeleli a 15 a Setempuru a 1994 a Ekunya, ooloca: “Vaavaa nyuwaano munamulevelelaanyu namacheka, ela henataphulela wi munatumerya yoocheka. Mukristu yoowo  onakhurumuwela onnaroromela wi Yehova onahaala othoriha moophaameya. Owo Muthoriha awookololowa a elapo yoothene nave onahaala wookolola mwaha mu elukuluku yoophwanelela.” Ntakhara heeni Yehova onnanceenyerya okhala ookhurumuwela ni omuroromela yoowo wi athorihe miyaha mwawookololowa?

8. Ti mwawiihai okhala ookhurumuwela onooniheryaaya othamalela wahu ikharari sa Yehova?

⁸ Okhala ookhurumuwela onooniherya othamalela. Mu niphwanaphwaniho nimoha, Yesu aahimulikanyiha Yehova ni patarawu yoowo aalevelenle evaale etokweene yeeyo kapuro awe ahaaweryeiye oliva. Nyenya, kapuro ola haawoonihenrye ikharari wa kapuro yoowo aampolen’ye ikhorowa vakhaani. (Mat. 18:23-35) Tiheeni Yesu aachuneiye onihusiha? Wakhala wi mweeparipari ninnavaha esisapo ikharari itokweene Yehova onooniheryeiye wa hiyaano, eyo enamuniceenyerya waakhurumuwela akina. (Sal. 103:9) Mulipeleli mmoha ovinre mu iyaakha sa muculi aahithariha yeela mmukhalelo ola: “Moohipwacha ikwaha kavi naakhurumuwenlaahu akina, eyo henalikana ni mukhalelo Muluku onamukhurumuweleiye mmoha ti mmoha a hiyo moorweela wa mukucho wa Kristu.”

9. Taani Yehova onawooniheryeiye ikharari? (Mateu 6:14, 15)

⁹ Wakhala wi ninnaakhurumuwela akina, Yehova tho onahaala onikhurumuwela. Yehova onnooniherya ikharari wa yaale ari a ikharari. (Mat. 5:7; Tiy. 2:13) Yesu aahooniherya vanlakani vene yeela vaavaa aahusinheiye oohuserya awe mukhalelo wa ovekela. (Mwaalakhanye Mateu 6:14, 15.) Hiyaano ninnahuserya nihusiheryo noolikana orweela wa yeeyo Yehova aamuleenleiye mulapeli awe Yupu. Mulopwana yoola oororomeleya aahitepa osooseya murima ni masu a alopwana araru awiichaniwa Elifase, Piltate ni Sohari. Yehova aahimuleela Yupu wi aavekelele yaawo. Yupu amanle weerano yeela, Yehova aahimureeliha yoowo.—Yobi 42:8-10.

10. Mmukhalelo taani nniihooxaahu mukhatiihu vaavaa nnatitelelaahu onyeenyeya ni muchu mukina? (Éfeso 4:31, 32)

¹⁰ Ninniihooxa mukhatiihu vaavaa nnatitelelaahu okhala oonyeenyeya. Esara eri ntoko mucholo woohokola, nave Yehova onachuna wi nikhaleno murecele moorweela wa orula yoowo. (Mwaalakhanye Éfeso 4:31, 32.) Owo onnamuceenyerya mmoha ti mmoha a hiyo wi “hiya onanariwa, orihe esara.” (Sal. 37:8) Wakhala wi noochariha ekano yeela, enahaala onikhaviherya. Vaavaa nnatitelelaahu onyeenyeya ni muchu yoowo onichekenle, hiyaano nniihooxa mukhatiihu omwiilini ni mmuupuweloni. (Masi. 14:30) Chiryene, vaavaa nnatitelelaahu onyeenyeya ni muchu, ela henamuhooxa yoowo, ori ntoko owurya murece wawiipha, murece owo homuhooxa yene. Ohiya yeeyo, vaavaa nnaakhurumuwelaahu akina, ninniiseerela saphaama. (Masi. 11:17) Hiyaano ninnakhalano murecele nave nnanwerya otitelela mmuteko ahu wa Yehova.

11. Tiheeni Piipiliya onaloceiye vooloca sa wunla ikuhu? (Aroma 12:19-21)

¹¹ Wunla ikuhu ti wa Yehova. Yehova hanivanhe owerya wa omulaka muchu yoowo onichekenle. (Mwaalakhanye Aroma 12:19-21.) Nthowa na okotakota ni miyoonelo sahu soohiphaameya, hannawerya othoriha miyaha moophwanelela hiihaa ntoko Muluku onaweryeiye. (Ahe. 4:13) Nave ikwaha ikina, miyoonelo sahu sinanwerya onihuweliha ni weeriha okhala woovila osuwela echu yeeyo eri yoophwanelela weera. Yehova aahimveerela Tiyako orepa: “Onanariwa wa muchu, honaruuha wookololowa wa Muluku.” (Tiy. 1:20) Hiyaano nnaphwanela osuwela wi Yehova onahaala weerano ichu moophwanelela  ni ororomela moomalela wi ekhaikhai enahaala weeriwano.

12. Ti mwawiihai nneeraahu niwerye wooniherya wi ninnaroromela wookololowa wa Yehova?

¹² Okhurumuwela onnooniherya ororomela wahu wookololowa wa Yehova. Moorweela wa ohiya miyaha mmatani mwa Yehova, hiyaano ninnooniherya wi ninnaroromela wi Yehova onahaala omaliha makacamiho oothene atannyiwe ni yoocheka. Mu elapo evyaani yeeyo ororomelinheiye, muupuwelo woohooxa ‘hiwuupuweleliwa tho, nari waanyiheriwa mano’ wanaawiili. (Isa. 65:17) Nyenya vaavaa nnanyeenyeihiwaahu, apwanne ti wooweryeya ohiya esara ni omukuherya mathowa muchu? Muthokororye mukhalelo akina awenryaaya weerano yeeyo.

13-14. Tiheeni muhusenryaanyu vooloca sa okhurumuwela orweela wa yaweereya ya Tony ni José?

¹³ Anna ni arokora ahu ancipale yaahilakelela okhurumuwela naamwi awo yaanyeenyeihiwe vancipale ni saweera sa akina. Mareeliho taani awo yaakhenlaaya moorweela wa weerano yeela?

¹⁴ Mu iyaakha sincipale ahaakumve okhala Namoona a Yehova, Tony * yoowo onakhala o Filipina, aahisuwela wi munnawe a mutokotoko iiphiwe ni mulopwana awiichaniwa José. Mu elukuluku yeele, Tony aari muchu oowali ni a nlala nave owo aanachuna wunla ikuhu. José aaphariwa nave awaleliwa nthowa na okhala a nlala. Voocharela, vaavaa José aakumihiweiye mukariposo, Tony aahilakelela wi amphwanye owo nave amwiiphe. Owo aahimuthuma kapuchi ntakhara yoolakelela yeela. Nyenya Tony aahipacerya omuhuserya Piipiliya ni Anamoona a Yehova. Owo ooloca: “Mu yoohuserya aka ya Piipiliya, kaahihuserya wi kaaphwanela otoroka mukhalelo ni saweera saka, nave ela yaaphitaanyerya ohiya esara.” Mu elukuluku aya, Tony aahipatisiwa nave voocharela owo aahipacerya orumeela ntoko mutokweene a mmulokoni. Mwaanyiherye mukhalelo owo aatikhinihen’yeiye vaavaa aasuwenleiye wi José aahipatisiwa akhala mulapeli a Yehova! Vaavaa ooweeli yaakumannaaya, awo yaahikhupaarelana moosivela, nave Tony aahimuleela José wi aahimukhurumuwela. Tony olonce  wi omukhurumuwela José waahimuruuhela ohakalala otokweene yoowo waari woovila othariha. Chiryene, Yehova aahimureeliha Tony nthowa na okhala ookhurumuwela.

15-16. Tiheeni muhusenryaanyu vooloca sa okhurumuwela orweela wa yaweereya ya Pedro ni Sue?

¹⁵ Mu 1985, Pedro ni Sue yiiha eri mmuthukumano mu Empa ya Omwene vaavaa moohiwehereryeya epompa yaaphunwaaya. Mulopwana mmoha taacukuchenrye epompa eyo mu Empa ya Omwene! Sue aaphoreya vancipale ophiyerya ahinawerya woona ni wiiwa. Owo tho aahiyeleela mukhalelo awe wa woona wunkhela. * Pedro ni Sue yaaniikoha: ‘Muchu a mukhalelo taani aahaala opaka echu yoonanara si yeela?’ Iyaakha sincipale ohoolo waya, mulipa ooreya epompa, yoowo ahaari mulapeli a Yehova, aahiphariwa nave aathoriheryiwa okhala mukariposo okumi awe woothene. Vaavaa yaakohiwaaya waakhanle wi awo aamukhurumuwela mulopwana ole, Pedro ni Sue yaahiloca: “Yehova oonihusiha wi okhalano esara ni okuha mathowa onanwerya onnanariha omwiilini ni mmuupuweloni. Mwawiihiiha, elukuluku vakhaani epompa ele emanle ophuwa, hiyaano naahimveka Yehova wi anikhaviherye okhala ookhurumuwela ni oomaaleleya.”

¹⁶ Apwanne waari wookhweya omukhurumuwela mulopwana yoole? Hooye, tahi wi ilukuluku soothene onakhala wookhweya. Awo annatitelela: “Mu ilukuluku ikina, vaavaa Sue aahooxeyeiye nthowa na makhwaca awe, hiyaano naananyeenyeya wanaawiili. Nyenya hiyaano hinaatitelela wuupuwelela vooloca sa yeela, mwawiihiiha moonelo owo onnamala mwawaakuveya. Mweeparipari, nnanwerya oloca ni murima ahu woothene wi wakhala wi nihiku nimoha yoole aaren’ye epompa munnihu, nnahaala omwaakhela phaama. Yaweereya ela ennooniherya wi vaavaa munapharihelaanyu malakiheryo a Mpiipiliyani, munnakhala ootaphuwa. Chiryene, malakiheryo a Mpiipiliyani annavahererya otaphuwa mmikhalelo mincipale opwaha seiho naahaalaahu waanyiherya! Hiyaano tho ninnalipiheya nthowa na osuwela wi moohilekela Yehova onahaala omalihavo onanara woothene.”

17. Tiheeni muhusenryaanyu vooloca sa okhurumuwela orweela wa yaweereya ya Myra?

 ¹⁷ Myra aahusenrye eparipari amanle otheliwa nave arino anamwane eeli akhaani. Aiyawe hiyeemerenrye eparipari. Mu elukuluku aya, awo yaahipaka mararuwo ni ehiya emusi. Myra ooloca: “Vaavaa aiyaka yaakihin’yaaya ni anamwane ahu eeli, miyaano kaanahooxeya vancipale mmuupuweloni nthowa na ohiroromeleya wa muchu yoowo kaamusivelaaka—kaahikhala oohaleeliheya, oohiiroromela, oothanana, awiikhupanya, awiiphwanyerya mathowa ni oonyeenyeya.” Naamwi othela ola waamanle, owo nlelo aanahooxeya nthowa nawi aiyawe yaari oohiroromeleya. Myra onnatitelela: “Kaahititelela okhala awuukhuwa ni oonyeenyeya mu miyeeri mincipale, nave kaahoona wi miyoonelo iha saanavolowela moonanara onthamwene aka ni Yehova vamoha ni akina.” Vano Myra olonce wi owo aahihiya esara nave hanachuna wi echu yoonanara vyakala yaaphacuwele aiyawe akhalai. Owo onnaroromela wi nihiku nimoha awo anahaala okhala nthamwene a Yehova. Myra otikitheryen’ye pahiru mu omwaahiyu. Ntoko mayi yoowo ori muciye, owo onnaahusiha anaawe eeli wi ekhale alapeli a Yehova. Olelo Myra onnahakalala omurumeela Yehova ni anaawe vamoha ni amusi awe.

18. Tiheeni nnaphwanelaahu ororomela wi Muthoriha Mutokotoko Yehova onahaala weera?

¹⁸ Ennanihakalaliha osuwela wi hiyaano hinaano owerya wa olakelela mukhalelo muchu onaphwaneleiye othorihiwa! Woona wi owo Muthoriha Mutokotoko, Yehova onahaala okhapelela muteko yoola woochuneya. (Aro. 14:10-12) Nnaphwanela ororomela moomalela wi owo ilukuluku soothene onahaala othoriha mwawiiwanana ni malamulo awe oophaameya wa yeeyo eri yaphaama ni yoonanara. (Map. 18:25; 1 Mam. 8:32) Owo harwa eerano echu moohookololowa!

19. Tiheeni wookololowa weekhaikhai wa Yehova onahaalaaya waakhwaniherya?

¹⁹ Ninnawehererya elukuluku yeeyo Yehova oneereiye amalihe moomalela ichu soothene soonanara sinakhumelela nthowa na ohiphaameya ni yoocheka. Mu elukuluku yeeyo, makacamiho ahu oothene oomwiilini ni a mmuupuweloni anahaala omalihiwa. (Sal. 72:12-14; Wup. 21:3, 4) Awo herwa tho yuupuweleliwa wanaawiili. Vaavaa nnawehereryaahu ophiya elukuluku yeeyo yoohakalaliha, nnaphwanela wooniherya othamalela wa Yehova nthowa na onivaha mavyakelo a omutakiherya yoowo moorweela wa okhala ookhurumuwela.