1. ¿Tlenon kimijlia Jehová akin kichiuaj se tlajtlakojli niman noyolkuepaj?

 PAMPA Jehová otexchijchiuj techijlia tlenon noneki tikchiuaskej niman techtlajtlakolmaka, san ika, noijki melak techtlasojtla (Sal. 100:3; Is. 33:22). Ika yejon, tla tikchiuaj se tlajtlakojli niman yemelak toyolkuepaj, yejua kinektok techtlapopoluis (Sal. 86:5). Jehová techyolseuiya ika tlen okijkuilo teotlajtoketl Isaías, yejua okijto: “Maski nemotlajtlakoluan sanoyej tekuik ken itlaj yestli chichilti, nejua nikchipauas istak ken itlaj nieve” (Is. 1:18).

2. ¿Tlenon noneki tikchiuaskej tla tiknekij tiyolseujtoskej imiuan oksekimej?

² Tinochimej titlajtlakolejkej, ika yejon, tikchiujtikisaj noso tikijtojtikisaj itlaj tlen oksekimej kinyolkokoua (Sant. 3:2). Maski ijkon, uelis tikinpiyaskej akin kuajli imiuan touikaskej, san noneki totlapopoluijtiaskej (Prov. 17:9; 19:11; Mat. 18:21, 22). Jehová kineki matikintlapopoluikan akin techyolkokouaj (Efes. 4:32). Niman melak techpaleuis tla ijkon tikchiuaj. Noijki, tikchiujtoskiaj ijkon ken Jehová pampa yejua nochipa techtlapopoluiya (Is. 55:7).

3. ¿Tlenon tikitaskej ipan yejuin tlamachtijli?

³ Ipan yejuin tlamachtijli tikitaskej ika maski titlajtlakolejkej uelis titetlapopoluiskej ijkon ken Jehová. Noijki, tiknankiliskej yejuin: Tla tikchiuaj se tlajtlakojli ¿noneki  tikimijliskej tlayekankej? ¿Tleka Jehová kineki matitetlapopoluikan? ¿Niman tlenon techmachtiaj sekimej tokniuan akin melak otlajyouijkej ipampa tlen oksekimej okichiujkej?

4. a) ¿Tlenon noneki kichiuas akin yokichiuj se ueyi tlajtlakojli? b) ¿Tlen tekitl yokinmakak Jehová tlayekankej?

⁴ Ijkuak yakaj kichiua se ueyi tlajtlakojli noneki kimijlis tlayekankej. Ipan 1 Corintios 6:9, 10 kijtoua katlejua yejon uejueyimej tlajtlakoltin. Tla yakaj kichiujtoskia se de yejon tlajtlakojli, kichiujtoskia tlen melak xkuajli pampa xkitlakamatstoskia itlanauatil toTajtsin niman nonekiskia kinotsas Jehová niman kitlajtlanilis makitlapopolui. Niman noijki noneki kimijlis tlayekankej tlen okichiuj (Sal. 32:5; Sant. 5:14). Matikilnamikikan ika san Jehová uelis kijtos tla yakaj kitlapopoluis noso ka, niman yejua ueli techtlapopoluiya pampa Jesús omik topampa. b San ika, Jehová yokintekitlali tlayekankej niman ijkon ika Biblia makitakan tla kikixtiskej itech tlanechikojli akin okichiuj se ueyi tlajtlakojli (1 Cor. 5:12). Ijkuak ijkon panos, tlayekankej melak noneki manotlajtoltikan yejuin: ¿okinemili kenon kichiuas yejon tlajtlakojli?, ¿okiyan tlen okichiuj?, ¿ouejkauj ijkon kichiujtinemiya? Niman yejuin tlen noneki más kuajli kitaskej: ¿yokiteititi ika yemelak yonoyolkuep?, ¿nesi ika Jehová yokitlapopolui? (Hech. 3:19).

5. ¿Kenon tepaleuiya tlen kichiuaj tlayekankej?

⁵ Ijkuak tlayekankej kinotsaj akin yotlajtlako noijki noneki kitlapejpeniskej tlen Jehová yokijto kichiuilis akin yotlajtlako (Mat. 18:18). ¿Niman kipaleuiya tlanechikojli tlen kitlapejpeniaj tlayekankej? Kema. Pampa tla akin yotlajtlako xnoyolkuepa, xkikauiliskej manemi ipan tlanechikojli. ¿Tleka? Pampa xkinekij makimijtlako akin kuajli kitekichiuilijtokej Jehová (1 Cor. 5:6, 7, 11-13; Tito 3:10, 11). Noijki, kipaleuiya akin otlajtlako manoyolkuepa niman ijkon makitlapopolui toTajtsin (Luc. 5:32). Niman tlayekankej kitlajtlaniliaj Jehová oksejpa kuajli manouika iuan akin yonoyolkuep (Sant. 5:15).

6. Xkijto tleka Jehová uelis kitlapopoluis yakaj akin yokikixtijkej itech tlanechikojli.

⁶ Tla yakaj akin okichiuj se tlajtlakojli xnoyolkuepa ijkuak tlayekankej iuan tlajtouaj, kuakon, kikixtiskej itech tlanechikojli. Niman tlayekankej xkipaleuiskej tla xokintlakamat itlanauatiluan tekiuajkej. Jehová yokinkauili tekiuajkej yejuamej makintlajtlakolmakakan noso makijtokan tlenon kichiuiliskej akin xokintlakamat tlanauatiltin, maski tla yonoyolkuep noso ka (Rom. 13:4). San ika, tla sakin, akin okichiuj tlajtlakojli peua kuajli tlanemilia, yemelak noyolkuepa, xok tlanemilia ijkon ken tlanemiliaya niman xok kichiua ijkon ken kichiuaya, kuakon, Jehová kinektos kitlapopoluis (Luc. 15:17-24). Maski okichiuj tlen melak xkuajli, Jehová uelis kitlapopoluis (2 Crón. 33:9, 12, 13; 1 Tim. 1:15).

7. ¿Tlenon kijtosneki ijkuak tiktlapopoluiyaj yakaj akin otexchiuili tlen xkuajli?

⁷ ¿Xmelak ika techyolseuiya ika xtejuamej tikijtouaj akinon kitlapopoluis Jehová? Kema, san ika, onka itlaj tlen uelis tikchiuaskej. ¿Itech tlenon titlajtouaj? Tejuamej  uelis tikijtoskej tla tiktlapopoluiskej yakaj akin otexchiuili tlen xkuajli noso yakaj akin otechyolkoko. Yejua kanaj uelis techijlis matiktlapopoluikan noso kanaj xtlaj techijlis. San ika, tla yemelak tiktlapopoluiyaj, xok tikualantoskej ipampa tlen otexchiuili nion xok tiktlauelitstoskej. San ika, tla melak otechyolkokojkej, noneki tiempo para uelis tikilkauaskej tlen otexchiuilijkej. Se revista La Atalaya del 15 de septiembre de 1994 kijtoua: “Ijkuak yakaj tiktlapopoluiyaj xkijtosneki ika tikijtotokej ika kuajli tlen okichiuj. Ijkuak yakaj akin kichiua ken Cristo tetlapopoluiya kiteititia ika kikauilia Jehová makiyektlali nochi tlen xkuajli okichiuilijkej. Jehová se Juez akin nochipa kichiua tlen kuajli niman yejua tetlajtlakolmakas ijkuak nonekis”. ¿Tleka Jehová kineki matitetlapopoluikan niman matijkauilikan yejua makiyektlali tlen xkuajli otexchiuilijkej?

8. ¿Kenon tikteititiaj ika tiktlasojkaitaj ika Jehová techiknelia?

⁸ Ijkuak titetlapopoluiyaj, tikteititiaj ika tiktlasojkaitaj ika Jehová techiknelia. Ipan Biblia tikitaj ika Jesús okijto ika Jehová yeskia ken on tlakatl akin okitlapopolui itlakeual akin miyek kuikiliaya niman xueliya kitlaxtlauiliaya. San ika, akin okitlapopoluijkej xokikneli akin xmiyek kuikiliaya (Mat. 18:23-35). ¿Tlenon techmachtisnekiya Jesús? Ika tla melak tiktlasojkaitaj ika Jehová melak techiknelia, kuakon tejuamej noijki titeikneliskej niman titetlapopoluiskej (Sal. 103:9). Yeuejkaui se Amatl Tekakistilijketl okijto ika maski miyekpa matitetlapopoluikan, xkeman uelis titetlapopoluiskej ijkon ken Jehová pampa “yejua sajnoye tetlapopoluiya niman teiknelia niman ueli ijkon kichiua pampa Cristo omik topampa”.

9. ¿Akinomej kimiknelia Jehová? (Mateo 6:14, 15).

⁹ Tla titetlapopoluiyaj, Jehová noijki techtlapopoluis pampa yejua kimiknelia akin noijki teikneliaj (Mat. 5:7; Sant. 2:13). Jesús noijki ijkon okiteititi ijkuak okinmachti inomachtijkauan kenon noneki kichiuaskej teoyotl (xpoua Mateo 6:14, 15). Jehová noijki ijkon okimachti Job. Job melak okinxiko Elifaz, Bildad niman Zofar akin san tlemach okijlikej niman melak okiyolkokojkej. San ika, Jehová okinauati makichiua teoyotl inpampa. Niman ijkuak Job ijkon okichiuj, Jehová melak okiteochiuj (Job 42:8-10).

10. ¿Tleka sa no tejuamej toijtlakouaj tla san tikualantokej? (Efesios 4:31, 32).

¹⁰ Tla san tikualantokej, sa no tejuamej toijtlakouaj. Tla san tikualantokej, kentla tikechpanojtiaskiaj totlauel niman matikilnamikikan ika Jehová xkineki matisiauikan (xpoua Efesios 4:31, 32). Ipan Salmo 37:8 Jehová techijlia: “Maka xkuajkualani, xkaua on tlauejli”. Tla tikchiuaj tlen Jehová techijlia, techpaleuis. Pampa tla san tikualantokej techkualotlas niman kijtlakos totlamachilis (Prov. 14:30). Tla san tiktlauelitstokej yakaj kentla topajuiskiaj: sa no tejuamej toijtlakojtoskiaj. Kuakon, ijkuak tikintlapopoluiyaj oksekimej sa no tejuamej topaleuiyaj (Prov. 11:17). Noijki, tiyolseuij niman ika toyojlo tiktekichiuiliaj Jehová.

11. ¿Kuajli tla totlakuepiltiaj? (Romanos 12:19-21).

¹¹ Matijkauilikan Jehová makitlajtlakolmaka akin otechyolkoko. Jehová xtechkauilia matotlakuepiltikan (xpoua Romanos  12:19-21). ¿Tleka? Pampa Jehová kimatstok ika tejuamej titlajtlakolejkej niman ika xueli tikitaj nochi tlen panoua. San ika, Jehová yejua tetlajtlakolmaka pampa kimatstok nochi tlen panoua (Heb. 4:13). Noijki, kemantika pampa tikualanij xok kuajli titlanemiliaj. Santiago okijkuilo: “Ijkuak sen tlakatl kualani, yejua xkichiua on tlen Dios kuelita” (Sant. 1:20). Kuajli matikmatstokan ika Jehová kichiuas tlen kuajli niman kitlajtlakolmakas akin otechyolkoko noso otexchiuili tlen xkuajli.

12. ¿Kenon tikteititiaj ika titlaneltokaj itech tlen Jehová kichiuas?

¹² Ijkuak titetlapopoluiyaj, tikteititiaj ika titlaneltokaj itech tlen Jehová kichiuas. Tla tijkauiliaj ika Jehová makiyektlali tlen otexchiuilijkej, tikteititiaj ika tikneltokaj ika yejua kipopolos tlajtlakojli tlen melak techtlajyouiltia. Ipan yenkuik tlaltikpaktli nochi tlen techtlajyouiltia niman tlen techajmana “nochimej kelkauaskej; xokaman yakaj kelnamikis” (Is. 65:17). San ika ¿yemelak uelis xok tikualaniskej niman xok tiktlauelitaskej yakaj akin melak otechtlajyouilti noso otechyolkoko? Matikitakan kenon sekimej ijkon yokichiujkej.

13, 14. ¿Tlenon mitsmachtia tlen ipan onochiuj Tony niman José?

¹³ Miyekej tokniuan yokinyolkokojkej niman yokintlajyouiltijkej, san ika, yejuamej yotetlapopoluijkej. ¿Kenon yokinpaleui pampa otetlapopoluijkej?

¹⁴ Matikitakan tlen ipan onochiuj Tony, c akin chanti Filipinas, ijkuak yejua xinomachtiaya okimiktilijkej se ikniuj akin más iueyi katka. Sakin, okimat ika se tlakatl akin itoka José okimikti ikniuj. Pampa Tony melak tlauele katka kinekiya notlakuepiltis. José okitsajkej pampa otemikti. Ijkuak José okis kampa tsauktoya, Tony okikouj se pistola niman okijto ika kitejtemoskia José niman kimiktiskia. San ika, sakin opeuj nomachtia Biblia imiuan iteixpantijkauan Jehová, yejua kijtoua: “Ijkuak opeuj ninomachtia,  onikasikamat ika nonekiya ninopatlas niman ika xok nonekiya niktlauelitas José”. Tony onoapolakti niman onochiuj tlayekanketl ipan itlanechikol. Tony melak oyolpak ijkuak okimat ika José noijki onochiuj iteixpantijkauj Jehová. Ijkuak onoitakej chikauak ononapalojkej niman Tony okijli José ika yokitlapopoluijka. Tony kijtoua ika ijkuak okitlapopolui José, melak oyolpak. Yejuin tokniuj ouel otetlapopolui niman Jehová melak okiteochiuj.

15, 16. ¿Tlenon mitsmachtia tlen ipan onochiuj Peter niman Sue?

¹⁵ Ipan 1985 se tlakatl okitlali se bomba ipan se Kajli kampa tosentlaliaj. Ijkuak otopon yejon bomba tokniuan Peter niman Sue ompa nemiyaj pampa kipixtoyaj intlanechikol, niman tokniuj Sue melak onokoko. d Miyekpa, Peter niman Sue notlajtoltiayaj: “¿Akinon okichiuj yejuin tlen melak xkuajli?”. Sakin, yejon tlakatl akin okitlali bomba okajsikej niman okitsajkej. Okintlajtoltijkej tokniuan Peter niman Sue tla yokitlapopoluijkaj yejon tlakatl, niman yejuamej okijtokej: “Jehová yotechmachti ika tla san tikualantokej niman san tiktlauelitstokej akin otechtlajyouilti, yejon uelis melak techijtlakos. Ika yejon, ijkuak kemach ijkon topan onochiuj nimantsin otikijlikej Jehová matechpaleui maka sa matikualantokan ipampa tlen opanok pampa tiknekiyaj tiyolpakiskej”.

¹⁶ ¿Ouijtika yokitakej Peter niman Sue kitlapopoluiskej yejon tlakatsintli? Kema. Yejuamej kijtouaj: “Kemantika oksejpa peua titlauelmikij ijkuak Sue peua nokokoua. San ika, pampa xsan itech yejon titlanemilijtokej nimantsin tiuajyolseuij. Noijki tikijtouanij ika tla yejon tlakatl peua nomachtia, tejuamej kuajli tikseliskej ipan ikalpan Jehová. Tlen topan onochiuj techmachtia ika tlen tiuelij ipan Biblia melak techpaleuiya. Nion xueli tiknemiliaj kenon melak techpaleuiya. Noijki, melak tiyolseuij pampa tikmatij ika sa  achijtsin poliui ijkuak Jehová kipopolos nochi tlen techtlajyouiltia”.

17. ¿Tlenon mitsmachtia tlen ipan onochiuj Myra?

¹⁷ Myra yononamiktijka ijkuak opeuj nomachtia niman ikinpiaya omemej ikoneuan, san ika, iueuentsin xokinek nomachtis Biblia. Sakin, iueuentsin okikajkayauj iuan okse siuatl niman okikauj. Myra kijtoua: “Xueliya nikneltokaya ika noueuentsin otechkauj. Ninomachiliaya ijkon ken nomachiliaj akin kinkajkayauaj. Melak ninoyolkokouaya, nitlauelmikiya, xok yakaj itech nitlaneltokaya niman sa no nejua ninotlajtlakoltiaya”. Maski yonokaujkaj, Myra ok noyolkokouaya. Yejua kijtoua: “Opanok seki metstli niman ok ijkon ninomachiliaya niman onikitak ika xok más kuajli ninouikaya iuan Jehová nion imiuan oksekimej”. Aman, Myra kijtoua ika xok kitlauelita iueuentsin niman xok tlauelmiki. Noijki kijtoua ika kuelitaskia ika akin iueuentsin katka mapeua manomachti. Myra xsan kinemilijtok tlen okichiuilijkej, yejua san kinemilia tlen panos ika tlayekapan. Maski Myra san iselti okinmachti ikoneuan itech Biblia niman okinchikauili intlaneltokil aman yolpaki pampa kitekichiuilia Jehová iuan ikoneuan niman ichanejkauan.

18. Pampa Jehová Ueyixtika Juez, ¿tlenon uelis kuajli tikmatstoskej?

¹⁸ Pampa Jehová Ueyixtika Juez, xnoneki tajmanaskej kenon kintlajtlakolmakas oksekimej. ToTajtsin kitas kenon tetlajtlakolmakas. ¡Yejon melak techyolseuiya! (Rom. 14:10-12). Uelis kuajli tikmatstoskej ika yejua nochipa temelajkatlalis niman tetlajtlakolmakas ijkon ken kinamiki (Gén. 18:25; 1 Rey. 8:32). Yejua nochipa kichiuas tlen kuajli.

19. ¿Tlenon kichiuas Jehová ika tlayekapan?

¹⁹ Jehová kipopolos tlajtlakojli tlen melak techtlajyouiltijtika. ¡Tinochimej tiknekij mayejko yejon tonajli! Yejua kichiuas maka sa matikualokan niman maka sa matoyolkokokan (Sal. 72:12-14; Apoc. 21:3, 4). Nochi tlen xkuajli topan yonochiuj tikilkauaskej. Niman aman ika xiyejko yejon tonajli matotlapopoluijtiakan ijkon ken Jehová kineki.