1. Hadia niwaʼö Yehowa ba niha samalalini era-era?

 HEWAʼAE Yehowa andrö Somböi, Sameʼe Huku, ba Sanguhuku yaʼita, yaʼia andrö göi Amada sebua faʼomasi si so ba zorugo. (Si. 100:3; Yes. 33:22) Ba ginötö tafalua zala ba tafalalini gera-erada soroi ba dödö, hasambalö iʼefaʼö zalada andrö. Ifalua daʼö tenga ha börö me iʼokhögö kuaso, hizaʼi börö me omasi ia wamalua daʼö. (Si. 86:5) Ifaʼema Yesaya samaʼeleʼö hadia wehede Yehowa si möi fondrandra dödöda, ”He no hulö ndro waʼoyo horömi, ba tobali afusi sibai hulö esi.”—Yes. 1:18.

2. Hadia zinangea tafalua na omasi ita fahuwu ba niha böʼö?

² Börö me lö moʼahonoa ita, tola manö taʼafökhöiʼö dödö niha böʼö ba wehede hegöi ba gamuatada. (Yak. 3:2) Hewaʼae simanö, tenga daʼö geluahania wa tebai taʼokhögö wahuwusa saro ba niha böʼö. Tola taʼokhögö wahuwusa saro na tafomaha ita wangefaʼö sala. (Amd. 17:9; 19:11; Mat. 18:21, 22) Na so manö maʼifu zala niha böʼö khöda, iʼandrö Yehowa enaʼö taʼefaʼö zalara. (Kol. 3:13) Lö tola löʼö tafalua daʼö, mendrua manö me no iʼefaʼö zalada Yehowa ”soroi ba dödö”.—Yes. 55:7.

3. Hadia nitutunöda ba artikel daʼa?

 ³ Ba artikel daʼa, tatutunö dania hewisa woloʼöda Lowalangi Yehowa ba wangefaʼö sala hewaʼae na lö moʼahonoa ita. Hadia manö horö sinangea tafatunö khö ndra satua sokubaloi? Hadia mbörö wa iʼandrö khöda Yehowa enaʼö taʼefaʼö zala niha böʼö? Ba hadia wamahaʼö nihalöda moroi ba zi no irai alua khö ndra talifusöda, sanaögö abula dödö börö zala nifalua niha böʼö?

4. (a) Na ifalua horö sebua si samösa samosumange Yehowa, hadia zinangea ifalua? (b) Hadia noro dödö ndra satua sokubaloi na so zamalua horö?

⁴ Na so zamalua horö sebua, lö tola löʼö mufatunö daʼö khö ndra satua sokubaloi. So ösa horö sebua si no tesura ba 1 Korindro 6:9, 10. Horö sebua andrö no amuata si lö sökhi sanawö oroisa Lowalangi. Na ifalua horö sebua si samösa niha Keriso, lö tola löʼö mangandrö ia khö Yehowa ba ifatunö zalania andrö khö ndra satua sokubaloi. (Si. 32:5; Yak. 5:14) Hadia noro dödö niʼokhögö ndra satua sokubaloi? Ha Yehowa zangokhögö kuaso ba wangefaʼö horöda fefu, ba teʼodane-dane wangefa nibeʼenia andrö ba höli. * Hewaʼae simanö, no ibeʼe noro dödö khö ndra satua sokubaloi ba wotatugöi hadia laʼefasi moroi ba mbanua niha Keriso niha si no mamalua horö andrö mazui löʼö. (1 Ko. 5:12) Moguna lahalö gangetula si teʼodane-dane ba Zura Niʼamoniʼö. Moguna göi laʼangeragö wanofu-nofu daʼa: Hadia iʼodödögö wamalua horö andrö? Hadia iforege waminiʼö horönia andrö ba niha böʼö? Hadia no ara ifalua-lua daʼö? Sabölö moguna, hadia so dandra wa no ifalalini gera-erania? Hadia so dandra wa no iʼefaʼö zalania Yehowa?—Hal. 3:19.

5. Hadia mbuania ba mbanua niha Keriso na lafalua halöwöra ira satua sokubaloi?

⁵ Ba ginötö fahuhuo ndra satua sokubaloi ba niha si no mamalua sala, ohitö dödöra yaʼia daʼö ba wangai angetula si tefaudu ba gangetula si no ihalö Yehowa ba zorugo. (Mat. 18:18) Hadia mbuania halöwöra andrö ba mbanua niha Keriso? Börö me laʼefasi niha si lö mamalalini era-era, daʼö zi tobali folumöʼö ba nono mbanua Yehowa irege lö tekiko wamatira. (1 Ko. 5:6, 7, 11-13; Tit. 3:10, 11) Tobali göi fanolo daʼö ba niha samalua horö enaʼö ifalalini gera-erania ba itema wangefa moroi khö Yehowa. (Luk. 5:32) Na ifalalini gera-erania niha samalua horö, mangandrö ndra satua sokubaloi salahinia ba laʼandrö wanolo moroi khö Yehowa enaʼö ifuli aro ia ba wamati.—Yak. 5:15.

6. Na no laʼefasi zi samösa niha Keriso, hadia tola nasa itema wangefa moroi khö Yehowa? Tutunö.

⁶ Hadia nifalua ndra satua sokubaloi na laʼila wa lö ifalalini gera-erania si samösa niha? Lö tola löʼö laʼefasi ia moroi ba mbanua niha Keriso. Na no isawö huku ba soi si toröi yaʼia, lö laʼalui lala ira satua sokubaloi ba wolumöʼö yaʼia. Itehegö Yehowa khö ndra samatörö ba wanguhuku gofu haniha manö zanawö huku, he na no ifalalini gera-erania mazui löʼö. (Rom. 13:4) Hizaʼi, na aboto ba dödönia ba gafuriata wa fasala nifaluania andrö, ifalalini gera-erania, ba ibulöʼö gamuatania, hasambalö iʼefaʼö zalania Yehowa. (Luk. 15:17-24) Tola itema wangefa hewaʼae na no ifalua horö sebua.—2 Ng. 33:9, 12, 13; 1 Ti. 1:15.

7. Hadia geluahania taʼefaʼö zala niha si fasala ba khöda?

⁷ Taʼandrö sibai saohagölö me taʼila wa lö nibeʼe khöda noro dödö ba wotatugöi hadia tola teʼefaʼö horö zi samösa niha mazui  löʼö. Ha Yehowa zotatugöi daʼö. Hizaʼi, so göi gangetula si tola tahalö. Hadia daʼö? Te so samösa niha si no mamalua sala khöda, ba tola manö no horö sebua nifaluania andrö. He na iʼandrö khöda wangefa mazui löʼö, tola tahalö gangetula ba wangefaʼö sala niha daʼö. Eluahania, lö saʼae mofönu ita mazui abao dödöda khönia. Tatu manö, moguna khöda ginötö hegöi famorege, mendrua manö na afökhö sibai khöda nifaluania andrö. Moloʼö sambua artikel ba Menara Pengawal 15 Mbaŵa si Siwa 1994, na taʼefaʼö horö zi samösa niha, tenga daʼö geluahania wa fao dödöda ba horö nifaluania. Imane ba artikel daʼö, ”Ba niha Keriso, mangefaʼö sala eluahania itouʼö ba danga Yehowa fefu ngawalö zalua. Ha yaʼia Zanguhuku fondrege zatulö ba zi sagörö banua awö danö, ba hasambalö ifalua wanguhuku satulö ba ginötö si tefaudu.” Hadia mbörö wa iʼandrö khöda Yehowa enaʼö taʼefaʼö zala niha böʼö ba faduhu dödöda khönia wa hasambalö ifalua huku satulö?

8. Hadia mbuania na taforomaʼö wangandrö saohagölö ba waʼahakhö dödö Yehowa?

⁸ Na taʼefaʼö zala, no taforomaʼö wangandrö saohagölö ba waʼahakhö dödö Yehowa. Ba gamaedola nitutunö Yesu, iʼamaedolagö Yehowa simane si samösa razo sangeheta foʼömö sebua si tebai ibuʼa si samösa sawuyu. Hizaʼi, sawuyu si no muhakhösi tödö andrö, lö iforomaʼö waʼahakhö dödö khö nawönia sawuyu tanö böʼö hewaʼae no ide-ide woʼömö nawönia andrö. (Mat. 18:23-35) Hadia nifahaʼö Yesu khöda? Na sindruhu-ndruhu taʼandrö saohagölö ba waʼahakhö dödö Yehowa, daʼö zamarou yaʼita ba wangefaʼö sala niha böʼö. (Si. 103:9) Imane majalah Manuriaigö me hauga wulu fakhe silalö, ”Gofu hauga kali taʼefaʼö zala nawöda niha, lö fagölö daʼö ba wangefaʼö sala nifalua Lowalangi khöda hegöi faʼahakhö dödö niforomaʼönia me ifatenge Nononia Yesu Keriso.”

9. Haʼökhö iforomaʼö waʼahakhö dödönia Yehowa? (Mataiʼo 6:14, 15)

⁹ Na taʼefaʼö zala, ba teʼefaʼö göi zalada. Iforomaʼö waʼahakhö dödönia Yehowa ba niha sangahakhösi tödö niha böʼö. (Mat. 5:7; Yak. 2:13) No itutunö daʼö Yesu me ifomaha ndra nifahaʼönia ba wangandrö. (Baso Mataiʼo 6:14, 15.) No irai göi ifahaʼö zimane daʼö Yehowa khö genoninia Yobi. Afökhö sibai dödö ndra matua si lö faröi andrö ba wehede ndra awönia si datölu sotöi Elifasi, Bilidado, hegöi Sofari. Iʼandrö Yehowa khö Yobi enaʼö mangandrö ia salahira. Me no aefa ifalua daʼö Yobi, ifahowuʼö ia Yehowa.—Yob. 42:8-10.

10. Hana wa tobali famaʼalada na tahöna khöda waʼabao dödö? (Efeso 4:31, 32)

¹⁰ Tobali famaʼalada na tahöna khöda waʼabao dödö. Omasi Yehowa na taheta khöda waʼabao dödö si no amaedola noro sabua enaʼö tarasoi waʼahono dödö. (Baso Efeso 4:31, 32.) Ifarou ita enaʼö ’taböhöli wofönu ba taröi waʼaukhu dödö’. (Si. 37:8) Tobali fanoloda na taʼoʼö wanuturu lala andre. Na lö taböhöli waʼabao dödö, tola iʼasogö wökhö ba mbotoda ba fawuka gera-erada. (Amd. 14:30) Sindruhunia, na tahöna khöda waʼabao dödö, fagölö ita simane niha samadu langu. Yaʼita samösa zanaögö lua-luania, tenga niha sangafökhöiʼö tödöda andrö. Hizaʼi, na taʼefaʼö zala niha böʼö, hulö no tafohare ita samösa. (Amd. 11:17) Tarasoi waʼahono dödö ba anau gölöda wangai halöwö khö Yehowa.

11. Hadia niwaʼö Zura Niʼamoniʼö sanandrösa ba wolau balö? (Roma 12:19-21)

¹¹ Ha Yehowa zinangea molau balö. Lö nitehegö  Yehowa khöda ba wolau balö na so zamalua sala khöda. (Baso Roma 12:19-21.) Börö me lö moʼahonoa ita ba ambö faʼatua-tuada, andrö wa tebai tafalua wanguhuku satulö simane nifalua Lowalangi. (Heb. 4:13) Itaria göi lö taʼila tahalö gangetula si tefaudu börö waʼaukhu dödöda. Ibeʼe gehehania Yehowa khö Yakobo ba wanura, ”Fönu niha andrö, lö iʼasogö waʼatulö ba wamaigi Lowalangi.” (Yak. 1:20) Faduhu dödöda wa hasambalö ihalö gangetula si tefaudu Yehowa, ba ifalua huku satulö ba soʼahonoa.

12. Hewisa wangoromaʼöda faʼafaduhu dödö wa hasambalö ifalua zatulö Yehowa?

¹² Na taʼefaʼö zala, daʼö zangoromaʼö faʼafaduhu dödöda wa hasambalö ifalua zatulö Yehowa. Na tatouʼö gabula dödöda ba danga Yehowa, no taforomaʼö waʼafaduhu dödö khönia wa hasambalö iheta fefu ngawalö zi lö sökhi niʼasogö horö. Ba gulidanö si bohou si no ifabuʼu, iheta waʼafökhö dödö si no irai tarasoi, ’lö saʼae itörö tödöda zi no numalö, ba lö saʼae irai tumbu ia ba dödöda’. (Yes. 65:17) Hizaʼi, na abölö-bölö sibai waʼafökhö nirasoida, hadia tola tatayaigö khöda waʼafökhö dödö ba lö mofönu ita? Datafaigi hadia mbörö wa so ösa ndra talifusöda si tola mamalua daʼö.

13-14. Moroi ba duma-duma Tony hegöi José, hadia wamahaʼö si tola tahalö sanandrösa ba wangefaʼö sala?

¹³ Ato ndra talifusöda si no mangai angetula ba wangefaʼö sala hewaʼae na afökhö sibai dödöra börö gamuata niha böʼö. Hadia howu-howu nitemara me no lafalua daʼö?

¹⁴ Nehegö atö zi no irai alua khö Tony, * si toröi ba Filipina. Ara fatua lö ifahaʼö ia ba zindruhu, no irongo haniha zamunu gaʼania ira matua, yaʼia daʼö José. Me luo daʼö, Tony andrö niha si lö sökhi ba samuʼi, ba omasi ia ilau mbalönia. Börö waʼalösökhi nifalua José, laraʼu ia ba labeʼe ba gurunga. Aefa daʼö, me no teʼefaʼö José moroi ba gurunga, möi ba hölu Tony wa hasambalö iʼalui ba ibunu José. Börö daʼö, iʼöli khönia pistol. Me luo daʼö, no ibörögö ifahaʼö ia Tony ba Zura Niʼamoniʼö khö ndra Samaduhuʼö Yehowa. Imane, ”Me ufahaʼö ndraʼo, aboto ba dödögu wa moguna ubulöʼö lala waʼaurigu ba uforege enaʼö lö  saʼae mofönu ndraʼo.” Ba gafuriata, tebayagö idanö Tony ba lafataro ia tobali satua sokubaloi ba mbanua niha Keriso. Khalaigö hawaʼatokea dödönia me iʼila wa no göi tebayagö idanö José tobali Samaduhuʼö Yehowa! Me falukha ira, faoma latalagui nawöra ba ifatunö Tony khö José wa no iʼefaʼö zalania. Itutunö Tony wa börö me no iʼefaʼö zala José, daʼö zameʼe khönia faʼomuso dödö irege lö iʼila itutunö hawaʼebua waʼomuso dödönia andrö. Sindruhu, itema howu-howu Tony moroi khö Yehowa me no iʼefaʼö zala nawönia.

15-16. Moroi ba duma-duma Peter hegöi Sue, hadia wamahaʼö si tola tahalö sanandrösa ba wangefaʼö sala?

¹⁵ Me döfi 1985, mamoka bom me so Peter hegöi Sue ba Nahia Gangowuloa. Sindruhunia, so samösa ndra matua sameʼe bom bakha ba daʼö. Lua-luania, mesokho Sue irege asese irasoi waʼafökhö ba dalingania hegöi hörönia. Baero daʼö, lö saʼae iʼila iʼago hua iadaʼa. * Manofu-nofu Peter hegöi Sue, ’Hana wa so niha samalua amuata si lö sökhi simane daʼö?’ Mato hauga fakhe aefa daʼö, laraʼu ndra matua andrö ba labeʼe ia ba gurunga sandrohu faʼaurinia. Ira matua daʼö tenga Samaduhuʼö Yehowa. Me lasofu khöra hadia no laʼefaʼö zala ndra matua daʼö, imane Peter hegöi Sue, ”No ifahaʼö ita Yehowa enaʼö böi tahöna khöda waʼabao dödö hegöi fönu börö me tola manö taʼofökhöi, tobali fangabu dödöda, ba fawuka wangera-ngerada. Börö daʼö, iʼotarai ba wamobörö, maʼandrö khö Yehowa ba wanolo yaʼaga enaʼö tola maheta khöma waʼabao dödö hegöi fönu, irege marasoi waʼowua-wua dödö ba waʼaurima.”

¹⁶ Hadia aoha khöra wangefaʼö sala? Itaria abua. Latohugö wanutunö, ”Na itaria mangarö-ngarö Sue börö waʼafökhö zokhonia andrö, ifuli zui aukhu dödöma. Hizaʼi, lö maʼera-era sibai zalua andre enaʼö alio taya daʼö ba dödöma. Sindruhunia, na samuza inötö tobali talifusöda zamazökhi bom daʼö, tola mawaʼö soroi ba dödöma wa hasambalö matemaʼö ia. Salua andre zi tobali famahaʼö khöma wa sindruhu-ndruhu iʼefaʼö ita goi-goi  Zura Niʼamoniʼö. Börö me maʼoʼö daʼö, tola masöndra waʼohahau dödö töra moroi ba zi tola makhalaigö. Terara göi dödöma börö me maʼila wa hasambalö iheta Yehowa ngawalö gabula dödö ba zi lö ara tö.”

17. Moroi ba duma-duma Myra, hadia wamahaʼö si tola tahalö sanandrösa ba wangefaʼö sala?

¹⁷ Ifahaʼö ia Myra ba zindruhu me no aefa mangowalu ia ba no tumbu khönia darua ndraono side-ide. Hizaʼi, lö itemaʼö zindruhu foʼomonia. Samuza inötö, mohorö woʼomonia ira matua andrö ba iröi nösi nomonia. Imane Myra, ”Me iröi ndraʼo hegöi iraonoma, urasoi hadia nirasoi niha böʼö na faröi khöra niha niʼomasiʼöra. Urasoi waʼafatö dödö, faʼabu dödö, faniasa, hegöi fönu. Utahigö göi ndraʼo samösa ba lö faduhu dödögu wa no alua khögu daʼö.” Hewaʼae no fabali ira, lö taya waʼafökhö dödö nirasoi Myra. Itohugö wanutunö, ”Mato hauga waŵa, fawuka wangera-ngeragu irege molua-lua daʼö ba wahuwusagu khö Yehowa hegöi ba niha böʼö.” Iadaʼa, tola saʼae iwaʼö Myra wa no aheta ba dödönia wönu ba lö iʼandrö-andrö enaʼö alua zi lö sökhi khö woʼomonia. Itötöna enaʼö samuza inötö dania, tobali samosumange Yehowa woʼomonia andrö. Iʼosambuaʼö dödönia Myra ba zi so miföna ba lö itörö-törö manö tödönia zi no numalö. Hewaʼae no tobali ia lakha mbanua, mofozu ia ba wangebuaʼö iraononia tobali samosumange Yehowa. Iadaʼa, omuso dödö Myra wangai halöwö khö Yehowa, ba simanö göi ndraononia si darua awö nösi nomora.

18. Hadia waʼafaduhu dödöda khö Yehowa börö me yaʼia Zanguhuku Fondrege Zalawa?

¹⁸ Terara sibai dödöda me no taʼila wa tenga khöda tebeʼe noro sabua ba wanguhuku niha böʼö! Yehowa zamalua halöwö si tohude andrö börö me yaʼia Zanguhuku Fondrege Zalawa. (Rom. 14:10-12) Faduhu dödöda wa hasambalö ihalö gangetula si tefaudu ba goi-goinia soʼahonoa sanandrösa ba zatulö hegöi si lö atulö. (1 Mo. 18:25; 1 Ra. 8:32) Lö irai ifalua zi lö atulö!

19. Hadia nifalua Yehowa ba zi so miföna börö me moʼahonoa waʼatulönia?

¹⁹ Tatu tadöna-döna wa iheta dania Yehowa fefu ngawalö zi lö sökhi niʼasogö horö hegöi falömoʼahonoa. Ba luo daʼö, lö saʼae tarasoi ngawalö waʼafökhö hegöi faʼabu dödö. (Si. 72:12-14; Fam. 21:3, 4) Lö saʼae itörö-törö tödöda daʼö. Gasa-gasa wombaloida inötö sahöli-höli dödö andre, taʼandrö sibai saohagölö khö Yehowa me no ibeʼe khöda waʼabölö ba woloʼö yaʼia ba wangefaʼö sala niha böʼö.