1. Ngisiphi isiqinisekiso uJehova asinikela labo abatjhugulukako?

 NANYANA uJehova anguMdali, uMnikelimthetho nomaHluleli, godu ubuya abenguBabethu wezulwini onethando. (Rhu. 100:3; Isa. 33:22) Nasona kuye begodu sitjhuguluka kwamambala, uzosilibalela bewuzimisele ukwenza njalo. (Rhu. 86:5) Ngomphorofidakhe UIsaya, uJehova wasinikela nasi isiqinisekiso: “Nanyana izono zenu zitlerebede, zizaba mhlophe njengesithwathwa.”—Isa. 1:18.

2. Nasizakuba nokuthula nabanye, khuyini ekufuze siyenze?

² Ngebanga lokuthi sinesono, soke sitjho besenze izinto ezikhuba abanye. (Jak. 3:2) Lokho akutjho bona angeze sibe nobuhlobo obuhle nabo. Sizokuba nabo nasizifundisa ukubalibalela. (IzA. 17:9; 19:11; Mat. 18:21, 22) Nasikhubene sodwa uJehova ufuna silibalelane. (Kol. 3:13) Sinamabanga amahle khulu wokwenza njalo. Kazi uJehova “uyathethelela nokuthethelela.”—Isa. 55:7.

3. Sizokucoca ngani esihlokwenesi?

³ Esihlokwenesi, sizokucoca ngokuthi abantu abanesono bangakulingisa njani ukulibalela kwakaJehova. Ngiziphi izono ekufuze sizilethe kubadala? Kubayini uJehova asikhuthaza bona silibalelane begodu khuyini esingayifunda kumaKrestu esikunye nawo akhewaqalana nobuhlungu ngebanga lezono ezikulu ezenziwa babanye abantu?

4. (a) Lokha inceku kaJehova yenze isono esikhulu, kufuze yenzeni? (b) Khuyini elindeleke kubadala bebandla nabayokuhlanga nomuntu owonileko?

⁴ Izono ezikulu kufuze zilethwe kubadala bebandla. Iimbonelo zezono ezinjalo, zifumaneka kweyoku-1 kwebeKorinte  6:9, 10. Izono ezinjalo zifaka hlangana ukungayilaleli ngamabomu imithetho kaZimu. UmKrestu nakenze isono esinjalo, kufuze akhulume noJehova uZimu ngomthandazo begodu aye nakubadala bebandla. (Rhu. 32:5; Jak. 5:14) Abadala bebandla badlala yiphi indima? NguJehova kwaphela onelungelo lokulibalela izono ngokupheleleko begodu lokho ukwenza ngesisekelo somhlatjelo. * UJehova unikele abadala umthwalo wokuqunta ngokusizwa miTlolo ukuthi umuntu owonileko kufuze ahlale ebandleni namkha awa. (1 Kor. 5:12) Hlangana nezinye izinto, kufuze bazimisele ukuphendula imibuzo elandelako le: Inga-kghani isono senziwe ngehloso? Kghani umuntu owonileko lo bekahlele kusesengaphambili ukwenza isono? Kghani usibuyelele isikhathi eside kangangani isoneso? Okuqakatheke khulu, inga-kghani bukhona ubufakazi obutjengisa ukuthi uzimisele kwamambala ukutjhuguluka? Bukhona na ubufakazi obubonakalako bokuthi uJehova umlibalele?—IzE. 3:19.

5. Ngiziphi iimbusiso ezilethwa msebenzi yabadala?

⁵ Lokha abadala nabahlangana nomuntu owonileko, umgomwabo kufikelela isiquntu esifanako naleso esifikelelwe ezulwini. (Mat. 18:18) Ihlelelweli lilizuzisa njani ibandla? Liqinisekisa ukuthi labo abangatjhugulukiko ekwenzeni ubumbi, bayasuswa ebandleni bona bangalimazi izimvu zakaJehova eziligugu. (1 Kor. 5:6, 7, 11-13; Tit. 3:10, 11) Ilungiselelweli lisiza nomuntu owonileko bona atjhuguluke begodu azuze ngokulitjalelwa nguJehova. (Luk. 5:32) Abadala bathandazela umuntu otjhugulukako begodu babawe uJehova ukuthi amsize alungise ubuhlobo bakhe noJehova.—Jak. 5:15.

6. Inga-kghani uJehova angamlibalela umuntu osusiweko? Hlathulula.

⁶ Akhesithi umuntu owonileko akatjhuguluki lokha abadala nabacoca naye. Ebujamwenobo, uzokususwa ebandleni. Nangabe uphule umthetho wenarha, abadala angeze bamvikela nakufuze aqalane nomphumela wokona kwakhe. UJehova uvumela iimphathimandla bona zahlulele bezijezise nanyana ngubani ophula umthetho, akunandaba bona umuntu loyo uyatjhuguluka namkha awa. (Rom. 13:4) Nangabe umuntu loyo ngokukhamba kwesikhathi uyazisola begodu atjhuguluke, uJehova uzimisele ukumlibalela. (Luk. 15:17-24) UJehova uzomlibalela ngitjho nanyana izono zakhe zizikulu.—2 Kron. 33:9, 12, 13; 1 Thim. 1:15.

7. Kuzosisiza ngani ukulibalela umuntu osonileko?

⁷ Kuyathabisa ukwazi ukuthi akusimthwalethu ukuqunta ukuthi uJehova kufuze asilibalele isoni namkha awa! Nanyana kunjalo, kunesiqunto nathi ekufuze sisenze. Ngisiphi? Singaqalana nobujamo la umuntu owenze isono esikhulu kithi abawa bona simlibalele. Mhlamunye ngesinye isikhathi umuntu loyo angasibawi bona simlibalele. Kinanyana ngibuphi ubujamo esizifumana sikibo, kuzokufuze siqunte ukumlibalela umuntu osonileko ukwenzela bona singasaba nehloyo namkha ilaka nasicabanga ngaye. Iqiniso kukuthi kuzokuthatha isikhathi nomzamo, khulukhulu nangabe umuntu loyo usilimaze khulu. IsiThala sakaSeptemba 15, 1994, sithi:  “Nawulibalela umuntu owonileko, lokho akutjho ukuthi uvumelana nezenzo zakhe ezimbi. KumaKrestu, ukulibalela kutjho ukutjhiyela izinto ezandleni zakaJehova. Nguye umaHluleli wephasi nezulu begodu nguye ozokuletha ubulungiswa ngesikhathi esifaneleko.” Kubayini uJehova asikhuthaza bona silibalele begodu siliselele ukwenziwa kobulungiswa ezandleni zakhe?

8. Ukulibalela kutjengisa njani ukuthi siyawuthokoza umusa kaJehova?

⁸ Nasilibalela abanye, sitjengisa ukuthi siyawuthokoza umusa kaJehova. Komunye umfanekiso, uJesu umadanisa uJehova nomphathi othileko owavala isikolodo esikhulu sesigqila sakhe ebesele singasakghoni ukusibhadela. Isigqilesi sabhalelwa kutjengisa ummoya ofanako wokulibalela esinye isigqila ebesisikoloda imali encani khulu. (Mat. 18:23-35) Khuyini uJesu asifundisa yona? Nasiwuthokozela kwamambala umusa omkhulu uJehova asitjengise wona, nathi sizokulibalela abanye. (Rhu. 103:9) IsiThala salibeka nganasi indlela iphuzweli emnyakeni eyadlulako: “Akunandaba bona sibalibalela iinkhathi ezingangani labo abasonileko ngombana ngeze kwalingana nezinga uZimu asilibalela bekasitjengisa umusa ngayo ngoKrestu.”

9. UJehova unomusa kibobani? (Matewu 6:14, 15)

⁹ Abalibalelako bazakulitjalelwa. UJehova uba nomusa kilabo abanomusa kwabanye. (Mat. 5:7; Jak. 2:13) UJesu wakwenza kwakhanya lokho nakafundisa abafundi bakhe indlela ekufuze bathandaze ngayo. (Funda uMatewu 6:14, 15.) Ngaphambi kwalokho, uJehova waveza iphuzu elifanako malungana nencekwakhe uJobho. Indoda ethembekileko le yezwa ubuhlungu ngebanga lezinto ezakhulunywa madoda amathathu U-Elifazi, uBhilidadi noTsofara. UJehova wayalela uJobho bona abathandazele. Ngemva kokubathandazela, uJehova wambusisa.—Job. 42:8-10.

10. Kubayini ukufukamela ihloyo kungasilimaza? (Efesu 4:31, 32)

¹⁰ Ukufukamela ihloyo kuyalimaza. UJehova ufuna sithabele itjhaphuluko esiyifumana ngokuthi singazithwesi umthwalo wokuhloya abanye. (Funda yebe-Efesu 4:31, 32.) Usikhuthaza bona ‘silise ukuhluthuleka, sitjhide elakeni.’ (Rhu. 37:8) Ukulandela iselulekwesi kuzosisiza. Ukufukamela ihloyo kungasilimaza emzimbeni nemkhumbulweni. (IzA. 14:30) Ukufukamela kwethu ihloyo, ngeze kwalimaza omunye umuntu ukudlula indlela okungalimaza thina ngayo. Kungafana nalokha umuntu nakangasela itjhefu bese alindele bona kulimale umuntu omkhubileko. Yeke, nasilibalela abanye, sizipha isipho. (IzA. 11:17) Siba nokuthula komkhumbulo nehliziyo begodu sikghona ukuragela phambili sisebenzela uJehova sithabile.

11. Khuyini okutjhiwo liBhayibheli ngokufuna ukuzibuyiselela? (Roma 12:19-21)

¹¹ Ukwahlulela ngekwakaJehova. UJehova akhenge asivumele bona sizibuyiselele emntwini osonileko. (Funda yebeRoma 12:19-21.) Ukuba nesono kwenza bona singakghoni ukwahlulela njengoJehova. (Heb. 4:13) Lokhu kwenziwa kukuthi ngezinye iinkhathi sivumela indlela esizizwa ngayo ithinte indlela esahlulela ngayo. UJehova waphefumulela uJakopo bona atlole athi: “Itukuthelo  yomuntu ayilethi ukulunga kwakaZimu.” (Jak. 1:20) Singaqiniseka ngokuthi uJehova uzokwenza okulungileko ngokusilethela ubulungiswa.

12. Singatjengisa njani ukuthi siyabuthemba ubulungiswa bakaJehova?

¹² Nasilibalelako, sitjengisa bona siyabuthemba ubulungiswa bakaJehova. Ngokutjhiyela zoke izinto ezandleni zakaJehova, sitjengisa bona siyathemba ukuthi uzokulungisa woke umonakalo owenziwe sisono. Ephasini lakhe elitjha elithenjisiweko, izinto ezisizwisa ubuhlungu “zaphambilini azisazokukhunjulwa, namkha ziyelelwe emkhumbulweni.” (Isa. 65:17) Lokha nasizwe ubuhlungu khulu, kghani kungenzeka bona silise ukuba nelaka nehloyo ekungenzeka sibe nakho ehliziyweni? Akhesitjheje ukuthi abanye bakghona njani ukukwenza lokho.

13-14. Indaba ka-Tony noJosé ikufundiseni ngokulibalela?

¹³ Inengi labafowethu nabodadwethu liqunte ukulibalela ngitjho nanyana belizwe ubuhlungu ngebanga lezenzo zabanye. Ngiziphi iimbusiso abazifumanako ngokwenza njalo?

¹⁴ Ngaphambi kobana afunde iqiniso, uTony * wePhillipines wafumana ukuthi umfowabo omkhulu kunaye wabulawa yindoda ibizo layo linguJosé. Ngesikhatheso, uTony bekamumuntu onelaka nenturhu begodu bekafuna ukuzibuyiselela. UJosé wabotjhwa begodu wagwetjelwa umlandwakhe. Ngokukhamba kwesikhathi lokha uJosé nakaphuma ngejele, uTony waqeda nehliziywakhe ukuthi uzomfuna amfumane bekambulale. Wabe wathenga nesigidi. UTony wathoma ukufunda iBhayibheli naboFakazi bakaJehova. Uthi, “Njengombana bengifunda, ngabona ukuthi kutlhogeka ngitjhugulule indlela engenza ngayo izinto kunye nobuntu bami, kwafuza ngilise nokuba nenturhu.” Ngokukhamba kwesikhathi, uTony wabhajadiswa waba mdala webandla. Akhucabange bona warareka kangangani nakafumana ukuthi uJosé naye sele ayinceku kaJehova ebhajadisiweko! Ababilaba nabahlanganako, bamukelana kuhle begodu uTony  watjela uJosé ukuthi umlibalele. UTony uthi ukulibalela UJosé kwamenza wathaba khulu begodu bekubudisi nokuyihlathulula ngokupheleleko indlela ebekazizwa ngayo. Iye, uJehova wakubusisa ukulibalela kwaka-Tony.

15-16. Khuyini oyifundileko ngokulibalela endabeni kaPeter noSue?

¹⁵ Ngo-1985, uPeter noSue bebasesifundweni eWolweni lomBuso lokha nakuzakuthuthumba ibhomu bangakalindeli. Indoda ethileko yafaka ibhomu ngaphakathi eWolweni lomBuso! USue walimala khulu kangangokuthi akasakghoni ukuzwa nokubona kuhle. Kwathinteka nekghono lakhe lokunukelela. * UPeter noSue bahlala bazibuza ukuthi, ‘Mumuntu onjani ongenza ubumbi obungaka?’ Ngemva kweminyaka ethileko, umuntu owenza isenzwesi wabotjhwa, wagwetjelwa ipilwakhe yoke ejele. Nababuzwako ukuthi bayilibalele na indoda le, uPeter noSue bathi: “UJehova usifundisa ukuthi ukufukamela ihloyo nenturhu kungalimaza imizwethu, umzimba kunye nomkhumbulo. Yeke, khenge siriyade, sabawa uJehova bona asisize silise ukuba nenturhu nehloyo, siragele phambili nokuphila kwethu.”

¹⁶ Kghani bekububulula ukuthi balibalele? Ingasi ngaso soke isikhathi, baraga bathi: “Lokha uSue nakezwa ubuhlungu ngebana lokulimala akufumanako, lokho kwenza bona sisilingeke. Ukungadzimeleli kilokho, kwenza bona imizwa leyo iphele msinya. Ekhabolakhona, singatjho ngokusuka eenhliziyweni zethu ukuthi nange umuntu owathuthumbisa ibhomu lo angaba ngumfowethu ngelinye ilanga, sizomamukela. Indaba le isifundisa ukuthi iinkambisolawulo zeBhayibheli zenza bona sitjhaphuluke ngendlela ebesingakhenge khesiyicabange! Kuyasiduduza nokwazi ukuthi uJehova, esikhathini esingaphelisihliziyo, uzowulungisa woke umonakalo owenzekileko.”

17. Ufundeni ngokulibalela endabeni kaMyra?

 ¹⁷ UMyra wafunda iqiniso sele atjhadile begodu banabantwana abancani ababili. Indodakwakhe khenge ifune ukufunda. Ngokukhamba kwesikhathi, yaziphatha kumbi ngokomseme, yatjhiya umndenayo. UMyra uthi: “Indodakwami nayingitjhiyako nginabantwana abancani ababili, ngazizwa ngendlela efanako neyabanengi abahlukene nabantu ababathandako, ngasala ngibambe ongenzasi, ngingakholelwa, ngizwa ubuhlungu, ngizisola begodu nginelaka.” Nanyana umtjhadwabo waphela, wabuzwa ubuhlungu obabangelwa kungathembeki komuntu ebekatjhade naye. UMyra uragela phambili uthi: “Imizwa le yangiphatha iinyanga ezinengi ezalandelako begodu ngatjheja nokuthi sele kuthinteka ubuhlobo bami noJehova kunye nendlela engisebenzelana ngayo nabanye.” Nje uMyra uthi akasayifiseli izinto ezimbi indodakwakhe yaphambilini. Ufisa kwanga nayo ingatjhidela kuJehova ngelinye ilanga. Nje, uqale phambili esikhathini esizako. Ukhulisa abantwana ababili ayedwa, ubafundisa bona balotjhe uJehova. Sikhuluma nje, uthabela ukulotjha uJehova akunye nabantwana bakhe nemindenabo.

18. Khuyini esiqiniseka ngayo ukuthi umaHluleli omKhulu uJehova uzoyenza?

¹⁸ Kuyasithabisa ukwazi ukuthi umthwalo wokukwahlulela abantu akusingewethu! Ngebanga lokuthi ungumaHluleli omKhulu, uJehova uzozibambela umsebenzi oqakathekileko lo. (Rom. 14:10-12) Singaba nethemba elipheleleko lokuthi uzokwahlulela ngokuvumelana neenkambiso zakhe zokulungileko nokungakalungi. (Gen. 18:25; 1 Kho. 8:32) Angekhe enze into enganabulungiswa!

19. Khuyini uJehova azoyenza?

¹⁹ Siyasilulukela isikhathi lapho uJehova azokulungisa khona yoke imiphumela emimbi eyenziwa kukuba nesono kwabantu. Ngesikhatheso, zoke iimbazi zangaphakathi nangaphandle zizokulapheka ngokupheleleko. (Rhu. 72:12-14; IsAm. 21:3, 4) Ngeze sisazikhumbula. Njengombana sisalinde isikhatheso, siyamthokoza uJehova ngokusinikela ikghono lokumlingisa ngokuthi silibalele abanye.