1. Ke eng seo Jehofa a se tshepišago badiradibe bao ba itsholago?

 LE GE Jehofa e le Mmopi wa rena, a re ahlola e bile a re nea molao, ke Tatago rena wa legodimong yo a re ratago. (Ps. 100:3; Jes. 33:22) Ge re mo direla sebe gomme re itshola go tšwa pelong, ga a no nyaka go re lebalela eupša o fela pelo. (Ps. 86:5) Jehofa o ile a bolela mantšu a mabotse a diriša moporofeta Jesaya ao a rego: “Le ge dibe tša lena di ka hwibila go etša madi, di šweufala go etša kapoko.”—Jes. 1:18.

2. Re swanetše go dira eng ge re nyaka go ba le khutšo le batho ba bangwe?

² Ka ge re se ra phethagala, re tlo bolela goba ra dira dilo tšeo di tlago go kgopiša batho ba bangwe. (Jak. 3:2) Seo ga se bolele gore re tlo palelwa ke go ba bagwera ba bona. Re ka kgona go gwerana le bona ge re ka ithuta go lebalela. (Die. 17:9; 19:11; Mat. 18:21, 22) Ge re kgopišana, Jehofa o nyaka gore re lebalelane. (Bakol. 3:13) Re na le mabaka a mabotse a go dira bjalo ka gobane Jehofa o re “lebalela kudu.”—Jes. 55:7.

3. Re tlo ithuta eng sehlogong se?

³ Sehlogong se re tlo ithuta kamoo batho bao ba sa phethagalago ba ka ekišago mohlala wa Jehofa wa go lebalela batho ba bangwe. Ke dibe dife tšeo re swanetšego go di botša bagolo? Ke ka lebaka la eng Jehofa a re kgothaletša go lebalela batho ba bangwe? Le gona re ka ithuta eng go bana  babo rena le dikgaetšedi bao ba ilego ba kwa bohloko ka baka la dibe tša batho ba bangwe?

4. (a) Re swanetše go dira eng ge Mokriste a dira sebe se segolo? (b) Bagolo ba na le boikarabelo bofe ge ba kopana le motho yo a dirilego sebe?

⁴ Re swanetše go botša bagolo ge motho yo mongwe a dirile sebe se segolo. Tše dingwe tša dibe tše dikgolo go bolelwa ka tšona go 1 Bakorinthe 6:9, 10. Dibe tše dikgolo di thulana le molao wa Modimo kudu. Ge Mokriste a dirile sebe se segolo, o swanetše gore a rapele Jehofa Modimo a mo kgopele tshwarelo ke moka a bolele le bagolo ba phuthego. (Ps. 32:5; Jak. 5:14) Bagolo ba na le boikarabelo bja go dira eng? Ke Jehofa feela a nago le matla a go lebalela ka mo go feletšego a diriša sehlabelo sa topollo. b Eupša o neile bagolo boikarabelo bja go diriša mangwalo go bona ge e ba modiradibe a ka tšwela pele a le ka phuthegong. (1 Bakor. 5:12) Gore bagolo ba kgone go dira se, ba tlo leka go hwetša dikarabo tša dipotšišo tše: Na o dirile sebe ka boomo? Na o ile a leka go uta sebe seo? Na o bušeleditše sebe seo gantši? Sa bohlokwa le go feta ke gore na go na le bohlatse bja gore o itshola go tšwa pelong? Na go na le bohlatse bjo bo bontšhago gore Jehofa o mo lebaletše?—Dit. 3:19.

5. Ke ditšhegofatšo dife tšeo di tlišwago ke seo bagolo ba re direlago sona?

⁵ Ge bagolo ba kopana le motho yo a dirilego sebe, ba nyaka gore phetho yeo ba e dirago mo lefaseng e swane le yeo e šetšego e dirilwe legodimong. (Mat. 18:18) Tokišetšo ye e tlo thuša phuthego bjang? E šireletša phuthego ka go dira gore batho bao ba dirilego dibe ba tlošwe ka phuthegong gore ba se ke ba kweša bahlanka ba Modimo bohloko. (1 Bakor. 5:6, 7, 11-13; Tito 3:10, 11) Seo se ka thuša le motho yo a dirilego sebe gore a lebalelwe ke Jehofa. (Luka 5:32) Ge bagolo ba thuša motho yo a dirilego sebe gore a itshole, e bile Jehofa a mo lebalele, ba a mo rapelela le go kgopela Jehofa gore a mo thuše go lokiša segwera sa gagwe le yena.—Jak. 5:15.

6. Na go a kgonega gore Jehofa a lebalele motho yo a kgaotšwego? Hlalosa.

⁶ A re re motho yo a dirilego sebe ga a bontšhe gore o a itshola ka morago ga gore a kopane le bagolo. Ge e ba go le bjalo o tlo kgaolwa ka phuthegong. Ge e ba a senyeditše mmušo bagolo ba ka se mo emelele. Jehofa o dumeletše baetapele ba mmušo gore ba ahlole le go otla batho bao ba senyetšago mmušo go sa šetšwe gore ba itshola goba ga ba itshole. (Baroma 13:4) Eupša ge e ba motho yoo mafelelong a ka itshola ka dilo tšeo a di dirilego ke moka a fetoša tsela yeo a dirago dilo ka yona, Jehofa o tlo mo lebalela. (Luka 15:17-24) Jehofa o tlo mo lebalela le ge e ba a ile a dira dibe tše dikgolo kudu.—2 Dikor. 33:9, 12, 13; 1 Tim. 1:15.

7. Ke ka lebaka la eng re lebalela motho yo a re diretšego sebe?

⁷ Re thaba kudu ka gobane ga re na boikarabelo bja go kgetha ge eba Jehofa a ka lebalela modiradibe goba aowa! Eupša go na le seo re swanetšego go dira phetho ka sona. Ke eng seo? Ka dinako tše dingwe motho a ka ba a re diretše sebe se segolo ke moka a kgopela gore re mo lebalele. Eupša  ka nako e nngwe a ka no se kgopele gore re mo lebalele. Le ga go le bjalo, re ka kgetha go lebalela motho yoo e bile ra leka go se mo swarele sekgopi. Se se tlo tšea nako le maiteko ge e ba motho yoo a re kwešitše bohloko kudu. Morokami wa September 15, 1994, o re: “Ge o lebalela motho yo a dirilego sebe, seo ga se bolele gore o tšwetša sebe pele. Go Mokriste, go lebalela go bolela go tlogelela taba ka kholofelo ka diatleng tša Jehofa. Ke moahlodi wa go loka wa legohle ka moka le gona o tla phetha toka ka nako e swanetšego.” Ke ka lebaka la eng Jehofa a re kgothaletša go lebalela le gore re mo tshepe gore o tlo ahlola bothata bjo gabotse?

8. Re bontšha bjang gore re leboga tsela yeo Jehofa a re lebalelago ka yona ge re lebalela batho ba bangwe?

⁸ Ge re lebalela batho ba bangwe re bontšha gore re leboga gore Jehofa le yena o a re lebalela. Papišong e nngwe, Jesu o ile a swantšha Jehofa le monna yo a ilego a phumola sekoloto sa mohlanka wa gagwe yo a bego a sa kgone go mo lefa. Eupša mohlanka yoo o ile a palelwa ke go swarela mohlanka yo mongwe yo a bego a mo kolota tšhelete e nyenyane. (Mat. 18:23-35) Jesu o be a re ruta eng? Ge e ba re tloga re leboga tsela yeo Jehofa a re lebalelago ka yona, le rena re tlo kgona lebalela ba bangwe. (Ps. 103:9) Mengwageng e fetilego Morokami o mongwe o ile wa re: “Go sa šetšwe tsela yeo re lebalelago batho ba bangwe ka yona, re ka se swane le tsela yeo Jehofa a re lebalelago ka yona ka Jesu Kriste.”

9. Ke bomang bao Jehofa a ba bontšhago kgaugelo? (Mateo 6:14, 15)

⁹ Ge re lebalela batho ba bangwe, Jehofa o tlo re lebalela. Jehofa o gaugela batho bao ba bontšhago ba bangwe kgaugelo. (Mat. 5:7; Jak. 2:13) Jesu o ile a hlalosa taba ye gabotse ge a be a ruta barutiwa ba gagwe go rapela. (Bala Mateo 6:14, 15.) Re ithuta se gape go seo Jehofa a ilego a se botša mohlanka wa gagwe Jobo. Monna yoo yo a botegago o ile a kwešwa bohloko ke mantšu a banna ba bararo, e lego Elifase, Tsofara le Bilidada. Jehofa o ile a botša Jobo gore a ba rapelele. Ka morago ga gore Jobo a dire bjalo, Jehofa o ile a mo šegofatša.—Jobo 42:8-10.

10. Ke ka lebaka la eng go boloka sekgopi go le kotsi? (Baefeso 4:31, 32)

¹⁰ Re a ikgobatša ge re dula re bolokile sekgopi. Go boloka sekgopi go swana le go rwala morwalo o boima, ka gona Jehofa o nyaka gore re tloše morwalo woo go rena gore re kgone go ba le khutšo. (Bala Baefeso 4:31, 32.) O re kgothaletša gore ‘re lese go galefa gomme re tlogele go befelwa.’ (Ps. 37:8) Ge re ka latela keletšo yeo e tlo re thuša. Ge re boloka sekgopi re ka ikgobatša mmeleng le monaganong. (Die. 14:30) Ge re bolokile sekgopi, ga re gobatše motho yo a re kgopišitšego, eupša go no swana le ge re nwele mpholo gomme o re gobatša. Ka gona, ge re lebalela batho ba bangwe re tla be re phema go ikgobatša. (Die. 11:17) Re tlo ba le khutšo ya monagano gomme ra tšwela pele re hlankela Jehofa.

11. Beibele e reng ka go nyaka go itefeletša? (Baroma 12:19-21)

¹¹ Tefetšo ke ya Jehofa. Jehofa ga a re dumelele gore re itefeletše ge motho yo  mongwe a re direla sebe. (Bala Baroma 12:19-21.) Ka ge re se ra phethagala, ga re kgone go ahlola go swana le Modimo. (Baheb. 4:13) Ka dinako tše dingwe maikwelo a rena a ka dira gore re se kgone go ahlola gabotse. Jehofa o ile a diriša Jakobo go ngwala gore: “Kgalefo ya motho ga e tšweletše toko ya Modimo.” (Jak. 1:20) Re ka holofela gore Jehofa o tlo dira selo seo se lokilego le gore mafelelong go tlo ahlolwa ka toka.

12. Re bontšha bjang gore re tshepa gore Jehofa o tlo ahlola ka toka?

¹² Ge re lebalela batho ba bangwe re bontšha gore re tshepa Jehofa. Ge re dumelela Jehofa gore a ahlole dilo ka moka ka toko, re bontšha gore re tshepa gore o tlo tloša dilo ka moka tše mpe tšeo di bakilwego ke sebe. Lefaseng le lefsa, dilo tše mpe tšeo di re diragaletšego, “di ka se sa gopolwa e bile di ka se sa rotoga pelong.” (Jes. 65:17) Na go a kgonega gore re se sa ba le sekgopi ge motho yo mongwe a ile a re kweša bohloko kudu? A re boneng kamoo ba bangwe ba ilego ba kgona go se sa ba le sekgopi.

13-14. O ithutile eng tabeng ya go labelela phihlelong ya Tony le José?

¹³ Bana babo rena ba bantši le dikgaetšedi ba ile ba kgona go lebalela batho ba bangwe bao ba ilego ba ba kweša bohloko kudu ka dilo tšeo ba ilego ba ba dira tšona. Ba ile ba holega bjang?

¹⁴ Tony c yo a dulago Philippines o re mengwaga e mentši pele a e ba Hlatse ya Jehofa, o ile a hwetša gore monna yo a bitšwago José o bolaile buti wa gagwe. Ka nako yeo Tony o be a rata dintwa e bile a nyaka go itefeletša. José o ile a golegwa. Ka morago ga gore a tšwe kgolegong, Tony o be a ikemišeditše go mo nyaka ke moka a mmolaye. O ile a ba a reka le sethunya. Ge nako e dutše e eya, Tony o ile a thoma go ithuta Beibele le Dihlatse tša Jehofa. O re: “Ge ke ithuta Beibele, ke ile ka lemoga gore ke swanetše go fetoša tsela yeo ke dirago dilo ka yona le go tlogela go swarela José sekgopi.” Ka morago Tony o ile a kolobetšwa ke  moka a ba mogolo ka phuthegong. Nagana ka tsela yeo a bego a maketše ka yona ge a ekwa gore José le yena o kolobeditšwe gomme ke yo mongwe wa Dihlatse tša Jehofa! Ge ba be ba kopana ba be ba thabelane kudu, ke moka Tony a botša José gore o mo lebaletše. Tony o re ka morago ga gore a lebalele José o ile a thaba kudu e bile ga a kgone le go hlalosa ka tsela yeo a ikwago ka yona. Sa go thabiša le go feta, Jehofa o ile a mo šegofatša.

15-16. Phihlelo ya Peter le Sue o go ruta eng ka go lebalela?

¹⁵ Ka 1985, ge Peter le Sue ba be ba le dibokeng Holong ya Mmušo, ba ile ba kwa go thuthupa pomo. Monna yo mongwe o be a e tsentšhitše ka boomo ka Holong ya Mmušo! Sue o ile a gobala kudu mo a ilego a se sa kgona go kwa gabotse le go bona gabotse. O ile a se sa kgona le go kwa monkgo. d Peter le Sue ba be ba ipotšiša gore, ‘Ke motho wa mohuta mang a ka dirago selo sa mohuta wo?’ Mengwaga e mentši ka morago monna yo a bego a beile pomo ka Holong ya Mmušo o ile a swarwa gomme a ahlolelwa gore a dule kgolegong bophelo bja gagwe ka moka. Peter le Sue ge ba be ba botšišwa gore ba lebaletše monna yoo ba ile ba re: “Jehofa o re ruta gore re se ke ra boloka sekgopi ka gobane se be se ka re gobatša mmeleng, maikwelong le monaganong. Ka morago ga gore pomo yeo e thuthupe, re ile ra kgopela Jehofa gore a re thuše go lebalela monna yoo gore re kgone go tšwela pele ka maphelo a rena re na le khutšo.”

¹⁶ Na go be go le bonolo go lebalela monna yo? Ga se ka mehla go bego go le bonolo. Ba tšwela pele ka gore: “Nako le nako ge Sue a ekwa bohloko ka baka la kotsi yeo e diregilego, re galefa gape. Eupša ga re dule re nagana ka seo re diregilego. Le gona re bolela se go tšwa dipelong tša rena gore ge eba monna yo a ilego a thea pomo yela e ka ba yo mongwe wa Dihlatse tša Jehofa, re tlo mo amogela.  Phihlelo ye e re rutile eng gore ge e ba re diriša melao ya motheo ya Beibele, re tlo dula re lokologile kudu! E bile re a tseba gore Jehofa o tlo tloša mathata ka moka e se kgale.”

17. Mohlala wa Myra o go rutile eng ka go lebalela?

¹⁷ Myra o ithutile ditherešo a šetše a nyetšwe e bile a na le bana ba babedi ba banyenyane. Monna wa gagwe ga se a amogela ditherešo. Ge nako e dutše e eya monna yo ile a dira bohlotlolo gomme a tlogela lapa la gagwe. Myra o re: “Ge monna wa ka a be a ntlogela le bana ba ka, ke ile ka ikwa ka tsela yeo batho ba bantši ba ikwago ka yona ka morago ga go tlogela ke batho bao ba ba ratago, ke ile ka ikwa ke galefile, ke itshola e bile ke ipea molato. Le ge lenyalo la rena le fedile, ke sa kwa bohloko.” Myra o tšwela pele ka gore: “Ke ile ka ikwa ka tsela yeo ka nako e telele gomme ka lemoga gore seo se kgoma segwera sa ka le Jehofa le batho ba bangwe.” Gona bjale Myra o re ga a sa swere sekgopi e bile ga a nyake gore monna wa gagwe wa peleng a diragalelwe ke selo se sebe. O holofela gore ka letšatši le lengwe monna e tla ba mohlanka wa Jehofa. Gona bjale Myra o nagana ka bokamoso bja gagwe. O godišitše bana ba babedi a nnoši gore e be Dihlatse tša Jehofa. Lehono Myra o thabela go hlankela Jehofa le bana ba gagwe le malapa a bona.

18. Re ka kgodišega gore Moahlodi yo Mogolo e lego Jehofa o tlo dira eng?

¹⁸ Re ba le khutšo ka go tseba gore ga go hlokagale gore re ahlole batho! Ka ge Jehofa e le moahlodi yo mogolo, ke yena a swanetšego ke go dira mošomo wo o bohlokwa. (Baroma 14:10-12) Re ka kgodišega gore ka dinako ka moka o tlo ahlola ka toka le ka go dumelela le melao ya motheo ya seo se lokilego le seo se sa lokago. (Gen. 18:25; 1 Dikg. 8:32) A ka se tsoge a dirile selo seo se sa lokago!

19. Ka ge Jehofa e le moahlodi wa rena wa go loka, o tlo re direla eng?

¹⁹ Re fela pelo ya go bona nako yeo Jehofa a tlago go fediša dilo ka moka tšeo di bakilwego ke go se phethagale le sebe. (Ps. 72:12-14; Kut. 21:3, 4) Ka nako yeo, Jehofa o tlo fediša ka moka bohloko bjo re bo kwago mmeleng le maikwelong. Re ka se sa gopola dilo tšeo. Ge re sa dutše re emetše nako yeo re swanetše go leboga Jehofa ka gobane o re neile bokgoni bja go mo ekiša ka go lebalela batho ba bangwe.