1. Yehova naahamiza ki abasiisi abarikweteisa?

 N’OBU Yehova araabe ari Omuhangi waitu, Omunyabiragiro, kandi Omuramuzi, ni Tataitwe oine rukundo. (Zab. 100:3; Isa. 33:22) Twakora ekibi kandi tukeeteisa twihire aha mutima, naaba ayeteekateekire kutusaasira. (Zab. 86:5) Yehova naatuhamiza kurabira omuri nabi Isaaya ati: ‘Ebibi byanyu n’obu biraabe nibitukura nka karari, nibiija kwera nk’orubaare.’—Isa. 1:18.

2. Twine kukora ki kubaasa kugira enkoragana nungi n’abandi?

² Ahabw’okugira ngu tituhikiriire, nitushagiza bagyenzi baitu omu bigambo n’omu bikorwa. (Yak. 3:2) Kwonka ekyo tikirikumanyisa ngu titurikubaasa kugira enkoragana nungi nabo. Nikibaasika, twayega kusaasira. (Enf. 17:9; 19:11; Mat. 18:21, 22) Twashagizana omu bintu bikye, Yehova naayenda ngu tusaasirane. (Kol. 3:13) Twine enshonga nungi y’okukikora. Nangwa na Yehova ‘naatusaasirira kimwe.’—Isa. 55:7.

3. Nituza kushwijuma ki omu kicweka eki?

³ Omu kicweka eki, nituza kureeba oku abantu abatahikiriire barikubaasa kutooreza Yehova omu kusaasira abandi. Ni bibi ki ebi twine kugambira abareeberezi? Ahabw’enki Yehova naatuhiga kusaasira abandi? Kandi nitubaasa kwegyera ki  aha b’eishe-emwe bagyenzi baitu ababonaboine munonga ahabw’ebibi by’abandi?

4. (a) Omuheereza wa Yehova yaakora ekibi ky’amaani, aine kutwaza ata? (b) Abareeberezi nibaba baine bujunaanizibwa ki baaba nibagaaniira n’okozire ekibi?

⁴ Ebibi eby’amaani biine kumanyisibwa abareeberezi. Ebibi nk’ebyo nibigambwaho omu 1 Abakorinso 6:9, 10. Ebibi by’amaani n’ebihagaro by’amaani ebirikuhenda ebiragiro bya Ruhanga. Omukristaayo yaakora kimwe aha bibi nk’ebyo, naaba aine kushaba Yehova okusaasirwa, kandi aine n’okugambira abareeberezi b’ekibiina. (Zab. 32:5; Yak. 5:14) Abareeberezi baine bujunaanizibwa ki? Yehova niwe wenka oine obushoboorozi bw’okusaasira abantu ebibi byabo omu bwijwire, kandi ekyo naakikora arikwihirira aha kitambo. * Kwonka, kurugiirira aha Byahandiikirwe Yehova ahaire abareeberezi obujunaanizibwa bw’okucwamu yaaba omusiisi naabaasa kuguma omu kibiina. (1 Kor. 5:12) Bimwe aha bintu ebi barikuteeraho kumanya nibitwariramu ebibuuzo nk’ebi: Ekibi kikozirwe nkana? Mbwenu shi omuntu akateeraho kukishereka? Akakikora kumara obwire buraingwa? Kandi ekikuru munonga, hariho ekirikworeka ngu ayeteisize kuruga aha mutima? Hariho ekirikworeka ngu Yehova amusaasiire?—Byak. 3:19.

5. Ni birungi ki ebirikuruga omu murimo gw’abareeberezi?

⁵ Abareeberezi baaba nibagaaniira n’okozire ekibi, ekigyendererwa kyabo nikiba kiri okucwamu ebirikuhikaana n’okucwamu okw’omu iguru. (Mat. 18:18) Entebeekanisa egi neegasira eta ekibiina? Neebaasisa abasiisi abatarikweteisa abarikubaasa kureeta akabi aha ntaama za Yehova ez’omuhendo kubingwa. (1 Kor. 5:6, 7, 11-13; Tit. 3:10, 11) Kandi ekyo nikibaasa kuhwera omusiisi kweteisa kugira ngu abaase kugasirwa omu kusaasirwa kwa Yehova. (Luk. 5:32) Abareeberezi nibashabira omusiisi oyeteisize, barikushaba Yehova kumuhwera kugaruka kugira omukago murungi nawe.—Yak. 5:15.

6. Mbwenu shi omuntu yaabingwa omu kibiina, naaba naakibaasa kusaasirwa? Shoboorora.

⁶ Ka tugire ngu omuntu yaayoreka ngu tayeteisize obu abareeberezi baashutama nawe. Obwo naaba aine kubingwa omu kibiina. Yaaba ahenzire ekiragiro kya gavumenti, abareeberezi tibarikumukingira kuhikwaho ebirikuruga omu kucwamu kwe kubi. Yehova naikiriza ab’obushoboorozi kufubira omuntu weena orikuhenda ekiragiro yaaba ayeteisize nari ateeteisize. (Rom. 13:4) Kwonka, omuntu yaayeteera omu kifuba akamanya ngu eki akozire kigwire kandi akahinduka, Yehova naaba ayeteekateekire kumusaasira. (Luk. 15:17-24) Nikwo kiri n’obu ebibi bye byakuba biri eby’amaani munonga.—2 Bus. 33:9, 12, 13; 1 Tim. 1:15.

7. Nitubaasa kusaasira tuta omuntu orikuba atushagiize?

⁷ Ka nikireeta oburuhuuko kumanya ngu tiitwe abaine kucwamu yaaba Yehova naija kusaasira omusiisi! Kwonka nabwo, hariho eki twine kucwamu. Niki? Obumwe, omuntu naabaasa kutukora kubi munonga, kwonka bwanyima atushabe okusaasirwa. Obundi naabaasa kwanga kushaba okusaasirwa. Kwonka nabwo, nitubaasa kucwamu kumusaasira turikureka kubiika enziika n’okumugirira ekiniga. Amazima gari ngu, eki nikibaasa kutwara obwire n’amaani, na  munonga kyaba kitukozire kubi munonga. Watchtower eya Seputemba 15, 1994, ekagira eti: “Waasaasira omusiisi, tikirikumanyisa ngu nooshagika ekibi kye. Aha Mukristaayo okusaasira nikimanyisa okureka enshonga omu mikono ya Yehova kwija kugishoboorora. Niwe Muramuzi ohikiriire omu nsi n’omu iguru, kandi naija kucwa emanja omu buringaaniza omu bwire obuhikire.” Ahabw’enki Yehova naatuhiga kusaasira abandi, kandi tukareka enshonga omu mikono ye kuba niwe yaacwamu omu buringaaniza?

8. Okusaasira abandi nikworeka kuta ngu nitusiima embabazi za Yehova?

⁸ Okusaasira nikworeka okusiima. Omu nfumu emwe, Yesu akagyeragyeranisa Yehova n’omushaija owaasaasiire omwe aha bahuuku be eibanja rihango eri yaabaire atarikubaasa kushashura. Kwonka, omuhuuku ogwo akanga kusaasira omukozi mugyenzi we obusente bukye obu yaabaire naamubanja. (Mat. 18:23-35) Yesu akaba naayegyesa eishomo ki? Buzima twaba nitusiima embabazi nyingi ezi Yehova yaatugiriire, nitwija kusaasira abandi. (Zab. 103:9) Watchtower eyaashohoziibwe emyaka mingi enyima ekagira eti: “N’obu twakusaasira bagyenzi baitu emirundi engahi, titurikubaasa kuhika aha ku Yehova yaatusaasiire n’embabazi ezi yaatugiriire kurabira omuri Kristo.”

9. Ni baahi abu Yehova arikugirira embabazi? (Matayo 6:14, 15)

⁹ Abarikusaasira abandi nibaija kusaasirwa. Yehova naagirira embabazi abanyambabazi. (Mat. 5:7; Yak. 2:13) Yesu akashoboorora gye enshonga egi obu yaabaire naayegyesa abeegi be oku baine kushaba. (Shoma Matayo 6:14, 15.) Enyima, Yehova akaba yaagambire aha nshonga niyo emwe aha bikwatiraine n’omuheereza we Yobu. Omushaija omwesigwa ogwo akaba aine obusaasi bwingi ahabw’ebigambo birikucumita eby’abashaija bashatu, Elifaazi, Biludaadi, na Zofari. Yehova akagambira Yobu kubashabira. Ku yaaherize kukikora, Yehova akamuha emigisha.—Yob. 42:8-10.

10. Ahabw’enki okubiika enziika n’eky’akabi? (Abaefeso 4:31, 32)

¹⁰ Okubiika enziika n’eky’akabi. Yehova naayenda ngu tugire obuhuumure oburikuruga omu kutabiika enziika. (Shoma Abaefeso 4:31, 32.) Naatuhiga ati: “Reka kuguubwa kubi, ruga omu kiniga.” (Zab. 37:8) Nitugasirwa twakuratira obuhabuzi obwo. Okubiika enziika n’eky’akabi aha mubiri gwaitu n’ebiteekateeko byaitu. (Enf. 14:30) Okubiika enziika, nikubaasa kugyeragyeranisibwa n’omuntu orikunywa obutwa arikuteekateeka ngu nibuza kukora kubi omushagiize. Beitu, twasaasira abandi, nituba turi nk’abaayeha ekiconco. (Enf. 11:17) Nitugira obusingye bw’omu mutima n’obw’omu biteekateeko, reero tugumizamu nituheereza Yehova.

11. Baibuli neegamba ki aha kuhoora enzigu? (Abarooma 12:19-21)

¹¹ Okuhoora enzigu n’okwa Yehova. Yehova tarikwenda ngu tuhoore enzigu haagira owaatukora kubi. (Shoma Abarooma 12:19-21.) Obutahikiirira n’obugarukiro bwaitu nibituremesa kucwamu gye aha nshonga, nka Ruhanga. (Heb. 4:13) Kandi obumwe, nitwikiriza enyehurira zaitu kuturemesa kucwamu gye. Yehova akahwera Yakobo kuhandiika ati: “Ekiniga ky’omuntu tikikora by’okuhikiirira kwa Ruhanga.” (Yak. 1:20)  Nitubaasa kugira obwesigye ngu Yehova naija kukora ekihikire, kandi areeteho n’oburingaaniza obuhikire.

12. Nitubaasa kworeka tuta ngu nitwesiga oburingaaniza bwa Yehova?

¹² Okusaasira nikworeka ngu nitwesiga oburingaaniza bwa Yehova. Okureka enshonga omu mikono ya Yehova, nikyoreka ngu nitwesiga Yehova ngu naija kwihaho akabi koona akaareetsirwe ekibi. Omu nsi ensya, titurikwija kugaruka kwehurira kubi, nari kwijuka ebintu bibi ebi twarabiremu. (Isa. 65:17) Kwonka shi omuntu ku yaakuba yaakukozire kubi munonga, nikibaasika kuguma otaine kiniga kandi otabiikire nziika? Yetegyereze oku bamwe babaasize kukikora.

13-14. Tony na José waabeegyeraho ki aha bikwatiraine n’okusaasira?

¹³ Ab’eishe-emwe na banyaanyazi-itwe baingi nibacwamu kusaasira abandi n’obu barikuba babakozire kubi munonga. Mbwenu bagasiirwe bata ahabw’okukora ekyo?

¹⁴ Tony * orikutuura omuri Philippines ira atakeegire amazima akamanya ngu Jose akaita omwe ahari bakuru be. Omu bwire obwo, Tony owaabaire ari enshaarizi akaba naayenda kuhoora enzigu. Kwonka José akakwatwa kandi yaakomwa ahabw’ekikorwa ekyo. José ku yaarugire omu kihome, Tony akamariirira ngu naija kumusherura kandi amwite. Akagura n’embundu ahabw’ekigyendererwa ekyo. Omu bwire obwo, Abajurizi ba Yehova bakatandika kwegyesa Tony Baibuli. Naagira ati: “Omu kwega Baibuli kwangye nkareeba ngu nkaba nyine kuhindura emitwarize yangye nkarekyera aho kugira ekiniga.” Bwanyima y’obwire, Tony akabatizibwa yaaba omureeberezi omu kibiina. Teebereza oku yaatangaire kumanya ngu Jose nawe akaba ahindukire omuheereza wa Yehova obatiziibwe! Bombi ku babugaine, bakeegwa omu kifuba, kandi Tony akagambira José ngu akaba yaamusaasiire. Tony naagira ngu ekikorwa eki eky’okusaasira kikamureetera okushemererwa kwingi, nangwa akaba naagumirwa n’okushoboorora enyehurira  ze nungi ezo. Eego, Yehova akaha omugisha Tony ahabw’okugira ngu akaba ayeteekateekire kusaasira.

15-16. Waayegyera ki ahari Peter na Sue aha bikwatiraine n’okusaasira?

¹⁵ Omuri 1985, Peter na Sue bakaba bari omu ruteerane omu Kyombeko ky’Obukama obu bomu yaabaruka ahonaaho. Haine omushaija owaabaire agitegire omu Kyombeko ky’Obukama! Sue akatunga obuhuta bw’amaani obwamureetaire kuhumira kimwe amaisho n’okwigara amatu. Akaba atakibaasa n’okukaga. * Peter na Sue bakaba nibakira kwebuuza bati: ‘Ni muntu wa muringo ki okozire ekintu ky’obwinazi nk’eki?’ Bwanyima y’emyaka, omwinazi ogwo owaabaire atari muheereza wa Yehova akakwatwa, kandi yaakomwa ebiro byona eby’amagara ge. Ku baabuurize Peter na Sue yaaba basaasiire omwinazi ogwo, bakagira bati: “Yehova naatwegyesa ngu okugira ekiniga n’okubiika enziika n’eky’akabi aha magara gaitu, enyehurira zaitu, n’ebiteekateeko byaitu. N’ahabw’ekyo bomu egyo eherize kubaruka, tukashaba Yehova kutuhwera kureka kugira ekiniga n’okubiika enziika kugira ngu tugumizemu nka butoosha.”

¹⁶ Mbwenu shi kikaboorobera kusaasira omushaija ogwo? Ngaaha buzima. Nibongyeraho bati: “Buri murundi ogu Sue arikugira obusaasi ahabw’obuhuta bwe, nitugaruka tugira ekiniga. Kwonka ku turikwehuzya enshonga, ekiniga kyaitu nikihwaho ahonaaho. Nangwa, omu mutima gwaitu nitugira ngu omushaija ogwo yaaba omwe aha baheereza ba Yehova nitwija kumwakiira. Ebyatuhikireho bikatwegyesa ngu buzima emisingye ya Baibuli neecungura, etuhaire obusingye omu miringo ei tutarikubaasa kuteekateeka! Kandi ni kituhuumuriza kumanya ngu Yehova ari haihi kwihaho embeera mbi zoona.”

17. Myra waamwegyeraho ki aha bikwatiraine n’okusaasira?

 ¹⁷ Myra akeega amazima aherize kutaaha omu bushwere, kandi aine n’abaana babiri bato. Iba taraikiriize mazima. Kandi bwanyima akashambana yaatsigaho n’eka ye. Myra naagira ati: “Ibanyi ku yaantsigireho n’abaana baitu babiri, nkeehurira kubi ahabw’omukundwa wangye kundeebya, nkashoberwa, tindakikiriize, nkaba niinganya, ndikwefuuza, ndikwecwera orubanja, kandi nyine n’ekiniga.” N’obu obushwere buraabe bwafiire, obusaasi bw’okwereeba nk’ou bareebize bukagumaho. Myra naayongyeraho ati: “Enyehurira ezo zikanteganisa kumara ameezi, okuhitsya obu naayetegyereza ngu nikishiisha mukago gwangye na Yehova n’ogu nyine n’abandi.” Myra hati naagira ngu akarekyera aho kugira ekiniga, kandi tarikwendeza ebibi owaabaire ari iba. Kandi aine amatsiko ngu izooba rimwe naija kwirira haihi Yehova. Myra omutima agutaire aha biro by’omumaisho. Akabaasa kworora abaana be wenka, kandi hati boona nibaheereza Yehova. Myra hati aine okushemererwa ahabw’okuheereza Yehova n’abaana be n’ab’amaka gaabo.

18. Nitubaasa kugira bwesigye ki omuri Yehova Omuramuzi orikukirayo?

¹⁸ Ka nikitureetera oburuhuuko kumanya ngu titwine mugugu gw’okucwera abantu orubanja! Yehova omucwi w’emanja orikukirayo niwe arikwija kukora omurimo mukuru ogu. (Rom. 14:10-12) Nitubaasa kugira obuhame ngu naija kucwa emanja zoona arikwegamira aha mitindo ye ehikiriire erikukwata aha kihikire n’ekigwire. (Kut. 18:25; 1 Bag. 8:32) Tihariho obu Yehova arikora ekintu kyona ekitahikiriire!

19. Oburingaaniza bwa Yehova obuhikiriire nibwija kuhikiiriza ki?

¹⁹ Twiniire ekihika obwire obu Yehova arikwija kwihiraho kimwe byona ebireetsirweho ekibi n’obutahikiirira. Omu bwire obwo enkojo zoona ezi twine aha mubiri n’aha mutima niziija kukirira kimwe. (Zab. 72:12-14; Kush. 21:3, 4) Ebya ira tibirikwija kwijukwa n’akakye. Twaba tutegyereize obwire obwo kuhika, ka nikishemeza kumanya ngu Yehova atuhaire okubaasa kw’okumutooreza turikusaasira abandi.