1. Amunu yii na Jɛhova yira nɛ pya a kiiya aaloo wa pɔrɔ a?

 KERE Jɛhova lu i Nɛɛ Dɛmnu, Nɛɛ-a-i-nɛ-lok le Nɛɛ Biaɛ, alunage i Tɛ a i wereloo a le li bunyɔɔ. (Yɔɔ 100:3; Ais 33:22) Naale aba bee a dap i aaloo nɛ sɔ̄ i ye si pɔrɔ kumaloo sa kiiya kaāna aābu i beenyiɛ, mɛ a kpɛ̄nanage loo e’aaloo i nɛ. (Yɔɔ 86:5) Tɛ̄maloo nɛɛ mɔmanudɛɛ̄ Aisaia, Jɛhova bee kɔ ue a i yere mɛm loo ama kɔ: “Kere dɛ̄dɛɛ̄ bui pɔrɔ lu miīmiī, ba elu ɛɛ doodoo snow.”—Ais 1:18.

2. Ena a bɔloo kɔ i doo lo i gbī enyɔɔnɛ pya dɔɔ̄na tɔɔ̄bu efɛɛloo a?

² Nyɔɔbee i lu pya a naa mmana a, dɛ̄dɛɛ̄ ii wee kɔ ue sa doo nu a biirebu pya dɔɔ̄na. (Jem 3:2) Kerewo, lo ama naa kura kɔ ii wa dap nyɔɔnɛ ɛrɛ le gbanialoo. I dap wa nyɔɔnɛ ɛrɛ le gbanialoo lo a le i nɔ lo e’aaloo pɔrɔ. (Kam 17:9; 19:11; Mat 18:21, 22) Sɔ̄ i tɛɛ̄ ekwɔ loo ziī, kere bu nu a tera, Jɛhova gbī kɔ i aaloo nɛ ziī. (Kɔl 3:13) A ɛrɛ nu anua a lee kɔ i doo wo. Nyɔɔbee Jɛhova “lɛɛbaloo [i] nɛ emanyɔɔ.”—Ais 55:7.

3. Ena i nɔ bu ekobee ue ama ani?

³ Bu ekobee ue ama, i nɔ kɛ̄ pya nɛɛ a naa mmana dap nɔ pya sīdee Jɛhova aaloo pɔrɔ doo. Pya amunu pɔrɔ na i kɔ nɛ pya kanɛɛ a? Ena anua Jɛhova yere i mɛm loo kɔ i aaloo nɛ pya dɔɔ̄na a? E ena i dap nɔ  aāloo pya i wuga bu yira lo ba etɛ̄na bu gbɛnɛ taāŋa nyɔɔbee pɔrɔ nu pya dɔɔ̄na bee wa doo loo a?

4. (a) Lo ziī nɛɛ a gaa taāŋabah Jɛhova si gbɛnɛ pɔrɔ, ena a ɛrɛ edoo a? (b) Ena pya kanɛɛ edoo sɔ̄ ba yii bu ue nɛɛ a bee si gbɛnɛ pɔrɔ a?

⁴ A ɛrɛ elu edoo kɔ pya kanɛɛ a suā sɔ̄ nɛɛ si gbɛnɛ pɔrɔ. Bu edoba, alu ekue bee pio pɔrɔ alu gbɛnɛ ama bu 1 Pya Kɔrint 6:9, 10. Gbɛnɛ pɔrɔ na e’agabah dogo a gbee lok Bari. Lo a le ziī Nɛɛ Kraist si pɔrɔ a doo wo, a ɛrɛ ekɔ nɛ Jɛhova bu kara, sa a ɛrɛ ekɔnage nɛ pya kanɛɛ ba le bu bɔŋanaloo. (Yɔɔ 32:5; Jem 5:14) Ena pya kanɛɛ edoo ani? Aba Jɛhova na a ɛrɛ ekpo e’aaloo pɔrɔ bu mmɛɛ sīdee a, e a doo wo tɛ̄maloo waara zɔɔ a’agara. * Kerewo, Jɛhova enɛa tam pya kanɛɛ kɔ ba a su Kpa Kaɛ ɛma lo a le a bɔgeloo kɔ lo nɛɛ a kiisī lo ebia bu bɔŋanaloo. (1 Kɔr 5:12) Lokwa ba dap doo lo ama leere, ba ɛrɛ esuā ture loo pya ebip a kɔ: A bee ɛmɛnɛbee si lo pɔrɔ ni? Ekɔ lo nɛɛ bee nɔɔ lo esi lo pɔrɔ ni? Ekɔ a bee le aa si lo pɔrɔ bu nyɔɔnyɔɔ sɔ̄ ni? Lo a kuī eera na bee, a dooge nu a tɔgɛ kɔ ekiiyae kaāna ni? A ɛrɛge pya nu a tɔgɛ kɔ Jɛhova e’aaraloo ye nɛ ni?—Doonu 3:19.

5. Pya amunu biī na a wee sira aabu tam pya kanɛɛ aa si a?

⁵ Sɔ̄ pya kanɛɛ yii bu ue nɛɛ a bee si gbɛnɛ pɔrɔ, nu ba seeasī na lo edoo kɔ wa biaɛfii a gbaaloo biaɛfii Jɛhova kiiloo lo pɔrɔ. (Mat 18:18) Bu mɛ sīdee na nɔɔnɔɔnu ama dɔbiī nɛ bɔŋanaloo a? A doo kɔ alu elɛɛ pya a si gbɛnɛ pɔrɔ sa naa kiiya bu bɔŋanaloo, lokwa ba naa gbee pya naana pee Jɛhova. (1 Kɔr 5:6, 7, 11-13; Taitɔs 3:10, 11) A dapnage yerebah nɛ nɛɛ a bee si pɔrɔ kɔ a kiiya sa Jɛhova aaloo ye nɛ. (Luk 5:32) Pya kanɛɛ eyere kara bee nɛɛ a bee kiiya a, sa bara kɔ Jɛhova a yerebah ye nɛ kɔ a sikɛ̄ ɛrɛ le gbanialoo ye kumaloo.—Jem 5:15.

6. A waɛge kɔ Jɛhova a aaloo nɛ nɛɛ a bee lu ekpo lɛɛ bu bɔŋanaloo ni? Naa baatɛ̄.

⁶ Naa su kɔ nɛɛ a bee si gbɛnɛ pɔrɔ naa gbī ekiiya sɔ̄ pya kanɛɛ yiibu lo ue. Lo a sira doo wo, elu ekpo ye lɛɛ bu bɔŋanaloo. E lo a dɔ lok wa edonyɔɔ, pya kanɛɛ naale ekpega ye lɛɛ loo kpɔte ebee ye zia. Jɛhova nɛ dee pya bɛbɛɛ kɔ ba a biaɛ biaɛ loo ɛrɛgeba nɛɛ a dɔ lok sa ye nɛ kpɔte, kere lo nɛɛ ekiiya ale a sii kiiya. (Rom 13:4) Kerewo, lo alu kɔ lo nɛɛ sikɛ̄ suā kɔ nu a bee doo bee piya sa kiiya sɔ̄ esaa, Jɛhova le ekpɛ̄naloo lo e’aaloo ye nɛ. (Luk 15:17-24) Taɛ kɛ̄ a le doolo kere a bee si gbɛnɛ pɔrɔ.—2 Edoo 33:9, 12, 13; 1 Tim 1:15.

7. Mɛ sīdee na i dap aaloo nɛ nɛɛ a bee i si pɔrɔ loo a?

⁷ Naa ɛp kɛ̄ alu nu egbɔ̄nyiɛ doo kɔ naale ili na ebiaɛfii nɛɛ Jɛhova e’aaloo pɔrɔ nɛ a! Kerewo, a ɛrɛ nu ili dap biaɛfii. Lo nu na eni? Pio sɔ̄, dap lu kɔ ziī nɛɛ ebee i si gbɛnɛ pɔrɔ loo, kerewo, edaba i bara kɔ i aaloo ye nɛ. E siga sɔ̄, lo nɛɛ naale edoo wo. Kerewo, i dap biaɛfii lo e’aaloo ye nɛ sa ɔbɛ e’ɛrɛ ye saŋ loo. Bu kaka, a dap su sɔ̄ le epiaga, eetɔɔ̄ na lo a bee i doo gbɛnɛ piya nu loo. Watchtower September 15, 1994, kɔ: “Sɔ̄ o aaloo nɛ nɛɛ a bee a si  pɔrɔ loo, naa kura kɔ o ɛp nu a bee doo tɛrɛ. Kiikɛ̄ nɛɛ alu Nɛɛ Kraist le, sɔ̄ a aaloo pɔrɔ, a wee lɛɛbaloo biebah Jɛhova. Alɛ na alu kaāna Nɛɛ Biaɛ loo dɛ̄dɛɛ̄ nyɔuwe a, sa ebiaɛ kaāna biaɛ taɛ sɔ̄ a bɔloo.” Ena anua Jɛhova yere i mɛm loo kɔ i aaloo pɔrɔ sa ye lɛɛbaloo biebah a?

8. Bu mɛ sīdee na sɔ̄ i aaloo pɔrɔ tɔgɛ kɔ i tɔgɛ nialoo toesaɛ̄ Jɛhova i ɛrɛ loo a?

⁸ Sɔ̄ i aaloo pɔrɔ nɛ pya dɔɔ̄na a tɔgɛ kɔ i tɔgɛ nialoo kɛ̄ Jɛhova i ɛrɛ toesaɛ̄ loo doo. Bu ziī kam Jizɔs, a bee su Jɛhova dooreloo ziī tɛtɔ a bee lɛɛbaloo kɔm lo ziī ye zooro naa bee dap kpɛ ye nɛ. Kerewo, lo zooro a bee lu e’aaloo nɛ a, naa bee yiga e’aaloo nɛ dɔɔ̄na zooro lo alɛ bee ɛrɛ nwīgbagbara kpugi bee. (Mat 18:23-35) Ena Jizɔs aa bee gbī kɔ i suā ani? Lo i tɔgɛ nialoo kɛ̄ Jɛhova i ɛrɛ gbɛnɛ toesaɛ̄ loo doo, ezū i kɔ i aaloo nɛ pya dɔɔ̄na. (Yɔɔ 103:9) Watchtower bee kɔ doo wo ama bu pio zua akii adumɛ kɔ: “Kaɛlɛɛ buā sɔ̄ i aaloo nɛ pya dɔɔ̄na, a naale etura dɛɛ̄ kɛ̄ Bari i aaloo nɛ doo, le toesaɛ̄ a i ɛrɛ loo tɛ̄maloo waara zɔɔ Kraist.”

9. Ba mɛɛ na Jɛhova wee tɔgɛ toesaɛ̄ loo a? (Matiu 6:14, 15)

⁹ Elu e’aaloo nɛ pya a wee aaloo nu nɛ nɛɛ. Jɛhova wee tɔgɛ toesaɛ̄ loo pya a wee tɔgɛ toesaɛ̄. (Mat 5:7; Jem 2:13) Jizɔs bee doo kɔ alu edābeeloo lo ama leere sɔ̄ a bee tɔgɛ pya a wee ye nyɔɔnɛ dumɛ kɛ̄ eyere kara doo. (Buū Matiu 6:14, 15.) Lɛɛ a gae lu lo sɔ̄, Jɛhova ebee kɔ dua ue ama kumaloo ye zooro Job. Nɛɛ a bee bɔ ture nyiɛ loo ama ebee ɛrɛ ezialoo aāloo pɔrɔ muɛ̄ ue taa pya ye gbo bee ye kɔ nɛ, lo a le Elifaz, Bildad, le Zofa. Jɛhova bee kɔ nɛ Job kɔ a yere wa kara bee. E sɔ̄ Job bee doo wo, Jɛhova bee ye nɛ leelee.—Job 42:8-10.

10. Ena anua aa saŋ biea bu bee piya a? (Pya Ɛfɛsɔs 4:31, 32)

¹⁰ A’aa saŋ biea bu bee piya. Jɛhova gbī kɔ i ɛrɛ ɛɛbu a wee sira aaloo sɔ̄ nɛɛ naa aa saŋ biea bu. (Buū Pya Ɛfɛsɔs 4:31, 32.) A zū i kɔ i “aaloo ɛrɛ saŋ, sa kiī gbɛnɛ biirabu.” (Yɔɔ 37:8) Suānu le bu sɔ̄ i su zuurabahtɔ̄ ama yerebu dogo. Aa saŋ biea bu dap doo kɔ i ɛrɛ dumɛloo, e a dapnage doo kɔ i aa kɛɛrɛ nu leere. (Kam 14:30) E sɔ̄ i kiisī lo e’ɛrɛ biirabu loo nɛɛ a bee i doo piya nu loo, a le doodoo sɔ̄ i denu a ɛrɛ taā, a naale edoo lɔgɔ nu loo lo nɛɛ, mɛ taāwo ili na eyɔ a. Nyɔɔwo, sɔ̄ i aaloo pɔrɔ nɛ pya dɔɔ̄na, i aa doo lenu loo aba ii. (Kam 11:17) I ɛrɛ le ekɛɛrɛ le efɛɛloo beenyiɛ, e i kiisī lo esitam nɛ Jɛhova.

11. Ena Baibol kɔ akiiloo obara kpɛ a? (Pya Rom 12:19-21)

¹¹ Obara kpɛ le nɛ Jɛhova. Jɛhova naa nɛ i ekpo kɔ i obara kpɛ sɔ̄ nɛɛ i doo piya nu loo. (Buū Pya Rom 12:19-21.) Kuma sɔ̄ i lu pya a naa mmana a, ii le edap biaɛ nu leere dookɛ̄ Bari doo. (Hib 4:13) E pio sɔ̄, kɛ̄ nu i tɔɔ̄loo doo dap doo kɔ i aa dap biaɛ nu leere. Jɛhova bee nɛ ye edɔɔ̄ Jems kɔ a ɛm kɔ: “Saŋ nɛɛ naa si tam kaāna dogo Bari.” (Jems 1:20) I dap dɛrɛ nyiɛ nyɔɔ kɔ Jɛhova edoo nu a lera sa doo kɔ i ɛrɛ kaāna biaɛ.

12. Mɛ sīdee na i dap tɔgɛ kɔ i dɛrɛe nyiɛ nyɔɔ Jɛhova kɔ ebiaɛ kaāna biaɛ a?

 ¹² Aaloo pɔrɔ nɛ nɛɛ tɔgɛ kɔ i dɛrɛ nyiɛ nyɔɔ Jɛhova kɔ ebiaɛ kaāna biaɛ. Sɔ̄ i lɛɛbaloo pɔrɔ nu alu edoo i loo biebah Jɛhova, a tɔgɛ kɔ i dɛrɛ ye nyiɛ nyɔɔ kɔ a gaa le lɛɛ dɛ̄dɛɛ̄ pah a aaloo pɔrɔ. Bu aā nyɔuwe Jɛhova eyira yii loo, “naale lu enyɛŋiabu [lɔgɔ ezialoo] ale lu eyere bu ekɛɛrɛ.” (Ais 65:17) Mɛ lo elua edoo i gbɛnɛ piya nu loo a, waɛge e’aaloo sa bu i naa biirana ni? Naa ɛp kɛ̄ pio nɛɛ edaba doo lo ama doo.

13-14. Aāloo nu a bee sira yɛɛ Tony le José, ena o nɔ akiiloo aaloo pɔrɔ nɛ nɛɛ a?

¹³ Gbɛnɛ-edo pya i wuga nɛɛdam le nɛɛwa ba lu Nɛɛ Kraist biaɛfii lo e’aaloo nɛ pya dɔɔ̄na kere sɔ̄ nu ba bee wa doo loo bee wa ziloo gbɛnɛ. Pya amunu leelee na ba e’ɛrɛ sɔ̄ ba doo wo ani?

¹⁴ Gbɛnɛ-edo zua lɛɛ Tony * a wee tɔɔ̄ Philippines gae lu Nɛɛ Ekeebee, a bee gbītɛ̄ muɛ kɔ ziī gbara a kura José bee fɛ ziī ye gbɛnɛ wuga nɛɛdam. Taɛ lo sɔ̄, Tony bee le nɛɛ a wee doo dogo lumiī, sa a bee gbī e’obara kpɛ. A bee lu e’aa José yere kpɔgɔrɔ loo nu a bee doo ama. Sɔ̄ esaa, sɔ̄ a bee lu elɛɛ José kpɔgɔrɔ, Tony bee yira yii kɔ a ɛrɛ egbīe ye muɛ sa ye fɛ. Nyɔɔwo, a bee yaɛ naā lo etaā ye. Kerewo, Tony bee bɔātɛ̄ enyɔɔnɛ Pya Ekeebee Jɛhova nɔ Baibol. Alɛ kɔ: “Kuma sɔ̄ m aa bee nɔ Baibol a, m bee nɔ kɔ alu ebɛɛ̄ kɔ m nyaana na sīdee tɔɔ̄dum, e alunage ebɛɛ̄ kɔ m lɛa saŋ bu.” Sɔ̄ sɔ̄ aa kiisī, Tony bee liamaā sa a bee lu etubo ye baloo nua nɛɛ kanɛɛ bu bɔŋanaloo. Naa ɛp kɛ̄ a bee ye lu nyɛŋialoo doo sɔ̄ a bee dā kɔ José elianage maā sa lu zooro Jɛhova doo a! Sɔ̄ baɛ aba bee zɔ̄ŋia, ba bee aa ziī uuwaloo, sa Tony bee kɔ nɛ José kɔ e’aaraeloo ye nɛ. Tony kɔ dua ɛɛbu a ɛrɛe sɔ̄ a aaeloo nɛ José, lu lo a naa dabe kɔ. Bu kaka, Jɛhova nɛ leelee Tony nyɔɔbee a bee kpɛ̄naloo e’aaloo pɔrɔ.

15-16. Ena o nɔ akiiloo aaloo pɔrɔ aāloo nu a bee siraloo Peter le Sue a?

 ¹⁵ Bu zua 1985, Peter le Sue bee le enɔānu bie Tɔ Nɔnu Buɛ̄-mɛnɛ sɔ̄ ziī nu aadee bugia pɔm. Ziī gbara bee gɔ̄ ebɛm naā a kura bomb yerebu Tɔ Nɔnu Buɛ̄-mɛnɛ! Nu bee zia Sue sa doo kɔ aa dapna dānu ale muɛnu. Wuga nɛɛwa ama naa bee dapnage dānuloo nu. * Peter le Sue wee bialoo bip aba aba kɔ: ‘Taɛ mɛɛ na a dap doo dua pɔrɔ nu ama a?’ Sɔ̄ gbɛnɛ-edo zua etɛ̄na, ba bee aa lo nɛɛ bag dogo ama lo a naa wee taāŋabah Jɛhova sa biaɛ kɔ ebia tɔkpɔgɔrɔ mmɛ dee e’u. Sɔ̄ a bee lu ebip Peter le Sue lo a le ba e’aarageloo nɛ lo gbara, ba bee kɔ: “Jɛhova tɔgɛ i kɔ lo i aa saŋ le biirabu biea bu, a dap i gbee nu loo bu namloo, bu ekɛɛrɛ, le kɛ̄ nu i tɔɔ̄loo doo. Nyɔɔwo, aba sɔ̄ lo nu sira sah, i bee bara Jɛhova kɔ a yerebah i nɛ kɔ i lɛa saŋ le biirabu bu i lokwa i dap ɛrɛ efɛɛloo beenyiɛ.”

¹⁶ A bee wa waɛgebah e’aaloo nɛ lo nɛɛ ni? Naa bee aadee waɛ. Ba kɔ yereloo kɔ: “Ɛrɛgeba sɔ̄ muū a bee yiiloo Sue a sikɛ̄ ye yɔ, bu i wee agɛrɛbah biira. Kerewo, ii wee bialoo kɛɛrɛbu nu a bee sira ama, e wo bee doo kɔ i nwaabah ibere. Bu kaka, i kɔ aā taɛ bu i beenyiɛ kɔ, lo nɛɛ a bee tā ebɛm naā ama taāŋabah Jɛhova ziī dee a ee, i su baɛbah ye suā doodoo i wuga. Nu a bee sira ama tɔgɛ i kɔ pya zuurabahtɔ̄ Baibol doo kɔ i lu puɛ, ba doo kɔ i lu puɛ bu sīdee ii dap kɔ! I ɛrɛnage egbɔ̄nyiɛ aāloo susuā kɔ sɔ̄ sɔ̄ naa binia Jɛhova esikɛ̄ kwabaloo dɛ̄dɛɛ̄ nu a bee lu egbee.”

17. Ena o nɔ akiiloo aaloo nɛ aāloo nu a bee siraloo Myra a?

¹⁷ Myra bee nɔ kaka ue sɔ̄ ebee iya dam sa maɛ̄ baɛ bee nwiīnɛɛdam. Ye dam naa bee su kaka ue. Sɔ̄ sɔ̄ aa kiisī, a bee kue wa sa lɛɛbaloo pya ye butɔ  bie. Myra kɔ: “Sɔ̄ na dam bee lɛɛbaloo baɛ pya na miɔŋɔ le mm bie, nu bee mɛ tɔɔ̄loo dookɛ̄ a wee tɔɔ̄nageloo gbɛnɛ-edo nɛɛ doo sɔ̄ nɛɛ ba wereloo wa lɔgara, lo a le kɔ a bee mɛ deege, mm bee dap yiga, e m bee to, ɛrɛ ekiɛ̄nu, bege aba mm, sa ɛrɛ biirabu.” Kereadoo wa iya dam le wa bee ina kuma, a bee lege gaa ye ziloo nyɔɔbee ye dam bee ye lɔgara. Myra kɔ yereloo kɔ: “Kɛ̄ lo nu bee mɛ ziloo doo bee kiisī lo enɛ mɛ taāŋa bu pio enɔɔ̄, sa m bee muɛ kɔ a gaa ɛrɛ pah nyɔɔ na gbanialoo kumaloo Jɛhova le pya dɔɔ̄na.” Nyaawo, Myra kɔ a naa ɛrɛnae biirabu le saŋ kumaloo ye tua dam. A ɛrɛ bɛābu kɔ ye tua dam ama etaāŋabah Jɛhova ziī dee a ee. Nyaawo, Myra bie ekɛɛrɛ nyɔɔ deesī, taā a ɛrɛ biirabu loo ye tua dam. Doodoo ka alu aba ɛɛ loo butɔ, aba ɛɛ na a kpɔā baɛ pya ye miɔŋɔ nɛɛdam kɔ ba a taāŋabah Jɛhova a. Nii’ee, bu Myra ɛɛ lo enyɔɔnɛ pya ye miɔŋɔ le pya wa butɔ taāŋabah Jɛhova.

18. Amunu dɛrɛ nyiɛ nyɔɔ na i ɛrɛ bu Jɛhova doodoo Gbɛnɛ Nɛɛ Biaɛ a?

¹⁸ Naa ɛp dua iinaloo i ɛrɛ lo esuā kɔ a naale ili na i kɔ kɛ̄ elu ebiaɛ ziī ziī nɛɛ doo a! Nyɔɔbee Jɛhova na Gbɛnɛ Nɛɛ Biaɛ a, alɛ na esi gbɛnɛ tam ama a. (Rom 14:10-12) I dɛrɛ ye nyiɛ nyɔɔ kaāna kɔ ebiaɛ kaāna biaɛ dɛɛa nyɔɔ pya ye daakuu a mma akiiloo nu a lee le nu a bee piya. (Jɛn 18:25; 1 Mɛnɛ 8:32) A naale edoo lɔgɔ nu a bee piya doo pippip!

19. Ena kaāna biaɛ Jɛhova a mmana edoo gbɔ̄mɛɛ a?

¹⁹ A taɛ i emuɛ sɔ̄ Jɛhova elɛɛ dɛ̄dɛɛ̄ pɔrɔ pah a aaloo i kɛ̄tɔɔ̄ a naa mmana le pɔrɔ. Taɛ lo sɔ̄, elu elɛɛ dɛ̄dɛɛ̄ nu a i nɛ ezialoo bu namloo le kɛ̄ nu i tɔɔ̄loo doo mmɛ deedee. (Yɔɔ 72:12-14; Mum 21:3, 4) Naale eluna enyɛŋiabu lɔgɔ sɔ̄. Kuma sɔ̄ i aa tɔɔ̄ge baɛ lo sɔ̄ a, bu i ɛɛ kaāna kɔ Jɛhova doo kɔ i dap nɔ kɛ̄ e’aaloo pɔrɔ nɛ pya dɔɔ̄na doo.