1. Ӕ тӕрегъӕдбӕл ка ӕрфӕсмон кодта, уонӕн Йеговӕ зӕрдӕ цӕмӕй ӕвӕруй?

 ЙЕГОВӔ айдагъ не Сфӕлдесӕг, Закъонӕвӕрӕг ӕма Тӕрхонгӕнӕг нӕй, фал ма нӕ берӕ ка уарзуй, уӕхӕн уӕларвон Фидӕ дӕр (Пс. 100:3; Ис. 33:22). Кӕд нӕ тӕрегъӕдбӕл зӕрдӕй ӕрфӕсмон кодтан, уӕд нин Йегови бон ӕй ниххатир кӕнун, ӕма ӕй фӕндгӕ дӕр кӕнуй (Пс. 86:5). Йеговӕ пахампар Исаййӕн уӕхӕн дзурдтӕ ниффинсун кодта: «Уӕ тӕрегъӕдтӕ сурх-сурхид ку уонцӕ, уӕд уин мети хузӕн уорс фестдзӕнцӕ» (Ис. 1:18).

2. Ци нин банхус кӕндзӕй иннети хӕццӕ фӕрнӕй цӕрун?

² Мах ӕгасӕйдӕр ӕнӕнхӕст ан, уомӕ гӕсгӕ еуӕй-еухатт дзурдӕй кенӕ гъуддагӕй еске зӕрдихудти бацӕуӕн (Иак. 3:2). Фал е уобӕл дзорӕг нӕ фӕууй, ӕма нур кӕрӕдземӕ знаги цӕстӕй кӕсдзиан. Уой туххӕй ба гъӕуама кӕрӕдземӕн хатир кӕнун зонӕн (Ӕмб. 17:9; 19:11; Матф. 18:21, 22). Йегови фӕндуй, цӕмӕй нин нӕ зӕрдӕ ка фӕрресун кодта, уомӕн ниххатир кӕнӕн (Кол. 3:13). Ӕма гъӕуама гъе уотӕ кӕнӕн, уомӕн ӕма нин Йеговӕ ӕхуӕдӕг зӕрдиагӕй хатир кӕнуй (Ис. 55:7).

3. Аци статьяй дзурд цӕбӕл цӕудзӕй?

³ Аци статьяй радзордзиан, ӕнӕнхӕст адӕни бон куд ӕй ӕнхӕст Хуцауи фӕнзун ӕма иннетӕн хатир кӕнун. Мах ӕркӕсдзиан уӕхӕн фарстатӕмӕ: хестӕр нӕлгоймӕгтӕн цӕхуӕн  тӕрегъӕдти туххӕй фӕгъгъӕуй зӕгъун? Йеговӕ нӕ хатир кӕнунмӕ цӕмӕн разӕнгард кӕнуй? Иннети тӕрегъӕдти туххӕй маст ка бавзурста, еци хуӕртӕ ӕма ӕнсувӕрти хабӕрттӕй цӕбӕл ахур кӕнӕн?

4. а) Уӕззау тӕрегъӕд ка искодта, е куд гъӕуама архайа? б) Хестӕр нӕлгоймӕгтӕбӕл цӕхуӕн ихӕс ес?

⁴ Кадӕр уӕззау тӕрегъӕд ке ракодта, уой ку базонӕн, уӕд нӕ ихӕс фӕууй хестӕр нӕлгоймӕгтӕн зӕгъун. Уӕззау тӕрегъӕдтӕмӕ ци хауй, е финст ӕй 1 Коринфӕгтӕмӕ 6:9, 10. Адӕймаг уӕззау тӕрегъӕд ку искӕнуй, уӕд Хуцауи закъони нихмӕ рацӕуй. Уӕхӕн тӕрегъӕд ка искодта, е бал гъӕуама Йегови рази ӕ фудбӕл басӕтта, уой фӕсте ба хестӕр нӕлгоймӕгтӕй ӕнхус ракора (Пс. 32:5; Иак. 5:14). Уӕхӕн хабар ку ’рцӕуа, уӕд еци ӕнсувӕртӕ куд гъӕуама архайонцӕ? Адӕймагӕн ӕ тӕрегъӕд кӕронмӕ ниххатир кӕнуни барӕ ӕрмӕстдӕр Йеговӕн ес, Киристе ӕ цард нивондӕн ке равардта, уой фӕрци *. Фал Йеговӕ хестӕр нӕлгоймӕгтӕн баихӕс кодта Библий фӕрци ниллух кӕнун, тӕрегъӕд ка искодта, еци адӕймаг ӕмбурди байзайдзӕй ӕви нӕ (1 Кор. 5:12). Уомӕй уӕлдай ма сӕ фӕгъгъӕуй балӕдӕрун: тӕрегъӕд зонгӕ-зонгӕй искодта? Ӕ тӕрегъӕд римахста? Еунӕг хатт фӕррӕдудӕй ӕви еци рӕдуд цалдӕр хатти искодта? Ӕма тӕккӕ ӕхсидзгӕдӕр – ӕ рӕдудбӕл ке фӕсмон кӕнуй, уой гъуддагӕй ӕвдесуй? Йеговӕ адӕймагӕн ке ниххатир кодта, е естӕмӕй бӕрӕг ӕй? (Гъуд. 3:19).

5. Хестӕр нӕлгоймӕгтӕ цӕмӕн фембӕлунцӕ, тӕрегъӕд ка искодта, уой хӕццӕ?

⁵ Хестӕр нӕлгоймӕгтӕ, тӕрегъӕд ка ракодта, уой хӕццӕ цӕмӕн фембӕлунцӕ? Сӕ нисан ӕй, уӕлӕрвти ци унаффӕ хаст ӕрцудӕй, уӕхӕн унаффӕ рахӕссун. Уой туххӕй Йеговӕмӕ фӕкковунцӕ ӕма Библий ци уагӕвӕрдтӕ ес, уонӕмӕ лӕмбунӕг ӕркӕсунцӕ (Матф. 18:18). Уотӕ ке фӕййархайунцӕ, е ӕмбурди хуӕртӕ ӕма ӕнсувӕрти куд багъӕуай кӕнуй? Ӕ тӕрегъӕдбӕл ка не ’рфӕсмон кодта, уой ӕмбурдӕй рацох кӕнунцӕ, ӕма уотемӕй еци адӕймаг Йегови хъазар уӕриккитӕн неци зӕран ӕрхӕссуй (1 Кор. 5:6, 7, 11–13; Тит. 3:10, 11). Фал, ка ’й зонуй, хестӕр нӕлгоймӕгти бон исуодзӕй адӕймагӕн банхус кӕнун, цӕмӕй ӕрфӕсмон кӕна, ӕма ин уӕд Хуцау ниххатир кӕндзӕй (Лук. 5:32). Уой фӕсте хестӕр нӕлгоймӕгтӕ еци адӕймаги туххӕй Йеговӕмӕ раковдзӕнцӕ, цӕмӕй ин нӕуӕгӕй ӕ хӕццӕ бафедаунмӕ банхус кӕна (Иак. 5:15).

6. Ӕмбурдӕй ке рацох кодтонцӕ, уӕхӕн адӕймагӕн Йеговӕ ниххатир кӕндзӕй? Ба ’й лӕдӕрун кӕнӕ.

⁶ Фал хестӕр нӕлгоймӕгти хӕццӕ фембӕлгӕй адӕймаг ку не ’рфӕсмон кӕна, уӕд ӕй ӕмбурдӕй рацох кӕндзӕнцӕ. Уомӕй уӕлдай ма адӕймаг хецауади закъони сӕрти ку рахеза, уӕд ӕй хестӕр нӕлгоймӕгтӕ нӕ ергъӕв кӕндзӕнцӕ, закъонмӕ гӕсгӕ ци ӕфхуӕрд гъӕуама баййафа, уомӕй. Уомӕн ӕма Йеговӕ хецӕуттӕн уой барӕ равардта, цӕмӕй, лӕгъуздзийнадӕ ка кӕнуй, уой бафхуӕронцӕ. Ӕма уӕлдай нӕй адӕймаг фӕсмон кӕнуй ӕви нӕ (Ром. 13:4). Фал уӕхӕн адӕймаг зӕрдӕй ку ’рфӕсмон кӕна ӕма ӕ гъуддӕгтӕ ку раййева, уӕд ин Йеговӕ ниххатир кӕндзӕй (Лук. 15:17–24). Йеговӕ ин ниххатир кӕндзӕй цийфӕнди уӕззау тӕрегъӕд ма ракӕна, уӕддӕр (2 Анз. 33:9, 12, 13; 1 Тим. 1:15).

7. Нӕ бон куд ӕй, нӕ нихмӕ тӕрегъӕд ка искодта, уомӕн ниххатир кӕнун?

⁷ Адӕймагӕн ниххатир кӕнӕн ес ӕви нӕ, уой Йеговӕ ӕхуӕдӕг лух кӕнуй. Фал нӕхецӕй дӕр берӕ кӕнгӕ фӕууй. Цума ци?  Кӕд ни адӕймаг хатир нӕ ракурдта, уӕддӕр ин нӕ бон ӕй ниххатир кӕнун. Гъома нӕ зӕрди имӕ маст мабал дарун ӕма имӕ мабал мӕстгун кӕнун. Фал, раст зӕгъгӕй, е алкӕд ӕнцон нӕ фӕууй. Уомӕн берӕ рӕстӕг ӕма хъауритӕ фӕгъгъӕуй, уӕлдайдӕр ба нин нӕ зӕрдӕ хъӕбӕр ку фӕрресун кӕнунцӕ, уӕд. 1994 анзи 15 сентябри «Гъӕуайгӕнӕн мӕсуг»-и финст адтӕй: «Адӕймагӕн ку ниххатир кӕнӕн, уӕд е уобӕл дзорӕг нӕ фӕууй, ӕма ци бакодта, уой тӕрегъӕдбӕл нӕ нимайӕн. Киристон ку ниххатир кӕнуй, уӕд е уобӕл дзорӕг фӕууй, ӕма гъуддаг Йегови барӕ бакодта. Е ӕй Дун-дуйней тӕккӕ хуӕздӕр Тӕрхонгӕнӕг ӕма ӕ рӕстӕги гъуддаг исраст кӕндзӕй». Цума нӕ Йеговӕ хатир кӕнунмӕ ӕма гъуддаг уой бӕрагӕ бакӕнунмӕ цӕмӕ разӕнгард кӕнуй?

8. Йегови фӕлмӕнзӕрдӕдзийнадӕй боз ке ан, е нӕ цӕмӕ разӕнгард кӕнуй?

⁸ Иннетӕн ку хатир кӕнӕн, уӕд бӕрӕг уодзӕй, Йегови фӕлмӕнзӕрдӕдзийнадӕй боз ке ан. Еухатт Йесо ци фӕсномуг хабар ракодта, уоми Хуцауи рабарста, ӕ цагъарӕн хъӕбӕр устур ихӕс ка ниххатир кодта, уӕхӕн паддзахи хӕццӕ. Фал еци цагъар ба е ’мбалӕн дзӕвгарӕ минкъийдӕр ихӕс нӕ ниххатир кодта (Матф. 18:23–35). Еци хабар Киристе цӕмӕн радзурдта? Йегови фӕлмӕнзӕрдӕдзийнадӕн ӕцӕгӕйдӕр ку аргъ кӕнӕн, уӕд нӕхуӕдтӕ дӕр архайдзиан, цӕмӕй иннетӕн хатир кӕнӕн (Пс. 103:9). Еухатт «Гъӕуайгӕнӕн мӕсуг»-и уотӕ финст адтӕй: «Кӕрӕдземӕн цӕйбӕрцӕфӕнди ма хатир кӕнӕн, уӕддӕр уой некӕд уодзӕй рабарӕн, Йеговӕ нин Киристей нивонди фӕрци цӕйбӕрцӕ хатир кӕнуй, уой хӕццӕ».

9. Йеговӕ фӕлмӕнзӕрдӕ кӕмӕ фӕууй? (Матфеййи 6:14, 15).

⁹ Иннетӕн ку хатир кӕнӕн, уӕд нин Йеговӕ дӕр хатир кӕндзӕй. Фӕлмӕнзӕрдӕ ка ӕй, уонӕмӕ Йеговӕ фӕлмӕнзӕрдӕ фӕууй (Матф. 5:7; Иак. 2:13). Уой Киристе балӕдӕрун кодта, ковун куд гъӕуй, уой ку амудта, уӕд. (Бакӕсӕ Матфеййи 6:14, 15.) Е куд ӕхсидзгӕ ’й, уой ма Йеговӕ ӕхуӕдӕг дӕр балӕдӕрун кодта, Иови хӕццӕ ку дзурдта, уӕд. Еци рӕстгӕнӕг нӕлгоймаги хъӕбӕр фӕрресун кодтонцӕ Елифаз, Вилдад ӕма Софари ӕхсилкъӕ дзурдтӕ. Фал Йеговӕ Иовӕн загъта, цӕмӕй уони туххӕй ракувтайдӕ. Иов дӕр уотӕ бакодта, ӕма ин Хуцау райарфӕ кодта (Иов 42:8–10).

10. Зӕрди маст дарун лӕгъуз цӕмӕн ӕй? (Ефесӕгтӕмӕ 4:31, 32).

¹⁰ Нӕ зӕрди маст ку дарӕн, уӕд нӕхецӕн фуддӕр кӕнӕн. Маст дарун уӕззау уаргъи хузӕн ӕй, Йегови ба фӕндуй, цӕмӕй еци уаргъӕй исуӕгъдӕ уӕн. (Бакӕсӕ Ефесӕгтӕмӕ 4:31, 32.) Библий финст ӕй: «Ниууадзӕ маст ӕма фудӕнхӕ» (Пс. 37:8). Аци унаффӕмӕ гӕсгӕ ку архайӕн, уӕд е зундбӕл дзорӕг уодзӕй. Уомӕн ӕма ескӕмӕ нӕ зӕрди маст ку фӕддарӕн, уӕд е не ’нӕнездзийнадӕбӕл дӕр рабӕрӕг уй (Ӕмб. 14:30). Адӕймаг ӕ зӕрди маст ку ниддаруй, уӕд, зӕгъӕн ес, ӕма марг баниуазуй. Ӕма уӕд фуддӕр ӕхецӕй ӕндӕр кӕмӕн кӕнуй? (Ӕмб. 11:17). Мадта иннетӕн ку фӕххатир кӕнӕн, уӕд нӕхе уодӕн хуарз фӕккӕнӕн. Уотемӕй нӕ зӕрди уодзӕй фарнӕ ӕма нӕ Йеговӕн лӕггадӕ кӕнунмӕ неци хъор кӕндзӕй.

11. Библий маст есуни туххӕй ци финст ес? (Ромӕгтӕмӕ 12:19–21).

¹¹ Мастесӕг ӕй Хуцау. Йеговӕ нин уой барӕ нӕ равардта, цӕмӕй, нӕ зӕрдихудти ка бацудӕй, уонӕй нӕ маст есӕн. (Бакӕсӕ Ромӕгтӕмӕ 12:19–21.) Ӕнӕнхӕст ке ан, уомӕ гӕсгӕ нӕ бон нӕй Хуцауи хузӕн рӕстӕй  тӕрхон кӕнун (Дзиуит. 4:13). Мӕстгун кенӕ зӕрдӕрист ке фӕууӕн, уомӕ гӕсгӕ нин хатгай зин фӕууй раст хатдзӕгмӕ ’рцӕун. Йеговӕ Иаковӕн дзӕгъӕли нӕ ниффинсун кодта: «Адӕймагӕн мӕстгунӕй ӕ бон нӕй, Хуцауи цӕсти раст ци ӕй, уой кӕнун» (Иак. 1:20). Мадта ма гурусхӕ кӕнӕ: Йеговӕ гъуддагмӕ цийфӕнди цӕстӕй нӕ кӕсуй ӕма ӕ рӕстӕги алцидӕр исраст кӕндзӕй.

12. Йеговӕбӕл нӕ зӕрдӕ ке дарӕн, е цӕмӕй бӕрӕг уодзӕй?

¹² Иннетӕн ку фӕххатир кӕнӕн, уӕд ӕй февдесӕн, Йеговӕбӕл нӕ зӕрдӕ ке фӕддарӕн. Тӕрхон кӕнуни барӕ гъӕуама Йеговӕн уадзӕн. Цӕмӕн? Уомӕн ӕма ’й уотемӕй ӕвдесдзиан, тӕрегъӕд нин ци зӕран ӕрхаста, уомӕй фӕд дӕр ке нӕбал ниууадздзӕй, уобӕл федарӕй ке ӕууӕндӕн. Нӕуӕг дуйней нин Йеговӕ не ’гас риститӕ дӕр исдзӕбӕх кӕндзӕй. Библий финст ӕй: «Раздӕр ци адтӕй, уони гъуди дӕр некебал ӕркӕндзӕй ӕма зӕрди дӕр нӕбал байзайдзӕнцӕ» (Ис. 65:17). Фал цума уомӕн гӕнӕн ес, цӕмӕй маст ӕма зӕрдихудтӕй исуӕгъдӕ уӕн, кӕд нин нӕ зӕрди арф гъӕдгинтӕ ниууагътонцӕ, уӕддӕр? Гъо. Ӕма е бӕрӕг ӕй дӕлдӕр финст хабӕрттӕй.

13, 14. Тоний хабарӕй цӕбӕл ахур кӕнӕн?

¹³ Берӕ хуӕртӕ ӕма ӕнсувӕртӕн сӕ бон иссӕй, рист син ка бавзарун кодта, уонӕн ниххатир кӕнун. Цума син Йеговӕ куд райарфӕ кодта?

¹⁴ Ӕркӕсӕн Филиппинтӕй еу ӕнсувӕр Тоний * хабармӕ. Йегови Ӕвдесӕн ку нӕма адтӕй, уӕд ин ӕ хестӕр ӕнсувӕртӕй еуей рамардта еу нӕлгоймаг, Хосе, зӕгъгӕ. Еци нӕлгоймаги ӕрахӕстонцӕ ӕма ӕй ахӕстдони исбадун кодтонцӕ. Тони хъӕбӕр мӕстгунгӕнагӕ ӕма ӕнӕхатир адӕймаг адтӕй. Ӕма Хосей ку исуӕгъдӕ кодтонцӕ, уӕд расоми кодта, ке ’й иссердзӕй ӕма ’й уодӕгасӕй ке нӕ ниууадздзӕй. Дамбаца дӕр ма балхӕдта. Фал фӕстӕдӕр Тони Йегови Ӕвдесӕнти хӕццӕ базонгӕ ’й. Е загъта: «Библи ке ахур кодтон, уой фӕрци ’й балӕдӕрдтӕн, мӕ уодигъӕдӕ ӕма мӕ мӕ цард раййевун ке гъӕуй. Е ба уобӕл дзорӕг адтӕй, ӕма мӕ зӕрди гъӕуама маст мабал дардтайнӕ». Рӕстӕг рацудӕй, ӕма Тони донаргъуд райста, фӕстӕдӕр ба хестӕр нӕлгоймаг  иссӕй. Ӕма ’й ку базудта, Хосе дӕр Йегови Ӕвдесӕн ке иссӕй, уӕд ӕ десӕн кӕрон дӕр нӕбал адтӕй. Еци дууӕ ӕнсувӕри ку фембалдӕнцӕ, уӕд кӕрӕдземӕн нихъхъури кодтонцӕ. Ӕма Тони Хосейӕн загъта, ке ин ниххатир кодта. Тони куд загъта, уотемӕй берӕ ӕнзти дӕргъи ци уаргъ фӕххаста, уой ӕхецӕй ке рагӕлста, уой фӕрци исуолӕфтӕй ӕма ӕ зӕрдӕ цийнӕй байдзаг ӕй. Е ба ӕцӕгӕйдӕр устур арфӕдзийнадӕ ’й.

15, 16. Питер ӕма Сьюй хабарӕй цӕбӕл ахур кӕнӕн?

¹⁵ Нур ба ӕркӕсӕн Питер ӕма Сьюй хабармӕ. 1985 анзи Паддзахади зали ку адтӕнцӕ, уӕд си бомбӕ фехалдӕй. Еци фидбилизи фӕсте Сью лӕгъуз уинун ӕма лӕгъуз игъосун райдӕдта, удта смӕгтӕ дӕр нӕбал лӕдӕрдтӕй *. Питер ӕма Сью сагъӕс кодтонцӕ, уӕхӕн фудмиуӕ ка бакодтайдӕ, зӕгъгӕ. Цалдӕр анзей фӕсте еци фудгӕнӕги ниййахӕстонцӕ ӕма ’й цӕргӕ-цӕрӕнбонти ахӕстдони исбадун кодтонцӕ. Питер ӕма Сьюй ку бафарстонцӕ, еци адӕймагӕн ниххатир кодтонцӕ, зӕгъгӕ, уӕд загътонцӕ: «Йеговӕ нӕ ахур кӕнуй, цӕмӕй нӕ зӕрди маст ма дарӕн, уомӕн ӕма уотӕ ку нӕ кӕнӕн, уӕд е не ’нӕнездзийнадӕн зӕран ӕрхӕсдзӕй. Уомӕ гӕсгӕ, еци фӕдбӕл Йеговӕмӕ ковун райдӕдтан, цӕмӕй нӕ зӕрди маст ма ниддардтайанӕ. Курдтан ма си, цӕмӕй еци адӕймагмӕ мӕстгун мабал кӕнӕн ӕма нӕ бон уа идарддӕр цӕрун».

¹⁶ Цума Сью ӕма Питерӕн ӕнцон адтӕй еци адӕймагӕн ниххатир кӕнун? Нӕъ. Идарддӕр зӕгъунцӕ: «Рӕстӕгӕй-рӕстӕгмӕ Сьюй е ’нӕнездзийнадӕ тухсун кӕнун райдайуй ӕма бабӕй уӕд фӕммӕстгун кӕнӕн. Фал еци мастӕн нӕ зӕрди ӕрбунат кӕнун нӕ фӕууадзӕн. Раст уин ку зӕгъӕн, уӕд, еци фудгӕнӕг ескӕд не ’нсувӕр ку исуа, уӕд нин хъӕбӕр ӕхцӕуӕн уодзӕй. Мах ӕй балӕдӕрдтан, Библий уагӕвӕрдти фӕрци адӕймаги бон ке ӕй ӕцӕг сӕребарӕ ун. Еци сӕребарӕдзийнадӕ мах куд ӕнгъӕл ан, уомӕй дзӕвгарӕ фулдӕр ӕй. Удта ма нин нӕ нифс федар кӕнуй, тагъд рӕстӕги нин Йеговӕ не ’гас цӕфтӕ дӕр ке радзӕбӕх кӕндзӕй, е».

17. Мири хабарӕй цӕбӕл ахур кӕнӕн?

 ¹⁷ Мира Библи ахур кӕнун ку райдӕдта, уӕд ин адтӕй сӕрихецау ӕма дууӕ минкъий сувӕллони. Ӕ сӕрихецауи рӕстдзийнади надбӕл ислӕуун нӕ бафӕндадтӕй. Цӕйбӕрцӕдӕр рӕстӕги фӕсте ба Мирӕбӕл гадзирахаттӕй рацудӕй ӕма ӕ бийнонтӕ ниууагъта. Мирӕ зӕгъуй: «Сувӕллӕнтти хӕццӕ мӕ ку ниууагъта, уӕд ӕй балӕдӕрдтан, берӕ ке уарзис, еци адӕймаг дӕ ниууадза, е куд зин фӕууй, уой. Уотӕ ке рауадӕй, е ми не ’руагӕс кодта. Мӕхемӕ нийгъустон, уой фӕсте ба мӕхе фудгин кодтон ӕма имӕ хъӕбӕр мӕстгун кодтон». Кӕд еумӕ нӕбал цардӕнцӕ уӕддӕр ӕй ӕ рист нӕ уагъта. Мирӕ идарддӕр уотӕ загъта: «Мӕйгӕйттӕ еци тухст сагъӕстӕй гъезӕмарӕ кодтон ӕма ’й балӕдӕрдтӕн, уой туххӕй Йеговӕй ӕма иннӕ адӕнӕй дӕр ке идард кӕнун». Мирӕ ӕ мастбӕл фӕууӕлахез ӕй ӕма ӕ лӕгӕн ӕ зӕрдӕ лӕгъузӕй неци зӕгъуй. Удта ма ’й нифс ес, еу уӕхӕни е дӕр Йегови Ӕвдесӕн ке исуодзӕй. Мири бон иссӕй ӕ каст нӕуӕг дуйней арфӕдзийнӕдтӕмӕ исаразун. Кӕд ӕ дууӕ биццеуи еунӕгӕй гъомбӕл кодта, уӕддӕр син Йегови бауарзун кодта, ӕма етӕ дӕр сӕ бийнонти хӕццӕ Йеговӕн лӕггадӕ кӕнунцӕ.

18. Сӕйраг Тӕрхонгӕнӕг Йеговӕ ӕхуӕдӕг ке ӕй, уой фӕрци федарӕй ци зонӕн?

¹⁸ Ци хуарз ӕй, Дун-дуйней Тӕрхонгӕнӕг Йеговӕ ӕхуӕдӕг ке ӕй, мах нӕ, фал! Еци уӕззау уаргъ махбӕл не ’сӕвардта (Ром. 14:10–12). Ӕма нӕ бон ӕй федарӕй ӕууӕндун, ци тӕрхӕнттӕ фӕххӕссуй, етӕ алкӕддӕр ӕ раст уагӕвӕрдтӕмӕ гӕсгӕ ке фӕуунцӕ (Райд. 18:25; 1 Пад. 8:32). Йеговӕ хӕран гъуддаг некӕд ракӕндзӕй!

19. Тӕккӕ хуӕздӕр Тӕрхонгӕнӕг Йеговӕ федӕни ци искӕндзӕй?

¹⁹ Мах хъӕбӕр ӕнгъӕлмӕ кӕсӕн, Йеговӕ тӕрегъӕд ӕма ӕнӕнхӕстдзийнадӕ кӕд фесафдзӕй, еци рӕстӕгмӕ. Гъе уӕд нин не ’гас цӕфтӕ дӕр исдзӕбӕх кӕндзӕй. Ӕма сӕ гъуди дӕр некӕдбал ӕркӕндзиан (Пс. 72:12–14; Рарг. 21:3, 4). Фал нин Йеговӕ абони дӕр ке ӕнхус кӕнуй, уомӕн хъӕбӕр аргъ кӕнӕн. Ӕ цӕветтон ӕма е ’нхуси фӕрци нӕ бон ӕй иннетӕн хатир кӕнун.