1. Ngera ngtibir a Jehovah el mo er tirke el mera el obult?

 ME ALTA Jehovah a Ulemeob, ngike el omeskid a llach, e chad er a kerrekeriil, engdi ngdirrek el betik a rengul el Demad el ngar er a eanged. (Psa. 100:3; Isa. 33:22) A derellii a klengit e dobult e a Dios a diak di le sebechel el ousubes, ngdirrek el kmal meruul el uaisei. (Psa. 86:5) Ngoeak a profet Isaia e a Jehovah olterekokl er a rengud el kmo: “A kngtim a lesal mo bekerkard, e ak mo ngotechau el mo beches el ua yuki.”​—Isa. 1:18.

2. A lsoad a bo lebudech a delongeled kid me a rebebil, e ngngera kired el meruul er ngii?

² Kid el diak demecherrungel a uchul me kede mo dmu e remuul a tekoi el ngii a mo tomall a rengrir a rebebil. (Jak. 3:2) Me nguaisei engdi tia diak lebelkul a kmo, ngdiak el sebechel mo er ngii a kmes el deleuill er kid me tir. Ngsebechel a lsekum e kede mo mesuub el ousubes. (Osi. 17:9; 19:11; Mt. 18:21, 22) Sel ledu me a lechub e leruul a kora di mekekerei el tekoi el tomall a rengud, e a Jehovah a soal a dousubes. (Kol. 3:13) E ngar ngii a ungil luchul me ngkired el meruul uaisei. E le Jehovah a kongei el “mereched el ousubes a [kngtid].”​—Isa. 55:7.

3. Ngera kede mo mesaod er tia el suobel?

³ Ngar tia el suobel e kede mo mesaod a rolel e a rediak el mecherrungel el chad a sebechir el oukerebai er a Jehovah el ousubes. Ngera el klengit a kired el ouchais er a remechuodel? Ngera uchul me a Jehovah melisiich er kid el mo ousubes? E ngera sebeched el suub er a rudam me a rudos el kmal mlo chuarm er a kngterir a rebebil?

4. (a) A mesiungel a Jehovah sel lerellii a oberaod el klengit, e ngera kirel meruul? (b) Ngera ngerechelir a remechuodel sel lebo el kldibel lobengkel a chad el rirebet er a oberaod el klengit?

⁴ Ngkired louchais er a remechuodel a lsekum a chad a ruebet er a oberaod el klengit. A bebil er a oberaod el klengit a losaod a 1 Korinth 6:9, 10. A oberaod el klengit a kmal omtok a llechul a Dios. A Kristiano el ruebet er oberaod el klengit a kirel meluluuch el mora Jehovah lolengit a klausubes, e a uriul e ngmora remechuodel er a ongdibel. (Psa. 32:5; Jak. 5:14) Ngngera ngerechelir a remechuodel er tia el tekoi? Ngdi ta el Jehovah ngike el cherrungel lousubes a klengit, e tia di sebechel meketmokl loeak a olubet el tenget. * Me nguaisei engdi Jehovah mla mesterir a remechuodel a ngerachel el mo olterekokl loeak a Bades el kmo, ngika el rirebet er a klengit ngsebechel melemolem el ngar ongdibel me a lechub e ngdiak. (1 Ko. 5:12) A loruul el uaisei e a tekoi el kirir el mo medenge nger er ngii a: Ngika el chad ngmillib el mo meruul er tia el klengit? Ngmillasem lomart er a kngtil er a rechad? Ngmirruul er tia el oberaod el klengit el kemanget el taem? E a ngar uchei er ngii, ngngar ngii olechotel a kmo ngmera el mla obult? Ngngar ngii olechotel a kmo, a Jehovah mla ousubes er ngii?​—Rel. 3:19.

5. Ngera el klungiaol a mo er ngii loeak a urerir a remechuodel?

⁵ A remechuodel sel bo loumiting, e a turrekong er tir a mo rullii a omelilt el ngii a mla meketmokl er a eanged. (Mt. 18:18) Ngmekera tia el blekeradel e mo uchul a klungiolel a ongdibel? Ngoterekeklii el kmo a chad el diak el kengei el obult a diak lolemolem el ngar ongdibel me a sib er a Jehovah a mukerreu. (1 Ko. 5:6, 7, 11-13; Tit. 3:10, 11) Ngsebechel ngosuir a chad el ngar er a klengit el mo obult e nguu a klausubes er a Jehovah. (Lk. 5:32) A remechuodel a mo meluluuch el kirel a chad el lobult, e olengit er a Jehovah me lengesuir el lmuut el mo mesisiich er a klereng.​—Jak. 5:15.

6. A lsekum a chad a mesuld a ngklel, e ngdirk sebechel mo nguu a klausubes? Mosaod.

⁶ Omko chad a diak lekengei lobult sel bo longedecheduch er ngii a remechuodel. Seikid e ngmesuld a ngklel. A lsekum a chad a tilemellii a llach er a beluu e a remechuodel a diak lomart omerellel. A Jehovah mla msa llemeltel a kabelment er a beluu el mo oukerrekeriil e omals er a chad el tomall a llach, a lobult er a kngtil me a lak. (Rom 13:4) Me nguaisei engdi a lsekum a chad a uriul e ngmo mtab a mekngit el omerellel e obult er a kngtil, e a Jehovah kmal kongei el mo ousubes er ngii. (Lk. 15:17-24) Mo lmuut me a lsekum e ngkmal mle oberaod a kngtil, me a Jehovah kongei el mo ousubes.​—2 Kr. 33:9, 12, 13; 1 Ti. 1:15.

7. Ngmekera dousubes er a chad el mlora klengit el bedul kid?

⁷ Ngkmal dmeu a rengud el medengei el kmo ngdiak lekid a melilt el kmo, a Jehovah mo ousubes a kngtil a chad me a lechub e ngdiak! Me nguaisei engdi ngdirk ngar ngii omelilt el kired el meruul er ngii. Tiang ngerang? Ngar er a bebil er a blekeradel e a chad a locha mo rullii a klengit me a lechub e ngoberaod el klengit el mei er kid e olengit a klausubes. Engdi te ngar ngii a rediak bo lolengit a klausubes. Ngdirk sebeched el melilt el mo ousubes er a chad. Tia belkul a kmo kede mo chemoit a ngesechel a rengud el bedul ngii. Me nguaisei, kede medengei el kmo  tia mo ousbech a taem me a meringel lureor, tokubets a lsekum a chad a kmal tilemellid. A The Watchtower er a September 15, 1994, a melekoi el kmo: “Sel mousubes er a chad e ngdiak el belkul a kmo ke kongei er a kngtil. A belkul a klausubes er a Kristiano a kmo, ngoumerang er a Jehovah e mecherei tia el mondai er a chimal. Ngika melemalt el chad er a kerrekeriil e ngii mo sumecheklii er a melemalt el taem.” Ngera uchul me a Jehovah melisiich er kid el mo ousubes e mecherei a mondai er a chimal?

8. Ngmekera e sel dousubes e ngochotii omereng el saul er kid el kirel a klechubechub er a Jehovah?

⁸ Sel dousubes e kede ochotii omereng el saul. Ngar er a ta el okesiu, e a Jesus ulemekesiu er a Jehovah el mora mastang el sileldii a klou el blsel a ta er a mesiungel el dimlak el sebechel el harau. Me nguaisei engdi ngika el mesiou el uluusubes er ngii a dimlak lochotii a klechubechub el mora mesiou el mle belsel er a di kesai el udoud. (Mt. 18:23-35) Ngera ngullisechakl er ngii er kid a Jesus? A lsekum e kede mera el oba omereng el saul el kirel a klechubechub er a Jehovah el mei er kid, e ngodbechid el mo ousubes er a rechad. (Psa. 103:9) A Ongkerongel er a betok el rak er a mla me mong a mesaod er ngii el kmo: “Alta ngkmal mo betok el di dousubes er a rebebil, me nguaisei engdi ngdiak el sebechel mekesiur a klausubes me a klechubechub er a Jehovah loeak a Kristus.”

9. A Jehovah ngolecholt er a klechubechub el mora rua techang? (Mateus 6:14, 15)

⁹ Tirke el ousubes a mo musubes. A Jehovah olecholt er a klechubechub el mo er tirke el olecholt er a klechubechub. (Mt. 5:7; Jak. 2:13) A Jesus ulemeketakl er tiang er a lolisechakl er a redisaiplo er ngii el meluluuch. (Monguiu er a Mateus 6:14, 15.) Kede suubii osisiu el tekoi er a tekingel a Jehovah el mora mesiungel er a Job. A tekingel a Elifas, Bildad, me a Sofar a kmal tilemellii a rengul ngika el blak a rengul mesiungel. Me nguaisei a Jehovah dilu er a Job el mo meluluuch el kirir. Uriul er a loruul uaisei a Job e a Jehovah ulemekngeltengat er ngii.​—Job 42:8-10.

10. Ngera uchul me nguchul a telemelled sel dorreked a ngasecherreng? (Efesus 4:31, 32)

¹⁰ A chad lorreked a ngasecherreng a kmal di ngii el melemall er ngii. A Jehovah a soal a bo dekebekakl e bo domelechesiu er a budech el mo er ngii sel dechoit a ngasecherreng. (Monguiu er a Efesus 4:31, 32.) Ngdmu er kid el kmo, “lak lochedechudel a rengum, e lak lolengasech a rengum!” (Psa. 37:8) Ngllomeserreng a doltirakl er tia el ulekrael. Sel dorreked a ngasecherreng e ngsebechel mo uchul a secherel a bedenged me a uldesued. (Osi. 14:30) E tia el ngasecherreng el dorreked er ngii a kmal diak a ngera lerellii el mo er ngike el tilemellii a rengud. Ngua dolim er a dok el melemall er ngike el tilemellii a rengud. Ngbai sel dousubes er a rebebil e ngomiange el mei er kid. (Osi. 11:17) Ngmo budech a uldesued me a rengud me kid a sebeched el melemolem er a omesiunged el mora Jehovah.

11. Ngera ngmelekoi a Biblia el kirel a omelaitechei? (Rom 12:19-21)

¹¹ A omelaitechei a ngar er a Jehovah. A Jehovah dimlak lebeskid a llemelted el mo melaitechei er ngike el mlora klengit el bedul kid. (Monguiu er a Rom 12:19-21.) Kid el diak dodengei a rokui e diak demecherrungel, a uchul me ngdiak el sebeched el melemalt el oukerekeriil el ua Dios. (Heb. 4:13) E ngar ngii aike el taem el tekoi el domelechesiu a uchul me ngdiak bo dungil merriter. A Jakobus  a mlukreng el mo meluches el kmo: “Ngasecherreng ra chad a diak le rellii a llemeltel a Dios.” (Jak. 1:20, BT) Ngkmal sebechel mo ulterekokl a rengud el kmo a Jehovah mo meruul er a llemalt.

12. Ngmekera dochotii el kmo kede oumerang er a llemeltel a Jehovah?

¹² A dousubes e ngochotii el kmo kede oumerang er a llemeltel a Jehovah. Sel debechei a tekoi er chimal a Jehovah e kede ochotii el kmo, kede oumerang el kmo ngmo omult a rokui el rellel a klengit. Ngar er a beches el blekeradel e aike el tekoi el dilubech el mei er kid el uchul a ringelel a rengud, “a kmal di mo diak a melatk.” (Isa. 65:17) Me alta ngkmal mekngit a rengud, engdi ngmera el sebeched el chemoit a ngesechel a rengud el bedul a chad? Molatk er a rolel e a rebebil a mla meruul el uaisei.

13-14. Ngera ke silubii el kirel a klausubes er a experience er a Tony me a José?

¹³ A rebetok er a rudam me a rudos a mla ngiltii el mo ousubes alta te kmal miltemall a rengrir er a omerellir a rebebil. Ngera el klungiaol a bla lengai?

¹⁴ Betok el rak er uchei er a bo lodengelii a klemerang a Tony * el kiei er a Huriping, e ngsilubii el kmo a chad el ngklel a José a milekodir a ta er a obekul. Ngar tiakid el taem e a Tony a kmal mle mekngit a blekerdelel el soal di okoad, e mle soal melaitechei. A José a mlo kelebus el kirel a kodellel obekul. Uriul er a letobed er a kelebus, e a Tony rirellii er a rengul el kmo ngmo sikii e mekodir. Me ngmilecherar a boes. Me nguaisei, a Tony mlo omuchel el mesuub er a Biblia lobengterir a Resioning er a Jehovah. A Tony kmo: “Ngar er a omesubek e ak silubii el kmo ngkirek el melodech a blekerdelek, el uldimukl er ngii a mo mengoit er a ngesechel a renguk.” Cherengel a taem e a Tony miltecholb e mlo mesiou el ta er a remechuodel. Ka molatk er a uldesuel er a bo lodengei el kmo a José a dirrek el mla metecholb el mesiungel a Jehovah! Sera bo lekasoues e te mlo kaiuechull, e a Tony dilu er a José el kmo ngmla ousubes er ngii. Tony mesaod el kmo ngii el uluusubes er a José a uchul e ngmlo melechesuar er a klou el deurreng, e ngii el deurreng a meringel a losaod er ngii. Chochoi, a Jehovah  a ulemekngeltengat er a Tony el kilengei el ousubes.

15-16. Ngera ke silubii el kirel a klausubes er a experience er a Peter me a Sue?

¹⁵ Sera 1985 e a Peter me a Sue a mlara Blil a Ongdibel e ngobuu a klou el dub. Ngngar ngii a chad el dillemii a dub er a chelsel a Blil a Ongdibel! A Sue a kmal mlo klou el metemall e dirk telemall osengel me a oderengesel el mei er chelechang. Ngdirrek el dikea el sebechel melungel. * A Peter me a Sue a blechoel el melatk, ‘Ngmekera chad e sebechel rullii tia el kmal mekngit el omeruul?’ Betok el rak er uriul e ngika el chad el dillemii a dub e diak el mesiungel a Jehovah a luldechemii e kilebsengii er a klemengetel a klengar er ngii el rokir. A loker er a Peter me a Sue el kmo te mla ousubes er ngika el chad, e te kmo: “A Jehovah olisechakl er kid el kmo kede di melemall er kid sel dorreked a ngasecherreng e dongemekl a kngtil a rengud. Me ngkmal di mle uchelel e aki ullengit er ngii me lengesukemam el mo diak ki moba ngasecherreng e ki mongemekl a kngtil a rengmam me lsebecham el melemolem a klengar er kemam el budech.”

¹⁶ Ngmle beot er tir a ousubes er ngika el chad? Ngdiak le blechoel el uaisei. Te melemolem el melekoi el kmo: “Sel lsal mo meringel a klengar le ngtelemellel a bedengel a Sue a uchul, e ngmo kesib a rengmam. Me nguaisei engdi ngdiak ki molemolem el melatk me ngdiak lolemolem el kesib a rengmam. Ngmera el sebecham el melekoi el ngar er a rengmam el kmo, a lsekum ngika el chad el rirellii a dub a mo odam er kid er a ta er a klebesei, e aki mo outkeu er ngii. A experience er kemam a mla osisecheklemam el kmo, sel moltaut omellach er a Biblia e ke mo omelechesiu er a ilmokl. Ngrullid el mo mimokl er a lmuut el betok el rolel el dimlak dodengei el kmo kede mo omelechesiu! Ngdirrek el kmal mechelaod a rengmam el kmo a Jehovah a di kmedung e ngmo omult a rokui el tekoi!”

17. Ngera ke silubii el kirel a klausubes er a experience er a Myra?

¹⁷ A Myra silubii a klemerang er a lebechiil e ledirk mekekerei a reteru el ngelekel. A bechil  a dimlak lekengei er a klemerang. Cherengel a taem e a bechil a mlora laokreng e choitii a telungalek er tir. Ngmelekoi el kmo: “A bechik er a lechitak ngak me a rengelekam, e ak mlo omelechesiu aike el bo lolechesuar a rechad el metemall a rengrir er a rebetik er a rengrir. Ngkmal mlo mechas a renguk, mle meringel er ngak oumerang, mlo mekngit a renguk, e ouuchel er a renguk, e omdasu el kmo nglocha kngtik, e kesib a renguk.” Me alta ngmlo merek a chebechiielel, engdi ngdirk ulemelechesiu er a ringelel a kngtil a bechil. A Myra melemolem el melekoi el kmo: “Ngmillemolem el di mengesang er ngak tia el tekoi e kesib a renguk el betok el buil, e ak mlo mtebengii el kmo ngngar ngii a loruul er ngii er a deleuill er ngak me a Jehovah me a rebebil.” A Myra kmo ngmla choitii a ngesechel a rengul e mla mo diak louketui er ngika el mle bechil. Ngomeltkel el kmo a ta er a klebesei e ngmo kmeed er a Jehovah. Ngmla mo sebechel el melatk el kirel a ngar medal. Ngika di mle mesobil e omekeroul er tirka el teru el ngelekel el mo mesiou er a Jehovah. Ngkmal dmeu a rengul a Myra le chelecha el taem e ngmesiou er a Jehovah lobengterir a rengelekel me a telungalek er tir.

18. Ngera uchul me ngsebechel ulterekokl a rengud er a Jehovah el ngike el Kot el Ngarbab el chad er a kerrekeriil?

¹⁸ Ngmeral dmeu a rengud le ngdiak doba oberaod el omelilt el kmo, ngmekera chad e mukerrekeriil! A Jehovah el ngike el kot el ngarbab el chad er a kerrekeriil a meruul er tia el ureor. (Rom 14:10-12) Ngkmal sebeched el cherrungel loumerang el kmo, ngmo oukerrekeriil lotirakl er a cherrungel el llechul el kirel a ungil me a mekngit. (Gen. 18:25; 1 Ki. 8:32) Ngkmal diak el sebechel el mo rullii a tekoi el diak el melemalt!

19. Ngngera ngmo kutmeklii a cherrungel el llemeltel a Jehovah?

¹⁹ Kede kmal omes el beduluchei el kirel sel taem el Jehovah a mo omult aike el rokui el rellel a klengit me a diak el chelerrungel. Seikid el taem aike el rokui el telemellel a bedenged, rengud, me a uldesued a mo selemechokl el diak a ulebengelel. (Psa. 72:12-14; Osi. 21:3, 4) Ngkmal diak deluut el mo lmatk. Me chelecha el dongiil er tia el taem, e ngkmal dmeu a rengud e le Jehovah a mla meskid a klisiich el mo oukerebai er ngii el ousubes.