1. Ndaga itshi Yehowa walayele athu ana balumuna diago mutshima?

 YEHOWA udi Mufugi wetu, Muhanyi wa mikhuala nu Nzuji. Udi nji Tata wetu wa guzumba. (Ngi. 100:3; Yesh. 33:22) Gula tuamukalegela gubola uvi tuabalumuna diago mutshima, muene udi watagana ha gututotesela nu wana khala hehi ha guyitshita. (Ngi. 86:5) Mu njila ya profete Yeshaya, Yehowa watulayele egi: ‘Ngatshima gubola guenu guamihaga matona abenguluga, ame mbangumiphelegetesa.’—Yesh. 1:18.

2. Gula tudi mutshigina gukhala nu ufuta wabonga nu athu ako, itshi tudi naye gutshita?

² Luholo tushigo athu atagana, mukut’etu agasue tuana zuela nu tuana kalagala ndaga jiana sagesa athu ako. (Yak. 3:2) Uvi ishigo mukotelesa egi tuajiyilego gukhala nu ufuta wabonga nu athu ene. Tuajiya gukhala nu ufuta wabonga nawo gula tudi nu khadilo dia gutotesela athu ako. (Ish. 17:9; 19:11; Mat. 18:21, 22) Gula muthu mumoshi wazuela nga wakalagala ndaga imoshi yatusagesa, Yehowa wana tshigina egi tumutotesele. (Kol. 3:13) Idi diago nu ndando ha gukalagala ngenyi, handaga Yehowa wana gututotesela nu ‘mutshima umoshi.’—Yesh. 55:7.

3. Itshi tuza muzuelela mu longo edi?

³ Mu longo edi, tuza muzuelela luholo tuajiya gulandula gifezegeselo gia Yehowa mu ndaga yatadila gutotesela athu ako, ngatshima tushigo athu atagana. Gubola gua luholo lutshi tudi naye guya muwambela akulu? Mukunda natshi Yehowa wana tshigina egi tutotesele athu ako gubola guawo? Malongo atshi tuajiya guzula gudi aphangi etu ako anyi amonele lamba mukunda nu gubola gua athu ako?

4. (a) Gula mukombeledi wa Yehowa wakalagala gubola guakoma, udi naye gutshita itshi? (b) Ginemo gitshi akulu adi nagio tangua adi muta maga nu muthu wakalaga gubola?

⁴ Gula phangi mumoshi wakalagala gubola guakoma tudi naye guwambela akulu. Ha gufezegesa, mukanda wa 1 Kolinto 6:9, 10, udi muzuelela gubola guko guakoma. Gubola guakoma guana shiya mikhuala ya Nzambi. Gula Muklisto wakalagala gubola gua luholo elu, udi naye gutshita gisambu gudi Yehowa, gungima udi naye guya mumona akulu. (Ngi. 32:5; Yak. 5:14) Ginemo gitshi akulu ana khala nagio? Phamba Yehowa wana totesela athu mu luholo luatagana, wana guyitshita ngenyi mu njila ya mulambu wa Yesu. * Uvi Yehowa wahanele akulu ginemo gia gukalegela Biblia ha guzula desizio dia gujiya gula muthu wakalagala gubola udi naye guzolewa mu hungu nga ndo. (1 Kol. 5:12) Gutuama dia guzula desizio, akulu adi naye gudihula mihu eyi: Itshi yatumi muthu muene ha gukalagala gubola? Wadilondele gutuama ha gukalagala gubola guene? Wakalegele gubola guene masugu avula? Muthu muene udi mumonesa haphelo egi wabalumuna diago mutshima nu udi mutshigina guvutula ufuta wenji nu Yehowa? Gudi nu ndaga idi mumonesa diago egi Yehowa wamutotesela?—Makal. 3:19.

5. Gubonga gutshi mudimo wa akulu wana gutubatela?

⁵ Tangua akulu adi muta maga nu muthu watshitshi gubola, adi naye gutshita yagasue ha guzula desizio didi gudivua nu dinyi Yehowa wazudi gale mu dilu mukunda nu muthu muene. (Mat. 18:18) Gubonga gutshi hungu diana heta mukunda nu desizio diene? Gula muthu watshitshi gubola watuna gubalumuna mutshima nu wazolewa mu hungu, hungu diana sala mu ubambi. (1 Kol. 5:6, 7, 11-13; Tito 3:10, 11) Desizio diene diajiya nji gukuatesa muthu wakalagala gubola ha gubalumuna mutshima nu hagula Yehowa a mutotesele. (Luka 5:32) Akulu ana tshita gisambu mukunda nu muthu wabalumuna mutshima nu ana toga Yehowa ha gumukuatesa hagula avutule ufuta n’enji.—Yak. 5:15.

6. Gula muthu wazolewa mu hungu, Yehowa wajiya gumutotesela ba? Kotelesa.

⁶ Tangiza egi muthu mumoshi watshitshi gubola, nu gubalumuna ndo mutshima tangua adi muta maga nu akulu. Gula idi ngenyi, muthu muene mbawuzolewa mu hungu. Gula muthu muene wakalagala ndaga yashiyi mikhuala ya leta, akulu ashigo naye gubamba ndaga yene. Yehowa wana hana mafumu a leta njila ha gusophesa muthu wagasue washiyi mukhuala nu gumuhana ndola, ikhale muthu muene wa balumuna mutshima nga ndo. (Roma 13:4) Uvi gungima gula muthu muene wakotelesa egi wakalegele gubola nu wa balumuna diago mutshima, Yehowa mbawukhala hehi ha gumutotesela. (Luka 15:17-24) Idi yadiago egi Yehowa mbawumutotesela ngatshima gubola guene gudi guakoma diago.—2 Gudi. 33:9, 12, 13; 1 Tim. 1:15.

7. Mu luholo lutshi tuajiya gutotesela muthu watukalegela gubola?

⁷ Tudi nu gusuanguluga ha gujiya egi ishigo esue tudi naye guzula desizio, gula Yehowa mbawutotesela muthu wakalagala gubola! Uvi, tudi naye guzula desizio mu ndaga imoshi. Ndaga itshi yene? Yajiya gukhala egi muthu mumoshi watukalegela ndaga yatusagesa diago muavula, gungima watutoga pardo. Uvi yajiya nji gukhala egi muthu muene gatutogelego pardo. Ikhale ngenyi tuajiya guzula desizio dia gutotesela muthu muene nu gutuna gumubambela khabu mu mutshima. Yadiago, yajiya gutoga egi tukalagala ngolo nu yajiya guzula tangua gula ndaga yene ya tusagesele diago muavula. Inzo Yaleha ya Mutaledi ya Français ya 15 Septembre 1994, idi muzuela egi: “Gula tuatotesela muthu,  ishigo mukotelesa egi tuasuanguluga nu ndaga yabola yatukalegela muene. Esue Aklisto gula tuatotesela muthu, yana kotelesa egi tuabembi ndaga yene ha mago a Yehowa. Yehowa udi diago Nzuji watagana, gushigo nu nzuji muko gifua muene. Muene mbawusophesa ndaga mu luholo luatagana nu mu tangua diabonga.” Mukunda natshi Yehowa wana tshigina egi tutotesele athu ako, nu gusha mutshima egi muene mbawusophesa ndaga yene mu luholo luatagana?

8. Luholo lutshi tuajiya gumonesa egi tuana suanguluga nu luholo Yehowa wana gutuvila khenda?

⁸ Tangua tuana totesela athu ako, tuana monesa egi tuana suanguluga nu luholo Yehowa wana gutuvila khenda. Mu gifezegeselo gimoshi, Yesu wafuanesele Yehowa nu fumu mumoshi wavidile muhiga wenji khenda. Muhiga muene wakhalele nu mukudi wenji wakoma, uvi gakhalelego nu luholo lua guwufuta, hene fumu wa mutotesele mukudi wene. Uvi gungima muhiga muene gavidilego muhiga n’a muko khenda yango wakhalele nu mukudi wenji wazonda. (Mat. 18:23-35) Longo ditshi tuajiya guzula mu gifezegeselo giahanele Yesu. Gula tudi musuanguluga diago nu luholo Yehowa wana gutuvila khenda, mbayitutuma nji ha gutotesela athu ako. (Ngi. 103:9) Ivo yavula yabalega gale, Inzo Yaleha ya Mutaledi ya Français ya 15 Decembre 1951 yazuelele egi: “Ngatshima tuatotesela athu ako mahugo guvula gutshi, yajiyilego gukhala gifua luholo Yehowa wana totesela muthu wagasue mukatshi dietu nu wana gutuvila khenda mu njila ya mulambu wa Klisto.”

9. Ha gutadila Matayo 6:14, 15, akuatshi Yehowa wana guvuila khenda?

⁹ Gula tudi mutotesela athu ako, Yehowa nji mbawudi gututotesela. Athu anyi ana guvila athu ako khenda, Yehowa nji wana guavila khenda. (Mat. 5:7; Yak. 2:13) Yesu wamonesele ndaga yene muabonga tangua dialongesele muene alandudi enji luholo lua gutshita gisambu. (Tanga Matayo 6:14, 15.) Thomo, Yehowa wamonesele nji ndaga ya luholo lumoshi mu ndaga jiawambelele muene mukombeledi wenji Yobo. Yobo wavile diago lamba diavula mu mbimbi jiabola jiamuwambelele mafut’enji awa thathu, Elifaze, Biledade, nu Sofale. Yehowa wawambelele Yobo ha gukombelela mukunda nu athu ene. Wakalegele ngenyi, hene Yehowa wamushimbigile.—Yobo 42:8-10.

10. Mu gudivua nu Efeso 4:31, 32, mukunda natshi gubamba khabu mu mutshima gudi gingonza?

¹⁰ Gula tudi mubamba khabu mu mutshima tudi gudihua lamba esue hakhetu. Khabu jidi gifua ginemo giakola, hene Yehowa wanatshigina egi tukatule ginemo giene hagula tukhale mu guhuima. (Tanga Efeso 4:31, 32.) Yehowa wana gutuwambela ha ‘gutuna guvua khabu nu gubemba gubundumuga.’ (Ngi. 37:8) Idi nu ndando ha gutumagela longo edi. Gula tudi mubamba khabu mu mutshima mukunda nu muthu watukalegela gubola, yajiya gutubatela malamba, gifua misongo. (Ish. 14:30) Gula tudi mubambela muthu khabu, yajiyilego gubatela muthu muene malamba, uvi mbatudibatela malamba esue hakhetu handaga idi gifua tuanui puazo. Hene gula tudi mutotesela athu ako, tuana guditshitshila gubonga. (Ish. 11:17) Gutshita ngenyi guana gutukuatesa ha gukhala mu guhuima nu ha gulandula gukalegela Yehowa muavula.

11. Ha gutadila Roma 12:19-21, itshi Biblia yana zuela mu ndaga yatadila guvutula gubola mu gubola?

¹¹ Yehowa muene mbawuvutula gubola. Yehowa ganago gutuhana njila ya guvutula gubola gudi muthu watukalegela ndaga yabola. (Tanga Roma 12:19-21.) Luholo tushigo athu atagana, yana khala lamba gudi esue ha gutadila mulonga mu luholo luatagana gifua Yehowa. (Heb. 4:13) Matangua ako, matangi’etu ajiya gutuhuiga nu gutshita egi ikhale lamba ha gujiya ndaga yabonga tudi naye gutshita. Mu njila ya nyuma ya Nzambi Yakoba wasonegele egi: “Gula muthu  wavua khabu, muene gana tshitago ndaga jiabonga gu meso a Nzambi.” (Yak. 1:20) Tudi naye gusha mutshima egi Yehowa mbawudi mukalagala ndaga jiabonga nu mbawutshita egi jisophesewe mu luholo luatagana.

12. Luholo lutshi tuajiya gumonesa egi tuana sha mutshima egi Yehowa wana sophesa ndaga mu luholo luatagana?

¹² Tangua tuana totesela athu ako, tuana monesa egi tuana sha mutshima egi Yehowa wana sophesa mu luholo luatagana. Gula tuabemba mulonga ha mago a Yehowa, yana monesa egi tuana sha mutshima egi muene mbawukatula malamba agasue tuana tagana nawo. Mu mavu ahe-ahe atutendelele Yehowa, ndaga jia lamba ‘mbajitujilago mu matangi nga mu mutshima.’ (Yesh. 65:17) Uvi gula muthu watukalegela ndaga yatuhanyi diago lamba diavula, yana khala yaleba ha gutuna guvuila muthu muene khabu nga ha gumubambela wumbalagaji ba? Tutadilenu luholo athu ako akalegele ndaga yene.

13-14. Longo ditshi tuazula mu eksperianse ya Tony nu José mu ndaga yatadila gutotesela?

¹³ Aphangi’etu a mala nu a akhetu avula azudile desizio dia gutotesela athu ako, ngatshima athu ene akalegele ndaga yaasagesele muavula. Gubonga gutshi ahetele luholo akalegele ngenyi?

¹⁴ Ivo yavula gutuama egi Tony * wana jinga gu Philippines abue Temue wa Yehowa, wajiyile egi muthu mumoshi mu jina dia José, muene washiyile mbuta wenji wa yala. Mu tangua diene, Tony wabuile diago mbundudi, wakhalele mutshigina guvutula gubola mu gubola. Akuatele José nu amumbile mu bologo mukunda nu gubola guakalegele muene. Gungima tangua azolele José mu bologo, Tony watshitshile yagasue ha gumukamba hagula amushiye. Wasumbile uta mukunda nu ndaga yene. Uvi gungima Tony wasendesele gulonguga Biblia nu Matemue a Yehowa. Udi muzuela egi: “Tangua ngakhalele mulonguga Biblia ngakotelesele egi ngudi naye gusombegesa makalegelo ami nu gubemba khabu ngakhalele najio mukunda nu José.” Gungima, Tony wabatijiwe nu wabuile mukulu mu hungu. Tangiza gale luholo Tony wadivile hajiyile muene egi José nji wabuile gale Temue wa Yehowa! Lusugu adimonele adiyambele nu gisemo giagasue, Tony wawambelele José egi ngagutotesele gale gubola wakalegele. Udi muzuela egi  gutotesela José guamukuatesele ha gukhala nu gusuanguluga guavula diago. Wakhalele hehi ha gutotesela José, hene Yehowa wamushimbigile.

15-16. Longo ditshi tuazula mu ndaga yabuidile phangi Peter nu mukaji’enji Sue mu ndaga yatadila gutotesela?

¹⁵ Mu givo 1985, lusugu lumoshi tangua phangi Peter nu mukaji’’enji Sue ayile mu gudibungisa gua mu hungu, bombe imoshi yamuanganele mu Inzo ya Ufumu. Muthu mumoshi wambile bombe yene mukatshi dia Inzo ya Ufumu. Gungima dia gumuangana gua bombe yene, phangi Sue gakhalelego mumona luko muabonga, gakhalelego nji muvua muabonga nga guvua vumba dia ima. * Matangua avula phangi Peter nu Sue akhalele gudihula egi: ‘Nanyi wakalegele ndaga yabola luholo elu?’ Gungima dia ivo yavula, ajiyile egi muthu wambile bombe mu Inzo ya Ufumu gakhalelego Temue wa Yehowa. Akuatele muthu muene, gungima dia gumusophesa azudile desizio egi udi naye gubalegesa monyo wenji wagasue mu bologo. Tangua ahudile phangi Peter nu mukaji’enji Sue gula atotesele gale muthu muene, azuelele egi: “Yehowa wana gutulongesa egi tushigo naye gubamba khabu mu mutshima handaga yajiya gutubatela malamba gifua misongo. Tangua bombe yamuanganele, gungima tuatogele Yehowa ha gutukuatesa ha gutuna guvua khabu nu ha gutuna gubambela muthu muene umbalagaji.”

¹⁶ Yakhalele ndaga yaleba gudi phangi Peter nu Sue ha gutotesela muthu muene ba? Ndo sha. Adi muzuela luko egi: “Uu nu mangino matangua ako, gula Sue udi mu mona lamba mukunda nu ndaga yabuile, tuana vua khabu. Uvi ha gukatula ndaga yene mu matangi, tuana landulago guyitangiza. Hene, tuajiya guzuela nu mutshima wetu wagasue egi gula lusugu muthu munu wambile bombe mu Inzo ya Ufumu wabua Temue wa Yehowa, mbatudi gumuyamba nu gisemo giagasue. Ndaga yabuidile aphangi awa idi gutumonesa egi, gukalegela malongo a Biblia guana gutukuatesa ha gukhala mu guhuima. Malongo ene ana gutukuatesa mu maluholo avula diago! Tuana heta nji gikhesa handaga tudi mujiya egi gualeha ndo Yehowa mbawukatula ndaga jiagasue jiana gutubatela malamba.”

17. Longo ditshi tuazula mu gifezegeselo gia phangi Myra mu ndaga yatadila gutotesela?

 ¹⁷ Tangua Myra wajiyile giamatshidia, wakhalele wazudiwe gale mu ulo nu wakhalele nu ana mbadi. Mulumi’enji gakhalelego musuanguluga nu giamatshidia. Mu tangua diene, wakalegele uthambi nu wabembele fami yenji. Myra udi muzuela egi: “Tangua mulumi’ami wangubembele nu ana mbadi, ngavile gifua muana gudivua athu avula gula muthu ana zumba muavula waatuna. Ngamonele egi ndaga yene yajiyilego gukalegewa, ngavile diago gikenene giavula, ngadibelele, ngamonele egi gubola guakhalele guami nu ngavile khabu.” Ngatshima ulo wafile, Myra walanduile guvua lamba handaga mulumi’enji wakalegele uthambi. Myra udi muzuela luko egi: “Ngalanduile gudisagesa muavula. Uvi gungima ngakotelesele egi ndaga yene yajiya gubolesa ufuta wami nu Yehowa nu athu ako.” Henyaha, Myra udi muzuela egi ganago luko guvua khabu nu gana tshiginago egi ndaga imoshi yabola ibuile mulumi’enji. Wana khala nu gutshigina egi lusugu mulumi’enji wajiya gubua futa dia Yehowa. Henyaha Myra wana balegesa tangua dienji ha gutangigiza ndaga jiabonga mbajikalegewa mu masugu adi muza jinyi Yehowa watulayele. Ngatshima gashigo nu yala, uvi wakuatesele an’enji mbadi ha gubua akombeledi a Yehowa. Mangino Myra udi nu gusuanguluga ha gukombelela Yehowa hamoshi nu an’enji nu fami jiawo.

18. Luholo Yehowa udi Nzuji Wabalega Gukoma, mbawutshita itshi?

¹⁸ Gujiya egi ishigo esue tudi naye guzula desizio luholo athu adi naye gusophesewa, yana gutukuatesa ha gukhala mu guhuima. Luholo Yehowa udi Nzuji Wabalega Gukoma, mbawutadila muabonga ndaga yatadila usopheshi. (Roma 14:10-12) Tudi naye gusha mutshima egi muene mbawusophesa mu luholo luatagana mugudivua nu mikhuala yenji yatadila ndaga jiabonga nu jiabola. (Gis. 18:25; 1 Maf. 8:32) Muene mbagashigo mukalagala nga ndaga imoshi mu luholo luabola!

19. Ndaga itshi Yehowa Nzuji watagana mbawukalagala?

¹⁹ Tudi munengena diago tangua dinyi Yehowa mbawukatula malamba agasue tuana tagana nawo luholo tushigo athu atagana nu tudi enya masumu. Mu tangua diene, ndaga jiagasue jia lamba tuana tagana najio mbajikhadigo luko. (Ngi. 72:12-14; Gumo. 21:3, 4) Mbajitujilago luko mu matangi nga hazonda. Hatudi munengena guza gua tangua diene diabonga, tudi nu gusuanguluga guavula luholo Yehowa wana gutukuatesa ha gulandula gifezegeselo gienji gia gutotesela athu ako.