مطالعے دا مضمون نمبر 25
یہوواہ معاف کرن والیاں نُوں برکتاں دیندا اے
جیویں یہوواہ نے توانوں دلوں معاف کیتا اے اونویں ای تُسی وی دُوجیاں نُوں معاف کرو۔—کلسیوں 3:13۔
گیت نمبر 130: دلوں معاف کرو
مضمون تے اِک نظر a
1. گُناہ توں دلوں توبہ کرن والیاں نُوں یہوواہ کیہڑی گل دا یقین دَواندا اے؟
یہوواہ ساڈا خالق، قانون بنان والا تے سب توں ودھیا جج اے۔ ایس لئی اوہدے کول سانوں معاف کرن دا اِختیار اے۔ پر اوہ ساڈا اسمانی باپ وی اے تے سانوں بوہت پیار کردا اے۔ (زبور 100:3؛ یسعیاہ 33:22) ایس لئی جدوں اَسی کوئی گُناہ کرن توں بعد دلوں توبہ کرنے آں تے یہوواہ سانوں معاف کر دیندا اے۔ (زبور 86:5) یہوواہ نے یسعیاہ نبی دے ذریعے اِک ایہو جہی گل دَسی جدے توں سانوں بڑی تسلی مِلدی اے۔ اوہنے کہیا: بھانویں تواڈے گُناہ لال سُرخ ہون، اوہ برف وانگوں چِٹے ہو جان گے۔—یسعیاہ 1:18۔
2. جے اَسی دُوجیاں نال صلح نال رہنا چاہنے آں تے سانوں کیہہ کرنا چاہی دا اے؟
2 عیبدار ہون دی وجہ توں اَسی اکثر کجھ ایہو جیہا کہہ دینے آں یاں کر دینے آں جدے توں دُوجے دُکھی ہوندے نیں۔ (یعقوب 3:2) پر ایہدے باوجود اَسی صلح نال رہ سکنے آں۔ ایہدے لئی ضروری اے کہ اَسی اِک دُوجے نُوں کُھل کے معاف کرئیے۔ (امثال 17:9؛ 19:11؛ متی 18:22،21) جدوں اَسی چھوٹیاں موٹیاں گلاں چ اِک دُوجے نُوں ٹھیس پونچانے آں تے یہوواہ چاہندا اے کہ اَسی اِک دُوجے نُوں معاف کرئیے۔ (کُلسّیوں 3:13) یہوواہ سانوں دل کھول کے معاف کردا اے ایس لئی سانوں وی اِنج کرنا چاہی دا اے۔—یسعیاہ 55:7۔
3. ایس مضمون چ اَسی کیہڑے سوالاں تے غور کراں گے؟
3 ایس مضمون چ اَسی ایہناں سوالاں تے غور کراں گے: عیبدار ہون دے باوجود اَسی معاف کرن دے معاملے چ یہوواہ دی مثال تے کیویں چل سکنے آں؟ سانوں کیہڑے گُناہواں بارے بزرگاں نُوں دَسنا چاہی دا اے؟ یہوواہ کیوں چاہندے اے کہ اَسی اِک دُوجے نُوں معاف کرئیے؟ نالے اَسی اوہناں بھین بھراواں توں کیہہ سکھ سکنے آں جنہاں نُوں دُوجیاں دے گُناہواں دی وجہ توں بڑی تکلیف ہوئی؟
جدوں کوئی مسیحی سنگین گُناہ کردا اے
4. جدوں یہوواہ دا کوئی بندہ کوئی سنگین گُناہ کردا اے تے اوہنوں کیہہ کرنا چاہی دا اے؟ (ب) جدوں بزرگ اِک ایہو جہے مسیحی نال مِلدے نیں جنہے سنگین گُناہ کیتا اے تے اوہناں دی کیہہ ذمےداری ہوندی اے؟
4 جدوں اِک مسیحی کوئی سنگین گُناہ کردا اے تے سانوں ایہدے بارے کلیسیا دے بزرگاں نُوں دَسنا چاہی دا اے۔ 1-کُرنتھیوں 6:10،9 چ کجھ سنگین گُناہواں دا ذکر کیتا گیا اے۔ ایہو جہے سنگین گُناہ کر کے اِک مسیحی یہوواہ دے حکماں نُوں بُری طرحاں توڑ رہیا ہوندا اے تے ایہہ یہوواہ دی نظر چ کوئی معمولی گل نئیں۔ ایس لئی اوس مسیحی نُوں ایہدے بارے یہوواہ کولوں دُعا کرنی چاہی دی اے تے کلیسیا دے بزرگاں نُوں دَسنا چاہی دا اے۔ (زبور 32:5؛ یعقوب 5:14) صرف یہوواہ کول ای کسے دے سنگین گُناہ نُوں مکمل طور تے معاف کرن دا اِختیار اے تے اوہ یسوع مسیح دی قربانی دی بِنا تے اِنج کردا اے۔ پر اوہنے کلیسیا دے بزرگاں نُوں ایہہ ذمےداری دِتی اے کہ اوہ پاککلام دے مطابق ایہہ فیصلہ کرن کہ سنگین گُناہ کرن والا کلیسیا چ رہ سکدا اے یاں اوہنوں خارج کرن دی لوڑ اے۔ (1-کُرنتھیوں 5:12) ایہہ فیصلہ کردے ویلے بزرگ ایہناں سوالاں دے جواب جانن دی کوشش وی کردے نیں: کیہہ اوس مسیحی نے جانبجھ کے گُناہ کیتا سی؟ کیہہ اوہنے اپنا گُناہ دُوجیاں توں لُکان دی کوشش کیتی سی؟ کیہہ اوہ کافی عرصے توں ایہہ گُناہ کر رہیا اے؟ نالے سب توں ضروری گل ایہہ وے کہ کیہہ اوہدے کماں توں پتہ چلدا اے کہ اوہنے دلوں توبہ کیتی اے تے اوہ یہوواہ نال اپنا رشتہ مضبوط کرنا چاہندا اے؟ کیہہ ایس گل دا کوئی ثبوت ہے وے کہ یہوواہ نے اوہنوں معاف کر دِتا اے؟—اعمال 3:19۔
5. بزرگ جو کجھ کردے نیں اوہدے توں کیہڑے فائدے ہوندے نیں؟
5 جدوں بزرگ سنگین گُناہ کرن والے نال مِلدے نیں تے اوہ اوہی فیصلہ کرن دی کوشش کردے نیں جیہڑا یہوواہ نے اسمان تے اوس معاملے بارے کر لیا ہوندا اے۔ (متی 18:18) یہوواہ دی مرضی مطابق فیصلہ کرن لئی بزرگ دُعا کر کے پاککلام دے اصولاں تے تنظیم دِیاں ہدیتاں تے غور کردے نیں۔ ایہدے توں کلیسیا نُوں کیہہ فائدہ ہوندا اے؟ جدوں سنگین گُناہ توں توبہ نہ کرن والے نُوں کلیسیا چوں کڈھ دِتا جاندا اے تے ایہدی وجہ توں اوس بندے دا بُرا اثر باقی بھین بھراواں تے نئیں پیندا۔ (1-کُرنتھیوں 5:7،6، 11-13؛ طِطُس 3:11،10) ایس بندوبست توں گُناہ کرن والے دی وی مدد ہوندی اے کہ اوہ توبہ کرے تے یہوواہ توں معافی حاصل کرے۔ (لُوقا 5:32) بزرگ توبہ کرن والے مسیحی لئی یہوواہ کولوں درخاست کردے نیں کہ اوہ اوہدی مدد کرے تاکہ اوہ فیر توں یہوواہ نال رشتہ جوڑ سکے۔—یعقوب 5:15۔
6. جے کسے نُوں کلیسیا چوں خارج کر دِتا جاندا اے تے کیہہ ایہہ ممکن اے کہ یہوواہ فیر وی اوہنوں معاف کرے؟ وضاحت کرو۔
6 جے بزرگ ویکھدے نیں کہ سنگین گُناہ کرن والے نے توبہ نئیں کیتی تے اوہنوں کلیسیا چوں کڈھ دِتا جاندا اے۔ نالے جے اوس بندے نے حکومت دا کوئی قانون توڑیا اے تے بزرگ اوہنوں سزا توں بچان دی کوشش نئیں کرن گے۔ یہوواہ نے حکومتاں نُوں ایہہ اِختیار دِتا اے کہ اوہ قانون توڑن والے ہر بندے نُوں سزا دین فیر بھانویں اوہنے توبہ کیتی اے یاں نئیں۔ (رومیوں 13:4) پر جے بعد چ اوس بندے نُوں اپنی غلطی دا احساس ہوندا اے تے اوہ اپنی بُری سوچ تے کماں نُوں چھڈ کے دلوں توبہ کردا اے تے یہوواہ اوہنوں معاف کر دَوے گا۔ (لُوقا 15:17-24) فیر بھانویں اوہنے سنگین گُناہ ای کیوں نہ کیتا ہووے۔—2-تواریخ 33:9، 12، 13؛ 1-تیمُتھیُس 1:15۔
7. جے کوئی ساڈے خلاف گُناہ کردا اے تے اَسی کیس لحاظ نال اوہنوں معاف کر سکنے آں؟
7 اَسی کِنّے شکرگزار آں کہ یہوواہ نے سانوں ایہہ فیصلہ کرن دی ذمےداری نئیں دِتی کہ سانوں کسے گُناہگار نُوں معاف کرنا چاہی دا اے یاں نئیں۔ پر اِک فیصلہ ہے جیہڑا سانوں ای کرنا پووے گا۔ کیہڑا فیصلہ؟ ہو سکدا اے کہ کسے بھین یاں بھرا نے ساڈے خلاف ای گُناہ کیتا اے پر فیر اوہ ساڈے کولوں معافی منگدا اے۔ ایہہ وی ہو سکدا اے کہ اوہ معافی نہ منگے۔ بھانویں اوہ معافی منگے یاں نہ منگے فیر وی اَسی اوہنوں معاف کر سکنے آں تے اپنے دل چوں اوہدے لئی ناراضگی تے غصہ کڈھ سکنے آں۔ ایہہ سچ اے کہ اِنج کرنا اسان نئیں ہوندا تے اپنے آپ نُوں سمجھان چ وقت لگدا اے۔ خاص کر کے اوہدوں جدوں اوس بندے دے گُناہ دی وجہ توں سانوں تکلیف ہوئی ہووے۔ یکم دسمبر 1994 دے ”مینارِنگہبانی“ چ ایہہ دَسیا گیا سی: ”جدوں تُسی کسے نُوں معاف کر دیندے او تے ایہدا مطلب ایہہ بالکل وی نئیں ہوندا کہ تُسی اوہدے گُناہواں نُوں نظر انداز کر رہے او۔ اِک مسیحی لئی کسے دے گُناہ نُوں معاف کرن دا مطلب ایہہ وے کہ اوہ یہوواہ تے بھروسا رکھ کے معاملے نُوں اوہدے ہتھاں چ چھڈ دیندا اے۔ اوہ ساری کائنات دا اِنصاف کرن والا اے تے ہمیشاں صحی وقت تے صحی فیصلے کردا اے۔“ یہوواہ کیوں چاہندا اے کہ اَسی دُوجیاں نُوں معاف کرئیے تے اِنصاف لئی اوہدے تے بھروسا کرئیے؟
یہوواہ کیوں چاہندا اے کہ اَسی دُوجیاں نُوں معاف کرئیے؟
8. دُوجیاں نُوں معاف کرن چ کیہڑی چیز ساڈی مدد کرے گی؟
8 دُوجیاں نُوں معاف کر کے اَسی وکھانے آں کہ اَسی یہوواہ دے رحم لئی اوہدے شکرگزار آں۔ یسوع مسیح نے اِک مثال دے کے دَسیا کہ یہوواہ اِک ایہو جہے بادشاہ وانگوں اے جنہے اپنے اِک غلام دا بوہت وڈا قرضہ معاف کر دِتا کیونکہ اوہ ایہنوں چُکا نئیں سکدا سی۔ پر فیر اوسے غلام نے اِک دُوجے غلام تے رحم نئیں کیتا تے اوہدا چھوٹا جیہا قرضہ معاف نئیں کیتا۔ (متی 18:23-35) ایس مثال دے ذریعے یسوع نے کیہڑی گل سکھائی؟ جے اَسی یہوواہ دے رحم لئی اوہدے دلوں شکرگزار آں تے اَسی دُوجیاں نُوں معاف کر دَواں گے۔ (زبور 103:9) کجھ سال پہلے اِک ”مینارِنگہبانی“ چ ایہہ دَسیا گیا سی: ”اَسی بھانویں کسے نُوں کِنّی واری معاف کیوں نہ کرئیے، ایہہ اوس معافی دے سامنے کجھ وی نئیں جیہڑی یہوواہ یسوع دی قربانی دی بِنا تے سانوں دیندا اے۔“
9. یہوواہ کِنہاں لوکاں تے رحم کردا اے؟ (متی 6:15،14)
9 معاف کرن والیاں نُوں معاف کیتا جائے گا۔ یہوواہ اوہناں تے رحم کردا اے جیہڑے دُوجیاں تے رحم کردے نیں۔ (متی 5:7؛ یعقوب 2:13) یسوع مسیح نے وی اپنے شاگرداں نُوں اوہدوں ایہہ گل سکھائی جدوں اوہنے اوہناں نُوں دُعا کرنا سکھایا۔ (متی 6:14، 15 نُوں پڑھو۔) یہوواہ نے اپنے بندے ایوب نُوں وی ایہہ ای گل سمجھائی سی۔ ایوب نُوں الیفز، بلدد تے ضوفر دِیاں گلاں توں بڑا دُکھ ہویا سی۔ پر یہوواہ نے ایوب نُوں کہیا کہ اوہ اوہناں تناں لئی دُعا کرے۔ جدوں ایوب نے اِنج کیتا تے یہوواہ نے اوہنوں برکت دِتی۔—ایوب 42:8-10۔
10. اپنے دل چ ناراضگی رکھن نال کیہہ نقصان ہوندا اے؟ (اِفسیوں 4:32،31)
10 دل چ ناراضگی رکھن نال ساڈا ای نقصان ہوندا اے۔ اِفسیوں 4:31، 32 نُوں پڑھو۔ غصہ اِک بھاری بوجھ وانگوں اے تے یہوواہ چاہندا اے کہ اَسی ایس بوجھ توں چھٹکارا پا کے سکون نال زندگی گزارئیے۔ (زبور 37:8) اوہنے سانوں کہیا اے کہ اَسی قہر توں باز آئیے تے غصے نُوں چھڈ دَئیے۔ یہوواہ دی ایس نصیحت تے عمل کر کے سانوں بڑا فائدہ ہوئے گا۔ (امثال 14:30) جے اَسی اپنے دل چ کسے لئی ناراضگی رکھاں گے تے ایہہ اِنج ہوئے گا جیویں اَسی زہر پی رہے آں۔ ایہدے نال ساڈا ای نقصان ہوئے گا تے دُوجے بندے دا کجھ وی نئیں وِگڑے گا۔ اَسی پریشان رہن لگ پواں گے تے ساڈی صحت وی خراب ہو سکدی اے۔ دُوجیاں نُوں معاف کر کے ساڈا ای بھلا ہوندا اے۔ (امثال 11:17) ساڈے دل تے دماغ نُوں سکون مِلدا اے تے سانوں یہوواہ دی خدمت کردے رہن دی ہمت مِلدی اے۔
11. بائبل بدلہ لین بارے کیہہ کہندی اے؟ (رومیوں 12:19-21)
11 بدلہ لینا یہوواہ دا کم اے۔ جے کوئی ساڈے خلاف گُناہ کردا اے تے یہوواہ نے سانوں اوہدے کولوں بدلہ لین دا اِختیار نئیں دِتا۔ (رومیوں 12:19-21 نُوں پڑھو۔) عیبدار ہون دی وجہ توں سانوں کسے معاملے بارے ساری گل پتہ نئیں ہوندی۔ نالے کدی کدی اَسی کسے معاملے بارے بڑے جذباتی ہو جانے آں۔ ایس لئی اَسی ایس قابل نئیں آں کہ یہوواہ وانگوں کسے معاملے بارے بالکل صحی فیصلہ کرئیے۔ (عبرانیوں 4:13) یہوواہ نے اپنے کلام چ دَسیا اے: جیہڑا بندہ غصے تے قابو نئیں رکھدا اوہ خدا دی نظر چ نیک نئیں ٹھہردا۔ (یعقوب 1:20) اَسی ایس گل دا پکا یقین رکھ سکنے آں کہ یہوواہ ہمیشاں صحی فیصلہ کردا اے تے اوہ سانوں ضرور اِنصاف دَوائے گا۔
اپنے دل چوں ناراضگی تے غصے نُوں کڈھ دَوو۔ معاملے نُوں یہوواہ دے ہتھاں چ چھڈ دَوو۔ اوہ اوس نقصان نُوں بھر دَوے گا جیہڑا توانوں کسے دی وجہ توں ہویا اے۔ (پیراگراف نمبر 12 نُوں ویکھو۔)
12. اَسی کیویں ثابت کر سکنے آں کہ سانوں یہوواہ دے اِنصاف تے بھروسا اے؟
12 دُوجیاں نُوں معاف کر کے اَسی ثابت کرنے آں کہ سانوں یہوواہ دے اِنصاف تے پورا بھروسا اے۔ معاملے نُوں یہوواہ دے ہتھاں چ چھڈ کے اَسی وکھانے آں کہ سانوں پورا بھروسا اے کہ یہوواہ اوس نقصان نُوں بھر دے گا جیہڑا سانوں کسے دے گُناہ دی وجہ توں ہویا اے۔ اوہنے وعدہ کیتا اے کہ نوِیں دُنیا چ دُکھ پونچان والیاں بُریاں یاداں ساڈے دل چوں مِٹ جان گیاں تے فیر کدی ساڈے خیال چ وی نئیں آن گیاں۔ (یسعیاہ 65:17) پر جے کسے نے ساڈے دل نُوں بوہت زیادہ دُکھی کیتا اے تے کیہہ اوہدوں اپنے دل چوں غصے تے ناراضگی نُوں کڈھنا ممکن اے؟ آؤ ویکھئے کہ کجھ بھین بھراواں نے اِنج کیویں کیتا۔
معاف کرو تے برکتاں پاؤ
13، 14. معاف کرن بارے تُسی بھرا ٹونی تے بھرا ڈیوڈ دے تجربے توں کیہہ سکھیا اے؟
13 ساڈے کئی بھین بھراواں نے اوہناں لوکاں نُوں معاف کرن دا فیصلہ کیتا جنہاں نے اوہناں نُوں بوہت تکلیف پونچائی سی۔ اِنج کر کے اوہناں نُوں کیہڑیاں برکتاں ملیاں نیں؟
14 بھرا ٹونی فلپائن چ رہندا اے۔ b اوہدے وڈے بھرا نُوں ڈیوڈ ناں دے اِک بندے نے قتل کر دِتا۔ اوہدوں ٹونی یہوواہ دا گواہ نئیں سی۔ اوہ بڑے غصے والا سی تے اکثر دُوجیاں نُوں ماردا کٹدا سی۔ اوہ اپنے بھرا دی موت دا بدلہ لینا چاہندا سی۔ ڈیوڈ نُوں پولیس نے گرفتار کر لیا تے اوہنوں جیل دی سزا ہو گئی۔ جدوں ڈیوڈ جیل توں رہا ہویا تے ٹونی نے قسم کھادی کہ اوہ اوہنوں جانوں مار دَوے گا۔ اوہنے ڈیوڈ نُوں مارن لئی اِک پستول وی خریدی۔ کجھ وقت بعد ٹونی نے یہوواہ دے گواہواں توں بائبل کورس کرنا شروع کیتا۔ اوہ دَسدا اے:”بائبل کورس کرن توں میں سمجھ گیا کہ مینوں اپنے آپ نُوں بدلنا پووے گا تے اپنے غصے تے قابو پانا ہوئے گا۔“ فیر ٹونی نے بپتسمہ لے لیا تے بعد چ اوہ کلیسیا چ بزرگ بن گیا۔ سوچو کہ ٹونی ایہہ سُن کے کِنّاں حیران ہویا ہوئے گا کہ ڈیوڈ نے وی یہوواہ دے اِک گواہ دے طور تے بپتسمہ لے لیا اے۔ جدوں اوہناں دی ملاقات ہوئی تے اوہ اِک دُوجے نُوں گلے ملے۔ ٹونی نے ڈیوڈ نُوں دَسیا کہ اوہنے اوہنوں معاف کر دِتا اے۔ ٹونی کہندا اے کہ اوہ دَس نئیں سکدا کہ ڈیوڈ نُوں معاف کر کے اوہنوں کِنّی خوشی ہوئی۔ نالے ایہدی وجہ توں یہوواہ نے وی اوہنوں برکت دِتی۔
بھرا پیٹر تے بھین سُو دی مثال توں اَسی سکھنے آں کہ اَسی اپنے دل چوں غصہ تے ناراضگی کڈھ سکنے آں۔ (پیراگراف نمبر 15، 16 نُوں ویکھو۔)
15، 16. معاف کرن بارے تُسی بھرا پیٹر تے بھین سُو دے تجربے توں کیہہ سکھیا اے؟
15 1985 چ بھرا پیٹر تے بھین سُو عبادت چ سن۔ فیر اچانک عبادتگاہ چ اِک زوردار دھماکہ ہویا کیونکہ اِک بندے نے اوتھے بم رکھ دِتا سی۔ اوس دھماکے دی وجہ توں بھین سُو نُوں بوہت زیادہ سٹاں لگیاں۔ جدی وجہ توں اوہ اَج تک چنگی طرحاں ویکھ، سُن یاں سونگھ نئیں سکدی۔ c اوس دن نُوں یاد کردئیاں ہوئیاں بھرا پیٹر تے بھین سُو اکثر ایہہ سوچدے نیں: ”اِک بندہ ایناں بھیڑا کم کیویں کر سکدا اے۔“ کئی سالاں بعد اوس بندے نُوں گرفتار کر لیا گیا تے اوہنوں عمر قید دی سزا دِتی گئی۔ جدوں بھرا پیٹر تے بھین سُو نُوں پچھیا گیا کہ کیہہ اوہناں نے اوس بندے نُوں معاف کر دِتا اے تے اوہناں نے کہیا: ”یہوواہ نے سانوں سکھایا اے کہ دل چ غصہ تے ناراضگی رکھن دی وجہ توں ساڈی صحت تے بُرا اثر پووے گا تے اَسی اپنی خوشی کھو دَواں گے۔ ایس لئی اوس دھماکے توں کجھ وقت بعد اَسی یہوواہ توں دُعا کیتی کہ اَسی اپنے دل چوں غصہ کڈھ دَئیے تے اوس بندے نُوں معاف کر کے سکون نال زندگی گزارئیے۔“
16 کیہہ اوہناں لئی اوس بندے نُوں معاف کرنا اسان سی؟ نئیں۔ بھرا پیٹر نے کہیا: ”ہُن وی جدوں سُو نُوں اپنیاں سٹاں دی وجہ توں تکلیف ہوندی اے تے ساڈیاں بُریاں یاداں تازہ ہو جاندیاں نیں تے سانوں غصہ آن لگ پیندا اے۔ پر اَسی اوہناں گلاں بارے سوچدے نئیں رہندے ایس لئی ساڈا غصہ چھیتی ٹھنڈا ہو جاندا اے۔ اَسی دلوں مننے آں کہ جے اوہ بندہ ساڈا بھرا بن جائے تے اَسی اوہنوں خوشی نال قبول کراں گے۔ ایس تجربے توں اَسی سکھیا اے کہ بائبل دے اصولاں تے عمل کرن دی وجہ توں سانوں بڑا سکون مِلدا اے۔ نالے سانوں ایس گل توں وی بڑی تسلی مِلدی اے کہ یہوواہ چھیتی ای اوس سارے نقصان نُوں بھر دَوے گا جیہڑا سانوں ہویا اے۔“
17. معاف کرن بارے تُسی بھین مائرہ دے تجربے توں کیہہ سکھیا اے؟
17 بھین مائرہ اوہدوں یہوواہ دی گواہ بنی جدوں اوہدی شادی ہو چُکی سی تے اوہدے دو بچے سن۔ اوہدا شوہر یہوواہ دا گواہ نئیں بنیا۔ اوہنے حرامکاری کیتی تے اپنے بیوی بچیاں نُوں چھڈ دِتا۔ بھین مائرہ دَسدی اے: ”جدوں اوہنے سانوں چھڈ دِتا تے میں وی اوہناں لوکاں وانگوں اندروں ٹُٹ گئی جنہاں دا کوئی اپنا اوہناں نُوں دھوکھا دیندا اے۔ میرے پیراں تھلوں زمین نکل گئی، یقین نئیں ہو رہیا سی کہ ایہہ میرے نال ہو رہیا اے۔ میں بوہت دُکھی ساں تے اپنے آپ نُوں اِلزام دینی ساں۔ مینوں بڑا غصہ آندا سی۔“ بھین مائرہ دی طلاق ہو گئی۔ اپنے شوہر دی بےوفائی توں اوہنوں ہُن تک بڑی تکلیف ہوندی اے۔ بھین مائرہ نے اَگے دَسیا: ”میں کئی مہینیاں تک بوہت پریشان تے غصے چ رہی تے مینوں محسوس ہویا کہ ایہدی وجہ توں یہوواہ تے بھین بھراواں نال میرا رشتہ خراب ہو رہیا اے۔“ بھین مائرہ دَسدی اے کہ اوہنے ہُن اپنے دل چوں اپنے شوہر لئی ناراضگی تے غصہ کڈھ دِتا اے۔ اوہنوں امید اے کہ اِک دن اوہ یہوواہ دے قریب آ جائے گا۔ بھین مائرہ دے نال جو کجھ وی ہویا اوہدے تے اپنا دھیان لان دی بجائے اوہنے اپنا دھیان یہوواہ دے وعدیاں تے لایا اے۔ اوہنے کلّے اپنے بچیاں دی پرورش کیتی تے اوہناں نُوں یہوواہ بارے سکھایا۔ اَج بھین مائرہ اپنے بچیاں تے اوہناں دے خانداناں نال مل کے یہوواہ دی عبادت کر رہی اے تے بڑی خوش اے۔
یہوواہ اِنصاف کرن چ بےمثال اے
18. اَسی پورا بھروسا کیوں رکھ سکنے آں کہ یہوواہ اِنصاف کرے گا؟
18 اَسی کِنّے خوش آں کہ یہوواہ نے سانوں ایہہ فیصلہ کرن دی ذمےداری نئیں دِتی کہ کسے نُوں معاف کرنا چاہی دا اے کہ نئیں۔ ایہہ اہم کم اِنصاف کرن والا خدا یہوواہ آپ کرے گا۔ (رومیوں 14:10-12) اَسی پورا یقین رکھ سکنے آں کہ یہوواہ اپنے نیک معیاراں دے مطابق بالکل صحی فیصلہ کرے گا کیونکہ اوہنوں پتہ اے کہ صحی تے غلط کیہہ اے۔ (پیدایش 18:25؛ 1-سلاطین 8:32) اوہ کدی وی بےاِنصافی نئیں کرے گا۔
19. یہوواہ دے اِنصاف دی وجہ توں کیہڑے نتیجے نِکلن گے؟
19 آن والے وقت چ یہوواہ کیہہ کرے گا؟ اَسی بےصبری نال اوس وقت دا اِنتظار کر رہے آں جدوں یہوواہ اوس سارے نقصان نُوں ٹھیک کر دَوے گا جیہڑا گُناہ تے عیبدار انساناں دی وجہ توں ہویا اے۔ اوہدوں ساڈے جذباتی تے جسمانی زخم ہمیشاں لئی بھر جان گے۔ (زبور 72:12-14؛ مکاشفہ 21:3، 4) نالے سانوں کدی وی بُریاں یاداں نئیں ستان گیاں۔ پر جدوں تک اوہ وقت نئیں آندا یہوواہ نے سانوں اپنے وانگوں دُوجیاں نُوں معاف کرن دی صلاحیت دِتی اے تے ایہدے لئی اَسی اوہدے بڑے شکرگزار آں۔
گیت نمبر 18: فدیے لئی احسانمند
a یہوواہ اوہناں لوکاں نُوں معاف کرنا چاہندا اے جیہڑے دلوں توبہ کردے نیں۔ سانوں وی یہوواہ دی مثال تے عمل کردے ہوئیاں اوہناں لوکاں نُوں معاف کر دینا چاہی دا اے جیہڑے ساڈا دل دُکھاندے نیں۔ ایس مضمون چ اَسی ویکھاں گے کہ سانوں دُوجیاں دے کیہڑے گُناہواں نُوں معاف کرنا چاہی دا اے تے کیہڑے گُناہواں بارے بزرگاں نُوں دَسنا چاہی دا اے۔ نالے اَسی ویکھاں گے کہ یہوواہ کیوں چاہندا اے کہ اَسی اِک دُوجے نُوں معاف کرئیے تے اِنج کرن نال سانوں کیہڑیاں برکتاں مِلن گیاں۔
b ایس مضمون چ کجھ ناں بدل دِتے گئے نیں۔
c ویبسائٹ jw.org تے بھرا پیٹر تے بھین سُو دی ویڈیو ”Peter and Sue Schulz: A Trauma Can Be Overcome“ ہندی چ ویکھو۔