1. Со ветинела о Јехова околенге со каинена пе?

 ИАКО о Јехова тано амаро Створители, Судија хем лестар авела о закони, ов исто аѓаар тано амаро небесно Дад кова со мангела амен (Пс. 100:3; Иса. 33:22). Кеда грешинаја леске хем пало адава чаче каинаја амен, ов на само со шај те простинел аменге него исто аѓаар мангела те керел адава (Пс. 86:5). Преку о пророко Исаија о Јехова уверинела амен: „Иако тумаре гревија тане сар лоло платно, ка овен парне сар ив“ (Иса. 1:18).

2. Со ваљани те кера ако мангаја те ова ко мир е јаверенцар?

² Адалеске со сием несовршена, сарине амен вакераја хем кераја буќа коленцар со поврединаја е јаверен (Јак. 3:2). Сепак, шај те ова е јаверенцар ко шукар односија само ако сием спремна те простина (Изр. 17:9; 19:11; Мат. 18:21, 22). Кеда поврединаја амен јекх јекхеа башо несаве тикне буќа о Јехова очекујнела амендар те простина (Кол. 3:13). Ваљани те кера адава, соске о Јехова спремно простинела аменге „башо побаре буќа“ (Иса. 55:7).

3. Со ка дикха ки акаја статија?

³ Ки акаја статија ка дикха сар о несовршена мануша шај те простинен е јаверенге сар о Јехова со керела адава. Кола гревија мора те вакера е старешиненге? Соске поттикнинела  амен о Јехова те простина е јаверенге? Хем со шај те сикљова таро амаре пхраља хем пхења кола со доживинѓе бари неправда адалеске со о јавера грешинѓе спрема ленде?

4. а) Со ваљани те керел јекх Јеховаскоро слуга кеда керела баро грево? б) Со ваљани те керел јекх старешина кеда керела лафи јекхе грешникоја?

⁴ Амен ваљани те вакера е старешиненге кеда керела пе пхаро грево. Несаве таро адала пхаре гревија шај те аракха лен ко 1. Коринќаните 6:9, 10. Ако керела пе пхаро грево адалеа пхагела пе е Девлескоро закони. Ако јекх пхрал керела асавко грево тегани ов ваљани те молинел е Јехова те простинел леске хем ваљани те керел е старешиненцар лафи (Пс. 32:5; Јак. 5:14). Сави одговорност иси е старешинен? Само е Јехова иси ле право целосно те простинел амаре гревија хем ов керела адава преку и откупнина. * Ама о Јехова исто аѓаар денѓа одговорност е старешиненге те одлучинен дали о грешнико шај те ачховел ко собрание хем ко адава поможинена лен о библиска начелија (1. Кор. 5:12). Ола исто аѓаар размислинена башо акала пучиба: Дали о грево со керѓа ле сине свесно кердо? Дали мангља те гаравел о грево е јаверендар? Дали повише време керела адава грево? А сој најважно, дали чаче каинела пе башо грево со керѓа? Дали шај јасно те дикхел пе кај о Јехова простинѓа леске? (Дела 3:19).

5. Сави корист иси амен таро адава со керена о старешине?

⁵ Кеда о старешине керена лафи е грешникоја, ленгири цел тани те анен и исто одлука која со више о Јехова анѓа ла ко небо (Мат. 18:18). Сар акава користинела е собраниеске? О собрание тано заштитимо таро грешнико со на каинела пе аѓаар со нане дело таро собрание хем нашти те керел штета е Јеховаскере скапоцена слугенге (1. Кор. 5:6, 7, 11-13; Тит 3:10, 11). Адава исто шај те поможинел е грешникоске те каинел пе хем те овел ле корист таро адава со простинела леске о Јехова (Лука 5:32). О старешине молинена пе е Јеховаске те поможинел околеске со каинела пе те овел палем паше леа (Јак. 5:15).

6. Дали о Јехова ка простинел некаске сој тано исклучимо? Објаснин.

⁶ Со ако некој на каинела пе кеда о старешине керена леа лафи? Ко адава случај ка овел исклучимо таро собрание. А ако пхагља јекх закони тари држава тегани о старешине на само со ка исклучинен ле, него исто аѓаар нане те заштитинен ле таро последице. О Јехова дозволинела е властенге те судинен хем те казнинен секоле јекхе кова со пхагела о закони бизи разлика дали каинела пе или на (Рим. 13:4). Сепак, кеда покасно хаљола кај адава со керѓа тано погрешно хем менинела пло стави хем пле постапке, тегани о Јехова тано спремно те простинел леске (Лука 15:17-24). Чак ако лескере гревија сине бут пхаре (2. Лет. 33:9, 12, 13; 1. Тим. 1:15).

7. Ко саво начин шај те простина некаске со грешинѓа аменге?

⁷ Кобор керела аменге полокхо адава со џанаја кај на ваљани те одлучина дали о Јехова ка простинел јекхе грешникоске или на. Сепак, иси нешто со ваљани те одлучина. Сој адава? Ко несаво случај, шај некој бут грешинѓа аменге ама тегани шај  халило кај грешинѓа хем родинѓа те простина леске, а ко јавер случај шај на керѓа адава. Чак тегани да шај те бирина те простина леске аѓаар со ко амаро вило ка одлучина те на икера холи спрема лесте. Ама те ова искрена, башо адава ваљани време хем трудо посебно ако сием сине бут дукхавде таро адава. И Стражарско кула таро 15 септември 1994 берш вакерела: „Ако простинеа јекхе грешникоске, адава на значинела кај одобринеа и грешка. Јекх христијани кова со простинела иси ле доверба ко Јехова хем адалеске мукхела адаја бути е Јеховаске ко васта. Ов тано праведно Судија таро цело универзум хем ка анел правда ко исправно време“. Соске поттикнинела амен о Јехова те простина хем те мукха ов те судинел, јавере лафенцар те мукха адаја бути леске ко васта?

8. Сар адава со простинаја сикавела кај ценинаја е Јеховаскири милост?

⁸ Ако простинаја сикаваја ценење. О Исус спорединѓа е Јехова јекхе газдаја кова со жалинѓа пле робо хем адалеске на родинѓа лестар те иранел леске о баро борчи. Ама, адава робо на сине милостиво јекхе робоја кова со дужинела леске сине јекх бут потикни сума паре (Мат. 18:23-35). Со мангља те сикавел амен о Исус? Ако чаче ценинаја е Јеховаскири бари милост спрема аменде, тегани адава ваљани те поттикнинел амен те простина е јаверенге (Пс. 103:9). Англедер бут берша и Стражарско кула вакерѓа башо акава: „Бизи разлика кобор пути простинаја амаре пхраленге хем пхењенге, никогаш нане те простина добором кобор со о Јехова простинела секоле јекхеске преку е Христосескири откупнина“.

9. Каске сикавела о Јехова милост? (Матеј 6:14, 15).

⁹ Ако простинаја е јаверенге о Јехова ка простинел аменге. О Јехова сикавела милост околенге сој тане милостива (Мат. 5:7; Јак. 2:13). Кобор тано адава важно дознајнаја таро адава сар о Исус сикавѓа пле следбеникон те молинен пе. (Читин Матеј 6:14, 15.) Јекх слично поука сикљоваја таро адава со вакерѓа о Јехова е Јовеске. Акава верно мануш сине бут повредимо таро адава со вакерѓе о Елифаз, о Вилдад хем о Софар. Ама о Јехова вакерѓа е Јовеске те молинел пе ленге. Чак откеда о Јов керѓа адава, о Јехова денѓа ле берекети (Јов 42:8-10).

10. Соске тано штетно аменге ако икераја холи? (Ефешаните 4:31, 32).

¹⁰ Ако икераја холи кераја штета аменге. И холи тани сар пхарипе со пхираваја ле. Адалеске о Јехова мангела те цида и холи те шај те овел амен мир. (Читин Ефешаните 4:31, 32.) Ов поттикнинела амен „циде тутар о гнев хем мукх и холи“ (Пс. 37:8). Акава совет шај бут те поможинел аменге. Ако икераја холи адава шај бут лошно те влијајнел ко амаро физичко хем емоционално састипе (Изр. 14:30). Те ачхова хољаме некаске со поврединѓа амен тано слично сар те пхене пијаја отров. Адалеа на поврединаја е јавере него само аменде коркори. Значи кеда простинаја е јаверенге тано сар те пхене кераја шукарипе коркори аменге (Изр. 11:17). Овела амен андруно мир хем шај понадари да те служина е Јеховаске.

11. Со вакерела и Библија баши одмазда? (Римјаните 12:19-21).

¹¹ И одмазда тани е Јеховаскири. О Јехова на денѓа амен право те ирана лошнипаја некаске со грешинѓа аменге. (Читин Римјаните 12:19-21.) Адалеске со сием ограничиме хем несовршена амен нашти те  проценина о буќа исправно сар о Девел со шај (Евр. 4:13). Понекогаш, амаре чувствија шај те керен аменге пхаро исправно те постапина. О Јехова поттикнинѓа е Јакове те пишинел: „Е манушескири холи на анела и праведност која со родела о Девел“ (Јак. 1:20). Шај те ова увериме кај о Јехова ка постапинел ко исправно начин хем ка керел са те шај те анел и праведно одлука.

12. Сар шај те сикава доверба ки е Јеховаскири правда?

¹² Кеда простинаја сикаваја кај иси амен доверба ки е Јеховаскири правда. Ако мукхаја о буќа е Јеховаске ко васта, сикаваја доверба ко Јехова кај ка цидел секоја штета со керѓа о грево. Ко нево свето, никогаш више нане те сетина амен ко буќа со дукхавена амен а ни нане те појавинен пе аменге ко вило (Иса. 65:17). Ама кеда сием бут повредиме, дали чаче шај те на икера холи спрема некасте? Дикх сар несаве успејнѓе ко адава.

13-14. Со сиклиљан таро Тони хем таро Хосе башо простибе?

¹³ Бут пхраља хем пхења одлучинѓе те простинен е јаверенге иако сине лендар бут повредиме. Саве берекетија добинѓе адалеске со простинѓе?

¹⁴ Бут берша англедер те овел е Јеховаскоро сведоко, о Тони * кова со живинела ко Филипини дознајнѓа кај јекх мануш кова со викинела пе Хосе мударѓа лескере попхуре пхрале. Ко адава време, о Тони сине бут агресивно хем насилно хем адалеске мангља те одмаздинел пе. О Хосе сине пханло башо адава со керѓа. Покасно кеда о Хосе сине мукхло таро затвор, о Тони денѓа совли кај ка аракхел ле хем ка мударел ле, адалеске кинѓа песке пиштоли. Ама ко адава периоди о Тони почминѓа те проучинел и Библија е Јеховаскере сведоконцар. Ов вакерела: „Џикоте проучинава сине, сиклиљум кај ваљани те менинав мли личност хем мле постапке, а адава значинела сине кај на ваљани више те икерав холи“. Пало несаво време, крстинѓа пе о Тони, хем покасно уло старешина. Кеда дознајнѓа кај о Хосе исто аѓаар уло е Јеховаскоро сведоко бут изненадинѓа пе. Кеда дикхле пе, ола  гушинѓе пе хем о Тони вакерѓа е Хосеске кај простинѓа леске. О Тони вакерѓа кај адалеске со простинѓа леске сине добором бут бахтало со нашти сине те опишинел адава лафенцар. Чаче, о Јехова наградинѓа е Тонескири спремност те простинел.

15-16. Со сиклиљан таро Питер хем Су башо простибе?

¹⁵ Ко 1985 берш, о Питер хем и Су сине ко состанок ки дворана коте со таро јекх пути експлодиринѓа јекх бомба со чхивѓа ла јекх мануш. Таро повреде и Су нашти шукар те дикхел хем те шунел. Исто аѓаар нашавѓа пло мирис. * О Питер хем и Су бут пути пучле пе сар шај некој те керел асавко нешто? Пало несаве берша, окова со чхивѓа и бомба сине пханло џи ко крајо таро пло живото. Кеда пучле лен дали простинѓе акале манушеске, о Питер хем и Су вакерѓе: „О Јехова сикавѓа амен кај ако цело време мислинаја баши амари дукх хем икераја холи, адава шај бут лошно те влијајнел упро амаро физичко, емоционално хем психичко састипе. Адалеске кратко пало адава страшно настан, молинѓем е Јехова те поможинел аменге те простина леске те шај те овел амен андруно мир“.

¹⁶ Дали сине ленге локхо те простинен? На секогаш. Ола вакерена: „Понекогаш кеда и Су осетинела о последице таро адава со случинѓа пе, иранела пе аменге и холи. Ама на мангаја бут те размислина башо адава, адалеске сигате накхела амендар и холи. Уствари, искрено те вакера ако акава мануш јекх диве овела амаро пхрал ка прифатина ле. Акава искуство сикавѓа амен кај о библиска начелија шај чаче те ослободинен амен. Уствари ола шај те ослободинен амен ко повише начинија него со шај те замислина аменге! Исто аѓаар утешинела амен адава со џанаја кај о Јехова панда хари ка цидел са и штета“.

17. Со сиклиљан тари Мира башо простибе?

¹⁷ И Мира ули Сведоко кеда сине више  женими хем сине ла дуј тикне чхаве. Ама лакоро ром на прифатинѓа о чачипе. Пало несаво време ов керѓа прељуба хем мукхља е фамилија. И Мира вакерела: „Кеда мо ром мукхља амен осетинѓум ман сар бут јавера со сине изневериме таро пумаре мангле. Сиум сине шокирими, дукхавди, хољами, тажно, кривинава сине коркори ман хем нашти сине те верујнав со случинѓа пе. Иако на сием више ко брако ама панда дукхала ман адава со изневеринѓа ман. Масеконцар сиум сине хољами хем на осетинава ман сине шукар. Хем халиљум кај адала чувствија влијајнѓе упро мло однос е Јеховаја хем е јаверенцар“. И Мира нане леске више хољами хем надинела пе кај јекх диве ов да ка овел е Јеховаскоро сведоко. Акана и Мира шај те концентриринел пе ки иднина. Ој бајрарѓа пле чхавен коркори, хем акана тане е Јеховаскере сведокија. Авдиве ој тани бахтали со шај те служинел е Јеховаске пле чхавенцар хем ленгере фамилиенцар.

18. Соске шај те овел амен доверба ко Јехова сар Најбаро Судија?

¹⁸ Кобор сием бахтале адалеске со џанаја кај на ваљани амен те одлучина сар ваљани те судинел пе е јаверен. Сар Најбаро Судија, о Јехова ка грижинел пе баши акаја бут важно бути (Рим. 14:10-12). Шај те овел амен целосно доверба кај ов секогаш судинела спрема пле совршена мерилија (1. Мој. 18:25; 1. Цар. 8:32). Адалеске, никогаш нане те постапинел неправедно!

19. Со ка керел о Јехова сар совршено Судија?

¹⁹ Едвај аџикераја о време кеда о Јехова целосно ка цидел са о лошна последице тари манушикани несовршеност хем грево. Ко адава време ка сасљон са амаре физичка хем емоционална ране (Пс. 72:12-14; Отк. 21:3, 4). Никогаш нане више те сетина амен ки ленде. Џикоте аџикераја те авел адава време, бут сием благодарна е Јеховаске со денѓа амен и способност те простина сар лесте.