1. So o Jehova obećini okolenđe kola kajinena pe?

 IAKO tano o Jehova amaro Stvoritelj, Sudija hem okova kova dinđa o zakon, ov tano hem amaro Dad kova but mangela amen (Ps. 100:3; Is. 33:22). Ked ćeraja disavo greh hem ked ando vilo kajinaja amen, ov na samo so šaj te oprostini amenđe, već hem mangela te ćerel odova (Ps. 86:5). Prekalo prorok Isaija, o Jehova phenđa amenđe: „Ako tane tumare grehija sar i loli boja, ka oven parne sar o iv“ (Is. 1:18).

2. So valjani te ćera ako mangaja te ova ko mir averencar?

² Sare amen hijam nesavršena, odolese but putija phenaja ja ćeraja diso sova povredinaja averen (Jak. 3:2). Ama, da li odova značini so našti te ova šukar amala amare phralencar hem phenjencar? Na, amen ka ova šukar amala olencar ako sikljovaja te oprostina (Posl. 17:9; 19:11; Mat. 18:21, 22). Ako amare phralja povredinena amen ko disave tikne buća, o Jehova ađićeri amendar te oprostina lenđe (Kol. 3:13). Sose? Odolese so ov amenđe spremno oprostini but pobare buća (Is. 55:7).

3. Sostar ka vaćera ko akava članko?

³ Ko akava članko ka dikha, sar šaj te oprostina sar o Jehova, iako hijam nesavršena. Isto ađahar, ka dobina  odgovorija ko nekobor pućiba: Kola averenge grehija valjani te vaćera e starešinenđe? Sose o Jehova rodela amendar te oprostina? So šaj te sikljova ando amare phralja hem phenja kolenđe hine but pharo sebepi so avera povredinđe len?

4. (a) So jekh e Jehovaso sluga valjani te ćerel ako ćerđa ozbiljno greh? (b) Koja odgovornost isi len o starešine?

⁴ Ako neko ćerela ozbiljno greh, amen odova valjani te vaćera e starešinenđe. Disave ando odola ozbiljna grehija pominena pe ki 1. Korinćanima 6:9, 10. Ked neko ćerela odola buća, ov premalo Devleso zakon ćerela ozbiljno greh. Ov valjani te molini e Jehova te oprostini lese. Ama, valjani te phenel hem e starešinenđe so ćerđa (Ps. 32:5; Jak. 5:14). Samo o Jehova šaj te oprostini amenđe sose o Isus dinđa po životi amenđe. b Ama, sose ipak valjani te vaćeri pe e starešinenđe? Odolese so o Jehova dinđa len odgovornost te odlučinen da li neko ko ćerđa greh valjani te aćhol ki skupština. Đi ćerena odova, on valjani te ićeren pe ko načelija ando Devleso Lafi (1. Kor. 5:12). Te šaj te ćeren odova, valjani te razmislinen ando akala pućiba: Da li odova manuš planirinđa te ćerel odova greh? Da li garavđa averendar odova? Da li beršencar ćerđa odova greh? Soj tano najvažno, da li isi disavo dokaz kova mothovi so kajini pe hem so o Jehova oprostinđa lese? (Dela 3:19).

5. Sar pomožini amen odova so o starešine ćerena?

⁵ Ked o starešine vaćerena nekasa kova ćerđa greh te dikhen da li ka aćhol ki skupština ili na, on mangena te anen isto odluka koja već anđa pe ko nebo (Mat. 18:18). Sar odova pomožini e skupštinaće? I skupština tani zaštitimi ando lošno uticaj kova šaj te ćerel okova kova grešini (1. Kor. 5:6, 7, 11-13; Titu 3:10, 11). Isto ađahar, o starešine mangena te pomožinen okolese kova ćerđa disavo greh te haljol kobor tano važno te kajini pe hem te rodel ando Jehova te oprostini lese (Luka 5:32). On molinena pe olese hem rodena ando Jehova te pomožini lese palem te ovel paše oleja (Jak. 5:15).

6. Da li o Jehova šaj te oprostini okolese kova tano isključimo? Objasnin.

⁶ Ako o starešine dikhena so o manuš kova ćerđa greh na kajini pe, ov ka ovel isključimo. Ama, ako ov ćerđa diso soj tano protiv o zakon kova tano ki odija phuv, o starešine na ka zaštitinen le ando posledice. O Jehova phenela so o vlastija šaj te sudinen hem te kazninen svakone ko na poštujini o zakon, bizo obzir da li kajini pe (Rimlj. 13:4). Ama, ako palo disavo vreme odova manuš kajini pe hem na ćerela više odova so angleder ćerđa, o Jehova ka oprostini lese (Luka 15:17-24). Ov ka ćerel odova čak ako odova greh hine but ozbiljno (2. Let. 33:9, 12, 13; 1. Tim. 1:15).

7. So značini te oprostine nekase kova povredinđa tut?

⁷ Amen hijam but zahvalna so na valjani amen te odlučina da li o Jehova ka oprostini nekase kova ćerđa ozbiljno greh.  Ama, isi diso so valjani te ćera. Šaj neko but povredinđa amen, ama izvininđa pe amenđe hem rodinđa te oprostina lese. Ama, čak hem ako na izvininđa pe amenđe, ovela bi šukar te oprostina lese hem te na ićera i holi ano amende. Disavo puti odova nane lokho, sose odija osoba šaj but povredinđa amen. Ki Stražarsko kula kotar 15. septembar, 1994. berš, pisini: „Ked oprostineja nekase kova grešinđa, odova na značini so tiknjaćereja oleso greh, već odoleja mothoveja so mukheja o buća ko Jehovase vasta. Ov tano najpravedno Sudija hem ka anel i pravda ko pravo vreme.“ Sose o Jehova podstaknini amen te oprostina hem te mukha o buća ko olese vasta?

8. Sar mothovaja so hijam zahvalna aso Jehovaso milosrđe?

⁸ Ked oprostinaja, amen mothovaja so hijam zahvalna e Jehovase aso oleso milosrđe. Ko jekh poređenje, o Isus uporedinđa e Jehova jekhe gospodareja kova oprostinđa pe robose jekh baro dugo kova naštinđa te irini. Ama, odova isto robo na manglja te oprostini jekhe avere robose jekh but potikno dugo (Mat. 18:23-35). So o Isus manglja te phenel akaleja? Ako ćaće hijam zahvalna e Jehovase aso milosrđe kova mothovđa amenđe, odova ka podstaknini amen te oprostina averenđe (Ps. 103:9). Angleder nekobor berš, ki jekh Stražarsko kula pisinđa: „Iako šaj ka valjani but putija te oprostina averenđe, amen niked na ka oprostina odobor kobor o Jehova oprostinđa amenđe prekali Isusesi otkupno žrtva.“

9. Kase o Jehova mothovi milosrđe? (Matej 6:14, 15)

⁹ Ked oprostinaja averenđe, o Jehova ka oprostini amenđe. O Jehova tano milosrdno premalo okola kola tane milosrdna (Mat. 5:7; Jak. 2:13). O Isus phenđa odova ked sikavđa pe učenikonen sar te molinen pe. (Čitin Matej 6:14, 15.) Beršencar angleder, hem o Jehova odova phenđa pe slugase e Jovese. O Elifas, o Vildad hem o Sofar but povredinđe e Jove pe lafencar. Ama, o Jehova phenđa e Jovese te molini pe olenđe. Ked odova ćerđa, o Jehova but blagoslovinđa le (Jov 42:8-10).

10. Sose nane šukar te ićera i holi ando amende? (Efešanima 4:31, 32)

¹⁰ Ked ićeraja i holi ano amende, odoleja samo povredinaja kokri amen. I holi tani sar jekh teret, a o Jehova mangela te cida amendar odova teret te šaj te ovel amen mir. (Čitin Efešanima 4:31, 32.) Ov phenela: „Cide tutar o gnev hem mukh i holi“ (Ps. 37:8). Ako ka ićera amen ko akava savet, odova ka ovel šukar aso amaro sastipe (Posl. 14:30). Ked ićeraja i holi ando amende, odoleja samo amenđe ćeraja lošnipe. Odova tano isto sar ked bi amen pijaja otrov, a mislinaja so neko aver ka otrujini pe. Odolese, ked amen oprostinaja odova tano samo aso amaro šukaripe (Posl. 11:17). Ađahar isi amen mir hem šaj radosno te služina e Jehovase.

11. Premali Biblija, da li amen valjani te irina o lošnipe? (Rimljanima 12:19-21)

¹¹ O Jehova ka irini o lošnipe. Ov phenela so amen nane amen pravo te irina o lošnipe nekase. (Čitin Rimljanima  12:19-21.) Amen hijam nesavršena hem na đanaja sa o buća, odolese našti te sudina pravedno sar o Jehova (Jevr. 4:13). Disavo puti amare osećanja šaj te ćhinaven amen te ćera odova soj tano ispravno. O Jakov pisinđa: „E manušesi holi na legari đi e Devlesi pravednost“ (Jak. 1:20). Amen šaj te ova sigurna so o Jehova ka ćerel odova so valjani hem so ka sudini pravedno.

12. Sar šaj te mothova so isi amen poverenje so o Jehova pravedno ka sudini?

¹² Ked oprostinaja, amen mothovaja so isi amen poverenje upro Jehova so pravedno ka sudini. Ked mukhaja o buća ko Jehovase vasta, ađahar mothovaja so hijam sigurna so ov ka cidel sa o lošnipe kova doživinđam. Ko nevo sveto, sa i dukh koja osetinđam sebepi odova više „na ka avel ki godi niti ka pojavini pe ko vilo“ (Is. 65:17). Ama, da li šaj ćaće te oprostina nekase kova but povredinđa amen hem te cida i holi ando amaro vilo? Disave iskustvija kola akana ka dikha mothovena so šaj.

13-14. So sikljovaja ando Toni hem ando Hose?

¹³ But amare phralja hem phenja odlučinđe te oprostinen okolenđe kola but povredinđe len. Kola blagoslovija hine len sebepi odova?

¹⁴ Angleder te počmini te proučini e Devleso Lafi, o Toni c šunđa so jekh manuš kova vićini pe Hose mudarđa olese phuredere phrale. Tegani, o Toni hine but nasilno hem manglja te irini odole manušese. I policija astarđa odole manuše hem ćhivđa le ko phanlipe. Ama, o Toni dinđa sovel so ka mudari odole manuše, čak ćinđa pese pištolji sebepi odova. Palo disavo vreme, o Toni počminđa te proučini e Devleso Lafi. Ov phenela: „Đi proučinđum, haljiljum so valjani te menjinav man hem te cidav i holi kotar mo vilo.“ Sar đelo o vreme, o Toni krstinđa pe hem kasnije ulo starešina. Šaj samo te zamisline kobor  hine iznenadimo ked šunđa so hem o Hose ulo phral. Ama, ked reslje pe, on doljije pe ki angalja hem o Toni phenđa so oprostinđa lese. O Toni phenela so ked ćerđa odova, ov hine odobor bahtalo samći cidinđa jekh baro pharipe kotar pe pike. O Jehova blagoslovinđa e Tone odolese so hine spremno te oprostini.

15-16. So sikljiljam andi Su hem ando Piter?

¹⁵ Ko 1985. berš jekh manuš ki dvorana fordinđa jekh bomba. Tegani, amaro phral o Piter hem amari phen i Su hine but povredime. I Su čak jekh vreme našti hine šukar te šunel, te dikhel hem te osetini o miris. d On duj but putija pućlje pe: „Savo manuš tano odova ked šaj hine te ćerel asavko baro lošnipe?“ Palo nekobor berš, i policija astarđa odole manuše hem ov hine osudimo celo po životi te ovel ko phanlipe. Ked pućlje len da li bi on oprostinena odole manušese, on phenđe: „O Jehova sikavi amen so na valjani te ićera i holi ko amaro vilo sose ađahar samo kokri amenđe ćeraja lošnipe. Odolese, odmah palo odova so desinđa pe, molinđam e Jehova te pomožini amen te cida amendar i holi hem te ovel amen mir.“

¹⁶ Da li hine lenđe lokho te oprostinen? Na hine lenđe lokho. On phenena: „Svako puti ked i Su isi la dukha, amen pana osetinaja holi. Ama, na razmislinaja but odolestar hem i holi sigate nakhela. Šaj te phena so ako odova manuš jekh dive ovela phral, amen bi prihvatinaja le. Kotar akava sikljiljam so ked ićeraja amen ko biblijake načelija, odova oslobodini amen ko but načinija. Isto ađahar, but ohrabrini amen odova so đanaja so o Jehova pana hari ka cidel sa o lošnipe.“

17. So sikljovaja andi Majra?

 ¹⁷ Ked penđarđa o ćaćipe i Majra već hine ko rom hem hine la duj ćhave. Ama, olako rom na manglja te proučini. Palo disavo vreme, ov prevarinđa la hem aćhavđa hem ola hem e ćhaven. I Majra phenela: „Ked mo rom mukhlja amen, hine maje but pharo. Hijum le ko baro šok, but putija krivinđum kokri man aso odova so ulo hem hijum le but holjami.“ Iako razvedinđa pe ando po rom, oj pana osetinđa bari dukh ko po vilo. I Majra pana phenela: „Masekoncar hijum le but holjami hem haljiljum so odova lošno utičinđa upro mo amalipe e Jehovaja hem averencar.“ I Majra phenela so akana više na ićeri i holi ano peste hem so na mangela ništa lošno te desini pe lese. Oj nadini pe so jekh dive hem ov ka ovel paše e Jehovaja. I Majra više na razmislini ando odova so desinđa pe laće angleder, nego ando šukar buća kola o Jehova ka del la ki budućnost. Oj kokri barjaćerđa pe duje ćhaven hem pomožinđa len te oven e Jehovase sluge. I Majra tani bahtali so zajedno pe ćhavencar akana služini e Jehovase.

18. Sose šaj te ova sigurna so o Jehova ka sudini pravedno?

¹⁸ Amen isi amen mir odolese so na valjani amen te odlučina sar valjani te sudini pe nekase. O Jehova sar najbaro Sudija, đanela sar najšukar te ćerel odija buti (Rimlj. 14:10-12). Amen šaj te ova sigurna so o Jehova uvek ka sudini pravedno sose olese merilija tane savršena (Post. 18:25; 1. Kralj. 8:32). Ov niked na ka ćerel diso soj tano nepravedno.

19. So o Jehova pana hari ka ćerel?

¹⁹ Amen jedva ađićeraja o dive ked o Jehova ka cidel sa o lošnipe kola isi amen sebepi amari nesavršenost hem o greh. Ked ka avel odova vreme, o Jehova ka saćari svako amari rana (Ps. 72:12-14; Otkr. 21:3, 4). Sa odova so hine angleder ni ki godi na ka avel amenđe. Đi ađićeraja te avel odova vreme, o Jehova već akana sikavi amen te oprostina sar oleste.