1. Ndi cinyindiro cipi cinapereka Yahova kuna anyakudawa angatcunyuka?

 YAHOVA ndi Nciti wathu, Nyakukhazikisa Mitemo na Ntongi wathu. Kusiyapo pyenepi, iye ndi Babathu waufuni. (Masal. 100:3; Iza. 33:22) Natenepa ife tingan’dawira mbatitcunyuka na ntima onsene, iye anatilekerera. (Masal. 86:5) Kubulukira kuna mprofeta Izaiya Yahova atipasa cinyindiro ici: ‘Maseze madawo anu akhale akufuira, iwo anadzacena kakamwe ninga matalala.’—Iza. 1:18.

2. Tisafunika kucitanji toera tikhale akubverana na anango?

² Nakuti ndife akusowa ungwiro, midzidzi inango ife tisalonga peno kucita pinthu pyakuti pisatsukwalisa anango. (Tiya. 3:2) Mbwenye pyenepi nkhabe bveka kuti ife nee tinakwanisa kukhala akubverana na anango. Ife tinakwanisa kubverana na anango tingakhala akulekerera. (Mis. 17:9; 19:11; Mat. 18:21, 22) Tingatsukwalisana na anango mu pinthu ping’ono, Yahova asafuna kuti tilekererane. (Akol. 3:13) Ife tisafunika kucita pyenepi thangwi Yahova asatilekerera na ‘ntima onsene.’—Iza. 55:7.

3. Ndi mibvundzo ipi inafuna ife kutawira mu nsolo uno?

³ Mu nsolo uno, ife tinapfundza kuti maseze ndife akusowa ungwiro, tinakwanisa kutowezera kulekerera kwa Yahova. Pontho tinatawira mibvundzo iyi: Ndi madawo api akuti tisafunika kualekerera, pontho ndi madawo api akuti tisafunika kualonga kuna akulu a mpingo? Thangwi yanji Yahova asafuna kuti tilekerere anango? Tinapfundzanji na pitsandzo pya abale na alongo akuti athabuka kakamwe na madawo a anango?

4. (a) Nkristu angacita madawo makulu, asafunika kucitanji? (b) Ndi basa ipi iri na akulu a mpingo mu ndzidzi unacedza iwo na munthu adacita madawo makulu?

⁴ Nkristu angacita madawo makulu ife tisafunika kulonga kuna akulu a mpingo. Anango mwa madawo anewa makulu asagumanika pa lemba ya 1 Akorinto 6:9, 10. Munthu anacita madawo makulu ali kupwaza kakamwe mitemo ya Mulungu. Natenepa Nkristu angacita madawo makulu, iye asafunika kucita phembero kuna Yahova, pontho asafunika kuenda kalonga madawo anewa kuna akulu a mpingo. (Masal. 32:5; Tiya. 5:14) Mphapo ndi basa ipi iri na akulu a mpingo? Basi ene Yahova ndiye ali na ufulu wakulekerera nyakudawa. Pontho iye asacita pyenepi mukuphatisira ntsembe ya ciomboli. * Mbwenye Yahova apasa akulu a mpingo basa yakuona khala mwakubverana na Malemba, nyakudawa athema kupitiriza mu mpingo peno nkhabe. (1 Akor. 5:12) Toera akwanise kucita pyenepi, cibodzi mwa pinthu pinacita iwo ndi kuyesera kugumana mitawiro ya mibvundzo iyi: Kodi iye acita madawo anewa mwakufuna? Kodi iye acita madawo anewa mwakubwereza-bwereza? Kusiyapo pyenepi, pana umboni unapangiza kuti iye atcunyuka na ntima onsene? Pontho pana umboni unapangiza kuti Yahova amulekerera?—Mabasa 3:19.

5. Basa inacita akulu a mpingo isaphedza tani mpingo na munthu adacita madawo?

⁵ Akulu a mpingo angacedza na munthu adacita madawo toera kutsalakana nseru wace, cifuno cawo ndi kucita cisankhulo cibodzi cene cidamala kale kucitwa kudzulu. (Mat. 18:18) Kodi masasanyiro anewa asaphedza tani mpingo? Iwo asatsidzikiza mpingo toera nyakudawa wakukhonda tcunyuka akhonde kupitiriza mu mpingo mbagwegwedusa atumiki anango a Yahova. (1 Akor. 5:6, 7, 11-13; Tito 3:10, 11) Masasanyiro anewa asaphedzambo nyakudawa toera atcunyuke mbalekererwa na Yahova. (Luka 5:32) Akulu a mpingo asacita phembero kuna Yahova toera aphedze nyakudawa kuti akhale pontho na uxamwali wakuwanga na iye.—Tiya. 5:15.

6. Khala munthu abuluswa mu mpingo, kodi Yahova anamulekerera? Fokotozani.

⁶ Khala munthu anatsalakanwa nseru wace na akulu a mpingo nee atcunyuka, iye asafunika kubuluswa mu mpingo. Khala acita pinthu pyakuti nee pisabverana na mitemo ya dziko inakhala iye, akulu a mpingo nee anabisa pinthu pyakuipa pidacita iye. Yahova asatawirisa kuti mautongi atcunyuse munthu anakhonda bvera mitemo yawo, mwakukhonda tsalakana khala munthu unoyu atcunyuka peno nkhabe. (Aroma 13:4) Ngakhale tenepo, munthu unoyu angatcunyuka na ntima onsene mbasiya kucita pinthu pyakuipa, Yahova anamulekerera. (Luka 15:17-24) Yahova anakwanisa kucita pyenepi, ngakhale kuti madawo akhadacita munthu unoyu ndi makulu kakamwe.—2 Pya dziko. 33:9, 12, 13; 1 Tim. 1:15.

7. Pisabvekanji kulekerera munthu adatidawira?

⁷ Ife tisapereka takhuta kakamwe thangwi yakudziwa kuti nee tiri na basa yakucita cisankhulo khala Yahova analekerera nyakudawa peno nkhabe. Ngakhale tenepo, pana cisankhulo cakuti tisafunika kucicita. Ndi cisankhulo cipi ceneci? Midzidzi inango munthu anatidawira mbaphemba kulekererwa, mbwenye midzidzi inango panango iye nee anaphemba kulekererwa. Ngakhale tenepo, ife tinakwanisa kucita cisankhulo cakumulekerera mbatiwangisira toera tikhonde kukoya pinthu muntima peno kuipirwa na  iye. Mwandimomwene, pyenepi pisaphemba kuwangisira kakamwe, makamaka khala munthu unoyu aticitira pinthu pyakuipa kakamwe. A Sentinela ya 15 de Setembro de 1994 yalonga: “Mungalekerera munthu adakudawirani, pyenepi nee pisabveka kuti mukutawirisa kuti iye apitirize kucita pinthu pyakuipa pidacita iye. Nkristu analekerera andzace asanyindira kuti Yahova anatonga nseru wace mwaulungami. Iye ndi Ntongi wakulungama kakamwe kupiringana onsene, pontho iye anadzatonga mwakulungama pa ndzidzi wakuthema.” Thangwi yanji Yahova asatikulumiza toera tilekerere anango mbatisiya pyonsene m’manja mwace?

8. Tingalekerera anango tisapangiza tani kuti tisapereka takhuta thangwi ya ntsisi za Yahova?

⁸ Tingalekerera anango tisapangiza kuti tisapereka takhuta thangwi ya ntsisi za Yahova. Mu nsangani unango, Yezu alandanisa Yahova na mbuya wakuti alekerera mangawa a nyabasa wace m’bodzi wakuti nee akwanisa kualipa. Mbwenye nyabasa unoyu nee alekererambo nyabasa wakuti anfiyari kobiri yakucepa kakamwe. (Mat. 18:23-35) Kodi Yezu asatipfundzisanji na nsangani unoyu? Khala ife tisaperekadi takhuta thangwi ya njira inatibvera ntsisi Yahova, pyenepi pinatikulumiza toera kulekerera anango. (Masal. 103:9) Revista inango ya A Sentinela yalonga tenepa: “Mwakukhonda tsalakana khala tisalekerera kazinji kene anango, ife nee tinakwanisa kulekerera anango ninga munjira idatilekerera Mulungu mukuphatisira ntsembe ya Kristu.”

9. Mbani anabverwa ntsisi na Yahova? (Mateu 6:14, 15)

⁹ Ife tingalekerera anango Yahova anatilekererambo. Yahova asabvera ntsisi kakamwe ale anabvera ntsisi andzawo. (Mat. 5:7; Tiya. 2:13) Yezu apangiza pyenepi mu ndzidzi udapfundzisa iye anyakupfundzace kucita phembero. (Lerini Mateu 6:14, 15.) Ife tinakwanisa kupfundza pibodzi pyene na mafala adalonga Yahova kuna ntumiki wace Yobe. Ntumiki unoyu wakukhulupirika atsukwaliswa kakamwe na mafala adalonga amuna atatu akhacemerwa Elifaji, Bhildhadhe na Zofari. Mbwenye Yahova apanga Yobe toera acite phembero thangwi ya iwo. Pidamala iye kucita phembero, Yahova ampasa nkhombo.—Yobe 42:8-10.

10. Thangwi yanji nee tisafunika kukhala akuipirwa? (Aefesi 4:31, 32)

¹⁰ Kuipirwa kunatibweresera nyatwa. Kuipirwa kwakhala ninga ntolo wakulemera kakamwe, pontho Yahova asafuna kuti tisiye ntolo unoyu mbatikhala akutsandzaya. (Lerini Aefesi 4:31, 32.) Iye asatipanga toera ‘tikhonde kuipirwa, pontho toera tikhonde kukhala aukali.’ (Masal. 37:8) Kubvera uphungu unoyu kunatiphedza kakamwe. Thangwi kukhala akuipirwa kunaphekesa ungumi wathu na manyerezero athu. (Mis. 14:30) Pontho tingakhala akuipirwa ife nee tisathabusa munthu adatitsukwalisa, thangwi munthu anamwa venenu anathabuka ndiye, tayu munthu adantsukwalisa. Natenepa, tingalekerera anango, anaphedzeka ndife. (Mis. 11:17) Ife tisakhala na ntendere wa m’manyerezero, pontho tinakwanisa kupitiriza kutumikira Yahova mwakutsandzaya.

11. Bhibhlya isalonganji thangwi yakubwezera pyakuipa? (Aroma 12:19-21)

¹¹ Kubwezera ndi kwa Yahova. Yahova nee asatitawirisa kubwezera pyakuipa kuna ale anaticitira pyakuipa. (Lerini Aroma 12:19-21.) Thangwi yakusowa kwathu ungwiro, ife nee tinakwanisa kutonga pinthu mwadidi ninga pinacita Mulungu. (Aheb. 4:13) Pontho midzidzi inango, mabvero athu asatipingiza  kucita pisankhulo pyadidi. Tiyago alemba: “Ukali wa munthu nkhabe kubweresa ulungami wa Mulungu.” (Tiya. 1:20) Ife tinakwanisa kukhala na cinyindiro cakuti Yahova anacita pinthu pyadidi, mbatonga mwaulungami pa ndzidzi wakuthema.

12. Tinapangiza tani kuti tisanyindira ulungami wa Yahova?

¹² Tingalekerera anango tisapangiza kuti tisanyindira ulungami wa Yahova. Ife tingasiya m’manja mwa Yahova pinthu pinatitsukwalisa, tisapangiza kuti tisanyindira kuti Yahova anadzamalisa nyatwa zonsene zinaoneka thangwi ya madawo. Mu dziko ipswa pinthu pinatitsukwalisa lero ‘nee pinadzakumbukirwabve.’ (Iza. 65:17) Mphapo khala ife tatsukwaliswa kakamwe, mphyakukwanisikadi kukhonda kuipirwa mbatikhonda kukoya mathangwi muntima? Tendeni tione pitsandzo pingasi pinapangiza kuti anango akwanisa tani kucita pyenepi.

13-14. Mwapfundzanji na citsandzo ca Tony na José?

¹³ Abale na alongo azinji asankhula kulekerera anango, maseze acitirwa pinthu pyakuipa kakamwe. Kodi ndi nkhombo zipi zidakhala na iwo thangwi yakucita pyenepi?

¹⁴ Tony * anakhala ku Filipina, mbadzati kukhala Mboni wa Yahova adzindikira kuti m’bale wace wankulu aphiwa na mamuna unango anacemerwa José. Mu ndzidzi unoyu, Tony akhali na makhaliro auphanga kakamwe, pontho akhafuna kubwezera pyakuipa pidacitirwa iye. Mbwenye José akhadafungirwa nkaidi thangwi ya munthu adapha iye. Mukupita kwa ndzidzi, pidabuluswa José nkaidi, Tony akhadapikira kuti anansaka toera kumupha. Natenepa, iye agula mpfuti toera kucita pyenepi. Mu ndzidzi unoyu, Tony atoma kupfundza Bhibhlya na Mboni za Yahova. Iye alonga: “Mu ndzidzi ukhapfundza ine, ndadzindikira kuti ndikhafunika kucinja makhaliro anga, pontho nee ndikhafunika kukhala wakuipirwa.” Mukupita kwa ndzidzi Tony abatizwa mbakhazikiswa ninga nkulu wa mpingo. Iye adzumatirwa kakamwe pidadziwa iye kuti José abatizwambo ninga Mboni wa Yahova. Pidaonana iwo, akhumbatirana mwakutsandzaya, pontho Tony apanga José kuti amulekerera. Tony alonga kuti  pidalekerera iye José akhala wakutsandzaya kakamwe, pontho pikhali pyakunentsa toera kulonga mabvero a kutsandzaya kukhali na iye. Mwandimomwene, Yahova apasa nkhombo Tony thangwi yakulekerera José.

15-16. Mwapfundzanji na citsandzo ca m’bale Peter na mulongo Sue thangwi yakulekerera?

¹⁵ Mu caka ca 1985 Peter na Sue akhali pa misonkhano n’Nyumba ya Umambo, pontho mu ndzidzi unoyu, mamuna unango akhadaikha bhomba n’Nyumba ya Umambo. Sue aphekeka kakamwe, pontho mpaka cincino asanentseka toera kuona mwadidi na kubva. Kusiyapo pyenepi, iye nee asakwanisabve kubva khwema. * Kazinji kene, Peter na Sue akhabvundzika: ‘Ndi munthu wa ntundu wanji adacita pinthu pyakuipa tenepa?’ Mukupita kwa pyaka, munthu unoyu adaikha bhomba n’Nyumba ya Umambo, wakuti nee akhali Mboni wa Yahova, aphatwa mbafungirwa nkaidi toera akhale mwenemo mu umaso wace onsene. Pidabvundzwa iwo khala alekerera mamuna unoyu, Peter na Sue atawira: “Yahova asatipfundzisa toera tikhonde kuipirwa na kukoya mathangwi muntima. Thangwi pyenepi pinaphekesa ungumi wathu na manyerezero athu. Natenepa, pakumala kucitika pyenepi taphemba Yahova toera atiphedze kuti tikhonde kuipirwa, mbatikhala na ntendere.”

¹⁶ Kodi pikhali pyakukhonda nentsa kuna iwo kulekerera mamuna unoyu adaikha bhomba n’Nyumba ya Umambo? Nkhabe. Iwo athimiza: “Midzidzi inango, Sue angabva kupha kakamwe thangwi ya cidengwa ceneci ife tisakhala akuipirwa, mbwenye ife nee tisapitiriza kunyerezera pyenepi. Natenepa mabvero anewa asamala mwakucimbiza. Mwandimomwene, ife tinakwanisa kulonga kuti mamuna unoyu angakhala m’bale wathu, ife tinantambira mwakutsandzaya. Pinthu pyenepi pyatipfundzisa kuti kubvera pitsogolero pya Bhibhlya kusatiphedza toera tikhale akusudzuka. Kusiyapo pyenepi, ife tisabalangazwa thangwi ya kudziwa kuti mwakukhonda  dembuka, Yahova anadzamalisa nyatwa zonsene.”

17. Mwapfundzanji na citsandzo ca mulongo Myra thangwi yakulekerera?

¹⁷ Myra atoma kupfundza Bhibhlya pikhali iye na mamunace, pabodzi na anawo awiri ang’ono. Mbwenye mamunace nee atawirambo kupfundza Bhibhlya. Mukupita kwa ndzidzi, iye acita upombo mbasiya banja yace. Myra alonga: “Pidabuluka mamunanga mbandisiya pabodzi na ananga, ine ndakhala na mabvero akuti anthu azinji anasiyiwa na ndzawo wa m’banja asakhala nawo, ninga kutsukwala, kutsumbikika, kupasika mulando na kuipirwa.” Maseze banja yace yamala, iye apitiriza kutsukwala thangwi ya kusiyiwa na mamunace. Myra athimiza: “Ine ndapitiriza kukhala wakudzudzumika na wakuipirwa miyezi mizinji, pontho ndadzindikira kuti mabvero anewa akhakhuya uxamwali wanga na Yahova na anthu anango.” Myra alonga kuti cincino nee asakhalabve wakuipirwa, pontho nee asafuna kuti cinthu cakuipa cicitike kuna mamunace. Kusiyapo pyenepi, iye ali na cidikhiro cakuti na ntsiku yace, mamunace anatumikirambo Yahova. Myra asaikha manyerezero ace ku pinthu pya ntsogolo. Pontho iye akwanisa kupfundzisa anace toera akhale atumiki a Yahova. Lero, Myra ali wakutsandzaya kakamwe thangwi yakutumikira Yahova na anace akuti ali na mabanjawo.

18. Kodi Yahova anacitanji ninga Ntongi Wankulu Kakamwe?

¹⁸ Pisatitsandzayisa kakamwe kudziwa kuti nee ndife anasankhula njira inafunika kutongwa munthu. Ninga Ntongi Wankulu Kakamwe, Yahova ndiye adathema kucita pyenepi. (Aroma 14:10-12) Ife tinakwanisa kukhala na cinyindiro cakuti ndzidzi onsene, iye anatonga mwakulungama, mwakubverana na njira yace yakusiyanisa pyadidi na pyakuipa. (Gen. 18:25; 1 Ama. 8:32) Iye cipo anacita pinthu mwakusowa ulungami.

19. Ninji pinafuna kucita Yahova wakuti ndi Ntongi Wakulungama?

¹⁹ Ife tisadikhira ndzidzi wakuti Yahova anadzamalisa nyatwa zonsene zinaoneka thangwi ya madawo a anthu. Pa ndzidzi unoyu, mautenda na pinthu pyonsene pyakuipa pinatitsukwalisa pinadzamaliswa. (Masal. 72:12-14; Apok. 21:3, 4) Ife nee tinadzakumbukabve pinthu pyenepi. Mu ndzidzi unadikhira ife pinthu pyenepi pyakutsandzayisa, ife tisapereka takhuta kakamwe kuna Yahova thangwi yakutipasa luso ya kuntowezera mbatikhalambo akulekerera ninga iye.