1. Zendo wa la Jéhovah amû na azo so asara siokpari na achangé bê ti ala?

 ATÂA so Jéhovah la acréé e, lo lu andia na e nga lo yeke Juge ti e, lo yeke nga Babâ ti e ti yayu so aye e mingi (Ps. 100:3; És. 33:22). Tongana e sara siokpari na terê ti lo na e changé bê ti e biani, lo yeke na ngangu nga na nzara ti pardonné e (Ps. 86:5). Na lege ti prophète Ésaïe, Jéhovah atene na e pendere tënë ti dengo bê so: “Même tongana siokpari ti ala ni abe tongana mênë, a yeke vuru tongana neige.”—És. 1:18.

2. Tongana e ye ti duti na siriri na amba ti e, nyen la e doit ti sara?

² So e yeke mbilimbili-kue ape, e kue e yeke tene mbeni tënë nga e yeke sara aye so ason amba ti e (Jacq. 3:2). Me so aye ti tene ape so e lingbi ape ti duti na kpengba songo na ala. E peut ti duti na kpengba songo na ala tongana e manda ti pardonné zo (aProv. 17:9; 19:11; Mat. 18:21, 22). Tongana e son bê ti mba na yâ ti akete kete ye, Jéhovah aye ti tene e pardonné mba (aCol. 3:13). E yeke na nzoni raison ti sara ni, ndali ti so Jéhovah ayeke pardonné e “kue kue kue.”—És. 55:7.

3. Nyen la e yeke bâ na yâ ti article so?

³ Na yâ ti article so, e yeke bâ tongana nyen la azo so ayeke mbilimbili-kue ape apeut ti mû tapande ti Jéhovah ti pardonné azo. Asiokpari wa la e doit ti sara tënë ni na a-ancien?  Ngbanga ti nyen la Jéhovah awa e ti pardonné azo? Nyen la e peut ti manda na lege ti ambeni ita so abâ pasi mingi ndali ti asiokpari ti amba ti ala?

4. (a) Tongana mbeni wakua ti Jéhovah asara kota siokpari, nyen la lo doit ti sara? (b) Nyen la a-ancien ayeke sara na ngoi so ala wara terê na mbeni zo so asara siokpari?

⁴ Tongana mbeni ita asara mbeni kota siokpari, a yeke nzoni e sara tënë ni na a-ancien. Tapande ti akota siokpari ni so ayeke na 1 aCorinthien 6:9, 10. Tongana zo asara ye ague tâ nde mingi na ndia ti Nzapa, andâ kota siokpari la lo sara. Tongana mbeni Chrétien asara mara ti siokpari so, lo doit ti sambela Jéhovah Nzapa ti hunda pardon, lo doit nga ti sara tënë ni na a-ancien (Ps. 32:5; Jacq. 5:14). Nyen la a-ancien ayeke sara? Gï Jéhovah oko la ayeke na ngangu ti pardonné asiokpari ti e biani biani, nga lo yeke sara ni grâce na ye so a futa ti zi azo. * Me Jéhovah amû na a-ancien kua ti tene ala bâ na lege ti Bible wala mbeni zo so asara siokpari apeut ti ngbâ na yâ ti congrégation (1 aCor. 5:12). Ti bâ wala zo ni apeut ti ngbâ, mbeni ye so ala yeke sara ayeke ti wara kiringo tënë na ahunda so: Eskê zo ni asara siokpari ni na mbana? Eskê lo leke ti sara ni kozo? Eskê lo sara siokpari ni fani mingi teti mbeni ngoi? Kota ye ni, eskê lo fa so lo changé bê ti lo biani? Eskê aye ayeke dä so afa so Jéhovah apardonné lo awe?—Kus. 3:19.

5. Anzoni ye wa la ayeke ga na lege ti kua ti a-ancien?

⁵ Na ngoi so a-ancien awara terê na zo so asara siokpari, ye so ala yeke gi ayeke ti mû oko desizion so a mû na yayu awe (Mat. 18:18). Nzoni ti nyen la congrégation ayeke wara na lege ti ye so a leke so? A yeke bata congrégation na lege so a sara si azo so asara sioni na so achangé bê ti ala ape angbâ na yâ ti congrégation ape ti sara sioni na awakua ti Jéhovah so ayeke ye ti ngangu ngere na lê ti lo (1 aCor. 5:6, 7, 11-13; Tite 3:10, 11). A peut nga ti aidé zo so asara siokpari ti changé bê ti lo si Jéhovah apardonné lo (Luc 5:32). A-ancien ayeke sambela ndali ti zo so achangé bê ti lo nga ala yeke hunda Jéhovah ti aidé lo ti leke songo ti lo na Lo.—Jacq. 5:15.

6. Tongana a bi mbeni zo na gigi ti bungbi, eskê lege ayeke dä ti tene Jéhovah apardonné lo ande? Fa ndani so mo tene tongaso.

⁶ Bâ so mbeni zo achangé bê ti lo ape na ngoi so lo na a-ancien awara terê. Tongana a yeke tongaso, a yeke bi lo na gigi ti bungbi. Tongana lo doro ndia ti kodro, a-ancien ayeke kanga lege ape ti tene lo wara akpale ti peko ti sioni sarango ye ti lo. Jéhovah amû lege na akota zo ti gouvernement ti fâ ngbanga nga ti punir zo kue so adoro andia, atâa zo ni achangé bê ti lo wala pëpe (aRom. 13:4). Me tongana na pekoni, li ti zo ni aga dä na lo changé bê ti lo biani nga lo changé lege ti lo, Jéhovah ayeke pardonné lo (Luc 15:17-24). Jéhovah ayeke pardonné lo même tongana asiokpari so lo sara ayeke lani kota mingi.—2 Chron. 33:9, 12, 13; 1 Tim. 1:15.

7. Na lege wa la e peut ti pardonné mbeni zo so asara siokpari na terê ti e?

⁷ Bê ti e adë ti hinga so a yeke pëpe e la e yeke mû desizion ti tene Jéhovah apardonné mbeni zo wala pëpe. Me mbeni ye ayeke dä so e doit ti mû desizion ti sara ni. Ye ni so ayeke nyen? Na yâ ti ambeni ye, mbeni zo apeut ti sara kota siokpari na terê ti e, na pekoni  lo yeda so lo sara faute, na lo hunda na e ti pardonné lo. Na yâ ti ambeni ye nde, peut-être zo ni asara ni ape. Atâa so kue, e peut ti soro ti pardonné zo ni nga ti gi ti sara ngonzo na terê ti lo ape. Ti vrai ni, a peut ti mû ngoi nga a hunda ti sara effort, mbilimbili tongana zo ni ason bê ti e mingi. Tour ti Ba Ndo ti lango 15 ti septembre 1994 atene: “Tongana mo pardonné mbeni zo so asara siokpari na terê ti mo, a ye ti tene ape so mo kanga lê na ndö ti sioni so lo sara. Mbeni Chrétien so apardonné zo ayeke na confiance so Jéhovah ayeke fâ ngbanga na ndö ti tënë ni mbilimbili. Na yâ ti dunia kue, lo la lo yeke Juge so ayeke mbilimbili, nga lo yeke bâ ande si a fâ ngbanga ti e mbilimbili na tâ ngoi ni.” Ngbanga ti nyen la Jéhovah awa e ti pardonné zo nga ti duti na confiance so lo yeke fâ ngbanga mbilimbili?

8. Tongana nyen la ti pardonné zo afa so e kiri singila na Jéhovah ndali ti nzoni bê ti lo?

⁸ Tongana e pardonné zo, e fa so e kiri singila na Jéhovah ndali ti nzoni bê ti lo. Na yâ ti mbeni toli ti Jésus, lo haka Jéhovah na wa ti angbâa so azi kota bon na li ti mbeni ngbâa ti lo ndali ti so lo peut ti futa ni ape. Me ngbâa so ake ti sara nzoni bê na mbeni mba ti lo ngbâa, so ayeke na bon ti lo so akono ape (Mat. 18:23-35). Nyen la Jésus aye ti fa na e? Tongana e bâ na nene ni biani kota nzoni bê ti Jéhovah na mbage ti e, a yeke pusu e ti pardonné amba ti e (Ps. 103:9). A sara ngu mingi awe, Tour ti Ba Ndo atene tënë so: “Atâa fani oke la e pardonné amba ti e, a yeke lingbi ape na pardon ti Jéhovah nga na nzoni bê so lo fa na mbage ti e na lege ti Christ.”

9. Azo wa la Jéhovah ayeke sara nzoni bê na ala? (Matthieu 6:14, 15).

⁹ A yeke pardonné azo so apardonné amba ti ala. Jéhovah ayeke sara nzoni bê na azo so asara nzoni bê na azo (Mat. 5:7; Jacq. 2:13). Jésus afa ni polele na ngoi so lo fa na adisciple ti lo lege ti sambela. (Diko Matthieu 6:14, 15.) E manda oko ye so na lege ti atënë so Jéhovah atene na wakua ti lo Job. Atënë so Éliphaz, Bildad na Zophar atene na nzoni bê pëpe ason lani bê ti koli be-ta-zo so mingi. Jéhovah atene na Job ti sambela ndali ti ala. Na peko ti so Job asara ni, Jéhovah asara tufa na ndö ti lo.—Job 42:8-10.

10. Ngbanga ti nyen la ti bata zo na bê ayeke sara sioni na e? (aÉphésien 4:31, 32).

¹⁰ Ti bata zo na bê ayeke sara sioni na e. Ngonzo ayeke tongana mbeni ye so ane, na Jéhovah aye ti tene e zia lege ni si e duti na siriri. (Diko aÉphésien 4:31, 32.) Lo wa e ti ‘zia lege ti ngonzo nga ti zia si ngonzo ahon ndö ti e pëpe’. (Ps. 37:8). A yeke lege ti ndara ti sara ye alingbi na wango so. Ti bata zo na bê apeut ti sara sioni na seni ti e (aProv. 14:30). Tongana e ngbâ ti sara ngonzo na terê ti mbeni zo, a yeke sara sioni na lo ape, gï tongana ti so tongana e nyon poison, a yeke sara sioni na lo ape. Me tongana e pardonné azo, e yeke sara nzoni na e wani (aProv. 11:17). E yeke wara siriri ti bê nga e yeke wara lege ti gue na li ni na yâ ti kua ti Jéhovah.

11. Nyen la Bible atene na ndö ti kiringo na zo peko ti sioni so lo sara? (aRomain 12:19-21).

¹¹ Jéhovah la ayeke kiri na zo peko ti sioni so lo sara. Jéhovah amû lege na e pëpe ti punir mbeni zo so asara siokpari na terê ti e. (Diko aRomain 12:19-21.) So e yeke mbilimbili-kue ape nga e hinga ye kue na ndö ti mbeni tënë ape, e peut pëpe ti fâ  ngbanga na lege ni, tongana ti Nzapa (aHéb. 4:13). Nga na ambeni ngoi, atënë ti bê ti e apeut ti handa e na asara si a yeke ngangu na e ti hinga nzoni ye ti sara. Na gbe ti yingo ti Jéhovah, Jacques asû tënë so na mbeti: “Ngonzo ti zo ayeke sara pëpe si mbilimbili ti Nzapa aga.” (Jacq. 1:20). E peut ti duti sûr so Jéhovah ayeke sara ye na lege ni nga lo yeke bâ si na nda ni a fâ ngbanga tâ na lege ni.

12. Tongana nyen la e peut ti fa so e yeke na confiance so Jéhovah ayeke fâ ngbanga mbilimbili?

¹² Ti pardonné zo afa so e yeke na confiance so Jéhovah ayeke fâ ngbanga mbilimbili. Tongana e yeke na confiance so Jéhovah ayeke fâ ngbanga lakue na lege ni, e fa so e yeke na confiance so Jéhovah ayeke zi asioni ye kue so siokpari aga na ni. Na yâ ti fini dunia ti lo so lo mû zendo ni, ‘azo ayeke dabe ti ala encore ape’ na aye so azia kä na bê ti ala, ‘nga ala yeke bi bê ti ala na ni encore pëpe.’ (És. 65:17). Me tongana mbeni zo ason bê ti e ngangu, eskê e peut biani ti ngbâ ti sara ngonzo ape nga ti ke ti bata zo ni na bê? Bâ tongana nyen la ambeni ita awara lege ti sara ni.

13-14. Nyen la ye so asi na Tony na José afa na mo na ndö ti pardonengo zo?

¹³ Aita ti e mingi amû desizion ti pardonné amba ti ala même tongana asarango ye ti amba ti ala ni ason bê ti ala ngangu. So ala sara tongaso so, anzoni ye wa la ala wara?

¹⁴ Ngoi mingi kozo si Tony, * so ayeke na Philippines, ahinga tâ tënë, lo hinga so José la afâ mbeni yaya ti lo ti koli. Na ngoi ni so, Tony ayeke sara lani ye ti ngangu mingi na zo, nga lo ye ti kiri na José peko ti sioni so lo sara. A gbu lani José a kanga lo ndali ti sioni so lo sara. Ambeni ngoi na pekoni, na ngoi so a zi José, Tony aleke na bê ti lo ti gi lo na ti fâ lo. Lo vo mbeni ngombe ti fâ na lo. Na ngoi ni so, aTémoin ti Jéhovah akomanse ti manda Bible na Tony. Tony atene: “Na lege ti étude ti mbi, mbi manda so mbi doit ti changé asarango ye ti mbi, na tapande mbi doit ti zia lege ti ngonzo.” Ambeni ngoi na pekoni, Tony awara batême, na lo ga ancien. Imaginé tongana nyen la li ti lo akpe na ngoi so lo hinga so José nga kue aga wakua ti  Jéhovah so awara batême. Na ngoi so ala wara terê, ala gbu mba na kate, na Tony atene na José so lo pardonné lo awe. Tony atene so, so lo pardonné lo asara si lo yeke na ngia mingi na lo hinga même ape tongana nyen ti fa ni. Jéhovah asara tufa na ndö ti Tony so ayeda na bê ti lo ti pardonné zo.

15-16. Nyen la ye so asi na Peter na Sue afa na mo na ndö ti pardonengo zo?

¹⁵ Na ngu 1985, Peter na Sue ague lani na mbeni bungbi na Da ti Royaume, na hio tongaso, mbeni ye asungba. Mbeni koli azia bombe na yâ ti Da ti Royaume. Sue awara angangu kä so asara si lo wara kpale ti bango ndo nga na ti mango ndo. Lo yeke mä nga fion ti ye ape. * Peter na Sue ayeke hunda ka terê ti ala: ‘Zo wa la asara mara ti sioni ye tongaso?’ Angu mingi na pekoni, a gbu zo so azia bombe ni, so ayeke wakua ti Jéhovah ape, na a kanga lo na kanga ti kpu na kpu. Tongana a hunda Peter na Sue wala ala pardonné koli ni, ala tene: “Jéhovah afa na e so tongana e bata ngonzo na bê ti e, a peut ti sara sioni na e. Tongaso, tâ gï na peko ti ye so asi, e hunda lani na Jéhovah ti mû maboko na e ti bata ngonzo na bê ti e ape tongaso si e peut ti duti na siriri.”

¹⁶ Eskê a yeke lani ngangu na ala ape ti pardonné koli ni? Ên-ën. Ala tene: “Na ambeni ngoi, tongana Sue abâ pasi ti peko ti akä so lo wara lani, bê ti e ayeke son. Me e ngbâ gï ti pensé na ndö ni ape, tongaso ngonzo ni adë hio. Ti vrai ni, e peut ti tene na bê ti e kue so mbeni la, tongana koli so azia bombe so aga ita ti e, e yeke yamba lo. Ye so asi so afa so amama-ndia ti Bible ayeke zi zo biani. A zi e na alege mingi so e peut ti imaginé ape. Bê ti e adë nga ti hinga so fafadeso Jéhovah ayeke zi akpale kue so e wara na peko ti ye so.”

17. Nyen la ye so asi na Myra afa na mo na ndö ti pardonengo zo?

¹⁷ Myra amanda lani tâ tënë na ngoi so lo sara mariage awe nga lo yeke na akete molenge use. Koli ti lo ayeda lani na tâ tënë ape.  Ambeni ngoi na pekoni, lo gi mbeni wali nde na lo dö sewa ni lo zia. Myra atene: “Na ngoi so koli ti mbi adö mbi na amolenge ti e use azia, mbi hinga ye so asi na azo mingi so mbeni zo so ala ye lo akä ala, aye tongana songo bê, vundu, bingo tënë na li ti zo wani nga na ngonzo.” Atâa so yâ ti mariage ni afâ, vundu angbâ ti sara lo ndali ti so lo bâ so koli ti lo akä lo. Myra akiri atene: “Mbi ngbâ ti sara vundu nga ngonzo asara mbi teti ambeni nze, na mbi ga ti bâ so a yeke buba lani songo ti mbi na Jéhovah nga na ambeni zo.” Fadeso, Myra atene so ngonzo asara lo encore ape na terê ti ngbene koli ti lo, na lo ye ape ti tene sioni asi na lo. Lo yeke na beku so mbeni lâ lo yeke ga ande nduru na Jéhovah. Lê ti Myra ayeke na ndö ti gigi ti kekereke. Lo bata amolenge ti lo gï lo oko nga lo fa na ala ti sara na Jéhovah. Laso, Myra ayeke na ngia ti sara na Jéhovah legeoko na amolenge ti lo nga na asewa ti ala.

18. Nyen la e peut ti duti sûr so Jéhovah, so ayeke Kota Juge, ayeke sara ande?

¹⁸ Bê ti e adë ti hinga so a yeke pëpe e la e yeke mû desizion na ndö ti fason so a yeke nzoni a fâ ngbanga na ndö ti azo. E peut ti duti sûr so Jéhovah, so ayeke Kota Juge, ayeke bâ lege ti kota kua so (aRom. 14:10-12). E peut ti duti na confiance kue so lo yeke fâ lakue ngbanga ague tâ oko na ye so lo tene ayeke na lege ni nga na ye so ayeke na lege ni ape (Gen. 18:25; 1 aGbia 8:32). Lo yeke sara lâ oko ape ye so ayeke mbilimbili ape.

19. Nyen la Jéhovah ayeke sara ande na lege ti fango ngbanga ti lo so ayeke mbilimbili-kue?

¹⁹ E yeke ku kungo ngoi so Jéhovah ayeke zi ande asioni ye kue ti peko ti dutingo mbilimbili-kue ape nga na siokpari. Na ngoi ni so, akpale ti seni kue nga na akä kue so ayeke na bê ti e ayeke hon biani biani (Ps. 72:12-14; Apoc. 21:3, 4). Zo ayeke dabe ti lo na ni lâ oko encore ape. Na ngoi so e yeke ku pendere ngoi so, e kiri singila mingi na Jéhovah so amû na e ngangu ti mû tapande ti lo ti pardonné zo.