1. Eshikikelo kɛkɔnge Yehova ɔpɛyɛnde ananghi y’evunga wayapɛla?

 KAANGA Yehova oyɛnde Ontongi, ondjidji w’Ɛlɛmbɛ, la Isushi yɛso, nde alekɔ lonkina Papa kɛso kɛ ngandji kel’olongo. (Yee. 100:3; Iza. 33:22) Winá w’onanghelaso mpekanto la woyapɛlaso lá lɛdji lɔ nsɔsɔlɔ, nde apayalaka ngo l’akoka wa ntimeyɛ toko, koko nde nkɔpaka ntimeyɛ. (Yee. 86:5) Má lotshimbo lɔ ɔprɔfɛtɛ Izaya, Yehova apɛyɛka eshikikelo kɛ ngandji kɛnɛ ante: ‘Kaanga mpekanto yɛnyo imboyala nkolankola k’efula, ingoyala mpɛmbɛ ngo ngete nkeka djɛ lowonge.’​—Iza. 1:18.

2. Ntsha iso nkɔpaka ndjala vu l’anto ankina, kɛkɔnge k’oyɛso ladjɛ nanghaka?

² Ladjikɛnde tolekɔ ase ntshamba djɛ djɔ, isankfumɔ ntepelaka kana nanghaka akambo wakiyanyɛ anto ankina. (Dja. 3:2) Koko, nkambo djɛsɔ mpasakisola ante topakoke ndjala la djokanelo djɛ wɔlɔ lawɔ. Iso nkoka ndjala la djokanelo djɛ nghɔsɔ lawɔ ntsha iso ndjeka djɛ nyimeyɛka. (Woo. 17:9; 19:11; Mat. 18:21, 22) Ntsha onto ɔmɔtshi ambotepela kana ambonangha nkambo mɔtshi djɛ daambi djémbotokiyanyɛ, Yehova ntɔlɔmbaka dj’iso nyimeyɛ. (Kɔl. 3:13) Tolekɔ la donga djɛ wɔlɔ djɛ nangha nkambo djɛsɔ. Koko nkambo deka nde, Yehova ntimeyɛka iso ‘l’oloko ɔmɔ.’​—Iza. 55:7.

3. Kɛkɔnge kɛ songoshishima lá djamba djɛnɛ?

³ Lá djamba djɛnɛ, tongoshishima wopo w’anto wa ntshamba djɛ djɔ okokawɔ ndjokola Yehova djɛ nyimeyɛ anto ankina. Evunga  wɛkɔnge w’okokaso nshimela tokokolo? Lamo Yehova otokembɛnde djɛ nyimeyɛ anto ankina? Ko olakanyelo wɔkɔnge w’okokaso mba me winaso Akristo amɔtshi wɛnisá ndjolo efula má evunga w’anto ankina?

4. a) Ntsha onkambi wɔ Yehova ambonangha mpekanto k’ekekete, kɛkɔnge koyɛnde ladjɛ nangha? b) Odjito wɔkɔnge wolekɔ́ la tokokolo winá w’osawolawɔ l’onanghi wɔ mpekanto?

⁴ Ntsha onto ɔmɔtshi ambonangha ovunga w’ekekete iso ladjɛ nshimela tokokolo. Ndjɔmbɔmba yɛ evunga wɛ nghɔsɔ yetanema lá 1 Kɔrɛtɔ 6:9, 10. Mpekanto yɛ nkekete alekɔ opendwelo w’ɛlɛmbɛ wɛ Ndjambe lá lɛdji lɔ nyɛtshi efula. Ntsha Okristo ambonangha mpekanto kɛ nghɔsɔ, nde ladjɛ nshimela Yehova Ndjambe lá lɔlɔmbɔ, edjinge nde ladjɛ ntshɔ ntoshimela tokokolo tel’otshumano. (Yee. 32:5; Dja. 5:14) Odjito wɔkɔnge wolekɔ́ la tokokolo? Ngo Yehova toko ndeke lolekɔ la lowandji lɔ nyimeyɛ evunga wɛ nkekete, edjinge nde nanghaka nkambo djɛsɔ mpeyi l’olambo w’oshinga wɔ mbendo. * Koko, Yehova apɛyɛka tokokolo odjito wɔ ndɔsa nkano lá nkilika Afunelo djɛ kana onanghi w’ovunga nkoka ntshikala l’otshumano kana lako. (1 Kɔ. 5:12) Djɛ nkotshɛ okoma wɔsɔ, nkambo nkina dj’onanghakawɔ nde mba nsakiso lá weepó wɛnɛ: Iyayalende mpekanto kɛ l’ɛkɔpa? Onto wɔkɔ ahonaka djɛ ndjisa mpekanto kɛnde? Onto wɔkɔ ambonanghá ovunga wɔkɔ mbala la mbala l’ilá k’etsho efula? Weepó weleka djonyi wekinɛ, tolembetelo tolekɔ tɛnyɛ ente nde amboyapɛla lá lɛdji lɔ nsɔsɔlɔ? Tolembetelo tolekɔ tɛnyɛ ente Yehova ambowimeyɛ?​—Ele. 3:19.

5. Wapɔ wɛkɔnge weposaka m’olemo wɔ tokokolo?

⁵ Winá wɔ tokokolo osawolawɔ l’onanghi w’ovunga, okoma wɔwɔ nde ndɔsa nkano ngo mɔ djemboshiyɛka ndɔsama l’olongo. (Mat. 18:18) Wopo wɔkɔnge nonghanyi kɛsɔ oyakalakawɔ otshumano wapɔ? Nonghanyi kɛsɔ nkotshɛ́ka djɛ ananghi w’evunga wapayapɛlɛ wakoká nanghela ɛnkɔkɔ wɛ ntshó wɛ Yehova nyɛtshi mposa m’otshumano. (1 Kɔ. 5:6, 7, 11-13; Tit. 3:10, 11) Kekoka nkotshɛ́ lonkina onanghi w’ovunga djɛ nde ndapɛla la mba wapɔ má imeyelo kɛ Yehova. (Luka 5:32) Tokokolo ndɔmbɛlaka onto womboyapɛla edjinge ndɔmbaka Yehova djɛ ndookotshɛ́ djɛ nde nkalɔ ndjala la djokanelo djɛ wɔlɔ nyande.​—Dja. 5:15.

6. Ntsha onto amboposa m’otshumano, Yehova nkoka ndowimeyɛ lonkina? Pakisola.

⁶ Kɔsa djɛ onto apalekɔ la ndapɛla winá wɔ tokokolo osawolawɔ lande. Lá mbamba kɛ nghɔsɔ, nde nkoka mposa m’otshumano. Ntsha nde apendolaka ɔlɛmbɛ wɔ lɛɛta, tokokolo wapangosela má eposelo wɛ nyɛtshi wɛ nanghedji djɛnde. Yehova ndjawolaka djɛ ewandji wɛ lɛɛta ndomboyɛ la mpɛyɛ onto onkfumɔ wombotshita ɔlɛmbɛ dilanyɛ kaanga ntsha nde amboyapɛla kana lako. (Ɔrɔ. 13:4) Koko, ntsha m’ɔkɔngɔ onto wɔkɔ amboosipisoyɛ ante ananghaka nyɛtshi ko amboyapɛla lá lɛdji lɔ nsɔsɔlɔ la ambokadjimola oloko, Yehova ndjalaka entshupa djɛ ndowimeyɛ. (Luka 15:17-24) Nkambo djɛsɔ dekɔ nsɔsɔlɔ kaanga ntsha mpekanto yɛnde yeyalaka nkekete efula.​—2 Ɛk. 33:9, 12, 13; 1 Ti. 1:15.

7. Lá lɛdji lɔkɔnge l’okokaso nyimeyɛ onto wombotonanghela nyɛtshi?

⁷ Ɔsɔ ngo lokembo lowaso má ndjewa ente apalekɔ iso ndeke l’ɔsa nkano djɛ Yehova nyimeyɛ onanghi w’ovunga kana lako! Koko, tolekɔ la nkambo mɔtshi dj’oyɛso ladjɛ ndɔsa nkano. Nkambo djɛkɔnge? Lá mbamba imɔtshi, ntsha onto atonanghelaka ovunga ayale kaanga w’ekekete, koko masɔ nde ambawola ovunga wɔnde ko ambɔtɔlɔmba dj’iso ndowimeyɛ. Lá  mbamba inkina, onto apawolisa ovunga edjinge apatɔlɔmbisa djɛ ndowimeyɛ. Kaanga oyɛwɔ nghɔsɔ, iso nkoka nsɔna djɛ nyimeyɛ onto wɔsɔ má ndɔsa nkano dj’ipa ndowombela onkomba kana nkindjɛ ndowoka nkɛlɛ. Lá nsɔsɔlɔ, kɛsɔ nkoka ndɔmba winá la welo pekapeka ntsha onto wɔkɔ atokiyanyɛka efula. Etange k’Olami Ngɔndɔ kɛ djuwa 15, 1994, ketepelaka ante: “Winá w’imeyɛ onto wombokonanghela nyɛtshi, kɛsɔ kepasakisola ente ombodjipa wiso l’ovunga wɔnde. Le Akristo, nyimeyɛ nsakisolaka ntshika nkambo l’ɛwɔ wɛ Yehova la ndashikikɛ kenkfumɔ ente nde angolomboyɛ akambo lá lɛdji lɔ djɔ. Nde alekɔ Isushi yɛ sii yɛ looko l’otondo edjinge nde anghonangha djɛ ntosembolelá akambo lá winá wɛdje.” Lamo Yehova otokembɛnde djɛ nyimeyɛ la djɛ ntshika akambo l’ɛwɔ wɛnde?

8. Wopo wɔkɔnge nyimeyɛ anto ankina ɛnyɛwɔ djɛ tolekɔ la djedjɛ tá nkɛtshi ketoka Yehova?

⁸ Winá w’imeyɛso anto, iso nyɛnyɛka ente tolekɔ la djedjɛ tá nkɛtshi kɛ Yehova. Lá ndjɔmbɔmba kɛmɔtshi, Yeso ɛdjɛka Yehova la owandji wimeyisá ose olemo wɔnde ɔmɔtshi basa dj’ekekete djɛ ndotayala l’akoka wa mfuta. Koko, ose olemo w’iyimeyɛ wɔsɔ atayalá la nkɛtshi te winande ose olemo woyalisá la basa djɛnde djɛ daambi efula. (Mat. 18:23-35) Yeso ndakɔpɛ ntolakanyɛ nge? Ntsha nsɔsɔlɔ tolekɔ la djedjɛ tá nkɛtshi k’efula kɛ Yehova otokande, tongotshindama djɛ nyimeyɛ anto ankina. (Yee. 103:9 ) Amboheta ɛnɔnyi efula Etange k’Olami kɛmɔtshi ketepelaka nkambo djɛsɔ lá lɛdji lɔnɛ ante: “Ayale mbala imangha yɛsongimeyɛ winaso, nkambo djɛsɔ mpɛlamaki kaanga ndambo daambi la ekekete kɛ imeyelo la kɛ nkɛtshi kɛ Ndjambe otokande má lotshimbo lɔ Kristo.”

9. Te wa na Yehova oyalakande la nkɛtshi? (Mateo 6:14, 15)

⁹ Wanɛ w’imeyɛ anto ankina wangawimeyɛ edjinge iwɔ. Yehova ndjalaka la nkɛtshi te wanɛ w’okana nkɛtshi. (Mat. 5:7; Dja. 2:13) Yeso ɛnyɛka nkambo djɛsɔ papoo winá wɔ ndalakanyɛ ambeki wande wopo wɔ ndɔmbaka. (Wala Mateo 6:14, 15.) Iso mbaka olakanyelo wɔkɔ ɔmɔ má kɛnɛ kɛ Yehova ndashimela onkambi wɔnde Djɔbɔ. Mpame kɛ kɔmano kɛsɔ akiyanaka efula m’etepela wɛ nyɛtshi w’oshimelisa ampeme isato yɛnɛ: Elifazɛ, Bilidadɛ, la Zɔfara. Yehova ashimelaka Djɔbɔ djɛ ndaalɔmbela. M’ɔkɔngɔ wɔ Djɔbɔ nangha nkambo djɛsɔ, Yehova ɔ́tshɔkɔlaka.​—Djɔ. 42:8-10.

10. Lamo mbombela onto onkomba oyɛwɔ ndananghela nghɔmɛlɛ nyɛtshi? (Ɛfɛsɛ 4:31, 32)

¹⁰ Winá w’owombelaso onto onkomba iso ndananghelaka isɔmɛlɛ nyɛtshi. Yehova nkɔpaka dj’iso ndjala la vu djeyalaka l’onto winá wimɛnde onkomba m’oloko. (Wala Ɛfɛsɛ 4:31, 32.) Nde ntokembɛka djɛ ntshika ‘nkɛlɛ la ntshika nkɛlɛ k’indeko.’ (Yee. 37:8) Alekɔ nkambo djɛ balo nkilika dako djɛsɔ. Mbomba onkomba kana nkɛlɛ nkoka ndjala l’eposelo wɛ nyɛtshi lá demba kana lá wɔɔngɔ wɔso. (Woo. 14:30) Winá wowombelaso onto ɔmɔtshi onkomba, nkambo djɛsɔ djepangoonanghela nyɛtshi, alekɔ etengo ntsha tɔmbɔnɔ lɔlɛngɔ, nkambo djɛsɔ djengoyala l’eposelo wɛ nyɛtshi teso koko ape te onto w’owombelaso nkɛlɛ. Koko, winá w’imeyɛso anto ankina oyananghelaso nde isɔmɛlɛ wɔlɔ. (Woo. 11:17) Iso ndjalaka la vu djelá wɔɔngɔ edjinge djel’oloko, la ndjalaka l’akoka wa nkindjɛ ntshɔ tá ntondo l’olemo wokambelaso Yehova.

11. Bible otepelande nge lá kɛnɛ kelendana la nsɔmbɔla? (Ɔrɔma 12:19-21)

¹¹ Nsɔmbɔla oyɛwɔ nde nkambo djɛ Yehova. Yehova atatɔpɛyɛ lotshungɔ lɔ nsɔmbɔla winá w’onto ɔmɔtshi otonanghelande mpekanto.  (Wala Ɔrɔma 12:19-21.) Má ekanedji kɛso kɛ yimba kelekɔ́ l’elelo la kepalekɔ́ djɔ, topalekɔ l’akoka wa nsambola akambo wɔlɔwɔlɔ, ngo ngete Ndjambe okokande nangha. (Heb. 4:13) Edjinge, lá mbamba imɔtshi, iso ndjawolaka djɛ nsaki yɛso ntshita ekanedji kɛso kɛ yimba kɛ wɔlɔ. Yehova ashimelaka Djakɔbɔ djɛ mfuna ante: ‘Nkɛlɛ k’onto kepananghe akambo lá yopo y’okana la sii kɛ Ndjambe.’ (Dja. 1:20) Iso nkoka ndashikikɛ ente Yehova angonangha kɛnɛ kelekɔ́ wɔlɔ la angonangha djɛ sii nanghema lá lɛdji lɔ djɔ.

12. Wopo wɔkɔnge w’okokaso nyɛnyɛ ente iso ndawɛkɛka tá sii kɛ Yehova?

¹² Winá wimeyɛso iso nyɛnyɛka ente iso ndawɛkɛka lá sii kɛ Yehova. Má ntshika akambo l’ɛwɔ wɛ Yehova, iso nyɛnyɛka djɛ tolekɔ la djawo ente Yehova angokomɛ nyɛtshi inkfumɔ yeyɛ má mpekanto. L’andja wa bango w’otolakande, akambo wa yɛnyi ‘wapangovungɔma lonkina, edjinge wapangoyɛ lonkina l’oloko.’ (Iza. 65:17) Ntsha onto ɔmɔtshi atokiyanyɛka efula, iso nkoka nsɔsɔlɔ nyimɛ nkɛlɛ kana ntshika ndoowombela onkomba? Tokoshishima wopo w’anto amɔtshi iyayale l’akoka wa nangha nkambo djɛsɔ.

13-14. Olakanyelo wɔkɔnge wɔ ngombowa má ndjɔmbɔmba kɛ Tony nya José lá kɛnɛ kelendana la nyimeyɛ?

¹³ Wananyɔ l’ankaana yɛso y’Akristo efula wɔsaka nkano djɛ nyimeyɛ anto wánanghelisá nyɛtshi. Ɛtshɔkɔ wɛkɔnge wɛ yawa má nangha nghɔsɔ?

¹⁴ Ilá efula lá ntondo kɛnde ndjeka akambo wa nsɔsɔlɔ, Tony, * kanga lintansɛ lá Filipinɛ, isolaka ante mpame kɛmɔtshi ketawɔ José ndeke loyakisá mama kɛnde kɛmɔtshi kɛ mpame. L’etsho wɛsɔ, Tony ayalaki onto w’onkonda la wɔ lopango efula, edjinge nde akɔpaka nsɔmbɔla. Wavundaka José wowilaka lá lokando má nkambo djɛ ndananghe djɛ nyɛtshi djɛsɔ. M’ɔkɔngɔ, winá wɔ José ndapose má lokando, Tony akindjɛka ndohona djɛ ndoyaka. Nde asombaka ota ngo djɛ nkotshɛ okoma wɔsɔ. M’ɔkɔngɔ w’etsho, Tony awangaka ndjeka Bible nya Ewakɛ wɛ Yehova. Nde ntepelaka ante: “Winá wɔ mekaka Bible, ndjekaka ente ngo lemi ntshikitanyɛ nanghedji djɛmi la lonto lɔmi, la ntshika nkɛlɛ.” L’ilá k’etsho, Tony alongolaka batisimo edjinge m’ɔkɔngɔ ayɛka ndokoma ikokolo l’otshumano. Kokanela wopo wɔ ndakamɔ winá wɔ  ndewe ante edjinge José akomaka onkambi wɔ Yehova wombolongola batisimo! Winá wɔ yapomana iyape, walongwanaka l’osasa onkfumɔ, edjinge Tony ashimelaka José ante ambówimeyɛ. Tony ntepelaka ante nyimeyɛ ókotshɛka djɛ nde ndjala l’osasa efula wɔ ndopewe nsipisoyɛ. Ee, Yehova atshɔkɔlaka Tony lá wopo wɔ ndawola nyimeyɛ.

15-16. Olakanyelo wɔkɔnge wɔ ngombowa má ndjɔmbɔmba kɛ Peter nya Sue lá kɛnɛ kelendana la nyimeyɛ?

¹⁵ Lá 1985, Peter nya Sue wayalaka lá losanghanyɛ lá Mvulu k’Onkfumi winá wɔ bɔmbɛ yatondjɔ mbala kɛkɔ kɛmɔ. Mpame kɛmɔtshi ayɛka ndowamba bɔmbɛ l’eteyi kɛ Mvulu k’Onkfumi! Sue ahotalaka wolo efula ko kɛsɔ ketshitaka akoka wande wa nyɛna la wa ndjoka. Nde atshutshɛka lonkina nkoka djɛnde djɛ ndjoka nsolo. * Peter nya Sue wayawopolaki mbala la mbala ambɔ: ‘Onto wɔkɔna wonanghisá nkambo djɛ nyɛtshi djɛ nghonyi?’ Ɛnyɔnyi efula m’ɔkɔngɔ, wavundaka onto wɔkɔ woyisá ndowamba bɔmbɛ lá lokando, nde atayala Owakɛ wɔ Yehova, wɔpɛyɛka dilanyɛ djɛ ntshikala lá lokando lowiko lɔnde l’otondo. Winá wɔ yopola Peter nya Sue ntsha wambimeyɛ mpame kɛsɔ, watepelaka ambɔ: “Yehova ntolakanyɛka ante mbombela onto nkɛlɛ la onkomba nkoka ntonanghela nyɛtshi lá demba, lá tokanyi la lá yimba. Djɛkondeke ngo má bango djɛ nkambo djɛnɛ, tɔlɔmbaka Yehova djɛ nde ntokotshɛ́ dj’iso ntshika nyomala la nyimɛ onkomba dj’iso ndjala la vu.”

¹⁶ Ayalaka wɔdju lewɔ djɛ nyimeyɛ? Lako. Iwɔ nkotshɛka ambɔ: “Winá wɔ Sue ɛnande ndjolo m’ampota yɛ ndahotala yɛsɔ, nkɛlɛ kɛso nkalɔka lonkina. Koko topakindjɛka nkanela ngo l’eteyi, djɛko ndeke nkɛlɛ kɛsɔ nshilaka lankeke. Lá nsɔsɔlɔ, tokoka ntepela l’oloko ɔmɔ ente ntsha lofu lɔmɔtshi kanga loyisá ndowamba bɔmbɛ ambokoma wɔnanyɔ wɔso wɔ lá nyuma, tongoosangela. Nkambo djetokomelisá djɛsɔ ntolakanyɛka djɛ winá w’okambaso la tɔkfɔ tɔ Bible lá lowiko lɔso, iso ntshungɔka lá topo efula tɔsopakanela! Iso mbaka lokembo lonkina má ndjewa ente lako ilá Yehova angokomɛ ndjolo inkfumɔ.”

17. Olakanyelo wɔkɔnge ngombowa me Myra lá kɛnɛ kelendana la nyimeyɛ?

 ¹⁷ Myra ekaka Bible m’ɔkɔngɔ wɔnde ntshukana la wɔ mbota wana ape wa dɛngɛ. Womɛnde atawola akambo wa nsɔsɔlɔ. M’ɔkɔngɔ w’etsho, nde ananghaka loseka edjinge akadjɛka nkfumbo kɛnde. Myra ntepelaka ante: “Winá wɔ womɛmi ndatokadjɛ isa wana waso ape wa dɛngɛ, ndawokaka etengo anto efula oyawokakawɔ winá w’onto ɔmɔtshi w’ɔkɔpande ambosadjɛ, ndjalaka la yɛnyi, nkɛlɛ, otshutshumalo, edjinge nkomaka polo lá ndatshumola mɔmɔmɛlɛ.” Kaanga bala djɛsɔ iyavu, nde atshikalaka la yɛnyi yɛ wopo wɔ womɛnde ndokadjɛ. Myra akindjɛ ntepela ante: “Nkindjɛka ndjala la nkɛlɛ l’ilá k’angɔndɔ efula, edjinge ndjɛka ndosipisoyɛ ente nkambo djɛsɔ djeyalaka l’eposelo wɛ nyɛtshi tá djokanelo djɛmi isa Yehova l’anto ankina.” Winá wɔsɔ, Myra atepela ante nde atshikaka nyomala la nkombola womɛnde wɔsɔ lokolo lɔ nyɛtshi. Nde alekɔ la nkongi ante lofu lɔmɔtshi angawola nkambela Yehova. Myra amboyala l’akoka wa ndjila yimba ngo l’etsho weyaye. Ngo ngete oyɛnde nyɔ k’epolo, nde akotshɛ́ka wana wande ape djɛ nkambela Yehova. Lɔɔko kɛnɛ Myra alekɔ l’osasa wɔ nkambela Yehova esanga nya wana wande ape la ankfumbo yɛwɔ.

18. Eshikikelo kɛkɔnge kekoka ndjala laso te Yehova etengo oyɛnde Isushi y’apamela lá djiko djɛ tshɛ?

¹⁸ Iso mbaka lokembo efula má ndjewa ente apalekɔ iso ndeke l’odjito wɔ nshikikɛ wopo wɔ anto oyɛwɔ ladjɛ ndomboyama! Etengo oyɛnde Isushi y’apamela lá djiko djɛ tshɛ, Yehova ndeke lolekɔ́ l’odjito wɔ djonyi wɔsɔ. (Ɔrɔ. 14:10-12) Iso nkoka ndjala l’eshikikelo kenkfumɔ ente nde angolomboyɛka nkfu inkfumɔ lá nkilika ɛlɛmbɛ wɛnde wɛ djɔ, welendana la wɔlɔ edjinge la nyɛtshi. (Ewa. 18:25; 1 Nk. 8:32) Nde apananghaki kaanga nkambo mɔ djepalekɔ́ sii!

19. Yehova ndonghonangha nge mpeyi má sii kɛnde kɛ djɔ?

¹⁹ Tokongela l’eloko lukuluku winá wɔ Yehova ndongoshiyɛ eposelo wɛ nyɛtshi enkfumɔ weyɛ má eyalelo kɛso k’anto wa ntshamba djɛ djɔ. Lá mbamba kɛsɔ, ampota yɛso inkfumɔ yelá alemba la yel’eloko ingɔkɔnɔ. (Yee. 72:12-14; Ndj. 21:3, 4) Topangokanela akambo wasɔ lonkina. Winá w’okongelaso djɛ winá wɔ wɔlɔ wɔsɔ nkoka, tolekɔ la djedjɛ dj’efula te Yehova lá wopo wɔ ndɔtɔpɛyɛ akoka wa ndjokola ndjɔmbɔmba kɛnde kɛ nyimeyɛ.