1. Nkishinkamiisho kinyi ki’abapa bakintshishi a miluisho abelanga kuishimba mu binyibinyi kui Yehowa?

 BU BI Yehowa Mmupangi eetu, etuelelaa Miya, na Nsushi eetu, muikale dingi Nshetu sha kifulo e muiyilu. (Mis. 100:3; Yesh. 33:22) Nsaa y’atumuluishisha na tubelanga kuishimba mu binyibinyi, te nka penda na mushindo nya, kadi akumiina dingi kuitufuila lusa. (Mis. 86:5) Kukiila kui mutemuki Yeeshaya, Yehowa etushinkamisha’shi: “Sunga miluisho yenu yekala imongie pididi bu nkula, ayikatoko nka soo bu butongo.”​—Yesh. 1:18, NWT.

2. Su atukumiina kuikala mu butaale na bangi, abitungu tukite kinyi?

² Pa muanda wa’shi tui bantu bashi bapuidikie, atue booso atuakulaa sunga kukita mianda ayikokosha bangi. (Shak. 3:2) Bino t’abipushisha’shi ta tui balombene kuikala n’abo mu kipuano ki buwa nya. Tui balombene kui bikita su tualonga bia kufuila bangi lusa. (Nki. 17:9; 19:11; Mat. 18:21, 22) Su muntu akula sunga kukita muanda kampanda upeela ubetutapa kuishimba, Yehowa akumiina’shi tu mufuile lusa. (Kol. 3:13) Tui na kabingilo ke buwa ka kukita bino. Ku mfudiilo a bioso Yehowa akumiina kuitufuila lusa pa ‘kuitulekyêla byoso.’​—Yesh. 55:7, EEM.

3. Nkinyi ki’atukataluula mu uno muisambo?

³ Mu uno muisambo, atukamono mushindo wi bantu bashi bapuidikie mbalombene kuambula lusa lua Yehowa. Miluisho kinyi ayitungu’shi tukalungule bakulu? Buakinyi Yehowa etulungula buatudia kufuila bangi lusa? Na kinyi kiatudi balombene kulongiela  kui bangi bakuetu bena Kidishitu bakuete kukienga ngofu pa muanda wa miluisho ya bangi?

4. (a) Nsaa i mufubi a Yehowa bakitshi muluisho ukata, abitungu akite kinyi? (b) Bakulu be na bushito kinyi nsaa yabafumankana na kitshishi a bubi?

⁴ Miluisho ikata abitungu kuiyilungula bakulu. Bileshesho bia miluisho ikata i bino atuibipete mu 1 Bena-Kodinda 6:9, 10. Kukita miluisho ikata, kuimumune na kuipaa miya y’Efile Mukulu. Su muina Kidishitu bakitshi muluisho wa biabia abitungu atekie Yehowa lusa mu luteko, kubaapu ende akalungule bakulu ba mu kakongie. (Mis. 32:5; Shak. 5:14) Mbushito kinyi buinabo bakulu? Nka penda Yehowa ngi e na matalua a kuitufuila lusa ku miluisho mu mushindo upuidikie, na bino ebikitaa ku bukuashi bua mulambu wa nkuulo. * Anka Yehowa, ngi mupe bakulu bushito bua kuata kitshibilo akimeena mu Bifundue pabitale yawa nkitshishi a bubi su mulombene kushaala mu kakongie. (1 Kod. 5:12) Bua kulombasha uno mudimo, kintu kimune kiabekitshisha bua kupeta ngaluulo ku ino nkonko ayilondo: Ekeele muate mpango kumpala bua kukita uno muluisho su? Ta bakitshine dingi uno muluisho wadi mukite takudi mafuku e bungi su? Muanda wi na muulo ukata, kui kishinkamiisho akileesha’shi muilangie kuishimba mu binyibinyi su? Kui mianda ayilesha’shi Yehowa mupue ku mu fuila lusa su?​—Bik. 3:19.

5. Mmiabi kinyi ayituukila ku mashito e na bakulu?

⁵ Nsaa i bakulu abafumankana na nkitshishi a bubi, kepatshila kaabo nkakuata kitshibilo pano pa nsenga, ki mumune na kipue kuatshibua muiyilu. (Mat. 18:18) Ino mpango ayikuasha kakongie naminyi? Ino mpango ayikaluila kakongie pa kushinkamisha’shi, yawa kitshishi a bubi shi muilangie kuishimba batushibua mu kakongie, na bino abikaluila bafubi be buwa ba Yehowa. (1 Kod. 5:6, 7, 11-13; Tt. 3:10, 11) Mbilombene kukuasha dingi kitshishi a bubi buadia kuilanga kuishimba na kufuidibua lusa kui Yehowa. (Luk. 5:32) Bakulu abatekiela yawa belanga kuishimba, na kuteka Yehowa bua’shi amukuashe buadia kualusha biubishi biaye bia mu kikudi.​—Shak. 5:15.

6. Su muntu mutushibue mu kakongie, ku ki mushindo wa’shi Yehowa amufuile lusa su? Patuula.

⁶ Bikuikala naminyi su nkitshishi a bubi ta muilangie kuishimba nsaa y’esambanga na bakulu? Mu muanda wi bino, bakulu abamutuusha mu kakongie. Su muntu bayipaa muiya sunga’shi bakitshi kibeshi bakulu ta mbalombene kumukaluila ku bipeta bia bikitshino biaye bi bubi. Yehowa atadiila’shi bakata ba mbulamatadi be na matalua basambishe na kupa muntu ooso yawa ayipaa muiya kibawe, bielanga kuishimba sunga kukutua kuilanga. (Lom. 13:4) Biabia, su muntu akatundula kilubilo kiaye elanga mu binyibinyi, alukiila, Yehowa akumiina ku mufuila lusa. (Luk. 15:17-24) Bino bia binyibinyi sunga miluisho yaye ikadika ikata.​—2 Mya. 33:9, 12, 13; 1 Tim. 1:15.

7. Mu mushindo kinyi muatudi balombene kufuila muntu muituluishishe lusa?

⁷ Tui na lutumbu lukata lua kuuka’shi ta tui na matalua a kuata kitshibilo su Yehowa akumiina kufuila nkitshishi a bubi lusa! Anka kui ungi muanda autungu’shi tuate kitshibilo. Bu muanda kinyi? Mu ingi mianda muntu mulombene kuituluishisha, sunga muluisho wikala ukata, anka ekuituisendeela na ateka bua’shi tumufuile lusa. Mu ingi mianda muntu mulombene kupela kuituteka lusa sunga kuituisendeela. Sunga mbiabia tui kusangula bua kufuila muntu lusa bua kulesha’shi, tui balombene kuata kitshibilo kia kukatusha mushikua sunga nsungu watudi bafitshile yawa muntu. Mu kuakula kua kalolo, bino bilombene kuata nsaa i bungi na  kuikitshisha kui bungi bikishekishe su muntu ekalanga muitutape kuishimba ngofu. Kitenta kia Mulami kia 15/9/1994 akiamba’shi: “Nsaa yofuila nkitshishi a bubi lusa bino t’abileshesha’shi bobepuula muluisho nya. Bua muina Kidishitu kufuila muntu lusa akulesha kulekiela muanda mu masa mua Yehowa na lukulupilo looso. Aye nyi Nsushi mululame a muiyilu na pa nsenga, akamutshibila kiimu pa nsaa ilombane.” Buakinyi Yehowa etunyingisha bua kufuilana lusa na kulekiela bilumbu kuadi, kuamba’shi mu masa muaye?

8. Mmushindo kinyi wikale kufuila bangi lusa akulesha’shi tui na lutumbo bua lusa lua Yehowa?

⁸ Kufuidishena lusa nkulesha lutumbu. Mu lungi lukindi, Yesu apuandikisha Yehowa na mukata a mudimo, baadi mufuile lusa mpika aye baadi na ebasa diaye dia makuta e bungi dibaadi nadio, diashibaadi mulombene kumualuisha. Anka, yawa mpika abaabadi bafuile lusa bakutshile kulesha namu lusa kui mpika naye baadi n’ebasa diaye dia makuta apeela. (Mat. 18:23-35) Yesu baadi muitulongieshe kinyi pano? Su mu binyibinyi tui na lutumbu bua lusa lukata lua Yehowa kuatudi, abiketutakula namu n’atue bua kufuila bangi lusa. (Mis. 103:9) Kitente kia Mulami kibakuile ino miaku takudi bipua bi bungi’shi: “Sunga tuafuila bipangua netu lusa misuusa bungi kinyi, ta ya kulombana na lusa luabetufuila kui Efile Mukulu, lusa luadi neetu kukiila kui Kidishitu.”

9. Yehowa baadi muleshe lusa kui bantu kinyi? (Mateo 6:14, 15)

⁹ Su tubafuila bangi lusa, Yehowa aketufuila namu lusa. Yehowa aleshaa lusa luaye kui baaba booso abalesha namu bangi lusa. (Mat. 5:7; Shak. 2:13) Yesu baadi mupatuule uno muanda kalolo nsaa ibaadi mulongieshe balongi baaye mushindo wa kuteka. (Badika Mateo 6:14, 15.) Atulongo dilongiesha ku muanda wi mumune na uno ubakuile Yehowa pabitale mufubi aye Yoobo. Uno muntu sha lulamato baadi mutapikie kuishimba ngofu na bishima bibaadi bakule kui bakuuku baye basatu Elifaze, Bildade, na Zofare. Yehowa baadi mulungule Yoobo buadia kuibatekiela. Kunyima kua Yoobo kuibatekiela, Yehowa baadi mumuelele miabi.​—Yob. 42:8-10.

10. Buakinyi kulama nsungu kuishimba kui masaku? (Bena-Efeso 4:31, 32)

¹⁰ Nsaa yatushaala na nsungu atuiluishisha atue banabene. Yehowa akumiina’shi tupete butaale abutukila mu kusumbula sunga kupela kutuula kua nsungu kuishimba. (Badika Bena-Efeso 4:31, 32.) Yehowa etulungula’shi, “leka nsungu sumbula etombo.” (Mis. 37:8) Su tu balondo dino elango adiketukuasha. Kulama nsungu kulombene kuluisha mbidi yetu na binangu bietu. (Nki. 14:30) Su tubalamina muntu nsungu, yaya nsungu t’ayimukalakasha, tui nka bu muntu mutome nsumu ishi ilombene kukita yawa muntu atudi balamine nsungu kintu. Nsaa yatufuila bangi lusa, tui nka bu babapete atue banabene kiabuntu. (Nki. 11:17) Atupete butaale bua mu binangu na bua muishimba na atuikala na mushindo wa kuenda kumpala mu mudimo watufubila Yehowa.

11. Bible akula kinyi pabitale kuiobuela? (Bena-Looma 12:19-21)

¹¹ Koobola nkua Yehowa. Yehowa ta muitupe matalua a kuiobuela atue banabene nsaa ayituluishisha muntu nya. (Badika Bena-Looma 12:19-21.) Bu biatudi na mikalo na mueneno a kukutua kupuidika, ta tui na ngobesha ya kutshiba kiimu mu muanda kalolo, bilombene kuikitshiba Efile Mukulu nya. (Eb. 4:13) Ingi nsaa su tuatadiila nsungu’shi itukunkushe bi kuituelela bukopo buatudia kuuka ki buwa kiatudia kukita. Yehowa baadi muyokiele Shake buadia kufunda’shi: “Mwanda nsungu ya muntu ta ngilombene kukita kilulame kumpala kw’Efile Mukulu.” (Shak. 1:20) Tui balombene kushinkamisha’shi Yehowa akakitshi mianda ilulame  na kuikala bashinkamishe’shi kiimu kiaye kipuidikie akikakitshika.

12. Mushindo kinyi watudi balombene kulesha’shi tui bakulupile mu kululama kua Yehowa?

¹² P’atufuilana lusa atulesha’shi tuibakulupile kululama kua Yehowa. P’atutuulu mianda yoso mu maasa a Yehowa, atulesha’shi tuibakulupile kikiebe kieshimba diaye bua’shi akatushe ino mianda yoso i bubi yabakuete kufuisha kui miluisho. Mu nsenga yaye ipia yadi muitule, mianda yoso ibi ayitukiengesha mu binangu ‘taatukeyitentekyesha dimo nya, taayiiketufwila dimo ku mashimba nya’ bua losoo. (Yesh. 65:17) Biabia, su tui batapikie ngofu kuishimba bi kuikala bibofule buatudia kuleka nsungu na mushikua, biatudi balombene kuikala nabio muishimba su? Tutaleyi mushindo watudi balombene kuibikita.

13-14. Nkinyi kibolongo pabitale kufuilana lusa akufiki ku muanda ubaadi pankatshi pa Tony na José?

¹³ Bakuetu be bungi bena Kidishitu balume na bakashi mbaate kitshibilo kia kufuilana lusa, sunga bibaabadi bebatape ngofu ku mashimba kui bikitshino bia bangi. Mmiabi kinyi yabadi bapete p’abo kukita biabia?

¹⁴ Tony, * ungi muana mulume a mu Philippines amba’shi, kumpala kuandia kulonga bia binyibinyi naadi musangane’shi, tuutu eetu a kumpala babaadi bamuipe kui ungi muana mulume abetanyinaa bu José. Mu aa mafuku Tony bekiele na nsungu i bungi afika bu ntomboshi, na baadi akumiina kuiobuela. José babamukuatshile bamuela mu lukano bua kiakia kibeshi kiaye. Kunyima, pa batukile José mu lukano, Tony abaadi amukiimbi kooso kuadi bua’shi amuipe. Baadi muule mputu buadia kulombasha kepatshila kaaye. Mu aa mafuku, Tony babangile kulonga Bible na ba Temue ba Yehowa. Aakula’shi: “Mu kulonga kuande kua Bible, naadi mulongie’shi abitungu shintuule bumuntu buande na bikitshino biande, bino abilesha kukatusha mpaa na nsungu yande.” Kunyima kua mafuku, Tony baadi mubatshishibue akupu aye nkufika mpaa na bu mukulu mu kakongie. Banda kunangushena bibaadi mukanye nsaa ibaukile’shi na José namu bafiki mufubi a Yehowa mubatshishibue! Nsaa ibaabadi bafumankane booso babidi, babaadi beanyene biipa na muloo, na Tony balunguile José’shi mupue kumufuila lusa. Tony akula’shi bikitshino biaye  bia kufuilana lusa bibaadi bimutuadile muloo ukata, ubaadi bukopo bua kupatuula bibaadi apusha. Eyendo, Yehowa muelele Tony miabi p’aye kukumiina kufuilana lusa.

15-16. Nkinyi ki bolongiela pabitale kufuidishena lusa, ku muanda wa Peter na Sue?

¹⁵ Mu 1985, Peter na Sue babaadi mu bisangilo mu Nshibo ya Bufumu nsaa ibatanyikile bombe mu kabasamushi. Ungi muana mulume batudile bombe ku lupese lua Nshibo ya Bufumu! Sue baadi mukiengie munda a mafuku e bungi na malonda na lulalakashi lua kumona na lua kupusha. Tabaadi apusha nyi sunga eshiko dia kintu. * Peter na Sue bababangile kuiyipusha abo banabene’shi, ‘Muntu kinyi mulombene kukita kintu ki bubi bui bino?’ Kunyima kua bipua bi bungi yawa muntu baadi muele bombe, ta baadi mufubi a Yehowa nya, babamukuatshile buadia kukisha muwa waye ooso mu lukano. Nsaa ibaabadi bebayipushe su mbalombene kufuila uno muntu lusa, Peter na Sue babakuile’shi: “Yehowa etulongiesha’shi kulama nsungu na mushikua nkulombene kuluisha mbidi yetu, na binangu bietu. Kia kumpala, tubatekiele Yehowa bua’shi etukuashe tukaatshe nsungu na mushikua buatudia kuikala na butaale mu nshalelo.”

¹⁶ Bino bibaadi bibofule bua kufuila yawa muntu lusa su? Nya, ta bibaadi bibofule. “Ingi nsaa pabaadi apakiengie Sue pa muanda wa malonda nsungu ibaadi ayitualukiila dingi, bu bibatudi balekie kunangushena ku uno muanda nsungu yetu ibapuile. Biabia tui balombene kuakula n’eshimba dietu dioso’shi, su dingi efuku yawa muntu belele bombe akafika mukuetu muina Kidishitu atukamutambula. Uno muanda ubetulongiesha’shi mayi a kulonda a mu Bible aekashaa bantu bulungantu, na ngetuikashe bulungantu mu mishindo i bungi yatushi balombene kupuandikisha! Abitunyingisha dingi, pa kuuka’shi binobino Yehowa akalumbuula mianda yoso i bubi ikuete kukitshika.”

17. Nkinyi kibolongiela ku muanda ubaadi upete Myra pabitale kuifuilana lusa?

¹⁷ Myra balongiele bia binyibinyi aye mupue  kuibakilua atanda mpaa na bana babidi balume. Mulume aaye ta baadi mukumiine bia binyibinyi nya. Mu angi mafuku batambukile lusandi asumbushena kifuko kiaye. Myra akula’shi: “Nsaa ibandekiele mulume ande na bana beetu babidi, naadi mupushe bubi ngofu, anka abipushaa bantu be bungu kunyima kuabo kuibaluishiisha kui muntu abadi bafule, bibaadi bintape kuishimba ngofu, biankaanyisha, nabanga kuitopeka, biampa nsungu.” Nabanga kuimona bu ami shi na muulo, na mukambe kuinyongola. Ki’atungunukaa nka na kupusha bubi muanda wa mulume aaye mumuluishishe. Myra atungunuka na kuakula’shi: “Natungunukile nakuinyongola, napusha nsungu munda a mieshi i bungi, na naadi musangane’shi bino bioso binaadi apusha bibaadi na bukitshishi ku kipuano kiande na Yehowa, na ku kipuano kiande na bangi.” Myra aakula binobino’shi mupue kukatusha nsungu na taki na muanda su ngumune wadi mulamine yawa mulume aaye nya. Mukulupile’shi mulume aye yawa anafikie mufubi a Yehowa. Myra e na mushindo wa kutala nka penda mu mafuku aaye aafiki. Mmukushe bana baye babidi bupenka na bafika bafubi ba Yehowa. Lelo uno, Myra e na muloo wa kufubila Yehowa pamune na bana baye na kifuko kiaye kioso.

18. Nkinshinkamiisho kinyi kikata kiatudi balombene kuikala nakio kui Yehowa, bu biadi Nsushi Mukata mukile booso?

¹⁸ Kintu akitunyingisha pa kuuka’shi ta tui na bushito bua kuata kitshibilo kia mushindo wa kutshibila bantu biimu! Bu bikale Yehowa bu Nsushi Mukata mukile booso, akapasukila uno mudimo wi na muulo ukata. (Lom. 14:10-12) Abitungu tuikale na lukulupilo lukata’shi Yehowa akatshibi biimu mu kuipushena na mayi aye a kulonda apuidikie a ki buwa na ki bubi. (Kib. 18:25; 1 Bf. 8:32) T’ana kakite kintu su nkimune kishi kilulame!

19. Kululama kua Yehowa kupuidikie, akukalombasha mianda kinyi?

¹⁹ Atutengiela na luishinko looso, nsaa yabakakatusha kui Yehowa mianda yoso ibi i na bukitshishi bui bubi, bua bantu bashi bapuidikie na miluisho. Mu kiakia kipungo makienga ooso a ku mbidi na a mu binangu atudi nao aakapuishibua. (Mis. 72:12-14; Kibaf. 21:3, 4) T’atukeatentekiesha dingi nya. Bu bia tukuete kutengiela kiakia kipungo ki buwa bukile bua’shi kifikie. Tui na lutumbu lukata muanda Yehowa mmuitupe mushindo wa kumuambula pa kufuilana lusa.