1. Sortu moi dyaranti Yehovah e gi sma di abi trutru berow?

 BOITI taki Yehovah na wi Mekiman, wi Krutuman èn a sma di e gi wi wet, en na wi lobi-ati hemel Papa tu (Ps. 100:3; Yes. 33:22). Te wi sondu teige Gado èn wi e sori taki wi abi trutru berow, dan a abi a makti fu gi wi pardon èn a de klariklari fu du dati tu (Ps. 86:5). Nanga yepi fu a profeiti Yesaya, Yehovah ben gi wi a moi dyaranti disi: „Awinsi den sondu fu unu redi leki brudu, toku den o kon weti leki snew.”​—Yes. 1:18.

2. San wi musu du efu wi wani libi na ini freide nanga trawan?

² Fu di wi na sondusma, meki wi alamala e taki èn e du sani di e hati trawan (Yak. 3:2). Ma disi no wani taki dati wi no kan abi wan bun matifasi nanga trawan. Wi o abi wan bun matifasi nanga trawan te wi e leri fu gi den pardon (Odo 17:9; 19:11; Mat. 18:21, 22). Efu wan sma taki noso du wan sani di hati wi, ma a sani dati no bigi so, dan Yehovah wani taki wi gi a sma dati pardon (Kol. 3:13). Wi abi bun reide fu du dati fu di Yehovah de klariklari fu gi wi pardon „nanga en heri ati”.​—Yes. 55:7.

3. San wi o luku na ini na artikel disi?

³ Na ini na artikel disi wi o luku fa sondu libisma kan gi trawan pardon neleki Yehovah. Sortu sondu wi musu fruteri den owruman? Fu san ede Yehovah wani taki wi gi trawan pardon? Èn san wi kan leri fu wi brada nanga sisa di nyan furu pina fu di trawan du hati sani nanga den?

4. (a) Te wan futuboi fu Yehovah du wan seryusu sondu, dan san a musu du? (b) Sortu frantwortu den owruman abi te den e taki nanga wan sma di du wan sondu?

⁴ Wi musu taigi den owruman te wan sma du wan seryusu  sondu. San na wan seryusu sondu? Wi kan feni wan tu eksempre na ini 1 Korentesma 6:9, 10. Seryusu sondu, na sondu di de teige a wet fu Gado èn di ogri srefisrefi. Efu wan Kresten du so wan sondu, dan a musu begi Yehovah Gado fu aksi en pardon èn a musu taki nanga den owruman fu a gemeente (Ps. 32:5; Yak. 5:14). Sortu frantwortu den owruman abi? Na Yehovah wawan abi a makti fu gi wan sma pardon dorodoro fu den sondu fu en èn a e du dati nanga yepi fu a frulusu-ofrandi. * Ma Yehovah gi den owruman a frantwortu fu luku nanga yepi fu Bijbel efu wan sma di sondu kan tan na ini a gemeente (1 Kor. 5:12). Fu man du dati, dan den owruman musu kon sabi den sani disi: A sma du a sondu fu espresi? A sma pruberi fu kibri a sondu di a du? A sma du a sondu fu wan heri pisi ten? Èn san moro prenspari, a sma sori taki a abi berow trutru? Buweisi de taki Yehovah gi en pardon?​—Tori 3:19.

5. Te den owruman e pruberi fu yepi wan sma di du wan sondu, dan fa a heri gemeente e kisi wini fu dati?

⁵ Te den owruman o taki nanga wan sma di du wan sondu, dan den wani teki a srefi bosroiti di Yehovah teki kaba na ini hemel (Mat. 18:18). Fa a seti disi e tyari wini kon gi a gemeente? A e sorgu taki sma di du sondu èn di no abi berow, no pori a bribi fu den skapu fu Yehovah di a lobi srefisrefi (1 Kor. 5:6, 7, 11-13; Tit. 3:10, 11). A seti disi kan yepi wan sma di sondu fu sori berow èn a kan meki taki Yehovah gi en pardon (Luk. 5:32). Den owruman o begi gi a sma di sori berow èn den o aksi Yehovah fu yepi a sma fu kon bun baka nanga en.​—Yak. 5:15.

6. Efu den puru wan sma fu a gemeente, dan so wan sma man kisi pardon ete? Fruklari dati.

⁶ Kow taki dati wan sma no abi berow te den owruman e taki nanga en. Efu dati de so, dan den o puru en fu a gemeente. Efu so wan sma pasa lanti wet, dan den owruman no o kibri a sma fu no kisi strafu. Yehovah gi pasi taki lanti krutu èn strafu iniwan sma di pasa a wet, awinsi a sma dati abi berow (Rom. 13:4). Ma toku efu a sma kon frustan bakaten taki a du wan ogri, a abi berow fu san a du èn a drai en libi, dan Yehovah de klariklari fu gi en pardon (Luk. 15:17-24). Dati de so srefi efu a sma du wan sondu di bigi srefisrefi.​—2 Kron. 33:9, 12, 13; 1 Tim. 1:15.

7. Fa wi kan gi wan sma pardon te a du wan hati sani nanga wi?

⁷ Wi breiti srefisrefi taki a no wi abi a frantwortu fu bosroiti efu wan sma di sondu o kisi pardon, ma na Yehovah e bosroiti dati. Ma toku wan sani de di wi musu du. San na dati? Son leisi wan sma du wan hati sani nanga wi. Son leisi a sani dati na wan seryusu sani. Ma kande a sma e aksi pardon baka dati. Na ini tra situwâsi, a kan taki a sma no e aksi wi pardon srefi. Ma awinsi fa a no fa, wi srefi kan bosroiti fu gi a sma pardon èn wi kan pruberi fu no hori a sma na ati. A no de fu taki dati a sani disi kan teki ten èn wi abi fu meki tranga muiti. Spesrutu efu a sma du wan sani di hati wi srefisrefi. A Waktitoren fu 15 september 1994 e taki: „Te yu e gi wan sondari pardon, dan disi no wani taki dati yu e tapu yu ai gi a sondu di a du. A gi di wan Kresten e gi wan  trawan pardon, wani taki dati a e libi na afersi gi Yehovah fu di a e frutrow na en tapu. En na a reti Krutuman fu hemel nanga grontapu èn a sa du san reti na a yoisti ten.” Fu san ede Yehovah wani taki wi gi trawan pardon èn frutrow na en tapu taki a o krutu sani na wan reti fasi?

8. Fu san ede wi musu sori taki wi de nanga tangi gi a sari-ati fu Yehovah?

⁸ Te wi e gi trawan pardon, dan wi e sori taki wi de nanga tangi. Na ini wan agersitori, Yesus ben agersi Yehovah nanga wan masra di taigi wan fu den srafu fu en taki a no ben abi fu pai en a bigi moni moro di a ben musu pai en. Ma a srafu disi no sori sari-ati gi wan srafu di no ben abi fu pai en so wan bigi moni srefi (Mat. 18:23-35). San Yesus e leri wi dya? Efu wi de nanga tangi trutru taki Yehovah e sori sari-ati gi wi, dan a sani dati o meki taki wi o wani gi trawan pardon (Ps. 103:9). Furu yari pasa wan Waktitoren artikel ben taki dati „awinsi omeni leisi wi e gi trawan pardon, noiti dati o man doro den someni leisi di Yehovah gi wi pardon èn di a sori wi sari-ati nanga yepi fu Krestes”.

9. Gi suma Yehovah e sori sari-ati? (Mateyus 6:14, 15)

⁹ Yehovah o gi wi pardon te wi e gi trawan pardon. Yehovah e sori sari-ati gi den sma di e sori sari-ati gi trawan (Mat. 5:7; Yak. 2:13). Yesus ben taki fu a sani disi di a leri den disipel fu en fu begi. (Leisi Mateyus 6:14, 15.) Wi e leri wan srefi sortu sani fu san Yehovah ben taigi en futuboi Yob. A ben hati Yob srefisrefi di den dri man Elifas, Bildad nanga Sofar taigi en hati sani. Ma Yehovah ben taigi Yob fu begi gi den. Baka di Yob du dati, dan Yehovah blesi en.​—Yob 42:8-10.

10. Fu san ede a no bun gi wi fu hori sma na ati? (Efeisesma 4:31, 32)

¹⁰ A no bun gi wi te wi e hori sma na ati. Te wi e hori sma na ati, dan dati de leki wan hebi na wi tapu. Yehovah wani taki wi de koloku, èn fu dati ede wi no musu tan atibron nanga trawan. (Leisi Efeisesma 4:31, 32.) Dati meki a e gi wi a deki-ati disi: „No kisi atibron moro èn no rigeri moro” (Ps. 37:8). A de wan bun sani efu wi teki a rai dati. Te wi e hori sma na ati, dan a sani dati kan siki wi èn wi no o de koloku (Odo 14:30). Te wi e hori sma na ati, dan a de neleki wi dringi vergif. Te wi e tan atibron nanga wan sma di du wi wan hati sani, dan na soso ogri wi e du wisrefi. Na presi fu dati, te wi e gi trawan pardon, dan wi e du wisrefi wan bun (Odo 11:17). Wi o de koloku èn wi o man go doro na ini a diniwroko fu Yehovah.

11. Suma musu pai wan sma gi na ogri di a du, soleki fa Bijbel e taki? (Romesma 12:19-21)

¹¹ Na Yehovah musu pai sma gi na ogri di den du. Yehovah no gi wi a reti fu pai wan sma gi na ogri di a du nanga wi. (Leisi Romesma 12:19-21.) Fu di wi na sondu libisma èn fu di wi no sabi ala sani fu wan tori, meki wi no man krutu sani na a yoisti fasi soleki fa Gado man du dati (Hebr. 4:13). Èn son leisi a kan pasa taki den firi fu wi kan kori wi èn dati kan meki en muilek gi wi fu krutu sani na wan reti fasi. Yehovah ben meki Yakobus skrifi a sani disi: „Na atibron fu libisma, e meki den du sani di Gado no feni bun” (Yak. 1:20). Wi kan de seiker taki Yehovah o du san reti èn taki a o krutu sani na wan reti fasi.

12. Fa wi kan sori taki wi abi a frutrow taki Yehovah o krutu sani na wan reti fasi?

 ¹² Te wi e gi trawan pardon, dan wi e sori taki wi abi a frutrow taki Yehovah o krutu sani na wan reti fasi. Te wi e libi sani gi Yehovah, dan na so fasi wi e sori taki wi abi a frutrow taki a o puru ala den ogri sani di pasa nanga sma fu di trawan sondu. Na ini a nyun grontapu di a pramisi wi, wi „no o memre” nowan fu den hati sani di trawan ben du nanga wi, moro èn noiti moro den o ’abi krakti na wi tapu’ (Yes. 65:17). Ma te wan sma hati yu srefisrefi, dan yu denki taki yu o man gi a sma pardon trutru? Luku san yepi son brada nanga sisa.

13-14. San yu leri fu na ondrofenitori fu Tony nanga José?

¹³ Furu fu wi Kresten brada nanga sisa bosroiti fu gi wan trawan pardon, aladi a sma dati ben du wan hati sani nanga den. Sortu wini den kisi di den gi trawan pardon?

¹⁴ Langa ten fosi Tony, * di e libi na den Filippijnen, kon sabi a waarheid, dan a ben kon sabi taki wan man di nen José, ben kiri wan fu den bigi brada fu en. Na a ten dati, Tony ben de wan ogri-ati sma èn a ben wani kiri a man disi. Bakaten skowtu kisi José èn den poti en na strafu fu na ogri di a du. Baka wan pisi ten di José komoto na strafu, dan Tony sweri taki a ben o luru a man disi èn kiri en, awinsi san e pasa. Dati meki Tony bai wan gon fu kiri José. Ma Tony bigin studeri Bijbel nanga Yehovah Kotoigi. A e taki: „Di mi ben e studeri Bijbel, mi kon si taki mi ben musu drai mi libi èn dati ben wani taki tu dati mi no ben musu atibron moro.” Baka wan pisi ten, Tony dopu èn te fu kaba a tron wan owruman na ini wan gemeente. Yu kan frustan fa Tony ben skreki fu kon sabi taki José ben tron wan dopu futuboi fu Yehovah tu. Di den tu brada disi miti makandra, den brasa makandra èn Tony taigi José taki a gi en pardon. Tony e taki dati fu  di a gi José pardon, meki a ben de so koloku taki bijna a no ben man fruteri trawan fa a ben firi. Iya, Yehovah blesi Tony fu di a ben de klariklari fu gi José pardon.

15-16. San yu leri fu na ondrofenitori fu Peter nanga Sue?

¹⁵ Na ini 1985, Peter nanga Sue ben go na wan konmakandra na a Kownukondre zaal, di wantronso wan bom sutu. Wan man ben poti wan bom na ini a Kownukondre zaal. A sani disi meki taki Sue no man si èn yere so bun moro. Èn a no man smeri sani moro. * Son leisi Peter nanga Sue e aksi densrefi: ’Fa wan sma kan du so wan ogri sani?’ Furu yari baka dati, skowtu ben kisi a man di ben poti a bom èn a ben musu koti strafu en heri libi langa. Di sma aksi Peter nanga Sue efu den gi a man disi pardon, den taki: „Yehovah e leri wi taki te wi e tan hori wan sma na ati, dan dati kan siki wi, wi kan sari èn wi kan stress. Dati meki sensi a sani disi pasa, wi aksi Yehovah fu yepi wi so taki wi no atibron moro. Na so wi ben man libi wi libi go doro sondro taki wi ben abi fu broko wi ede nanga a tori disi.”

¹⁶ A ben makelek gi den fu gi a man disi pardon? A no ala ten. Den e fruteri moro fara: „Son leisi te Sue en skin e hati en fu di ogri ben miti en na zaal, dan wi ati kan bron baka. Ma wi no e tan prakseri a tori. Dati e meki taki na atibron e saka. Nanga wi heri ati wi kan taki dati efu wan dei a man disi di poti a bom tron wan brada fu wi, wi ben o gi en wan switikon. Fu taki en leti, Bijbel gronprakseri e meki wi kon fri na moro fasi leki san wi prakseri. A e trowstu wi tu fu sabi taki heri esi Yehovah o poti ala sani kon reti baka.”

17. San yu leri fu na ondrofenitori fu Myra?

¹⁷ Di Myra kon leri sabi a waarheid, a ben trow kaba èn a ben abi tu yongu pikin. En masra no kon na ini waarheid.  Baka wan pisi ten, a man waka gi en èn a gwe libi na osofamiri. Myra e taki: „Di mi masra gwe libi mi nanga den tu pikin fu wi, dan mi ben e firi leki fa furu sma e firi te wan lobiwan fu den bedrigi den. Mi no ben man bribi san miti mi, mi ben e sari, a sani disi ben e hati mi srefisrefi, mi ben gi misrefi a fowtu fu san pasa, èn mi ati ben e bron.” Aladi a trow broko, toku Myra tan firi sari fu di en masra waka gi en. Myra e fruteri moro fara: „Omeni mun langa mi ben e firi brokosaka èn mi ati ben bron. Ma bakaten mi kon si taki den firi disi ben abi krakti tapu a matifasi di mi abi nanga Yehovah èn nanga tra sma.” Myra e taki now dati a no e atibron moro èn a no wani taki ogri miti na ex-masra fu en. A e howpu taki wan dei a man disi o kon krosibei fu Yehovah. Myra man poti ala en prakseri now na a howpu di a abi gi a ten di e kon. Myra wawan kweki den tu pikin fu en èn now den e dini Yehovah tu. Myra breiti taki a man dini Yehovah makandra nanga den pikin fu en nanga den osofamiri.

18. Fu di Yehovah na a Moro Hei Krutuman, dan fu san wi kan de seiker?

¹⁸ Wi breiti srefisrefi fu sabi taki a no wi abi fu bosroiti sortu krutu wan sma o kisi. Fu di Yehovah na a Moro Hei Krutuman, meki en o du a prenspari wroko dati (Rom. 14:10-12). Fu di Yehovah wawan sabi san bun èn san no bun, meki wi kan abi a frutrow taki ala ten a o krutu sani na wan reti fasi (Gen. 18:25; 1 Kow. 8:32). Noiti Yehovah o du wan sani di no reti.

19. San o pasa fu di Yehovah o krutu sani na wan reti fasi?

¹⁹ Wi no man wakti a ten te Yehovah o puru ala takru bakapisi di a sondu fu libisma tyari kon. Na a ten dati, wi no o siki moro, wi no o sari moro, èn wi no o firi a pen moro fu den sani di ben miti wi (Ps. 72:12-14; Openb. 21:3, 4). Noiti moro wi o memre den sani dati. Aladi wi e wakti a moi ten dati, wi wani sori taki wi de nanga tangi trutru taki Yehovah meki wi na so wan fasi taki wi kan gi trawan pardon neleki en.