1. Yini Jehova layetsembisa labo labonile labaphendvukako?

 JEHOVA akagcini nje ngekuba nguMdali wetfu, uMnikimtsetfo wetfu neMehluleli wetfu, kepha uphindze abe nguBabe wetfu wasezulwini lositsandzako. (Hla. 100:3; Isa. 33:22) Nasona futsi siphendvuka mbamba, Jehova angakhona kusicolela futsi ufuna mbamba kukwenta loko. (Hla. 86:5) Asebentisa umphrofethi Isaya, Jehova usicinisekisa ngelutsandvo utsi: “Nome ngabe tono tenu tibovu njengengati, titawentiwa tibe mhlophe njengelichwa.”—Isa. 1:18.

2. Yini lokufanele siyente nangabe sifuna kuba nekuthula nalabanye?

² Ngenca yekutsi sinesono, sonkhe sisho tintfo letibavisa buhlungu labanye nobe sente tintfo letibaphatsa kabi. (Jak. 3:2) Kodvwa loko akusho kutsi angeke sibe nebuhlobo lobuhle nalabanye. Singaba nabo nangabe sicolela. (Taga 17:9; 19:11; Mat. 18:21, 22) Nangabe lomunye asho lokutsite lokusivisa buhlungu nobe ente lokutsite lokusiphatsa kabi, Jehova ufuna simcolele. (Khol. 3:13) Sinesizatfu lesihle sekukwenta loko, ngobe Jehova usitsetselela “ngekukhululeka lokukhulu.”—Isa. 55:7.

3. Sitawucoca ngani kulesihloko?

³ Kulesihloko sitawucoca ngekutsi singamlingisa njani Jehova nakutiwa endzabeni yekucolela labanye. Ngutiphi tono lokufanele sitibike kulabadzala belibandla? Yini leyenta Jehova  afune kutsi sicolele labanye? Yini lesingayifundza kulabanye bazalwane betfu nabodzadze lababhekana nemiphumela lebuhlungu ngenca yetono talabanye?

4. (a) Yini lokufanele yentiwe sikhonti saJehova nangabe sente sono lesikhulu? (b) Uyini umsebenti walabadzala belibandla nabakhuluma nemuntfu lowonile?

⁴ Kufanele sitjele labadzala belibandla nangabe lotsite ente sono lesikhulu. Letinye tono letinkhulu titfolakala ku-1 KubaseKhorinte 6:9, 10. Umuntfu lowente sono lesikhulu usuke awephule kakhulu umtsetfo waNkulunkulu. Nangabe umKhristu ente sono lesikanjalo, kufanele athantaze kuJehova Nkulunkulu futsi kufanele akhulume nalabadzala belibandla. (Hla. 32:5; Jak. 5:14) Uyini umsebenti walabadzala belibandla? NguJehova kuphela lonelilungelo lekucolela tono ngalokuphelele, futsi loko ukwenta asebentisa inhlawulo. * Nanobe kunjalo, Jehova unike labadzala belibandla umsebenti wekuncuma kutsi loyo lowonile uyachubeka yini ayincenye yelibandla basebentisa imiBhalo. (1 Khor. 5:12) Kuze bakhone kukwenta loko, labadzala belibandla kufanele betame kutfola timphendvulo tanayi imibuto: Lesono sentiwe ngemabomu yini? Lomuntfu wetamile yini kusifihla lesono? Lesono usente sikhatsi lesidze yini? Lokubaluleke kakhulu kutfola kutsi, bukhona yini bufakazi bekutsi sewuphendvuke mbamba? Bukhona yini bufakazi bekutsi Jehova umcolele?—Imis. 3:19.

5. Ngumiphi imiphumela lemihle lebakhona ngemsebenti lowentiwa ngulabadzala belibandla?

⁵ Labadzala belibandla nabakhuluma nalowonile, umgomo wabo kwenta sincumo lesifanako naleso lesentiwe ezulwini. (Mat. 18:18) Loko kulisita njani libandla? Kuyalivikela, futsi kwenta kutsi soni lesingaphendvuki singachubeki siyincenye yelibandla futsi singabalimati bantfu baNkulunkulu labaligugu. (1 Khor. 5:6, 7, 11-13; Thit. 3:10, 11) Loku kungaphindze kusite lesoni lesingaphendvuki kutsi sicolelwe nguJehova. (Luk. 5:32) Labadzala belibandla bayamthantazela kuJehova loyo lophendvukile futsi bamcele kutsi amsite aphindze abe nebuhlobo lobuhle naye.—Jak. 5:15.

6. Nangabe umuntfu ayekelisiwe kuba nguFakazi, usengacolelwa yini? Chaza.

⁶ Asesitsi umuntfu akaphendvuki nakakhuluma nalabadzala belibandla. Kuleso simo, utawuyekeliswa kuba nguFakazi. Nangabe ephule umtsetfo wahulumende, labadzala belibandla angeke bamvikele kutsi angayitfoli imiphumela yetento takhe letimbi. Jehova uvumele tiphatsimandla kutsi tehlulele futsi tijezise nobe ngubani lowephula umtsetfo ngisho nobe aphendvukile nobe angakaphendvuki. (Rom. 13:4) Kodvwa nangabe ngekuhamba kwesikhatsi lomuntfu asanguluka futsi aphendvuke mbamba, ashintje nendlela lenta ngayo nalacabanga ngayo, Jehova ukulungele kumcolela. (Luk. 15:17-24) Utamcolela ngisho nobe ente sono lesikhulu.—2 Khr. 33:9, 12, 13; 1 Thim. 1:15.

7. Singamcolela ngamuphi umcondvo umuntfu losiphetse kabi?

⁷ Sijabula kakhulu ngekutsi awukanikwa tsine umsebenti wekuncuma kutsi Jehova utamcolela yini lowonile nobe cha. Nobe kunjalo, kukhona lokudzingeka sikwente. Kuyini? Kuletinye timo, umuntfu angasiphatsa kabi kakhulu futsi angahle acolise, acele kutsi simcolele. Kodvwa kuletinye timo angahle angacolisi. Nanobe kunjalo, singakhetsa  kumcolela futsi setame kungamtfukutseleli. Kuliciniso kutsi loko kungahle kutsatse sikhatsi kanye nemetamo, ikakhulukati nangabe asivise buhlungu kakhulu. Sicongosekulindza saSeptember 15, 1994, sitsi: “Nawucolela umuntfu lowonile, loko akusho kutsi uyavumelana naloku lokubi lakwentile. KumKhristu, kucolela kusho kwetsemba Jehova futsi ushiyele tintfo kuye. Nguye uMehluleli lolungile wako konkhe lokukhona futsi utawehlulela ngesikhatsi lesikahle.” Yini leyenta Jehova asikhutsate kutsi sicolele labanye futsi sishiyele tonkhe tintfo kuye?

8. Kucolela labanye kukhombisa njani kutsi siyabonga ngemusa waJehova?

⁸ Nasicolela sisuke sikhombisa kutsi siyabonga. Kulomunye umfanekiso, Jesu wafananisa Jehova nenkhosi leyasula sikweleti lesikhulu sesisebenti sayo lebesingasakhoni kusibhadala. Nanobe kunjalo, lesisebenti sehluleka kukhombisa umusa lesinye sisebenti lebesisikweleta imali lencane. (Mat. 18:23-35) Yini Jesu lebekasifundzisa yona? Nangabe sibonga mbamba ngemusa lomkhulu Jehova lasikhombisa wona, natsi sitabacolela labanye. (Hla. 103:9) Eminyakeni leminyenti leyendlulile, Sicongosekulindza satsi: “Ngisho nobe singabacolela tikhatsi letinyenti kangakanani labanye, loko akuyoze kulingane nendlela Nkulunkulu lasicolela ngayo nalasikhombisa ngayo umusa ngaKhristu.”

9. Bobani Jehova labakhombisa umusa? (Matewu 6:14, 15)

⁹ Labo labacolelako nabo batawucolelwa. Jehova ubakhombisa umusa labo labanemusa. (Mat. 5:7; Jak. 2:13) Jesu wakwenta kwacaca loko ngesikhatsi afundzisa bafundzi bakhe kuthantaza. (Fundza Matewu 6:14, 15.) Sitfola sifundvo lesifanako kuloko Jehova lakutjela Jobe. Lendvodza leyetsembekile beyiviswe buhlungu ngemavi lahlabako a-Elifazi, Bildadi naSofari. Jehova watjela Jobe kutsi awathantazele lamadvodza. Ngemuva kwekutsi Jobe sekente njalo, Jehova wambusisa.—Jobe 42:8-10.

10. Kuyingoti ngani kuhlala sitfukutsele? (Kubase-Efesu 4:31, 32)

¹⁰ Kuyingoti kuhlale utfukutsele. Kutfukutsela kufana nemtfwalo lowesindzako futsi Jehova ufuna siwulahle kuze sitfole kuthula. (Fundza Kubase-Efesu 4:31, 32.) Usicela kutsi siyekele ‘kutfukutsela nekuba nelulaka.’ (Hla. 37:8) Kukuhlakanipha kulalela leseluleko. Kuhlale sitfukutsele kungasilimata emtimbeni nasengcondvweni. (Taga 14:30) Nangabe sitfukutselele lotsite, loko akumlimati, njengobe nje angeke agule nangabe kungitsi lesinatse shevu. Ngako nasicolela labanye sisuke sitisita tsine. (Taga 11:17) Siba nekuthula, futsi siyakhona kuchubeka sikhonta Jehova.

11 Litsini liBhayibheli ngekutiphindziselela? (KubaseRoma 12:19-21)

¹¹ Kuphindzisela kwaJehova. Jehova akasiniketi imvume yekutiphindziselela kulotsite nakasiphetse kabi. (Fundza KubaseRoma 12:19-21.) Njengobe sinesono, angeke sikhone kwehlulela kahle njengaNkulunkulu. (Heb. 4:13) Ngalesinye sikhatsi, indlela lesitiva ngayo ingasidukisa futsi isente singakuboni lokulungile lokufanele sikwente. Jehova waphefumulela Jakobe kutsi abhale atsi: “Intfukutselo yemuntfu ayikuletsi kulunga kwaNkulunkulu.” (Jak. 1:20) Singaciniseka kutsi Jehova utawukwenta lokulungile futsi utawuciniseka kutsi wehlulela kahle.

12. Singakhombisa njani kutsi siyetsemba kutsi Jehova wehlulela kahle?

¹² Nasicolela sisuke sikhombisa kutsi siyetsemba  kutsi Jehova wehlulela kahle. Nasishiyela tintfo kuJehova, sisuke sikhombisa kutsi siyaciniseka kutsi utawulungisa wonkhe umonakalo lobangelwe sono. Eveni lakhe lelisha lasetsembise lona, tintfo letibuhlungu letenteke kitsi ‘angeke sisatikhumbula futsi angeke tisasivisa buhlungu.’ (Isa. 65:17) Nangabe lotsite asivise buhlungu kakhulu, singakhona yini vele kungamtfukutseleli? Asesicoce ngekutsi labanye bakhone njani kukwenta loku.

13-14. Yini loyifundzile ngekucolela kuloko lokwenteka kuTony naJosé?

¹³ Bazalwane betfu nabodzadze labanyenti bakhetse kubacolela labanye ngisho nobe tintfo labatentile tibavise buhlungu. Kubasite njani kwenta njalo?

¹⁴ Ngaphambi kwekutsi Tony, * lohlala ePhilippines afundze liciniso, weva kutsi umnakabo lomdzala ubulewe ngulenye indvodza lokutsiwa nguJosé. Ngaleso sikhatsi, Tony bekasheshe atfukutsele futsi asidlova, ngetulu kwaloko bekafuna kutiphindziselela kuJosé. José waboshwa ngenca yalelicala lalenta. Ngekuhamba kwesikhatsi, wakhululwa ejele futsi Tony wafunga wagomela watsi utamfuna aze amtfole bese uyambulala. Waze watsenga nesibhamu. Kuleso sikhatsi, Tony wacala kudadisha liBhayibheli naBoFakazi BaJehova. Utsi: “Njengobe bengisadadisha liBhayibheli, ngafundza kutsi bekufanele ngishintje buntfu bami nendlela bengenta ngayo futsi ngiyekele nekutfukutsela.” Ngekuhamba kwesikhatsi, Tony wabhajatiswa futsi wagcine angulomdzala welibandla. Cabanga nje kutsi wativa njani ngesikhatsi eva kutsi José naye sewunguFakazi waJehova! Ngesikhatsi bahlangana, bajabulelana futsi Tony watjela José kutsi sewumcolele. Tony utsi kucolela José kwamenta watfola injabulo langakhoni ngisho nekuyichaza. Jehova wambusisa ngaloko lakwenta.

15-16. Yini loyifundzile mayelana nekucolela kuloko lokwenteka kuPeter naSue?

¹⁵ Nga-1985, Peter naSue bebasemhlanganweni eHholweni leMbuso ngesikhatsi kuchuma ibhomu. Lenye indvodza beyihlanyele  ibhomu eHholweni leMbuso! Sue walimala kakhulu kangangekutsi akasaboni emehlweni futsi akaseva etindlebeni. Ngetulu kwaloko akasaliva neliphunga. * BoPeter naSue bavame kutibuta kutsi, ‘Ngumuntfu lonjani longenta intfo lembi kangaka?’ Ngemuva kweminyaka, lendvodza lebeyingamkhonti Jehova yaboshwa futsi yatfola sigwebo sekudzilikelwa lijele. BoPeter naSue nababutwa kutsi sebayicolele yini lendvodza, batsi: “Jehova usifundzisa kutsi kuhlale sitfukutsele kungasilimata emoyeni, emtimbeni nasengcondvweni. Ngako nayisandza kwenteka lengoti, sacela Jehova asisite singahlali sitfukutsele futsi sichubeke nemphilo.”

¹⁶ Bekumelula yini kuyicolela lendvodza? Cha. Batsi: “Njalo nje nakuphazamisa kuphila kwetfu loko lokwenteka kuSue, siphindze sitfukutsele. Kodvwa ngenca yekutsi asihlali sicabanga ngako, loko kusheshe kuphele. Ecinisweni nakungatsiwa lendvodza seyingumzalwane wetfu, singayemukela. Loku lokwenteka kusifundzise kutsi timiso teliBhayibheli tisikhulula ngendlela lebesingeke siyicabange. Kuyasidvudvuta kwati kutsi ngekushesha Jehova utawulungisa wonkhe lomonakalo.”

17. Yini loyifundzile ngekucolela kuloko lokwenteka kuMyra?

¹⁷ Myra besekavele ashadile futsi anebantfwana labancane lababili nakafundza liciniso. Indvodza yakhe ayizange ilemukele liciniso. Ngekuhamba kwesikhatsi, yaphinga futsi yawushiya umndeni wayo. Myra utsi: “Ngesikhatsi indvodza yami ingishiya kanye nebantwana betfu lababili, ngativa ngendlela labanye labativa ngayo nabashiywa ngumuntfu labamtsandzako—ngamangala, ngangakholwa, ngeva buhlungu lobukhulu, ngatisola futsi ngatfukutsela.” Nanobe lomshado waphela, kodvwa usabuva buhlungu bekushiywa yindvodza yakhe. Myra uchubeka utsi: “Kwaphela tinyanga solo ngitiva ngalendlela futsi ngabona kutsi bekulimata buhlobo bami naJehova nebuhlobo bami nalabanye.” Nyalo  utsi sewuyekele kuyitfukutselela indvodza yakhe nekuyifisela lokubi. Uyetsemba kutsi ngalelinye lilanga itawukhonta Jehova. Myra unake likusasa. Uphumelele kukhulisa bantfwana bakhe lababili ayedvwa kutsi bakhonte Jehova. Lamuhla ujabulela kukhonta Jehova akanye nebantfwana bakhe lababili kanye nemindeni yabo.

18. Yini lesingaciniseka ngako kutsi Jehova utawukwenta njengobe anguMehluleli Lophakeme?

¹⁸ Siyajabula ngekutsi awukanikwa tsine lomsebenti lomatima wekuncuma kutsi bantfu behlulelwe njani! Njengobe Jehova anguMehluleli Lophakeme, utawenta lomsebenti lobaluleke kakhulu. (Rom. 14:10-12) Siyaciniseka kutsi utawuhlale ehlulela ngekuvumelana netimiso takhe letiphakeme talokulungile nalokungakalungi. (Gen. 18:25; 1 Khos. 8:32) Akayuze ente intfo lengakalungi!

19. Utawuba yini umphumela wekwehlulela kahle kwaJehova?

¹⁹ Siyasilangatelela sikhatsi lapho Jehova atawususa khona yonkhe imiphumela lebuhlungu yesono. Ngaleso sikhatsi, bonkhe buhlungu butawucedvwa ngalokuphelele. (Hla. 72:12-14; Semb. 21:3, 4) Angeke siphindze sibukhumbule. Njengobe sisalindze leso sikhatsi lesijabulisako, sibonga kakhulu ngekutsi Jehova usiphe likhono lekucolela njengaye.