1. Jeová promete saida ba ema neʼebé arrepende an ho laran?

 MASKI Jeová mak Ida neʼebé Fó Ukun-Fuan, Kriadór no Juís, maibé nia mós ita-nia Aman neʼebé hadomi ita. (Sal 100:3; Isa 33:22) Bainhira ita halo sala hasoru nia no arrepende an ho laran, nia hakarak no iha podér atu fó perdua ba ita. (Sal 86:5) Liuhusi profeta Isaias, Jeová hatete: “Maski imi-nia sala sira mak mean, sira sei sai mutin fali hanesan jelu-rahun.”​—Isa 1:18.

2. Saida mak ita presiza halo atu iha relasaun diʼak ho ema seluk?

² Tanba ita la perfeitu, dala ruma ita koʼalia no halo buat neʼebé hakanek ema seluk nia laran. (Tgo 3:2) Maibé, neʼe la dehan katak ita labele iha relasaun diʼak ho sira. Ita bele duni iha relasaun diʼak se ita aprende atu fó perdua. (Prov 17:9; 19:11; Mt 18:21, 22) Se ema ruma koʼalia ka halo buat kiʼik ruma neʼebé hakanek ita-nia laran, Jeová hakarak ita atu perdua ema neʼe. (Kol 3:13) Ita presiza fó perdua ba nia tanba Jeová ‘fó perdua ba ita ho laran-luak’.​—Isa 55:7.

3. Iha lisaun neʼe, ita sei aprende saida?

³ Iha lisaun neʼe, ita sei aprende oinsá ema neʼebé la perfeitu bele banati-tuir Jeová no fó perdua. Ita presiza fó sai hahalok sala saida deʼit ba katuas sira? Tanbasá Jeová haruka ita atu perdua ema seluk? Saida mak ita bele aprende husi irmaun-irmán sira neʼebé hasoru susar tanba ema seluk nia sala?

4. (a) Bainhira Jeová nia atan ida halo sala sériu, saida mak nia presiza halo? (b) Katuas sira iha responsabilidade saida bainhira hasoru ema neʼebé halo sala?

⁴ Ita presiza fó sai ba katuas sira se ema ruma halo sala sériu. Bíblia fó sai kona-ba sala sériu balu iha 1 Korinto 6:9, 10. Sala sériu mak aat tebetebes tanba kontra Maromak nia ukun-fuan. Se ema Kristaun ida halo sala sira hanesan neʼe, nia presiza halo orasaun ba Jeová atu husu perdua no nia mós presiza koʼalia ho katuas kongregasaun. (Sal 32:5; Tgo 5:14) Katuas sira iha responsabilidade saida? Jeová fó responsabilidade ba katuas sira atu deside se ema neʼebé halo sala bele kontinua sai parte ba kongregasaun ka lae. (1 Kor 5:12) Maski nuneʼe, só Jeová deʼit mak iha podér atu fó perdua ba ema iha dalan neʼebé kompletu no nia fó perdua ba ita bazeia ba Jesus nia sakrifísiu. * Maibé, katuas sira hakaʼas an atu buka resposta ba pergunta sira tuirmai: Ema neʼe ho neon halo planu nanis atu halo hahalok sala ka lae? Nia koko atu subar ninia sala husi ema seluk ka lae? Nia halo sala neʼebé sériu beibeik durante tempu kleur ka lae? Importante liu mak nia hatudu sai ho klaru katak nia arrepende an ka lae? Iha evidénsia ruma neʼebé hatudu katak Jeová perdua ona nia ka lae?​—Após 3:19.

5. Oinsá katuas sira-nia serbisu lori benefísiu ba kongregasaun?

⁵ Bainhira katuas sira hasoru ema neʼebé halo sala, sira-nia objetivu mak atu foti desizaun neʼebé Jeová foti ona iha lalehan. (Mt 18:18) Oinsá arranju neʼe lori benefísiu ba kongregasaun? Bainhira hasai ema neʼebé halo sala husi kongregasaun, neʼe proteje Jeová nia bibi sira. (1 Kor 5:6, 7, 11-13; Tito 3:10, 11) Neʼe mós bele ajuda ema neʼebé halo sala atu arrepende an no hetan perdua husi Jeová. (Lc 5:32) Katuas sira halo orasaun kona-ba ema neʼebé arrepende an no husu Jeová atu ajuda ema neʼe hadiʼa fali ninia relasaun diʼak ho Jeová.​—Tgo 5:15.

6. Se ema ida hasai husi kongregasaun, nia sei bele hetan perdua ka lae? Esplika toʼok.

⁶ Oinsá se ema ida la arrepende an bainhira katuas sira hasoru nia? Se nuneʼe, ema neʼe sei hasai husi kongregasaun. Se ema neʼe kontra lei governu nian, katuas sira sei la hanetik ema neʼe atu hetan konsekuénsia husi ninia hahalok. Jeová fó lisensa ba governu sira atu tesi-lia no fó-kastigu ba ema naran deʼit neʼebé kontra lei, maski ema neʼe arrepende an ka lae. (Rom 13:4) Maibé Jeová prontu atu fó perdua ba ema neʼe se nia rekoñese katak nia halo sala, arrepende an no troka ninia hanoin no hahalok. (Lc 15:17-24) Jeová prontu atu fó perdua ba ema neʼe maski nia halo sala sériu.​—2 Krón 33:9, 12, 13; 1 Tim 1:15.

7. Fó perdua ba ema seluk neʼebé halo sala hasoru ita envolve saida deʼit?

⁷ Ita kontente atu hatene katak ita la iha responsabilidade atu deside se ema neʼebé halo sala merese hetan perdua husi Jeová ka lae. Jeová mak sei deside. Maibé iha buat ida neʼebé ita bele deside. Saida mak neʼe? Dala ruma ema neʼebé halo sala hasoru ita, husu deskulpa no husu ita atu perdua nia. Maibé dala ruma, nia la husu deskulpa. Maski nuneʼe, ita bele hili atu perdua nia no koko atu la rai hirus ba nia. Klaru katak  presiza tempu no hakaʼas an atu halo nuneʼe, liuliu se ema neʼe hakanek duni ita-nia laran. Livru Haklaken 15 Setembru 1994 hatete: “Se ita fó perdua ba ema neʼebé halo sala, neʼe la dehan katak ita simu deʼit ninia sala. Ema Kristaun neʼebé fó perdua, fiar katak Jeová sei tesi-lia ho loloos kona-ba situasaun neʼe. Jeová mak Juís ba lalehan no rai, no nia sei tesi-lia ho loloos iha tempu neʼebé loos.” Tanbasá Jeová anima ita atu fó perdua no fiar katak Jeová sei tesi-lia ho loloos?

8. Oinsá mak fó perdua hatudu katak ita hafolin Jeová nia laran-sadiʼa?

⁸ Bainhira ita fó perdua, ita hatudu katak ita hafolin Jeová nia laran-sadiʼa. Iha Jesus nia ai-knanoik ida, nia kompara Jeová ho liurai ida neʼebé halo livre ninia atan ida husi debe boot neʼebé atan neʼe labele selu fali. Maibé atan neʼe la hatudu laran-sadiʼa ba atan ida neʼebé debe osan uitoan deʼit husi nia. (Mt 18:23-35) Saida mak ita aprende? Se ita hafolin Jeová nia laran-sadiʼa ba ita, neʼe sei book ita atu perdua ema seluk. (Sal 103:9) Tinan barak liubá, Livru Haklaken ida hatete: “Maski ita fó perdua beibeik ba ema seluk, maibé neʼe labele kompara ho dalan neʼebé Maromak fó perdua no hatudu laran-sadiʼa ba ita ida-idak liuhusi Kristu nia sakrifísiu.”

9. Jeová hatudu laran-sadiʼa ba sé? (Mateus 6:14, 15)

⁹ Se ita fó perdua ba ema seluk, Jeová mós sei fó perdua ba ita. Jeová sei hatudu laran-sadiʼa ba ita se ita mós hatudu laran-sadiʼa ba ema seluk. (Mt 5:7; Tgo 2:13) Jesus esplika ho klaru kona-ba neʼe bainhira nia hanorin ninia dixípulu sira kona-ba oinsá atu halo orasaun. (Lee Mateus 6:14, 15.) Ita mós aprende ida-neʼe husi Jeová nia liafuan ba Job. Mane naʼin-tolu naran Elifaz, Bildad no Zofar nia liafuan hakanek tebes Job nia laran. Maibé Jeová haruka Job atu halo orasaun kona-ba sira. Job halo nuneʼe no Jeová haraik bensaun ba nia.​—Job 42:8-10.

10. Tanbasá rai hirus hakanek ita-nia an rasik? (Éfeso 4:31, 32)

¹⁰ Ita hakanek ita-nia an rasik bainhira ita rai hirus. Bainhira ita rai hirus, neʼe hanesan ita lori naha todan ida no Jeová hakarak ita atu sente kmaan hodi hasai tiha naha neʼe. (Lee Éfeso 4:31, 32.) Nia anima ita atu “husik tiha hirus no soe tiha laran-nakali”. (Sal 37:8) Se ita halo tuir matadalan neʼe, neʼe sei ajuda ita. Se ita rai hirus, neʼe bele lori problema ba ita-nia saúde fíziku no mentál. (Prov 14:30) Bainhira ita rai hirus ba ema ida, neʼe la fó impaktu ba ema neʼe. Ita bele kompara neʼe hanesan bainhira ita hemu venenu, neʼe la fó impaktu ba ema seluk, maibé ba ita-nia an rasik. Bainhira ita fó perdua ba ema seluk, ita lori buat diʼak ba ita-nia an rasik. (Prov 11:17) Ita sente dame iha ita-nia neon no laran no ita bele kontinua serbí Jeová.

11. Saida mak Bíblia hatete kona-ba selu fali hahalok aat? (Roma 12:19-21)

¹¹ Jeová mak iha direitu atu selu fali hahalok aat. Jeová la fó podér ba ita atu fó-kastigu ba ema neʼebé halo sala hasoru ita. (Lee Roma 12:19-21.) Tanba ita mak ema sala-naʼin no la hatene faktu hotu, ita labele tesi-lia ho loloos hanesan Maromak. (Ebr 4:13) Dala  ruma, ita-nia emosaun bele halo susar ba ita atu hatene buat neʼebé loos. Jeová dirije Tiago atu hakerek: “Ema nia hirus la kumpre buat neʼebé loos iha Maromak nia oin.” (Tgo 1:20) Ita bele fiar katak Jeová sei halo buat neʼebé loos no tesi-lia ho justisa.

12. Oinsá ita bele hatudu katak ita tau fiar ba Jeová nia justisa?

¹² Bainhira ita fó perdua, ita tau fiar ba Jeová nia justisa. Bainhira ita entrega problema ba Jeová nia liman, neʼe hatudu katak ita fiar Jeová sei hadiʼa problema hotu neʼebé mosu tanba ema nia sala. Maromak promete katak iha mundu foun, ita sei la hanoin tan memória aat no “buat sira-neʼe sei la rai nafatin iha ema nia laran”. (Isa 65:17) Maibé bainhira ema hakanek ita-nia laran, ita bele para atu rai hirus ka lae? Mai ita haree oinsá ema balu halo ida-neʼe.

13-14. Ita bele aprende saida husi Tony no José nia esperiénsia kona-ba fó perdua?

¹³ Irmaun-irmán barak deside atu fó perdua ba ema neʼebé hakanek tebes sira-nia laran. Sira hetan benefísiu saida?

¹⁴ Hanoin toʼok kona-ba Tony * neʼebé hela iha rai-Filipinas. Tinan barak antes Tony aprende lia-loos, mane ida naran José oho ninia maun. Iha tempu neʼebá, Tony mak ema neʼebé hirus-teen no gosta halo violénsia. Nia hakarak selu fali José nia hahalok aat. Polísia kaer no hatama José ba komarka tanba oho Tony nia maun. Ikusmai bainhira José sai livre husi komarka, Tony deside metin atu buka no oho José. Tony sosa kilat atu bele halo ida-neʼe. Tuirmai Tony komesa estuda Bíblia ho Testemuña ba Jeová. Nia hatete: “Bainhira haʼu estuda Bíblia, haʼu aprende katak haʼu presiza troka haʼu-nia hahalok no husik tiha haʼu-nia hirus.” Liutiha tempu balu, Tony hetan batizmu no ikusmai nia serbí nuʼudar katuas kongregasaun. Tony hakfodak tebes bainhira hatene katak José mós hetan batizmu no sai Jeová nia atan ida. Bainhira sira hasoru malu, sira hakoʼak malu no Tony hatete ba José katak nia perdua  ona José. Tony hatete katak hodi perdua José, neʼe halo nia sente haksolok tebes no la iha liafuan atu esplika ksolok neʼebé nia sente. Jeová haraik bensaun ba Tony tanba nia prontu atu fó perdua.

15-16. Ita bele aprende saida husi Peter no Sue nia esperiénsia kona-ba fó perdua?

¹⁵ Iha tinan 1985, Peter no Sue tuir reuniaun iha Reuniaun-Fatin no derrepente bomba rabenta. Mane ida tau bomba iha Reuniaun-Fatin laran. Sue hetan kanek todan neʼebé afeta ninia matan no tilun. Nia lakon ninia sentidu atu horon. * Peter no Sue hanoin beibeik: ‘Ema hanesan saida mak halo buat aat hanesan neʼe?’ Tinan barak liutiha, polísia kaer mane neʼebé tau bomba no hatama nia ba komarka. Nia laʼós Testemuña ba Jeová. Bainhira ema husu Peter no Sue se sira perdua ona mane neʼe ka lae, sira hatán: “Jeová hanorin ita katak rai hirus bele estraga ita-nia saúde fíziku, emosaun no mentál. Tan neʼe lakleur depois akontesimentu neʼe, ami husu Jeová atu ajuda ami la rai hirus no kontinua halaʼo ami-nia moris.”

¹⁶ Fasil ka lae ba sira atu fó perdua? Klaru katak dala barak susar. Sira hatete: “Dala ruma bainhira Sue hetan terus tanba akontesimentu neʼe, sentimentu hirus mosu fali. Maibé ami la kontinua hanoin kona-ba neʼe, tan neʼe sentimentu hirus lalais atu lakon. Tuir loloos, se mane neʼe ikusmai sai ita-nia irmaun, ami sei simu nia ho laran. Esperiénsia neʼe hatudu katak bainhira ita halo tuir Bíblia nia prinsípiu ita sente livre. Bíblia nia prinsípiu halo ami sente kmaan iha dalan neʼebé ami nunka bele imajina. Ami mós sente kmaan hodi hatene katak lakleur tan Jeová sei hadiʼa buat aat hotu.”

17. Ita bele aprende saida husi Myra nia esperiénsia kona-ba fó perdua?

¹⁷ Myra kaben ona no iha oan naʼin-rua  bainhira nia komesa aprende lia-loos. Ninia laʼen laʼós Testemuña. Ikusmai ninia laʼen halo adultériu no husik hela sira. Myra hatete: “Bainhira haʼu-nia laʼen husik hela haʼu no haʼu-nia oan naʼin-rua, haʼu iha sentimentu oioin hanesan hakfodak, la fiar, triste, arrepende, fó-sala ba haʼu-nia an no hirus.” Maski relasaun kaben nian kotu ona, maibé nia nafatin sente laran-kanek tanba ninia laʼen la laran-metin ba nia. Myra hatete: “Haʼu kontinua sente laran-taridu no hirus ba fulan barak no haʼu rekoñese katak sentimentu sira-neʼe afeta haʼu-nia relasaun diʼak ho Jeová no mós ema seluk.” Myra hatete katak agora nia la hirus tan no nia la espera buat aat ida atu akontese ba ninia laʼen uluk nian. No Myra hein katak loron ida ninia laʼen hakbesik ba Jeová. Myra bele tau fokus fali ba futuru. Myra haboot mesak ninia oan naʼin-rua atu serbí Jeová. Ohin loron, Myra kontente atu serbí Jeová hamutuk ho ninia oan no oan sira-nia família.

18. Tanba Jeová mak Juís neʼebé Boot Liu Hotu, ita bele iha konfiansa saida?

¹⁸ Ita sente kmaan bainhira hatene katak ita la presiza tesi-lia ba ema. Jeová mak Juís neʼebé Boot Liu Hotu no nia mak sei tesi-lia. (Rom 14:10-12) Ita bele fiar katak Jeová sei sempre tesi-lia tuir ninia matadalan neʼebé perfeitu kona-ba buat neʼebé loos no sala. (Gén 18:25; 1 Reis 8:32) Nia nunka halo buat neʼebé la justu.

19. Jeová nia justisa neʼebé perfeitu sei lori benefísiu saida?

¹⁹ Ita hein namanas ba tempu neʼebé Jeová sei halakon buat aat hotu neʼebé mosu tanba ema nia sala no la perfeitu. Iha tempu neʼebá, Jeová sei kura ita-nia laran-kanek no ita sei iha saúde neʼebé perfeitu. (Sal 72:12-14; Apok 21:3, 4) Ita sei nunka hanoin tan kona-ba susar sira neʼebé uluk ita hasoru. Nuʼudar ita hein ba tempu furak neʼe, ita agradese tebes ba Jeová tanba nia fó ba ita kbiit atu banati-tuir nia hodi fó perdua ba ema seluk.