1. ¿Tuku kamalaknuni Jehová tiku tlawakgo akgtum talakgalhin chu nitlan limakgkatsikgo?

 JEHOVÁ kiMalakatsukinakan, wa Tiku kinkamaxkiyan limapakgsin chu kiJuezkan, pero xla na xapaxkina kinTlatkan xalak akgapun (Sal. 100:3; Is. 33:22). Wa xlakata, akxni makglakgalhinanaw kxlakatin chu nitlan limakgkatsiyaw xliputum kinakujkan tuku nitlan tlawanitaw, ni kajwatiya tlan kinkatapatiyan, wata chuna tlawaputun (Sal. 86:5). Jehová limaklakaskilh palakachuwina Isaías xlakata nakinkatlawaniyan uma tamalaknun nema tlan kinkamamakgkatsiniyan. Wa: «Maski mintalakgalhinkan lu tsutsokgo xwa, xasnapapa nawan xtachuna la miki» (Is. 1:18).

2. ¿Tuku kilitlawatkan komo ni katakgalhiputunaw taʼakglhuwit amakgapitsin?

² Xlakata makglakgalhinanin akinin, ankgalhin wanaw chu tlawayaw tuku nitlan kamamakgkatsini amakgapitsin (Sant. 3:2). Pero uma ni wamputun pi nila nakatalalinaw amakgapitsin. Tuku nakinkamakgtayayan wa nakatsiniyaw tapatinanaw (Prov. 17:9; 19:11; Mat. 18:21, 22). Komo wi tiku wan o tlawa tsinu tuku nitlan kinkamamakgkatsiniyan, Jehová kgalhkgalhi pi katapatiw (Col. 3:13). Chu anan tuku xlakata xlakaskinka chuna natlawayaw. Katsiyaw pi xla xatapaxuwan kinkatapatiyan (Is. 55:7).

3. ¿Tuku nalichuwinanaw kʼuma artículo?

³ Kʼuma artículo nalichuwinanaw pi maski akinin makglakgalhinanin, tlan nastalaniyaw xliʼakxilhtit Jehová akxni katapatiyaw amakgapitsin. ¿Tuku talakgalhin talakaskin nakamakatsiniyaw lakgkgolotsin? ¿Tuku xlakata Jehová lakaskin pi kalatapatiw chatunu chatunu? ¿Chu tuku tlan nakatsiniyaw  xlakata la lipatinankgolh makgapitsi natalan xlakata xtalakgalhinkan amakgapitsin?

4. 1) ¿Tuku xlitlawat chatum kstalanina Cristo tiku tlawanit akgtum lanka talakgalhin? 2) ¿Tuku talakgatay kgalhikgo lakgkgolotsin?

⁴ Akxni wi tiku tlawa akgtum lanka talakgalhin talakaskin nakamakatsiniyaw lakgkgolotsin. Anta k1 Corintios 6:9, 10, lichuwinan makgapitsi laklanka talakgalhin. Umakgolh talakgalhin lakatsala xLimapakgsin Dios. Komo chatum kstalanina Cristo tlawa pulaktum uma talakgalhin, xlitlawanit oración Jehová xlakata naskini pi katapatilh chu nakatachuwinan lakgkgolotsin xalak congregación (Sal. 32:5; Sant. 5:14). ¿Tuku talakgatay kgalhikgo lakgkgolotsin? Kajwatiya Jehová lakgchan natapatinan putum talakgalhin, chu maklakaskin xtamakamastan Jesús. * Maski chuna, Dios kamaxkinit talakgatay lakgkgolotsin namaklakaskinkgo Biblia xlakata nakatsikgo komo makglakgalhina tlan chuntiya natamakgxtakga kcongregación o ni (1 Cor. 5:12). Xlakata chuna natlawakgo kgalhtikgo umakgolh takgalhskinin: ¿lakkaxwililh natlawa talakgalhin?, ¿matsekgputulh?, ¿akglhuwa kilhtamaku tlawalh uma talakgalhin? Chu, tuku tlakg xlakaskinka, ¿limasiya pi xlikana nitlan limakgkatsi xtalakgalhin?, ¿wi tuku limasiya pi Jehová tapatinit? (Hech. 3:19).

5. ¿La litamakgtayakgo congregación taskujut nema tlawakgo lakgkgolotsin?

⁵ Akxni lakgkgolotsin tachuwinankgo tiku tlawanit akgtum talakgalhin, tuku xlakan laksakputunkgo wa tuku laksakkanita kʼakgapun (Mat. 18:18). ¿La litamakgtaya uma congregación? Komo tiku tlawanit talakgalhin ni limasiya pi nitlan limakgkatsi xtalakgalhin, nialh maxkikan talakaskin namakgtapakgsi kcongregación, chu chuna kakuentajtlawakan amakgapitsi xborregos Jehová (1 Cor. 5:6, 7, 11-13; Tito 3:10, 11). Na tlan namakgtaya tiku tlawanit talakgalhin xlakata nitlan nalimakgkatsi tuku tlawanit chu Jehová tlan natapati (Luc. 5:32). Lakgkgolotsin tlawakgo oración xpalakata tiku nitlan limakgkatsi xtalakgalhin chu skinikgo Jehová pi kamakgtayalh namatliwakglhpara xtakanajla (Sant. 5:15).

6. Kalichuwinanti komo tiku tamakxtukanit kcongregación tlan natapati Jehová.

⁶ Kalilakpuwaw tiku tlawanit talakgalhin chu ni limasiya pi nitlan limakgkatsi tuku nitlan tlawanit akxni katachuwinan lakgkgolotsin. Xlakata uma, natlawa pi natamakxtukan kcongregación. Chu, komo lakatsalanit limapakgsin xalak país, lakgkgolotsin nila katimakgtayakgolh. Jehová kamaxkinit talakaskin mapakgsinanin namalakgaxokgekgo kaxatikawa tiku lakatsala limapakgsin, maski nalimasiya pi nitlan limakgkatsi xtalakgalhin o ni (Rom. 13:4). Komo alistalh naʼakxilha pi lu nitlan tuku tlawalh chu nalakgpali xtapuwan chu xtayat, Jehová natapati (Luc. 15:17-24). Uma chuna nala maski tlawanit laklanka talakgalhin (2 Crón. 33:9, 12, 13; 1 Tim. 1:15).

7. ¿Tuku kilhchanima natapatiyaw tiku kinkatlawanin tuku nitlan?

⁷ Paxtikatsiniyaw akxni katsiyaw pi ni kinkalakgchanan nalaksakaw komo Jehová natapati tiku tlawanit akgtum talakgalhin. Maski chuna, anan tuku chatunu akinin kinkalakgchanan natlawayaw. ¿Tuku uma? Max tiku kinkatlawanin tuku lu nitlan, nakinkaskiniyan pi katapatiw. O max nikxni chuna katitlawalh. Maski chuna, tlan nalaksakaw pi natapatiyaw, uma wamputun, nalakgmakganaw tasitsi nema kgalhiniyaw uma lataman.  Xlikana pi uma max nalin kilhtamaku chu lu tuwa namakgkatsiyaw, liwaka komo lu nitlan tuku kinkatlawaninitan. Revista La Atalaya 15 xla septiembre kata 1994 wan: «Tapatikan chatum tiku tlawanit talakgalhin ni wamputun ni kuenta tlawakan xtalakgalhin. Akxni tapatinan chatum kstalanina Cristo, wamputun pi makamaxki Jehová uma taʼakglhuwit. Jehová wa xaʼakgstitum Juez kxlikalanka kakilhtamaku, chu natlawa tuku xaʼakgstitum akxni xlilat». ¿Tuku xlakata Jehová lakaskin pi katapatinaw chu pi wa kamakamaxkiw taʼakglhuwit, uma wamputun, pi kalipawaw pi xla natlawa tuku xaʼakgstitum?

8. ¿La limasiyayaw pi xtapalh akxilhaw xtalakgalhaman Jehová?

⁸ Akxni tapatinanaw limasiyayaw pi xtapalh akxilhaw xtalakgalhaman Jehová. K’akgtum parábola, Jesús tamalakxtumilh Jehová chatum malana tiku tapatilh kskujni tiku xlaklini lhuwa tumin chu nila kxokgoni. Pero uma skujni ni tapatilh xtaskujni tiku ni lhuwa tumin xlaklini (Mat. 18:23-35). ¿Tuku xmasiyaputun Jesús? Pi komo xlikana paxtikatsiniyaw Jehová talakgalhaman nema kinkalimasiyaniyan, uma natlawa nakatapatiputunaw amakgapitsin (Sal. 103:9). Xlakata uma tema, makgasata revista La Atalaya lichuwinalh pi, maski makglhuwa nakatapatiyaw amakgapitsin, chuna la tapatinanaw nikxni katitatalakxtumilh «chuna la Dios kinkatapatiyan chu kinkalimasiyaniyan talakgalhaman xpalakata xtamakamastan Cristo».

9. ¿Tiku kalimasiyani talakgalhaman Jehová? (Mateo 6:14, 15).

⁹ Komo tapatinanaw, Jehová na nakinkatapatiyan. Xla kalimasiyani talakgalhaman tiku lakgalhamanankgo (Mat. 5:7; Sant. 2:13). Jesús liwana lichuwinalh uma akxni kamasiyanilh kstalaninanin la natlawakgo xʼoracioneskan (kalikgalhtawakga Mateo 6:14, 15). Jehová xlichuwinanita uma kxkilhtamaku Job. Uma kskujni Dios tayanilh ni xalaktlan xtachuwinkan kgalhtutu lakchixkuwin: Elifaz, Bildad chu Zofar. Jehová skinilh Job pi xkapalakaskilh kxʼoración. Chu akxni Job chuna tlawalh, Jehová sikulunatlawalh (Job 42:8-10).

10. ¿Tuku xlakata nitlan kinkakitaxtuniyan akxni wi tiku sitsiniyaw? (Efesios 4:31, 32).

¹⁰ Akxni wi tiku sitsiniyaw nitlan kinkakitaxtuniyan. Tasitsi xtachuna la takuka, chu Jehová kinkawaniyan pi kalakgmakgaw uma takuka (kalikgalhtawakga Efesios 4:31, 32). Kinkawaniyan: «Kamakgxtakgti chu kalakgmakganti tasitsi» (Sal. 37:8). Akxni lilatamayaw uma tastakyaw lu kinkamakgtayayan xlakata ni natatatlayaw chu tlan natawila kintalakapastaknikan (Prov. 14:30). Akxni wi tiku sitsiniyaw, xtachuna la komo xwaw veneno. Wata kiʼakstukan nitlan tuku kinkatlawanikanan. Wa xlakata, akxni katapatiyaw amakgapitsin, kiʼakstukan tlan kinkakitaxtuniyan (Prov. 11:17). Kgalhiyaw takaksni chu chuntiya tlan skujnaniyaw Jehová.

11. ¿Tuku wan Biblia xlakata malakgaxokgenankan? (Romanos 12:19-21).

¹¹ Kamastaw talakaskin pi wa Jehová namalakgaxokgenan. Jehová ni kinkamaxkinitan talakaskin namalakgaxokgeyaw tiku kinkatlawaniyan tuku nitlan (kalikgalhtawakga Romanos 12:19-21). Xlakata makglakgalhinanin akinin chu ni putum katsiyaw, ni kgalhiyaw liskgalala nema kgalhi Jehová chu nila lakputsananaw la xla tlawa (Heb. 4:13). Nachuna, min kilhtamaku mastayaw talakaskin pi tuku makgkatsiyaw natlawa pi ni liwana nalakapastaknanaw. Santiago tsokgli tuku malakpuwanilh Dios: «Xtasitsi chixku ni makgantaxti tuku xaʼakgstitum nema Dios  skin» (Sant. 1:20). Tlan liwana nakatsiyaw pi Jehová natlawa tuku tlan chu pi kalalh tuku xaʼakgstitum.

12. ¿La limasiyayaw pi lipawanaw pi Jehová natlawa tuku xaʼakgstitum?

¹² Akxni tapatinanaw, limasiyayaw pi lipawanaw pi Jehová natlawa tuku xaʼakgstitum. Komo mastayaw talakaskin pi Jehová kalakkaxtlawalh taʼakglhuwit, limasiyayaw pi kanajlayaw pi xla nalakkaxtlawa putum tuku lakxtlawanit talakgalhin. Kxasasti kakilhtamaku nema malaknunit, tuku nitlan titaxtunitaw “nialh katilakapastakwi chu na nialh katitawilalh kkinakujkan” (Is. 65:17). Pero ¿xlikana tlan nalakgmakganaw tasitsi nema kgalhiniyaw tiku kinkatlawanin tuku nitlan? Kaʼakxilhwi la makgapitsin chuna tlawakgonit.

13, 14. ¿Tuku masiyaniyan tuku titaxtukgolh Tony chu José?

¹³ Lhuwa kinatalankan laksakkgonit nakatapatikgo tiku katlawaninit tuku lu nitlan. ¿La litamakgtayakgonit xlakata chuna tlawakgonit?

¹⁴ Kaʼakxilhwi tuku titaxtulh Tony, * tiku lama kFilipinas. Akglhuwa kata akxni nina xtatayana Jehová xwanit, makgnika xtala. Katsilh pi chixku tiku xmakgninit xtala wanikan José. Xlakata Tony lu xaluku xwanit, na xmakgniputun. José tamaknuka kpulachin xlakata xmakgninanit. Akxni José tamakxtuka kpulachin, Tony wa pi xʼama putsa chu xʼama makgni, wa xlakata tamawalh akgtum pistola. Pero xtatayananin Jehová tsukukgolh limakgalhtawakgekgo Biblia Tony. Xla lakapastaka: «Chuna la xakkgalhtawakgatilhama, kkatsinilh pi kililakgpalit xwanit la xaklikatsi. Kililakgmakganat xwanit tasitsi». Tony tamunulh chu titaxtulh kilhtamaku kgolotsin litaxtulh kxcongregación. ¡Lu kaks lilakawa akxni katsilh pi José na xtatayana Jehová xlitaxtu! Akxni latatanokglhli laʼakgpixtiyalh chu Tony wanilh José pi xtapatinit. Tony wan pi ni katsi la nawan tuku makgkatsilh akxni tapatilh José. Uma tala katsinilh la natapatinan, chu Jehová sikulunatlawalh xlakata uma.

15, 16. ¿Tuku masiyaniyan tuku titaxtulh Peter chu Sue?

¹⁵ Kkata 1985, Peter chu Sue xwilakgo kPukgalhtawakga kʼakgtum tamakxtumit akxni kaj xalan wi tuku pankgli. Chatum chixku  xwilinit akgtum bomba kPukgalhtawakga. Xlakata uma tuku lalh, Sue nialh xkgankgawanan, chu nialhla liwana xakxilha chu xkgaxmata. * Makglhuwa, uma tamakgaxtokgat xlakpuwan: «¿Tiku tlawalh uma tuku lu nitlan?». Akglhuwa kata alistalh, tiku xtlawanit uma chu ni xtatayana Jehová xwanit, tamaknuka kpulachin chu nialh xʼamaka tamakxtukan. Kakgalhskinka Peter chu Sue komo xtapatikgonit, chu xlakan kgalhtinankgolh: «Jehová kinkamasiyaninitan pi tasitsi chu ni tapatinankan tlan kinkamakgatatatlayan kkimaknikan chu kkintalakapastaknikan. Wa xlakata, lata xapulana kskiniw pi xkinkamakgtayan naklakgmakganaw tasitsi chu xaktapatinaw».

¹⁶ ¿Ni tuwa makgkatsikgonit uma tamakgaxtokgat natapatinankgo? Ni chuna. Kaʼakxilhwi tuku wankgo: «Min kilhtamaku akxni Sue nitlan limakgkatsi tuku akgspulanit, ksitsiparayaw. Pero, xlakata nialh klilakpuwanaw tuku ktitaxtunitaw, lakgsputa tuku kmakgkatsiyaw. Chu xlikana tlan kwanaw pi komo namin kilhtamaku uma chixku xtatayana Jehová nalitaxtu, tlan nakmakgamakglhtinanaw. Uma liʼakxilhtit kinkamasiyaninitan pi akxni stalaniyaw xtastakyaw Biblia, lakgmakganaw akgtum tsinka takuka. Lu tlan kinkamamakgkatsiniyan nixawa tuku xlakpuwanaw. Na lu tlan kinkamamakgkatsiniyan akxni katsiyaw pi nialh makgas kilhtamaku Jehová nalakkaxtlawa tuku nitlan titaxtunitaw».

17. ¿Tuku masiyaniyan tuku titaxtulh Myra?

¹⁷ Myra lakgapasli Jehová akxni xtamakgaxtokgnita chu xkgalhiya chatiy laktsu xkamanan, pero xchixku ni makgamakglhtinalh xaxlikana. Titaxtulh kilhtamaku, xla akgskgawilh xpuskat chu kaʼakgxtakgwililh xfamilia. Myra lakapastaka: «Akxni kinchixku kinkaʼakgxtakgwilin, ni xakkatsi tuku naktlawa. Xakmakgkatsi tuku makgkatsikgo tiku kaʼakgskgawikan: niti xaklipawan, xkinkatsani, xaklilipuwan chu xaklakpuwan pi akit xaklin kuenta». Maski xtamakgaxtokgat lakxlalh,  chuntiya xkatsani pi xʼakgskgawikanit. Myra wan: «Akglhuwa papaʼ chuna kmakgkatsilh, chu kakxilhli pi uma tuku xakmakgkatsi xlakxtlawama la xaktalalin Jehová chu amakgapitsin». La uku, Myra wan pi nialh makgkatsi tasitsi nema xkgalhi xapulana chu pi ni lakpuwan pi kaʼakgspulalh tuku nitlan tiku xchixku xwanit. Wata kgalhkgalhi pi namin kilhtamaku tlan namakgamakglhtinan xaxlikana. Myra wa lilakpuwan kilhtamaku nema aku mima, chu ni wa tuku titaxtulh makgasa. Maski xʼakstu kamakgastakli xkamanan kxaxlikana, la uku lipaxuwa pi akxtum kataskujnanima Jehová xkamanan chu xfamilias xkamanan.

18. Xlakata Jehová wa xaPuxku Juez, ¿tuku liwana kilikatsitkan?

¹⁸ Xlakata Jehová wa xaPuxku Juez, akinin ni kililakgaputsatkan la nakalakputsananikan amakgapitsin. Jehová wa tiku natlawa uma. ¡Uma lu tlan limakgkatsiyaw! (Rom. 14:10-12). Liwana kilikanajlatkan pi xla xaʼakgstitum nalakputsanan chuna la wi xaʼakgstitum xlimapakgsin xlakata tuku tlan chu tuku nitlan (Gén. 18:25; 1 Rey. 8:32). Xla nikxni katitlawalh tuku ni xaʼakgstitum.

19. ¿Tuku tlan nakitaxtu xlakata Jehová xaʼakgstitum Juez?

¹⁹ Jehová nalakkaxtlawa putum tuku nitlan tlawanit talakgalhin. ¡Lu kgalhkgalhimaw kachilh uma kilhtamaku! Xla tlan namapaksa niku kinkakatsaniyan chu tlan nakinkamamakgkatsiniyan (Sal. 72:12-14; Apoc. 21:3, 4). Chu nialh katilakapastakwi. Xlakata nina chin uma kilhtamaku, xtapalh kaliʼakxilhwi talakgalhaman nema Jehová kinkamaxkinitan nastalaniyaw xliʼakxilhtit chu nakatapatiyaw amakgapitsin chuna la xla tlawa.