1. Kiki Yahwe ekyakuraganiza abasiisi abegarukamu?

 N’OBUKIRAABA ngu Yahwe nuwe Omuhangi waitu, Muhi w’Ebiragiro, kandi Omucwi w’Emisango, ekindi ali Isiitwe ow’okugonza. (Zab. 100:3; Is. 33:22) Obutusiisa omu maiso ge kandi tukegarukamu kuruga ha mutima, aine obusobozi n’ekihika eky’okutuganyira. (Zab. 86:5) Kurabira omu nabbi Isaya, habw’okugonza Yahwe natugumya ati: “Ebibi byanyu nobubiba nkorugoye orukutukura, biryera nkebirika.”​—Is. 1:18.

2. Kiki ekitusemeriire kukora kwegondeza omu businge n’abagenzi baitu?

² Habwokuba tituhikiriire, itwena tubaza kandi tukora ebintu ebibiihiza abandi. (Yak. 3:2) Baitu eki tikirukumanyisa ngu titusobora kuba n’enkoragana enungi nabo. Nikisoboka, kakuba twega kuba bantu abarukuganyira. (Nfu. 17:9; 19:11; Mat. 18:21, 22) Kakuba omuntu abaza rundi atukora ekintu ekitali ky’amaani baitu kikatusaaliza, Yahwe nagonza tumuganyire. (Bak. 3:13) Twine ensonga enungi habwaki tusemeriire kukikora. Habwokuba Yahwe “atuganyirra kimu.”​—Is. 55:7, NWT.

3. Bintu ki ebiturukugenda kubazaaho omu kicweka kinu?

³ Omu kicweka kinu nitugenda kubazaaho omulingo abantu abatahikiriire basobora kwegera ha kyokurorraho kya Yahwe eky’okuganyira. Bibi ki ebitusemeriire kumanyisa abagurusi? Habwaki Yahwe nagonza tuganyire abandi? Kandi kiki ekitusobora kwegera h’Abakristaayo abamu ababoineboine muno habw’ebibi eby’abantu abandi?

4. (a) Omuheereza wa Yahwe obw’akora ekibi eky’amaani kiki eky’asemeriire kukora? (b) Bujunanizibwa ki abagurusi obubaine obubatangatangana n’omusiisi?

⁴ Tusemeriire kugambira abagurusi omuntu obwakora ekibi eky’amaani. Ebibi ebimu eby’amaani nibisangwa omu 1 Abakolinso 6:9, 10. Ebibi eby’amaani bicwa ebiragiro bya Ruhanga. Kakuba Omukristaayo akora ekibi eky’amaani, asemeriire kusaba Yahwe Ruhanga kumuganyira, kandi asemeriire n’okugenda omu bagurusi b’ekitebe. (Zab. 32:5; Yak. 5:14) Bujunanizibwa ki abagurusi obubaine? Yahwe nuwe wenka aine obusobozi obw’okuganyirra kimu ebibi kandi kinu akikora nasigikirra ha kicunguro. * Baitu Yahwe ahaire abagurusi obujunanizibwa obw’okumanya omusiisi obwaraaba asemeriire kusigara omu kitebe nibasigikirra ha Byahandiikirwe. (1 Kol. 5:12) Kusobora kuhikiiriza kinu, kimu ha bintu ebibakora nukwo kulengaho kumanya eby’okugarukamu eby’ebikaguzo binu: Ekibi ekiyakozere akakigenderra? Akalengaho kukisereka abandi? Ekibi eki akakikora emirundi nyingi kumara akasumi? Ekirukukira obukuru, haroho obwakaiso oburukwoleka ngu ayegarukiremu kuruga ha mutima? Haroho obwakaiso oburukwoleka ngu Yahwe amuganyire?​—Eng. 3:19.

5. Birungi ki ebiruga omu mulimo abagurusi bakora?

⁵ Abagurusi obubatangatangana n’omusiisi, ekigendererwa kyabo kiba kiri ky’okuhika ha ncwamu Yahwe ey’emazire ira kukora omu iguru. (Mat. 18:18) Entekaniza enu egasira eta ekitebe? Erinda ekitebe hali abasiisi abanga kwegarukamu abasobora kusiisa entaama za Yahwe ez’omuhendo. (1 Kol. 5:6, 7, 11-13; Tit. 3:10, 11) Kandi n’esobora n’okukonyera omusiisi kwegarukamu kandi akagasirwa omu kuganyira kwa Yahwe. (Luk. 5:32) Abagurusi basabira omusiisi ow’ayegarukiremu kandi basaba Yahwe amukonyere kugarraho enkoragana ye na Uwe.​—Yak. 5:15.

6. Kakuba omuntu abingwa, Yahwe naaba nakyasobora kumuganyira? Soborra

⁶ Kiki ekibaho abagurusi obubatangatangana n’omuntu atarukugonza kwegarukamu. Omu nyikara nk’egi, naija kubingwa omu kitebe. Kakuba aba acwire ebiragiro bya gavumenti, abagurusi tibarukwija kumusereka ngu atahikwaho ebizibu ebirugire omu bikorwa bye ebibi. Yahwe aikiriza ab’obusobozi omu gavumenti kucwera omusango n’okufubira omuntu wena kaabe ayegarukiremu rundi nangwa. (Bar. 13:4) Hanyuma kakuba omuntu ogu akyetegereza ngu ekiyakozere kyali kibi, kandi akakora empindahinduka omu ntekereza hamu n’omu bikorwa bye, Yahwe ayetekaniize kumuganyira. (Luk. 15:17-24) Eki ky’amananu n’obukiraaba ngu omuntu ogu akakora ebibi eby’amaani.​—2 Byom. 33:9, 12, 13; 1 Tim. 1:15.

7. Mulingo ki ogutusobora kuganyiramu omuntu ow’atusiisire?

⁷ Kanikihuumuza kukimanya ngu tibuli bujunanizibwa bwaitu kucwamu ngu omusiisi aganyirwe rundi ataganyirwa! Yahwe nuwe akora encwamu egi. Baitu haroho encwamu eitusemeriire kukora. Ncwamu ki egi? Obwire obumu, omuntu nasobora kutusiisira omu mulingo ogw’amaani kandi hanyuma akatusaba ekiganyiro. Baitu obwire obundi omuntu ogu, nasobora kutatusaba ekiganyiro. Eki n’obukiraaba nukwo kiri, nitusobora kucwamu kuganyira omuntu ogu omu mulingo gw’okuleka kumwahurra enzigu kandi n’okwikara tumukwatiirwe ekiniga. Amananu gali, kinu nikisobora kutwara obwire n’okutekamu amaani kukira muno  omuntu ogu obwaraaba yatusaalize muno. Watchtower eya Sebutemba 15, 1994, n’egamba eti: “Kuganyira omusiisi tikirukumanyisa ngu nosagika ekibi kye. Hali Omukristaayo kuganyira nikimanyisa kuleka ensonga omu mikono ya Yahwe okamwesiga ngu naija kucwa omusango ogu omu mulingo ogurukukirayo oburungi. Nuwe Omucwi w’Emisingo anyakuhikiriire omu nsi n’omu iguru kandi naija kukigumiza kimu ngu twatunga obwinganiza omu kaire akahikire. Habwaki Yahwe natwekambisa kuganyira abandi n’okumwesiga ngu naija kucwa omusango ogw’obulyo?

8. Obutuganyira, twoleka tuta ngu nitusiima embabazi za Yahwe?

⁸ Obutuganyira twoleka ngu nitusiima. Omu ruganikyo orumu, Yesu akalengesaniza Yahwe n’omukama ayaganyire omu h’abairu be ibanja ery’amaani muno ery’akaba atasobora kusasura. Baitu omwiru ow’akaba aganyirwe akanga kwoleka embabazi omwiru mutaahi we ow’akaba aine ibanja lye erya sente ntaito muno. (Mat. 18:23-35) Yesu akaba natwegesa ki? Obuturaaba nitusiima mali embabazi enyingi Yahwe ez’atwolekere nikiija kutuletera kuganyira abandi. (Zab. 103:9) Emyaka nyingi enyuma Watchtower ekagamba eti: “N’obutwakuganyira abantu emirundi nyingi kwingana nkaha, titulisobora kuhika ha rulengo rwa Ruhanga orw’okuganyira n’embabazi eziyatwolekere kurabira omuli Yesu Kristo.”

9. Nibaha Yahwe abayoleka embabazi? (Matayo 6:14, 15)

⁹ Abaganyira nibaija kuganyirwa. Yahwe ayoleka embabazi hali abo ab’embabazi. (Mat. 5:7; Yak. 2:13) Yesu akooleka kurungi ensonga enu obwakaba nayegesa abegeswa be nk’oku basobora kusaba. (Soma Matayo 6:14, 15.) Nitwega isomo niryo limu omu bigambo Yahwe yagambiire omuheereza we Yobu. Omusaija omwesigwa akaba asaliirwe muno habw’ebigambo ebitali by’embabazi Erifazi, Biridadi, hamu na Zofa ebibamugambiire. Yahwe akagambira Yobu kubasabira. Hanyuma y’okubasabira, Yahwe akamuha emigisa.​—Yob. 42:8-10.

10. Habwaki ky’akabi kwahura enzigu? (Abefeso 4:31, 32)

¹⁰ Kwahura enzigu kyakabi. Kwahura enzigu kiri nk’okwetweka omugugu ogw’amaani kandi Yahwe nagonza tugwetuule nukwo tutunge obusinge. (Soma Abefeso 4:31, 32.) Yahwe n’atutererra ‘kuleka okubihirwa, n’okuruga omu kiniga.’ (Zab. 37:8) Obuturahondera obuhabuzi obu nikiija kutukonyera. Kwahura enzigu ky’akabi muno ha bwomeezi bwaitu. (Nfu. 14:30) Obutwikara twahuliire omuntu enzigu, tikiba ky’akabi ha muntu ogu, kiri nk’okunywa obutwa noteekereza ngu nibwija kukora kubi omuntu ow’akubiihize. Oihireho, obutuganyira abandi tuba twehaire ekisembo. (Nfu. 11:17) Tutunga obusinge kandi tugumizaamu nituheereza Yahwe.

11. Kiki Baibuli eky’eyegesa ha kuhoora enzigu? (Abarumi 12:19-21)

¹¹ Kuhoora enzigu kwa Yahwe. Yahwe tatuhaire obusobozi obw’okufubira omuntu ow’atusiisire. (Soma Abarumi 12:19-21.) Habw’obutahikirra bwaitu, titusobora kucwa emisango kurungi nka Ruhanga. (Baheb. 4:13) Kandi obwire obumu, enyehurra zaitu nizisobora kutuhabya kandi tukalemwa kumanya ekintu ekihikire eky’okukora. Yahwe akaterekereza Yakobo n’omwoyo gwe ogurukwera kuhandiika ati: “Ekiniga ekyomuntu tikirukukora okuhikirra kwa Ruhanga.” (Yak. 1:20) Leka tukigumye ngu Yahwe naija kukora ekintu ekihikire kandi naija kurorra kimu ngu habaho obwinganiza.

12. Nitusobora tuta kwoleka ngu nitwesiga obwinganiza bwa Yahwe?

 ¹² Obutuganyira twoleka ngu nitwesiga obwinganiza bwa Yahwe. Obutuleka ensonga omu mikono ya Yahwe twoleka ngu nitumwesiga ngu naija kumaraho ebintu byona ebibi ebireserweho ekibi. Omu nsi empyaka ey’aturaganiize, ebintu ebirukusaaliza ‘ebya kara tibiriijukwa, kunu tibiritaaha omu mutima.’ (Is. 65:17) Baitu obutuba tusaliziibwe muno, mali nikisoboka kuleka ekiniga n’okwahurra omuntu enzigu? Tekerezaaho omulingo abamu basoboire kukikoramu.

13-14. Kiki eky’oyegere ha kuganyira kuruga omu kyokurorraho kya Tony na José?

¹³ Ab’oruganda na banyaanya itwe baingi, bakacwamu kuganyira abandi n’obukiraaba ngu bakabasaaliza muno habw’ebintu ebibabakozere. Migisa ki eibatungire habw’okukikora?

¹⁴ Emyaka nyingi enyuma, Tony * ow’arukwikara omu Philippines obwakaba atakafookere omu h’Abakaiso ba Yahwe, akakizoora ngu omu ha bagenzi be abakuru akaitwa omusaija arukwetwa José. Omu kasumi ako, Tony akaba ali mukaali muno kandi akaba nagonza kuhoora enzigu. José akakwatwa kandi yateekwa omu nkomo habw’obwisi. Hanyuma, José obuyalekiirwe kuruga omu nkomo, Tony akaba acweriiremu kimu kumuserra nukwo amwite. Akagura n’emundu habw’ekigendererwa eki. Omu kasumi ako, Tony akatandika kwega Baibuli n’Abakaiso ba Yahwe. Nagamba ati: “Obunkaba ninyega Baibuli nkakyetegereza ngu nsemeriire kukora empindahinduka omu ngeso zange, kandi eki kyali nikitwarramu kuleka ekiniga kyange.” Obwire bukahika, Tony yabatizibwa kandi hanyuma yafooka mugurusi w’ekitebe. Tekerezaaho omulingo Tony yayehuliiremu obuyakyetegeriize ngu José na uwe akaba afookere omu h’Abakaiso ba Yahwe! Banu babiri obubatangatangaine bakagwangana omu kifuba kandi Tony yagambira José ngu akaba amuganyire. Tony nagamba ngu obuyaganyire José akatunga okusemererwa okw’amaani muno okw’atasobora n’okusoborra. Mali, Yahwe akaha Tony emigisa habw’okwikiriza kuganyira.

15-16. Kiki eky’oyegere ha kuganyira kuruga omu kyokurorraho kya Peter na Sue?

 ¹⁵ Omu 1985, Peter na mukazi we Sue obubakaba bali omu nsorrokano omu Kyombeko ky’Obukama, hakabaho okuhuulika okw’amaani. Omusaija akaba ategere bbomu omu Kyombeko ky’Obukama! Sue akahutaara muno eky’amuletiire kuleka kuhweza kurungi, hamu n’okuhurra. Ekindi, akaba atakyasobora n’okukaga. * Peter na Sue bakiraga kwekaguza ngu: ‘Muntu wa mulingo ki asobora kukora ekintu ekibi nk’eki?’ Hanyuma y’emyaka nyingi muno, omusaija ayategere bbomu egi bakamukwata, kandi bamucwera omusango ogw’okumara omu nkomo obwomeezi bwe bwona. Obubakagwize Peter na Sue obubaraaba baganyiire omusaija ogu bakagarukamu bati: “Yahwe natwegesa ngu, kwahura enzigu n’ekiniga by’akabi muno ha bwomeezi bwaitu. Nahabweki, hanyuma y’okuhuulika kwa bbomu, tukasaba Yahwe atukonyere tuleke kwahura enzigu n’ekiniga nukwo twikale twine obusinge.”

¹⁶ Kibanguhiire kuganyira omusaija ogu kandi bakaleka ekininga n’okumwahurra enzigu? Nangwa. Nibagumizaamu nibagamba bati: “Obwire obumu, Sue obwasaasa habw’ebihuta ebiyatungire twongera tukwatwa ekiniga baitu tituteeka muno omutima ha nsonga egi. Nahabweki enyehurra egi erahuka kuhwaho. Amananu gali, kinu nitukigamba kuruga ha mutima, ngu kakuba kiro kimu omusaija ogu ayategere bbomu afooka omu h’ab’oruganda nitwija kumutangirra. Ekyokurorraho kinu kitwegeseze ngu obututeeka omu nkora emisingi ya Baibuli, kitukonyera kwehurra twine obusinge. Amananu gali ngu, emisingi ya Baibuli etukonyera kutunga obugabe omu miringo nyingi eitutasobora n’okutekerezaaho! Kandi nituhuumuzibwa kukimanya ngu omu kasumi akatali ka hara, Yahwe naija kumaraho ebizibu byona.”

17. Kiki eky’oyegere ha kuganyira kuruga omu kyokurorraho kya Myra?

¹⁷ Myra nambere yayegiire amananu akaba  amazire ira kutaaha obuswere kandi aine abaana babiri abato. Iba ataikirize amananu. Obwire bukahika yasihana kandi yalekaho eka ye. Myra nagamba ati: “Iba nyowe obuyandekereho hamu n’abaana baitu babiri, nk’atunga enyehurra baingi ezibakira kutunga obubagobezebwa omugonzebwa wabo nk’okuganya, kweijukya, kwecwera omusango, hamu n’ekiniga.” N’obukiraaba ngu obuswere bwabo bukahwaho, obusaasi obw’okumugobeza bukaikaraho. Myra nagumizaamu ati: “Enyehurra ezi zikandetera kwetuntura n’okwikara nyine ekiniga kumara emyezi nyingi, kandi nkakyetegereza ngu zikaba zitandikire kusiisa enkoragana yange na Yahwe hamu n’abantu abandi.” Myra hati nagamba ngu akaleka ekiniga kandi tarukugonza ekintu kyona ekibi kihike ha musaija ow’akaba ali iba. Nanihira ngu omusaija ogu kiro kimu alirra haihi na Yahwe. Myra hati omutima agutaire ha bintu ebirungi Yahwe ebyaraganiize habw’akasumi ak’omu maiso. Akasobora kukuza abaana be babiri ali wenka, kandi y’abakonyera kufooka baheereza ba Yahwe. Omu kasumi kanu, Myra aine okusemererwa kwingi okw’okuheereza Yahwe ali hamu n’abaana hamu n’ab’omu maka gaabo.

18. Kiki Yahwe eky’arukwija kukora, nk’Omucwi w’Emisango Arukukirrayo kimu?

¹⁸ Kanikihuumuza muno kukimanya ngu titwine mugugu ogw’okucwamu omulingo abantu basemeriire kucwerwamu omusango! Habwokuba Yahwe nuwe Omucwi w’Emisango arukukirrayo kimu, naija kuhikiriza obujunanizibwa obu obukuru. (Bar. 14:10-12) Tumwesigire kimu ngu naija kucwaga emisango nasigikirra ha ndengo ze ez’okuhikirra ezirukukwata ha bihikire n’ebigwire. (Kub. 18:25; 1 Bakam. 8:32) Tasobora kukora ekintu kyona ekitahikire!

19. Yahwe habwokuba w’obwinganiza, kiki eky’arukwija kukora?

¹⁹ Tulindiriire n’ekihika kingi akasumi nambere Yahwe alimarraho kimu ebizibu byona ebireserweho obutahikirra bw’abantu hamu n’ekibi. Omu kasumi ako, obusaasi bwona obutwine omu mutima rundi obw’omubiri nibwija kwihirwaho kimu. (Zab. 72:12-14; Kus. 21:3, 4) Titulyongera kubwijuka. Obuturaaba tulindiriire akasumi ako kuhika, tusemeriire kusiima Yahwe habwokuba atuhaire obusobozi obw’okwegera ha kyokurorraho kye eky’okuganyira.