1. Kasi Yehova wakuŵalayizga vichi ŵakwananga awo ŵapera?

 NANGAULI Yehova ni Mlengi withu, Mupi wa Dango, na Mweruzgi, kweni ni Dada withu wachitemwa wakuchanya. (Sal. 100:3; Yes. 33:22) Para tamunangira ndipo tapera kufumira pasi pamtima, iyo wakuŵa wakunozgeka kutigowokera. (Sal. 86:5) Kwizira mwa ntchimi Yesaya, Yehova mwachitemwa wakutilayizga kuti: “Nanga zakwananga zinu ziŵe nga ntchinthu chiswesi, zizgokenge zituŵa nga ntchiwuvi chakukhoma.”—Yes. 1:18.

2. Kasi tikwenera kuchita wuli usange tikukhumba kuŵa paubwezi uwemi na ŵanji?

² Chifukwa chakuti ndise ŵambura kufikapo, tose tikuyowoya na kuchita vinthu ivyo vikukhuŵazga ŵanji. (Yak. 3:2) Ndipouli, ichi chikung’anamura kuti tingaleka kuŵaso nawo paubwezi yayi. Tingaŵa nawo paubwezi para nase tingaŵa na mtima wakugowokera ŵanyithu. (Zinth. 17:9; 19:11; Mat. 18:21, 22) Para tabudirana pa tunthu tuchokotuchoko, Yehova wakukhumba kuti tigowokeranenge. (Kol. 3:13) Tili na chifukwa chiwemi chakuchitira nthena. Nakuti nase Yehova ‘wakutigowokera chomene.’—Yes. 55:7.

3. Kasi tidumbiskanenge vichi mu nkhani iyi?

³ Mu nkhani iyi, tiwonenge umo taŵanthu ŵambura kufikapo tingamuyezgera Yehova pa nkhani yakugowokera. Kasi ni zakwananga wuli izo tikwenera kuphalira ŵalara? Chifukwa wuli Yehova wakutichiska kuti tigowokerenge ŵanji? Ndipo kasi  tingasambirako vichi ku ŵabali na ŵadumbu ŵithu awo ŵali kutamburapo chomene chifukwa cha zakwananga za ŵanji?

4. (a) Para muteŵeti wa Yehova wachita kwananga kukuru, kasi wakwenera kuchita vichi? (b) Kasi udindo wa ŵalara ngwakuti wuli para ŵakukumana na uyo wachita kwananga?

⁴ Tikwenera kuphalira ŵalara para munyake wachita kwananga kukuru. Viyelezgero vya kwananga kukuru vikusangika pa 1 Ŵakorinte 6:9, 10. Para munthu wachita kwananga kukuru wakulongora kuti wakuyuyura chomene dango la Chiuta. Usange Mkhristu wachita kwananga kukuru, wakwenera kulomba kwa Yehova Chiuta kuti wamugowokere kweniso kuphalira ŵalara mu mpingo. (Sal. 32:5; Yak. 5:14) Kasi ŵalara ŵali na udindo wuli? Yehova pera ndiyo wali na wenelero wakugowokera na kusisita zakwananga za munthu, ndipo wakugowokera zakwananga zithu chifukwa cha sembe yakuwombora. * Nangauli vili nthena, Yehova wali kuŵapa ŵalara udindo wakuwona usange wakwananga wangalutilira kukhala mu mpingo, ndipo ŵakuchita nthena mwakugwiliskira ntchito Malemba. (1 Kor. 5:12) Kuti ŵafiske kuchita nthena, ŵalara ŵakwenera kusanga mazgoro gha mafumbo ghakulondezgapo agha: Kasi wakachitira dala kwananga uku? Kasi wakayezganga kubisa zakwananga izo wakachita? Kasi wachita mwakuwerezgawerezga kwananga uku kweniso kwanyengo yitali? Ndiposo chakuzirwa chomene, kasi pali ukaboni wakuti munthu uyu ngwakupera nadi? Kasi pali ukaboni wakuti Yehova wamugowokera munthu uyu?—Mil. 3:19.

5. Kasi pakuŵa vyandulo wuli pa mulimo uwo ŵalara ŵakuchita?

⁵ Para ŵalara ŵakukumana na uyo wachita kwananga kukuru, chilato chawo ntchakuti ivyo ŵadumurenge pano pa charu chapasi viyane na ivyo vyakakika kale kuchanya. (Mat. 18:18) Kasi ndondomeko iyi yikovwira wuli mpingo? Yikovwira kuti ŵakwananga awo mbambura kupera ŵawuskikemo mu mpingo mwakuti ŵaleke kunanga mberere za Yehova izo ni zakuzirwa chomene. (1 Kor. 5:6, 7, 11-13; Tito 3:10, 11) Yingawovwiraso wakwananga kuti wapere na kugowokereka na Yehova. (Luka 5:32) Ŵalara ŵakumulombera wakwananga uyo wapera kuti Yehova wamovwire kuwezgerapo ubwezi wake na iyo.—Yak. 5:15.

6. Usange munthu wasezgeka, kasi ntchamachitiko kuti Yehova wamugowokere? Longosorani.

⁶ Tiyelezgere kuti munthu walongora kuti ngwambura kupera para ŵalara ŵakumana nayo. Usange ndimo viliri, munthu uyu wakusezgeka mu mpingo. Usange waswa dango la boma, ŵalara ŵamuvikilirenge yayi ku chilango cha ivyo wachita. Yehova wali kuzomerezga ŵalara ŵa boma kweruzga na kulanga waliyose uyo waswa dango, kwali ngwakupera panji yayi. (Rom. 13:4) Kweni para munthu uyu pamanyuma wawamo kuti ivyo wakachita vikaŵa viheni na kusintha, Yehova ngwakunozgeka kumugowokera. (Luka 15:17-24) Yehova wangamugowokera nanga vingaŵa kuti zakwananga za munthu uyo zanguŵa zikuru chomene.—2 Mid. 33:9, 12, 13; 1 Tim. 1:15.

7. Kasi tingamugowokera wuli munthu uyo watibudira?

⁷ Tikuwonga chomene kumanya kuti tilije udindo wakusankha kuti Yehova wagowokere munthu panji yayi. Ndipouli, pali chinthu chinyake icho nkhwa ise kusankha. Kasi ntchivichi? Nyengo zinyake munthu wangatinangira chomene, kweni pamanyuma wangaphepiska na kupempha kuti timugowokere. Kweni nyengo zinyakeso ndimo wangachitira yayi. Nanga vingaŵa nthena, tingasankha waka kumugowokera na kusulako waka. Kweni kuyowoya unenesko, kuchita nthena kungakhumbikwa nyengo na kuŵikapo mtima, chomene usange ivyo  wanguchita vyangutiŵinya chomene. Gongwe la Mulinda Lachingelezi la Seputembala 15, 1994, likuti: “Para wamugowokera wakwananga, chikung’anamura kuti ukuzomerezga kwananga kwake yayi. Mkhristu uyo wakugowokera wakugomezga kuti Yehova ndiyo weruzgenge nkhani iyo mwakwenelera. Iyo ni Mweruzgi waurunji mu chilengiwa chose, ndipo wawoneseskenge kuti urunji wachitika pa nyengo yakwenelera.” Chifukwa wuli Yehova wakutichiska kuti tigowokenge na kumugomezga kuti ndiyo weruzgenge mwakwenelera?

8. Kasi para tikugowokera ŵanyithu tikulongora wuli kuti tikuwonga lusungu lwa Yehova?

⁸ Para tikugowoka, tikulongora kuti tikuwonga lusungu lwa Yehova. Mu ntharika yinyake, Yesu wakayaniska Yehova na themba ilo likagowokera muzga wake uyo wakatondeka kuwezga ngongoli yikuru. Kweni muzga uyo wakagowokereka uyu, wakatondeka kulongora lusungu kwa muzga uyo wakaŵa na ngongoli yake yichoko waka. (Mat. 18:23-35) Kasi apa Yesu wakutisambizga vichi? Usange tikuwonga nadi lusungu lukuru ulo Yehova wali kutilongora, vitovwirenge kuti nase tigowokerenge ŵanyithu. (Sal. 103:9) Vyaka ivyo vyajumpha, Gongwe la Mulinda linyake likayowoya kuti: “Kwali ŵanyithu tingaŵagowokera kanandi wuli, kweni vizamuyanapo yayi na kugowoka kwa Chiuta na lusungu ulo wali kutilongora kwizira mu sembe ya Khristu.”

9. Kasi mbanjani awo Yehova wakuŵalongora lusungu? (Mateyu 6:14, 15)

⁹ Awo ŵakugowokera ŵanyawo, nawo ŵazamugowokereka. Yehova wakulongora lusungu ku awo mbalusungu. (Mat. 5:7; Yak. 2:13) Fundo iyi Yesu wakayilongosora mwakupulikikwa makora apo wakasambizganga ŵasambiri ŵake kulomba. (Ŵazgani Mateyu 6:14, 15.) Tikusambiraso fundo yakuyana waka iyi pa ivyo Yehova wakaphalira muteŵeti wake Yobu. Munthu wakugomezgeka uyu wakakhuŵazgika chomene na mazgu gha ŵanalume ŵatatu aŵa, Elifazi, Bilidadi na Zofari. Yehova wakaphalira Yobu kuti waŵalombere. Yobu wati wachita nthena, Yehova wakamutumbika.—Yobu 42:8-10.

10. Chifukwa wuli kulutilira kukwiya nkhwakofya? (Ŵaefeso 4:31, 32)

¹⁰ Usange tikulutilira kukwiya tikujipweteka waka tekha. Munthu para wakwiya wakuŵa nga wanyamura katundu muzito, ntheura Yehova wakukhumba kuti tiŵenge na mtende uwo ukwiza para tawuskamo ukali. (Ŵazgani Ŵaefeso 4:31, 32.) Wakutichiska kuti ‘titaye ukali na kuleka kutukutwa.’ (Sal. 37:8) Ni vinjeru kulondezga ulongozgi uwu. Usange tikulutilira kukwiyira munthu munyake uyo watinangira, tikujipweteka waka tekha, uyo watibudira yayi. (Zinth. 14:30) Vikuyana waka nakuti mwamwa poyizoni. Kasi ni njani wangapwetekeka? Uyo wamubudirani ngati? Yayi, imwe mwamwa poyizoni ndimwe mupwetekekenge. Ntheura para tikugowokera ŵanji, tikusanga chandulo ndise. (Zinth. 11:17) Tikuŵa na mtende wa mu mtima ndipo tikulutilira kuteŵetera Yehova.

11. Kasi Baibolo likuti wuli pa nkhani ya kuwezgera? (Ŵaroma 12:19-21)

¹¹ Kuwezgera nkhwa Yehova. Yehova wandatipe yayi wenelero wakuti tiwezgerenge tekha para munyake watinangira. (Ŵazgani Ŵaroma 12:19-21.) Chifukwa chakuti ndise ŵambura kufikapo, tingeruzga makora yayi vinthu nga umo viliri na Chiuta. (Heb. 4:13) Ndipo nyengo zinyake tikweruzga kuyana na umo tikuwonera waka vinthu panji umo tikujipulikira waka panyengo iyo. Yehova wakakhuŵilizga Yakobe kulemba kuti: “Pakuti ukali wa munthu ukulongora urunji wa Chiuta yayi.” (Yak. 1:20) Tikwenera kugomezga kuti Yehova wachitenge icho ntchakwenelera na kuwoneseska kuti urunji wachitika.

12. Kasi tingalongora wuli kuti tikugomezga kuti Yehova ndiyo wangachita vinthu mwaurunji?

 ¹² Kugowokera kukulongora kuti tikugomezga kuti Yehova wakuchita vinthu mwaurunji. Para tikugomezga kuti Yehova ndiyo wangeruzga vinthu vyose mwaurunji, tikulongora kuti tikusimikizga kuti iyo ndiyo wazamuwuskapo viheni vyose ivyo vili kwiza chifukwa cha kwananga. Mu charu chiphya icho walayizga, viheni ivyo vikatichitikira, ‘vizamukumbukikaso yayi ndipo vizamunjiraso yayi mu mtima’ kwamuyirayira. (Yes. 65:17) Kweni kasi para takhuŵara chomene ntchamachitiko kuleka kukwiya panji kusungira vyakusingo munthu? Wonani umo ŵanyake ŵafiskira kuchita nthena.

13-14. Kasi mwasambira vichi pa nkhani yakugowokerana pa ivyo vikachitikira Tony na José?

¹³ Ŵabali na ŵadumbu ŵithu ŵanandi ŵakusankha kugowoka nanga ŵangaŵa kuti ŵakhuŵara chomene na vyakuchita vya ŵanji. Kasi ŵasanga vyandulo wuli chifukwa chakuchita nthena?

¹⁴ Vyaka vinandi kumanyuma pambere wandasambire unenesko, Tony, * uyo wakukhala ku Philippines, wakaphalirika kuti mukuru wake wakomeka na mwanalume munyake zina lake José. Pa nyengo iyo, Tony wakaŵa munthu wankhaza chomene, ndipo wakakhumbanga kuwezgera. José wakakakika ndipo wakajalirika mu jele chifukwa cha ivyo wakachita. Pamanyuma, José wati wafumiskika mu jele, Tony wakaŵikapo mtima kuti wamupenjenge na kumukoma. Ndipo wakagura na futi wuwo yakuti wamukomere. Nyengo yichoko waka Tony wakamba kusambira Baibolo na Ŵakaboni ŵa Yehova. Iyo wakuti: “Apo nkhasambiranga Baibolo nkhamanya kuti nkhakhumbikwiranga kuti nisinthe wunthu wane na vyakuchita vyane, ndipo ivi vikasazgangapo kuwerako ku ukali wane.” Pati pajumpha nyengo, Tony wakabatizika ndipo pamanyuma wakimikika kuŵa mulara mu mpingo. Ghanaghanirani waka umo wakajipulikira wati wapulika kuti José nayoso wali kubatizika ndipo ni muteŵeti wa Yehova. Ŵanthu ŵaŵiri aŵa ŵati ŵakumana, ŵakavumbatirana, ndipo Tony wakaphalira José kuti wali kumugowokera. Tony wakuti kumugowokera José kukamupangiska kuti waŵe wakukondwa chomene mwakuti chikamuŵira chakusuzga kuti walongosore umo wakajipulikiranga.  Enya, Yehova wakamutumbika Tony chifukwa chakuŵa na mtima wakugowoka.

15-16. Kasi mwasambirako vichi kwa Peter na Sue pa nkhani yakugowokera?

¹⁵ Mu 1985, Peter na Sue ŵakaŵa ku maungano pa Nyumba ya Ufumu, apo mwamabuchi bomba likaphulika. Munthu wakathya bomba mu Nyumba ya Ufumu. Sue wakapwetekeka chomene ndipo maso na makutu ghake vikanangikirathu na kuleka kugwira ntchito. Kweniso mphuno zake zikaleka kunuska vinthu. * Kanandi Peter na Sue ŵakajifumbanga kuti: ‘Kasi ni munthu wamtundu wuli uyo wangachita vinthu viheni nthena?’ Vyaka vinandi vyati vyajumphapo, munthu uyo wakathya bomba ili, uyo wakaŵa muteŵeti wa Yehova yayi, wakakakika, ndipo wakeruzgika kuti wakakhale mu jele umoyo wake wose. Ŵati ŵafumbika usange ŵakamugowokera munthu uyu, Peter na Sue ŵakazgora kuti: “Yehova wakutisambizga kuti kulutilira kusunga vyakusingo, kungatipwetekaso waka taŵene mwakuthupi, na kutitimbanizga maghanoghano. Ntheura bomba lira lati laphulika waka tikamupempha Yehova kuti watovwire kugowoka na kuleka kusunga vyakusingo mwakuti tikhalenge mwamtende pa umoyo withu.”

¹⁶ Kasi chaŵa chipusu nthena kwa iwo kuti ŵamugowokere munthu uyu? Yayi. Iwo ŵakuti: “Nyengo yiliyose para ulwari wa Sue wawuka, tikuŵangaso ŵakukwiya chomene. Kweni tikulutilira yayi kughanaghanira vinthu ivi, ndipo ivi vikovwira kuti ukali uwo tanguŵa nawo umare. Nakuti tingayowoya kufumira pasi pamtima kuti, usange uyo wakathya bomba wangazakazgoka mubali zuŵa linyake, tizamumupokelera. Ivyo vikachitika apa vili kutisambizga kuti fundo za mu Baibolo zikufwatura. Nakuti zili kutifwatura munthowa zinandi izo tikaghanaghanangako yayi. Tikupembuzgikaso chomene kumanya kuti sonosono apa Yehova wamazgenge viheni vyose.”

17. Kasi mwasambirako vichi kwa Myra pa nkhani yakugowokera?

¹⁷ Myra wakasambira unenesko wati watengwa kale ndipo wakaŵa na ŵana ŵachokoŵachoko  ŵaŵiri. Mfumu wake wakakana kusambira unenesko. Nyengo yati yajumphapo, wakachita uleŵi na kuyileka mbumba yake. Myra wakuti: “Mfumu wane wati wanileka na ŵana ŵane ŵaŵiri, nane nkhajipulika nga umo ŵanandi ŵakujipulikira awo ŵakutemweka ŵawo ŵaŵayenda pasi. Nane nkhagomezganga yayi ivyo vikachitika, nkhaŵa na chitima, kudandawura, kujiyimba mulandu kuti ndine napangiska kuti mfumu wane wachite ivi, kweniso nkhakwiya.” Nangauli nthengwa yikamara, kweni vikaŵa kuti vichali kumuŵinya ivyo mfumu wake wakachita. Myra wakutiso: “Nkhalutilira kufipa mtima kweniso kukwiya kwa myezi yinandi, kweni pamanyuma nkhamanya kuti ivi vyamba kutimbanizga ubwezi wane na Yehova na ŵanji.” Myra pasono wakuti wali kuwerako ku ukali wake ndipo wakumusungiraso vyakusingo yayi mfumu wake wakale nesi kumukhumbira viheni. Iyo wakugomezga kuti zuŵa limoza mfumu wake wakale uyu wazamwamba kuteŵetera Yehova. Myra pasono wakulaŵiska waka kunthazi. Walera yekha ŵana ŵaŵiri ŵara kuŵa ŵateŵeti ŵa Yehova. Ndipo pasono Myra wakukondwa kuteŵetera Yehova lumoza na ŵana ŵake kweniso mbumba zawo.

18. Kasi tikwenera kugomezga kuti Mweruzgi Mukuru Yehova weruzgenge wuli?

¹⁸ Tikuŵa na mtende wa mu mtima kumanya kuti ni udindo withu yayi kusankha umo ŵanthu ŵakwenera kweruzgikira. Mweruzgi Mukuru Yehova ndiyo wakuchita ntchito yakuzirwa iyi. (Rom. 14:10-12) Tikugomezga na mtima wose kuti weruzgenge mwakukolerana na malango ghake ghaurunji pa nkhani ya icho ntchiwemi na chiheni. (Gen. 18:25; 1 Mathe. 8:32) Iyo wazamuchitapo yayi vinthu mwambura urunji.

19. Kasi Yehova wazamufiska vichi pakuŵa mweruzgi waurunji?

¹⁹ Tikulindilira mwakunweka nyengo iyo Yehova wazamuwuskirapothu masuzgo ghose agho ghali kwiza chifukwa chakuti ndise ŵambura kufikapo kweniso kwananga. Panyengo iyo, masuzgo ghithu ghose ghazamumara kwamuyirayira. (Sal. 72:12-14; Chivu. 21:3, 4) Vinthu vyakale vizamukumbukikaso chara. Apo tikulindilira nyengo yapadera iyi kuti yifike, tikumuwonga chomene Yehova chifukwa cha kutipa mwaŵi wakuti timuyezge pakuŵa ŵanthu ŵakugowokera.