1. Se a te tautoga ne fai ne Ieova ki tino agasala māfai ko sala‵mō?

 E TIGA eiloa a Ieova ko te ‵tou Mafuaga, Tino Fai Tulafono, mo te Famasino, a ia foki ko te ‵tou Tamana alofa i te lagi. (Sala. 100:3; Isa. 33:22) Kafai e agasala tatou ki a ia kae sala‵mō ‵tonu, e se mafai fua o fakamagalo ne ia tatou, kae e manako malosi foki a ia ke fai penā. (Sala. 86:5) E auala i te pelofeta ko Isaia, ne tauto mai a Ieova mo te alofa, penei: “Faitalia me fai otou agasala e pelā me se laugatu kula, ka fai eiloa a mea konā ke ‵kena e pelā me se kiona.”—Isa. 1:18.

2. Kafai e ma‵nako tatou ke maua se va filemu mo nisi tino, se a te mea e ‵tau o fai ne tatou?

² Ona ko tatou e se ‵lei katoatoa, e fai‵pati kae fai ne tatou a mea kolā e ita ei a nisi tino. (Iako. 3:2) Kae e se ko tena uiga, me ko se toe mafai o maua se fesokotakiga ‵pili mo latou. E mafai o toe maua ne tatou māfai e taumafai tatou ke uiga fakamagalo. (Faata. 17:9; 19:11; Mata. 18:21, 22) Kafai ne fakalogo‵mae sāle tatou ne se tino i tamā mea fua, e manako a Ieova ke fakamagalo ne tatou. (Kol 3:13) Kae e isi se pogai ‵lei e ‵tau ei o fai tatou penā. Me i a Ieova ne fakamagalo ne ia tatou “i se auala lasi.”—Isa. 55:7.

3. Ne a mea ka onoono tatou ki ei i te mataupu tenei?

³ I te mataupu tenei, ka onoono tatou ki te auala e mafai ei ne tino sē ‵lei katoatoa o fakaakoako ki te fakamagaloga a  Ieova. Ne a agasala e ‵tau o fakaasi ki toeaina? Kaia e fakamalosi tatou ne Ieova ke fakamagalo a nisi tino? Kae ne a mea e tauloto ne tatou mai i nisi taina tali‵tonu kolā ne logo‵mae malosi ona ko agasala a nisi tino?

4. (a) Kafai ko fai ne se tavini a Ieova se agasala matagā, ne a mea e ‵tau o fai ne ia? (e) Se a te tiute o toeaina māfai ko fai‵pati fakatasi latou mo te tino agasala?

⁴ A agasala matagā e ‵tau o fakaasi ki toeaina. E pelā eiloa mo agasala kolā e fakaasi mai i te 1 Kolinito 6:9, 10. A agasala matagā ko te ‵teke tonu atu ki te tulafono a te Atua i se auala masei ‵ki. Kafai e fai ne se Kelisiano se agasala penā, e ‵tau o ‵talo atu a ia ki a Ieova te Atua, kae fanatu ki toeaina i te fakapotopotoga. (Sala. 32:5; Iako. 5:14) Se a te tiute o toeaina? Ko Ieova tokotasi fua e isi sena malosi ke fakamagalo katoatoa ne ia a agasala, telā e fakavae ki te taulaga togiola ne fakatoka ne ia. * Kae ne tuku ne Ieova a te tiute ki toeaina ke mafai o fakaiku aka ne latou e ‵tusa mo te Tusi Tapu ke fakatumau io me ikai a te tino tenā i te fakapotopotoga. (1 Koli. 5:12) Kae ke fai ne latou te mea tenā, e ‵tau o taumafai latou ke iloa faka‵lei a tali ki fesili konei: E mata, a te agasala ne fai mo te iloa tonu? E mata, ne palani faka‵lei a te tino tenā ke fai ne ia te mea ‵se? E mata, ko leva eiloa ne fai ne ia te agasala tenā? Kae ko te ‵toe mea tāua, e a, e isi ne fakamaoniga me i a ia ko salamō tonu? E mata, e isi ne fakaasiga me ko oti ne fakamagalo a ia ne Ieova?—Galu. 3:19.

5. Ne a fakamanuiaga e maua mai i galuega a toeaina?

⁵ Kafai ko fai‵pati fakatasi a toeaina mo te tino fai mea ‵se, e fakamoe‵moe latou ke fai se fakaikuga e ‵tusa mo te taliaga ko oti ne maua ne latou mai te lagi. (Mata. 18:18) E aoga pefea te fakatokaga tenei ki te fakapotopotoga? E fakamautinoa i ei me e tapale keatea te tino fai mea ‵se sē salamō telā e mafai o pokotia i ei a mamoe fakapelepele a Ieova. (1 Koli. 5:6, 7, 11-13; Tito 3:10, 11) E mafai foki o aoga ki te tino agasala ke salamō kae ke maua a mea aoga mai te fakamagaloga a Ieova. (Luka 5:32) E ‵talo a toeaina mō te tino salamō kae fakamolemole ki a Ieova ke fesoasoani o toe faka‵lei aka tena feitu faka-te-agaga.—Iako. 5:15.

6. Kafai se tino ne fakatea, e mata, koi mafai a ia o fakamagalo? Fakamatala mai.

⁶ Mafaufau la māfai te tino e se salamō i te taimi e fai‵pati fakatasi latou mo toeaina. I te tulaga tenā, ka fakatea a ia mai te fakapotopotoga. Kafai ne soli ne ia se tulafono a te fenua, e se puipui ne toeaina a ia mai i ikuga o tena mea ne fai. E talia ne Ieova a malo o tāgata ke fakamasino kae fakasala so se tino telā e soli ne ia te tulafono—faitalia me e salamō io me ikai. (Loma 13:4) Kae kafai se tino ko salamō tonu fakamuli kae ‵fuli tena olaga, e loto fiafia a Ieova o fakamagalo a ia. (Luka 15:17-24) Ka fakamagalo eiloa faitalia te matagā o tena agasala ne fai.—2 Nofo. 33:9, 12, 13; 1 Timo. 1:15.

7. I te auala fea e mafai o fakamagalo ne tatou se tino telā ne agasala mai ki a tatou?

⁷ E fakafetai tatou ke iloa atu me e se ‵tau o fakaiku aka ne tatou me ka fakamagalo io me ikai ne Ieova se tino agasala! Kae e isi eiloa se mea e ‵tau o fakaiku aka ne tatou. Se a te mea tenā? I nisi taimi, e agasala mai se tino ki a tatou—e mafai foki o matagā tena agasala—kae oti ko fakatoese mai ke fakamagalo aka a ia. I nisi taimi e se fakatoese mai te tino tenā. E tiga eiloa te feitu tenā, e mafai o filifili ne tatou ke fakamagalo a ia ko te mea ke mafai o  ave keatea te ‵tou ita fakamoemoe mo te kaitaua ki a ia. E pelā mo te masani, e mafai o uke a taimi mo taumafaiga ke fai penā, maise māfai ne logo‵mae malosi tatou. E fai mai Te Faleleoleo Maluga i a Setema 15, 1995, penei “Kafai ko fakamagalo ne koe se tino agasala, e se fakauiga i ei me ko talia ne koe te agasala. Mō te Kelisiano, a te fakamagaloga e fakauiga eiloa ki te talitonu katoatoa mo te tuku atu o fakalavelave ki lima o Ieova. Ko ia ko te Fāmasino fai mea tonu i te lagi mo te lalolagi, kae ka fai eiloa ne ia a fakamasinoga ‵tonu i te taimi tonu.” Kaia e fakamalosi ei tatou ne Ieova ke fakamagalo a nisi tino kae tuku atu te fakamasinoga tonu ki te tino tonu—ki ana lima?

8. E fakaasi atu pefea ne tatou a te loto fakafetai ki te alofa fakamagalo o Ieova māfai ko fakamagalo ne tatou a nisi tino?

⁸ A te fakamagalo atu e fakaasi atu ei te loto fakafetai. I se auala fakatusa, ne faka‵pau a Ieova ki se matai telā ne fakamagalo ne ia se agasala lasi a sena tavini e tokotasi telā ko se mafai o ‵togi ne ia. Kae ko te tavini tenā ne seki alofa o fakamagalo ne ia se tavini telā ne foliki fua te aofaki tupe ne kaitalafu ne ia mai i a ia. (Mata. 18:23-35) Se a te mea ne akoako mai ne Iesu? Kafai e loto fakafetai tatou ki te lasi o te alofa fakamagalo o Ieova ki a tatou, ka fai foki i ei ke fia‵fia tatou o fakamagalo a nisi tino. (Sala. 103:9) Ne fakamatala mai Te Faleleoleo Maluga i tausaga ko ‵teka, penei: “Faitalia te uke o taimi e fakamagalo ne tatou ‵tou taina, e se mafai eiloa o ‵pau mo te lasi o te alofa fakamagalo o te Atua ki a tatou e auala i a Keliso.”

9. Ko oi e fakaasi atu ne Ieova te alofa fakamagalo ki ei? (Mataio 6:14, 15)

⁹ A tino uiga fakamagalo ka fakamagalogina. E fakaasi atu ne Ieova te alofa fakamagalo ki a latou kolā e a‵lofa fakamagalo. (Mata. 5:7; Iako. 2:13) Ne fakaasi faka‵lei mai ne Iesu a te mea tenā i te taimi ne fakaakoako ne ia ana soko ke ‵talo. (Faitau te Mataio 6:14, 15.) Mai mua atu i ei, ne fakaasi mai foki ne Ieova te manatu tenā e uiga ki tena tavini ko Iopu. Ne logo‵mae malosi te tagata fakamaoni tenā ona ko pati faka‵mae loto a tāgata e tokotolu ko Elifasa, Pilitati mo Sofala. Ne fakatonu atu a Ieova ki a Iopu ke ‵talo mō latou konā. I te otiga ne fai ne Iopu te mea tenā, ne fakamanuia a ia ne Ieova.—Iopu 42:8-10.

10. Kaia e fakalogo‵mae tatou ne te ita fakamoemoe? (Efeso 4:31, 32)

¹⁰ E fakalogo‵mae tatou ne te ita fakamoemoe. Ne manako a Ieova ke se fi‵ta tatou i te ‵nofo mo te loto ita. (Faitau te Efeso 4:31, 32.) Ne fakamalosi mai a ia ke “tuku kea‵tea te kaitaua kae tiaki te ita.” (Sala. 37:8) E maua ne tatou te poto māfai e tau‵tali ki te manatu fesoasoani tenā. A te nofo mo te loto ita e fakamasei ki ‵tou foitino mo ‵tou mafaufau. (Faata. 14:30) A te ‵tou ‵nofo mo te loto ita e se pokotia ei te tino ne fakakaitaua ne ia koe, e pelā loa me e inu ne koe se mea poisini telā e se logo‵mae i ei te tino telā ne fakakaitaua ne ia koe. I lō te fai penā, kafai e fakamagalo ne tatou a nisi tino, e tuku eiloa ne tatou se meaaalofa ki a tatou. (Faata. 11:17) E maua ne tatou te filemu o te mafaufau mo te loto kae ka mafai foki o gasolo atu tatou ki mua i te ‵tou tapuakiga ki a Ieova.

11. Ne a pati i te Tusi Tapu e uiga ki te taumafai o taui atu? (Loma 12:19-21)

¹¹ A te taui ma sui i a Ieova. Ne seki tuku mai ne Ieova te taliaga ke taui ne tatou se tino ne  agasala mai. (Faitau te Loma 12:19-21.) Ona ko te sē lava mo te sē ‵lei katoatoa o te ‵tou kilokiloga, e se mafai o ‵tonu a ‵tou fakamasinoga. (Epe. 4:13) Kae i nisi taimi, e fai ne ‵tou lagonaga ke se ‵lei a fakamasinoga e fai ne tatou. Ne fakaosofia ne Ieova a Iakopo ke tusi mai: “E se mafai o aumai ne te ita o te tagata a te amiotonu o te Atua.” (Iako. 1:20) E tali‵tonu tatou me ka fai ne Ieova te mea tonu kae e fakamautinoa aka me ka fai eiloa te fakamasinoga tonu fakamuli.

12. E fakaasi atu pefea ne tatou te loto tali‵tonu ki te fai mea tonu o Ieova?

¹² A te fakamagalo atu e fakaasi ei te ‵tou loto tali‵tonu ki te fai mea tonu o Ieova. A te tuku atu o fakalavelave ki lima o Ieova ne fakaasi atu i ei a te ‵tou loto talitonu me ka fakaseai ne Ieova a logo‵maega kolā ne māfua mai i te agasala. I tena lalolagi fou telā ne folafola mai, “ka se toe manatua i te mafaufau” a lagonaga logo‵mae konā. (Isa. 65:17) Kae kafai ne logo‵mae malosi tatou i se mea, e mata, e mafai o fakaseai ne tatou te kaitaua i ‵tou loto? Ke mafau‵fau tatou ki nisi tino kolā ne fai penā.

13-14. Se a te mea ne tauloto ne koe e uiga ki te fakamagalo atu mai te tala o Tony mo José?

¹³ E tokouke a ‵tou taina mo tuagane Kelisiano ne fakamagalo ne latou a nisi tino faitalia te lotou logo‵mae malosi i olotou faifaiga. Ne a fakamanuiaga ne maua ne latou mai te faiga penā?

¹⁴ Mai mua o tauloto a ia ki te munatonu, a Tony, * telā ne ola i Filipaina, ne iloa ne ia me i tena taina matua ne tamate ne se tagata e igoa ki a José. I te taimi tenā, a Tony se tino mata kaitaua kae uiga fakasaua, kae ne manako a ia ke taui te mea tenā. A José ne ‵pei ki te falepuipui ona ko tena agasala tenā. Fakamuli ifo ne ‵tala a José mai te falepuipui, kae ne tauto atu a Tony me ka ‵sala ne ia ke tamate. Ne ‵togi ne ia se fana. I te taimi foki tenā, ne kamata a Tony o tauloto ki te Tusi Tapu mo Molimau a Ieova. Ne fai mai a ia, “I te taimi ne fai taku akoga, ne iloa ne au me e ‵tau o ‵fuli oku auala, kae e aofia i ei te fakagata o toku kaitaua.” Fakamuli ifo, ne papatiso a Tony kae fai pelā me se toeaina i te  fakaptoopotoga. Mafaufau la ki tena poi i te iloaga ne ia me i a José ko fai foki mo fai se tavini papatiso a Ieova! I te taimi ne fetaui ei, ne fakatau ‵sai lāua, kae fai atu a Tony ki a José me ko oti ne fakamagalo ne ia a tou tagata. Ne fai mai a Tony me ne seki mafai ne ia o fakamatala mai a tena fiafia i te taimi ne fakamagalo ne ia a José. Ne fakamanuia ne Ieova a te loto fiafia o Tony ke fakamagalo atu.

15-16. Ne a au mea ne tauloto e uiga ki te fakamagaloga mai te tala o Peter mo Sue?

¹⁵ I te 1985, ne ‵kau atu a Peter mo Sue ki se fakatasiga i se Fale Tapuaki telā ne ‵pa i ei se pōmu. Ne tuku ne se tagata se pōmu i te Fale Tapuaki! Ne ‵lasi a pa‵kiaga o Sue telā ne fai ei ke se ‵lei tena kilo mo tena fakalogo. Ne seki mafai foki ne ia o ‵sogi a mea. * Ne fesili sāle ifo a Peter mo Sue, ‘Se a te vaegā tino telā ne fai ne ia te mea matagā tenei?’ Fakamuli ifo, a te tino telā ne fai ne ia te pōmu, telā e sē se tavini a Ieova, ne puke kae fakasala ki te ‵pei ki te mate i te falepuipui. I te taimi ne fesili atu me e mata, ne fakamagalo ne lāua te tagata tenei, ne fai atu a Peter mo Sue: “E akoako tatou ne Ieova i te ‵nofo mo te loto ita, e mafai o fakamasei i ei ‵tou foitino, ‵tou lagonaga, mo ‵tou mafaufau. Tela la, ne fakamolemole māua ki a Ieova ke fesoasoani mai ke ave keatea te kaitaua mo te loto ita kae ke toe kamata te mā olaga.”

¹⁶ E mata, ne faigofie ki a lāua ke fakaasi atu te uiga fakamagalo? Ne seki faeloa penā. Ne fai mai lāua: “I taimi katoa e pokotia māua ona ko pa‵kiaga o Sue, ne fanaka faeloa te mā kaitaua. Kae ne seki mafau‵fau faeloa māua ki ei, tela la, ne vave ‵galo atu a lagonaga konā. Ne fai ‵tonu atu māua me kafai te tino telā ne fai ne ia te pōmu, e fai pelā me se taina, ka fakafetaui faka‵lei atu māua ki a ia. E akoako mai ne te tala tenei me e fakasaoloto tatou ne fakatakitakiga i te Tusi Tapu i auala e uke kolā e sili atu mo ‵tou mafaufauga! E maua foki ne tatou te fakamafanafanaga ke iloa atu me ko pili fua o fakaseai ne Ieova a logo‵maega katoa.”

17. Ne a mea ne tauloto ne koe e uiga ki te fakamagalo atu mai te tala o Myra?

 ¹⁷ Ne tauloto a Myra ki te munatonu i te taimi ko oti a ia ne avaga kae ko tokolua ana tamaliki foliki. Ne seki talia ne tena avaga a te munatonu. Fakamuli ifo, ne mulilua tou tagata kae tiaki tena kāiga. Ne fai mai a Myra: “I te taimi ne tiaki matou mo aku tama e tokolua ne taku avaga, ne maua ne au a lagonaga e maua sāle ne te tokoukega kolā ne seki fakamaoni ki ei olotou tino pele—te sē talitonu, fanoanoa, salamō, ‵losi ki a ia, kae kaitaua.” E tiga eiloa ko se avaga māua, kae ko te logo‵mae o te sē fakamaoni koi tumau loa. Ne toe fai mai a Myra: “Ne fai ne lagonaga konā ke manavase au mō ne masina, kae ne iloa ne au me ka fai ei ke pokotia toku fesokotakiga mo Ieova mo nisi tino.” Nei la, ne fai mai a Myra me ko oti ne fakaseai ne ia tena kaitaua kae ko se toe nofo a ia mo te loto ita ki tena avaga mua. Ne fakamoemoe a ia ki se aso e tasi ke mafai o fakapilipili atu tou tagata ki a Ieova. Ko mafai ne Myra o saga tonu ki aso mai mua. E pelā me se mātua tokotasi, ne puti aka ne ia ana tama‵liki e tokolua ke fai mo tavini a Ieova. Nei la, ko tavini atu a Myra ki a Ieova mo te fiafia fakatasi mo ana tama‵liki mo lā kāiga.

18. E maua pefea ne tatou te loto tali‵tonu ki a Ieova e pelā me ko te Famasino Tafasili i te Maluga?

¹⁸ Ko oko eiloa i te filemu o ‵tou mafaufau me e se ‵tau o fakaiku aka ne tatou a te fakamasinoga o tino taki tokotasi! E pelā me ko te Famasino Tafasili i te Maluga, ka fai eiloa ne Ieova te galuega tenā. (Loma 14:10-12) E tali‵tonu katoatoa tatou me ka fai faeloa ne ia tena fakamasinoga e ‵tusa mo tena iloa i te mea ‵lei mo te mea ‵se. (Kene. 18:25; 1 Tupu 8:32) E se mafai o fai ne ia se faifaiga sē amiotonu!

19. Ne a mea ka fakataunu ne te fai mea tonu ‵lei katoatoa o Ieova?

¹⁹ E olioli malosi tatou ki te taimi ka fakaseai katoatoa ne Ieova a ikuga ma‵sei katoa o te tulaga sē ‵lei katoatoa o tino mo te agasala. I te taimi tenā, a pa‵kiaga katoa o tatou i te feitu faka-te-foitino mo feitu tau lagonaga ka faka‵lei katoatoa. (Sala. 72:12-14; Faka. 21:3, 4) Ka se toe masaua eiloa ne tatou. Kae koi faka‵tali tatou ke oko mai te taimi gali tenā, e loto fakafetai tatou ki a Ieova me ne tuku mai ne ia te atamai ke fakaakoako tatou ki a ia mai te fakamagalo atu.