1. Djehovha anogondesei ku aya akashaisha asi acinyuka zvezvirokwazvo?

 IZVIROKWAZVO kuti Djehovha ndiye Musiki wedu, akasisira kugadza Mutemo, uye Mutongi wedu, asiwo ayena ndi Baba edu ano rudo. (Pis. 100:3; Isa. 33:22) Kana tikaita citema kuna Djehovha uye tocinyuka zvezvirokwazvo, ayena aandotirekereri basi asi anotodawo kuzviita. (Pis. 86:5) Djehovha akaseenzesa muphorofita Isaya kuti atipase rugondo iri: “Kunyazi zvitema zvenyu zvakapsvuka kuti piriwiri, zvicaceneswa hingana cando.”—Isa. 1:18.

2. Kana tecida kuzwirana no anhu amweni, tinodikana kuitei?

² Tese atizi kukwana, ndiyo ndaa tinopedzesera tareketa kana kuita ciro cinokuwadza munhu umweni. (Tig. 3:2) Asi izvi azvidi kureya kuti atingazwirani no anhu amweni. Cingatibetsera kuti tizwirane no anhu amweni i kurekerera. (Zvie. 17:9; 19:11; Mat. 18:21, 22) Kana munhu akaita kana kureketa ciro cingatinyangadza kunyazi ciri cidoko-doko, Djehovha anoda kuti tirekerere. (Ako. 3:13) Uye tino zvikonzero zvakawanda kuti tirekerere amweni. Ngekuti Djehovha wene anotirekerera “no mwoyo wese.”—Isa. 55:7.

3. Ticaonei mu fundo ino?

³ Mu fundo ino, ticaona kuti isusu anhu asikazi kukwana tingateedzera kudini muezaniso wa Djehovha we kurekerera. Ticaonawo mhinduro dze mibvunzo dzinoteera: Zvitema zvipi zvinodikana kugadziriswa no akuru? Ngei Djehovha ecida kuti tirekerere amweni? Uye tingafundei no miezaniso ye  hama no hanzvadzi dzakanetseka maningi no zvishaishi zve amweni?

4. (a) Kana museenzi wa Djehovha akaita citema cakakura, anodikana kuitei? (b) Akuru ano ubaba upi paanogarisana no mushaishi?

⁴ Patinoziya kuti Mukristu waita zvitema zvakakura, tinodikana kuziisa akuru. Asi zvinyi zvinozwi zvitema zvakakura? Zvitema zvakakura ikuposha mitemo yakakura ya Mwari. Tinogumira zvitema izvona pana 1 Akorinti 6:9, 10. Mukristu paanoita citema cakadaro, anodikana kunamata ecikumbira rurekerero ra Djehovha, uye anodikana kupsvaka akuru e ungano. (Pis. 32:5; Tig. 5:14) Ngaupi ubaba we akuru? Izvirokwazvo kuti Djehovha basi ndiye ano ubaba we kurekerera zvitema, uye ayena anozviita eciseenzesa rusudzunuro ra Djesu. * Asi Djehovha akapasa akuru ubaba wekusanangura maererano no Bhaibheri kuti mushaishiwo anodikana kurumbwa ari mu ungano kana kuti haiwa. (1 Ako. 5:12) Kuti akwanise kuita cisananguro icona, akuru anodikana kudaira mibvunzo inoteera: Munhuwo wakaronga kuita citema ici here? Iyena wakaedza kucifisa ku amweni? Wakaita citema icona kakawanda here? Cinonyanya kukosha, zviri pamhene kuti mushaishiwo wacinyuka pa citema cake here? Pano zviro zvinopangidza kuti Djehovha arekerera mushaishiwo here?—Zvii. 3:19.

5. Basa re akuru rinobetsera kudini ungano uye no munhu washaisha?

⁵ Akuru paanoungana no hama inonga yaita citema, cinangwa cawo nge ce kuita cisananguro cinonga caizwa kare na Djehovha kudengeyo. (Mat. 18:18) Basa iri rinoizwa no akuru rinobetsera ungano yese. Ngekuti kana mushaishi akadzingwa izvona zvinodziirira ungano yese pa kushamwaridzana no mushaishiwo. (1 Ako. 5:6, 7, 11-13; Tito 3:10, 11) Kusiya izvona, izvi zvinobetsera mushaishi kuti aone cishaishi caanonga aiita, ocinyuka zvezvirokwazvo uye orekererhwa na Djehovha. (Ruka 5:32) Akuru anonamata no mushaishiwo kuitira kuti iyena agarezve akabamba pane zvekunamata.—Tig. 5:15.

6. Kana munhu akadzingwa, iyena angarekererhwa here? Panganidzai.

⁶ Ngatimboti kuti akuru paanoungana no munhuwo, iyena aazi kupangidza kucinyuka. Pamugariro uu, munhuwo anodikana kudzingwa mu ungano. Kana munhuwo waita krime, akuru aangamudziiriri ku anyautongi. Djehovha anotendera kuti anyautongi atonge uye aphanice munhu upi hake usikateereri mutemo—kunyazi munhuwo wakatocinyuka. (Aro. 13:4) Asi no kuhamba ke nguwa, kana mushaishiwo akaona cishaishi caakaita, ocinyuka zvezvirokwazvo uye oita zvinodikana kuizwa, Djehovha acamurekerera. (Ruka 15:17-24) Uye izvi zvingaitika kunyazi kana munhuwo wakaita citema cakakurisisa maningi.—2 Mak. 33:9, 12, 13; 1 Ti. 1:15.

7. Zvinoreyei kurekerera munhu watishaishira?

⁷ Zvakanaka maningi kuziya kuti isusu atisananguri kuti ndiyani acarekererhwa na Djehovha! Asi kunyazi zvakadaro, tinodikana kuita cisananguro. Cisananguro cipi? Zvingakwanisa kuita kuti cishaishi cakaizwa no munhuwo cakatikuwadza maningi uye iyena angatikumbira rurekerero kana kuti haiwa—kunyazi zvakadaro tingasanangura kurekerera munhuwo. Izvi zvinoreya kuti atigari no bundu uye atigariwo no shungu. Pamweni zvingatotora nguwa uye munotodikana kupeta masimba kuti murekerere munhuwo, maka-maka paya paanonga aita cishaishi  cakakura maningi. Nharireyomurindi wa 15 ya Setembro wa 1994, unoti: “Pamunorekerera, munonga musikaripi kutendera citemeco. Ku Akristu, kurekerera kunoreya kusiya no rugondo nyaya yakhoneyo mu nyara dza Djehovha. Ayena ndi Mutongi munatsi we nyika yese, uye ayena acaita unatsi pa nguwa yakasisira.” Ngei Djehovha ecitikohomedzesa kuti tirekerere uye tisiye kunatsirisa zviro pazvakasisira—munyara dzake?

8. Ticagara no cido cekuitei kana tecitenda nyasha dza Djehovha?

⁸ Patinorekerera tinopangidza kuti tinotenda Djehovha. Pa mufanikiso umweni, Djesu akaezanisa Djehovha na mambo akarekerera gaa rakakura re muranda wake. Murandewo wainga asikazokwanisi kuripa gaa irona, asi mumasure me izvona muranda uu aazi kurekerera gaa re muranda wake wainga ano gaa naye. (Mat. 18:23-35) Djesu waida kufundisei pa mufanikiso uu? Kana tikatenda Djehovha nge nyasha dzaanopangidza katiri, tingagarawo no cido cekurekerera amweni. (Pis. 103:9) Pa makore akadarika, Murindiri wakapanganidza izvi nge mushobo uu: “Pasinei nokurekerera kangana katinoita adoni edu, azvizomboezaniswi no kurekererhwa katinoizwa na Djehovha eciseenzesa Djesu Kristu.”

9. Djehovha anopangidzira nyasha kuna aani? (Mateu 6:14, 15)

⁹ Uya unorekerera ucarekererhwawo. Djehovha anopangidza nyasha ku aya anopangidza nyasha. (Mat. 5:7; Tig. 2:13) Djesu akasiya izvi pamhene paakafundisa afundi ake kuti anganamata kudini. (Erengai Mateu 6:14, 15.) Tinofundawo zvimwezvo kubva pa masoko akarekethwa na Djehovha kuna Djobo. Mwanarume uu wakagondeka kuna Djehovha, wakanetseka maningi nge masoko akarekethwa no anarume atatu, Erifazi, Bhiridhadhi na Zofari. Asi Djehovha akabhuya kuti Djobo waidikana kunamatira anarume aya. Mumasure me kuita izvona, Djehovha akakomborera museenzi wake wakagondeka.—Djobo 42:8-10.

10. Ngei kucengeta bundu kunotikuwadza? (Aefeso 4:31, 32)

¹⁰ Kucengeta bundu kunotikuwadza. Uye kurema ke bunduro kungakura maningi uye Djehovha aadi kutiona tecinetseka nazvo. (Erengai Aefeso 4:31, 32.) Ndiyo ndaa anotibvunza kuti ‘musatsamwe uye siyai hasha.’ (Pis. 37:8) Kuita izvona kunonga kuri kupangidza uzii, ngekuti kucengeta bundu kungatikuwadza pa nyama uye mu ndangariro. (Zvie. 14:30) Edzurirai kuti, kucengeta bundu akukuwadzi munhu watishaishira. Kuita izvona zvaizoita hingana kumwa mutombo unouraya toetsera kuti munhu umweni akuwadzike, hino patinorekerera amweni tisu tinowina. (Zvie. 11:17) Tinozwa runyararo uye mwoyo wedu unogara wakacena, pedzepo tinoenderera mberi teciseenzera Djehovha.

11. Bhaibheri rinobhuyei ngezve kuda kutsiya zvishaishi zvatinonga taizirhwa? (Aroma 12:19-21)

¹¹ Kutsiya nge ka Djehovha. Djehovha aazi kutipasa ubaba we kutsiya zvishaishi zvatinonga taizirhwa no anhu amweni. (Erengai Aroma 12:19-21.) Ngekuti atikwanisi kuona zviro nge mwazvo, atikwaniriswi kutonga amweni, Mwari basi ndiye angazviita. (Aheb. 4:13) Pamweni paya, mazwire edu angatikangaidza. Ndiyo ndaa Djehovha akafemera Tiyago atare kuti: “Shungu dze munhu adziiti kuti paoneke unatsi unodiwa na Mwari.” (Tig. 1:20) Tingagara no rugondo rekuti Djehovha acaita zvakanaka nguwa dzese uye acatonga nge mushobo wakakwana.

12. Tingapangidza kudini kuti tinogonda unatsi wa Djehovha?

 ¹² Patinorekerera tinopangidza kuti tinogonda unatsi wa Djehovha. Kusiya nyaya mu nyara dza Djehovha, zvinopangidza kuti tinogonda kuti ayena acagadzirisa kushuphika kupi hako katiri kusongana nako nge ndaa yezvitema zvedu kana zve amweni. Mu nyika ipsva, zvironda zvedu zviri nge cemukati “azvizouyi mu ndangariro, uyewo azvizouyi mu mwoyo.” (Isa. 65:17) Asi zvinoita here kutama kugara ne shungu uye no bundu, kunyazi paya patinoizirhwa cishaishi cakakura? Ngatimboone kuti amweni akazvikwanisa kudini.

13-14. Mafundei nge zve kurekerera kubva pa eshiperiensiya ya Tony na José?

¹³ Hama no hanzwadzi dzakawanda dzakasanangura kurekerera kunyazi dzakakuwadzika maningi nge zviito zve anhu amweni. Makomborero api aakatambira mumasure mekuita izvona?

¹⁴ Asati agara Mupupuri wa Djehovha Tony, * unogara ku Filipinas, wakaziya kuti mukoma ake akauraiwa no mwanarume umweni unozwi José. Panguwa iyona, Tony waiita zve cisimba, uye wainga wakagadzirira kutsiya zvakaitika. José wakakandhwa mukaraboso nge cishaishi caainga aita. Mumasure mekuti José wabuda mukaraboso, Tony wakapika kuti waizomupsvaka uye omuuraya. Iyena wakatotenga pfuti kuti aite izvona. Asi Tony wakatanga kufunda Bhaibheri no Apupuri a Djehovha. Iyena unoti: “Pandaifunda, inini ndakaona kuti ndaidikana kuita cinjo dzakawanda, dzaitobatanidza kusiya kuita zvecisimba.” Nokuhamba ke nguwa, Tony wakabhabhatidzwa uye wakazotogara mukuru we ungano. Rangarirai kushamisika kaakaita paakaziya kuti José wainga agarawo Mupupuri wa Djehovha! Awona akasongana uye akakhumbatirana uye Tony wakabvunza José kuti wainga amurekerera. Tony wakabhuya kuti kurekerera José kakaita kuti azwe akarerukirhwa uye ecipfara maningi zvekutoti aakwanisi kutozvipanganidza. Zviri pamhene kuti Djehovha  akakomborera Tony ngekuti iyena wainga wakagadzirira kurekerera.

15-16. Mafundei nge zve kurekerera kubva pa eshiperiyensiya ya Peter na Sue?

¹⁵ Muna 1985, Peter na Sue ainga ari pa musangano mu Nyumba ye Umambo. Imona makaputika bhomba rainga rakandhwa no mwanarume umweni! Sue wakakuwadzika maningi zvekuti aacatokwanisi kuona no kuzwa. Iyena aacatokwanisiwo kuzwa munuhwi. * Kakawanda, Peter na Sue aidzibvunzisa kuti: ‘Ndiyani munhu waita zviro zvakashata kudai?’ Mumasure me makore akawanda, mushaishiwo wainga asiripi Mupupuri wa Djehovha wakasungwa uye wakatongerhwa kuti agare mukaraboso ke upenyu wake wese. Peter na Sue paakabvunziswa kuti ainga arekerera mwanarume uya here, awona akadaira eciti: “Djehovha anotifundisa kutama kucengeta bundu ngekuti izvona zvinotikuwadza mu ndangariro, nge cekumukati uye mu muiri. Hino kubvira pakutanga, isusu takakumbira Djehovha kuti atibetsere kutama kugara no shungu uye kutama kucengeta bundu kuti tikwanise kuenderera mberi.”

¹⁶ Kunyazi no zviro zvese izvi, azviripi nyore kaari kurekerera nguwa dzese. Awona anoti: “Pamweni paya, Sue paanotanga kunetseka nge zvinetso zvaanazvo tinogarazve no shungu. Asi tinoita zviri zvese kuti tisarumbwe tecizvirangarira. Hino shungu idzona dzinopera nokukasika. Tingabhuya no mwoyo wese kuti mwanarume uu akazogara Mupupuri wa Djehovha, tinomutambira no nyara mbiri. Zvese izvi, zvatipangidza kuti kuteerera mazano e Bhaibheri zvinoita kuti tizwe takasudzunuka pa maitiro akashata maningi! Uye zvinonyaradzawo kuziya kuti mbai-mbai pano Djehovha acagadzirisa matambudziko ese atiri kubatana nawo.”

17. Mafundei nge zve kurekerera kubva pa eshiperiyensiya ye hanzvadzi Myra?

¹⁷ Hanzvadzi Myra paakafunda cokwadi, iyona yainga yakawakwa uye yainga yaano  ana airi. Asi mwamuna wayo aazi kutenda cokwadi. Nokuhamba ke nguwa, wakaita upombhwe uye wakasiya mhuri. Myra unoti: “Mwamuna wangu paakasiya mhuri, inini ndakazwa hingana munhu wese unosiiwa no munhu waanoda. Ndainga ndisikakwanisi kutendera zvakaitika—ndakatsukwara maningi, ndaidzipasa ndaa uye ndaigara no shungu dzakakura.” Kunyazi mumasure mekurambana, marhwadzo e kusiiwa airumbwa aripo. Myra unoenderera mberi eciti: “Inini ndakarumbwa ndecinetseka ke mwedzi dzakawanda, asi ndakazoona kuti izvi zvaikuwadza ushamwari wangu na Djehovha uye no anhu amweni.” Parizvino, Myra aacina shungu uye aacacengeti bundu ku mwanarume uya akamusiya. Uye Myra uno kariro yekuti iyena ucazofundawo Bhaibheri. Myra waakukwanisa kuwona zviro zviri mberi, iyena wakakwanisa kurera ana ake airi kuti aseenzere Djehovha. Uye nyamasi uno, iyena unokwanisa kuseenzera Djehovha akagondeka pamwepo no ana ake uye no mhuri dzawo.

18. Tingagara no rugondo ripi nge zve mishobo yekutonga ka Djehovha?

¹⁸ Zvezvirokwazvo, zvakanaka maningi kuziya kuti atisupi tinosanangura kuti munhu umwe na umwe ucatongwa kudini! Djehovha ndiye Mutongi Mukurusa uye ayena acaita izvona. (Aro. 14:10-12) Tingagara no rugondo rese rekuti Djehovha acagadzirisa zviro nge mushobo wakakwana eciteerera mitemo yake ye zvakanaka no zvakashata. (Gen. 18:25; 1 Mad. 8:32) Djehovha aazomboiti ciro cisina unatsi!

19. Djehovha acaitei mbai-mbai pano?

¹⁹ Tirikuetsera no mwoyo wese nguwa yekuti Djehovha acapedza nokutama kukwana ke anhu uye no zvitema. Izvona pazvicaitika, zvironda zvedu zviri nge cemukati uye nge cekunza zvicapora. (Pis. 72:12-14; Zvak. 21:3, 4) Patinonga tecietsera zuwa irona kuti rigume, zvezvirokwazvo tese isusu tinotenda Djehovha nge kutipasa cipo cekumuteedzera uye togarawo anhu anorekerera.