1. Иегова бачыдын миннип турар улусту чүү чүвеге бүзүредип турар?

 ИЕГОВА — бистиң Чаяакчывыс, Хоойлу Берикчизи болгаш Шииткекчивис, ол ышкаш сагыш човангыр дээрде Адавыс-тыр (Ыд. ыр. 99:3; Иса. 33:22). Бачытты кылыпкаш, ол дээш хараадап, буруувусту миннир болзувусса, Ол бисти өршээринге белен. Оон артык, Ол ону аажок күзеп турар (Ыд. ыр. 85:5). «Силерниң бачыттарыңар кып-кызыл өңнүг-даа болза, хар ышкаш ак апаар» — деп, Иегова биске чылыг-чымчаа-биле Исайя медээчи таварыштыр чугаалаан (Иса. 1:18).

2. Өске улус-биле эки хамаарылгалыг болурунга биске чүү дузалаар?

² Бис тергиин эвес болгаш, чамдыкта өске улусту хомудадыптар бир-ле чүүлдү чугаалаптар азы кылыптар бис (Иак. 3:2). Ынчалза-даа өршээп өөренип алыр болзувусса, оларның-биле чылыг-чымчак хамаарылгалыг артып шыдаар бис (У. ч. 17:9; 19:11; Мф. 18:21, 22). Бир кижи бисти хомудадыпкан болза, Иегова бистен ол кижини өршээривисти манап турар (Кол. 3:13). Ону кылыр чылдагааннарывыс хөй, чүге дизе Иегова Боду бисти сеткилинден өршээп турар (Иса. 55:7).

3. Бо статьяга чүнүң дугайында чугаалажыр бис?

³ Бис, тергиин эвес улус, тергиин Бурганны өттүнүп, өске улусту канчаар өршээрин өөренип ап болурувусту бо статьяга сайгарар бис. Ол ышкаш мындыг айтырыгларның харыызын билип алыр бис: кандыг бачыттарның дугайында хуралдың удуртукчуларынга чугаалаар херек? Иегова бисти улусту өршээринче чүге кыйгырып турар? Өске улустуң  хайындан шыңгыы когараан акы-угбаларның төөгүлеринден чүнү өөренип ап болур бис?

4. а) Аар бачыт кылган Бурганның бараалгакчызы чүнү канчаар ужурлуг? б) Удуртукчуларда кандыг харыысалга бар?

⁴ Бир кижиниң аар бачыт кылыпканын билип каан болзувусса, ону удуртукчуларга чугаалаар ужурлуг бис. Ындыг бачыттарның чижээн 1 Коринфичилерге 6:9, 10-да бижээн. Аар бачыт дээрге Бурганның хоойлузун шыңгыы үрээри-дир. Ынчангаш бачыт үүлгеткен кижи ооң дугайында Иеговага чугаалап, хуралдың удуртукчуларындан дузаны дилээр ужурлуг (Ыд. ыр. 31:5; Иак. 5:14). А ол акылар чүнү канчаар ужурлуг? Христостуң берген өргүлүнүң ачызында чүгле Бурган бачыттарны долузу-биле өршээр эргелиг *. Ынчалза-даа Бурганның Сөзүнде хоойлуларга даянып, бачыт үүлгеткен кижини чыышка арттырып болур бе дээн шиитпирни хүлээр харыысалганы Иегова удуртукчуларга дагзып каан (1 Кор. 5:12—13). Оон аңгыда, олар мындыг айтырыгларның харыызын билип алыр ужурлуг: ол бачытты өжегерээн кылган бе? Ол кылган үүлгедиин чажырып турган бе? Ол кайы хире үр үе ишти бачыт үүлгедип келген? А эң чугула чүүл: ооң шын сеткилинден буруузун миннип турарын чүү бадыткап турар? Иегова ону өршээп каан деп чүү көргүзүп турар? (Аж.-ч. 3:19).

5. Удуртукчулар бачыт кылган кижи-биле чүү дээш ужуражып турар?

⁵ Хуралдың удуртукчулары бачыт үүлгеткен кижи-биле кандыг сорулгалыг ужуражып турар? Олар дээрлерге үндүрүп каан шиитпирни хүлээп алыр ужурлуг. Ону кылыр дээш, удуртукчулар Библияда дүрүмнерни болгаш айтыышкыннарны ханы шинчилеп, Иеговага мөргүп турарлар (Мф. 18:18). Ол чүүл чыышты канчаар камгалап турар? Бир эвес бачыт кылган кижи буруузун миннивес болза, ол Иегованың эргим хойларынга хора чедирбезин дээш, ону чыыштан үндүрүптер (1 Кор. 5:6, 7, 11—13; Тит. 3:10, 11). Ындыг-даа болза, удуртукчулар бачыт үүлгеткен кижиге буруузун минниринге дузалап болур. Ынчан Бурган ону өршээптер (Лк. 5:32). Оон акылар ол кижи дээш мөргүп, Иегова аңаа Ооң-биле найыралын катап тургузарынга дузалаар кылдыр дилээр (Иак. 5:15).

6. Чыыштан үндүрткен кижини Иегова өршээп болур бе? Тайылбырлаптыңар.

⁶ Бачыт үүлгеткен кижи удуртукчулар-биле ужурашкаш, буруузун миннивейн турар дижик. Ынчан ону чыыштан үндүрүптер. А бир эвес ол күрүне хоойлузун үрепкен болза, ооң уржуктарындан удуртукчу акылар ону камгалавас. Ол кижи буруузун миннинген азы миннивээн-даа болза, «бузут үүлгеткен» кижи бүрүзүн кезедир эргени Иегова эрге-чагыргаларга берген (Рим. 13:4). А бир эвес ол орталанып, шын сеткилинден бачыдын миннип, эттинип алыр болза, ооң кылган бачыды чеже-даа аар болза, Иегова ону өөрүшкүлүг өршээп каар (Лк. 15:17—24; 2 Чыл. 33:9, 12, 13; 1 Тим. 1:15).

7. Биске удур бачыт үүлгеткен кижини кандыг уткалыг өршээп болур бис?

⁷ Бачыт үүлгеткен кижини өршээр-өршээвезин бис эвес, а Иегова шиитпирлээр деп бодал бисти оожуктуруп турар. Ынчалза-даа бир-ле чүвени шиитпирлеп болур бис. Чүнү? Бачыт кылган кижи буруузун миннивээн-даа болза, хомудал биле килеңден  адырлып ап турарывыс-биле ону өршээп болур бис. Ынчалза-даа ону кылыры белен эвес, ылаңгыя биске удур аар бачытты кылган болза. Кижини өршээрде, хөй үе болгаш күжениишкин херек апаар. 1994 чылдың сентябрь 15-тиң «Таңныыл суургазында» мынча деп бижээн: «Бачыт кылган кижини өршээп тура, ооң бачыдын херекке албайн турар бис дээни ол бе? Чок. Христиан кижи кандыг-бир кижини өршээп тургаш, ол херекти Иегованың холунга хүлээдип, Ол ону шын шиитпирлептер деп долузу-биле бүзүреп турар. Бурган — бүдүн Октаргайның чөптүг-шынныг Шииткекчизи болганда, Ол чөптүг чорукту чогуур үеде дөмей-ле тургузуптар». Ынчаарга Иегова бисти улусту өршээринче база Ооң холунче шииткелди хүлээдип бээринче чүге деткип турарыл?

8. Иегованың энерели дээш өөрүп четтиргенивис бисти чүнү кылырынче оттуруп турар?

⁸ Өршээп тургаш, Иегованың энерели дээш четтиргенивисти көргүзер бис. Бир катап Иисус угаадыглыг чугаа чугаалаан. Ол Бурганны дыка хөй өрелиг чалчазын өршээп каан хаанга дөмейлээн. Ынчалза-даа ол чалча оранчок эвээш өрелиг эжинге энерел көргүспээн (Мф. 18:23—35). Иисус бисти чүү чүвеге өөредиксээнил? Бир эвес Иегованың биске илередип чоруур өндүр улуг энерелин үнелеп турар болзувусса, өскелерни өршээрин кызар бис (Ыд. ыр. 102:9). Хөй чыл бурунгаар «Таңныыл суургазынга» мынча деп демдеглээн: «Өскелерни чеже-даа катап өршээр болзувусса, ол чүүл Иегованың өршээлинге канчап-даа деңнешпес. Чүге дизе Ол Иисус Христостуң өргүлүнге даянып, бисти эңмежок катап энерелдии-биле өршээп турар».

9. Иегова кандыг улуска энерелдиг? (Матфей 6:14, 15).

⁹ Өскелерни өршээр болзувусса, Иегова бисти өршээр. Иегова энерелдиг улуска энерелди көргүзер (Мф. 5:7; Иак. 2:13). Иисус өөреникчилерин мөргүүрүнге өөредип тургаш, ол бодалды онзалап демдеглээн. (Номчуптуңар: Матфей 6:14, 15.) Шак ол чүүлче Иегова Иов-биле чугаалажып тургаш, кичээнгейни салган. Элифаз, Вилдад болгаш Цофар ол чөптүг-шынныг кижини дорамчылап, сеткилин хомудаткан. Ынчалза-даа Иегова Иовтан олар дээш мөргүүрүн дилээн. Иов шак ынчаар кылырга, Бурган ону элбээ-биле шаңнаан (Иов 42:8—10).

10. Хомудал шыгжаары чүге хоралыг? (Эфесчилерге 4:31, 32).

¹⁰ Хомудал шыгжаары кадыкка хоралыг. Хомудал шыгжаары — чүрээнге аар чүъктү чүктеп турары-биле дөмей. А Иегова сеткиливиске бичии-даа аартык чүве турбас кылдыр күзеп чоруур. (Номчуптуңар: Эфесчилерге 4:31, 32.) Библияда: «Килеңнээриң соксат, калчаарааже ажынма» — дээн (Ыд. ыр. 36:8). Бо сүмени эдерери кайы хире мерген угаанныг-дыр! Бир кижиже хомудал шыгжап турар болзувусса, бодувуска-ла хораны чедирип чоруур бис (У. ч. 14:30). Бисти хомудадыпкан кижиге хорадаары дээрге-ле, ону хораннаар дээш, хоранны бодувус ижипкенивис-биле дөмей. А улусту өршээри — кижиниң бодунга ажык-дузалыг боор (У. ч. 11:17). Сагыш-сеткиливис чиигеп, Иеговага бараалгаарынга чүү-даа шаптыктавас апаар.

11. Библияда өжээн негээриниң дугайында чүнү чугаалаан? (Римчилерге 12:19—21).

¹¹ Чүгле Бурган өжээн негээр эргелиг. Иегова биске улустан өжээн негээрин чөпшээревээн. (Номчуптуңар: Римчилерге 12:19—21.) Чүге дээрге бис бачыттыг болгаш, хамык чүүлче, Бурган ышкаш, шын  көрүштүг бооп шыдавас бис (Евр. 4:13). Оон аңгыда, сагыш-сеткил хайныышкыны биске шаптыктап болур. «Килеңге алыскан кижи Бурганның мурнунга чөптүг-шынныг чорук чедип ап шыдавас» — деп, Иегова Иаковту бижииринче оттурган (Иак. 1:20). Иегова биске хамаарыштыр чөптүг чорукту албан тургузуптар дээрзинге бичии-даа чигзинмейн барып болур бис.

12. Иегованың чөптүүнге бүзүреливисти канчаар көргүзүп болур бис?

¹² Өршээп тургаш, Иегованың чөптүүнге бүзүреп турарывысты көргүзер бис. Шиидер эргени чүге Бурганга бээр ужурлуг бис? Чүге дизе Ол бачыттың хайындан тывылган шупту хораны албан узуткап кааптар. Оон аңгыда, чаа өртемчейге Иегова бисти сагыш-сеткил балыгларындан эмнеп каар. Ооң Сөзүнде мынча дээн: «Биеэде турган чүве моон соңгаар сагышка артпас, угаанга кирбес» (Иса. 65:17). Ынчалза-даа биске удур аар бачыт үүлгеткен кижини өршээп, килең биле хомудалдан долузу-биле адырлып ап шыдаар бис бе? Ийе, шыдаар бис. Дараазында таварылгалар ону бадыткап турар.

13, 14. Энтониниң төөгүзүнден чүнү өөренип ап болур бис?

¹³ Оларга удур аар бачыттарны кылган улусту хөй акы-угбаларывыс өршээп шыдаан. Иегова оларны канчаар шаңнаан?

¹⁴ Филиппиннерде чурттап турар Энтони-биле * мындыг таварылга болган. Ол Иегованың Херечизи апаарының мурнунда, ооң улуг акыларының бирээзин Хосе дээр кижи эндеп каан. Ол өлүрүкчүнү шагдаалар туткаш, кара-бажыңче олуртуп каан. Хосени хостаптарга, Энтони, дыка кылыктыг болгаш, ону тыпкаш, өлүрүп кааптар деп даңгыраглаан. Ол безин пистолет садып алган. Үе эрткенде, Энтони Иегованың Херечилеринге таваржы берген. Ол мынча деп үлешкен: «Библияны өөрени бергеш, аажы-чаңымны болгаш чуртталгамны өскертир ужурлуг мен деп билип каан мен. Кылыктыг чаңдан адырлыр ужурлуг турган мен». Чоорту Энтони сугга суктуруп алгаш, хуралдың удуртукчузу апарган. Хосе база Иегованың Херечизи апарган деп  билип кааш, ол аажок кайгаан! Олар ужуражып келгеш, дыңзыг куспакташкан. Ынчан Энтони Хосеге: «Сени өршээп каан мен!» — деп чугаалаан. Бодунуң дайзынын өршээп кааш, Энтони чүге-даа деңнешпес өөрүшкүнү миннинген. Шынап-ла, Иегова ону кайгамчык кылдыр шаңнаан!

15, 16. Питер биле Сьюнуң төөгүзүнден чүнү өөренип ап тур силер?

¹⁵ 1985 чылда Питер биле Сью Хурал залынга турда, хенертен бомба часты берген. Ооң ужундан Сью улуг кемдээшкиннерни алган. Ооң караа багай көөр, кулаа багай дыңнаар, а думчуу чыт ылгап билбес апарган *. Питер биле Сью: «Мындыг коргунчуг үүлгедигни кым кылыпканыл?» — деп бо-ла айтыртынар турганнар. Элээн каш чыл эрткенде, кем-херек үүлгедикчизин шагдаалар тудуп алгаш, бүгү назынында кара-бажыңче олуртуп каан. Ол кижини өршээпкен силер бе деп, улус Питер биле Сьюдан айтырарга, олар мынча дээн: «Иегова бисти хомудал шыгжавас кылдыр өөредип турар. Чүге дээрге ол бистиң мага-бодувуска-даа, сагыш-сеткиливиске-даа хоралыг. Ынчангаш ол болуушкун соонда-ла, Иегова биске хомудалды уттуптарынга дузалаар кылдыр, дилеп эгелээн бис. Оон ыңай сеткиливиске бичии-даа кара бодал артпас кылдыр база улаштыр чурттаар күштүг боор кылдыр, мөргүп турган бис».

¹⁶ Оларга өршээри белен турган бе? Чок. Олар улаштыр мынча дээн: «Үе-үе болгаш, Сьюнуң кемдээшкиннери аартып кээр. Ынчан хөрек-чүрээвиске кылыывыс катап хайнып эгелээр. Ынчалза-даа бис бодувуска багай бодалдарже дүлнү бээрин чөпшээревейн турар бис. Ынчангаш дораан оожургай бээр бис. Бир эвес ол кижи кажан-бир бистиң кады бүзүрээн акывыс апаар болза, аңаа аажок өөрүүр бис! Библейжи дүрүмнер ёзулуг хосталганы берип турар, аңаа чүү-даа деңнешпес. Оон ыңай биске чедирген хораның орнун Иегова удавас эгидип бээр деп бодал бисти оожуктурар-дыр».

17. Мираның төөгүзүнден чүнү өөренип ап турар бис?

 ¹⁷ Кажан Мира Библияны өөренип эгелээрге, ол ийи бичии ажы-төлдүг турган. Ооң ашаа алыс шынны хүлээп албаан. Үе эрткенде, ол Мирага шынчы чоруун үреп, өг-бүлезин каапкан. Угбавыс мынча деп үлешкен: «Ашаам чоруй баарга, чоок улузунга кагдырган улустуң минниишкиннерин миннип, эгезинде аңаа бүзүревейн, ундарап, бодумну буруудадып, хорадап турган мен». Мираның өг-бүлези буступ калган-даа болза, саттыныкчы чоруктуң аарышкызы ам-даа читпээн. Мира мынча деп улаштырган: «Сеткил-хөңнүм карарып, хөй айлар дургузунда хинчектенип келген мен. Ынчалза-даа ол чүүл мээң Иегова-биле болгаш өске улус-биле хамаарылгамны үреп турар деп билип каан мен». Мира кылыктанырын соксадып, баштайгы ашаанче хорадавайн барган. Безин ол кажан-бир Иегованың бараалгакчызы апаар дээрзинге идегеп турар. Мира бодалдарын Бурганның аазап турар аас-кежиктиг келир үезинче угландырган. Ол ам аас-кежиктиг. Ол оолдарын Иеговага ынак кылдыр өстүрүп каан, олар өг-бүлелери-биле Бурганга бараалгап чоруур.

18. Иегова — Дээди Шииткекчи деп чүге бүзүреп турар бис?

¹⁸ Бистер эвес, а Иегова — Дээди Шииткекчи боорга, кайы-хире аянныг-дыр! Ол бисти аар чүъктен хостап, кижилерни шиидер эргени Бодунга арттырган (Рим. 14:10—12). Бурган шиитпирлерни үндүрүп тургаш, Бодунуң эки-бакты ылгаар тергиин негелделеринге даянып турар дээрзинге долузу-биле бүзүреп болур бис (Э. д. 18:25; 3 Хаан. 8:32). Ол кажан-даа чөптүг эвес кылдыр алдынмас!

19. Эң-не эки Шииткекчи, Иегова, келир үеде биске чүнү кылыптар?

¹⁹ Иегова бачыттың болгаш тергиин эвес чоруктуң шупту уржуктарын чайладыптар үени четтикпейн манап чоруур бис. Ынчан Ол мага-бодувустуң болгаш сагыш-сеткиливистиң балыгларын экиртиптер. Бис ону кажан-даа сагынмас боор бис (Ыд. ыр. 71:12—14; Ажыд. 21:3, 4). Ынчалза-даа Иегова бисти амдыгааштан тура деткип, өршээринге хамаарыштыр кайгамчык үлегерни көргүзүп чоруур боорга, Аңаа өөрүп четтирер-дир бис. Ооң ачызында бис өске улусту өршээп шыдаар бис.