1. ¿Bin jamal la yal te Jehová ta stojol te machʼatik ya sujtes yoʼtanike?

 TE Jehová jaʼ Jpaswanej kuʼuntik, Jpasley sok Juez, jaʼnix jich jaʼ jTatik te kʼuxotik ta yoʼtan te ay ta chʼulchane (Sal. 100:3; Is. 33:22). Jaʼ yuʼun te kʼalal ya jle jmultik ta stojol sok ya jsujtes koʼtantik, ma jaʼuknax ya xjuʼ ya spasbotik perdón, jaʼnix jich ya skʼan ya spasbotik perdón (Sal. 86:5). Ta swenta te j-alwanej Isaías, te Jehová jich la yal ta jamal te ya yakʼ smukʼul koʼtantik: «Aunque hich amulic te bin utʼil buen tsaj, buen sac ya xhilic hich te bin utʼil meʼsic» (Is. 1:18).

2. ¿Bin ya skʼan ya jpastik swenta lek ya kil jbatik sok te yantike?

² Te bitʼil jmulawilotike, bayal bin ya kaltik sok ya jpastik te ya xjuʼ ya kutsʼinbeytik yoʼtan te yantike (Sant. 3:2). Pero ma skʼan ya yal-abi te ma xjuʼ ya jtatik lekil kamigotaktike. Te bin kʼax mukʼ skʼoplale jaʼ te ya jnaʼtik spasel perdón (Prov. 17:9; 19:11; Mat. 18:21, 22). Te Jehová ya skʼan te ya jpasbeytik perdón te machʼa ay bin ya yal o ya spas te kʼux ya kaʼiytike (Col. 3:13). Sok ay bin yuʼun mukʼ skʼoplal te jich ya skʼan jpastike. Melel te Jehová ya spasbotik perdón sok yutsil yoʼtan (Is. 55:7).

3. ¿Bin ya kilbeytik skʼoplal ta artículo ini?

³ Ta artículo ini ya kilbeytik skʼoplal bin utʼil ya xjuʼ ya jtʼunbeytik te ejemplo yuʼun te Jehová, te bitʼil ya spas perdón stukel manchukme jmulawilotik te joʼotike. ¿Bin muliletik ya skʼan ya kakʼbeytik snaʼ te ancianoetik? ¿Bin yuʼun ya skʼan Jehová te talel kʼaxel ya jpasbey jbatik perdone? ¿Sok bin ya yakʼ jnoptik te ejemplo yuʼun te chaʼoxtul hermanoetik te bayal kʼax swokolik ta skaj te mulil la spas te yantike?

4. 1) ¿Bin ya skʼan ya spas jtul j-abat yuʼun Dios teme ay la spas jun tulan mulil? 2) ¿Bin ay ta swentaik spasel te ancianoetik?

⁴ Te kʼalal ay machʼa ya spas jun tulan mulil, ya skʼan ya yakʼbey snaʼ te ancianoetik. Ta 1 Corintios 6:9, 10, ya jtatik ejemploetik yuʼun tulan muliletik. Te tulan muliletik-abi ya skʼaxuntay te ley yuʼun Dios. Teme jtul j-abat yuʼun Dios ay la spas junuk te mulil-abi, ya skʼan ya skʼopon te Jehová yuʼun ya skʼanbey te ya xpasbot perdón sok ya skʼan ya yakʼbey snaʼ te ancianoetik ta congregación (Sal. 32:5; Sant. 5:14). ¿Bin ay ta swentaik spasel te ancianoetik? Jaʼnax te Jehová te machʼa ay ta swenta spasel perdón ta jkʼaxel te muliletike, sok jaʼ ya spas ta swenta te laj te Jesuse. * Pero te Dios yakʼojbey ta swentaik te ancianoetik stael ta nopel sok te Biblia teme yato xjuʼ ya x-ayin ta congregación o maʼuk te machʼa la spas te mulil (1 Cor. 5:12). Ta swenta-abi, jun te bin ya spas te ancianoetik jaʼ te ya yakʼbeyik sujtib te jojkʼoyeletik ini: ¿yuʼun-nixbal snopojix-a te ya spas te mulile?, ¿labal smuk?, ¿labal spasulan te mulile? Te bin mukʼxan skʼoplale, ¿yakʼojbal ta ilel te sujtesoj yoʼtan ta smelelile?, ¿chikanbal ta ilel te pasbotix perdón yuʼun te Jehová? (Hech. 3:19).

5. ¿Bin lekilal ya sta te congregación ta swenta te bin ya spasik te ancianoetik?

⁵ Kʼalal te ancianoetik ya xkʼopojik sok te machʼa la spas te mulile, te bin ya skʼanike jaʼ te ya staik ta nopel jich te bin-utʼil tabilix ta nopel ta chʼulchan (Mat. 18:18). ¿Bin lekilal ya sta te congregacione? Teme ma sujtes yoʼtan te machʼa la spas te mulile, ma xjuʼ te ya x-ayinix ta congregación, sok jich ya yichʼ kanantayel te tuminchijetik yuʼun Jehová ta swenta te bin ma lek la spase (1 Cor. 5:6, 7, 11-13; Tito 3:10, 11). Jaʼnix jich ya xjuʼ ya xkoltayot te machʼa la spas te mulil yuʼun ya sujtes yoʼtan sok ya yichʼ pasbeyel perdón yuʼun te Jehová (Luc. 5:32). Te ancianoetik ya skʼoponik Dios ta stojol te machʼa la spas mulil swenta ya sujtes yoʼtan sok ya skʼanbeyik te Jehová yuʼun ya stsakxan yip te schʼuunel yoʼtan (Sant. 5:15).

6. ¿Yabal xjuʼ ya xpasbot perdón yuʼun Jehová te machʼa lokʼesbil ta congregación? Cholbeya skʼoplal.

⁶ Jnop kaʼiytik te ay machʼa la spas mulil te mato sujtesoj yoʼtan te kʼalal ya stsob sba sok te ancianoetik. Te kʼalal jich ya xkʼot ta pasel, ya yichʼ lokʼesel ta congregación. Sok teme ay la skʼaxuntay te leyetik yuʼun te nación, te ancianoetik maba ya skoltayik teme ay bin ya yichʼ pasbeyele. Te Jehová yakʼoj te j-aʼtel patanetik swenta ya yichʼik ta kʼop sok ya yakʼbeyik castigo spisil te machʼa ya skʼaxuntay te ley chikan teme sujtesoj yoʼtan o maʼuk (Rom. 13:4). Pero teme ta patil ya xkʼot ta yoʼtan te ma lek te bin la spase, ya sujtes yoʼtan ta smelelil, ya sjeltay te spensar sok te bin ya spas, te Jehová ya spasbey perdón (Luc. 15:17-24). Jaʼ jich ya xkʼot ta pasel manchukme la spas tulan mulil (2 Crón. 33:9, 12, 13; 1 Tim. 1:15).

7. ¿Bin ya skʼan ya yal te ay machʼa ya jpasbeytik perdón?

⁷ ¿Mabal jichuk te leknax ya kaʼiy jbatik te ma jaʼuk ay ta jwentatik yalel machʼa ya spasbey perdón te Jehová? Manchukme jich-abi, ay bin ay ta jwentatik spasel. ¿Bin-a? Jaʼ teme ayniwan machʼa la sta smul ta jtojoltik, jaʼniwan tulan mulil, ya  skʼanbotik perdón o maʼuk. Ta swenta-abi ya skʼan ya jpasbeytik perdón, te ya skʼan ya yal te ma jkʼej kilinbatik sok maʼyuk slab koʼtantik ta stojol. Ta melel ma orauk ta pasel sok wokol ya kaʼiytik, kʼaxtoxan-a teme bayal kʼax jwokoltik yuʼune. Te revista La Atalaya 15 yuʼun septiembre 1994 jich ya yal: «Te kʼalal ay machʼa ya jpasbeytik perdón ma jaʼuk ya skʼan ya yal te ya jkoltaybeytik skʼoplal. Kʼalal te j-abat yuʼun Dios ya spas perdón, ya skʼan ya yal te ya yakʼ smukʼul yoʼtan te jaʼ ya schajpan spisil te Jehová. Melel jaʼ te tojil Juez ta swolol Balumilal sok ta chʼulchan, sok jaʼ ya snaʼ te bin-ora ya schajpane». ¿Bin yuʼun ya skʼan Jehová te ya jpastik perdón sok te ya smukʼulin koʼtantik te stojil ya xchajpanwane?

8. ¿Bin-utʼil ya kakʼtik ta ilel te ya kaltik wokol ta swenta te ya snaʼbotik yoʼbolil jbatik te Jehová?

⁸ Te kʼalal ya jpastik perdón, ya kakʼtik ta ilel te ya kaltik wokol ta swenta te ya snaʼ yoʼbolil jbatik te Jehová. Ta jun lokʼombakʼop, te Jesús la spajaltay te Jehová sok jtul ajwalil te la spasbey perdón te j-abat yuʼun te kʼax bayalix sbet te ma xjuʼix yuʼun stojele. Pero te j-abat ini ma la snaʼbey yoʼbolil sba te sjoy ta j-abat te ma bayal sbet ta stojole (Mat. 18:23-35). ¿Bin la yakʼ jnoptik te Jesús? Teme yuʼun-nix ya kaltik wokol ta swenta te ya snaʼbotik yoʼbolil jbatik te Jehová, jaʼ ya stij koʼtantik yuʼun ya jpasbeytik perdón te yantike (Sal. 103:9). Ta swenta-abi, bayalix jaʼbil te revista La Atalaya la scholbey skʼoplal te chikan jayeb buelta ya jpasbeytik perdón te yantike, maʼyuk bin-ora pajal sok te kʼalal «ya spas perdón sok te ya snaʼbotik yoʼbolil jbatik te Dios ta swenta te Cristo».

9. ¿Machʼatik ya snaʼbey yoʼbolil sba te Jehová? (Mateo 6:14, 15).

⁹ Teme ya jpastik perdón, te Jehová ya spasbotik perdón. Ya snaʼbey yoʼbolil sba te machʼa jaʼnix jich ya snaʼbey yoʼbolil sba te yantike (Mat. 5:7; Sant. 2:13). Te Jesús jamal la yalbey skʼoplal te kʼalal la snojptes te jnopojeletik ta skʼoponel Dios (kʼopona Mateo 6:14, 15). Te Jehová yalojix-a ta skʼajkʼalel te Job. Te j-abat yuʼun Dios-abi kujchemix yuʼun-a te bintik kʼux ta aʼiyel la yalik te Elifaz, Bildad sok Zofar. Te Jehová la yalbey te Job te akʼa skʼopon Dios ta stojolik. Te kʼalal jich la spas te Job, te Jehová la yakʼbey bendición (Job 42:8-10).

10. ¿Bin yuʼun ya yutsʼinotik teme ya jkʼej kilinbatik? (Efesios 4:31, 32).

¹⁰ Te skʼejel ilinba ya yutsʼinotik. Te skʼejel ilinba jich kʼoem te ay bin al jkuchojtik, te Jehová ya skʼan te ya kijkitaytik yuʼun ya jtatik te slamalil koʼtantik (kʼopona Efesios 4:31, 32). Jich ya yalbotik: «Ihquitaya te ilimba, hiluc awuʼun te cʼahcʼubel» (Sal. 37:8). Ya jta jlekilaltik teme ya jpastik te tojobtesel-abi, melel ya xjuʼ ya stsakotik chamel sok ya yutsʼin jpensartik teme ya jkʼej kilinbatik (Prov. 14:30). Teme ya jkʼej kilinbatik jich kʼoem te yakotik ta yuchʼel veneno te joʼotik-nix ya kutsʼin jbatik. Jich yuʼun te kʼalal ya jpasbeytik perdón te yantike ya jta jlekilaltik (Prov. 11:17). Lamalnax koʼtantik sok jun koʼtantik ya x-abatinotik ta stojol te Jehová.

11. ¿Bin ya yal te Biblia ta swenta te yakʼel spakol? (Romanos 12:19-21).

¹¹ Kijkitaytik ta skʼab Jehová te yakʼel spakol. Te Jehová ma yakʼojbotik ta jwentatik yakʼbeyel spakol te bin ma lek ya kichʼtik pasbeyele (kʼopona Romanos 12:19-21). Te bitʼil jmulawilotik sok ma  jnaʼtik ta lek spisil te bin ya xkʼot ta pasel, ma jpajtik te Jehová ta swenta te bin-utʼil leknax ya schajpan te kʼope (Heb. 4:13). Jaʼnix jich te bin yaʼiyel ya kaʼiy jbatik ya xjuʼ ya sloʼlayotik te ma stojiluk ya kiltik te bin ya xkʼot ta pasel. Te Santiago jich la stsʼibay: «Te yilimba ants-winiquetic ma ba ya yacʼ te ya spas te bin stojil ay ta pasel yuʼun Dios» (Sant. 1:20). Seguro ayotik te ya spas te bin stojil te Jehová sok jaʼ ya schajpan ta lek.

12. ¿Bin-utʼil ya kakʼtik ta ilel te ya smukʼulin koʼtantik te stojil ya xchajpanwan te Jehová?

¹² Kʼalal ya jpastik perdón, ya kakʼtik ta ilel te ya smukʼulin koʼtantik te stojil ya xchajpanwan te Jehová. Ya kakʼtik ta ilel te schʼuunoj koʼtantik te jaʼ ya schajpan te wokoliletik yakʼoj te mulile teme jaʼ ya kakʼtik ta swentae. Ta achʼ balumilal, te bintik ya yakʼ jwokoltik «ya me xchʼay jilel ta oʼtanil, ma me ayuc jtuluc ya snaʼ xan» (Is. 65:17, TZOXCH). Pero, ¿yabal xjuʼ ya jlokʼes ta koʼtantik te ilinba sok ma jkʼej ta koʼtantik kʼalal ay machʼa yakʼojbotik bayal jwokoltik? Kiltik bin-utʼil chaʼoxtul juʼem yuʼunik.

13, 14. ¿Bin ya yakʼ jnoptik te bin kʼax ta stojol te Tony sok te José?

¹³ Bayal ta tul hermanoetik spasojik perdón manchukme akʼbot bayal swokolik yuʼun te ants winiketik. ¿Bin lekilal staojik yuʼun?

¹⁴ Kiltik bin kʼax ta stojol te Tony, * te yak ta kuxinel ta Filipinas. Kʼalal mato x-och ta testigo yuʼun Jehová, la yichʼ milel jtul sbankil. La snaʼ stojol te jaʼ milot yuʼun jtul winik te José sbiile. Te bitʼil oranax ya x-ilin te Tony sok ya xmajawan, la yakʼ ta yoʼtan te ya yakʼbey spakol. Te José otsesot ta cárcel ta skaj te la yaʼiy milawe. Te kʼalal lokʼ ta cárcel te José, te Tony la yakʼ ta yoʼtan te ya sle sok ya smil, jich yuʼun la sman spistola. Pero ta patil jajch snop te Biblia sok te testigoetik yuʼun Jehová. Jich ya yal: «Kʼalal la jnop ta Biblia te ya skʼan ya jeltay te jtalele, la kil te ya skʼan ya jlokʼes ta koʼtan te ilinba». Te Tony la yichʼ jaʼ sok ta patil bael och ta anciano ta congregación. ¡Bayal akʼbot stseʼelil  yoʼtan kʼalal la snaʼ stojol te jaʼnix jich och ta testigo yuʼun Jehová te José! Kʼalal la sta sbaik, tulan la smey sbaik, jich yuʼun te Tony la yalbey te la spasbeyix perdón te José. Te Tony ya yal te bayal stseʼelil yoʼtan akʼbot kʼalal la spasbey perdón te José. Te hermano-abi la snaʼ spasel perdón, sok akʼbot bendición yuʼun te Jehová.

15, 16. ¿Bin ya yakʼ jnoptik te bin kʼax ta stojol te Peter sok te Sue?

¹⁵ Ta 1985, kʼalal ayik ta sNail Tsoblej te Peter sok te Sue tʼom jun bomba te la yakʼ jilel jtul winik tey-a. Ta swenta-abi te Sue la sta tulan ejchen te utsʼinbot jilel te sit, te schikin sok maʼyukix bin ya yaʼiybey yikʼ. * Spisil-ora te Peter sok te Sue jich ya sjojkʼoybey sbaik: «¿Machʼawan la spas te bin kʼax ma leke?». Bayal jaʼbil ta patil te winik-abi, te ma jaʼuk testigo yuʼun Jehová, la yichʼ otsesel ta cárcel sok la yichʼ albeyel te maʼyuk bin-ora ya xlokʼixe. La yichʼik jojkʼoybeyel te Peter sok te Sue teme la spasbeyikix perdone, jich ya yalik: «Te Jehová la yakʼbotik jnoptik teme jaʼ ya xbajt ta koʼtantik te jwokoltik sok te spisil-ora ilinemotik ya xjuʼ ya yutsʼinotik, te ma lek ya kaʼiy jbatik sok ya yutsʼin te jpensartik. Jich yuʼun la jkʼanbeytik te Jehová te yakuk skoltayotik ta slokʼesel ta koʼtantik te ilinba sok te ma jkʼej slab koʼtantik ta stojole swenta jun koʼtantik ya x-abatinotik».

¹⁶ ¿Wokolbal yaʼiyojik spasel perdón te Peter sok te Sue? Aynix wokol yaʼiyojik. Jich ya yalik: «Baeltik ya xtal slab koʼtantik kʼalal te Sue ya xwoklaj ta swenta te bin kʼot ta stojole. Te bitʼil maba ya kakʼ ta koʼtantike, ya xchʼay ta ora te bin yaʼiyel ya kaʼiy jbatike. Jaʼ yuʼun teme ay bin-ora och ta Testigo te winik-abi, sok spisil koʼtantik ya kaltik te tseʼelnax koʼtantik yuʼune. Te experiencia-abi ya yakʼ jnoptik teme ya jpas ta jkuxlejaltik te mantaliletik ta Biblia maba ya jta bayal jwokoltik. Jaʼnix jich ya yakʼ smukʼul koʼtantik snaʼel te nopol ya slajinix Jehová te bintik ya yakʼ jwokoltike».

17. ¿Bin ya yakʼ jnoptik te bin kʼax ta stojol te Myra?

 ¹⁷ Te Myra la snaʼbey sba te Jehová te kʼalal nujpunemix-a sok ayix chaʼtul yalatak, pero te smamalal maʼyuk bin la skʼan stukel. Ta patil te smamalal la yaʼiy mulwej sok ijkitayot te Myra. Jich ya yal: «Kʼalal la yijkitayon te jmamalal, kʼax ma lek la kaʼiy jba. Jich la kaʼiy jba te bitʼil ya yaʼiy sbaik te machʼatik ya xloʼlayotike: maʼyuk machʼa ya smukʼulinix koʼtan, ay jwokol, ay jmul ya kaʼiy, sok ay slab koʼtan». Manchukme laj te nujpunel yuʼun, maba kʼax te swokole. Te Myra jich ya yalxan: «Bayal u jich la kaʼiy jba, sok la kil te yak ta yutsʼinel te bitʼil lek kiloj jba sok te Jehová sok te bitʼil ya kil te yantike». Ta ora ini, te Myra maba ya skʼejix yilinba sok ya kʼan te lekuk ay te machʼa smamalal-ae. Jaʼnix jich ya skʼan te ayuk bin-ora ya snaʼbey sba-euk te Jehová. Te Myra jaʼ baem ta yoʼtan te bin ya xtal ta pajel chaʼbej ma jaʼuk te bin kʼaxem ta stojole. Manchukme stukel la schʼites te yalatak, ta ora ini tseʼel yoʼtan yak ta abatinel ta stojol Jehová sok te yalatak sok te sfamiliae.

18. Te bitʼil jaʼ mukul Juez te Jehová, ¿bin-a te seguro ayotik yuʼune?

¹⁸ Te bitʼil jaʼ mukʼul Juez te Jehová, ya skʼan te maba ya jmel koʼtantik te bitʼil ya schajpan te yantike. Te bitʼil jaʼ ay ta swenta spasel-abi. ¡Leknax ya kaʼiy jbatik! (Rom. 14:10-12). Seguro ayotik te spisil-ora stojil ya xchajpanwan ta swenta te bin lek sok te bin ma leke (Gén. 18:25; 1 Rey. 8:32). Maʼyuk bin ora ya spas te bin ma stojiluke.

19. ¿Bin ya spas ta pajel chaʼbej te Jehová te bitʼil toj ya xchajpanwane?

¹⁹ Te Jehová ya schajpan ta jkʼaxel spisil te wokoliletik yakʼoj te mulil sok te bitʼil jmulawilotike. ¡Ya jkʼantik te ya xkʼotix yorail-abi! Ya slajin ta jkʼaxel te bin ya yakʼ jwokoltik ta jbakʼetaltik sok te bin ma lek ya kaʼiy jbatik yuʼun (Sal. 72:12-14; Apoc. 21:3, 4). Melel ya schʼay bael spisil te bintik ay ta nailale. Te bitʼil mato xkʼot yoraile, mukʼuk skʼoplal ya kiltik te ejemplo yakʼojbotik te Jehová ta swenta spasbeyel perdón te yantike.