1. ¿Kʼusi yaloj tspas Jeova ta stojolal li buchʼutik tsutes yoʼontone?

 LI Jeovae jaʼ Jpasvanej, J-akʼmantal xchiʼuk Jchapanvanej kuʼuntik. Pe jaʼ jkʼanvanej Totil kuʼuntik xtok (Sal. 100:3; Is. 33:22). Jaʼ yuʼun, mi la jsaʼ jmultik xchiʼuk mi la jsutes koʼontontik ta melele, maʼuk noʼox xuʼ yuʼun chakʼutik ta perton, yuʼun oy ta yoʼonton jech tspas xtok (Sal. 86:5). Li j-alkʼop Isaiase oy kʼusi akʼbat snaʼ yuʼun Jeova ti tspat koʼontontike. Xi albate: «Akʼo mi solel kuxul tsoj li amulike, sak ta xkom kʼuchaʼal li taive» (Is. 1:18).

2. ¿Kʼusi skʼan jpastik mi ta jkʼan lek xkil jbatik xchiʼuk li yantike?

² Ta skoj ti jmulavilutike, oy onoʼox kʼusitik ta jpastik xchiʼuk chkaltik ti chopol-o chaʼi sbaik li yantike (Sant. 3:2). Akʼo mi jech, xuʼ onoʼox buchʼutik lek xkamigointik. Li kʼusi tsots skʼoplale jaʼ ti xkakʼbe jbatik pertone (Prov. 17:9; 19:11; Mat. 18:21, 22). Li Jeovae tskʼan ti xkakʼbe jbatik ta perton li kʼusi jsetʼ juteb ta jpasbe jbatike (Kol. 3:13). Skʼan onoʼox ti jech jpastike, yuʼun li stuke muʼyuk spajeb ti kʼu yelan chakʼutik ta pertone (Is. 55:7).

3. ¿Kʼusi ta jkʼeltik li ta xchanobil liʼe?

³ Li ta xchanobil liʼe, ta jkʼeltik kʼuxi xuʼ xij-akʼvan ta perton jech kʼuchaʼal tspas Jeova akʼo mi jpasmulilutik. ¿Kʼusitik mulil ti jaʼ skʼan skʼelbeik skʼoplal li moletike? ¿Kʼu yuʼun tskʼan Jeova ti xkakʼbe jbatik pertone? Xchiʼuk ¿kʼusi xuʼ jchanbetik li ermanoetik ti laj yil tajek svokolik ta skoj li smul yantike?

4. 1) ¿Kʼusi skʼan spas li buchʼu tsots la spas smule? 2) ¿Kʼusi oy ta sbaik spasel li moletike?

⁴ K’alal oy buchʼu tsots tspas smule, skʼan xichʼ albel  li moletike. Li ta 1 Korintios 6:9 xchiʼuk 10 te chalbe skʼoplal junantik tsatsal muliletik. Li muliletik taje solel skontrainoj li smantal Diose. Mi oy jun ermano jaʼ jech tspas smule, skʼan skʼanbe Jeova ti x-akʼat ta pertone xchiʼuk skʼan xalbe li moletik ta tsobobbaile (Sal. 32:5; Sant. 5:14). Jaʼ noʼox Jeova xuʼ x-akʼvan ta perton ta j-echʼel. Jaʼ jech tspas ta skoj ti ay chamuk ta jtojolaltik li Jesuse. b Akʼo mi jech, yakʼojbe ta sba moletik ti skʼelbeik skʼoplal ta Vivlia mi xuʼ to xkom ta tsobobbail li buchʼu la spas smule (1 Kor. 5:12). Jtos li kʼusi tspasike jaʼ ti tskʼelbeik skʼoplal liʼe: ¿mi yolbaj la spas smul li jun ermanoe?, ¿mi la smuk li smule?, ¿mi oy kʼuk sjalil ti jech la spasilan smule? Li kʼusi mas tsots skʼoplal tskʼelike jaʼ mi sutesoj yoʼonton ta melele xchiʼuk mi xvinaj ti akʼbil xa ta perton yuʼun li Jeovae (Ech. 3:19).

5. Li kʼusi tspas moletike, ¿kʼuxi tstabeik sbalil li tsobobbaile?

⁵ Kʼalal tstsob sbaik li moletik ta tsobobbail xchiʼuk li buchʼu spasoj smule, jaʼ tstsakik ta venta li kʼusi kʼotem xa ta nopel yuʼun Jeova kʼalal oy kʼusi chkʼot ta nopel yuʼunike (Mat. 18:18). ¿Kʼuxi tstabe sbalil li tsobobbaile? Mi mu sutes yoʼonton li buchʼu la spas smule, chichʼ lokʼesel li ta tsobobbaile, vaʼun jaʼ jech chchabi xchijtak li Jeova sventa mu xchanbeik li xchopol talelale (1 Kor. 5:6, 7, 11-13; Tito 3:10, 11). Jech xtok, chkoltaat li buchʼu la spas smul sventa sutes yoʼonton xchiʼuk ti x-akʼat ta perton yuʼun li Jeovae (Luk. 5:32). Li moletike tskʼanbeik vokol Jeova ta stojolal li buchʼu la spas smul ti sutesoj xa yoʼontone xchiʼuk tskʼanbeik ti akʼo skolta yoʼ xlekub ta mantal yan veltae (Sant. 5:15).

6. Albo smelolal mi xuʼ x-akʼat ta perton yuʼun Jeova li buchʼu lokʼem ta tsobobbaile.

⁶ Jnoptik noʼox avaʼi liʼe: mi chakʼ ta ilel ti muʼyuk sutesoj yoʼonton li buchʼu spasoj smul kʼalal tstsob sba xchiʼuk li moletike, chichʼ lokʼesel ta tsobobbail. Jech xtok, li moletike muʼyuk tskoltaik mi muʼyuk la xchʼunbe li smantaltak ajvalile. Li Jeovae yakʼojbe ta sba j-abteletik ti xchapanik li buchʼu mu xchʼunbe smantal ajvalile akʼo mi sutes yoʼonton o mi muʼyuk (Rom. 13:4). Pe mi vul xchʼulel li buchʼu la spas smule, mi la sutes yoʼonton ta melel, mi la sjel li kʼusi tsnop xchiʼuk tspase, ta sjunul yoʼonton ch-akʼat ta perton yuʼun li Jeovae (Luk. 15:17-24). Ch-akʼat ta perton manchuk mi tsots la spas smul (2 Kron. 33:9, 12, 13; 1 Tim. 1:15).

7. ¿Kʼusi smakojbe skʼoplal ti chkakʼtik ta perton li buchʼu spasoj smul ta jtojolaltike?

⁷ ¿Mi mu jechuk ti tspat koʼontontik ti maʼuk oy ta jbatik yalel mi chakʼ ta perton jun jpasmulil li Jeovae? Pe oy kʼusi jbainojtik spasel. ¿Kʼusi taje? Yikʼaluk van oy buchʼu tskʼanbutik perton ta skoj ti la spas smul ta jtojolaltike o ti tsots kʼusi la spasbutike. O xuʼ van muʼyuk tskʼanbutik perton. Kʼuk xiuk noʼox, xuʼ me xkakʼtik ta perton, jaʼ xkaltik, ti mu jnakʼ skʼakʼal koʼontontik xchiʼuk skapemal joltik ta stojolale. Ti melel xkaltike, xuʼ van mu ta aniluk spas kuʼuntik taje xchiʼuk vokol chkaʼitik, mas to mi toj kʼux li kʼusi la spasbutike. Xi chal li revista La Atalaya ta 15 yuʼun septiembre ta 1994: «Kʼalal chij-akʼvan ta pertone, maʼuk skʼan xal ti lek xa laj kiltik li  kʼusi laj kichʼtik pasbele. Kʼalal ch-akʼvan ta perton li jun yajtsʼaklom Kristoe, jaʼ skʼan xal ti chakʼbe ta yok skʼob Jeova li kʼusi kʼot ta pasele. Li Jeovae jaʼ tukʼil Jchapanvanej ta sjunul vinajel balumil xchiʼuk ta yorail chchapan skotol». ¿Kʼu yuʼun tskʼan Jeova ti xij-akʼvan ta pertone xchiʼuk ti jpat koʼontontik ti tukʼ chchapanvane?

8. ¿Kʼuxi chkakʼtik ta ilel ti ta jtojtik ta vokol li xkʼuxul yoʼonton Jeovae?

⁸ Kʼalal chij-akʼvan ta pertone, chkakʼtik ta ilel ti ta jtojtik ta vokol li xkʼuxul yoʼonton Jeovae. Li ta jun lokʼolkʼope, li Jesuse la skoʼoltajes Jeova kʼuchaʼal jun yajval abtel ti la xchʼaybe yil jun smoso ti ep tajeke. Pe li mosoil taje muʼyuk xkʼuxubaj ta yoʼonton li xchiʼil ta mosoil ti juteb noʼox yile (Mat. 18:23-35). ¿Kʼusi tskʼan chakʼ ta chanel li Jesuse? Jaʼ ti chlokʼ ta koʼontontik yakʼel ta perton yantik mi ta melel ta jtojtik ta vokol li xkʼuxul yoʼonton Jeova ta jtojolaltike (Sal. 103:9). Jlik revista Li Jkʼel-osil ta toyol ti voʼne xa slokʼele laj yal ti akʼo mi ep ta velta chkakʼtik ta perton li yantike mu onoʼox xkoʼolaj «ti kʼu yelan ch-akʼvan ta perton xchiʼuk chakʼ ta ilel xkʼuxul yoʼonton Dios ta skoj ti ay chamuk li Kristoe».

9. ¿Buchʼutik chakʼbe ta ilel xkʼuxul yoʼonton li Jeovae? (Mateo 6:14, 15).

⁹ Mi chij-akʼvan ta pertone, chakʼutik ta perton li Jeovae. Li stuke chkʼuxubin li buchʼutik chakʼ ta ilel xkʼuxul yoʼontonik eke (Mat. 5:7; Sant. 2:13). Li Jesus eke jaʼ jech laj yal kʼalal la xchanubtas yajchankʼoptak ti kʼu yelan skʼan spas s-orasionike (kʼelo Mateo 6:14, 15). Li ta skʼakʼalil Jobe, li Jeovae jaʼ xa onoʼox jech laj yakʼ ta ilel. Li Jobe oy kʼusitik kʼuxik albat yuʼun li Elifas, Bildad xchiʼuk Sofare. Pe albat yuʼun Jeova ti akʼo spas orasion ta stojolalike. Kʼalal jech la spas li Jobe, akʼbat bendision (Job 42:8-10).

10. ¿Kʼu yuʼun chopol mi ta jnakʼ skʼakʼal koʼontontike? (Efesios 4:31, 32).

¹⁰ Chopol me mi ta jnakʼ skʼakʼal koʼontontike. Li skʼakʼal oʼontonale xkoʼolaj kʼuchaʼal jun ikatsil, jaʼ yuʼun li Jeovae tskʼan ti jyalestike (kʼelo Efesios 4:31, 32). Xi chalbutike: «Iktao li skʼakʼal avoʼontone xchiʼuk komtsano li stiʼemal ajole» (Sal. 37:8). Mi ta jchʼuntik li tojobtasel taje, ta me jtabetik sbalil. Yuʼun mi la jnakʼ skʼakʼal koʼontontike, chij-ipaj xchiʼuk chilbajin jnopbentik (Prov. 14:30). Kʼalal oy buchʼu ta jnakʼ skʼakʼal koʼontontik ta stojolale, voʼotik noʼox chkil jvokoltik, yuʼun xkoʼolaj ti chkuchʼtik venenoe. Jaʼ yuʼun, kʼalal chkakʼtik ta perton li yantike, ta jtabetik sbalil jtuktik (Prov. 11:17). Jun noʼox koʼontontik xchiʼuk xuʼ xijtun-o batel ta stojolal Jeova.

11. ¿Mi chal Vivlia ti jpak jkʼoplaltike? Albo smelolal (Romanos 12:19-21).

¹¹ Kakʼtik ti jaʼuk spak jkʼoplaltik li Jeovae. Li Jeovae muʼyuk yakʼojbutik permiso sventa jpakbetik sutel li buchʼu oy kʼusi chopol spasojbutike (kʼelo Romanos 12:19-21). Ta skoj ti maʼuk tukʼil krixchanoutik xchiʼuk ti mu xkiltik skotol li kʼusitik chkʼotanuk ta pasele, mu xuʼ xijchapanvan jech kʼuchaʼal tukʼ chchapanvan li Jeovae (Ebr. 4:13). Bakʼintik xtoke, muʼyuk xa lek kʼusi chkʼot ta nopel kuʼuntik ta skoj ti kʼu yelan chkaʼi jbatike. Xi la stsʼiba li Santiagoe: «Maʼuk tspas kʼusi tukʼ ta sat Dios kʼalal ch-ilin li jun krixchanoe» (Sant. 1:20). Xuʼ jchʼuntik ti  lek kʼusi tspas li Jeovae xchiʼuk ti tukʼ chchapanvane.

12. ¿Kʼuxi chkakʼtik ta ilel ti jpatoj koʼontontik ti tukʼ chchapanvan li Jeovae?

¹² Kʼalal chij-akʼvan ta pertone, chkakʼtik ta ilel ti jpatoj koʼontontik ti tukʼ chchapanvan li Jeovae. Kʼalal chkakʼbetik ta yok skʼob Jeova li kʼusi kʼot ta pasele, jaʼ jech chkakʼtik ta ilel ti jpatoj koʼontontik ti chchapan skotol li kʼusi chopol kʼotem ta pasel yuʼun li mulile. Yaloj ta jamal ti ta achʼ balumile «muʼyuk xa chichʼ tael ta naʼel» li kʼusi kʼux chkaʼitike xchiʼuk «muʼyuk te chkom-o ta oʼontonal» (Is. 65:17). Pe ¿mi ta melel xuʼ xchʼay li skapemal joltik xchiʼuk skʼakʼal koʼontontik ta stojolal li buchʼu yakʼoj tajek jvokoltike? Jkʼeltik kʼuxi spasoj junantik ermanoetik.

13, 14. ¿Kʼusi chakʼ achan li kʼusi kʼot ta stojolal Toni xchiʼuk Josée?

¹³ Ep kermanotaktike yakʼojik ta perton li buchʼutik chopol tajek k’usi pasbatike. ¿Kʼuxi staojbeik sbalil ti jech la spasike?

¹⁴ Kalbetik skʼoplal Toni c ti te nakal ta Filipinase. Kʼalal maʼuk toʼox stestigo Jeovae, cham li sbankile. Laj yaʼi ti jaʼ milvan jun vinik ti José sbie. Ta skoj ti simaron xchiʼuk lek snaʼ saʼ kʼop li Tonie, tskʼan xa ox tspak sutel. Li Josée laj yichʼ tikʼel ta chukel ta skoj ti milvane. Kʼalal lokʼ ta chukele, li Tonie laj yal ti tsta ta saʼele xchiʼuk ti tsmile, jaʼ yuʼun la sman spistola. Pe ta tsʼakale, lik yichʼ chanubtasel ta Vivlia yuʼun li stestigotak Jeovae. Xi chale: «Kʼalal jaʼo yakal ta jchan li Vivliae, laj kakʼ venta ti skʼan jel li jtalelale. Skʼan mu jnakʼ li skapemal jole». Li Tonie laj yichʼ voʼ xchiʼuk ta mas tsʼakale kʼot ta mol ta tsobobbail. ¡Chʼayal to kʼot yoʼonton kʼalal laj yaʼi ti jaʼ xa stestigo Jeova li José eke! La smey sbaik kʼalal la sta sbaike, vaʼun li Tonie laj yalbe José ti yakʼoj xa ta pertone. Li Tonie laj yal ti mu xa noʼox x-al yuʼun kʼu to yepal xmuyubaj kʼalal laj yakʼ ta perton  li Josée. Akʼvan ta perton li Tonie, jaʼ yuʼun akʼbat bendision yuʼun Jeova.

15, 16. ¿Kʼusi chakʼ achan li kʼusi kʼot ta stojolalik li Peter xchiʼuk Sue?

¹⁵ Li ta 1985, li Peter xchiʼuk Sue te oyik ta tsobajel ta salon kʼalal tʼom jpʼej vombae. Ta skoj taje, li Sue mu xa xaʼibe lek yikʼ li kʼusitike, chopol kom-o li sate xchiʼuk li xchikine. d Ep ta velta xi la sjakʼbe sbaike: «¿Buchʼu xa noʼox ti jech la spase?». Li buchʼu la stikʼ vomba ti maʼuk stestigo Jeovae laj yichʼ chukel xchiʼuk muʼyuk xa chlokʼ-o. Kʼalal laj yichʼik jakʼbel li Peter xchiʼuk Su mi xchʼayojbeik xa smule, xi laj yalike: «Li Jeovae yakʼoj jchantik ti kʼalal ta jnakʼ skapemal joltik xchiʼuk skʼakʼal koʼontontike, chij-ipajutik, muʼyuk xijmuyubajutik xchiʼuk chilbajin jnopbentik. Jaʼ yuʼun, kʼalal achʼtik toʼox jech kʼot ta pasele, la jkʼanbekutik Jeova ti akʼo skoltaunkutik sventa mu jnakʼ skapemal jolkutik xchiʼuk skʼakʼal koʼontonkutike».

¹⁶ ¿Mi kʼun van laj yaʼiik li nupultsʼakal ti x-akʼvanik ta pertone? Muʼyuk. Xi chalike: «Bakʼintike, chkap to-o jolkutik kʼalal oy to chaʼibe xkʼuxul li kʼusi kʼot ta stojolal Sue. Pe ta skoj ti chkakʼkutik persa muʼyuk ta jnopilanbekutik skʼoplal taje, tspas ta jun koʼontonkutik. Jech xtok, ta sjunul koʼonton chkalkutik ti mi oy jun kʼakʼal ch-och ta stestigo Jeova li vinik taje, lek ta jchʼamkutik li ta steklumal Jeovae. Li kʼusi la jnuptankutike laj yakʼ jchankutik ti jun noʼox koʼontontik kʼalal chkakʼ ta jkuxlejaltik li beiltaseletik ta Vivliae. Jech xtok, tspat koʼontonkutik ti jutuk xa skʼan slajesbe skʼoplal vokolil li Jeovae».

17. ¿Kʼusi chakʼ achan li kʼusi kʼot ta stojolal Mairae?

¹⁷ Li Mairae jaʼo laj yojtikin Jeova kʼalal nupunem xa ox xchiʼuk oy xa ox chaʼvoʼ yuni alabtake, pe li smalale muʼyuk la  xchʼam li mantale. Ta mas tsʼakale, mukul satiat yuʼun li smalale xchiʼuk iktaatik komel. Xi chal li Mairae: «Mu xa jnaʼ kʼusi ta jpas laj kaʼi kʼalal laj yiktaunkutik li jmalale. Jaʼ jech laj kaʼi jba kʼuchaʼal chaʼi sbaik li buchʼutik chloʼlaatik yuʼun snup xchiʼilike: mu xa jpat koʼonton ta stojolal li yantike, kʼux laj kaʼi li jvokole, oy jmul laj kaʼi jba xchiʼuk xkapet noʼox jol». Akʼo mi la xtuchʼ li snupunelike, jech-o kʼux laj yaʼi ti laj yichʼ loʼlaele. Xi to chal li Mairae: «Oy jayibuk u ti jech laj kaʼi jbae, pe laj kakʼ venta ti yakal xa ox snamajesun ta stojolal Jeova xchiʼuk ta stojolal yantike». Avie, muʼyuk xa snakʼoj skapemal sjol li Mairae xchiʼuk muʼyuk tskʼan ti chopol kʼusi xkʼot ta stojolal li smalal toʼoxe. Li kʼusi oy ta yoʼontone jaʼ ti xlikuk xchan li Vivliae. Li Mairae maʼuk jaʼ tsnopbe skʼoplal li kʼusi kʼot ta pasele, yuʼun jaʼ tsnopbe skʼoplal li kʼusi chtal ta jelavele. Akʼo mi stuk la stsʼitesan ta mantal li chaʼvoʼ yalabtake, avie jun yoʼonton chtunik ta stojolal Jeova xchiʼuk li yutsʼ yalalike.

18. ¿Kʼuxi tspat koʼontontik ti jnaʼojtik ti jaʼ Mukʼta Jchapanvanej li Jeovae?

¹⁸ Ta skoj ti jaʼ Mukʼta Jchapanvanej li Jeovae, mu persauk jnoptik kʼu yelan chichʼik chapanel li yantike. Yuʼun jaʼ chchapanvan stuk. Taje tspat koʼontontik (Rom. 14:10-12). Xuʼ jchʼuntik ta melel ti kʼalal chchapanvane, jaʼ tstsak ta venta li stukʼil mantaltak ta sventa li kʼusi lek xchiʼuk kʼusi chopole (Jen. 18:25; 1 Rey. 8:32). Li Jeovae muʼyuk onoʼox tspas li kʼusi muʼyuk tukʼe.

19. ¿Kʼusi tspas ta jelavel li Jeova ti tukʼ snaʼ xchapanvane?

¹⁹ Li Jeovae ta slajesbe skʼoplal li vokolil yakʼoj li mulil xchiʼuk ti maʼuk tukʼil krixchanoutike. ¡Ta jkʼantik xa ti xkʼot ta pasel taje! Li Jeovae tslajesbe skʼoplal ta sbatel osil li kʼusi chopol chkaʼi-o jbatik yuʼune xchiʼuk chpoxtautik (Sal. 72:12-14; Apok. 21:3, 4). Chchʼay-o ta joltik ta j-echʼel li kʼusi chopol kʼot ta pasele. Pe yoʼ to mu xkʼot yoraile, akʼvankutik ta perton jech kʼuchaʼal tspas li Jeovae.