1. Кызьы Иегова буйгатэ соосты, кинъёс сьӧлыкъёссы понна ӧпкелё?

 ИЕГОВА — милям Кылдытӥсьмы, Закон сётӥсьмы но Судьямы. Со сяна, со милям инмысь Атаймы (Пс. 99:3; Ис. 33:22). Ми сьӧлыкамы ке, собере ӧпкелимы ке, Иегова быгатэ но солэн потэ милемыз простить каремез (Пс. 85:5). Исаия пророк пыр со милемыз яратыса буйгатэ: «Сьӧлыкъёсын нап-горд ке но луиды, тӥледыз лымы кадь тӧдьы каро» (Ис. 1:18).

2. Мар юрттоз милемлы мукетъёсыныз тупаса улыны?

² Ми ваньмы тырбыдэстэмесь. Соин ик куддыръя кылъёсынымы но ужъёсынымы мукетъёсты вӧсь кариськомы (Иак. 3:2). Но ми простить карыны дышетскимы ке, соку мукет адямиосын кусыпъёсмы уз сӧриське (Мад. 17:9; 19:11; Матф. 18:21, 22). Куке милемыз кин ке вӧсь каре, Иегова возьма, ми простить каромы шуыса (Еф. 4:32). Иегова ачиз но милемыз вань сюлмысьтыз простить каре (Ис. 55:7).

3. Мар сярысь вераськоз та статьяын?

³ Та статьяын вераськоз со сярысь, кызьы тырбыдэстэм адямиос быгато тырбыдэс Инмарлэсь адӟем карыны но мукетъёсты простить карыны. Ми шедьтомы валэктонъёс таӵе юанъёслы: кыӵе сьӧлыкъёс сярысь тӧроослы  вераны кулэ? Малы Иегова мылкыдмес ӝутэ мукетъёсты простить карыны? Малы ми дышетскыны быгатӥськомы агайёслэсь но сузэръёслэсь, кудъёсызлы мукет адямиослэн сьӧлыкъёссы сэрен туж бадӟым изъян ваемын вал?

4. а) Мар кароно Иеговалэн ужась-тыршисезлы, кудӥз бадӟым сьӧлык лэсьтӥз? б) Мар кароно тӧроослы, куке сьӧлыкам адямиен пумисько?

⁴ Ми тодӥмы ке, агай яке сузэр бадӟым сьӧлык лэсьтӥз шуыса, со сярысь тӧроослы вераны кулэ. Куд-ог сыӵе сьӧлыкъёс сярысь вераське 1 Коринфъёслы 6:9, 10. Секыт сьӧлык — со Инмарлэсь законзэ тӥян. Соин ик сьӧлыкам муртлы Иеговалы сьӧлыкез сярысь верано но кенешысь тӧроослэсь юрттэт куроно (Пс. 31:5; Иак. 5:14). Соку мар карыны кулэ тӧроос? Христослэн курбонэзлы луыса Иегова гинэ быгатэ быдэсак простить карыны b. Но Иегова тӧроослы лэзиз, Библиысь возетъёсты лыдэ басьтыса, ужпум кутыны, сьӧлыкам муртэ кенешысь поттоно-а, ӧвӧл-а (1 Кор. 5:12). Со сяна, тӧроос валаны кулэ: адями юри сьӧлыказ-а? Со сьӧлыксэ ватыса улӥз-а? Кӧня дыр ӵоже со сьӧлыкаса улӥз? Нош тужгес но кулэез: адӟиське-а, со вань сюлмысьтыз ӧпкеле шуыса? Мар ке возьматэ-а, Иегова сое простить кариз шуыса? (Ап. уж. 3:19).

5. Кыӵе ужпумен тӧроос пумисько соин, кин бадӟым сьӧлык лэсьтӥз?

⁵ Кыӵе ужпумен тӧроос пумисько соин, кин бадӟым сьӧлык лэсьтӥз? Тӧроослы кутоно сыӵе ик ужпум, кудӥз инмын кутэмын вал ини. Соин ик соос вӧсясько но Библиысь возетъёсты пыр-поч эскеро (Матф. 18:18). Кыӵе пайда со кенешлы вае? Сьӧлыкам мурт ӧз ӧпкельы ке, со кенешысь поттэмын луоз но мукет вын-агайёслы но сузэр-апайёслы изъян вайыны уз быгаты (1 Кор. 5:6, 7, 11—13; Тит. 3:10, 11). Нош со ӧпкелиз ке, Инмар сое простить кароз (Лука 5:32). Соку тӧроос со понна вӧсяськозы но Инмарлэсь юрттэт курозы соин кусыпъёссэ тупатыны (Иак. 5:15).

6. Быгатэ-а Иегова простить карыны сое, кин кенешысь поттэмын вал? Валэктэ.

⁶ Шуом, тӧроосын пумиськыкуз, адями уг ӧпкельы. Соку сое кенешысь потто. Со шаерысь катэз тӥяз ке, тӧроос сое кылкутытонлэсь уз уте. Малы ке шуоно Иегова кивалтӥсьёслы лэзиз кылкутытыны котькинэ, кин урод уж лэсьтӥз, ӧпкеле-а со, уг-а (Рим. 13:4). Нош берлогес адями сьӧлыксэ валаз ке, вань сюлмысьтыз ӧпкелиз ке но воштӥськиз ке, Иегова сое шумпотыса простить кароз (Лука 15:17—24). Со простить кароз соку но, куке туж секыт сьӧлык лэсьтэмын вал (2 Пар. 33:9, 12, 13; 1 Тим. 1:15).

7. Кызьы ми возьматыны быгатӥськомы, милемыз вӧсь карись адямиез простить кариськомы шуыса?

⁷ Адямилэсь сьӧлыксэ простить карыны луэ-а, уг-а, ми ужпум ум кутӥське. Сыӵе ужпум Иегова кутэ. Озьы ке но милемлы но кыӵе ке ужпум кутоно. Кыӵе? Куддыръя милемыз вӧсь каро, но собере куро простить карыны. Нош куддыръя милемыз вӧсь каро ке но, простить карыны уг куро. Соку милемлы ужпум кутоно адямиез простить карыны  но со вылэ йыркуръяськытэк улыны. Тани мар со сярысь вераськиз 1994-тӥ арын 15-тӥ куарусён понна поттэм «Возьмаськон башняын» (ӟуч): «Адямиез простить карыса, ми ум малпаське, со янгыш ӧз ик лэсьты шуыса. Простить карыса, ми возьматӥськомы, та ужез Иегова умойгес сэрттоз-пертчоз шуыса. Со быдэс дунне вылысь шонерлыко Судья но ас дыраз шонерлыкез тупатоз». Малы Иегова мылкыдмес ӝутэ простить карыны но ваньзэ со кие сётыны?

8. Кызьы Иеговалэн гажан-жалянэз понна тау каронмес возьматоно?

⁸ Простить карыса, ми Иеговалэн гажан-жалянэз понна тау каронмес возьматӥськомы. Огпол Иисус вераз мадён. Иисус Инмарез ӵошатӥз эксэен, кудӥз аслаз ляльчиезлэсь туж бадӟым тыронзэ простить кариз. Нош та ляльчи простить ӧз кары аслэсьтыз эшсэ, кудӥзлэн солы трослы пичигес тыронэз вал (Матф. 18:23—35). Малы Иисуслэн милемыз дышетэмез потэ вал? Ми Иеговалэн гажан-жалянэз понна вань сюлмысьтымы тау кариськомы ке, ми но мукетъёсты простить карыны тыршомы (Пс. 102:9). Трос аръёс талэсь азьло «Возьмаськон башняын» вераськиз: «Кӧня гинэ ми мукетъёссэ простить медам каре, сое ӵошатыны ик уз луы соин, кӧня Иегова Христослэн курбонэзлы луыса адямиосты гажаса-жаляса простить каре».

9. Кинэ гажа-жаля Иегова? (Матфей 6:14, 15).

⁹ Ми мукетъёсты простить каримы ке, Иегова милемыз но простить кароз. Иегова гажа-жаля соосты, кинъёс мукетъёсызлы гажан-жалянзэс возьмато (Матф. 5:7; Иак. 2:13). Иисус та малпанэз валэктӥз, куке дышетскисьёссэ вӧсяськыны дышетӥз. (Лыдӟе Матфейлэсь 6:14, 15.) Солэсь азьвыл Иегова но та сярысь вераз, куке Иовен вераськиз. Елифазлэн, Вилдадлэн но Софарлэн кылъёссы Иовез вӧсь каризы вал. Но Иегова куриз Иовез соос понна вӧсяськыны. Иов озьы ик лэсьтӥз. Собере Инмар сое бакель кариз (Иов 42:8—10).

10. Малы йыркуръяськон номыр умойзэ уг вайы? (Ефесъёслы 4:31, 32).

¹⁰ Йыркуръяськон номыр умойзэ уг вайы. Иеговалэн потэ, ми йыркуръяськытэк но каньыл сюлмын мед уломы шуыса. (Лыдӟе Ефесъёслы 4:31, 32.) Библиын гожтэмын: «Дугды вождэ поттэмысь, йыркуръяськондэ но кельты» (Пс. 36:8). Та визь-кенеш туж бадӟым пайда вайыны быгатэ, малы ке шуоно йыркуръяськыса ми асьмелэсь тазалыкмес быдтӥськомы (Мад. 14:30). Куке ми йыркуръяськиськомы, ми яд юиськомы кадь, нош малпаськомы, милемыз вӧсь карись адямилы урод луоз шуыса. Соин ик простить карыса, ми асьмелы ик умой кариськомы (Мад. 11:17). Соку ми каньыл сюлмын Иеговалы ужаны-тыршыны быгатӥськомы.

11. Мар вера Библия пунэмзэ берыктон сярысь? (Римъёслы 12:19—21).

¹¹ Инмар гинэ пунэмзэ берыктыны быгатэ. Иегова ӧз лэзьы милемыз вӧсь карись адямиослы пунэмзэ берыктыны. (Лыдӟе Римъёслы 12:19—21.) Тырбыдэстэм луэммы сэрен Инмар кадь шонер судить карыны ми ум быгатӥське (Евр. 4:13). Со сяна, йыркуръяськеммы сэрен ми ваньзэ ум валаське, вылды. Соин ик  Иегова Иаков пыр вераз: «Адямилэн вожпотонэз Инмарлэн шонерлыкезъя улыны люкетэ» (Иак. 1:20). Ми оскыны быгатӥськомы, Иегова ас дыраз шонерлыкез одно ик тупатоз шуыса.

12. Кызьы возьматоно оскеммес, Иегова шонерлыкез тупатоз шуыса?

¹² Простить карыса, ми возьматӥськомы оскеммес, Иегова шонерлыкез тупатоз шуыса. Малы ваньзэ Инмар кие сётоно? Малы ке шуоно со сьӧлыклэсь вань урод бервылъёссэ одно ик быдтоз. Выль дуннеын Иегова сюлэм вӧсь луэммес бурмытоз. Солэн Кылаз гожтэмын: «Азьвылъёссэ-вужъёссэ буре уз ни вае, тодаз уз ни вае» (Ис. 65:17). Нош зэм ик-а луэ йыркуръяськытэк улыны, милемыз туж зол вӧсь каризы ке? Луэ. Тае куд-ог учыръёс возьмато.

13, 14. Малы дышетэ милемыз Энтонилэн учырез?

¹³ Трос вын-агайёсмы но сузэр-апайёсмы быгатӥзы простить карыны адямиосты, кудъёсыз соосты туж вӧсь каризы. Кызьы Иегова та агайёсты но сузэръёсты бакель кариз?

¹⁴ Тани Филиппиныысь Энтони c пиосмуртлэн учырез. Куке Энтони Иеговалэн Адӟись-Ивортӥсез ӧй вал на, Хосе пиосмурт солэсь одӥгзэ агайзэ вииз. Та пиосмуртэз кутӥзы но пытсэтэ пуктӥзы. Нош куке со пытсэтысь потӥз, Энтони туж лек вал но кылзэ сётӥз, сое шедьтоз но виёз шуыса. Со пистолет но басьтӥз. Но берлогес Энтони Иеговалэн Адӟись-Ивортӥсьёсыныз тодматскиз. Со вера: «Библиез дышетыса, мон валай, мыным сямме но улонме воштоно шуыса. Нош со понна мыным лекъяськемысь дугдоно вал». Дыр ортчыса, Энтони пылатӥськиз но кенешын тӧро луиз. Со туж паймиз, куке тодӥз, Хосе но Иеговалэн Адӟись-Ивортӥсез луиз шуыса. Куке та агайёс пумиськизы, соос юн ӟыгыртӥськизы но Энтони Хоселы вераз, сое простить кариз шуыса. Энтони вераз на, тушмонзэ простить карыса, со туж шумпотӥз шуыса. Тӥни кызьы Иегова сое бакель кариз!

15, 16. Малы дышетэ милемыз Питер но Сью кузпалъёслэн учырзы?

 ¹⁵ Нош тани Питер но Сью кузпалъёслэн учырзы. 1985-тӥ арын, куке соос пумиськонын вал, Эксэйлык юртын бомба пуштӥз. Соин сэрен Сью сузэр туж урод адӟыны но кылыны кутскиз, озьы ик зынъёсты шӧдэмысь дугдӥз d. Питер но Сью ӵем дыръя асьсэлэсь юазы: «Кин сыӵе урод уж лэсьтыны быгатӥз?» Аръёс ортчыса, со пиосмуртэз кутӥзы но вань улытозязлы пытсэтэ пуктӥзы. Куке та кузпалъёслэсь юазы, быгатӥзы-а соос та адямиез простить карыны, соос шуизы: «Иегова дышетэ милемыз йыркуръяськытэк улыны, малы ке шуоно со асьмелэн тазалыкмылы ик урод каре. Со учыр бере ик ми Иеговалэсь юрттэт курыны кутскимы йыркурмес но вожпотонмес кельтыны но азьлань улыны».

¹⁶ Капчи вал-а соослы простить карыны? Ӧй вал. Соос верало: «Куддыръя Сьюлэн тазалыкез уродгес луэ. Соку милям нош ик вожмы потэ. Но ми со сярысь малпаса ум улӥське, соин ик вожпотонмы ӝог сӥя. Та адями куке но вын-агаймы луысал ке, ми туж шумпотысалмы! Ми валамы: Библиысь возетъёс сёто зэмос эрик, кудзэ ми син азямы пуктыны но ум быгатӥське. Озьы ик милемыз буйгатэ малпан, ӝоген Иегова вань уродзэ быдтоз шуыса».

17. Малы дышетэ милемыз Миралэн учырез?

¹⁷ Куке Мира Библиез дышетыны кутскиз, со быземын вал но солэн кык пичи нылпиосыз вал. Нош картэзлэн Библиез дышетэмез ӧз поты. Кӧня ке дыр ортчыса, картэз мукет кышномуртэн улыны кутскиз но семьязэс кельтӥз. Сузэрмы тодаз вае: «Куке картэ кошкиз, мон воксё абдрай. Мон уг оскиськы вал, мон сыӵе учыре сюри шуыса. Мон туж куректыса, асме янгыше уськытыса но воже потыса улӥ». Люкиськемзы бере но Миралы туж  вӧсь вал. Со вера: «Трос толэзьёс ӵоже мыным секыт вал. Но мон валай, соин сэрен Иеговаен но мукет адямиосын кусыпъёсы сӧрисько шуыса». Соин ик Мира картэзлы вожзэ поттыса ӧз улы ни. Со оске, азьвыл картэз куке но Иеговалэн ужась-тыршисез луоз шуыса. Мира малпаське со сярысь, кыӵе умой улон Инмар вуонояз кузьмалоз. Али Мира шумпотыса улэ. Со быгатӥз кык пиоссэ дышетыны Иеговаез яратыны. Соос семьяосынызы ӵош Иеговалы ужало-тыршо.

18. Иегова — Вылӥ Судья бере, малы ми быдэсак оскыны быгатӥськомы?

¹⁸ Кыӵе умой, милемлы судить кароно ӧвӧл шуыса. Иегова, Вылӥ Судья, та ужез ачиз быдэстоз! (Рим. 14:10—12). Ми быдэсак оскыны быгатӥськомы, Инмар, вылӥ эсэпъёссэ лыдэ басьтыса, котьку но шонер судить каре шуыса (Ул.-выл. 18:25; 3 Экс. 8:32). Со ноку но шонерлыктэм ужпум уз куты!

19. Мар кароз вуонояз самой умой Судья, Иегова?

¹⁹ Ми ӵыдытэк витиськомы со дырез, куке Иегова сьӧлыклэсь но тырбыдэстэм луонлэсь вань бервылъёссэс быдтоз. Соку со вань висёнъёсмес бурмытоз но сюлэм куректонъёсмес ӵушоз. Соос тодамы но уз лыктэ ни (Пс. 71:12—14; Усьт. 21:3, 4). Ми туж шумпотӥськомы, Иегова али ик ини милемлы юрттэ шуыса. Со милемлы адӟем карон возьматэ но мукетъёссэ простить карыны юрттэ.