1. Cossa che Geovà el ga dito a quei che i se ciama grami?

 L’È VERA che Geovà el ne creà, el ga fato le lege che ghen’è nela Bìblia e l’è el nostro Giuis. Ma lu l’è anca el nostro Pare e el ne ama tanto. (Sal. 100:3; Isa. 33:22) Quando sbaliemo e se ciamemo grami, lu el pol perdonarne e el vol tanto farlo. (Sal. 86:5) Geovà el ga dito questo par meso del profeta Isaia: “Anca se i vostri pecati i ze come un pano rosso, i deventarà bianchi come la neve.” — Isa. 1:18.

2. Cossa che ghemo de far se volemo viver in union coi altri?

² Tuti noantri semo imperfeti, e podemo far o parlar qualcossa che ndarà disgustar i altri. (Tiago 3:2) Anca cossita, podemo viver in union coi altri. Come? Ghemo de seitar a perdonarse un al altro. (Pro. 17:9; 19:11; Mat. 18:21, 22) Alora Geovà el vol che seitemo a perdonar i altri, anca se lori i parla o i fà qualcossa pìcola contra noantri. (Col. 3:13) La Bìblia la dise che Geovà el perdona del tuto. (Isaia 55:7) Alora, anca noantri volemo farlo!

3. Cossa che ndaremo veder in questo stùdio?

³ In questo stùdio, ndaremo veder come podemo perdonar i altri compagno a Geovà. Ndaremo anca risponder a queste domande: ‘Che pecati i ansiani i ga de tender? Parché che Dio el vol che perdonemo i altri? Cossa che podemo imparar dei fradei che i ga sofrio tanto par via dei pecati dei altri?’

4. (a) Se un servo de Dio el ga fato un bruto pecato, cossa che el ga de far? (b) Che laoro Geovà el ga dato ai ansiani?

⁴ Quando un servo de Dio el fà un bruto pecato, i ansiani i ga de saverlo. Ma cossa che l’è un bruto pecato?  L’è quando una persona la fà una roba che la lege de Dio la dise che la ze tanto sbaliada. In 1 Corinti 6:9, 10, ghen’è arquanti esempi de bruti pecati. Se un servo de Dio l’è drio far un pecato cossita, lu el ga de domandar el perdon a Geovà in orassion e ndar in serca del aiuto dei ansiani nela congregassion. (Sal. 32:5; Tiago 5:14) L’è vera che sol Geovà el pol perdonar del tuto i pecati par meso del sacrifìssio de Gesù. * Alora cossa i ansiani i ndarà far? Lori i ndarà dessider de acordo cola Bìblia se la persona che la ga fato el pecato la pol seitar a esser Testimònia de Geovà, o nò. (1 Cor. 5:12) Par giutar i ansiani a farlo, lori i ga de farse arquante domande. Par esémpio: ‘La persona la ga pensà tanto come che la ndaria far el pecato? La ga proà sconder dei altri quel che la ga fato? Sarà che la ga fato el medèsimo pecato par tanto tempo? Sarà che la ga mostrà che la se ga pròpio ciamà grama? Ghen’è prove che Geovà la ga belche perdonà?’ — Ati 3:19.

5. Come che el laoro dei ansiani giuta la congregassion e la persona che ga fato un bruto pecato?

⁵ Quando i ansiani i se riune con un fradel che el ga fato un bruto pecato, lori i vol far la medèsima dessision che Geovà el ga belche fato nel cielo. (Mat. 18:18) Quando lori i lo fà, pol esser che questo fradel no’l possa seitar a esser una Testimònia de Geovà. Questa dessision la ndarà proteger a tuti nela congregassion. (1 Cor. 5:6, 7, 11-13; Tito 3:10, 11) Quando i ansiani i se riune con questo fradel, lori i vol giutarlo a ciamarse gramo e a gaver el perdon de Geovà. (Luc. 5:32) E quando el se ciama gramo, i ansiani i pol domandar che Geovà el ghe giute a esser nantra volta el so amigo. — Tiago 5:15.

6. Sarà che una persona che no la ze pi Testimònia de Geovà la podaria ancora esser perdonada?

⁶ Cossa che i ansiani i fà quando una persona la ga fato un bruto pecato e no la se ga ciamà grama? Lori i ga de dessider che no la podarà seitar a esser una Testimònia de Geovà. Metemo dir che questa persona la ga desobedio a una lege del governo. Alora, Geovà e i ansiani no i ndarà protegerla del giulgamento dele autorità del governo, anca che la se ga ciamà grama. (Rom. 13:4) Se la persona la ga fato el pecato, la se ga ciamà grama e la ga cambià quel che la ga de bisogno, Geovà el podarà perdonarla. (Luc. 15:17-24) Questo pol suceder anca se la persona la ga fato arquanti bruti pecati. — 2 Cró. 33:9, 12, 13; 1 Tim. 1:15.

7. Cossa che vol dir perdonar a qualchedun?

⁷ L’è bon saver che no semo noantri che ghemo de giulgar se una persona la mèrita el perdon de Dio. Ma ghen’è una roba che podemo far. Quala che la ze? Perdonar a qualchedun che ne ga disgustà. Metemo dir che una persona la ga fato un bruto pecato e ne ga assà tanto disgustà. Pol esser che ela la ne domande perdon. Anca se no la fae, podemo scòlier perdonarla. Alora no ndaremo seitar disgustà o inrabià con ela. Pol esser che ne tocarà far tanto sforso e ghe meterà tanto tempo par perdonarla. La Sentinela de 15 de setembre de 1994 la ga dito: “Quando te perdoni a qualchedun che ga fato un bruto sbàlio, no vol dir che te sì de acordo con quel che el ga fato. Quando te perdoni, te mostri che te te fidi che Geovà el ndarà giulgar quel che ga sucedesto dela maniera giusta. Lu l’è el Giuis del Universo, el giulga con giustìssia  e nela ora giusta. Alora, Geovà el vol che perdonemo e che se fidemo che lu el ndarà giulgar bruti pecati dela maniera giusta. Parché che Geovà el vol che femo cossita?

8. Cossa che ndaremo far se demo valor ala misericòrdia che Geovà el ne mostra?

⁸ Quando perdonemo, mostremo che demo valor ala misericòrdia che Geovà el mostra a noantri. Nte una ilustrassion, Gesù el ga dito che Geovà l’è come un rè che el ga perdonà un grando dèbito che un schiavo el gavea e che mai el saria bon de pagar. Ma Gesù el ga dito che questo schiavo no’l ga perdonà un dèbito tanto pi pìcolo che nantro schiavo el gavea con lu. (Mat. 18:23-35) Cossa che imparemo? Se demo tanto valor ala misericòrdia che Geovà el mostra a noantri, ndaremo perdonar i altri. (Sal. 103:9) Una Sentinela la ga dito: “Pol esser che ghemo belche perdonà arquante volte i nostri fradei. Ma mai saremo boni de perdonar e mostrar misericòrdia compagno Geovà el ne mostra par meso del sacrifìssio de Gesù.”

9. A chi che Geovà el mostra misericòrdia? (Mateo 6:14, 15)

⁹ Geovà el perdona a quei che i perdona. Geovà el mostra misericòrdia a quei che i mostra misericòrdia. (Mat. 5:7; Tiago 2:13) Gesù el ga parlà sora questo quando el ga insegnà i so dissìpoli a pregar. (Ledi Mateo 6:14, 15. *) Noantri anca imparemo che l’è importante mostrar misericòrdia par meso de quel che Geovà el ga dito a Giò. Anca che Giò el gavesse sofrio tanto par via de quel che Elifas, Bildade e Zofar i ghe ga dito, Geovà el ga dito che Giò el preghesse par questi òmini. E quando Giò lo ga fato, lu lo ga benedio tanto. — Giò 42:8-10.

10. Parché che no l’è bon seitar disgustadi? (Efesi 4:31, 32)

¹⁰ Noantri sofrimo quando seitemo disgustadi con qualchedun. Seitar disgustadi con qualchedun no l’è bon par la nostra salute e pol farne restar desanimadi. (Pro. 14:30; ledi Efesi 4:31, 32. *) Ghemo de ricordarse che quando seitemo disgustadi con qualchedun, semo sol noantri che ndaremo sofrir. Saria come bever velen e spetar che quel’altra persona la sofra. Par quela che Geovà el vol che mostremo sabedoria e no seitemo disgustadi coi altri. (Sal. 37:8) Alora, quando perdonemo i altri, se sentimo in pace, pi tranquili e semo boni de servir a Geovà contenti. — Pro. 11:17.

11. Cossa che la Bìblia la dise sora vingarse? (Romani 12:19-21)

¹¹ La vingansa la ze de Geovà. Geovà no’l assa che se vinghemo de una persona che la ga fato qualcossa contra noantri. (Ledi Romani 12:19-21. *) Noantri no semo boni de giulgar con giustìssia, parché no savemo de tuto compagno Geovà. (Ebr. 4:13) E quel che sentimo pol anca  intrigarne de giulgar dela maniera giusta. Par quela che Tiago el ga dito che, quando una persona la resta inrabiada, no la ze bona de far giustìssia come Dio. (Tiago 1:20) Invesse, Geovà l’è sempre bon de giulgar con giustìssia.

12. Come che mostremo che se fidemo nela maniera de Geovà far giustìssia?

¹² Quando perdonemo mostremo che se fidemo che Geovà el ndarà far giustìssia. Se assemo che Geovà el giulghe, mostremo che se fidemo che lu el pol finir fora coi problemi che ghemo par via dei nostri sbali e dei altri. In Paradiso, i bruti sentimenti no i sarà pi ricordadi e gnanca i tornarà al cuor. (Isa. 65:17) Ma sarà che semo boni de no seitar disgustadi con qualchedun anca che el gàpia fato una roba tanto bruta contra noantri? Ndemo veder come arquanti i ze stati boni de farlo.

13-14. Cossa che te ghè imparà sora el perdon con Toni e Giosè?

¹³ Arquanti fradei i ga sofrio tanto par via dei sbali dei altri. Ma lori i ga dessidio perdonarli. Che benedission lori i ga bio dopo de farlo?

¹⁴ Varda quel che ga sucedesto con Toni, che l’è dele Filipine. * Vanti de deventar una Testimònia de Geovà, un dei so fradei pi veci l’è stà copà. Lu el savea che el omo che gavea copà so fradel l’era Giosè. In quela època, Toni l’era tanto cativo e el volea vingarse. Giosè l’è ndato in preson par via de quel che el ga fato. E dopo che lu l’è vegnesto fora dela preson, Toni el ga comprà una arma e el ga dito che el ndaria coparlo. In quela època, Toni el ga scominsià a studiar la Bìblia cole Testimònie de Geovà. Lu el ga dito: “Nel me stùdio, go capio che gavea de cambiar tante robe e che no podea esser tanto cativo cossita. Dopo de un tempo, Toni el se ga batesà e l’è deventà un ansiano. Ma anca Giosè l’è deventà una Testimònia de Geovà. Quando lori i se ga catà la prima volta, i se ga dato un strucon, e Toni el ga dito a Giosè che lo gavea perdonà. Come che Toni l’è restà dopo de perdonarlo? Toni el ga dito che el ga sentio tanta pace e che l’è restà  tanto contento. Lu el ga dito che no l’era gnanca bon de spiegar tuto quel che l’era drio sentir. Sicuro che Toni el ga bio le benedission de Geovà parché el ga dessidio perdonar.

15-16. Cossa che te ghè imparà sora perdon con Peter e Sue?

¹⁵ Varda quel che ga sucedesto con Peter e Sue in 1985. Lori i era nte una riunion e ga sciopà una bomba che un omo, che no l’era Testimònia de Geovà, el gavea metesto rento el Salon. Sue la se ga fato tanto mal. No la saria pi bona de sentir el odor dele robe e gnanca pi bona de scoltar e vederghe come prima. * Tante volte, lori i se ga domandà: “Come che una persona la podaria far una roba bruta cossita?” Tanti ani dopo, i ga condanà quel omo a restar tuta la vita in preson. Quando i ga domandà a Peter e a Sue se lori i gavea perdonà quel omo, lori i ga rispondesto: “Geovà el ne ga insegnà che no ghemo de restar inrabiadi e gnanca disgustadi, parché podemo malarse e desanimarse. Par quela che ghemo sempre domandà che Geovà el ne giutesse a dàrghene fora coi bruti sentimenti e a esser boni de portar avanti.”

¹⁶ Ma sarà che l’è fàcile par lori perdonar? Nò! Lori i ga dito: “Dele volte, la Sue la sofre tanto par via dei so problemi de salute. Par quela, scominsiemo a restar inrabiadi nantra volta. Ma suito se fermemo de pensar in quel che ne ga sucedesto, e semo boni de restar tranquili nantra volta. Ancoi, podemo dir che, se quel omo el deventesse Testimònia de Geovà, restarissino tanto contenti. Questo che ne ga sucedesto ne ga mostrà che sol quando metemo in pràtica i prinsipi dela Bìblia semo boni de liberarse de bruti sentimenti e de altre robe! Nantra roba che ne consola tanto l’è saver che suito Geovà ndarà finir fora cole robe che ne fà sofrir.”

17. Cossa che te ghè imparà sora el perdon cola sorela Myra?

¹⁷ Adesso varda quel che ga sucedesto  cola sorela Myra. Quando la ga scominsià a imparar sora Geovà, la era belche maridada e la gavea due fioi. Ma el so omo no’l ga volesto imparar sora Geovà. Dopo de un tempo, lu el ga tradio Myra e el ga abandonà la fameia. Myra la ga dito: “Quando me omo el ga abandonà la fameia, me go sentio tradia. Mi no ero bona de creder in quel che gavea sucedesto. Mi son restada tanto disgustada, me sentia in colpa e sentia tanta ràbia.” Anca dopo del divòrsio, Myra la ga seità a sofrir tanto par via de quel che gavea sucedesto. Ela la ga dito: “Sol dopo de arquanti mesi, go visto che quel che ero drio sentir l’era drio intrigar la me amicìssia con Geovà e coi altri.” Adesso Myra no la ze pi disgustada con quel che ga sucedesto e gnanca no la ga pi ràbia de quel che l’era el so omo. Invesse, Myra la vol che un giorno lu el dessida servir a Geovà. Ela la ze stata bona de giutar i so due fioi a amar e a servir a Geovà. E ancoi, ela la serve a Dio insieme con lori e le so fameie e la ze bona de vardar avanti.

18. Cossa che ghemo de ricordarse sora i giulgamenti de Geovà?

¹⁸ L’è pròpio bon saver che no semo noantri che ghemo de giulgar i altri. Geovà che l’è el Giuis e sol lu che el ga de farlo. (Rom. 14:10-12) E podemo esser sicuri che Geovà sempre el ndarà giulgar de maniera perfeta de acordo con quel che l’è giusto. (Gén. 18:25; 1 Rè 8:32) E podemo anca esser sicuri che mai el ndarà far qualcossa sensa giustìssia.

19. Cossa che suito Geovà el ndarà far?

¹⁹ Suito Geovà el ndarà finir fora col pecato, cole malatie e con bruti sentimenti che ghemo. (Sal. 72:12-14; Apo. 21:3, 4) Alora, no ndaremo pi sofrir par via de queste robe. Semo pròpio premosi de viver cossita! Intanto che spetemo, podemo far come Geovà e perdonar i altri.