1. Yoororomeliha heeni Yehova onaavahaawe ale etthenke ni enattharuwa?

 EKHAIKHAI weera Yehova mpattuxaahu, namalamula ahu, mphuki ni tiithaahu a nsivelo. (Nsal. 100:3; Yes. 33:22) Namutthekela vale Yehova owo pooti onlevelela wakhala weera noottharuwa mweekhaikhai. Mwaha wooweera, ohiya okhalanoru ikuru, mene owo onnatthuna opaka eyo. (Nsal. 86:5) Yehova aanvarihela muteko mprofeti Yesaya weera anroromelihe: “Sopahula sanyu sakhanle soxera ntoko ekhama, kinotteliha ntoko makasa [etthapwe].”—Yes. 1:18.

2. Eheeni nintthuneyaahu opaka weera niiraaneke ni atthu akina?

² Mwaha wa hiyo wooyariwa ni yoottheka, pooti wuuluma naari opaka etthu enaanyoonyiha atthu akina. (Yak. 3:2) Mene eyo khantaphulela weera hiyo khaninkela okhalano onthamwene woolipa ni atthu akina. Mene esiiri etokotoko weera eyo ekhumelele, ontthuneya weera hiyo nikhaleke oolevelela. (Mir. 17:9; 19:11; Math. 18:21, 22) Emaara yeeyo mutthu mukina onnuulumelaawe naari onipakela etthu yoonanara, enaamuyeveru eyo, Yehova ontthuna weera nilevelele. (Akol. 3:13) Hiyo nookhalano mathowa mantxipale weera nilevelele. Mwaha wooweera Yehova “òwakuva olevelela.”—Yes. 55:7.

3. Eheeni ninkelaahu woona mpuwa mwa yoosoma ela?

³ Yoosoma ela ninkela woona moota hiyo niyariwe ootthekeene nneeraahu nimutakihe Yehova okhala oolevelela. Nave-tho, ninkela woona waakhula wa makoho ala: Yoottheka heeni entthuneya owehawehiwa ni asitokweene a mmulokoni? Mwaha wa  heeni Muluku ontthunaawe weera naaleveleleka atthu akina? Ni eheeni ninkelaahu oxuttera ni matakihero a asinna yaawo ehaawiye mwaha wa soottheka saatthu akina?

4. (a) Eheeni murumeyi a Yehova opanke yoottheka etokweene ontthuneyaawe opaka? (b) Muritti heeni asitokweene a mmulokoni ekhalannaaya vaavo enthukumanaaya wamoha ni namattheka?

⁴ Wakhala weera noosuwela weera mukristu mukhwiihu oopaka yoottheka etokweene, ontthuneya waaleela asitokwene a mmulokoni. Tiivi siri soottheka itokweene? Opaka yoottheka etokweene ori otupha malamulo a Muluku. Ni ninnaphwanya soottheka ntoko iyo va 1 Akorinto 6:9, 10. Wakhala weera mukristu oopaka yoottheka hiiho, onnitthuneya toko onvekela nlevelelo Yehova, ni avinyaka owaasaasa asitokweene a mmulokoni. (Nsal. 32:5; Yak. 5:14) Muritti heeni ekhalannaaya asitokweene a mmulokoni? Ekhaikhai weera Yehova tokhalanne owera woolevelela soottheka. Mene owo ompaka eyo, moorweela mwa yowoopoala yeeyo ovelenlaawe mwanawe Yesu Kristu. * Mene Yehova ohaavaha asitokweene a mmulokoni weera epake yoothanla moovarihana ni Biblya, waari weera ole opanke yoottheka onnaphwanela omukumiha mmulokoni kapena hooye. (1 Akor. 5:12) Nave weera epake yoothanla eyo, asitokweene a mmulokoni ontthuneya waakhula makoho ntoko ala: Mutthu ola, opanke yoottheka ela mwaayiini owiipithihaka atthu akina etthu opankaawe? Neereke mutthu ola opatxenre khalayi opaka yoottheka ela? Nave etthu yootepa otthuneya, onnoonihera weera mweekhaikhai yoottheka ela oottharuwa? Sookhala itthu sinthoonyera weera Yehova oomulevelela namattheka?—Mit. 3:19.

5. Moota heeni muteko wa asitokweene a mmulokoni, onkhaviheraaya muloko ni ole opanke yoottheka?

⁵ Emaara yeeyo asitokweene a mmulokoni enthukumanaaya ni ole opanke yoottheka, yootthunaaya ori othanla yoopaka nnaamweera Yehova othanliyeene yoopaka wiirimu. (Math. 18:18) Muteko owo wa asitokweene onnakhavihera muloko wootheene. Mwaha wooweera, wakhala weera namattheka ookumihiwa mmulokoni, eyo ennaakhavihera atthu akina a mmulokoni ohivala mukhalelo woonanara wa namattheka. (1 Akor. 5:6, 7, 11-13; Tito 3:10, 11) Opwaha mwa yeeyo, asitokweene a mmulokoni ennimukhavihera ole opanke yoottheka wiikhupanyiha ni ottharuwa mweekhaikhai ni oleveleliwa ni Yehova. (Luka 5:32) Asitokweene a mmulokoni ennivekela ni ole opanke yoottheka ni attharuwa weera atthikihere mukhalelo awe woomunepani.—Yak. 5:15.

6. Wakhala weera mutthu ookumihiwa mmulokoni, neereke pooti mutthu owo oleveleliwa? Muthalihe.

⁶ Ankha wakhala weera ole opanke yoottheka khampittikuxa murima kapena khanttharuwa? Wakhala haawo, onnitthuneya weera mutthu owo okumihiwe mmulokoni. Nave, wakhala weera mutthu owo opanke ekrime, asitokweene a mmulokoni khenkela omwaakiha mwaha wa etthu opankaawe. Naari mutthu owo apittikunxeene murima—Yehova khankela okhoottihera weera anamalamulela emuthorihe naari onwalela mukadeya. (Arom. 13:4) Mene-tho, wakhala weera namattheka oottharuwa nimurima wootheene, Yehova pooti omulevelela. (Luka 15:17-24) Eyo-tho, pooti weereya wakhala weera mutthu owo oopaka yoottheka etokotokoxa.—2 Sow. 33:9, 12, 13; 1 Tim. 1:15.

7. Entaphulela eheeni omulevelela ole onitthekenle?

⁷ Mweekhaikhai tiwooreera osuwela weera hiyo khaninwera wiithanlela taani aneera aleveleliwe ni Yehova! Mene nto nnaamweera vareene hiiho, yookhala etthu nintthuneyaahu  wiithanlela. Mmwaha wa heeni? Mwaheene eri yooweera emaara ekina mutthu pooti—ontthekela wootepaxa—nave emaara ekina pooti weera namattheka oonivekela nlevelelo kapena hooye. Mene nnaamweera vareene hiiho, hiyo pooti othanla omulevelela. Eyo entaphulela weera hiyo khaninkela onvithera isara naari omunyoonyeriwa. Mweekhaikhai onnitthuneya etempu ni wiilipihera, weera nimulevelele mutthu ole onitthekenle, vantxipalexa wakhala weera etthu onitthekenlaawe etokotoko. A Sentinela a 15 a Setembro a 1994, oneera: “Naamulevelelaka mutthu mukhwiihu, eyo khentaphulela weera nnimwaasa ohiya mwaayiini yoottheka. Wa mukristu, nlevelelo nintaphulela ohiya itthu sootheene mmatatani mwa Yehova. Owo mphuki a exariya a elapo yootheene nave onkela woonihera exariya awe etempu yooreerela.” Yehova ontthuna weera hiyo nleveleleke ni nroromeleke weera owo onoothoriha itthu sootheene moohitthekeya. Mwaha wa heeni nintthuneyaahu weera—nroromeleke eyo?

8. Eheeni ninkelaahu opaka wakhala weera ninnaxukurela omoriwa ikharari wa Yehova?

⁸ Etempu yeeyo ninlevelelaahu, ninnoonihera omuxukurela Yehova. Muniphwanaphwanihoni, Yesu aamulikanxera Yehova, okhala ntoko mwene aalevelenle evaale yoowaatta wa namuteko awe, yeeyo owo eeraawe ahiwere oliva. Nnaamweera vareene hiiho, namuteko ole khaawenre olevelela evaale yanamuteko awe yeeyo yaari yootepa oyeva. (Math. 18:23-35) Yesu aatthuna oxuttiha eheeni ni niphwanaphwaniho nna? Naaxukurelaka ni ikharari Yehova onnooniheraawe, nneereke otthuna waalevelela atthu akina. (Nsal. 103:9) Nwehereri a iyaakha sintxipale sa muttuli aahiiwanyeiha moota ola: “Nihipwatthaka ikwaha ikavi ale ennitthekala, khuwaakela olikanela moota Yehova oonihenraawe onimorela ikharari ni onilevelela moorweela mwa mukuttho a mwanawe Yesu Kristu.”

9. Yehova onaamorela taani ikharari? (Matheyo 6:14, 15)

⁹ Ole onlevelela onoomoreliwa ikharari. Yehova onnaamorela ikharari atthu oomoriwa ikharari. (Math. 5:7; Yak. 2:13) Yesu aahoonihera eyo vaavo owo aaxuttihaawe oohuseraawe moota woovekela. (Mmusome Matheyo 6:14, 15.) Ninxuttera etthu emoha-moharu vaavo Yehova aamooperenraawe murumeyi awe Yobi waavekelela ale yaamutthekenle. Murumeyi ola oororomeleya a Yehova ahoova vantxipale ni masu oonanara aalopwana araru yeeriwa: Elifazi, Bildadi, ni Zofari. Nto Yehova aamuleela Yobi weera aavekelele alopwana ale. Nto Yobi apakakaru ele, Yehova aamureeliha murumeyi awe ole.—Yobi 42:8-10.

10. Mwaha wa heeni osunkera sa wammilo onnihasulaaya? (Aefeso 4:31, 32)

¹⁰ Osunkerana sa wammilo onnanihasula. Osunkera itthu sa wammilo onkhala ntoko oteexa muritti wootepa olemela. Ni Yehova khontthuna weera onlemeleke muritti owo. (Mmusome Aefeso 4:31, 32.) Mwaheene tiyoowo Yehova onnileelaawe weera “owali muhiyeke, esará murihe.” (Nsal. 37:8) Opaka eyo enkela woonihera weera hiyo atthu a miruku. Osunkera itthu sa wammilo onnanihasula mmuupuweloni naari mpaka onoottiha. (Mir. 14:30) Musuwele weera, osunkera itthu sa wammilo onnihasula mwaneene ahu ohiya ole nimmuupuwelelihaahu. Opaka eyo, onkhala ntoko owura evenenu weera ahapaliwe mutthu mukina. Nto, naalevelelaka atthu akina onnanikhavihera ottiwala isara sahu nave eyo ennanikhavihera. (Mir. 11:17) Nave eyo, ennanihiya nreene murima mmapuroni, neera haawo, nneereke ovirelela onvarela Yehova moohakalala.

11. Eheeni Biblya onthalihaawe woohima sa winlela ikukuttula? (Aroma 12:19-21)

¹¹ Winlela Ikukuttula ti wa Yehova. Yehova khaninnyale edireitu yoowinlela ikukuttula  atthu ale ennitthekela. (Mmusome Aroma 12:19-21.) Mwaha woohisuwela itthu sootheene sinvoliihera yakhumelela etthu, hiyo khanaano edireitu yomphukela mutthu mukina, paahi Yehova toneera apake eyo. (Aheb. 4:13) Emaara ekina, muupuwelo ahu pooti onaakanyeriha. Tiyeeyo yaamweerinhe Yehova onvarihela muteko Yakobe olepa ha: “Okhala wera onyonyiwa wa mutthu khonèra yeyo eri yexariya vamaithoni va Muluku.” (Yak. 1:20) Niroromeleke weera Yehova onoopaka etthu yoororomeleya ni onoophuka itthu mwa exariya.

12. Moota heeni ninkelaahu woonihera weera ninnaroromela exariya ya Yehova?

¹² Naalevelelaka ninnoonihera weera ninnaroromela exariya ya Yehova. Naahiyaka itthu sootheene mmatatani mwa Yehova, eyo enoonihera weera hiyo ninnaroromela weera owo onooreherera itthu sootheene soonanara. Itthu soonanara seiyo sitannyeriwa mwaha wa soottheka sa asinna kapena sawihu. Mparadiso, elapo enyowani, maxupo ahu mootheene “khaninkela wupuwelela nari olohera” veeli. (Yes. 65:17) Neereke nnoowera ohiya, owali ni esara nipakeliwene etthu yoonanara? Vaanaano ninkela woona moota heeni atthu akina ewenraaya opaka eyo.

13-14. Eheeni muxuttenraanyu ni yooweereya ya Tony ni José woohima sa olevelela?

¹³ Asinna ni asirokora antxipale, ahiithanlela olevelela nnaamweera ekumiherinweene maxupo manxipale mwaha wa yoottheka ya atthu akina. Mareeliho heeni yaakhenlaaya mwaha woopaka eyo?

¹⁴ Tony * ahinaakuveene okhala Namoona a Yehova, aahoonelela weera mulopwana mmoha oneeriwa José, aamwiiva tximweene awe enkhalasa oFilipina. Emaara ene yeeyo Tony aari mutthu oowali ni aatthu winlela ikukuttula. Mene José aavolowa okadeya mwaha wa ekrime ele aapankaawe. Vaavo José aakhummaawe okadeya, Tony aamana vathi alipelaka weera ammwaasaasa José weera amwiive ni aamuthuma kapwitthi weera apake eyo. Woohilekela, oyo aapatxera omusoma Biblya ni Anamoona a Yehova. Owo onnithaliha, “Mwa yoosomaaka, kaahoona weera kannathuna opaka matxentxo mweekumini mwaka, ohela mpuwa okhala mutthu oowalixa.” Okhwipi waya, Tony aaBatiziwa ni muhoolo mwaya aakhala mutokweene a mmulokoni. Muupuwele moota  aatutuxereñyaawe osuwela weera José aakhala Namoona a Yehova. Tony akumanelakaru ni José, yaakhupaarelana ni yoowo ni aamuleela weera, “kihoolevelela.” Tony onnaatxeerera eeraka: “Omulevelela José, wookikhavihera okhalano murettele ni ohakalala otokotoko weiwo kihinweraaka othaliha.” Moohihovela, Yehova aamureeliha Tony mwaha wooweera owo aari oolikaneene weera alevelele.

15-16. Eheeni nyuwo muxuttenraanyu woohima sa nlevelelo na munna Peter ni Sue?

¹⁵ Eyaakha ya 1985, Peter ni Sue yoonela mithukumano empa ya Omwene vaavo mootutuxereya yaaphunwaaya ebomba. Ebomba yeeyo yiiyaathiwe ni mulopwana mmoha ni mwiitiho! Atthu antxipale yaawereyeya, akina yaahaatannyera evaasi ni akina ohiiwa. Peter ni Sue yaattiyana tho maaru. * Peter ni Sue ikwaha ikina yanniikoha: ‘Mutthu heeni yoola oolipa murima awenre opaka etthu ntoko ela?’ Nakrime yoole aapanke etthu ele ahaakhanle Namoona a Yehova, aatthukiwa ni aaviriha ekumi awe yootheene areene okadeya. Akohiwakaru, Peter ni Sue waari weera yaamulevelela mulopwana ole, awo waakhula yenre: “Nihaasunkereke itthu sawammilo atthu akina naari isara. Aani, mwaha wooweera eyo ennanoottiha naari onuupuweliha itthu sintxipale. Ovinyera wuupatxerani, hiyo nanvekela Yehova weera anikhavihere weera nihaavithere itthu sa wammilo ni isara atthu akina.”

¹⁶ Nnaamweera vareene hiiho, khoiyono onimwaakhweela olevelela. Awo ennaatxeerera yeeraka: “Vaavo mamparima a Sue enanvoreyaaya, isara sinnaniweela. Naari vareene hiiho, hiyo ninniilipihera weera nihuupuwelekexa eyo ni naapakaka eyo, murima onnamaala. Hiyo ninnathaliha nimurimaahu wootheene weera, mulopwana ole vaavo aneeraawe akhale Namoona a Yehova, nnoomwaakhela matata meeli. Sootheene iyo sinnanikhavihera oxuttera weera, otthara miruku sa mBiblyani sinnanikhavihera okhala ootaphuwa. Okhala ootaphuwa eri etthu nahuupuwelelaahu, opwaha mwa yeeyo, ninnahakalala osuwela weera Yehova onoomaliha maxupo ootheene ninvirihaahu.”

17. Eheeni muxuttenraanyu woohima sa olevelela ni ntakihero na murokora Myra?

 ¹⁷ Murokora Myra emaara aaxutteraawe ekhaikhai, eera athelinweene ni akhalanneene anamwane eeli akhaanini. Nto añyawe khiyaakhulenle ekhaikhai. Evirakaru etempu, aamuraruwela Myra ni aamuhiyera anamwane aathokororaka meekhaawe. Myra enre: “Iñyaka akihiyerakaru anamwane eeli ale, murima waatepa okivoreya ni nkaawera ororomela ele yaakhumelenle—Waakiina murima ni waatepa okivoreya ni kaaheera keerelani, opwaha mwa yeeyo, kanniivaha nthowa mwaha wa ele yaakhumelenle. Nnaamweera yaavinreene etempu yintxipale nimwalanneene, maxi ovoreya murima mwaha woomwalana wannatepa. Okivoreya murima wannavirelela mpakana nyeeri sintxipale. Kaahoonelela weera, ovoreya murima iwo wannananariha onthamwene aka ni Yehova ni atthu akina.” Nto vaanaano, owo khakhalanne owali naari khamusukenre itthu sa wammilo iyawe amwalannaaweno ni ookhalano yooweherera weera, iyawe onooxuttera ekhaikhai. Owo vano onnawera wuupuwela itthu sa muhoolo ni ohaahuwa anamwane eeli meekhaawe weera envarele Yehova. Olelo va, owo onnavarela Yehova moororomeleya ni anamwane awe wamoha ni amusi awe.

18. Nroromeleke eheeni sa moota Yehova okhanlaawe mphuki?

¹⁸ Tiwooreera osuwela weera, khoiyono hiyo ninthanla moota yoole ori mutthu aneeraawe ophukiweke mulattu awe. Yehova mphuki a elapo yootheene ni tiyoowo onkela opaka eyo. (Arom. 14:10-12) Nroromeleke weera, Yehova onkela othoriha mooreerela attharaka mikhalelo sawe sa exariya. (Eph. 18:25; 1 Mam. 8:32) Yehova khonkela opaka etthu eri poothe yoohikhala exariya!

19. Eheeni Yehova onkelaawe opaka moohipisa?

¹⁹ Onnanitthimaka murima, vaavo eneeraaya ephiye etempu Yehova onkelaawe omaliha itthu sootheene sinkumiheriwa ni yoottheka ya atthu a mulaponi. Emaara enkelaaya weereya eyo, maxupo ahu ootheene enkela omalihiwa khuluwi. (Nsal. 72:12-14; Apok. 21:3, 4) Hiyo khaninkela ohaawa tho mwaha wa itthu sene seiya sintannyeriwa ni yoottheka. Niwehereraka ophiya nihuku nno, ootheene hiyo ninnamuxukurela Yehova mwaha woonivaha owera woomutakiha nave okhala oolevelela.