1. Etthu xeeni Yehova aaleihenrye awe anatampi anittharuwa ni murima wootheene?

 NNAAMWI Yehova ori ene Mpattuxa ahu, Ole onipaka malamulo ni Mphuki, owo tiithi ahu a wiirimu oophenta. (Esal. 100:3; Yes. 33:22) Okathi nimmutthekela ahu, masi nnattharuwa ni murima wootheene, Yehova onniphavela ni ookhalana owerya wa onilevelela. (Esal. 86:5) Yehova aahimuruma profeta Yesaya olepa moolumo oovara murima ani: “Sottheka sanyu sinakhalaru soxerya ntoko ephome, miyo kinotteliha mpakha olikana ni nxotte”. — Yes. 1:18.

2. Nipakeke exeeni naaphavelaka okhalana murettele ni atthu akina?

² Okhala wira ootheene ahu na anatampi, ninnilavula aahiiso opaka itthu sinaawereya atthu akina. (Yak. 3:2) Masi, eyo khenitaphulela wira khivaniweryaneya okhalana ompatthani wooloka ni atthu awo. Maana nnoowerya okhala apatthani aya akhala wira nnimwiixutta okhala atthu oolevelela. (Mir. 17:9; 19:11; Math. 18:21, 22) Okathi nimpaka ahu itthu saamukhaani aahiiso suulupale sinaawereya atthu akina, Yehova oniphavela wira nilevelelaneke. (aKol. 3:13) Nookhalana mathowa manceene anniiriha waalevelela atthu akina, maana Yehova ‘onnaakuvela onilevelela’. — Yes. 55:7.

3. Mwaha ola, ninrowa othokorerya exeeni?

³ Mwaha ola, nnooweha moota apinaatamu oohimalela akhanle aya oomutakiha Yehova yaalevelelaka atthu akina. Itampi xeeni nikhanle ahu oowaaleela axitokweene? Xeeni Yehova oniphavela awe wira naaleveleleke atthu akina? Anniixuttiha exeeni anna ni arokora yaahaawale vanceene mwaha wa itthu soohiloka saapakiwa ni atthu akina?

4. (a) Akhala wira munna aahiiso murokora oopaka etampi yuulupale, ohaana opaka exeeni? (b) Muritti xeeni axitokweene arina aya okathi anithukumana aya ni mutthu opanke etampi yuulupale?

⁴ Okathi munna aahiiso murokora onipaka awe etampi yuulupale, nihaana waaleela axitokweene. Mwa ntakiheryo, itampi sikina suulupale siri 1 aKorinto 6:9, 10. Itampi suulupale exeeni? Etampi yuulupale onitaphulela otthekela vanceene malamulo a Muluku. Akhala wira munna aahiiso murokora oopaka etampi yuulupale ohaana omuleela Yehova ni waaleela axitokweene. (Esal. 32:5; Yak. 5:14) Yehova paahi torina owerya woowaalevelela anatampi anittharuwa ni murima wootheene. Owo onnipaka eyo, orumeelaka mukuttho wowoopola wa Yesu Kristu. b Nto muteko xeeni axitokweene a mmulokoni arina aya? Yehova ohaavaha muritti axitokweene wooweha amurumeelaka Biibiliya akhala wira mutthu opanke etampi yuulupale ohaana okumihiwa mmulokoni aahiiso nnaari. (1 aKor. 5:12) Wira axitokweene awerye opaka eyo, ahaana wiimananiha osuwela waakhuliwa wa makoho ala: Niireke oroolakela opaka etampi? Niireke anvitha-vitha etampi awe? Niireke ooviriha okathi munceene ni yaari yoolema awe opaka etampi ela? Niireke sookhala itthu sinooniherya wira oottharuwa ni murima wootheene? Niireke sookhala itthu sinooniherya wira Yehova oomulevelela? — Mit. 3:19

5. Muteko wa axitokweene onikumiherya mireerelo xeeni?

⁵ Okathi axitokweene anivaanela aya ni mutthu opanke etampi yuulupale, awo anniphavela opaka yoothanla Yehova ni Yesu aniphavela aya. (Math. 18:18) Nto malakiheryo ala anikhaliherya sai muloko? Okathi onikumihiwa awe mmulokoni mutthu opanke etampi yuulupale, eyo ennikhaliherya vanceene muloko ni ennikhaliherya ohaahapuxa anna ni arokora oororomeleya. (1 aKor. 5:6, 7, 11-13; Tito 3:10, 11) Nave eyo, ennimukhaliherya mutthu opanke etampi yuulupale ottharuwa ni murima wootheene ni oleveleliwa ni Yehova. (Luka 5:32) Axitokweene anninvekelela mutthu opanke etampi yuulupale khuttharuwa, ni anninvekela Yehova wira omukhaliherye otthikela okhalana ompatthani wooloka ni yena. — Yak. 5:15.

6. Akhala wira mutthu ookumihiwa mmulokoni, niireke Yehova pooti omulevelela? Mutthokiherye.

⁶ Ankhi akhala wira okathi axitokweene anivaanela aya ni mutthu owo khonooniherya wira oottharuwa ni murima wootheene? Akhala wira ti siiso, mutthu owo ohaana okumihiwa mmulokoni. Nave, akhala wira mutthu owo oopaka etampi yuulupale ni ootthekela malamulo a kuvernu, axitokweene khanrowa omwaakiherya wira ohihukhummwe, maana Yehova ohaavaha muritti makhulupale a kuvernu waaphukela ni waahukhumu atthu ootheene anipaka ikrime, hata attharuwaka ni murima wootheene aahiiso nnaari. (aRom. 13:4) Nto akhala wira muhoolo mwaya, mutthu owo onneemererya etampi opanke awe ni onnittharuwa ni murima wootheene, ooniheryaka ni miteko sawe, Yehova onoomulevelela. (Luka 15:17-24) Mutthu owo onooleveleliwa hata opanke ene etampi yuulupale. — 2 Wah. 33:9, 12, 13; 1 Tim. 1:15.

7. Ninrowa omulevelela sai mutthu onitthekenle?

⁷ Ninnihakalala vanceene osuwela wira khanrina muritti wa othanla akhala wira Yehova pooti omulevelela aahiiso ohimulevelela mutthu opanke etampi! Masi hata vari siiso, yookhala etthu nikhanle ahu oothanla. Etthu xeeni? Okathi mukina, mutthu mukina pooti onipakela etthu yoohiloka enniwereya vanceene. Nuumala-vo, owo pooti onivekela wira nimulevelele, masi akina pooti ohinivekela muswammaha. Hata vari siiso, hiyo pooti othanla omulevelela mutthu owo ni ohipweha  mathowa vamurimani. Akhala wira mutthu owo ooniwereiha murima vanceene, nihaana wiimananiha wira nimulevelele hata oviraka okathi munceene. Erevista A Sentinela ya 15 a Setembro, 1994, yaahimmye so: “Okathi nimmulevelela ahu mutthu onitthekenle, eyo khentaphulela wira ninneemererya etthu yoohiloka opanke awe. Mukristau onimulevelela mukhwaawe, onniroromela wira Yehova onoophuka saana. Yehova yoowo ori mphuki a xariya, onoophuka mwaha owo okathi wooreerela ni mwa xariya”. Xeeni Yehova onnitumererya awe waalevelela atthu akina ni ohiya mwaha owo mmatatani mwawe nikupaliki wira onoophuka mwa xariya?

8. Moota xeeni waalevelela atthu akina onooniherya aya wira ninnixukhurela omoriwa ikharari wa Yehova?

⁸ Okathi nnaalevelela ahu atthu akina, ninnooniherya wira ninnixukhurela omoriwa ikharari wa Yehova. Nlikanyiho aapanke awe, Yesu aahimulikanyiha Yehova ni mwene mmosa aamulevelenle murumeyi awe aamukophenle musurukhu munceenexa, yoowo ahaawerya awe oliva. Murumeyi ole khammorenle ikharari murumeyi aamukophenle musurukhu vakhaani. (Math. 18:23-35) Nlikanyiho na Yesu, ninniixuttiha exeeni? Akhala wira ninnixukhurela omoriwa ikharari wa Yehova, eyo enooniiriha waalevelela atthu akina. (Esal. 103:9) Erevista Owehaweha yaakumiheriwe iyaakha sinceene sivinre, yaahimmye so: “Hata naalevelelaka ikwaha sinceene anna ni arokora, waalevelela wahu khonikhala-khala olikanaka ni moota Muluku ommulevelela awe khula mmosa a hiyo orumeelaka mukuttho wa Kristu”.

9. Atthu xeeni Yehova onaamorela awe ikharari? (Matheyo 6:14, 15)

⁹ Ole onaalevelela atthu akina, onooleveleliwa ni Yehova. Yehova onnaamorela ikharari ale anaamorela ikharari atthu akina. (Math. 5:7; Yak. 2:13) Yesu aahooniherya eyo oratteene, okathi aawiixuttiha awe atthareli awe moota woovekela. (Mmusome Matheyo 6:14, 15.) Etthu Yehova aamulenle awe Yobi enniniixuttiha omoriwa ikharari. Yobi aahiriipiwa murima vanceene ni moolumo oohoma a Elifazi, Bildadi ni Sofari. Nto Yehova aahimuleela Yobi wira aavekelele alopwana ale. Nuumala Yobi waavekelela, Yehova aahimureeliha vanceene. — Yobi 42:8-10.

10. Xeeni opweha mathowa onrowa aya onikumiherya mixankiho? (aEefeso 4:31, 32)

¹⁰ Opweha mathowa pooti onikumiherya mixankiho. Opweha mathowa ori ntoko wiireya muritti woolemela. Yehova oniphavela wira nikhalaneke murettele. Murettele owo onikhumelela mwaha woohipweha mathowa vamurimani. (Mmusome aEefeso 4:31, 32.) Yehova onnintumererya wira “muhinanariwé! Mutthyawe oruwana”. (Esal. 37:8) Natthara malakiheryo ala, anoonikhaliherya vanceene. Akhala wira ninnipweha mathowa ni ninnikhootta omulevelela mutthu onitthekenle, eyo pooti oniphwanyiha iretta. (Mir. 14:30) Nave akhala wira ninnipweha mathowa ni othipelela onanariwa ni mutthu onitthekenle, eyo khenrowa omukumiherya mixankiho mutthu owo. Masi ninrowa wiikumiherya mixankiho mmensihu. Opaka eyo waarowa olikanaka ni owurya eveneno nuupuwelaka wira onrowa okhwa mutthu mukina. Nto vannooneya wira okathi nnaalevelela ahu atthu akina, ninniphwanya mireerelo sinceene. (Mir. 11:17) Okathi owo, ninniphwanya murettele, omaaleeleya ni khaninhiya ovara miteko sa Yehova.

11. Biibiliya onihimya exeeni sa wunla ikuhu? (aRoma 12:19-21)

¹¹ Wunla ikuhu ti wa Yehova. Yehova khonirumme wunla ikuhu okathi atthu akina annitthekela aya. (Mmusome aRoma 12:19-21.) Okhala wira nooravihiwa etampi, hiyo khaninwerya ophuka oratteene mwaha ni mwa xariya ntoko Muluku oniphuka awe. (aHeeb. 4:13) Okathi mukina moonelo ahu pooti onithweeleliha  ni ohisuwela etthu yooreerela opaka. Yehova aahimuruma Yakobo olepa so: “Onanariwa wa mutthu khonikumiherya exariya ya Muluku”. (Yak. 1:20) Nikupaliki ni murima wootheene wira Yehova onoopaka etthu yooloka ni okathi wooreerela onoophuka mwaha owo mwa xariya.

12. Ninrowa wooniherya sai wira ninniroromela exariya ya Yehova?

¹² Okathi nnaalevelela ahu atthu akina ninnooniherya wira ninniroromela exariya ya Yehova. Okathi ninkupali ahu wira Yehova onoophuka itthu sootheene mwa xariya, ninnooniherya wira ninnikupali wira Yehova onoomaliha mixankiho sootheene sikumiheriwe ni etampi. Elapo esya, itthu sootheene sootakhala “khasinupuweliwa-tho, itthu sivinre sinoliyaliwa khuluwi”. (Yes. 65:17) Okathi mutthu onnitthekela awe, niireke vanniweryaneya ohimunlela ikuhu ni ohipweha mathowa? Nrowe niwehe moota atthu akina awenrye aya opaka eyo.

13-14. Yoowiiraneya ya Tony ni José, ewiixuttinheni exeeni voohimya sa olevelela?

¹³ Anna ni arokora anceene yaahithanla waalevelela atthu akina hata atthu awo yaapanke itthu saawereyale vanceene. Mareeliho xeeni yaaphwannye aya mwaha woopaka eyo?

¹⁴ Iyaakha sinceene saavinre ohinatthi okhala Namoona a Yehova, Tony, c yoowo onikhala oFilipinas aahisuwela wira muulupale awe aahiiviwa ni mulopwana mmosa iihaniwa José. Okathi ole, Tony aari mutthu oowali ni aaphavela omunlela ikuhu José. Masi José aahitthukweliwa mukhatteya mwaha wa ekrime aapanke awe. Muhoolo mwaya nuumala José okumihiwa mukhatteya, Tony aahilapha wira ammwaavya José wira omwiive. Nto Tony aahimuthuma kapwitthi wira amwiive José. Okathi ene yoowo, Tony aahipacerya omusoma Biibiliya ni Anamoona a Yehova. Owo onihimya so: “Okathi kaamusoma aka Biibiliya, kaahoona wira kaahaana opaka marukunuxo ni ohiya owali ni onanariwa”. Nuuvira okathi, Tony aahipatisiwa ni aahikhala mutokweene a mmulokoni. Nkahaya muupuwele moota Tony aakhanle awe nuumala osuwela wira José aari-tho Namoona a Yehova. Okathi yaakumanne aya, awo yaahikhupaarelana. Nto Tony aahimuleela José wira aahimulevelela ni murima wootheene. Tony ohimmye wira aahihakalala vanceene okathi aamulevelenle awe José. Yehova  aahimureeliha vanceene Tony mwaha wookhala mutthu oolevelela.

15-16. Yoowiiraneya ya Peter ni Sue, ewiixuttinheni exeeni voohimya sa olevelela?

¹⁵ Mwaakha wa 1985, Peter ni Sue yaari Empa ya Omwene awehaka mithukumano. Nto mootutuxerya yaahiphuleya epompa. Mulopwana mmosa taareyale epompa ele muhina mwa Empa ya Omwene. Epompa ele yaahinvulaliha vanceene Sue mpakha ohonona maitho ni maaru awe. Nave Sue khaawerya woona wunkhela wa itthu. d Ikwaha sinceene, yaamakela wiikoha so: ‘Mutthu xeeni ola opanke etthu yootepexa otakhala ntoko ela?’ Nuuvira iyaakha sinceene, mulopwana aareyale epompa ele, yoowo ahaakhanle Namoona a Yehova, aahitthukiwa ni aahilamuliwa okhala mukhatteya okumi awe wootheene. Okathi yaakohiwe aya akhala wira yaahimulevelela mulopwana ole, awo yaahimmye so: “Yehova onniniixuttiha ohipweha mathowa vamurimani ni ohiwunlela ikuhu atthu ale annitthekela, hata anikumihenrye ene mixankiho sinceene. Nto moohipisa nuumala ophuleya epompa ele, naahinvekela Yehova wira onikhaliherye ohipweha mathowa vamurimani, omulevelela ole aapanke etthu ele yootakhala ni owehexexa itthu sa muhoolo”.

¹⁶ Niireke vaahaakhweela omulevelela mulopwana ole? Awo anihimya so: “Okathi mukina, vaavo Sue onoona awe owereya mwaha wa makhwatta aaphwannye awe okathi yaaphuleyale aya epompa ele, eyo enniniiriha onanariwa. Masi khaninthipelela wuupuwelela etthu ele yoohiloka. Ninnihimya ni murima wootheene wira, akhala wira nihiku nlo mulopwana ole aareyale epompa onookhala munnihu, nnoomwaakhela ni murima wootheene. Yoowiiraneya ele, yooniixuttiha wira otthara malakiheryo a mBiibiliyani anninikhaliherya vanceene ni ninnikhala ootaphuwa. Tthiri malakiheryo a mBiibiliyani aanitaphula mwa enamuna nahuupuwela ahu! Nave ninnihakalala osuwela wira moohipisa, Yehova onrowa omaliha mixankiho sootheene sikhumelenle”.

17. Yoowiiraneya ya Myra, ewiixuttinheni exeeni voohimya sa olevelela?

¹⁷ Murokora Myra iixuntte ekeekhai otheliwe  ene ni orina ene anamwane anli acikhaani. Masi iyawe khaaphavenle wiixutta ekeekhai. Nuuvira okathi, mulopwana ole aahiraruwa ni aahimuhiya murokora ole. Myra onihimya so: “Nuumala iyaka okihiya miyo ni anamwane anli, kaahikhalana moonelo anikhalana aya atthu anceene aniraruweliwa ni mutthu yamphenta aya vanceene, kiire so, miyo kaahithanana, nkaakupali etthu yiiraneya, kaahiriipiwa murima, kaahixanka, kaaniivaha nthowa ni kaahinanariwa vanceene”. Nnaamwi ekasamento aya emanle ene, nlelo murokora ole onnoona owereya. Myra onincererya so: “Saahivira myeeri sinceene kixankale ene ni kinanariwe ene. Nto moonelo owo waahipacerya ohonona ompatthani aka ni Yehova ni atthu akina”. Vano Myra ohimmye wira oohiya onanariwa ni opweha mathowa vamurimani. Nave khoniphavela wira iyawe ole aamuthenle emukhumelele etthu yootakhala. Myra onnilipelela wira nihiku nlo, owo onimwiixutta ekeekhai wira omurumeeleke Yehova. Tthiri vannooneya wira Myra onniwehexexa itthu sa muhoolo. Hata ohitheliwe, Myra ohaahuwa anaawe ale anli ni annimurumeela Yehova. Olelo-va, Myra onnihakalala omurumeela Yehova ni anaawe ale anli hoothe ni itthoko saya.

18. Okhala wira Yehova mphuki muulupale, nikupaliki exeeni?

¹⁸ Ti voohakalaliha osuwela wira khanivahiwe muritti wa othanla moota atthu akhanle aya oophukeliwa! Okhala wira Mphuki muulupalexa, Yehova tonrowa ovara muteko owo wa efaita yinceene. (aRom. 14:10-12) Nikupaliki ni murima wootheene wira Yehova onrowa waaphukela atthu mwa xariya, moovarihana ni malamulo awe a ele eri yooloka ni yoohiloka. (Maph. 18:25; 1 Mam. 8:32) Owo khonikhala-khala opakaka etthu yoohixariya!

19. Exariya ya Yehova, enrowa okumiherya exeeni?

¹⁹ Ninnilipelela vanceene okathi Yehova onrowa awe omaliha mixankiho sootheene sikumiheriwe ni etampi ni ohimalela wa apinaatamu. Okathi owo, iretta sootheene, ohela muhina iretta sa mmuupuweloni sinrowa omalihiwa. (Esal. 72:12-14; Wiis. 21:3, 4) Nto okathi owo khaninrowa wuupuwelaka itthu soohiloka sinnikhumelela olelo-va. Nlipelelaka okathi owo woohakalaliha, ninnimuxukhurela vanceene Yehova mwaha woonivaha owerya wa omutakiha naalevelelaka atthu akina.