1. Ano an iginpapasarig ni Jehova ha mga nakasala nga nagbabasol?

 BISAN kon Jehova an aton Maglalarang, Parahatag hin balaud, ngan Hukom, hiya liwat an aton mahigugmaon nga Amay ha langit. (Sal. 100:3; Isa. 33:22) Kon nakakasala kita ha iya ngan sinsero nga nagbabasol, diri la kay kaya kita niya pasayloon kondi karuyag gud liwat niya nga buhaton ito. (Sal. 86:5) Pinaagi kan propeta Isaias, iginhatag ni Jehova inin mahigugmaon nga pasarig: “Bisan kon an iyo mga sala sugad kapula han dugo, magigin sugad ito kabusag han niebe.”—Isa. 1:18.

2. Kon karuyag naton magkaada murayaw nga relasyon ha iba, ano an kinahanglan naton buhaton?

² Tungod kay diri kita perpekto, kita ngatanan may mga nayayakan ngan nabubuhat nga nakakasakit ha iba. (San. 3:2) Pero diri karuyag sidngon nga diri kita mahimo magkaada duok nga relasyon ha ira. Mahihimo naton ito kon mahibabaro kita pagpasaylo. (Prob. 17:9; 19:11; Mat. 18:21, 22) Kon nasasakitan kita han iba ha gudtiay nga paagi, karuyag ni Jehova nga magpasaylo kita. (Col. 3:13) May maopay kita nga rason nga buhaton ito. Kay ngani, hi Jehova “hura” nga nagpapasaylo ha aton.—Isa. 55:7.

3. Ano an aton hihisgotan hini nga artikulo?

³ Hini nga artikulo, hihisgotan naton kon paonan-o masusubad han diri perpekto nga mga tawo an pagpasaylo ni Jehova. Ano nga mga sala an kinahanglan naton isumat ha mga tigurang? Kay ano nga gin-aaghat kita ni Jehova nga pasayloon an iba? Ngan ano an aton mahibabaroan ha pipira naton nga kabugtoan nga nag-antos hinduro tungod han mga sala han iba?

4. (a) Kon an usa nga surugoon ni Jehova nakakahimo hin seryoso nga sala, ano an kinahanglan niya buhaton? (b) Ano an papel han mga tigurang kon nakikiistorya hira ha nakasala?

⁴ An seryoso nga mga sala kinahanglan isumat ha mga tigurang. Mababasa ha 1 Corinto 6:9, 10 an mga ehemplo han sugad nga mga sala. An seryoso nga mga sala daku gud nga pagtalapas ha balaud han Dios. Kon an usa nga Kristiano makahimo hin sugad nga sala, kinahanglan dumaop hiya kan Jehova nga Dios ha pag-ampo, ngan kinahanglan makiistorya hiya ha mga tigurang han kongregasyon. (Sal. 32:5; San. 5:14) Ano an papel han mga tigurang? Hi Jehova gud la an may awtoridad nga bug-os nga pasayloon an mga sala, ngan ginhihimo niya ito nga posible basado ha halad lukat. b Pero igintapod ni Jehova ha mga tigurang an responsabilidad han pagdesisyon uyon ha Kasuratan kon puydi ba magpabilin ha kongregasyon an nakasala. (1 Cor. 5:12) Basi mahimo ito, usa han ira ginbubuhat amo an pangalimbasog nga mabaton an masunod nga mga pakiana: Tinuyo ba an sala? Ginplano ba niya nga daan nga buhaton ito? Pauroutro ba niya ito nga ginbuhat ha sulod hin pipira ka panahon? Labaw ha ngatanan, may ebidensya ba nga sinsero hiya nga nagbabasol? May-ada ba mga proyba nga ginpasaylo na hiya ni Jehova?—Buh. 3:19.

5. Ano an mga bendisyon nga resulta han ginbubuhat han mga tigurang?

⁵ Ha pakiistorya han mga tigurang ha nakasala, tumong nira nga makahimo hin desisyon dinhi ha tuna nga pariho han ginhimo na ha langit. (Mat. 18:18) Ano an kapulsanan ha kongregasyon hini nga kahikayan? Ginsisiguro hini nga mapaiwas an mga nakasala nga diri nagbabasol nga bangin makadaot ha presyoso nga mga karnero ni Jehova. (1 Cor. 5:6, 7, 11-13; Tito 3:10, 11) Mahimo liwat ito makabulig ha nakasala nga magbasol ngan mapasaylo ni Jehova. (Luc. 5:32) Nag-aampo an mga tigurang para ha nakasala nga nagbabasol ngan naghahangyo kan Jehova nga buligan hiya nga maipahiuli an iya relasyon ha Iya.—San. 5:15.

6. Kon ginpaiwas an usa nga tawo, posible pa ba hiya mapasaylo? Isaysay.

⁶ Ano man kon ha panahon han pakiistorya han mga tigurang an nakasala diri nagbabasol? Hito nga kahimtang, papaiwason hiya ha kongregasyon. Kon gintalapas niya an balaud han gobyerno, diri hiya puproteksyonan han mga tigurang ha mga resulta hito. Gintutugotan ni Jehova an mga opisyal han gobyerno nga hukman ngan sirotan an bisan hin-o nga nagtatalapas han balaud—nagbabasol man hiya o diri. (Roma 13:4) Pero kon ha urhi makapamurubuot ito nga tawo ngan sinsero nga magbasol ngan magbag-o, andam hi Jehova nga pasayloon hiya. (Luc. 15:17-24) Tinuod ito bisan kon seryoso gud an iya mga sala.—2 Cron. 33:9, 12, 13; 1 Tim. 1:15.

7. Ha ano nga paagi naton mapapasaylo an usa nga nakasala ha aton?

⁷ Mapasalamaton gud kita nga mahibaroan nga diri kita kinahanglan magdesisyon kon papasayloon ni Jehova an usa nga nakasala! Pero may kinahanglan kita desisyonan. Ano ito? May mga kahimtang nga an usa nga indibiduwal nakakasala ha aton—hin seryoso pa ngani—pero bangin mangaro hiya hin pasaylo ha aton. May mga kahimtang liwat nga bangin diri hiya mangaro hin pasaylo. Bisan pa hito, mahimo kita magdesisyon nga pasayloon hiya ngan wad-on an anoman nga pagdumot ngan kasina nga aton inaabat ha iya. Ha tinuod la, bangin magkinahanglan ini  hin panahon ngan pangalimbasog, labi na kon nasakitan gud kita. Ini an siring han An Barantayan han Septyembre 15, 1994: “Kon ginpapasaylo mo an usa nga makasasala, diri ini nangangahulogan nga pinababay-an mo an sala. Para han Kristiano, an pagpasaylo nangangahulogan nga may pagsarig nga igintutubyan mo an butang ha mga kamut ni Jehova. Hiya an matadong nga Hukom ha bug-os nga uniberso, ngan ipapadapat niya an hustisya ha husto nga panahon.” Kay ano nga gin-aaghat kita ni Jehova nga magpasaylo ngan itubyan ha iya mga kamot an hustisya?

8. Paonan-o an pagin mapinasayloon nagpapakita hin apresasyon ha kalooy ni Jehova?

⁸ An pagin mapinasayloon nagpapakita hin apresasyon. Ha usa nga parabola, iginpariho ni Jesus hi Jehova ha usa nga agaron nga nagkansela han daku nga utang nga diri mabaydan han usa han iya mga uripon. Pero an uripon nga ginpasaylo waray magpakita hin kalooy ha usa nga uripon nga mas gutiay gud an utang ha iya. (Mat. 18:23-35) Ano an igintututdo ha aton ni Jesus? Kon gin-aapresyar gud naton an daku nga kalooy ni Jehova ha aton, mapapagios kita nga pasayloon an iba. (Sal. 103:9) Ini an ginsiring han The Watchtower damu ka tuig na an naglabay: “Bisan kon pira pa ka beses naton pasayloon an aton mga igkasi-linarang, diri gud hito matutupngan an kadaku han pagpasaylo ngan kalooy ha aton han Dios pinaagi han Kristo.”

9. Hin-o an ginpapakitaan ni Jehova hin kalooy? (Mateo 6:14, 15)

⁹ An mga nagpapasaylo papasayloon. Hi Jehova nagpapakita hin kalooy ha mga maloloy-on. (Mat. 5:7; San. 2:13) Ginklaro ito ni Jesus han gintutdoan niya an iya mga disipulo kon paonan-o mag-aampo. (Basaha an Mateo 6:14, 15.) May mahibabaroan kita nga puropariho nga leksyon ha ginsiring ni Jehova ha iya surugoon nga hi Job. Iton matinumanon nga lalaki nasakitan gud han mapintas nga mga yakan han tulo nga lalaki nga hira Elipaz, Bildad, ngan Zopar. Ginsugo ni Jehova hi Job nga ig-ampo hira. Katapos ito buhaton ni Job, ginbendisyonan hiya ni Jehova.—Job 42:8-10.

10. Kay ano nga nakakadaot an pagdumot? (Efeso 4:31, 32)

¹⁰ An pagdumot nakakadaot. An pagdumot sugad hin mabug-at nga pinas-an, ngan karuyag ni Jehova nga abaton naton an kamurayawan nga resulta han pagwara hito. (Basaha an Efeso 4:31, 32.) Gin-aaghat kita niya nga ‘diri na masina ngan bayaan an kapungot.’ (Sal. 37:8) Makakabulig ha aton an pagsunod hito nga sagdon. An pagdumot mahimo makadaot han kahimsog han aton lawas ngan hunahuna. (Prob. 14:30) An aton pagdumot diri makakaapekto ha nakasakit ha aton, sugad la nga an aton pag-inom hin hilo diri makakadaot ha iya. Lugod, kon nagpapasaylo kita, kita mismo an nagpapahimulos. (Prob. 11:17) Nagigin murayaw an aton hunahuna ngan kasingkasing, ngan nakakagpadayon kita ha aton pag-alagad kan Jehova.

11. Ano an ginsisiring han Biblia mahitungod ha pagbulos? (Roma 12:19-21)

¹¹ Kan Jehova an pagbulos. Waray kita tagi ni Jehova hin awtoridad nga bumulos kon may nakakasala ha aton. (Basaha an Roma 12:19-21.) Tungod kay limitado ngan diri perpekto an aton panhunahuna, waray kita abilidad nga hukman hin tama an mga butang, pariho han nahihimo han Dios. (Heb. 4:13) Ngan usahay, tungod han aton emosyon nakukurian kita paghimo han tama nga desisyon. Gin-giyahan ni Jehova hi Santiago nga magsurat: “An kasina han tawo diri nagriresulta hin katadongan  han Dios.” (San. 1:20) Makakasiguro kita nga bubuhaton ni Jehova an tama ngan sisiguruhon niya nga maipapadapat an perpekto nga hustisya.

12. Paonan-o naton maipapakita nga nasarig kita ha hustisya ni Jehova?

¹² An pagpasaylo nagpapakita nga nasarig kita ha hustisya ni Jehova. Kon igintutubyan naton an mga butang ha mga kamot ni Jehova, iginpapakita naton nga nasarig kita nga wawad-on niya an ngatanan nga kadaot nga resulta han sala. Ha iya iginsaad nga bag-o nga kalibotan, an mga kasakit ha emosyon “diri na mahinunumdoman, diri liwat ito masulod [utro] ha kasingkasing.” (Isa. 65:17) Pero kon duro kita nga nasakitan, posible gud ba nga mawara an kasina ngan pagdumot nga bangin inaabat naton? Kitaa kon paonan-o ito nahimo han iba.

13-14. Ano an imo nahibaroan mahitungod ha pagpasaylo ha eksperyensya nira Tony ngan José?

¹³ Damu han aton Kristiano nga kabugtoan an nagdesisyon nga magpasaylo bisan kon nasakitan gud hira han ginbuhat han iba. Ano nga mga bendisyon an ira nakarawat kay ginbuhat nira ito?

¹⁴ Hi Tony c naukoy ha Pilipinas. Damu ka tuig antes hiya magin Saksi ni Jehova, iya nahibaroan nga an usa niya nga magurang nga bugto nga lalaki ginpatay hin lalaki nga José an ngaran. Hito nga panahon, hi Tony agresibo gud ngan bayolente, ngan karuyag niya bumulos. Hi José gin-aresto ngan ginpriso tungod han krimen nga iya ginbuhat. Ha urhi, han ginpagawas hi José ha prisohan, determinado hi Tony nga bilngon hiya ngan patayon. Nagpalit hiya hin pusil para hito nga katuyoan. Hito nga panahon, nagpa-Bible study hi Tony ha mga Saksi ni Jehova. Siring niya, “Samtang nag-aaram ako, nahibaroan ko nga kinahanglan ko bag-uhon an akon personalidad ngan mga buhat, ngan upod hito an pagwara han akon kasina.” Paglabay han panahon, nabawtismohan hi Tony ngan ha urhi nagin tigurang hiya ha kongregasyon. Imadyina la an iya inabat han nahibaroan niya nga hi José nagin bawtismado liwat nga surugoon ni Jehova! Pagkita nira, mahigugmaon nga naghangkopay hira, ngan ginsidngan ni Tony hi José nga ginpasaylo na niya  hiya. Siring ni Tony nga an pagpasaylo kan José nakahatag ha iya hin daku gud nga kalipay salit makuri para ha iya bisan an paghulagway hiton maopay gud nga pag-abat. Oo, ginbendisyonan ni Jehova an pagin andam ni Tony nga magpasaylo.

15-16. Ano an imo nahibaroan mahitungod ha pagpasaylo ha eksperyensya nira Peter ngan Sue?

¹⁵ Han 1985, hira Peter ngan Sue naatender hin katirok ha Kingdom Hall han tigda nga nagkaada makusog nga pagbuto. May nagbutang hin bomba ha sulod han Kingdom Hall! Nag-antos hi Sue hin grabe nga mga injury nga permanente nga nakadaot han iya pagkita ngan pagpamati. Nawara liwat an iya panhamot. d Agsob pakianhan nira Peter ngan Sue an ira kalugaringon, ‘Ano nga klase hin tawo an magbubuhat hin sugad karaot nga butang?’ Paglabay hin damu ka tuig, an nagbomba, nga diri alagad ni Jehova, gin-aresto ngan ginsentensyahan nga mapriso tubtob ha iya kamatay. Han ginpakianhan hira Peter ngan Sue kon napasaylo na ba nira ini nga tawo, nagsiring hira: “Gintututdoan kita ni Jehova nga an pagtipig hin kasina ngan pagdumot may maraot nga epekto ha aton lawas, emosyon, ngan hunahuna. Salit katapos gud han panhitabo, ginhangyo namon hi Jehova nga buligan kami nga wad-on an kasina ngan pagdumot basi magin murayaw an amon kinabuhi.”

¹⁶ Nagin masayon daw la ha ira an pagpasaylo? Diri pirme. Hira nagsiring: “Ha pana-panahon kon nag-aantos hi Sue tungod han mga epekto han iya mga injury, nasisina na liwat kami. Pero diri namon ito ginhihinunahuna, salit madagmit la ini nga nawawara. Ngani, kinasingkasing nga masisiring namon nga kon umabot an panahon nga magin bugto naton an nagbomba, iwi-welcome namon hiya. Ini nga eksperyensya nagtutdo ha amon nga an mga prinsipyo ha Biblia naghahatag gud ha aton hin kagawasan ha mas damu nga paagi kay han aton mahuhunahuna! Naliliaw liwat kami ha paghibaro nga hirani na wad-on ni Jehova an ngatanan nga kadaot nga nahitabo ha amon.”

17. Ano an imo nahibaroan mahitungod ha pagpasaylo ha eksperyensya ni Myra?

 ¹⁷ Nagin Saksi hi Myra han inasaw-an na hiya ngan may duha nga gudti nga anak. An iya bana waray magin Saksi. Paglabay han panahon, nag-adulteryo an iya bana ngan ginbayaan an pamilya. Siring ni Myra: “Han ginbayaan ako han akon bana pati an amon duha nga anak, inabat ko an mga emosyon nga inaabat han damu katapos traydoran hin hinigugma—nakalasan ako, diri makatoo, nasubo, nagbasol, inabat nga ako an hinungdan, ngan nasina.” Bisan kon natapos an ira pag-asawa, inabat la gihapon niya an kasakit han pagtraydor han iya bana. Nagsiring liwat hi Myra: “Padayon ko nga inabat ito ha sulod hin damu ka bulan, ngan napansin ko nga naaapektohan na hito an akon relasyon kan Jehova ngan ha iba.” Yana nasiring hi Myra nga diri na hiya nasisina ngan diri naghihingyap hin maraot para ha iya bana hadto. Naglalaom hi Myra nga maabot an panahon nga magigin duok hiya kan Jehova. Hi Myra nakapokus ha tiarabot. Sugad nga solo nga kag-anak, ginpadaku niya an iya duha nga anak nga magin mga alagad ni Jehova. Yana, hi Myra malipayon nga nag-aalagad kan Jehova upod han iya mga anak ngan han ira mga pamilya.

18. Ha ano kita makakasarig may kalabotan kan Jehova sugad nga Supremo nga Hukom?

¹⁸ Makalilipay hibaroan nga diri kita an kinahanglan magdesisyon kon paonan-o dapat hukman an mga tawo! Sugad nga Supremo nga Hukom, hi Jehova an maghihimo hinin importante nga buruhaton. (Roma 14:10-12) Bug-os kita nga makakasarig nga an iya paghukom pirme magigin uyon ha iya perpekto nga mga suruklan ha tama ngan sayop. (Gen. 18:25; 1 Hadi 8:32) Diri gud hiya magbubuhat hin bisan ano nga diri matadong!

19. Ano an matutuman tungod han perpekto nga hustisya ni Jehova?

¹⁹ Ginpapamulat gud naton an panahon nga bug-os na nga wawad-on ni Jehova an ngatanan nga magraot nga epekto han pagkadiri-perpekto ngan sala han tawo. Hito nga panahon, an ngatanan naton nga kasakit ha lawas ngan emosyon permanente na nga matatambal. (Sal. 72:12-14; Pah. 21:3, 4) Diri na gud ito mahinunumdoman utro. Samtang ginhuhulat naton an pag-abot hiton makalilipay nga panahon, mapasalamaton gud kita nga hi Jehova naghatag ha aton han abilidad nga subaron hiya pinaagi ha pagin mapinasayloon.