ALATIKE AKO 25
ʼE Tapuakiʼi e Sehova Ia Natou ʼAe ʼe Lotofakamolemole
“Ohage pe ko te lotolelei ʼa Sehova ke fakamolemole kia koutou, ʼe tonu ke kotou toe fai feia mo koutou.”—KOL. 3:13.
KATIKO 130 Tou Lotofakamolemole
TE ʼU MANATU FAKANOUNOU *
1. Kotea te ʼu palalau neʼe fai e Sehova ʼe fakalotofimalie kia natou ʼae neʼe agahala pea mo fakahemala?
KO SEHOVA ʼe ko totatou Tupuʼaga, mo Tagata Failao pea mo totatou Tuʼi Fakamau. Pea ʼe ko ia foki tatatou Tamai ʼae ʼi selo ʼae ʼe ʼofa ia tatou. (Pes. 100:3; Esa. 33:22) Koia ʼe mole ina maʼu pe ia te malohi, kae ʼe ina toe maʼu ia te holi ʼae ke ina fakamolemole kia natou ʼae ʼe fakahemala moka neʼe natou agahala kia te ia. (Pes. 86:5) Neʼe ina fai te ʼu palalau fakalotofimalie ʼaeni: “Tatau aipe pe ʼe kula fakapoʼuli ʼakotou agahala, ʼe liliu anai ʼo hihina ohage ko te nive.”—Esa. 1:18.
2. Kotea ʼae ʼe tonu ke tou fai moka ʼe tou fia tokalelei mo ʼihi?
2 ʼE tou agahala fuli. Koia ʼe feala ai ke tou fai he ʼu palalau pea mo he ʼu meʼa ke mamahi ai ʼihi. (Sakp. 3:2) Kae kapau ʼe tou lotofakamolemole, ʼe tou haga maʼu pe anai he ʼu felogoi lelei ia tatou. (Taag. 17:9; 19:11; Mat. 18:21, 22) Ka tou fefakamamahiʼaki ia tatou, pea ʼe loto e Sehova ke tou fefakamolemoleʼaki. (Kol. 3:13) ʼE ʼi ai te tupuʼaga ʼe lelei ke tou fai te faʼahi ʼaia, he ʼe ko Sehova ʼe fakamolemole ‘lahi mai kia tatou.’—Esa. 55:7.
3. Kotea ʼae ka tou vakaʼi ʼi te alatike ʼaeni?
3 ʼI te alatike ʼaeni, ʼe tou vakaʼi anai ʼe feala ke tou faʼifaʼitakiʼi ia Sehova pea mo fakamolemole ki ʼihi logo la totatou ʼuhiga agahala. ʼE tou tali anai ki te ʼu fehuʼi ʼaeni: Ko te ʼu agahala fea ʼae ʼe tonu ke fakaha ki te kau tagata ʼafeā? He koʼe ʼe ui mai e Sehova ke tou manavaʼofa? Pea kotea ʼae ʼe tou ako mai ʼotatou tehina mo tuagaʼane, ʼae neʼe lava lotofakamolemole kae neʼe fakamamahiʼi natou e ʼihi?
ʼE FAI E HE TEHINA HE AGAHALA MAMAFA
4. (1) Kotea ʼae ʼe tonu ke fai e he kaugana ʼa Sehova neʼe ina fai he agahala mamafa? (2) Kotea ia te maʼua ʼa te kau tagata ʼafeā ʼae ka felogoi anai mo ia ʼae ʼe agahala?
4 ʼE tonu ke fakaha ki te kau tagata ʼafeā te ʼu agahala mamafa ʼae neʼe fai e he tahi. ʼE tou maʼu ia 1 Kolonito 6:9, 10 ʼihi ʼo te ʼu agahala ʼaia. Ka agahala mamafa he tahi, ʼe ina maumauʼi ʼosi te lao ʼa te ʼAtua. Kapau ʼe fai e he tehina he agahala feia pea ʼe tonu ke faikole kia Sehova pea mo fakaha ki te kau tagata ʼafeā ʼo tana kokelekasio. (Pes. 32:5; Sakp. 5:14) Kotea ia te maʼua ʼae ʼe tonu ke fai e te kau tagata ʼafeā? ʼE ko Sehova tokotahi pe ʼe feala ke ina fakamolemole fuli te ʼu agahala ʼo fakatafito ki te totogi. * Kae neʼe ina tuku ki te kau tagata ʼafeā te maʼua ʼae ke natou vakavakaʼi pe ʼe feala kia ia ʼae neʼe agahala ke hoko atu tana nofo ʼi te kokelekasio. ʼE natou fakahoko ia te faʼahi ʼaia ʼo fakatafito ki te Tohi-Tapu. (1 Ko. 5:12) Kapau ʼe natou fia kakusia te faʼahi ʼaia, ʼe natou faiga anai ke natou maʼu te tali ki te ʼu fehuʼi ʼaeni: Neʼe fai koa e te kilisitiano ʼaia te agahala ʼi tona loto faʼitaliha? Neʼe faiga koa ke ina fufu tana agahala? Neʼe tuʼa lahi koa tana agahala pea mo ina fai ʼi he temi loaloaga? ʼE ina fakaha koa ʼi ʼana gaue ʼe kua fakahemala moʼoni? Pea ʼe ʼi ai koa he ʼu fakamoʼoni kua fakamolemole age Sehova ki ai?—Gaue 3:19.
5. Kotea ia te ʼu fua lelei ʼe tou maʼu moka tokoni te kau tagata ʼafeā kia natou ʼae neʼe agahala?
5 Ka felogoi te kau tagata ʼafeā mo ia ʼae neʼe agahala pea ko tanatou fakatuʼutuʼu ke tatau ia te tonu ʼae ʼe natou fai ʼi te kele mo ʼae kua ʼosi fai ʼi selo. (Mat. 18:18) Kotea ia te ʼu fua lelei ʼe tou maʼu mai te fakatuʼutuʼu ʼaia? ʼAki te fakatuʼutuʼu ʼaia, ʼe puipui ai te kokelekasio ʼo feala ai ke fakamavae ia ia ʼae neʼe agahala kae ʼe mole fakahemala pea ke mole toe fakatupu kovi ai ki te ʼu kaugana ʼa Sehova. (1 Ko. 5:6, 7, 11-13; Tito 3:10, 11) Pea tahi, ʼe toe tokoni kia ia ʼae ʼe agahala ke fakahemala pea ke ina maʼu te fakamolemole ʼa Sehova. (Luka 5:32) ʼE hufakiʼi anai e te kau tagata ʼafeā ia ia ʼae neʼe agahala pea mo fakahemala, pea mo natou kole anai kia Sehova ke tokoni ki ai ke ina toe maʼu he ʼu felogoi lelei mo ia.—Sakp. 5:15.
6. Kapau ʼe fakamavae he tahi, ʼe kei feala koa he fakamolemole age ʼa Sehova? Fakamahino.
6 Tou fakakaukauʼi age muʼa ʼe felogoi he kau tagata ʼafeā mo ia ʼae ʼe agahala kae ʼe mole fakahemala ia. ʼI te aluʼaga ʼaia, ʼe fakamavae anai ʼi te kokelekasio. Pea kapau neʼe mole fakalogo ki he lao ʼo te fenua ʼae ʼe maʼuli ai, ʼe mole puipui anai e te kau tagata ʼafeā ia ia mai te ʼu nunuʼa ʼo tana aga ʼaia. ʼE tuku e Sehova ia te kau taki ke natou fakamauʼi pea mo fakatuʼā he tahi pe ʼe mole fakalogo ki he lao, tatau aipe pe ʼe fakahemala peʼe kailoa. (Loma 13:4) Kae kapau ki muli age, ʼe mahino leva neʼe mole lelei te meʼa ʼae neʼe ina fai pea ʼe ina fetogi tana faʼahiga manatu mo tana aga, ʼe lotolelei anai ia Sehova ke fakamolemole ki ai. (Luka 15:17-24) ʼE ina fakamolemole anai maʼia pe neʼe ina fai he ʼu agahala mamafa.—2 Klk. 33:9, 12, 13; 1 Tim. 1:15.
7. Kotea ia te fakaʼuhiga ʼae ke tou fakamolemole ki he tahi neʼe agahala mai kia tatou?
7 ʼE tou fiafia ʼi tatatou iloʼi ʼae ʼe mole ko tatou ʼae ʼe tou filifili pe ʼe fakamolemole anai e Sehova ki he tahi neʼe ina fai he agahala. Pea ka agahala mai he tahi kia tatou, ʼe ʼi ai pe te tonu ʼe tonu ke tou fai. Kotea te tonu ʼaia? Tatau aipe pe neʼe faifakalelei mai ia ia ʼaia peʼe kailoa, kae ʼe feala ke tou filifili ke tou fakamolemole ki ai. Ko tona fakaʼuhiga ke ʼaua naʼa tou toe nofo mo hotatou ita ki ai. ʼE mahino ia, ʼe ʼaoga he temi mo ni faiga ki ai, tafito la moka ʼe ina fakamamahiʼi ʼosi tatou. ʼE ui fenei ʼi Te Tule Leʼo ʼaho 15 ʼo Sepetepeli 1994: “ ʼI takotou fakamolemole ki he tahi neʼe hala atu ʼe mole ko tona fakaʼuhiga ia ʼe kotou fakamolemole ki te agahala. Ki te Kilisitiano ko te fakaʼuhiga ko te fakamolemole ko te tuku ʼaki he falala katoa ia meʼa fuli ki te ʼu nima ʼo Sehova. ʼE ko ia tonu te Tuʼi Fakamau faitotonu ʼo te ʼatulaulau katoa, pea ʼe ina ʼaumai anai te faitotonu ʼi tona lakaga tonu.” He koʼe ʼe kole mai e Sehova ke tou lotofakamolemole pea ke tou tuku ia meʼa fuli ke ina fakamauʼi?
HE KOʼE ʼE KOLE MAI E SEHOVA KE TOU LOTOFAKAMOLEMOLE?
8. Kotea ʼe ina uga anai tatou ke tou fai moka tou lotofakafetaʼi ki te manavaʼofa ʼo Sehova? Fakamahino.
8 Ka tou lotofakamolemole, ʼe tou fakaha ai tatatou lotofakafetaʼi ki te manavaʼofa ʼo Sehova. Neʼe fakaha e Sesu te manatu ʼaia ʼi hana lea fakata. Neʼe ina fakatatau ia Sehova ki he pule ʼe ina molehi he toe maʼua ʼo hana tagata kaugana he neʼe mole feala ke ina huʼi age. Kae neʼe mole manavaʼofa leva te tagata kaugana ʼaia ki te tagata kaugana ʼae neʼe tonu ke ina liufaki age he falā ʼe mole lahi ke feafeaʼi. (Mat. 18:23-35) Kotea te ako maʼa tatou? Kapau ʼe tou lotofakafetaʼi moʼoni ki te manavaʼofa lahi ʼo Sehova ʼe ina fakaha mai kia tatou, ʼe ina uga anai tatou ke tou lotofakamolemole ki ʼihi. (Pes. 103:9) Koʼeni te manatu neʼe ui ʼi he Tule Leʼo kua hili ki ai ni taʼu: “Tatau aipe pe kua tuʼa fia tatatou lotofakamolemole ki ʼihi kae ʼe mole hona ia fakatatau mo te lotofakamolemole ʼae ʼe fakaha mai e te ʼAtua kia tatou takitokotahi ʼo fakatafito ki te sakilifisio ʼo Kilisito.”
9. Ka tou lau ia Mateo 6:14, 15, ko ai ʼae ʼe manavaʼofa ki ai ia Sehova?
9 Ka tou lotofakamolemole ki ʼihi, pea ʼe fakamolemole anai e Sehova. ʼE manavaʼofa ia Sehova kia natou ʼae ʼe manavaʼofa. (Mat. 5:7; Sakp. 2:13) Pea ko te aluʼaga ʼaia neʼe fakaha e Sesu ʼi tana akoʼi ki ʼana tisipulo pe ʼe feafeaʼi hanatou faikole. (Lau ia Mateo 6:14, 15.) Pea neʼe toe fakaha e Sehova te manatu ʼaia ʼi te meʼa ʼae neʼe ina ui kia Sopo ke ina fai. Neʼe mamahi te tagata agatonu ʼaia ʼi te ʼu palalau fefeka ʼa te ʼu tagata ʼe toko tolu ʼaeni ko Elifasi mo Pilitate pea mo Tesofale. Kae neʼe loto e Sehova ke hufakiʼi e Sopo ia natou. ʼI tana ʼosi fai te faʼahi ʼaia, neʼe fakapale ia ia e Sehova.—Sopo 42:8-10.
10. Ka tou lau ia Efeso 4:31, 32, he koʼe ʼe mole lelei ke tou nofo mo hotatou ita ki he tahi?
10 Ka tou nofo mo hotatou ita ki he tahi, ʼe tou fakamamahiʼi pe ia tatou. ʼE hage pe tatatou nofo mo hotatou ita ki he tahi ko he kavega mamafa. Pea ʼe loto e Sehova ke tou liʼaki ke tou logoʼi ai te fimalie. (Lau ia Efeso 4:31, 32.) ʼE ina fai mai te tokoni ʼaeni: “Ke ke tuku te ita, ʼei, ke malū ifo tou ita.” (Pes. 37:8) ʼE ko he aga fakapotopoto ia te muliʼi ʼo te tokoni ʼaia. Koia ka tou nofo mo hotatou ita ki he tahi pea ʼe fakatupu kovi ki totatou maʼuli fakasino pea mo te faʼahi ʼo te fakakaukau. (Taag. 14:30) ʼE hage pe tatatou iita ki he tahi ko hatatou inu he meʼa ʼe kona. ʼE tou fakamamahiʼi pe ia tatou totonu kae ʼe mole ko ia ʼae neʼe agahala kia tatou. Koia ka tou lotofakamolemole ki ʼihi pea ʼe tou maʼuli lelei anai. (Taag. 11:17) ʼE tou logoʼi ai anai te tokalelei ʼo te loto pea mo tou lava hoko atu ia tatatou tauhi kia Sehova.
11. Kotea ʼae ʼe tou ako ia Loma 12:19-21 ʼo ʼuhiga mo te lagavaka?
11 ʼE ʼa Sehova te lagavaka. ʼE mole fakagafua mai e Sehova ke tou lagavaka moka fakamamahiʼi tatou e he tahi. (Lau ia Loma .) ʼE ʼi ai pe te ʼu tuʼakoi ʼo tatatou faʼahiga sio ki he ʼu aluʼaga ʼuhi ko totatou ʼuhiga agahala. Koia ʼe mole feala ai ke tou fakamauʼi he aluʼaga ʼi te faitotonu ohage ko tona fai e te ʼAtua. ( 12:19-21Hep. 4:13) Pea ʼi ʼihi temi, ʼe feala ke mole tou maʼu ia te fakasiosio poto ʼuhi ko te ʼu meʼa ʼae ʼi ʼotatou loto. Neʼe takitaki e Sehova ia Sakopo ke ina tohi fenei: “ ʼE mole fakahoko e te ita ʼo te tagata te faitotonu ʼa te ʼAtua.” (Sakp. 1:20) ʼE tou tui papau ʼe fai anai e Sehova te meʼa ʼae ʼe tonu ke fai pea mo fakahoko anai ia tana faitotonu.
12. ʼE tou fakaha feafeaʼi ʼe tou falala ki te faitotonu ʼa Sehova?
12 Ka tou lotofakamolemole, ʼe tou fakaha ʼe tou falala ki te faitotonu ʼa Sehova. Ka tou tuku ia meʼa fuli kia nima ʼo Sehova pea ʼe tou fakaha ai ʼe tou falala ʼe ina fakatokatoka anai ia mamahi fuli ʼuhi ko te agahala. ʼI te malama foʼou, ‘ ʼe mole tou toe manatuʼi anai ʼotatou mamahi pea ʼe mole toe hake anai ʼi ʼotatou loto.’ (Esa. 65:17) Kae ka fakamamahiʼi ʼosi tatou e he tahi, ʼe feala moʼoni koa ke mole tou toe logoʼi te ita peʼe ke mole tou haga nofo mo hotatou ita? Tou vakaʼi pe neʼe lava tauʼi feafeaʼi e ʼihi ia te aluʼaga ʼaia?
ʼE TOU MAʼU HE ʼU FUA LELEI MOKA ʼE TOU LOTOFAKAMOLEMOLE
13-14. Kotea ʼae ʼe tou ako ʼo ʼuhiga mo te lotofakamolemole mai te faʼifaʼitaki ʼa Tony mo José?
13 Tokolahi ʼotatou tehina mo tuagaʼane neʼe natou fakatotonu ke natou lotofakamolemole logo la neʼe mamahi ʼosi ʼonatou loto ʼuhi ko te ʼu aga ʼa ʼihi. Kotea ia te ʼu fua lelei ʼae neʼe natou maʼu?
14 Ko Tony * ʼe maʼuli ʼi Philippines. Pea ʼi muʼa ʼo tana iloʼi ia te moʼoni, neʼe maʼu logo neʼe matehi tona taʼokete e he tagata ʼe higoa ko José. ʼI te temi ʼaia, neʼe agakovi pea mo agamalohi ia Tony pea neʼe fia lagavaka. Neʼe puke mo pilisoniʼi ia José ʼuhi ko te fakapo ʼae neʼe ina fai. Ki muli age, neʼe mavae leva ʼi te pilisoni pea neʼe fakatotonu e Tony ke ina maʼu ia ia ʼo matehi. Ko te tupuʼaga la ʼaia ʼo tana toʼo he fana. Kae ʼi te temi ʼaia, neʼe ina ako leva te Tohi-Tapu mo te kau Fakamoʼoni ʼa Sehova. ʼE ina fakamatala fenei: “Neʼe tokoni mai taku ako te Tohi-Tapu ke au mahino neʼe ʼi ai te ʼu toe fetogi neʼe tonu ke au fai. Neʼe tonu ke au liʼaki toku loto ita.” Neʼe papitema leva ia Tony pea neʼe fakanofo ia ia ko he tagata ʼafeā. Fakakaukauʼi age muʼa koe, ia tana punamaʼuli ʼae ʼi tana iloʼi neʼe toe liliu mo José ko he Fakamoʼoni ʼa Sehova. ʼI tanā felaveʼi leva, neʼe nā fefaʼufuaʼaki pea neʼe ui age e Tony kia José kua ina fakamolemole age. Neʼe ui e Tony neʼe ina maʼu he toe fiafia lahi ʼi tana fakamolemole ʼae kia José pea ʼe mole hona ia fakatatau. ʼE mahino ia, neʼe tapuakinaʼi e Sehova ia tana faʼahiga manatu.
15-16. Kotea ʼae ʼe tou ako ʼo ʼuhiga mo te lotofakamolemole mai te faʼifaʼitaki ʼa Peter pea mo Sue?
15 ʼI te 1985, neʼe kau ia Peter mo Sue ki he fono pea fokifa pe neʼe paʼulu he foʼi pulu. Neʼe tuku e he tagata he foʼi pulu ʼi te loto Fale Fono. Neʼe lavea kovi ai ia Sue ʼo mole kei lelei ai tana sio pea mo tana logo. * Pea neʼe mole kei ina lava mamanuʼia he meʼa. Neʼe tau feuiʼaki fenei e Peter mo Sue: ‘Ko te taʼi faʼahiga tagata feafeaʼi koa ʼaeni ʼe feala ke ina fai he toe agakovi feia?’ Hili ki ai ni taʼu, neʼe puke mo fakatuʼā ki te pilisoni ia ia ʼae neʼe ina fai te agakovi ʼaia ʼo kaku ki te mate. Ko ia ʼaia neʼe ina fai te agakovi neʼe mole ko he Fakamoʼoni ʼa Sehova. ʼI te fehuʼi age ʼae kia Peter mo Sue pe neʼe kua nā fakamolemole, neʼe nā tali fenei: “ ʼE akoʼi mai e Sehova ka tou iita peʼe nonofo mo hotatou ita ki he tahi pea ʼe fakatupu kovi ki totatou maʼuli fakasino, mo te faʼahi ʼo te loto mo te fakakaukau. Koia, neʼe ma foimo kole kia Sehova ke tokoni mai ke ma tekeʼi te ʼu manatu ʼaia ke hoko atu pe tamā tauhi kia te ia.”
16 Neʼe faigafua koa kia naua ia te lotofakamolemole? Kailoa ia. ʼE nā toe ui fenei: “ ʼI ʼihi temi, ka mamahi ia Sue ʼuhi ko ʼona lavea, ʼe toe hake ia maua te ita. Kae ʼe ma faiga ke mole ma toe manatuʼi te aluʼaga ʼae neʼe hoko pea ʼe puli vave ai toma iita. Koia, ʼe feala pe hamā tala fakahagatonu kapau ʼe liliu anai ʼi he ʼaho ia ia ʼae neʼe ina tuku te foʼi pulu ʼi te loto Fale Fono ko homā tehina, ʼe ma fiafia anai ʼi tona fakatalitali. Neʼe tokoni mai te aluʼaga ʼae neʼe hoko kia maua ke ma mahino ʼe feala ki te ʼu pelesepeto Fakatohi-tapu ke ina fakaʼateainaʼi tatou. ʼEi, ʼe fakaʼateainaʼi ai tatou mai ni ʼu aluʼaga neʼe mole tou ʼamanaki ki ai. ʼE ma toe fiafia ʼi tamā iloʼi ʼae kua vave fakatokatoka e Sehova te ʼu fihifihia fuli.”
17. Kotea ʼae ʼe tou ako ʼo ʼuhiga mo te lotofakamolemole mai te faʼifaʼitaki ʼa Myra?
17 ʼI te liliu leva ʼa Myra ko he Fakamoʼoni ʼa Sehova, neʼe kua ʼohoana pea mo maʼu ʼana fanau ʼe toko lua. Neʼe mole tali e tona ʼohoana ia te moʼoni. Ki muli age, neʼe alu mo he tahi fafine pea neʼe ina liʼaki tona kiʼi famili. ʼE fakamatala fenei e Myra: “ ʼI te alu leva ʼo toku ʼohoana kae neʼe ina liʼaki au mo ʼama tamaliki ʼe toko lua, neʼe au logoʼi te meʼa ʼae ʼe logoʼi e te tokolahi moka kakaʼi natou e he tahi ʼe natou ʼoʼofa ai. Neʼe au punamaʼuli ʼosi, neʼe mole au fia tali te aluʼaga ʼae neʼe hoko. Neʼe au lotomamahi ʼosi mo fakahemala pea mo tukugakoviʼi au pea mo ita.” Logo pe la tana kua ʼosi mavete, kae neʼe kei mamahi pe ia Myra ʼi tona kakaʼi. ʼE ina toe ui fenei: “Neʼe au nofo mo te ʼu manatu ʼaia lolotoga ni mahina pea neʼe au tokagaʼi leva ʼe fakatupu kovi ki ʼaku felogoi mo Sehova pea mo ʼihi.” ʼI te temi nei, ʼe mole kei ita ia Myra ki tona ʼuluaki ʼohoana pea ʼe mole ina loto ke hoko he meʼa kovi kia ia. ʼE fakaʼamu ʼi he ʼaho ke tauhi kia Sehova. Pea kua lava tokaga tafito ki te ʼamanaki taulekaleka ʼi te ka haʼu. Kae neʼe ina taupau tokotahi ʼana fanau pea neʼe ina pusiʼaki naua ʼi te moʼoni. Ia ʼaho nei, ʼe fiafia ʼi te tauhi kia Sehova fakatahi mo ʼana fanau mo ʼonā kiʼi famili.
KO SEHOVA ʼE KO TE TUʼI FAKAMAU ʼAE ʼE HAOHAOA
18. Kotea ʼae ʼe tou tui papau ki ai ʼo ʼuhiga mo Sehova, ia te Tuʼi Fakamau Maʼoluga?
18 ʼE fakalotofimalie tatatou iloʼi ʼae ʼe mole ko tatou ʼae ʼe tou filifili pe ʼe tonu ke tou fakamauʼi feafeaʼi te hahaʼi. ʼE ko Sehova pe ia te Tuʼi Fakamau Maʼoluga ʼae ka tokaga ki te faʼahi ʼaia. (Loma 14:10-12) ʼE tou falala ʼe ina fakahoko tuʼumaʼu anai ia tana fakamau ʼo mulimuli ki ʼana lekula haohaoa ʼo ʼuhiga mo te meʼa ʼae ʼe lelei pea mo ʼae ʼe kovi. (Sen. 18:25; 1 Hau 8:32) ʼE ina fai anai ia meʼa fuli ʼi te faitotonu.
19. Kotea ka fai anai e Sehova ʼuhi ko tana faitotonu?
19 ʼE tou fakatalitali mo he fakaʼamu lahi ki te temi ʼae ʼe molehi anai e Sehova ia te ʼu nunuʼa fuli ʼo te ʼuhiga agahala ʼo te tagata. Koia ʼe pulihi anai ʼo talu ai ʼotatou mamahi fuli ʼi te faʼahi fakasino mo te faʼahi ʼo te loto. (Pes. 72:12-14; Apk. 21:3, 4) ʼE mole tou toe manatuʼi anai. ʼI tatatou fakatalitali ki te temi fakafiafia ʼaia, ʼe tou lotofakafetaʼi kia Sehova he neʼe ina foaki mai ia te fealagia ʼae ke tou faʼifaʼitakiʼi ia ia pea mo fakamolemole ki ʼihi.
KATIKO 18 Fakafetaʼi Ki Te Totogi
^ ʼE lotofakamolemole tuʼumaʼu ia Sehova kia ia ʼae neʼe agahala pea mo fakahemala. ʼI totatou ʼuhiga Kilisitiano, ʼe tou fia muliʼi ia tana faʼifaʼitaki pea mo fakamolemole kia natou ʼae ʼe natou fakamamahiʼi tatou. ʼI te alatike ʼaeni, ʼe tou vakaʼi ai anai he ʼu agahala ʼe feala ke tou fakalaka ai kae ʼe ʼi ai leva ʼihi ʼe tonu ke tou fakaha ki te kau tagata ʼafeā. ʼE tou toe vakaʼi anai pe koʼe ʼe loto e Sehova ke tou fefakamolemoleʼaki pea mo te ʼu fua lelei ʼe tou maʼu mai ai.
^ Vakaʼi Te Tule Leʼo ʼaho 15 ʼo Apelili 1996 “Te ’u Fehu’i ’a Te Kau Lautohi.”
^ Ko ʼihi higoa neʼe fetogi.
^ Vakaʼi te Réveillez-vous ! ʼaho 8 ʼo Sanualio 1992, p. 9-13. Pea toe vakaʼi te ʼata viteo ʼi te Televisio JW ko tona kupu tafito Peter et Sue Schulz: Un traumatisme peut être surmonté.