1. Ino toky amezany Jehovah olo panota mibebaka?

 JEHOVAH tsy raha Pamôron̈o, Pan̈amia lalàn̈a, ndreky Pitsara fo fa, izy koa Baba be fitiavan̈a. (Sal. 100:3; Isaia 33:22) Izikoa atsika manota ke ten̈a mibebaka, izy tsy basiny mahavita man̈ambela hadisovan̈antsika fo fa izy koa vôn̈ono han̈ano zen̈y. (Sal. 86:5) Nampiasa paminan̈y Isaia izy han̈amezan̈a toky atsika karaha ty: “Ndray mena dà fahotan̈anaro, hataoko fotsy mangatsakatsaka karaha lanezy.”​—Isaia 1:18.

2. Izikoa tiantsika ho tsara fihavanan̈a aminolo, ino raha tsy maintsy ataontsika?

² Atsika jiaby io samby mety hivolan̈a na han̈ano raha halanolo, fotony atsika tsy lavorary. (Jak. 3:2) Zen̈y ma mivolan̈a fa atsika tsy mety hanjary kamaradindro marikitry? Aha. Ho vitantsika hinaman̈a amindro izikoa atsika mahay man̈ambela hadisovan̈a. (Ohab. 17:9; 19:11; Mat. 18:21, 22) Izikoa nisy olo nivolan̈a na nan̈ano raha hely nampalahelo atsika, ravoravo Jehovah izikoa atsika man̈ambela hadisovan̈a. (Kol. 3:13) Ndray Jehovah fo vôn̈ono han̈ambela hadisovan̈antsika! Ary izy koa fa man̈ano zen̈y, ninany tsisy arakaraka.​—Isaia 55:7.

3. Ino ma raha hidinihintsika ato?

³ Akory havitanolombelon̈o tsy lavorary han̈ambela hadisovan̈a, karaha ataony Jehovah. Fahotan̈a karakory ma tsy maintsy koran̈intsika aminy antipan̈ahy? Nan̈ino Jehovah mampirisiky atsika han̈ambela hadisovan̈a? Baka io ino raha ianarantsika baka amy piaramanompo nijaly mare baka tamy raha ratsy nataonolo hafa? Zen̈y raha hidinihintsika iziô.

4. a) Izikoa misy panompony Jehovah man̈ano fahotan̈a maventy, ino raha tsy maintsy ataony? b) Ino andraikitriny antipan̈ahy izikoa iro efa mitraotro aminolo araiky nanota?

⁴ Izikoa fa misy olo man̈ano fahotan̈a maventy, atsika tsy maintsy mikoran̈a aminy antipan̈ahy. Sasany amy fahotan̈a maventy aby zen̈y hita amy 1 Korintianina 6:9, 10. Man̈ano fahotan̈a maventy olo araiky izikoa izy kinia mandika lalàn̈any Zan̈ahary. Ke izikoa Kristianin̈y araiky nan̈ano fahotan̈a maventy, izy tsy maintsy man̈aton̈o Jehovah Zan̈ahary amy vavaka. Koa fa vita zen̈y, tsy maintsy koran̈iny aminy antipan̈ahiny fiangonan̈a koa raha nataony. (Sal. 32:5; Jak. 5:14) Marin̈y fa Jehovah zaraiky fo manan̈a fahifan̈a han̈ambela amy fomba feno hadisovan̈antsika, ary izy lastio efa nan̈amia vidipan̈avotan̈a. b Ndray zen̈y, misy andraikitry ankin̈iny Jehovah aminy antipan̈ahy. Anjarandro mandiniky izikoa olo araiky nanota io mbala mety adôko ho an̈isany fiangonan̈a, mifan̈araka amy toro lalan̈any Baiboly. (1 Kor. 5:12) Ty koa raha hafa mila dinihindro: Izio ma ten̈a kinianolo io nanota? Nasitriny taminolo ma fahotan̈anany io? Tan̈atiny fotoan̈a lava ma izy nan̈ano izio? Fa ny raha ten̈a maventy, hita amy raha ataony ma fa ten̈a mibebaka izy? Ino porofo ahitan̈a fa efa nambelany Jehovah fahotan̈anany?​—Asa. 3:19.

5. Ino aby hatsaran̈a azontsika baka aminy asany antipan̈ahy?

⁵ Ino ma ten̈a tanjon̈ony antipan̈ahy izikoa fa misy olo nan̈ano fahotan̈a? Ataondro raha hahavy fanapahankevitrindro ambony tany eto hitovy amy niny Jehovah andan̈itry an̈y. (Mat. 18:18) Nan̈ino ma raha zen̈y mahatsara fiangonan̈a? Fotony izikoa panota tsy mibebaka io adoso tsy ho an̈isany fiangonan̈a, ho voaro ondrikondrikiny Jehovah. (1 Kor. 5:6, 7, 11-13; Tit. 3:10, 11) Tiany baka iro io! Fandroasan̈a io koa han̈ampy olo nanota io hibebaka ndreky hahazo familankeloko baka amy Jehovah. (Lioka 5:32) Iro antipan̈ahy aby io hivavaka momba olo nibebaka io, beky Jehovah han̈ampy izy hihavan̈a tsara aminany ndraiky.​—Jak. 5:15.

6. Izikoa olo araiky voaroaka, mety mbala hahazo familankelokony Jehovah fo ma izy? Hazavà.

⁶ Akory ndraiky izikoa olo io tsy mibebaka, lera antipan̈ahy mitraotro aminany? Izikoa zen̈y ny raha mandalo, ho voaroaka tsy ho an̈isany fiangonan̈a izy. Izikoa izy nandika lalàn̈any fanjakan̈a, ohatra namono olo, antipan̈ahy tsy hiaro izy amy vokadratsiny raha ratsy nataony. Jehovah man̈ambela manampahifan̈a hitsara ndreky han̈asazy zay olo nandika lalàn̈a, na mibebaka izy na tsy mibebaka. (Rom. 13:4) Izikoa olo io tontohitry fa ratsy ankitin̈y raha nataony, ke mibebaka izy avio miova, Jehovah vôn̈ono han̈ambela hadisovan̈anany. (Lioka 15:17-24) Mbala zen̈y fo ny raha ho hisy ndray maventy karakory fahotan̈ananolo io.​—2 Tan. 33:9, 12, 13; 1 Tim. 1:15.

7. Karakory ma man̈ambela hadisovan̈a zen̈y?

⁷ Mahivankivan̈a atsika mahay fa tsy anjarantsika manapakevitry izikoa olo araiky nanota vain̈y hahazo familankelokony Jehovah. Ndray zen̈y, mbala misy fanapahankevitry mety ataontsika fo. Diniha baka ty: Mety nisy olo iziô nan̈ano raha ten̈a ratsy taminao. Mety hiala tsin̈y aminao izy avio hangataka azafady aminao. Fa karakory ndraiky izikoa izy tsy miala tsin̈y aminao foeky? Anao mbala mety man̈ambela hadisovan̈anany fo ndreky mifidy tsy ho meloko aminany na tsy hikisasy izy. Mety hitaky fotoan̈a ndreky ezaka raha zen̈y, intsaka eky izikoa ten̈a namparary fônao raha nataony. Karaha ty koran̈iny Tilikambo  Fiambesan̈a tamy 15 Septambra 1994: “Tsy midika anao man̈ambela hadisovan̈anolo araiky nanota ke mankamora na milefitry amy raha nataony. Amintsika Kristianin̈y, dikany man̈ambela hadisovan̈a zen̈y matoky Jehovah ke man̈apetraka izio ampelantan̈anany. Jehovah Pitsara marin̈y amy raha jiaby, ke tsy maintsy han̈ano raha fo izy hazahoanao ny rariny, amy fotoan̈a hitany fa mety.” Nan̈ino Jehovah mampirisiky atsika han̈ambela hadisovan̈a ndreky han̈apetraka raha nampalahelo atsika ampelantan̈ananany?

8. Izikoa atsika mankasitraka famindrampôny Jehovah, ino raha tokony hataontsika?

⁸ Mahay mankasitraka atsika izikoa fa man̈ambela hadisovan̈a. Tamy fan̈oharan̈a araiky, Jehovah nampitovisiny Jesosy tamy panjaka araiky. Nisy panompo nanan̈any panjaka io trosa, kanefa nambelany panjaka io raha zen̈y fotony tsy avoaefany panomponany. Ndray panompo io namindràn̈a fô karaha zen̈y, izy tsy nahinakinaka panompo hafa nanan̈any trosa foeky. Kanefa trosany panompo hafa io tsisy dikany foeky izikoa ampiran̈iny amy ninany. (Mat. 18:23-35) Ino raha tiany Jesosy havian̈a? Jehovah mamindra fô amintsika, ke izikoa atsika mankasitraka famindrampônany, atsika vôn̈ono han̈ambela hadisovan̈anolo koa. (Sal. 103:9) Taon̈o maro lôso zay, nisy Tilikambo Fiambesan̈a nan̈azava karaha ty: “Ndray efa matetiky atsika man̈ambela hadisovan̈anolo, zen̈y mbala tsisy dikany izikoa ampitovisin̈y amy familankeloko ndreky famindrampô aboakany Jehovah amintsika, miôrin̈y amy sôron̈o nataony Kristy.”

9. Aminjovy Jehovah mamindra fô? (Matio 6:14, 15)

⁹ Lan̈iany man̈ambela hadisovan̈a fo hahazo familankeloko. Jehovah mamindra fô aminolo mamindra fô. (Mat. 5:7; Jak. 2:13) Nataony Jesosy mazava tsarabe raha zen̈y taminizy nampianatra pianatranany hivavaka. (Vakia Matio 6:14, 15.) Mitovitovy amy zen̈y hevitry tiany Jehovah nampitain̈a tamy Joba, panomponany tsy nivadiky. Nan̈ano raha namparary fôny Joba i Elifaza, Bildada, avio Zofara. Kanefa Jehovah nan̈iraka Joba hivavaka nindro telo lahy io. Koa fa vitany Joba raha zen̈y, Jehovah nitahy izy.​—Joba 42:8-10.

10. Nan̈ino atsika mivolan̈a fa mandraora mantsilan̈y atsika izikoa mitana heloko ampô? (Efesianina 4:31, 32)

¹⁰ Mandraora mantsilan̈y zay olo mitana heloko ampô. Tiany Jehovah hahivankivan̈a atsika, ke zen̈y mahavy izy man̈iraka atsika tsy hitana heloko ampô. (Vakia Efesianina 4:31, 32.) Ho izy: ‘Ialà heloko avio aza meloko mifaotafaota eky.’ (Sal. 37:8) Misy jery atsika izikoa man̈araka torohevitry io. Izikoa atsika tsy vôly meloko aminolo araiky, atsika harary avio hijaly koa eritreritrintsika. (Ohab. 14:30) Aza adin̈a fa anao fo ho voa fa tsy olo anan̈anao alahelo io. Izio miran̈a olo araiky migiaka poàzon in̈y. Izy fo ho voa na hofoaty fa tsy olo hafa. Fa anao ndraiky koa man̈ambela hadisovan̈a, anao miran̈a man̈amia kadô ain̈inao. (Ohab. 11:17) Hilamin̈y jerinao ndreky fônao, avio anao hahavita hanompo Jehovah fo.

11. Izikoa Baiboly zahan̈a, mety ma mamaly faty? (Romanina 12:19-21)

¹¹ Ambilà Jehovah hamaly izy. Atsika tsy namezany Jehovah fahifan̈a hamaly faty. (Vakia Romanina 12:19-21.) Voafetra raha mety ho takatrany jerintsika olombelon̈o tsy lavorary, ke tsy honohono hitovy amy fomba fitsaràny Jehovah foeky fomba fitsarantsika olo. (Heb. 4:13) Ndraikindraiky koa, mety tsy ho haintsika aby raha ten̈a tokony hataontsika, fotony atsika mora hindesimpô. Karaha ty raha nampanoratiny Jehovah i Jakoba: “Olo araiky koa meloko, izy tsy hahavita han̈ano ny  marin̈y man̈oloan̈a Zan̈ahary.” (Jak. 1:20) Ny raha azontsika antoko, Jehovah tsy maintsy han̈ano ny marin̈y ndreky ny rariny fo.

12. Akory han̈aboahantsika fa matoky fan̈anaovany Jehovah ny rariny atsika?

¹² Matoky fan̈anaovany Jehovah ny rariny atsika izikoa man̈ambela hadisovan̈a. Man̈apetraka raha ampelantan̈any Jehovah atsika izikoa man̈ambela hadisovan̈a. Zen̈y koa ahitan̈a fa, atokisantsika fampan̈antinan̈anany han̈adoso raha ratsy jiaby vokatrany fahotan̈a. Lera atsika miain̈y amy donia vaovao an̈y, ‘tsy ho azontsika onon̈o eky sady tsy handreraka fôntsika’ raha jiaby mampalahelo atsika amy zioty. (Isaia 65:17) Ke izikoa nisy olo nandratra fônao, akory hahavy anao tsy ho meloko na tsy hitana heloko ampô? Hizaha tantaranolo sasany nahavita zen̈y atsika.

13-14. Amy karakory ma tantarany Tony ndreky José mampianatra anao han̈ambela hadisovan̈a?

¹³ Maro amy piaramanompo amintsika nifidy han̈ambela hadisovan̈a, ndray namparary fôndro raha nataonolo tamindro. Ino hatsaran̈a nazondro vokatranizen̈y?

¹⁴ Mipetraka a Philippines i Tony. c Taon̈o maro talohanizy nanjary Vavolombelon̈o Jehovah, hainy azovy olo namono araiky tamy zokilahiny. José an̈aran̈any lelahy io. Mora meloko sady kafiry mare i Tony tamy zen̈y, ke hamaly faty fo tan̈atiny jerinany. Nigadra i José in̈y fotony namono olo. Fa izikoa fa tapitry sazinany, nan̈ano vava i Tony fa tsy maintsy hitsakarehany avio hivoneny i José. Nivanga basy foeky izy. Tamy fotoan̈anizen̈y, nanomboko nianatra Baiboly tamy Vavolombelon̈o Jehovah i Tony. Ho izy: “Izikoa fa lôso lavitry fianaran̈anay, tontohitry zaho fa nila niova, ke tsy tokony ho meloko amy José eky.” Natao batisa i Tony, avio nanjary antipan̈ahy tafara tatỳ. Miniminia hely baka halaniampan̈ahinany taminizy nahita i José. Kaiky José koa efa nanjary panompony Jehovah vita batisa. Iro koa fa nitraotro, iro nifampitolon̈o, avio Tony nivolan̈a tamy José fa nambelany hadisovan̈anany. Nivolan̈a i Tony fa ravoravo mare izy koa fa nifidy han̈ambela hadisovan̈a. Tsy hainy foeky mivolan̈a haravoan̈anany. Jehovah nitahy i Tony fotony izy vôn̈ono han̈ambela hadisovan̈a.

15-16. Amy karakory ma tantarany Peter ndreky Sue mampianatra anao han̈ambela hadisovan̈a?

 ¹⁵ Tandraraiky, nandeha nivory tamy Tran̈o Fivorian̈a i Peter ndreky Sue, tamy 1985. Tiô fo, nisy raha nipaofaka. Kaiky nisy lelahy nanitriky baomby tamy Tran̈o Fivorian̈a io. Naratra mare i Sue, ke nanjary tsy nahita tsara eky izy sady tsy naharen̈y tsara. Nanjary tsy naharen̈y fôfokondraha koa ôron̈onany. d Matetiky iro roe fivadiany man̈ontany ten̈a karaha ty: ‘Mba olo karakory loatra mahavita raha tsy manjary karaha in̈y?’ Taon̈o maro tafara, takatra lelahy nan̈apetraka baomby io ke nigadra. Tsy panompony Jehovah lelahy io. Izikoa fa nan̈ontanian̈a iro izikoa nan̈ambela hadisovan̈any lelahy io va karakory, karaha ty ho iro: “Jehovah mampianatra atsika fa tsy tokony hitana heloko aminolo na hamaly faty atsika, fotony ho hisy vokany ratsy aminy ain̈intsika, amy fôntsika ndreky sain̈intsika raha zen̈y. Ke tsy ela tafarany baomby niklaty in̈y, direkty zahay nivavaka baka Jehovah han̈ampy zahay han̈ambela hadisovan̈a ndreky hanohy fiain̈ananay.”

¹⁶ Ndray zen̈y, tsy nora tamy Peter ndreky Sue namela heloko. Karaha ty ho iro: “Ndraikindraiky, nijaly mare i Sue nohony bay be nahazo izy io, ke nisy vokany tamy fiain̈ananay raha zen̈y. Marary mare fônay. Fa niezaka fo zahay tsy hifantoko be loatra amy zen̈y, ke niala tsihelihely helokonay. Zahay iziô masaky mivolan̈a fa izikoa lelahy nan̈apetraka baomby in̈y manjary rahalahintsika andra araiky an̈y, vôn̈ono zahay handray izy. Raha niain̈anay in̈y nampianatra zahay fa toro lalan̈a amy Baiboly ten̈a mankafaka atsika; ia, mankafaka atsika amy fomba isankarazany, mihoatrany raha iritriretintsika! Mankahery zahay koa mahay fa Jehovah mbala han̈adoso takaitry jiaby vokatrany raha nandalo taminay in̈y.”

17. Amy karakory ma tantarany Myra io mampianatra anao han̈ambela hadisovan̈a?

¹⁷ Efa nanambady i Myra taminizy nianatra fahamarin̈ana. Aroe lahy zanakandro. Vadiny  Myra ndraiky tsiary nan̈eky fahamarin̈ana. Koa fa nandeha fotoan̈a, ramosenany nandiandia izy, avio niala tokantran̈o. Ho Myra: “Ramoseko koa fa niala zahay telo mianaka, nanjary tsapako raha tsapanolo voafitakanolo tian̈a. Zaho salakady taitry, tsy nino, nalahelo, nanen̈iny, nan̈ameloten̈a, avio neloko.” Ndray vita tiô vadian̈andro, mbala malahelo fo i Myra fotony vadiny nivadiky taminany. Karaha ty koa ho izy: “Tan̈atiny fanjava fanjava, nialamboetry fônaka. Tontohitry zaho baka tiô fa nisy vokany tamy fifandraisako tamy Jehovah ndreky taminolo hafa raha zen̈y.” Nivolan̈a i Myra fa, efa tsy meloko amy vadiny taloha in̈y eky izy, sady tsy mijôro raha ratsy ho avy aminany. Man̈anten̈a izy fa andra araiky an̈y lelahy io mbala han̈aton̈o Jehovah fo. Niezaka fo i Myra hifantoko aminy hoavy. Izy zaraiky fo nitarimy zanany aroe lahy, sady nan̈ampy iro hanjary panompony Jehovah. Iziô i Myra ravoravo mare manompo Jehovah miaraka amindro zanany aby io ndreky vady amanjanakandro.

18. Ino raha atokisantsika fa hataony Jehovah, Pitsara Farany An̈abo?

¹⁸ Iziô milamin̈y sain̈intsika, fotony haintsika fa tsy anjarantsika manapaka karakory fomba tokony hitsarain̈a olo araiky. Andraikitriny Jehovah han̈ano asa maventy io, fotony izy Pitsara Farany An̈abo. (Rom. 14:10-12) Matoky amy fô jiaby atsika, fa izy koa fa hitsara, tsy maintsy hataony mifan̈araka amy fitsipikinany lavorary momba ny tsara ndreky ratsy raha zen̈y. (Gen. 18:25; 1 Mpanj. 8:32) San̈atria izy han̈ano raha tsy rarin̈y!

19. Jehovah koa fa han̈ano ny rariny, han̈ano akory fiain̈ana?

¹⁹ Efa tsy din̈intsika fotoan̈a han̈adosoany Jehovah raha ratsy jiaby vokatrany tsy fahalavorarian̈a ndreky fahotan̈a. Amy leranizen̈y, raha jiaby nandratra ain̈intsika ndreky fôntsika tsy ho hisy eky. (Sal. 72:12-14; Apok. 21:3, 4) Tsy himpody amy jerintsika eky raha aby zen̈y. Parpaviany raha tsara ho avy zen̈y, ravoravo atsika fotony atsika nataony Jehovah mahay man̈ambela hadisovan̈a karaha izy.