1. Ana Yehofa akwasimichisya chichi ŵandu ŵakulemwa ŵapitikwiche mtima?

 ATAMOSE kuti Yehofa ni juŵatupanganyisye, jwakusatupa malamusi, soni jwakulamula, jwalakwe alisoni Atati ŵetu ŵachinonyelo. (Sal. 100:3; Yes. 33:22) Patumlemwechesye ni kupitikuka mtima yisyesyene, jwalakwe akwete udindo wakutukululuchila nambosoni akusasachilila kutenda yeleyo. (Sal. 86:5) Kupitila mwa jwakulochesya Yesaya, Yehofa jwatusimichisye kuti, “Mŵele ŵachejewu ligongo lya ulemwa wenu, nambo une tinjimchapa, nipo timchiŵa ŵaswela kuti mbee.”—Yes. 1:18.

2. Ana tukusosekwa kutenda chichi naga tukusaka kuŵa pamtendele ni ŵane?

² Ligongo lyakuti tuli ŵangali umlama, tukusaŵecheta soni kutenda yindu yakwakuŵasya ŵane. (Yak. 3:2) Nambo yeleyi ngayikugopolela kuti yili yangakomboleka kuŵasoni paunasi wambone ni jemanjaji. Yeleyi mpaka yikomboleche naga tukulijiganya kwakululuchila ŵane. (Mis. 17:9; 19:11; Mat. 18:21, 22) Naga ŵane atukuŵesye pa yindu yamnono, Yehofa akusasaka kuti twakululuchileje. (Akolo. 3:13) Kusala yisyene tukwete magongo gambone gakutendela yeleyi. Nambo kupunda yosope Yehofa chachitukululuchila “mnope.”—Yes. 55:7.

3. Ana chitukambilane chichi munganiji?

³ Munganiji chitukambilane yampaka atende ŵandu ŵangali umlama kuti asyasyeje ndamo ja Yehofa jakululuchila. Chitupatesoni kwanga kwa yiwusyo yakuyichisyayi. Ana yakulemwa yapi yatukusasosekwa kwasalila achakulungwa ŵa mumpingo? Ligongo chichi Yehofa akusatulimbikasya kwakululuchila ŵane? Ana mpaka tulijiganye chichi kwa Aklistu achimjetu ŵaŵasimene ni yakusawusya ligongo lya yakulemwa ya ŵane?

4. (a) Ana jwakutumichila jwa Yehofa akusosekwa kutenda chichi patesile chakulemwa chekulungwa? (b) Ana achakulungwa ŵa mumpingo akusakola udindo wamtuli pasimene ni mundu jwatesile chakulemwa?

⁴ Tukusasosekwa kwasalila achakulungwa ŵa mumpingo mundu jwine patesile chakulemwa chekulungwa. Yine mwa yisyasyo ya yakulemwa yeleyi yikusasimanikwa pa 1 Akolinto 6:9, 10. Yakulemwa yine yili yakusakala mnope, soni yikusatindana ni malamusi ga Mlungu. Naga Mklistu atesile yakulemwa mpela yeleyi, akusasosekwa kupopela kwa Yehofa kuti amkululuchile soni kuja kwasalila achakulungwa ŵa mumpingo. (Sal. 32:5; Yak. 5:14) Ana achakulungwa ŵa mumpingo akusakola udindo wamtuli? Yehofape ni jwakwete udindo wakumkululuchila mundu jwalemwisye, yeleyi yikusakomboleka ligongo lya mbopesi ja Yesu. b Nambope, Yehofa apeleche udindo kwa achakulungwa ŵa mumpingo wakumanyilila naga mundu jwakulemwa akusosekwa kumtyosya mumpingo kapena iyayi. Jemanjaji akusatenda yeleyi pakamulichisya masengo Malemba. (1 Akoli. 5:12) Chimo mwa yindu yakusatendaga jemanjaji kuti yeleyi yikomboleche chili kupata kwanga kwa yiwusyo yakuyichisyayi. Ana chakulemwacho jwatesile mwamele? Ana jwatesile kukosechela kuti atende chakulemwacho? Ana chakulemwacho jwatesile kwandaŵi jelewu mnope? Ana pana maumboni gakulosya kuti apitikwiche mtima yisyesyene? Ana pana maumboni gakulosya kuti Yehofa amkululuchile jwakulemwajo?—Mase. 3:19.

5. Ana yakusatenda achakulungwa pasimene ni mundu jwatesile chakulemwa yikusakamuchisya chamtuli?

⁵ Achakulungwa ŵa mumpingo pasimene ni mundu jwatesile chakulemwa, chakulinga chawo chikusaŵa chakuti yachasagule yikamulane ni nganisyo sya Mlungu. (Mat. 18:18) Ana mpingo ukusapindula chamtuli ni dongosolo jeleji? Yikusakamuchisya kuti mundu jwatesile chakulemwa jwele ngakupitikuka mtima atyosyedwe mumpingo, ligongo mpaka asokonasye ngondolo sya Yehofa. (1 Akoli. 5:6, 7, 11-13; Tit. 3:10, 11) Yikusakamuchisyasoni kuti jwakulemwajo apitikuche mtima soni kuti Yehofa amkululuchile yakulemwa yakwe. (Luk. 5:32) Achakulungwa ŵa mumpingo akusamŵenda Yehofa kuti amkamuchisye mundu jwapitikwiche mtima kuti aŵesoni paunasi ni Yehofajo.—Yak. 5:15.

6. Ana mundu jwatyosyedwe mumpingo, mpaka yikomboleche kuti Yehofa amkululuchile? Alondesye.

⁶ Tuwanichisye kuti mundu jwatesile chakulemwa ngakupitikuka mtima panyuma pakuti achakulungwa amkamuchisye. Mundu jweleju akusasosekwa kumtyosya mumpingo. Nambosoni naga mundujo akasile malamusi ga boma, achakulungwa ŵa mumpingo ŵangatenda chilichose pakusaka kumchenjela. Yehofa akusagakunda maboma kuti gamlamule soni kumpa chilango mundu jwalijose jwakasile malamusi. Ŵabomaŵa akusatenda yeleyi chinga mundujo apitikwiche mtima kapena iyayi. (Alo. 13:4) Nambo naga mundu amanyilile kuti jwatesile chakulemwa ni apitikwiche mtima yisyesyene mwakuchenga kaganisye soni ndamo syakwe, Yehofa akusamkululuchila mundujo. (Luk. 15:17-24) Yeleyi yikusakomboleka atamose yili mkuti jwatesile chakulemwa chekulungwa mnope.—2 Mbi. 33:9, 12, 13; 1 Tim. 1:15.

7. Ana litala line lyapi lyampaka tumkululuchile mundu jwatulemwechesye?

⁷ Kusala yisyene, yili yakusangalasya kumanyilila kuti nganitukola udindo wakusagula naga Yehofa chachimkululuchila mundu jwatesile chakulemwa. Atamose yili myoyo, pana chindu chine champaka tusagule. Ana chindu chelechi chili chichi? Tuwanichisye kuti mundu jwine atulemwechesye. Kombolekasoni kuti chakulemwacho chili chekulungwa, kaneko akutupepesya ni chakulinga chakuti tumkululuchile. Tuwanichisyesoni kuti mundu jwatuleŵeleju ngakusaka kupepesya kuti  tumkululuchile. Atamose yili myoyo, mpaka tusagule kumkululuchila ni kuyiliŵalila yakulemwa yakweyo soni ngamsunjila chakulukosi. Kusala yisyene, kutenda yeleyi mpaka kuŵe kwakusawusya mnopemnope naga yajwatesile mundujo yatupweteche mnope. Sanja ja Mlonda ja Sepetemba 15, 1994, jatite, “Naga tusagwile kumkululuchila mundu jwatulemwechesye, yangagopolelaga kuti tukunandiya chakulemwacho. Mklistu jwakusiŵakululuchila ŵane akusakulupilila kuti Yehofa ni jwampaka amasye nganijo chenene. Yehofa ali Jwakulamula jwachilungamo kwinani soni pachilambo chapasi, mwamti jwalakwe akusalolechesya kuti chilungamo chitendekwe pandaŵi jakwe.” Ligongo chichi Yehofa akusatulimbikasya kuti twakululuchileje ŵane soni kuleka nganijo mmyala mwakwe tuli mkukulupilila kuti jwalakwe chachijimasya chenene?

8. Ana kwakululuchila ŵane kukusalosya chamtuli kuyamichila chanasa chakusatulosya Yehofa?

⁸ Kwakululuchila ŵane kukusalosya kuyamichila. Mu chiwanichisyo chine, Yesu jwamlandenye Yehofa ni mundu jwine juŵamkululuchile jwamasengo jwakwe ngongole jekulungwa janganakombolaga kuwusya. Nambo jwamasengo juŵakululuchidweju, ŵalepele kumtendela chanasa jwamasengo mjakwe juŵakongwele mbiya syamnono. (Mat. 18:23-35) Ana Yesu akutujiganya chichi pa chiwanichisyochi? Naga tukusayamichila ni mtima wosope chanasa chekulungwa chakusatulosya Yehofa, yichitutendekasya kuti twakululuchileje ŵane. (Sal. 103:9) Yaka yipiteyo Sanja ja Mlonda jine jasasile kuti, “Chinga tuŵele tuli mkwakululuchila ŵane kwa ndaŵi jelewu chamtuli, yeleyo nganiyiŵa yilandene ni chanasa chiŵatulosisye Mlungu pakutukululuchila kupitila mu mbopesi ja Klistu.”

9. Ana Yehofa akusiŵalosya chanasa ŵandu ŵapi? (Mateyu 6:14, 15)

⁹ Ŵandu ŵakusiŵakululuchila ŵane nombenawo chachikululuchidwa. Yehofa akusiŵalosya chanasa ŵandu ŵakusiŵatendela chanasa ŵane. (Mat. 5:7; Yak. 2:13) Yesu ŵatukamuchisye kupikanichisya mfundo jeleji paŵajiganyaga ŵakumkuya ŵakwe mwampaka apopelele. (Aŵalanje Mateyu 6:14, 15.) Mkaniyitendekwe yeleyi, Yehofa jwasasile mfundo jakulandana ni jeleji kwa jwakutumichila jwakwe Yobu. Mundu jwakulupichikaju jwatengwiche mnope ni maloŵe gakupweteka gaŵamŵechetele achimjakwe ŵatatu. Achimjakweŵa ŵaliji Elifasi, Bilidadi soni Sofali. Nambope, Yehofa ŵamsalile Yobu kuti ŵapopelele achimjakweŵa. Yobu pajwatesile yeleyi, Yehofa ŵampele upile.—Yob. 42:8-10.

10. Ana kusunga chakulukosi kuli kwakogoya chamtuli?

¹⁰ Kusunga chakulukosi kukusatupweteka jika. Yehofa akusasaka kuti tukalagasikaga nganisyo ligongo lyakusunga chakulukosi. (Aŵalanje Aefeso 4:31, 32.) Jwalakwe akusatulimbikasya kuti, “Mkapya mtima ni kutumbila; mkayitenda kose yeleyi.” (Sal. 37:8) Kukuya malangiso gelega kuchitukamuchisya mnope. Kusunga chakulukosi mpaka kujonanje chilu soni nganisyo syetu. (Mis. 14:30) Nambosoni naga tukumtumbilila mundu jwatukuŵesye tukusalipweteka achimsyewe. Yeleyi mpaka yilandane ni kumwa poyisoni ni chakulinga chakuti awe mundu jwine, yayili yangakomboleka. Nambo naga tukwakululuchila ŵane yikusatukamuchisya achimsyewe. (Mis. 11:17) Tukusapata mtendele wa mumtima nambosoni tukusamtumichila Yehofa mwakusangalala.

11. Ana Baibulo jikusasala yamtuli pangani ja kuwuchisya yakusakala? (Aloma 12:19-21)

¹¹ Kuwuchisya kuli kwa Yehofa. Yehofa nganatupa udindo wakwawuchisya ŵane patulemwechesye. (Aŵalanje Aloma 12:19-21.) Nganituŵa tukombwele kumasya ngani mpela  mwakusatendela Mlungu, ligongo ngatukusamanyilila yejinji soni tuli ŵangali umlama. (Aheb. 4:13) Nambosoni ndaŵi sine, mwatukupikanila mumtima mpaka yitutendekasye kuyiwona yindu mwakulemwecheka. Yehofa ŵamsalile Yakobo kulemba kuti, “Lutumbilo lwa mundu ngapakombola kumtendekasya mundu kuŵa jwakulungama.” (Yak. 1:20) Tuŵeje ŵakusimichisya kuti Yehofa chachitenda yindu mwachilungamo soni pandaŵi jakwe.

12. Ana mpaka tulosye chamtuli kuti tukusadalila chilungamo cha Yehofa?

¹² Kwakululuchila ŵane kukusalosya kuti tukudalila chilungamo cha Yehofa. Patukuleka ngani mmyala mwa Yehofa, tukusalosya kuti tukusakulupilila yakuti jwalakwe chachimasya yakusawusya yosope yayikusayika ligongo lya ulemwa. Jwalakwe jwasasile kuti m’chilambo chasambano yakupweteka yosope ‘ngasituyikumbuchilasoni, tiyichiliŵalichika nditu.’ (Yes. 65:17) Nambo naga yikutupweteka mnope mumtima, ana yili yakomboleka kuti tukatumbila soni kusunga chakulukosi? Kwende tukambilane yisyasyo ya ŵandu ŵane ŵaŵakombwele kutenda yeleyi.

13-14. Ana ngani ja Tony ni José jajiganyisye chichi pakwamba ya kwakululuchila ŵane?

¹³ Abale ni alongo ŵetu ŵane ŵasagwile kwakululuchila ŵandu ŵane atamose kuti ŵatendelele yindu yakupweteka mnope. Ana jemanjaji ŵapatile upile wamtuli ligongo lyakutenda yeleyi?

¹⁴ Tony, c jwakusatama ku Philippines, jwayikopochele kuti mkulugwe jwine jwawulajidwe ni mundu jwine lina lyakwe José. Yeleyi yatendekwe yaka yejinji munyumamo Tony mkanaŵe kulijiganya usyesyene. Pandaŵiji jwalakwe jwaliji jwachiwawa, mwamti jwalinganyisye yakuwuchisya. José jwaŵichidwe mundende ligongo lya magambo gaŵapalamwilego. Kaneko, José paŵamkopwesye mundende, Tony jwasimichisye kuti pachampatepo chamwulaje. Mwamti jwayikene pakusuma uti. Kaneko Tony jwatandite kulijiganya Baibulo ni ŵa Mboni sya Yehofa. Jwalakwe jwatite, “Kulijiganya Baibulo kwangamuchisye kumanyilila kuti ngusosekwa kuchenga ndamo syangu, yeleyi yapwatikagapo kuleka kutumbila.” Pali papitile ndaŵi Tony  jwabatisidwe, mwamti kaneko jwaŵele jwamkulungwa jwa mumpingo. Ngatukukayichila kuti Tony jwasimonjile mnope pajwayimanyi kuti José ali jwakutumichila jwa Yehofa jwam’batisidwe. Ŵaŵiliŵa paŵasimene ŵasangalele mnope soni kumbatilana, mwamti Tony ŵamsalile José kuti ŵamkululuchile. Tony jwasasile kuti kumkululuchila mjakweku kwamtendekasisye kuti aŵe jwakusangalala mnope mwamti ngamkanakombola kusala mujwapikanilaga mumtima. Kusala yisyene Yehofa ŵampele upile Tony ligongo lyakuŵa jwakosekwa kumkululuchia mjakwe.

15-16. Ana ngani ja Peter ni Sue jajiganyisye chichi pakwamba ya kwakululuchila ŵane?

¹⁵ Mu 1985, Peter ni Sue ŵapite ku misongano ku Nyumba ja Uchimwene. Nambo mwangajembecheya m’Nyumba ja Uchimwenemo mwawuliche bomba. Mundu jwine ni juŵaŵisile bombaji mkati mwa nyumbaji. Sue jwawulele mnope ligongo lya bombaji, mwamti nganakombolaga kulola soni kupikana. Jwalakwe nganakombolagasoni kupikana liwungo lililyose. Peter ni Sue ŵaliwusisye kuti, ‘Ana ŵani ŵatesile yakusakala mpela yeleyi?’ Pali papitile yaka yejinji, mundu juŵaŵisile bomba jula jwelesoni nganaŵa jwa Mboni jwakamulidwe, mwamti ŵamlamwile kuti akatame mundende kwa umi wakwe wosope. Ŵandu ŵane paŵamwusisye Peter ni Sue naga ŵamkululuchile munduju ŵasasile kuti, “Yehofa jwatujiganyisye kuti kupitilisya kumtumbilila mundu mpaka kusokonasye umi wetu soni kaganisye ketu. Pajagambile kuwulika bombajo twamŵendile Yehofa kuti atukamuchisye kuti tukaŵa ŵakutumbila soni kuti tutameje mwamtendele.”

¹⁶ Ana yaliji yangasawusya kwa jemanjaji kuti amkululuchile munduju? Iyayi. Jemanjaji ŵasasilesoni kuti, “Ndaŵi jilijose Sue pakulaga mnope ligongo lya kuwulalaku yikusatutumbilikasya mnope. Nambo ngatukusagamba kutamila kuganichisya yayatendekweyi. Yeleyi yikusatukamuchisya kuti tukapitilisya kutumbila. Kusala mwakuwona mtima, naga lisiku line mundu juŵaŵisile bomba jula chachiŵa jwa Mboni sya Yehofa tuchimpochela ni makono gaŵili. Yindu yayatutendecheleyi yitujiganyisye kuti kamulichisya masengo mfundo sya m’Baibulo kuli kwakamuchisya mnope. Nambosoni kumanyilila kuti pachangakaŵa Yehofa chalinganyesoni  yindu yosope yayajonasiche kuli kwakutondoya mnope.”

17. Ana ngani ja Myra jajiganyisye chichi pakwamba ya kwakululuchila ŵane?

¹⁷ Jwamkongwe jwine lina lyakwe Myra jwalijiganyisye usyesyene ali alombedwe soni ali akwete ŵanache ŵaŵili. Ŵamkwakwe ŵakanile kulijiganya usyesyene. Pali papitile ndaŵi ŵamkwakweŵa ŵatesile chikululu soni ŵamasisye ulombela ni Myra. Kaneko jwalakwe jwatite, “Ŵamkwangu paŵandesile une ni ŵanache ŵaŵili yambweteche mnope. Yeleyi yandendekasisye kulipikana mpela mwakusapikanila ŵandu ŵatendeledwe yangali chilungamo ni mundu jwakusiŵanonyela. Mwamti nadandawulaga, kulijimbaga magambo, kutumbila soni nalepelekaga kuyijitichisya.” Atamose kuti ulombela wamasile nambo yikusampwetekape. Jwamkongweju jwapitilisye kuti, “Japitile miyesi ndili mkulagasika nganisyo ni yeleyi. Mwamti nayimanyilile kuti yitandite kusokonasya unasi wangu ni Yehofa soni ni ŵandu ŵane.” Apano jwalakwe jwasasile kuti jwamalene ni kutumbila soni kulagasika nganisyo ni yindu yaŵamtendele ŵamkwakwe. Jwalakwe akusakulupilila kuti lisiku line ŵamkwakweŵa tachitanda kumtumichila Yehofa. Mmalo mwakwamba ganichisya ya yindu yayamtendechele, jwalakwe akusaganichisya yindu yamsogolo. Atamose kuti jwalakwe jwalelite jika ŵanache ŵakwe, nambope ŵakamuchisye kuti amtumichileje Yehofa. Mwamti apano mlongoju akusasangalala kumtumichila Yehofa yalumo ni ŵanache ŵakwe soni maŵasa gawo.

18. Ana tukusosekwa kulupilila kuti Yehofa jwali Jwakulamula Jwamkulungwa chachitenda chichi?

¹⁸ Yili yakusangalasya kumanyilila kuti nganitukola udindo wa kusagula kuti ŵandu alamulidweje m’litala line lyakwe. Yehofa ni jwakwete udindo wakutenda yeleyi ligongo ali Jwakulamula Jwamkulungwa. (Alo. 14:10-12) Tukusosekwa kulupilila ni mtima wosope kuti ndaŵi syosope jwalakwe akusalamula mwakamulana ni mfundo syakwe syakulungama pakwamba chambone kapena chakusakala. (Gen. 18:25; 1 Ayi. 8:32) Jwalakwe akusatenda chilichose mwachilungamo.

19. Ligongo lyakuti Yehofa ali jwachilungamo, ana jwalakwe chachikwanilisya yindu yapi kusogoloku?

¹⁹ Kwandaŵi jelewu, tuŵele tuli mkwembecheya ndaŵi jele Yehofa chachityosya yakusakala yosope soni ulemwa. Pandaŵi jelejo tuchikola yilu soni nganisyo syambone mpaka kalakala. (Sal. 72:12-14; Chiw. 21:3, 4) Yakupweteka yosope yatukusimana nayo apano ngasituyikumbuchilasoni. Patukwembecheya ndaŵi jakusangalasyaji, tukusosekwa kumyamichilaga mnope Yehofa ligongo lyakutukamuchisya kuti tumsyasyeje jwalakwe pangani ja kwakululuchila ŵane.