1. Mbi Yave kankanikisa kuidi batu banhongina masumu mawu?

 KHETI Yave widi Mvang’itu, Tho yi Minsiku ayi Mfundisi, vayi mvandi widi Tat’itu yi luzolo. (Minku. 100:3; Yesa. 33:22) Bo tunsumuka ayi tunhongina masumu mitu, nandi kalenda ayi widi wukubama muingi kutulemvukila. (Minku. 86:5) Mu nzila ḿbikudi Yesaya, Yave wu tukindisa: “Kheti masumu minu madi mabenga, mala kituka maphembe buka matuti maphembe.”—Yesa. 1:18.

2. Boti tuntomba kuba mu ndembama na bankaka, mbi tufueti vanganga?

² Mu kuba batu ba masumu, tulenda tuba voti kuvanga mambu malenda nhongisa bankaka. (Yako. 3:2) Mawu masinsundula ko ti tulendi ba ko yawu kikundi kifikama. Vayi tulenda baka bakundi bafikama befu kuba bakubama muingi kuba lemvukilanga. (Zinga. 17:9; 19:11; Matai 18:21, 22) Bo ba tulueka ntima, Yave wuntomba muingi tu balemvukila. (Kol 3:13) Tuidi bibila biwombo muingi kuvanga mawu. Vayi kibila kilutidi, Yave wu tulemvukilanga mu “ntima woso.”—Yesa. 55:7.

3. Mbi tuenlonguka mu dilongi adidi?

³ Mu dilongi adidi, tuemmona buidi batu ba masumu balenda landikinina kifuani ki Yave mu matedi kulemvukila bankaka. Masumu mbi mantombulu lusadusu lu bakulutu ba kimvuka muingi kudedikisa? Kibila mbi Yave ka tukindisila muingi tulemvukilanga bankaka? Ayi mbi tulenda longuka mu bifuani bi zikhomba batovuka mu kibila ki mambu mambi baba vangila kuidi bankaka?

4. (a) Bo kisadi ki Yave kamvola disumu dingolo, mbi kafueti vanga? (b) Kiyeku mbi bakulutu ba kimvuka badi mu thangu bamfundisa mutu bevola disumu?

⁴ Bo khomba kamvola disumu dingolo, kafueti zabikisa mawu kuidi bakulutu ba kimvuka. Dedi, na kuvola masumu bantubila mu 1 Kolinto 6:9, 10. Masumu mangolo manlevulanga minsiku mi Nzambi. Boti khomba bevola disumu dingolo, nandi kafueti fikama Yave mu nsambu ayi kue zabikisa mawu kuidi bakulutu ba kimvuka. (Minkunga 32:5; Yako 5:14) Kiyeku mbi bakulutu ba kimvuka badi? Tuzebi ti Yave to widi nsua wu kulemvukila masumu mangolo mu nzila khudulu. * Vayi kheti bobo, Yave wuvana kiyeku kuidi bakulutu ba kimvuka muingi kufundisa mutu wumvola disumu dingolo, mu kulandakana zithuadusulu ziandi. (1 Koli. 5:12) Vayi bo bamvanga mawu, bafueti baka mimvutu mi biuvu abibi: Mu lutia luandi kabe vangila disumu beni? Nandi wusueka disumu beni kuidi bankaka? Wumvolanga disumu beni mu mimvu miwombo? Ayi bulutidi, vadi bivisa bimmonisa ti benhongina mambu ka bevanga? Vadi bivisa ti Yave benlemvukila?—Mava. 3:19.

5. Ndandu mbi tumbakanga mu kisalu bakulutu ba kimvuka bamvanganga?

⁵ Bo bakulutu ba kimvuka bamfundisa mutu bevola disumu dingolo, makani mawu mafueti ba, kubaka momawu makani Yave kabe baka ku diyilu. (Matai 18:18) Buidi mawu mantuadisilanga ndandu mu kimvuka? Mawu mankiebanga kiphevi ki zikhomba zinkaka mu kimvuka. (1 Koli. 5:6, 7, 11-13; Tito 3:10, 11) Mvandi mansadisanga mutu bevola disumu kanhongina mambu ka bevanga muingi kabaka nlemvu wu Yave. (Luka 5:32) Bakulutu ba kimvuka ba kunnatanga mu minsambu ayi bandindanga kuidi Yave muingi kansadisa kuvutula kikundi kiandi ayi Nandi.—Yako. 5:15.

6. Boti mutu bevaikusu, bukiedika ti Yave kalenda kunlemvukila? Sudikisa

⁶ Yindulabu ti khomba bemanga kunhongina mambu ka bevanga bo bakulutu ba kimvuka ba kumfundisa. Mu kutadila mambu amomo, nandi kafueti vaikusu mu kimvuka. Vayi boti belevula nsiku wu tsi, bakulutu ba kimvuka balendi kunkakidila ko mu mambu malenda kummonikina. Kibila Yave wuvana nsua kuidi zimfumu zi luyalu muingi bafundisa ayi basemba woso mutu wunlevula nsiku—kheti wunhongina masumu mandi voti ndamba. (Loma 13:4) Vayi bumviokila thangu, na kunhongina masumu ayi kubalula mavanga mandi, Yave widi wukubama muingi kunlemvukila. (Luka 15:17-24) Ayi Yave kalenda lemvukila masumu mandi kheti mawu madi mangolo.—2 Lusa. 33:9, 12, 13; 1 Timo. 1:15.

7. Mu phila mbi tulenda lemvukila mutu be tulueka ntima?

⁷ Mayangi beni kuzaba ti tulendi baka ko makani va mvingi Yave muingi nandi kalemvukila mutu! Vayi kheti bobo, tulenda vanga dioso diambu. Mbi tulenda vanga? Khumbu zinkaka bo mutu kabe tulueka ntima voti—kabe tuvangila diambu dimbi —ḿba nandi kalenda tudinda nlemvu. Vayi khumbu zinkaka masi ko mawu mammonikanga. Kheti bobo, tulenda baka makani ma kulemvukila, kubika kunkangila nganzi ayi kuvutula kikundi na mutu beni. Bukiedika, vantombuluanga  mangolo ayi thangu muingi kununga kuvanga mawu. Kibanga Ki Nsungi 15 Ngonda Yivua, 1994, kituba: “Bo ngie wulemvukila mutu wunkaka, masinsundula ko ti ngie wunkuangalala mu nzimbala kabe vanga. Kuidi befu Baklisto, kulemvukila kunsundula kubika mambu moso mu mioko mi Yave. Kibila nandi Mfundusi wusonga wu nza yimvimba wufueti dedikisa mawu mu thangu yifuana.” Vayi kibila mbi Yave ka tukindisila muingi tulemvukilanga bankaka ayi kubika mambu moso mu—mioko miandi?

8. Buidi kulemvukila kummonisina ti tuntondanga mamboti ma Yave?

⁸ Kulemvukila yidi mbonosono ti tuntondanga mamboti ma Yave. Mu kinongo Yesu kata, nandi wudedikisa Yave banga mfumu wulemvukila kisadi kiandi pholo yinneni yo kankhambu baka bu kufutila. Vayi kisadi akiokio, kasa monisa ko kiadi kuidi kisadi yandi waba kundeva zimbongo ziluelu. (Matai 18:23-35) Mbi Yesu katulonga? Boti tuntomba Yave katulemvukila, befu mvitu tufueti lemvukilanga bankaka. (Minku. 103:9) Kibanga Ki Nsungi kimueka kituba mambu amama: “Kheti tulenda lemvukila bankaka khumbu ziwombo, vayi tulendi dedakana ko na zikhumbu zio Yave ka tulemvukilanga mu nzila Klisto.”

9. Banani Yave kammonisanga kiadi? (Matai 6:14, 15)

⁹ Befu kulemvukila bankaka, Yave mvandi wala tulemvukila. Yave wummonisanga kiadi kuidi bo banlemvukilanga badi yawu. (Matai 5:7; Yako. 2:13) Yesu wusudikisa mawu, bo kalonga minlandikini miandi kusambila. (Tanga Matai 6:14, 15.) Ayi mawu Yave kavanga kuidi kisadi kiandi Yobi. Nandi banhongisa beni ntima kuidi bakundi bandi batatu, Elifazi, Bilidade ayi Sofali. Vayi Yave wunkamba muingi ka banata mu nsambu. Bo Yobi kavanga mawu, Yave wunsakumuna.—Yobi 42:8-10.

10. Kibila mbi kukangila bankaka nganzi didi diambu dimbi? (Efeso 4:31, 32)

¹⁰ Kukangila bankaka nganzi ku tutuadisanga ziphasi. Yave wuntomba tubaka ndandu yinkuizilanga mu kukhambu lunda nganzi. (Tanga Efeso 4:31, 32.) Yave wu tukamba: “Bika kufuema ayi zimbakana nganzi.” (Minku. 37:8) Yidi mbonosono yi nduenga kulandakana dilongi adiodio. Kibila befu kulunda nganzi, tulenda lebakana mu buvinya ayi mu mayindu. (Zinga. 14:30) Befu kukangila mutu nganzi, mawu masinkuiza tuadisa ko ziphasi kuidi mutu be tuvangila diambu dimbi vayi kuidi befu veka. Tulenda dedikisa mawu buka befu tunnua kiyimbu ayi kuvingila mutu wunkaka kafua. Diawu bo tunlemvukila bankaka tuntuadisanga ndandu kuidi befu veka. (Zinga. 11:17) Mvandi tuala baka mayangi ayi tuala tatamana kuvanga kisalu kitu kuidi Yave mu ntima woso.

11. Mbi Kibibila kintuba matedi kukangila bankaka nganzi? (Loma 12:19-21)

¹¹ Tubika lufundusu mu mioko mi Yave. Nzambi kasa tuvana ko nsua wu kufundisa mutu be tulueka ntima. (Tanga Loma 12:19-21.) Bo tuidi batu ba masumu ayi mu kukhambu zaba bibila bioso, tulendi fundisila ko batu mu phila Yave kamfundisilanga. (Ebe. 4:13) Ayi khumbu zinkaka tumbikanga mabanza mitu matuadisa phila tumfundisila mutu. Mu nzila phevi yinlongo, Yave wutuadisa Yakobi muingi kasonika: “Nganzi yi mutu yituadisanga ko busonga  bu Nzambi.” (Yako. 1:20) Tulenda ba lufiatu ti Yave wala vangila mambu mu phila yisonga ayi mu thangu yifuana.

12. Buidi tulenda monisina ti tuidi lufiatu mu zimfundusu zi Yave?

¹² Kulemvukila kummonisa ti tumfiatilanga mu lufundusu lu Yave. Mu kubika mambu mu mioko mi Yave, tunkuiza monisa ti tuidi lufiatu ti nandi wunkuiza dedikisa mawu. Mu nza yimona, Yave wu tukanikisa ti mambu moso mambi mala mana ayi malasa bue tukuizila ko va kilunzi. (Yesa. 65:17) Vayi bukiedika ti mu thangu tuidi mu kiunda, tulenda zimbakana mambu ba tuvangila ayi kubika lunda nganzi? Tala bifuani bi batu baviokila mu mawu.

13-14. Mbi tulenda longuka matedi nlemvu mu kifuani ki Tony ayi José?

¹³ Zikhomba zitu ziwombo babaka makani ma kulemvukila, kheti bo baba mu kiunda mu kibila ki mambu mambi baba vangila kuidi bankaka. Lusakumunu mbi bawu batambula mu kuvanga mawu?

¹⁴ Ava kazaba kiedika, Tony * wunkalanga ku Filipinas, wuyiza zaba mutu wuvonda khomb’andi yi nkulutu. Mu thangu beni, Tony wuba mutu wu nganzi ayi wu makhema. Nandi wukangila nganzi dibakala beni bantedilanga José. Dibakala beni bannata mu buloku mu mambu kavanga. Vayi bo bambasisa mu buloku Tony wubaka makani ma kumvonda. Diawu kasumbila buta muingi kumvondila. Vayi mu thangu beni, Tony wutona kulonguka Kibibila na Zimbangi zi Yave. Nandi wutuba: “Bo yaba longuka Kibibila, minu yilonguka ti yifueti balula phil’ama yi kuyindudila ayi kubika nganzi”. Buviokila thangu, Tony wuyiza botama ayi wuyiza ba nkulutu wu kimvuka. Buabu tala diambu di kukuituka diyiza monika, Tony wuzaba ti José mvandi wuyiza ba Mbangi yi Yave! Bo bawu babuadi badengana, mu luzolo babumbasana ayi Tony wukamba José ti wunlemvukila. Tony wubue tuba: “Bo yilemvukila José yibaka mayangi mawombo”. Bukiedika Yave wusakumuna Tony bo kalemvukila wadi yandi.

15-16. Mu matedi kulemvukila, mbi wulenda longuka mu kifuani ki Peter ayi Sue?

 ¹⁵ Mu mvu 1985, Peter ayi Sue bo baba mu lukutukunu, mu kinzimbukulu bomba yidumvuka kuna. Dibakala dimueka wu yetula yawu ku nzo Kintinu! Sue wuluala beni ayi mu kibila akiokio, mawu mabivisa meso ayi makutu mandi. Mvandi kasiala bue kuwa ko mfuku. * Peter ayi Sue khumbu zinkaka baba kukikuvusanga: ‘Ntindu mutu mbi wuvanga mambu amomo?’ Ayi buviokila thangu bayiza zaba mutu beni. Nandi kasa ba ko Mbangi yi Yave ayi bannata mu buloku. Bo baba yuvula boti balemvukila dibakala beni, Peter ayi Sue batuba: “Yave wu tulonga ti tulendi lunda ko nganzi, kibila mawu malenda lebikisa buvinya buitu ayi mayindu mitu. Tudinda kuidi Yave muingi ka tusadisa tubika lunda nganzi ayi tutsikika mayindu mu kisalu kitu mu nandi.”

¹⁶ Vayi bukiedika ti diba diambu diluelu kuidi bawu kulemvukila? Ndamba. Bawu babue tuba: “Khumbu zinkaka bo tunyindula mu ziphasi Sue kamviokilanga nganz’itu yimbuelamanga. Vayi bo tunkhambu tatamananga kuyindula mu mawu, nganzi yimmananga. Bukiedika, tulenda tuba mu ntima woso ti: Dibakala adiodio ditula bomba na kuba Mbangi yi Yave tuala kunyamba buboti. Mambu amomo, matusadisa kuvisa ti minsua mi Kibibila mi tusadisanga mu phila tunkhambu yindudilanga! Mvandi, mi tukindisanga kuzaba ti nkadu to wunkhambu Yave wala manisa ziphasi zioso.”

17. Mbi wulenda longuka mu matedi kulemvukila mu kifuani ki Myra?

¹⁷ Myra wulonguka kiedika bo kaba wukuela ayi wuba bana balezi. Vayi nnuni’andi kasa kikinina ko kiedika. Buviokila thangu, nnuni’andi wuvanga kitsuza ayi wuyekula dikanda. Myra wutuba: “Bo nnuni’ama ka tuyekula, yiba momawu mabanza batu bambanga bo mutu wu tuzolanga ka tukuekula—mawu  mandueka ntima, yiba mu kiunda, yinhonga beni, yaba kukivananga fotu ayi yiba beni mu nganzi.” Kheti bavambana, vayi nandi wukhidi tovukanga nati bubu. Myra wubue tuba: “Mabanza amomo mathuadisa beni ziphasi mu zingonda ziwombo ayi yivisa ti maba bifisa kikundi kiama na Yave ayi kuidi bankaka.” Myra wubika kulundila nganzi kuidi no wuba nnuni’andi. Ayi nandi widi kivuvu ti kioso kilumbu kalenda ba Mbangi yi Yave. Myra wuntsikikanga mayindu mandi mu bilumbu binkuiza kuntuala. Kheti mu kuba ngudi yikhambu kuela, nandi wuyonzula bana bandi muingi basadila Yave. Bubu, Myra wunsadila Yave mu mayangi va kimueka na bana bandi ayi makanda mawu.

18. Kibila mbi tulenda bela lufiatu ti zimfundusu zi Yave zidi zisonga?

¹⁸ Tunkuangalala beni kuzaba ti tuisi ko nsua wu kufundisa batu! Mu kuba Mfundisi Wulutidi, Yave nandi to widi kiyeku akiokio. (Loma 14:10-12) Tuidi lufiatu ti nandi wala fundisila mu kulandakana zithuadusulu ziandi zisonga, mu matedi mamboti ayi mambi. (Ngene. 18:25; 1 Minti. 8:32) Yave kalendi vanga ko mambu makhambulu masonga!

19. Mu kuba Mfundisi wusonga, mbi Yave kala vanga?

¹⁹ Tumvingila mu mayangi thangu Yave kala manisa ziphasi zioso ayi mambu moso ma tuluekanga ntima mu kibila ki disumu. Mu thangu ayoyo, kiunda kioso ayi mabanza moso mambi mala mana. (Minku. 72:12-14; Nzai. 21:3, 4) Mawu malasa bue tukuizila ko va kilunzi. Diawu bo tumvingila thangu ayoyo yi mayangi, tufueti tonda kuidi Yave mu ku tulemvukilanga ayi mu kutuvana luaku lu kulandakana kifuani kiandi muingi kulemvukilanga bankaka.