1. ¿Baʼax promesail ku beetik Jéeoba tiʼ le máaxoʼob ku arrepentiroʼoboʼ?

 JÉEOBAEʼ letiʼ beetmiloʼon, letiʼ tsʼáaiktoʼon leyoʼob yéetel letiʼ k-Juez. Chéen baʼaleʼ maʼ u tuʼubultoʼoneʼ letiʼ le k-Taata yaan teʼ kaʼanoʼ (Sal. 100:3; Isa. 33:22). Le oʼolaleʼ wa k-kʼebantal tu contra, chéen baʼaleʼ k-arrepentir tu jaajil k-óoleʼ, letiʼeʼ jeʼel u perdonarkoʼoneʼ yéetel ku tsʼíiboltik u beetik (Sal. 86:5). Jéeobaeʼ tu beetaj junpʼéel promesa jach ku kiʼimakkúuntik k-óol, yéetel tu yaʼalaj tiʼ profeta Isaías ka u tsʼíibte, tu yaʼalaj: «Kex jach chak a kʼebaneʼexeʼ yaan u saktal bey jeʼex le nieveoʼ» (Isa. 1:18).

2. ¿Baʼax unaj k-beetik utiaʼal u páajtal k-bisikba yéetel u maasil?

² Tumen kʼeban máakoʼoneʼ yaan kʼiineʼ k-ofendertik u maasil yéetel baʼax k-aʼalik bey xan yéetel baʼax k-beetik (Sant. 3:2). Chéen baʼaleʼ leloʼ maʼ u kʼáat u yaʼal wa maʼ tu páajtal k-bisikba yéetel mix máakiʼ. Chéen baʼax kʼaʼabéet k-beetkeʼ k-perdonartikba t-baatsil (Pro. 17:9; 19:11; Mat. 18:21, 22). Jéeobaeʼ ku páaʼtik ka k-perdonart u maasil le kéen yanak mejen baʼaloʼob jeʼel u beetik maʼ k-bisikba tu yéeteloʼobeʼ (Col. 3:13). Jach unaj k-beetik le baʼax ku yaʼalik Jéeobaoʼ tumen letiʼeʼ jach tu jaajil ku perdonarkoʼon (Isa. 55:7).

3. ¿Baʼax ken k-il teʼ xookaʼ?

³ Teʼ xookaʼ yaan k-ilkeʼ kex kʼeban máakoʼoneʼ jeʼel u páajtal  k-seguertik u ejemplo Jéeoba le kéen perdonarnakoʼoneʼ. ¿Máakalmáak le kʼebanoʼob unaj k-tsʼáaik u yojéelt le ancianoʼoboʼ? ¿Baʼaxten Jéeobaeʼ u kʼáat ka k-perdonartba t-baatsil? ¿Baʼax jeʼel u páajtal k-kanik tiʼ jujuntúul sukuʼunoʼob jach muʼyajnajoʼob tu yoʼolal le baʼax tu beetaj uláakʼ máakoʼoboʼ?

4. 1) ¿Baʼax unaj u beetik máak wa tsʼoʼok u lúubul tiʼ junpʼéel nojoch kʼeban? 2) ¿Máakalmáak le responsabilidad tsʼaʼan tiʼ le ancianoʼoboʼ?

⁴ Wa k-ojéeltik yaan juntúul máak tsʼoʼok u lúubul tiʼ junpʼéel nojoch kʼebaneʼ unaj k-aʼalik tiʼ le ancianoʼoboʼ. Jujunpʼéel ejemploʼob tiʼ le nojoch kʼebanoʼoboʼ ku chíikpajal tiʼ 1 Corintios 6:9 yéetel 10. Le kʼebanoʼob beyaʼ jach kʼaas u yilaʼaloʼob tumen Dios. Le oʼolaleʼ le máax ku lúubul tiʼ junpʼéel nojoch kʼebaneʼ unaj u kʼáatik tiʼ Jéeoba ka perdonartaʼak yéetel unaj u tʼaan yéetel le ancianoʼoboʼ (Sal. 32:5; Sant. 5:14). U jaajileʼ chéen tiʼ Jéeoba yaan u autoridadil u perdonartik le kʼebanoʼoboʼ yéetel ku beetik yoʼolal le u kuxtal Jesús tu kʼuboʼ. * Chéen baʼaleʼ Dioseʼ tu tsʼáaj u responsabilidadil tiʼ le ancianoʼob u chʼaʼtuklikoʼob yéetel u yáantaj le Biblia wa jeʼel u páajtal u pʼáatal le máak tsʼoʼok u kʼebantal ichil le múuchʼuliloʼ (1 Cor. 5:12). Utiaʼal leloʼ unaj u tuukuloʼob tiʼ le kʼáatchiʼobaʼ: ¿Taaliʼtiʼ wa úuchik u lúubul tiʼ le kʼebanoʼ? ¿Táan wa kaʼach u taʼakik? ¿Xáanchaj wa táan u kʼebantal? Chéen baʼaleʼ maʼ unaj xan u tuʼubultiʼob le kʼáatchiʼobaʼ: ¿Tsʼoʼok wa u yeʼesik jach tu jaajil arrepentido? ¿Yaan wa baʼax eʼesik tsʼoʼok u perdonartaʼal tumen Jéeoba? (Hech. 3:19).

5. ¿Baʼax utsil ku taasik tiʼ le múuchʼulil le meyaj ku beetik le ancianoʼoboʼ?

⁵ Le kéen u muchʼuba le ancianoʼob yéetel le máax tsʼoʼok u kʼebantaloʼ le baʼax ken u chʼaʼtukult u beetkoʼoboʼ letiʼe baʼax tsʼoʼok u chʼaʼtuklaʼal xan teʼ kaʼanoʼ (Mat. 18:18). Leloʼ ¿baʼax utsil ku taasik tiʼ le múuchʼuliloʼ? Ku kanáantik le múuchʼuliloʼ, le oʼolaleʼ wa maʼ tu arrepentir le máax tsʼoʼok u kʼebantaloʼ ku expulsartaʼal (1 Cor. 5:6, 7, 11-13; Tito 3:10, 11). U beetaʼal beyoʼ ku yáantik xan le máax expulsartaʼab utiaʼal ka arrepentirnak yéetel utiaʼal ka u kʼáat ka perdonartaʼak tumen Jéeobaoʼ (Luc. 5:32). Le kéen arrepentirnak juntúul máakeʼ le ancianoʼoboʼ ku oraroʼob tu yoʼolal yéetel ku kʼáatkoʼob tiʼ Jéeoba ka u yáant utiaʼal ka u kaʼa natsʼuba tu yiknal (Sant. 5:15).

6. ¿Jeʼel wa u perdonartaʼal tumen Jéeoba juntúul máax ku expulsartaʼaleʼ? Tsole.

⁶ Koʼoneʼex aʼalikeʼ le máax tsʼoʼok u kʼebantaloʼ maʼ tu arrepentir le kéen u muchʼuba yéetel le ancianoʼoboʼ, le oʼolal ku expulsartaʼal. Wa tsʼoʼok u beetik junpʼéel baʼal ku bin tu contra le gobiernoʼoboʼ, le ancianoʼoboʼ yaan u chaʼikoʼob u muʼyajtik u consecuenciail. Tumen Jéeobaeʼ tsʼoʼok u tsʼáaik páajtalil tiʼ le autoridadoʼob utiaʼal u juzgarkoʼob yéetel u castigarkoʼob jeʼel máaxak ku máansik por alto junpʼéel leyeʼ, kex wa arrepentido wa maʼ (Rom. 13:4). Chéen baʼaleʼ wa le kéen máanak kʼiin ku arrepentir, ku kʼexik u tuukul bey xan baʼaxoʼob ku beetkeʼ, Jéeobaeʼ yaan u perdonartik (Luc. 15:17-24). Beyoʼ, yaan u perdonartaʼal kex jach kʼaas baʼax u beetmaj (2 Cró. 33:9, 12, 13; 1 Tim. 1:15).

7. ¿Baʼax u kʼáat u yaʼal k-perdonartik wa máax?

⁷ ¿Máasaʼ ku taasiktoʼon kiʼimak óolal k-ojéeltik maʼ toʼon unaj k-chʼaʼtuklik wa yaan u perdonartaʼal máak tumen Jéeobaiʼ? Chéen baʼaleʼ yaan junpʼéel baʼax tiʼ toʼon  yaan u responsabilidadil k-chʼaʼtuklik. ¿Baʼax túuniʼ? Maʼ xaaneʼ yaan máax tsʼoʼok u kʼebantal t-contra yéetel jach tu beetaj u yaatal k-óol, letiʼeʼ ku kʼáatiktoʼon ka k-perdonarte wa yaan horaeʼ mix tu kʼáatiktoʼon, kex beyoʼ jeʼel u páajtal k-chʼaʼtuklik k-perdonarkeʼ. Leloʼ u kʼáat u yaʼaleʼ maʼ unaj u seguer k-kʼuuxil tu yéeteliʼ yéetel maʼ unaj u seguer k-chaʼik u kuup t-puksiʼikʼal le baʼax tu beetajtoʼonoʼ. U beetaʼal lelaʼ maʼ chéen chʼaʼabiliʼ yéetel ku bisik tiempo, maases wa jach yaj t-uʼuyil le baʼax tu beetajtoʼonoʼ. U Pʼíich Tulumil Kanan ich español 15 tiʼ septiembre tiʼ 1994, ku yaʼalik: «Le kéen k-perdonart wa máaxeʼ maʼ u kʼáat u yaʼal wa maʼ kʼaas k-ilik le baʼax tu beetoʼ. Baʼaxeʼ u kʼáat u yaʼaleʼ k-pʼatik tu kʼab Jéeoba le baʼax tu beetajtoʼonoʼ tumen letiʼeʼ juntúul jach maʼalob Juez yéetel yaan u kʼuchul u kʼiinil u beetik justicia». ¿Baʼaxten u kʼáat Jéeoba ka perdonarnakoʼon yéetel ka k-páaʼt u beetik justicia?

8. ¿Bix k-eʼesik k-agradecertik u chʼaʼabaltoʼon óotsilil tumen Jéeoba?

⁸ Le kéen perdonarnakoʼoneʼ k-eʼesik k-agradecertik tiʼ Jéeoba ikil u chʼaʼiktoʼon óotsilil. Juntéenjeakeʼ Jesúseʼ tu yaʼaleʼ Jéeobaeʼ bey jeʼex juntúul tsʼuul tu perdonartaj juntúul u esclavo jach yaʼab u pʼaaxeʼ. Chéen baʼaleʼ le esclavoaʼ maʼ tu chʼaʼaj óotsilil tiʼ u yéet esclavoil kex chéen junpʼíit u pʼaaxiʼ (Mat. 18:23-35). Lelaʼ ku kaʼansiktoʼoneʼ wa jach tu jaajil k-agradecertik tiʼ Jéeoba le bix u chʼaʼiktoʼon óotsililoʼ yaan xan k-perdonartik u maasil (Sal. 103:9). Junpʼéel U Pʼíich Tulumil Kananeʼ tu yaʼaleʼ kex jeʼel jaytéen ka perdonarnakoʼoneʼ mix bikʼin «ken k-perdonar yéetel ken k-chʼaʼ óotsilil jeʼex u beetik Jéeoba Dios tu yoʼolal Cristo Jesúsoʼ».

9. ¿Tiʼ máaxoʼob ku chʼaʼik óotsilil Jéeoba? (Mateo 6:14, 15).

⁹ Wa k-perdonareʼ yaan u perdonarkoʼon Jéeoba. Letiʼeʼ ku chʼaʼik óotsilil tiʼ le máaxoʼob ku chʼaʼikoʼob xan óotsililoʼ (Mat. 5:7; Sant. 2:13). Leloʼ letiʼe baʼax tu kaʼansaj Jesús tiʼ u discípuloʼob le táan yeʼesiktiʼob bix unaj u oraroʼoboʼ (xok Mateo 6:14, 15). Letiʼe baʼax xan tu kaʼansaj Jéeoba tu kʼiiniloʼob Joboʼ. Jobeʼ tu muʼyajtaj u sen aʼalaʼal baʼal tiʼ tumen Elifaz, Bildad yéetel Zofar. Chéen baʼaleʼ ka tsʼoʼokeʼ Jéeobaeʼ tu yaʼalaj tiʼ Job ka orarnak tu yoʼolal le óoxtúul máakoʼobaʼ, le ka tu beeteʼ bendecirtaʼabi (Job 42:8-10).

10. ¿Baʼaxten maʼatech u taasik utsil le kʼuuxililoʼ? (Efesios 4:31, 32).

¹⁰ Junpuliʼ maʼ tu taasiktoʼon utsil le kʼuuxililoʼ. Le kʼuuxililoʼ bey junpʼéel kuuch jach aaleʼ, le oʼolal Jéeobaeʼ u kʼáat ka k-píikchʼinte (xok Efesios 4:31, 32). Letiʼeʼ ku yaʼalik: «Maʼ a tsʼíikil mix a pʼuʼujul» (Sal. 37:8). Wa k-beetik le baʼax ku yaʼaliktoʼonoʼ yaan u taasiktoʼon yaʼab utsil, tumen le kʼuuxililoʼ jeʼel u beetik u kʼojaʼantal máakeʼ (Pro. 14:30). Juntúul máak ku kʼuuxileʼ bey ka u yukʼ venenoeʼ, tumen tiʼ letiʼ ku beetik loob. Le oʼolal le kéen perdonarnakoʼoneʼ ku bin utsil toʼon (Pro. 11:17). Bey túunoʼ k-pʼáatal tranquiloil yéetel ku seguer k-meyajtik Jéeoba yéetel kiʼimak óolal.

11. ¿Baʼax ku yaʼalik le Biblia yoʼolal u sutik u jeel máak le baʼax ku beetaʼaltiʼoʼ? (Romanos 12:19-21).

¹¹ Unaj k-pʼatik tu kʼab Jéeoba le baʼax ku beetaʼaltoʼonoʼ. Jéeobaeʼ ku yaʼaliktoʼoneʼ maʼ unaj k-sutik u jeel le baʼax ku beetaʼaltoʼonoʼ (xok Romanos 12:19-21). Como kʼeban máakoʼoneʼ maʼ tu páajtal k-ilik tuláakal baʼal jeʼex u yilik Jéeobaoʼ yéetel maʼ tu páajtal k-juzgar jeʼex u beetik letiʼoʼ (Heb. 4:13). Tsʼoʼoleʼ wa pʼujaʼanoʼoneʼ maʼ t-juzgar maʼalob. Santiagoeʼ tu yaʼalaj: «Máax ku pʼuʼujuleʼ maʼ  tu beetik baʼax maʼalob tu táan Dios» (Sant. 1:20). Maʼ u tuʼubultoʼoneʼ Jéeobaeʼ yaan u kʼuchul u kʼiinil u beetik justicia.

12. ¿Bix jeʼel k-eʼesik jach tu jaajil k-confiar tiʼ u justicia Jéeobaeʼ?

¹² Le kéen perdonarnakoʼoneʼ k-eʼesik k-confiar tiʼ u justicia Jéeoba. Wa k-pʼatik tu kʼab le baʼax ku beetaʼaltoʼonoʼ k-eʼesik jach tu jaajil k-creertik yaan u yutskíintik tuláakal baʼal. Teʼ túumben luʼumoʼ le baʼaxoʼob beetik u muʼyaj máakoʼ «maʼ kun kaʼa kʼaʼajsbiloʼob, mix ken u kaʼa chiʼichnakkúunt u puksiʼikʼal máak» (Isa. 65:17). Chéen baʼaleʼ, ¿jach wa tu jaajil jeʼel u páajtal u xuʼulul u kʼuuxil máak kex jach yaj baʼax beetaʼantiʼeʼ? Koʼoneʼex ilik jujuntúul sukuʼunoʼob tsʼoʼok u páajtal u beetkoʼob beyoʼ.

13, 14. ¿Baʼax ku kaʼansiktoʼon le baʼax úuch tiʼ Tony yéetel Joséoʼ?

¹³ Yaʼab sukuʼunoʼobeʼ tu chʼaʼtuklaj u perdonaroʼob kex jach yaj baʼax beetaʼabtiʼob. ¿Baʼax utsil tu taasajtiʼob?

¹⁴ Koʼoneʼex ilik baʼax úuch tiʼ Tony, * letiʼeʼ kajaʼan tu luʼumil Filipinas. Le maʼ u beetuba Testigooʼ, letiʼeʼ tu yojéelteʼ kíimsaʼab u sukuʼun tumen juntúul máak ku kʼaabaʼtik José. Como Tony jach séeb u pʼuʼujuleʼ taakchaj u vengarkuba. Chéen baʼaleʼ Joséeʼ kʼaʼal cárcel yoʼolal le baʼax tu beetoʼ. Le ka jóokʼ José teʼ cárceloʼ Tonyeʼ tu yaʼalaj yaan u kíimsik, le oʼolal tu manaj junpʼéel tsʼoon. Chéen baʼaleʼ teʼ kʼiinoʼob jeʼeloʼ káaj u tsʼaʼabaltiʼ xook yéetel le Bibliaoʼ. Letiʼeʼ ku yaʼalik: «Le ka joʼopʼ u bin in maas kaanbaleʼ tin naʼataj kʼaʼabéet in kʼexik in modos. Kʼaʼabéet u xuʼulul in pʼuʼujul». Le ka máan kʼiineʼ Tonyeʼ okjaʼanaji yéetel tu beetuba ancianoil. Letiʼeʼ jach jaʼakʼ u yóol ka tu yojéeltaj Joséeʼ tu beetuba xan u testigo Jéeoba. Le ka tu yilubaʼobeʼ tu méekʼubaʼob, Tony túuneʼ tu yaʼalaj tiʼ José tsʼoʼok u perdonartik. Tonyeʼ ku yaʼalikeʼ jach maʼalob tu yuʼubiluba ka tsʼoʼok u perdonartik José. Jeʼex k-ilkoʼ le sukuʼunaʼ perdonarnaji, yoʼolal leloʼ bendecirtaʼab tumen Jéeoba.

15, 16. ¿Baʼax ku kaʼansiktoʼon le baʼax úuch tiʼ Peter yéetel Sueoʼ?

¹⁵ Tu añoil 1985, Peter yéetel Sueeʼ tiaʼanoʼob kaʼach tiʼ junpʼéel muchʼtáambal ka tu yuʼuboʼob u téek wáakʼal junpʼéel baʼaleʼ.  Juntúul máakeʼ tu tsʼáaj junpʼéel bomba teʼ naj tuʼux ku yantal muchʼtáambaloʼ. Yoʼolal leloʼ Sueeʼ pʼáat mix baʼal ku yuʼubik u book yéetel úuch loob tiʼ u yich bey xan tiʼ u xikin. * Letiʼobeʼ cada ku tuklikoʼob: «¿Máax ta tʼaan jeʼel u táabal u beet baʼal beyoʼ?». Le máax tsʼáa le bombaoʼ maʼ juntúul Testigoiʼ. Le ka máan añoseʼ chuʼukeʼ ka aʼalaʼab yaan u kʼaʼalal tuláakal u kʼiiniloʼob u kuxtal. Le ka kʼáataʼab tiʼ Peter yéetel Sue wa tsʼoʼok u perdonarkoʼobeʼ letiʼobeʼ tu yaʼaloʼob: «Jéeobaeʼ tsʼoʼok u kaʼansiktoʼoneʼ le kʼuuxililoʼ jeʼel u beetik u kʼojaʼantal máakeʼ. Le oʼolal desde ka tsʼoʼok u yúuchultoʼon le looboʼ t-kʼáataj tiʼ Jéeoba ka u yáantoʼon utiaʼal u xuʼulul k-kʼuuxil yéetel ka xuʼuluk u kuup t-puksiʼikʼal le baʼax úuchtoʼonoʼ».

¹⁶ ¿Chéen chʼaʼabil wa úuchik u perdonarkoʼob le máax beet loob tiʼoboʼ? U jaajileʼ maʼatech. Koʼoneʼex ilik baʼax tu yaʼaloʼob: «Yaan kʼiineʼ le kéen k-il bix u muʼyaj Sue yoʼolal le baʼax úuchoʼ k-jáan pʼuʼujul, chéen baʼaleʼ como k-ilik u xuʼulul k-tuukul tiʼ leloʼ tu séebaʼanil ku xuʼulul k-pʼuʼujul. Hasta yaan kʼiineʼ k-aʼalikeʼ wa ka kʼuchuk u beetuba Testigoil le máakoʼ yaan k-kʼamik yéetel kiʼimak óolal ichil u kaajal Jéeoba. Le baʼax úuchoʼ tu kaʼansajtoʼoneʼ wa k-tsʼáaik ichil k-kuxtal le baʼax ku yaʼalik le Bibliaoʼ jach jeʼel u yáantkoʼon utiaʼal k-uʼuyikba maʼalobileʼ. Tsʼoʼoleʼ jach ku taasiktoʼon kiʼimak óolal k-ojéeltik yaan u kʼuchul u kʼiinil u yutskíintaʼal tuláakal baʼal tumen Jéeoba».

17. ¿Baʼax ku kaʼansiktech le baʼax úuch tiʼ Myraoʼ?

¹⁷ Myraeʼ ka joʼopʼ u meyajtik Jéeobaeʼ yaan kaʼatúul u mejen paalal, chéen baʼaleʼ u yíichameʼ maʼ tu yóotaj u meyajt Jéeobaiʼ. Ka máan kʼiineʼ Myraeʼ traicionartaʼab tumen u yíicham yéetel xúumpʼattaʼabi. Letiʼeʼ ku yaʼalik: «Le ka tu pʼaten in wíichameʼ pʼáat maʼ tin kaxtik baʼax in beete. Káaj in wuʼuyikinba jeʼex u maasil máakoʼob ku traicionartaʼaloʼoboʼ: pʼáat maʼ tin confiar tiʼ mix máak, sen yaachaj in wóol, pʼuʼujen yéetel joʼopʼ in wuʼuyik bey tiʼ teen yaan u culpail le baʼax úuchoʼ». Myraeʼ júub u matrimonio  yéetel máan yaʼab tiempo láayliʼ yaachajaʼan u yóoleʼ. Letiʼeʼ tu yaʼalaj xan: «Máan yaʼab meses bey in wuʼuyikinbaoʼ. Ka túun tin tsʼáaj cuentaeʼ leloʼ táan u afectartik bix in biskinba yéetel Jéeoba bey xan yéetel u maasil». Myraeʼ xuʼul u kʼuuxil yoʼolal le baʼax beetaʼabtiʼoʼ yéetel ku tsʼíiboltik ka xiʼik utsil tiʼ le u yíicham kaʼachoʼ. Hasta ku tsʼíiboltik ka kʼuchuk u kʼiinil u meyajtik Jéeoba. Myraeʼ maʼatech u chʼíikil tuukul tiʼ le baʼaxoʼob úuchtiʼoʼ baʼaxeʼ tiʼ le baʼaloʼob maʼalobtak ku taal u kʼiinoʼ. Kex Myra tu juunal tu líiʼsaj u paalaloʼobeʼ bejlaʼeʼ ku disfrutartik u múul meyajtik Jéeoba tu yéeteloʼob bey xan yéetel u familiaʼob.

18. Tumen Jéeoba kun juzgartik máakeʼ, ¿baʼaxten maʼ unaj k-preocupartikbaiʼ?

¹⁸ Jéeobaeʼ letiʼe maas Nojoch Juez yanoʼ, le oʼolal toʼoneʼ maʼ unaj k-preocupartikba tiʼ bix unaj u juzgartaʼal máakiʼ, tumen letiʼ kun beetik (Rom. 14:10-12). Toʼoneʼ k-ojel jach maʼalob bix kun juzgar Jéeoba, tumen letiʼeʼ mantatsʼ ku chʼaʼik en cuenta le leyoʼob u tsʼaamaj yoʼolal baʼax maʼalob yéetel baʼax maʼ maʼaloboʼ (Gén. 18:25; 1 Rey. 8:32). Letiʼeʼ mix bikʼin ken u beet junpʼéel injusticia.

19. ¿Baʼax ken u beet Jéeoba maʼ kun xáantal?

¹⁹ Jéeobaeʼ yaan u yutskíintik tuláakal le baʼaxoʼob tsʼoʼok u kʼaskúuntaʼal tumen le kʼebanoʼ. ¿Máasaʼ jach k-tsʼíiboltik ka kʼuchuk le kʼiin jeʼeloʼ? Jéeobaeʼ yaan u tsʼakik tuláakal le baʼaxoʼob k-muʼyajtikoʼ bey xan le loob beetaʼantoʼonoʼ (Sal. 72:12-14; Apo. 21:3, 4) Mix bikʼin kun kaʼa kʼaʼajaltoʼon le baʼaxoʼob t-muʼyajtoʼ. Mientras u kʼuchul le kʼiin jeʼeloʼ unaj k-perdonartik u maasil, beyoʼ k-eʼesik tiʼ Jéeoba k-agradecertik úuchik u kaʼanskoʼon perdonar.