1. Gini kidohe Yekova afuhe fu agu aboro ingapai saberã yo?

 WA VURA duhe nga Yekova nga Bakusirani, Bafurugute, na nga Basapungbanga, ko a nga gu Barani nga boro nyemuse du ngbangbaturũ yo. (Tam. 100:3; Yes. 33:22) Ho ani aingapai ni kutiko na ki mangi ndikidi saberã, ko na pagbia beko gbiati nyemu ka mbupai furani. (Tam. 86:5) Yekova afu gu bawene kidohe vurube gu nebi nangia Yesaya nga: “Ka gaoni ingapai vura du ni zamba ha vurũ, si adú adu kpau wa morogumba.”​—Yes. 1:18.

2. Ka ani aaida kadu na mbembedi pagume na kura aboro, ginipai si aida ani mangihe?

² Mbiko gupai nga ani nga aboro zangarengba, ani dunduko ninaape agu apai ape watadu ka manga agu apai naba gberãrago ti kura aboro. (Yak. 3:2) Ono gere ayugongo gupai nga, ka ani gbianga ngbarago ti mbembedi pagume na akuarani te te. Ani ima rengba ka gbia ngbarago ka ani wiriki wai kaa mbupai. (Snz. 17:9; 19:11; Mt. 18:21, 22) Ka si du nga boro pe wiripai watadu ka manga gu wiripai ba gberãrago tirani, Yekova naida gupai nga ani mbupai fu ni. (Koro. 3:13) Wene ndupai kina berani tipa ka mbupai. Gu garakaha agaraka berewe nga, Yekova nambupai furani “kpaima.”​—Yes. 55:7.

3. Gini apai ani nika sakapai tipaha rogo gi kekeapai re?

³ Rogo gi kekeapai re, ani nika sakapai tipa wai rengbe aboro zangarengba ka wirika Yekova na kini mbupai fu akurayo. Gini aingapai si aida ani pepa ha fu abaakumba? Tipagine Yekova aida ani mbupai ti ni fu kura aboro? Na ginipai rengbe ani ka wirikaha be agu awirinarani nga aguyo naima rungo ni kerehe be agu aingapai nga ga kura aboro?

4. (a) Ho ga Yekova moyambu namangi kere ingapai ni, ginipai si aida ni mangihe? (b) Ginipai si aida abaakumba mangihe ho i asungo ni na gu boro mangi ingaapai?

⁴ Ho boro namangi kere ingapai ni, si naida ani pehe fu abaakumba. Ngbatunga gu kere aingapai re i nape paha rogo 1 AKorindo 6:9, 10. Manga kere ingapai nga kere gbegberẽ kuo ga Mbori andiko. Ka si du nga Kristano mangi ngbatunga gu ingapai re, si naida ni mangi kparakpee fu Yekova ki sanako tipa mbupai na si naida ni ndu ka gumbaha fu agu abaakumba nga ga dungurati yo. (Tam. 32:5; Yak. 5:14) Ga abaakumba sunge nga gine? Kina Yekova sa du na gu pagbia nga ga mbupai dunduko ti aingapai, na ko namanga gipai re riimburu motumo tumorii. * Ono tie, Yekova ima fu gu pagbia fu abaakumba nga ka bihe rogo Ziazia Kekeapai yo singia si naida boro ingapai nye rogo dungurati. (1 Kor. 5:12) Tipa abaakumba mangi gipai re, pai sa dagba agu apai yo si aida i mangihe nga ka asada ka karagapai kuti agi asanahe re: Ya mo gu boro re ata ino aino kini mangi ingapai? Ya mo ni amangi mbakadapai amanga tipa ka manga ingapai? Ya mo ni dogodi manga gu ingaapai re tipa bete regbo? Gu nyakipaha anyaka gbe nga, ya mo gopai ho nayugo gupai nga ni ima manga ndikidi saberã? Ya mo apai ho nayugo gupai nga Yekova ima mbupai fu ni?​—Amo. 3:19.

5. Gini undo naye ni sangbana gu sunge abaakumba amangaha?

⁵ Ho abaakumba asungo ni na gu boro mangi ingapai, gayo sasa nga, ka da kina kuti gu bangisa diaberã auru kpotosende nga gu Yekova nada kutini ngbangbaturũ yo. (Mt. 18:18) Waigu gi mbakadapai re aundo dungurati? Si nasa gupai nga i kusi gu boro ingapai kusayo asanga berãni ya nga gu ni rengbe ka gbarasa ga Yekova akandoro. (1 Kor. 5:6, 7, 11-13; Tito 3:10, 11) Si ima rengba a ka undo boro ingapai ni saberã ni na ki gbia undo ti ga Yekova mbupai. (Rk. 5:32) Abaakumba namanga kparakpee tipa gu boro ingapai sa gani berã na kini sana Yekova ko undo ni ni mbakadi gani pagume na Ko berewe.​—Yak. 5:15.

6. Ka i kusi boro kusayo rogo dungurati, ya mo Yekova rengbe kindi ka mbupai fu ni? Oni sakingarogoyo.

⁶ Na ka si du nga boro asanga berã fuo sungo abaakumba na ni te. Ka si du wo, i nakusa gu boro re kusayo rogo dungurati. Ka si du nga ni ima kuo gu ndiko nga ga ringara, abaakumba aõkanga ni ti asangbana agu apai ye mbiko gani gbegberẽ diaberã te. Yekova ima mbugene fu agbia ngbii i sapungbanga ai gu boro nakuo ndiko na i ki fu mbusa fu ni​—ka si vura du vurũ nga ni mangi saberã watadu ni amanganga ha te. (Rom. 13:4) Ono ka gu boro re bihe kusa nga, gupai ni amangihe re angia gbegberẽpai na ni ki aria gani berã gbiati gani mangaapai, Yekova na bakere nyemu ka mbupai fu ni. (Rk. 15:17-24) Gipai re nga rengo ka si vura du vurũ nga gani ingapai aima du ni kerehe.​—2 Peka 33:9, 12, 13; 1 Tim. 1:15.

7. Ngba gini gene rengbe ani ka mbupai fu gu boro ingipai kuti rani?

⁷ Si nipa ngbarago ka ino gupai nga, gu tindiro berani nga ga sia singia Yekova nika mbupai fu boro ingapai te! Ono wa vura duhe wo, pai kinaho si aida ani mangi diaberã tipaha. Ginipai du ngaha? Ti kura aregbo, boro ima rengba ka ingapai kuti rani​—zavura si kidu nikerehe​—ono, ni ima rengba ka hõmbupai na ni ki sana rani ani mbupai fu ni. Ti kura aregbo, gu boro re ima rengba ka zanga hõmbupai. Ka si vura du wo, ani ima rengba ka sia ka mbupai fu gu boro re na ki asadi ka  zanga du na zinga na ni. Ka gumba guhe nga rengo, gipai re ima rengba ka dia regbo gbiati asadatise, gbe, ka si du nga gu boro re ima imisa rani nikerehe. Gu Ngbaõbambu Sinziri nangia ga Mbirinvuo 15, 1994, aya: “Ho mo ambupai ni fu boro ingapai, gure ayugongo gupai nga mo nambugene tipa aboro niingipai kutiro te. Ho Kristano ambupai ni, gure nayugo gupai nga ni nambu gupai re dunduko ku be Yekova. Ko nga ruru Basapungbanga zegino dunduko, na ko nika ye aye na ruru sarangbanga ti wene regbo.” Tipagine Yekova angarasa rani ti ni ani mbupai fu aboro na ki mbupa ruru sarangbanga ku beko?

8. Waigu pa mbu ani pai fu aboro ayugo gaani tambuahe tipa ga Yekova inapai?

⁸ Ho ani ambupai ni, ani nayugo gupai nga ani na tambuahe tipa ga Yekova inapai. Rogo kura sanza sa, Yesu aringbisi Yekova kuti kura bairasunge sa nambupa bakere bape fu kura gani moyambu, nga gu bape ka gani moyambu aarengbanga ka tumoho ya. Ono gu moyambu i ambupai fu ni re aayugongo inapai fu gu kura ni moyambu nga gu ni naadu na gani marã beni ni tooni ru te. (Mt. 18:23-35) Ginipai du Yesu aayugoho furani? Ka ani du nzunzu na tambuahe tipa ga Yekova bakere inapai furani, si nika sarani ani naambupai fu kura aboro. (Tam. 103:9) Dungu agarã kusayo, Ngbaõbambu Sinziri amoihe ngba gi gene re: “Ka ani vura mbupai fu akuarani bara dunguhe, ka si danga ti bakio wai Mbori ambupai furani na kini yugu inapai rogo Kristo yo te.”

9. Ada Yekova ayugo inapai fuyo? (Matayo 6:14, 15)

⁹ Ka ani mbupai fu aboro, Yekova nika mbupai ambu furani a. Yekova nayugo inapai fu agu aboro du na inapai. (Rk. 6:36; Yak. 2:13) Yesu aima yugo gipai re ziazia ho ko ayugupai ni fu gako abawiriki tipa wai ka manga kparakpee. (Oni gedi Matayo 6:14, 15.) Ani nawirika kina gu bangisapai re ti gupai Yekova apehe fu gu gako moyambu nangia Eyobo. Rago aima gberã nikerehe ti gu ruru bakumba re be gu kere gbegberẽ afugo agu akumba naadu biata nangia Erifaza, Biridada, na Sofara agumbaha. Yekova aya fu Eyobo ko mangi kparakpee tipa yo. Yekova afu maku fu Eyobo kina tifuo mangako kparakpee tipa yo.​—Eyo. 42:8-10.

10. Ngba gini gene ani aimisa kina tirani ho ani anye ni na zinga kuti boro? (AEfeso 4:31, 32)

¹⁰ Ani naimisa kina tirani ho ani anye ni na zinga. Zinga wakina rõrõi tindiro, na Yekova naida ani gbia gu ngbarago naye ti mbu ani zinga. (Oni gedi AEfeso 4:31, 32.) Ko nazungodi rani ani “mbu pa zinga, ki he erã!” (Tam. 37:8) Ka ani mangipai kuti gu rugute re, si nika undo rani aundo. Ho nye ani ni na zinga kuti gu boro mangi rani na gbegberẽpai, ani ima rengba ka imisa kpotorani na gaani berã. (Snz. 14:30) Ho ani anye ni na zinga kuti boro, gupai re aimisanga ni te kina wai ka ani mbiri siimi, ka si aimisanga ni ya. Ono, ho ani ambupai ni fu kura aboro, gure nga ani nafu gamahe fu tirani. (Snz. 11:17) Ani nagbia zereda nga ga berãseyo na ga kpotoseyo na ani nadu na rengba kaa ndu kindi kumbatayo na gaani sunge fu Yekova.

11. Ginipai Baibiri apehe nibipa irobape? (ARomo 12:19-21)

¹¹ Irobape nga ga Yekova. Yekova afunga gu pagbia furani nga ga irobape ti gu boro ingi kuti rani te. (Oni gedi ARomo 12:19-21.) Mbiko gaani zangarengba, ani na rengba ka sapangbanga ni ruruhe wa gu rengbe Mbori ka mangaha te. (Eb. 4:13) Na ti kura aregbo, gaani bipai ima rengba ka nanga rani na ki saha furani ni mbumbuhe tipa ka manga gupai du ni ruruhe. Ga Yekova toro adu kugii Yakoba  ko ke gupai nga: “Gu zinga nga ga boro si amanga nga gu rurupai nga ga Mbori te.” (Yak. 1:20) Ani ima rengba kadu na gu kido nga, Yekova nika manga gupai amanga du ni ruruhe na ko nika yeaye na ruru sarangbanga.

12. Waigu rengbe ani ka yugo gupai nga ani na kido kuti ga Yekova ruru sarangbanga?

¹² Pa mbu ani pai fu boro nayugo gaani kido kuti ga Yekova sarangbanga. Ho ani ambu apai ni ku be Yekova, ani nayugo gupai nga ani na kido nga ko nika dia gu gbegberẽ apai dunduko kusayo ingapai naye na ni. Rogo gako vovo zegino, ani aberãnga pa gu gbegberẽ apai berewe namanga te, ani ‘atíngidanga pa gu bambata apai te si ayé nga ku berãrani yo’ berewe te. (Yes. 65:17) Ono ho boro naimisi rani ni nikerehe, ya mo ani rengbe nzunzu ka mbu gu zinga na kpipai nga gu kaa du ngbaduraniyo? Ani bingo wai kura aboro adu na rengba ka manga gipai re.

13-14. Ginipai oni nawirikihe tipa mbupai ti gu kpiapai nga ga Tony na José?

¹³ Dungu awirinarani aKristano aima diaberã tipa ka mbupai zavura ho gu mangaapai nga ga kura aboro aimisi yo ni ni kerehe. Gini amaku i nagbiaha ti manga yo ho wo?

¹⁴ Dungu agarã kusayo mbata fu Tony, * nga gu ko naraka Philippines yo wiriki rengo, ko aye ka ino gupai nga, kura kumba sa du rimoko nga José du naimi unvurako. Ti gu regbo re, Tony angia kere zingizingi boro ni boro zuu na ko aaida ka irobape. I azi José ku bambukiso yo tipa gako gbegberẽ mangapai. Kusa, fuo kusayo José bambukiso yo, Tony akidohe nga ko du wa ka ko gbata ko na ki imiko. Ko angbe bundu tipa ka imoko na ni. Ti kina gu bangisa regbo re, Tony atona wirika Baibiri na aDezire Yekova. Ko aya, “Rogo gimi wirika Baibiri, mi aye ka ino gupai nga, si naida mi aria gimi asino na gimi mangaapai na nga gu naakoda mbu du na zinga.” Kusa, Tony azi bapatiza na i ki moiko ni bakumba rogo dungurati. Oni berẽnga pa wai ngbako azere ka ino gupai nga, José aima da a ni gu Dezire Yekova naima zio bapatiza! Ho i agbia tiyo ni, i adungo tiyo, na Tony ki pe gupai fu José nga ko ima mbupai fuko. Tony ape gupai nga, gupai ko amangihe nga  ka mbupai fu José re aima ye na bakere ngbarago fuko na si aima kpakara fuko ko sakipa gu bakere ngbarago re. Nirengo, Yekova aima fu maku fu Tony tipa wai ko adu na nyemu ka mbupai.

15-16. Ginipai oni nawirikihe nibipa mbupai ti gu kpiapai nga ga aPeter na Sue?

¹⁵ Rogo 1985, aPeter na Sue adu badunguratise yo Bambu Kindo yo ho bombu asu ni. Kura kumba namoi bombu Bambu Kindo yo! Gi bombu re asu na si ki ye na gu kerepai kuti Sue nga ka ri ngerenga na ka giapai rogo gari raka yo berewe ya. Na ri aima zanga agu apapara boro ninaasa ni ni naagia fuõ he. * Peter na Sue anaasana tiyo dedede nga, ‘Gini ngbatunga boro rengbe ka manga gbegberẽpai wa gu re?’ Fuo dungu agarã kusa, i azi gu kumba ku bambukiso yo tipa gako raka dunduko namoi gu bombu re, na ko aangianga ga Yekova moyambu te. Ho i asana aPeter na Sue ni ka ngia i mbupai fuko, i aya: “Yekova nayugo gupai furani nga, ka nye na zinga, si ima rengba ka gbarasapa kpotorani, gaani nyemuapai, na gaani berã. Sidu, kusa fuo su gu bombu re, ani asana Yekova ko undo rani ani mbu du na zinga tipa wa ka ani raki gaani raka rogo zereda.”

¹⁶ Ya mo si niidu fuyo taata i mbupai fu gi kumba re? Si naadunga fuyo taata ti aregbo dunduko te. I andu kindi kumbatayo ki ya: “Ti kura aregbo, ho Sue ninaambu ni be agu apai gi bombu re aye na ni kuti ri, ani nidu na zinga berewe. Ono ani ninaanyenga kaa berã kina kurii gipai re te, gu zinga re ninaago niipo. Ani ima rengba ka pe gupai ni rengo nga, ka gu boro namoi gu bombu re da ni Dezire Yekova rogo kura uru sa, ani diko adia kugume. Gi kpiapai re ima yugo gupai furani nga, ho ani amangapai ni kuti gu bangua arengo nga ga Baibiri, ani nagbia zereda; nirengo, agu abangua rengo nga ga Baibiri nafu zereda furani ngba bakere agene! Ani ninaagbia wasa a mbiko ani ima ino gupai nga, Yekova nika dia gbegberẽ apai dunduko kusayo barambeda.”

17. Ginipai oni nawirikihe nibipa mbupai ti gu kpiapai nga ga Myra?

 ¹⁷ Myra awiriki rengo ho ri aima dia kumba ni na rukutu agude ue kidu beyo. Kumbari aaidanga na rengo te. Fuo bete regbo kusa, ko amangi bari na ki mbu gako aborokporo. Myra aya: “Ho kumbami ambu re ni gbiati awirani ue, mi adu na gu bipai dungu aboro nidu na ni ho gayo boro i nakpinyemu ni ambu yo ni, mi abi tire nga, mi du nasa gupai nga kumbami mangi agu apai ko amangihe re na mi adu na zinga.” Wa vura duhe nga, gu rogatise re aima digo, ri aima du na gberãrago nga kumbari asamungu kuti ri. Myra andu kumbatayo kindi ki ya: “Mi aandu kindi kumbatayo kaa du na gberãrago tipa dungu adiwi, na mi aye ka ino gupai nga, gipai re aagbarasa pa gimi pagume na Yekova gbiati kura aboro.” Myra nape gupai awere nga, ri berewe na zinga te, na ri aidanga gbegberẽpai mangi kuru kumbari te. Ri na gu maabangirise nga, rogo kura uru sa, ko ambeda ambeda na Yekova. Myra na rengba awere ka maaberã ri tipa kumbatayo. Wangia ri gu naagude adunga gari badiarogatise ti ni ya, ri ima sonosa awiri ue i da ni ga Yekova amoyambu. Areme, Myra na gu ngbarago nga ga iriso Yekova na awiiri gbiati gayo aborokporo.

18. Gini kido rengbe ani kadu na ni kuti Yekova wangia ko Bakere Basapungbanga?

¹⁸ Ani nagbia bakere zereda mbiko ino ani gupai nga, si aidanga ani mangi diaberã tipa wai si aida i sapungbanga boro te! Wangia Yekova Bakere Basapungbanga, ko ima ino wai ka manga gi nyanyakipa sunge re. (Rom. 14:10-12) Ani ima rengba kadu na gu kido nga, ko nikaa sapangbanga ti aregbo dunduko ringbisihe kuti gu gako rengberengbe arugute nga gu du tipa rurupai na gbegberẽpai. (Bam. P. 18:25; 1 Aba. 8:32) Ka ko mangingo gupai du ni irairaha te!

19. Ginipai ga Yekova ruru sarangbanga nika mangaha?

¹⁹ Ani nangera kumbatayo na bakere nyemu gu regbo Yekova nika dia gu gbegberẽ apai kusayo dunduko ti ni, gu zangarengba gbiati ingapai nga ga aboro naye na ni. Ti gu regbo re, Yekova nika husa gaani aarõ nga ga borose gbiati gu fudifudiapai nga ga berãse yo nyeanye kindi. (Tam. 72:12-14; Yugo. 21:3, 4) Ani atingidanga paha berewe te. Wa ani apido gupai nga gu bawene regbo re ye, ani na bakere tambuahe fu Yekova mbiko ko ima fu gu tandu furani nga ga wirika ko ni mbu ani pai fu aboro.