1. Wa a som a di sitn dem we mek som a wi breda an sista dem fried?

 LUK pan wa did apm tu dem piipl ya. Wi av Nestor an im waif, María, we did waahn fi go elp out we dem did waahn muo elp fi du di priichin wok. * Bot fi dem fi kyan go du dis dem did afi chienj op ou dem did a liv. Bot dem did fiil se ef dem chienj op di wie ou dem liv, dem wudn api kaa dem wuda afi a liv aafa les moni. An den wi av Biniam, we afta im ton wan Jeuova Witnis iina wan konchri we di wok did anda lakdong, im did fain out se dem did a chriit di Jeuova Witnis dem bad an a put dem iina prizn, an dat did mek im fried. Bot muo dan wa dem wuda du tu im, im did muo fried a wa im fambili wuda du tu im wen dem fain out se im ton wan Jeuova Witnis. An den wi av Valérie uu did av wan bad kain-a kyansa, an shi did a fain it aad fi fain wan dakta uu wuda aarait fi apariet pan ar an no gi ar no blod, kaa shi waahn fi fala wa di Baibl se. So wi kyan si wa mek shi did fried se shi mait-a ded.

2. Wa mek wi fi chrai aad fi no tuu friedi-friedi?

² Dem sitn ya eva mek yu fried tu? Mmhm, a wol iip a wi it apm tu. So wi si se wi fi chrai fi no tuu friedi-friedi. Kaa ef wi tuu friedi-friedi wi a-go du som sitn we no mek sens, an it a-go mek wi an Jeuova no kluos agen, an a dat Sietan waahn fi apm. Sietan waahn wi so fried dat wi tap du wa Jeuova waahn wi fi du, laik fi go priich bout di gud nyuuz. (Rev. 12:17) Sietan wikid an powaful an im naa tap chrai du tingz fi mek wi tap sorv Jeuova. Bot yu kyan du  tingz fi mek im no tap yu fram sorv Jeuova. Wa a som a di sitn dem we yu kyan du?

3. Wa kyan elp wi fi no so friedi-friedi?

³ Wen wi nuo fi shuor se Jeuova lov wi an wi nuo se im aalwiez de de fi wi, dat kyan mek wi fait gens Sietan an win! (Sa. 118:6) Wen wi luk pan di sumadi we rait Saam 118, wi si se im did go chuu som wol iip a sitn. Im did av nof enimi we a fait gens im. Som a dem did a som tap-a-tap man (vors 9, 10). Somtaim im did schres out til im waahn gi op (vors 13). An Jeuova rof im op bad (vors 18). Bot aalduo im go chuu aal a dat, im se: “Mi naa go fried.” Bot wa mek im neehn fried? A kaa im nuo se iivn duo Jeuova did rof im op, im nuo se Jeuova im Faada we op iina evn lov im bad bad. Im nuo se no mata wa im a go chuu, im Gad Jeuova lov im an aalwiez a-go di de fi’im.​—Sa. 118:29.

4. Kaa wi nuo se Jeuova lov wi, wa a chrii tingz we wi na’afi fried fa?

⁴ Wi fi aalwiez memba se Jeuova lov evri wan a wi. Wen wi nuo dat, wi naa go mek dem chrii sitn ya mek wi friedi-friedi agen: (1) fried se wi naa go kyan main wi fambili, (2) fried a piipl, an (3) fried se wi a-go ded. Yu si di breda an sista dem we wi taak bout iina di fos paragraaf, kaa dem si se Jeuova lov dem, dem neehn so friedi-friedi agen.

5. Wa a som sitn we kyan mek di sumadi we a di ed fi dem fambili wori an fret? (Luk pan di picha pan di kova.)

⁵ Wan Kristiyan we a di ed a im fambili nuo se a im fi main im fambili an im tek it siiros. (1 Tim. 5:8) Ef a yu a di ed a yu fambili, sins KUOVID staat it mait-a luk laik se yu wuda luuz yu wok, no chuu? Yu mait-a did staat fi fiil fried se yu naa go kyan fain no fuud fi fiid yu fambili, an se yu naa go kyan fain no moni fi pie yu rent ar fi don pie fi yu ous. An yu mait-a did a fret se ef yu luuz yu wok, yu naa go kyan fain wan neda wan. Ar jos laik ou Nestor an María did fried fi chienj op dem laif, a so yu mait-a fried tu fi chienj yu wok, kaa yu mait-a afi go du widout sortn tingz we yu yuus tu. Kaaz a dem sitn ya, Sietan mek wol iip a piipl tap sorv Jeuova.

6. Wa Sietan waahn wi fi biliiv se?

⁶ Sietan waahn wi fi biliiv se Jeuova no bizniz wid wi​—wi de pan wi uon. Im waahn wi fi fiil se Jeuova naa go elp wi fi main wi fambili. An kaa a dat wi mait-a fiil se wi afi du eniting fi kip wi wok, aal ef a sitn we Jeuova no waahn wi fi du.

7. Wa Jiizas mek wi nuo se?

⁷ Jiizas, we nuo wi Faada Jeuova beta dan enibadi els, mek wi nuo se wi Gad “nuo wa [wi] niid iivn bifuo [wi] aks im fi it.” (Mat. 6:8) An Jiizas nuo se Jeuova redi fi gi wi evriting we wi niid. Kaa wi a Kristiyan, wi a paat a Gad fambili an Jeuova a di Ed a da fambili de. So im a-go mek shuor se im du wa im tel di fambili ed dem fi du iina 1 Timoti 5:8.

8. (a) Wa kyan elp wi fi no fried se wi naa go kyan main wi fambili? (Matyu 6:31-33) (b) Ou wi kyan du laik da ozban an waif ya uu a kyari som fuud go gi wan sista?

⁸ Wen wi nuo fi shuor se Jeuova lov wi an im lov wi fambili tu, wi naa go av no prablem fi biliiv se im a-go tek kier a wi an se im a-go gi wi aal a di sitn dem we wi niid. (Riid Matyu 6:31-33.) Jeuova wel waahn fi tek kier a wi an im riili a tek kier a wi! Wi si dat wen wi luk pan di wie ou im  mek di ort an di sitn dem pan it. Im no onggl mek it wid di sitn dem we wi niid fi liv, bot im mek it so wi kyan enjai wiself. (Jen. 2:9) Aal ef a onggl likl bit a sitn wi av fi mek it chuu, wi afi stil glad se wi a go chuu an Jeuova naa ramp fi tek kier a wi. (Mat. 6:11) Wi fi aalwiez memba se eniting we wi gi op komiin laik notn wen wi luk pan wa wi Gad a gi wi nou an wa im a-go gi wi iina di fyuucha. Dat a wa Nestor an María get fi si se.​—Aiz. 65:21, 22.

9. Wa wi kyan lorn fram wa Nestor an María did du?

⁹ Nestor an María we liv iina Kolombiya did liv iina wan nais ous, an di tuu a dem did av wan gud jab. Dem se: “Wi did waahn fi du muo fi Jeuova bot wi did fried se ef wi neehn stil av wi gud jab an av wi moni fi bai wa wi waahn, den wi naa go api.” Wa did elp dem fi no fried fi lef dem big jab an fi go du muo fi Jeuova? Dem tingk bout di uol iip a taim dem wen Jeuova du tingz fi mek dem si se im lov dem. So kaa dem did nuo se Jeuova wuda tek kier a dem, dem lef dem big wok an dem sel dem ous an muuv go wan paat a di konchri we dem did niid elp fi du di priichin wok. Ou dem fiil bout wa dem did du? Nestor se: “Wi si se wa Matyu 6:33 se a so it go fi chuu. Wi av evriting we wi niid an wi muo api ya nou.”

10. Wa mek it wudn aad fi biliiv se som piipl wuda fried a ada piipl?

¹⁰ A fram lang taim piipl a du tingz fi ort dem wan aneda. (Iik. 8:9) Laik ef dem av likl powa dem yuuz it fi ort ada piipl, an yu av kriminal we du som wikid sitn tu piipl, an yu av som pikni we a go a skuul go chobl ada pikni an mek tingz aad fi dem, an yu av som piipl we a chriit dem fambili bad an a biit biit dem op. So wi kyan si wa mek som piipl fried a ada piipl so! Ou Sietan yuuz it gens wi wen wi fried a ada piipl?

11-12. Wen wi fried a piipl, ou Sietan yuuz it gens wi?

¹¹ Sietan chrai fi mek wi fried a piipl so dat wi tap priich ar tap du di sitn dem we Jeuova waahn wi fi du. Sietan inviigl som a di govament dem fi put wi wok anda lakdong an fi mek tingz aad fi wi an put wi iina prizn. (Luuk 21:12; Rev. 2:10) Iina da worl ya we Sietan a kanchuol, im a yuuz nof piipl fi tel lai pan di Jeuova Witnis  dem. An nof piipl we biliiv dem lai ya mait-a staat fi mak wi an biit wi op, an diil wid wi wikid. (Mat. 10:36) Bot wi no sopraiz se aal a dis a gwaan, kaaz a no di fos im a dwi’it. Im did yuuz it pan di Kristiyan dem we did de bout wen di Baibl did a rait.​—Aks 5:27, 28, 40.

¹² A no onggl fi fried a wa govament kyan du wi Sietan a yuuz gens wi kaa fi som piipl dem no fried a lik an biit op. Wa dem fried a, a wa dem uona fambili wuda du an se ef dem ton wan Jeuova Witnis. Dem lov dem fambili an dem wuda waahn dem fi kom nuo bout Jeuova so dem kyan get fi lov im tu. Dem fiil a wie wen dem ier dem piipl dem a taak bad bout Jeuova an im piipl dem we a sorv im. Bot som a di taim, som a dem fambili we neehn laik it se dem ton wan Jeuova Witnis kom ton wan Jeuova Witnis tu. Bot tingk bout it, supuoz wi fambili ton dem bak pan wi kaa a wa wi biliiv ya nou, wa wi a-go du?

13. Kaa wi nuo se Jeuova lov wi, ou dat kyan elp wi wen wi fambili dem ton dem bak pan wi? (Saam 27:10)

¹³ It mek wi fiil gud wen wi tingk bout wa it se a Saam 27:10. (Riid.) Wen wi memba umoch Jeuova lov wi, it wi mek wi no fried wen piipl a fait gens wi. An wi nuo se wen wi eng aan an tan op chrang, Jeuova a-go bles wi. Jeuova a-go gi wi evriting we wi niid fi liv. Im a-go elp wi fi no wori wori op wiself, an im a-go elp wi fi enjai wi laif. An im a-go elp wi fi tan kluos tu im. Nobadi els kyaahn tek kier a wi laka im! Dat a wa Biniam did fain out se bout Jeuova.

14. Wa yu kyan lorn fram wa Biniam did go chuu?

¹⁴ Biniam did stil ton wan Jeuova Witnis aalduo im nuo se di govament iina di konchri we im liv did a mek tingz aad fi dem. Luk pan ou kaa Biniam nuo se Jeuova lov im, dat mek im neehn fried a piipl agen. Im se: “Di wikid sitn dem we dem did a du tu dem did wos dan mi kuda eva tingk bout”. Bot im se: “Iivn muo dan wa di govament did a du tu di Jeuova Witnis dem, mi did muo fried a wa mi uona fambili wuda du an se ef mi ton wan Jeuova Witnis. Mi did fried se mi faada wuda fiil se mi woklis an mi naa du notn wid mi laif. An a siem so mi fiil se di res a mi fambili wuda fiil bout mi tu.” Bot Biniam did nuo se Jeuova aalwiez tek kier a di piipl dem we im lov. Dis a wa im se: “Mi  tingk bout ou Jeuova elp ada piipl wen dem no av no moni an dem a go chuu aad taim, an wen piipl a fait gens dem kaaz a di kola a dem skin an wich paat dem kom fram, an wen piipl gyang op pan dem an a biit biit dem op. So mi did nuo se ef mi stik tu Jeuova no mata wa, an du wa im se, im wuda bles mi. Aal wen dem lak mi op wol iip a taim an dem du som wikid sitn tu mi, mi kyan tel yu se mi si umoch Jeuova elp im piipl dem wen dem niid elp ef dem stik tu im.” Jeuova did a wan riil Faada tu Biniam, an Jeuova piipl dem did du tingz fi shuo se dem a im fambili tu.

15. Wa mek it aarait ef wi fried se wi, ar sumadi we wi lov mait-a ded?

¹⁵ Di Baibl se det a wan enimi. (1 Kor. 15:25, 26) Wi mait-a staat fi wori an fret ef wi tingk se wi ar sumadi we wi lov sik bad an mait-a ded. Wa mek wi fried fi ded? Dis a kaa Jeuova mek wi fi waahn fi enjai laif an fi liv fi eva. (Iik. 3:11) Som a di sitn dem we wi mek op wi main fi du a kaa wi no waahn fi ded. So wi a-go du tingz fi tek kier a wiself. Laik wi a-go eksasaiz aafn, an wi a-go nyam gud fuud, an wi a-go go a dakta wen wi sik an tek di sitn dem we di dakta se wi fi tek so das wi kyan get beta, an wi naa go du notn kielis wid wi laif niida.

16. Kaa wi no waahn fi ded, ou Sietan chrai fi yuuz dat gens wi?

¹⁶ Sietan nuo se wi lov laif. An im kliem se wi wuda gi op evriting we wi av an wi guda aal ton wi bak pan Jeuova jos fi siev wi laif. (Juob 2:4, 5) Bot wi don nuo a lai Sietan did a tel! Yu si kaa Sietan ‘av di powa fi kil piipl,’ an im nuo se wi no waahn fi ded, im yuuz dat fi chrai fi mek wi ton wi bak pan Jeuova. (Iib. 2:14, 15) Somtaim Sietan inviigl som piipl fi chretn fi kil di wan dem we a worship Jeuova ef dem no tap sorv im. An somtaim Sietan nuo se wi sik bad so im yuuz dat gens wi tu. So wi mait-a fain se di dakta dem an som a wi fambili dem we naa sorv Jeuova staat fi presha wi fi tek di blod, an wi nuo se Jeuova no waahn wi fi du dat. Ar sumadi mait-a tel wi se wi fi du som ada chriitment we Jeuova no waahn wi fi du.

17. Bies pan wa Ruoman 8:37-39 se, wa mek wi na’afi fried fi ded?

¹⁷ Aalduo wi no waahn fi ded, wi nuo se ef wi ded Jeuova naa go tap lov wi. (Riid Ruoman 8:37-39.) Wen sumadi we Jeuova lov ded, im stil memba dem. A laik dem stil alaiv tu im kaa im naa figet dem. (Luuk 20:37, 38) Im wel waahn fi gi dem bak laif. (Juob 14:15) Jeuova gi op nof fi wi so dat wi kyan “liv fi eva.” (Jan 3:16) Wi nuo se Jeuova riili lov wi an im a-go tek kier a wi. So insted-a wi a ton wi bak pan Jeuova wen wi sik, ar wen it luk laik se wi a-go ded, a da taim de wi fi ton tu Jeuova fi im osh wi, an fi im mek wi waiz, an fi im gi wi di chrent we wi niid fi tan op chrang. An a dat Valérie an ar ozban did du.​—Sa. 41:3.

18. Wa yu kyan lorn fram wa Valérie did go chuu?

¹⁸ Wen Valérie did a 35 ier uol, dem fain out se shi av wan bad kain-a kyansa we nof piipl no av. Wi a-go fain out ou bikaa shi nuo se Jeuova lov ar, shi neehn fried fi ded. Shi se: “Evriting chienj wen wi fain out se mi av kyansa. Di dakta dem did niid fi du wan big aparieshan pan mi fi mi no ded. Bot wen mi taak tu som difrant difrant dakta, non a dem neehn waahn fi du da big aparieshan de ef mi naa tek blod. Mi naa tel no lai, mi did fried fi wa  mait-a apm, bot mi nuo wa Jeuova se bout blod, so mi did don mek op mi main se mi naa tek it! Bot wen mi tap an tingk bout aal a wa Jeuova du fi mi, mi si se im riili lov mi. Nou a fi mi taim fi shuo im se mi lov im tu. So evritaim wen mi ier som bad nyuuz bout mi siknis, it push mi fi gwaan du wa mi niid fi du fi mek Jeuova proud a mi, an fi mek shuor se Sietan no win. Afta aal a dis, mi get fi du di aparieshan widout blod an evriting wok out gud. Ye, mi stil sik, bot Jeuova aalwiez de de fi mi. Wan a di wie dem ou Jeuova shuo se im aalwiez de de fi mi, a das jos bifuo mi fain out ou sik mi bi, di Wachtowa lesn we wi du da wiik de did a elp wi fi si ou wi kyan diil wid prablem an schres iina laif an no fried. * It did mek wi fiil beta. Wi did afi riid it wol iip a taim. Wa did elp mi an mi ozban fi tingk chriet an fi du di rait sitn dem, an wa did gi wi piis iina wi aat, a som lesn laik da wan ya. An sitn els we elp wi a wen wi riid wi Baibl an go a wi miitn dem, an du ada tingz we elp wi fi stie kluos tu Jeuova.”

19. Wa an wa suun gwaan?

¹⁹ Kaa Jeuova a elp im piipl dem we de aal uova di worl, dem kyan nuo ou fi diil wid dem prablem dem iina wan gud wie an tan op chrang chrang gens di Devl. (1 Pii. 5:8, 9) Bot ges wa, yu kyan dwi’it tu! Suun suun, Jeuova a-go mek Jiizas an di ada wan dem we a ruul wid im iina evn, kom “mash op di devl wok.” (1 Jan 3:8) Yu si afta dat, di piipl dem we a sorv Jeuova pan di ort, “dem naa go fiil fried, an notn naa go di de fi mek dem fiil fried niida.” (Aiz. 54:14; Mai. 4:4) Til dem de taim de kom, wi afi wok aad rait ya nou fi mek shuor se wi no friedi-friedi.

20. A wa a-go elp wi fi tap friedi-friedi?

²⁰ Wi fi du tingz fi mek wi memba se Jeuova lov wi an im a protek di wan dem we a sorv im. Wa a-go elp wi fi du dis a wen wi tingk bout ou Jeuova protek im piipl dem bak iina di diez, an wen wi tingk bout ou Jeuova elp wi wen wi a go chuu wi prablem dem. Ye man! Fram Jeuova a elp wi, wi nuo se wi na’afi friedi-friedi.​—Sa. 34:4.