1. Medu di kuzê ki nu pode ten?

 PENSA na kel situason li ki alguns irmon pasa pa el. Nestor ku se mudjer Maria, krê sirbiba na undi ki tinha más nisisidadi. b Pa es konsigi fazeba kel-li es meste prende gastaba ménus dinheru. Má es tinha medu ma si es viveba ku más poku es pode ka sérba filís. Kantu Brunu bira Tistimunha di Jeová na un país ki govérnu é kóntra nos trabadju, el da kónta ma dja ki el ta sirbiba Deus, el pode sérba pirsigidu. Kel-li pô-l ku medu. Má el fika ku más medu inda di modi ki se família pode reajiba óras ki es daba kónta ma el bira Tistimunha di Jeová. Valéria atxadu ku un tipu di kánser gravi i el staba ta sforsa pa atxa un dotor ki ta ruspetaba se krénsas ku bazi na Bíblia sobri sangi. É klaru ki el xinti medu di móre.

2. Pamodi ki nu meste sforsa pa vense nos medu?

² Dja bu kustuma xinti medu di kes kuza li? Txeu di nos dja xinti. Si nu ka prende kontrola nos medu, nu pode toma disizons mariadu ki pode prujudika nos amizadi ku Jeová. I é kel-li ki Satanás krê. Tanbê el ta tenta uza nos medu pa pô-nu ka ta obi ku leis di Jeová, sima ku kel lei di prega notísias sábi. (Apo. 12:17) Satanás é mau i el ten txeu puder. Má modi ki bu pode proteje di el?

3. Kuzê ki ta djuda-nu vense nos medu?

 ³ Óras ki nu sta konvensidu ma Jeová ta ama-nu i ma el sta di nos ladu, Satanás ka ta pô-nu xinti medu. (Sal. 118:6) Pur izénplu, skritor di Salmo 118 pasa pa alguns situason difísil. El tinha txeu inimigu i alguns di es éra inportanti. (versíklus 9 i 10) Alvês el ta pasaba pa txeu preson. (versíklu 13) I Jeová disiplina-l. (versíklu 18) Má simé, kel salmista kanta: ‘N ka ta xinti medu.’ Kuzê ki pô-l ta xinti suguru? El sabia ma nbóra Jeová daba el un disiplina duru el ta amaba el txeu. El staba konvensidu ma ka ta nporta ki situason ki el pasaba pa el, se Deus ki ta amaba el txeu staba sénpri prontu pa djudaba el. — Sal. 118:29.

4. Medu di kuzê ki nu pode vense si nu kunfia ma Jeová ta ama-nu?

⁴ Nu meste sta konvensidu ma Jeová ta ama-nu. Kel-li ta djuda-nu vense medu di três kuza: (1) medu di ka konsigi sustenta nos família, (2) medu di ómi i (3) medu di mórti. Kes irmon ku irmans ki nu pâpia di el na komésu di es studu, konsigi vense ses medu pamodi es tinha sertéza ma Jeová ta ama-s.

5. Ki situasons pode poi un xéfi di família txeu preokupadu? (Odja fotu na kapa.)

⁵ Un xéfi di família ki ta sirbi Deus ta leba asériu se responsabilidadi di kuida di se família. (1 Tim. 5:8) Si bo é xéfi di família, talvês duránti es ténpu di koronavírus bu xinti medu di perde bu trabadju. Talvês bu fika preokupadu ku modi ki bu ta poi kumida na méza i modi ki bu ta paga rénda. Tanbê, talvês bu fika ku medu ma si bu perdeba bu trabadju bu ka ta konsigi atxaba otu. Ô sima Nestor ku Maria, ki dja nu papiaba di el antis, talvês bu fika ta pensa ma bu ka ta konsigi vive ku ménus dinheru. Satanás konsigi poi txeu algen para di sirbi Jeová pamodi es xinti medu di kes kuza li.

6. Kuzê ki Satanás ta tenta pô-nu ta kridita na el?

⁶ Satanás ta tenta pô-nu ta kridita ma Jeová ka ta preokupa ku nos i ma el ka ta djuda-nu kuida di nos família. Pamodi kel-li nu pode pensa ma nu ten ki faze tudu kuza pa nu ka perde nos trabadju, sikrê nu ten ki prujudika nos amizadi ku Deus.

7. Kuzê ki Jizus ta garanti-nu?

⁷ Ka ten ningen ki konxe Pai sima Jizus. I el ta garanti-nu ma nos Deus ‘sabe di kuzê ki nu meste, mésmu antis di nu pidi-l.’ (Mat. 6:8) I Jizus sabe ma Jeová sta prontu pa da-nu kel ki nu meste. Dja ki nu ta sirbi Deus, nu ta faze párti di se família. Jeová é Xéfi di família, pur isu nu pode ten sertéza ma el ta ruspeta kel prinsípiu ki sta na 1 Timóteo 5:8.

8. (a) Kuzê ki pode djuda-nu vense medu di ka konsigi sustenta nos família? (Mateus 6:31-33) (b) Modi ki nu pode imita izénplu di kel kazal na fotu ki sta leba un irman kumida?

⁸ Óras ki nu sta konvensidu ma Jeová ta ama-nu i ma el ta ama nos família, nu ka ta ten prubléma na kridita ma nu ta ten kes kuza ki nu meste. (Lé Mateus 6:31-33.) Jeová krê da-nu kes kuza ki nu meste. El ta ama-nu i el gosta di da. Kantu el faze Téra el ka  da-nu sô kes kuza ki nu meste pa nu ka móre, má ku amor, el intxi Téra ku kes kuza ki ta pô-nu xinti sábi. (Gén. 2:9) Sikrê alvês nu tene sô kel ki nu meste pa nu vive, nu debe lenbra di kenha ki sta ta da-nu el. Jeová ka ta dexa di da-nu kel ki nu meste. (Mat. 6:11) Nu debe lenbra sénpri ma kel ki Jeová ta da-nu ten mutu más valor di ki kalker kuza material ki nu dexa pa tras. I na futuru el ta ben da-nu vida pa tudu ténpu. É kel-li ki Nestor ku Maria da kónta. — Isa. 65:21, 22.

9. Kuzê ki bu pode prende ku izénplu di Nestor i Maria?

⁹ Nestor ku Maria tinha un vida sábi na Kulónbia. Es fla: “Nu pensa na bira nos vida más sinplis pa nu pode faze más txeu pa Jeová. Nu tinha medu ma si nu vive ku ménus dinheru nu pode ka sérba filís.” Kuzê ki djuda-s vense ses medu? Es pensa na kes txeu manera ki Jeová dja mostraba se amor pa es. Es staba konvensidu ma Jeová sénpri ta kuidaba di es. Pur isu, es larga ses trabadju ki es ta ganhaba dretu. Es bende ses kaza i es muda pa un párti di país undi ki tinha más nisisidadi. Modi ki es xinti ku kel disizon li? Nestor fla: “Nu odja ma kel ki sta na Mateus 6:33 é verdadi. Nunka ka falta-nu nada, i gósi nos é más filís.”

10. Pamodi ki é normal algen xinti medu di kunpanheru?

¹⁰ Désdi ki Adon ku Eva rabela kóntra Jeová, algen sta ta prujudika kunpanheru. (Ecl. 8:9) Pur izénplu, alguns algen ta uza ses autoridadi pa trata otus algen mariadu i pa faze violénsia. Kes ki sta na skóla ta sufri abuzu di kolégas i alguns algen ti ta maltrata ses família. Nu ka ta fika dimiradu di odja ma ómi ten medu di ómi. Modi ki Satanás ta uza medu di ómi kóntra nos?

11-12. Modi ki Satanás ta uza medu di ómi kóntra nos?

¹¹ Satanás ta uza medu di ómi pa tenta pô-nu ta para di prega ô di faze otus kuza ki Jeová ta fla-nu pa nu faze. Pamodi influénsia di Satanás, alguns  govérnu proíbi nos trabadju i es pirsigi-nu. (Luc. 21:12; Apo. 2:10) Na mundu di Satanás, txeu algen ta spadja informasons falsu i mintiras gravi sobri Tistimunhas di Jeová. Kes algen ki ta kridita na kes mintira li pode faze-nu trósa ô ti ataka-nu. (Mat. 10:36) Nu ta fika dimiradu ku kes armadilha di Satanás li? Klaru ki nau. El sta ta uza-s désdi ténpu di apóstlus. — Atos 5:27, 28, 40.

¹² É ka sô medu di opozison di govérnus ki Satanás ta uza. Pa alguns algen, medu di modi ki ses família ta reaji pamodi es bira Tistimunha di Jeová é más txeu di ki kalker abuzu ki es pode sufri. Es ta ama kes algen di ses família txeu i es krê pa es konxe Jeová i pa es ama-l. Ta due-s txeu obi kes algen di ses família ta pâpia sen ruspetu di Jeová i di se sérvus. Na alguns situason, alguns família ki na komésu éra kóntra dipôs seta verdadi. Má, imajina ma kes algen di nos família ta para di pâpia ku nos pamodi kes kuza ki nu ta kridita na el. Modi ki nu ta reaji?

13. Modi ki sta konvensidu ma Deus ta ama-nu ta djuda-nu si nos família bandona-nu? (Salmo 27:10)

¹³ Kes palavra bunitu ki sta na Salmo 27:10 ta konsola-nu. (Lé.) Óras ki nu lenbra di modi ki Jeová ta ama-nu, nu ta xinti suguru si nu sta pasa pa opozison. I nu ta kunfia ma el ta rekonpensa-nu si nu aguenta firmi. Jeová ta da-nu tudu kuza ki nu meste pa nu vive, pa nu ser filís i pa nu ten un fé fórti. I el ta faze kel-li más di ki kalker otu algen. I é kel-li ki Brunu, ki dja nu papiaba di el antis, da kónta.

14. Kuzê ki bu ta prende ku izénplu di Brunu?

¹⁴ Brunu bira Tistimunha di Jeová sikrê el sabia ma govérnus staba ta pirsigi-s na se país. Odja modi ki sabe ma Jeová ta ama-l djuda Brunu vense medu di ómi. El fla: “Pirsigison éra más di ki kel ki N staba ta pensa. Má é ka éra pirsigison di govérnu ki ta poba mi ku más medu, éra opozison di nha família. N tinha medu ma nha dizison di bira Tistimunha di Jeová ta poba nha pai ta fika tristi i ma nha família  ka ta ruspetaba mi más.” Má Brunu tinha sertéza ma Jeová sénpri ta kuida di kes ki el ta ama. Brunu fla: “N pensa na modi ki Jeová djuda otus ka dizisti sikrê ku falta di dinheru, prekonseitu i violénsia. N sabia ma si N fikaba na ladu di Jeová, el ta abensuaba mi. Kantu N podu prézu txeu bês i N torturadu, N odja ma Jeová sénpri ta djuda-nu si nu kontinua fiel pa el.” Jeová bira un Pai di verdadi pa Brunu i se povu prova ma es éra se família.

15. Pamodi ki é normal nu xinti medu di mórti?

¹⁵ Bíblia ta fla ma mórti é un inimigu. (1 Cor. 15:25, 26) Nu pode fika preokupadu di pensa na mórti, prinsipalmenti óras ki nos ô un algen ki nu krê txeu tene un duénsa gravi. Pamodi ki nu ten medu di mórti? Pamodi Jeová faze-nu ku dizeju di vive pa tudu ténpu. (Ecl. 3:11) Má ten medu di mórti pode djuda-nu proteje nos vida. Pur izénplu, el pode pô-nu ta toma bons dizison sobri nos diéta, faze izersísiu, djobe ajuda di dotor, toma ramedi óras ki nu meste i ivita poi nos vida na prigu sen nisisidadi.

16. Modi ki Satanás ta tenta uza medu di mórti?

¹⁶ Satanás sabe ma nu ta da nos vida valor. I el ta fla ma nu ta dizisti di tudu kuza, ti di nos amizadi ku Jeová, sô pa nu kontinua bibu. (Jó 2:4, 5) Kuzê ki el fla é ka verdadi. Má dja ki Satanás ten ‘puder di poi algen ta móre,’ el ta tenta uza medu di mórti pa pô-nu ta bandona Jeová. (Heb. 2:14, 15) Na alguns situason kes algen ki Satanás ta kontrola ta amiasa mata sérvus di Jeová si es kontinua ta adora-l. Ô alvês, Satanás pode odja ma nu sta duenti i el pode uza kel oportunidadi li pa pô-nu ta seta un tratamentu ki é kóntra leis di Deus. Kes dotor ô família ki ka ta sirbi Jeová pode faze-nu preson pa nu toma sangi, ki é kóntra prinsípius di Bíblia. Ô un algen pode tenta konvense-nu pa nu seta otu tratamentu ki Bíblia ka ta aprova.

17. Sima sta na Romanos 8:37-39, pamodi ki nu ka meste xinti medu di mórti?

¹⁷ Nbóra nu ka krê móre, nu sabe ma Jeová ta kontinua ta ama-nu sikrê kel-li kontise. (Lé Romanos 8:37-39.) Óras ki amigus di Jeová ta móre, el ta guarda-s na se mimória sima si inda es sta bibu. (Luc. 20:37, 38) El ten gana di pô-s ta vive otu bês. (Jó 14:15) Jeová paga un présu grandi asi pa nu pode ‘ten vida pa tudu ténpu.’ (João 3:16) Nu sabe ma Jeová ta ama-nu txeu i ma el ta kuida di nos. Pur isu, envês di bandona Jeová óras ki nu sta duenti ô óras ki nu amiasadu di mórti, nu ta djobe konsolu, sabedoria i forsa na el. I é kel-li própi ki Valéria ku se maridu faze. — Sal. 41:3.

18. Kuzê ki bu pode prende ku izénplu di Valéria?

¹⁸ Kantu Valéria tinha 35 anu, el fika ta sabe ma el tinha un tipu di kánser gravi. Odja modi ki amor djuda-l vense medu di mórti. El fla: “Nha duénsa muda nos vida di un óra pa kel otu. N meste fazeba un operason grandi asi pa N ka moreba. N pâpia ku txeu dotor, má tudu es nega opera-m sen sangi. N tinha medu, má pamodi kel ki  lei di Deus ta fla N nega toma sangi. Duránti tudu nha vida Jeová mostra-m txeu amor. Kel-li éra nha oportunidadi di mostra nha amor pa el. Tudu bês ki N ta resebeba un notísia mariadu, N ta fikaba más disididu na poi Jeová ta fika kontenti ku mi i ka dexa Satanás ganha. Ti ki enfin N konsigi faze kel operason sen sangi. Sikrê N kontinua ku prubléma di saúdi, Jeová sénpri kuida di mi. Pur izénplu, na runion di kel fin di simana antis di N fika ta sabe ma N tinha kánser, nu pâpia di un artigu ku téma: ‘Enfrente com coragem os problemas atuais.’ c Kel artigu li konsola-m txeu. Nu le-l un monti bês. Artigus sima kel-li i faze kuzas sima bai pregason i sisti runion djuda-nu xinti pas déntu nos, kontinua ikilibradu i toma bons dizison.”

19. Kuzê ki ka ta dura ta ben kontise?

¹⁹ Ku ajuda di Jeová i di irmons na mundu interu nu sta ta vense situasons difísil i ta ten bon rezultadu na luta kóntra Satanás. (1 Ped. 5:8, 9) Abo tanbê bu pode konsigi faze kel-li. Ka ta dura, Jeová ta ben orienta Jizus ku kes ki ta governa djuntu ku el ‘pa disfaze óbras di Diabu.’ (1 João 3:8) Dipôs di kel-li, povu di Jeová ki ta sirbi-l li na Téra ‘ka ta ben xinti medu di nada, nen es ka ta ten motivu pa ten medu’. (Isa. 54:14; Miq. 4:4) Timenti kel dia ka txiga nu meste sforsa txeu pa vense nos medu.

20. Kuzê ki ta djuda-nu vense nos medu?

²⁰ Pa vense nos medu nu debe kontinua ta bira nos kunfiansa más fórti ma Jeová ta ama-nu i ma el ta proteje se sérvus. Pâpia di modi ki Jeová proteje se sérvus na pasadu i pensa na el ta djuda-nu faze kel-li. I nu pode lenbra na modi ki dja el djuda-nu pasa pa situasons difísil. Ku ajuda di Jeová nu pode vense nos medu. — Sal. 34:4.